ئەندامەكێ مەكتەبا سیاسی یا پارتی دیموكراتی كوردستان ڕاگەهاند: هەرێما كوردستانێ د قۆناغەكا هەستیار دایە و دبیت گوهۆڕین ل دەڤەرێ ڕوو بدەن، هەروەسا دیاركر كو هیچ كێشەیەك د ناڤبەرا پارتی دیموكراتی كوردستان و ئێكەتی نیشتمانی كوردستان دا نینە چارەسەر نەبیت و پێشتر ژی هەردو ئالی ڕێككەفتینە كو ڕێكێ ل دروستبوونا كێشەیێن دی بگرن.
سەربەست لەزگین، ئەندامێ مەكتەبا سیاسی یا پارتی دیموكراتی كوردستان و بەرپرسێ مەكتەبا ڕێكخستنا هەولێرێ یا پارتی گوت» هەرێما كوردستانێ د قۆناغەكا هەستیاردایە و دبیت گوهۆڕین ل دەڤەرێ ڕووبدەن، لەوما باشترین ڕێك ژی بۆمە ئەوە ل ناڤخوەیا خوە كێشە و ناكۆكیان چارەسەر بكەین و بەردەوام پێكڤەبین».
ل دۆر پەیوەندیێن د ناڤبەرا پارتی دیموكراتی كوردستان و ئێكەتی نیشتمانی كوردستان، سەربەست لەزگین دبێژیت» ئەو كێشەیێن كو ل پێشتر د ناڤبەرا هەردو حزبان دا هەبوون، ڕێككەفتن هاتیە كرن كو كێشەیێن نوو دروست نەكەین، ئەڤە ژی یا گرنگە بۆ ڤێ قۆناغێ». هەروەسا گوت ژی» هیچ كێشەیەك د ناڤبەرا پارتی و ئێكەتیێ دا نینە چارەسەر نەبیت».
پێشتر دەرباز كۆسرەت ڕەسول، ئەندامێ مەكتەبا سیاسی یا ئێكەتی نیشتمانی كوردستان د كۆنگرەیەكێ ڕۆژنامەڤانی دا گوتبوو» خوەشبەختانە د دەمێ بۆری دا دانوستاندنێن مە ل گەل پارتی هاتینە دەستپێكرن، مە شیایە هەتا ڕادەیەكی ل سەر كۆمەكا پرسان د هەڤڕابین».
گوتبوو ژی» ل گەل پارتی دیموكراتی كوردستان ل سەر چەند بابەتەكان ڕێككەفتینە و دخوازین ل بەغدا كۆدەنگیەكا كوردی هەبیت».

هەولێر، قائید میرۆ

شرۆڤەكارەكا سیاسی ئاماژە ب وێ چەندێ دكەت، سەركەفتنا پارتی دیموكراتی كوردستان دهەلبژارتنێن جڤاتێن پارێزگەهێن ئیراقێ دا سەركەفتنا هەموو كوردایە، ژ بەر كو پارتی دێ بەرگریێ ژ دەڤەرێن كوردستانی كەت و داخوازكر ل ڕۆژا 18/12/2023 كورد بچنە سەر سندۆقێن دەنگدانێ و هەستا خوە یا كوردینیێ بكاربینن بۆ ڤەگەڕاندنا دەستهەلاتا كوردی بۆ دەڤەرێن كوردستانی یێن ژ دەرڤەی ئیدارەیا هەرێما كوردستانێ.
ئاشنا بابان، شرۆڤەكارا سیاسی بۆ ڕۆژنامەیا (ئەڤرۆ) گوت» ڤەگەڕیانا پارتی بۆ مووسلێ و كەركووكێ د دەمێ نوكەدا یا گرنگە و دێ كاریگەری ل سەر ڕەوشا ئەوان دەڤەران هەبیت، چونكە هەلبژارتن دێ هێنە ئەنجامدان و هەكە ئەو هەلبژارتن جارەكێ بۆ ئیراقێ د گرنگ بن، ب دەهان جاران هند بۆ كوردان د گرنگن، چونكە پشتی شەڕێ داعشێ و ڕوودانێن ١٦ی ئۆكتۆبەرێ گوهۆڕین ب سەر ڕەوشا دەڤەرێن كوردستانی یێن ژ دەرڤەی ئیدارەیا حوكمەتا هەرێما كوردستانێ هاتینە و پشتی هەلبژارتنان هەكە كورد شیان ڕێژەیەكا مەزن یا دەنگان بدەستڤەبینن دێ دەستهەلات بۆ كوردان ڤەگەڕیت، لەوڕا ژی پێدڤیە دەنگدەرێن كورد ل هەموو ئەوان دەڤەرێن هەلبژارتن تێدا دهێتە ئەنجامدان بچنە سەر سندۆقێن دەنگدانێ و دەنگی بدەنە كوردان».
ئاشنایێ گوت ژی» ل ڕۆژا هەلبژارتنان پێدڤیە وەلاتیێن كورد دەستان ژ هەموو گازندەیێن خوە بەردەن و هەستا خوە یا كوردینیێ بكاربینن بۆ سەركەفتنا كوردان، هەتا كورد بشێن زۆرترین دەنگ بدەستڤەبینن و ڕۆل هەبیت ل پێكئینانا حوكمەتێن نافخوەیی ل پارێزگەهێن نەینەوا و كەركووكێ، دەنگێ كوردان پیڤەرە بۆ ڤەگەڕاندنا دەستهەلاتا كوردی و دشێم بێژم هەلبژارتنێن ئەڤێجارێ وەكو راپرسیەكێ یە بۆ دیاركرنا ڕێژەیا هەر پێكهاتەیەكی».
ئاشنا بابان ئاماژەكر» ئەركە بۆ دەنگدەرێن كورد پشكداریێ د پڕۆسەیا هەلبژارتنێن جڤاتێن پارێزگەهان دا بكەن، چونكە ئەم یێ ل هەمبەر قۆناغەكا دی ل ئیراقێ و زڤرینا بارەگەهێن پارتی ژی بۆ كەركووك و نەینەوا دێ زێدەتر دەستهەلاتێ دەتە كوردان و ڤەگەڕیانا پارتی ئانكو ڤەگەڕیانا كوردایە بۆ ئەوان دەڤەران، ژ بەر كو تنێ پارتی دشێت بەرگریێ ژ خەلكێ ئەوان دەڤەران بكەت و ژبلی پارتی چو ئالیێن دی نەشێن وەكو پێدڤی بەرگریێ ژ كوردان بكەن، ئەز باوەرم هەر دەمێ پارتی سەركەڤیت ئانكو كورد سەركەفتن، دەنگدان بۆ لیستەیا ١٩٧ یا پارتی دیموكراتی كوردستان ئەركەكێ نەتەوەیی و نیشتیمانی یە بۆ ڤەگەڕاندنا سەنگا كوردان، بەری نوكە خەلكێ ئەوان دەڤەران دەستهەلاتا پارتی تاقیكریە و دەركەفتیە هەر جهێ پارتی تێدا بیت ئەو جهەكێ سەقامگیر و ئارام و ئاڤەدانە و بەرۆڤاژی مەدیت پشتی ١٦ی ئۆكتۆبەرێ ئەو دەڤەرێن پارتی تێدا نەمای چو كارەسات ب سەرێ كوردان ئینان».

سوپاسالارێ بەرێ یێ ئیراقێ باس ل هێرشێن چەكداری بۆ سەر بنگەهێن ئەمریكا ل ئیراقێ و سووریێ دكەت و دبێژیت: سەرۆك وەزیرێن ئیراقێ كەفتیە بەردەم ئاستەنگێن گەلەك مەزن.
بابەكر زێباری، سوپاسالارێ بەرێ یێ ئیراقێ و شیرەتكارێ سەرۆكێ هەرێما كوردستانێ بۆ كاروبارێن لەشكری گوت» حوكمەتا ئیراقێ نەشێت هیچ ئێك ژ وان گرۆپێن چەكداری كونترۆل بكەت، نوكە گرۆپا نوجەبا و حزبوللا چو هزران بۆ سۆدانێ ناكەن، د بنەڕەت دا دبێژنێ مە تو كریە سەرۆك وەزیران، بێی مە ژی نەشێی چ تشتەكی بكەی».
گوت ژی» پێشبینیێ دكەم ئەمریكا بچیتە شەڕێ ڕاستەوخوە ل گەل ئەوان گرۆپان، هەكە نەچیت چارە نینە، شەڕەكە و یا تووشبوویێ و ل بەردەم دو ئەگەران دا نینە و ئەمریكا نوكە گرۆپ ژی دەستنیشان كرینە، ئانكو ئاخڤتنێن وەزیرێ بەرگریا ئەمریكی ل گەل سودانی د ڕۆهن بوون، كو یان ئەمریكا دێ ل گەل ئەوان گرۆپان چیتە شەڕەكێ ڕاستەوخوە، یان پێدڤیە حوكمەتا ئیراقێ بخوە وێ چەندێ بكەت، چونكە وەزیرێ بەرگریا ئیرانێ ب ڕاشكاوانە دبێژیت هێرشان ڕابگرن، ئەگەر نە مە مافێ بەرسڤدانێ دێ هەبیت».
بابەكر زێباری دیاركر ژی كو د ڕەوشا نوكە یا ئیراقێ دا هەموو پێشبینی دهێنە كرن و دبیت ژ نشكەكێڤە ئەو گرۆپە هێرشێ بكەنە سەر هێزێن ئەمریكی و بالیۆزخانەیا ئەمریكی، ل پشت ئەوان گرۆپان بڕیارا هەرێمایەتی هەیە، ئەڤە د كرێگرتی نە، مخابن ئەو دخوازن هەرێما كوردستانێ تێكهەلی د ئەڤی شەڕی بكەن، بەلێ خەلكێ كوردستانێ پشتڕاست دكەین كو ئەم د پاراستی نە و پێدڤیە سەرۆك وەزیرێن ئیراقێ بەرسڤا گەلەك پرسیاران بدەت».
ل دووماهیێ گوت» ڕاستە ئیراقێ هێز هەیە، بەلێ ڕادەستی سەركردایەتیا میلیشیان كریە و ڕۆل نەمایە، ب ڤی حالەتی پێشبینیێ دكەم هەكە ئەمریكا بچیتە دناڤ شەڕی دا، دێ هێزێن زێدەتر هنێریتە ئیراقێ».

سەرۆكێ نوونەرایەتیا حوكمەتا هەرێما كوردستانێ ڕاگەهاند، پەیوەندیێن د ناڤبەرا حوكمەتا هەرێما كوردستانێ و حوكمەتا فیدرال د ئاستەكێ باش دانە و هەردو ئالی ڕۆژانە ل سەر هێلێ نە بۆ وێ چەندێ كێشەیان چارەسەر بكەن، هەروەسا ل سەر پرسا پەترۆلێ و غازێ ژی هەردو ئالی گەهشتینە ڕێككەفتنێ، دو لژنەیێن تایبەت هاتینە پێكئینان بۆ بەرهەڤكرنا ڕەشنڤیسێ پڕۆژە قانوونا پەترۆل و غازێ.
فارس عیسا، سەرۆكێ نوونەرایەتیا حوكمەتا هەرێما كوردستانێ گوت» سەرۆكێ وەزیران مەسرۆر بارزانی بۆ چارەسەركرنا كێشەیا فەرمانبەرێن هەرێما كوردستانێ نامەیەك ئاراستەی محەمەد شیاع سۆدانی، سەرۆك وەزیرێن ئیراقێ كربوو، كو چەند خالان بخوەڤە دگریت، بۆ ئەڤێ مەبەستێ ژی سۆدانی لژنەیەك بۆ ڕاستڤەكرنا قانوونا بودجەی پێكئینایە».
ئاماژەكر» د سەرەدانا بەرێ دا یا شاندێ حوكمەتا هەرێما كوردستانێ بۆ بەغدا و كۆمبوون ل گەل ئالیێن سیاسی، هەموو ل گەل وێ چەندێ دا بوون كێشە بهێنە چارەسەركرن ب ڕێكا چارەسەریەكا قانوونی یا گونجای، چونكە هەرێما كوردستانێ زیاندارا سەرەكی یە ژ قانوونا بودجەی ژ ئەگەری خەرجیێن ڕاستەقینە».
سەرۆكێ نوونەرایەتیا حوكمەتا هەرێما كوردستانێ ل بەغدا دیاركر ژی» حوكمەتا هەرێما كوردستانێ یا بەرهەڤە بۆ هنارتنا پەترۆلا هەرێما كوردستانێ و هیچ كێشە نینە».
باس ل وێ چەندێ ژی كر» ژ ئەگەرێ سكالایەكا حوكمەتا ئیراقێ ل دادگەها پاریس ل سەر توركیا، هەتا نوكە توركیا و ئیراق نەگەهشتینە ڕێككەفتنێ ل سەر دوبارە هنارتنا پەترۆلێ».

بەربژارەكا لیستەیا 197 یا پارتی دیموكراتی كوردستان بۆ هەلبژارتنێن جڤاتا پارێزگەها نەینەوا دیاركر، دێ‌ ل جڤاتا پارێزگەها نەینەوا كار ژبۆ گەهاندنا پڕۆژەیێن خزمەتگوزارێ‌ بۆ هەموو دەڤەرێن سەر ب پارێزگەها نەینەوا ڤە كەین ب تایبەتی ژی بۆ گەهاندنا پڕۆژەیێن ساخلەمیێ‌ ودابینكرنا دەرمان و پێدڤیێن نوژداری.
ئەفراح حوسام كاكەیی، بەربژارا هەژمار 40 ل سەر لیستەیا 197 یا پارتی بۆ هەلبژارتنێن جڤاتا پارێزگەها نەینەوا گوت» ژێرخانەیا ساخلەمیێ‌ ل دەڤەرێن سەر ب پارێزگەها نەینەوا ڤە یا باش نینە وئەم دێ‌ ل جڤاتا پارێزگەها نەینەوا كاركەین بۆ ئەنجامدانا پڕۆژەیێن ساخلەمی و دابینكرنا دەرمان و پێدڤیێن نوژداری بۆ هەموو بنگەهێن ساخلەمیێ‌ یێن ل نەینەوا ب تایبەتی بۆ دەڤەرێن كوردستانی یێن ژ دەرڤەی ئیدارەیا هەرێما كوردستانێ‌، چونكو وەكو پێدڤی گرنگی ب دەڤەرێن كوردستانی نەهاتیە دان و دواری ساخلەمیێ‌ دا ئەم دێ‌ بزاڤێ كەین هەر تشتەكێ‌ پێدڤی بیت دێ بۆ خەلكێ‌ خوە ئەنجامدەین».
گۆت ژی» پارتی دیموكراتی كوردستان بەرنامەیەكێ‌ گەلەك مەزن دانایە بۆ خزمەتكرنا هەموو دەڤەرێن پارێزگەها نەینەوا وئەم دێ‌ كار كەین كو جوداهی د گەهاندنا پڕۆژەێن خزمەتگوزاری دا نەبیت وبۆ هەمی دەڤەران وەكهەڤی هەبیت «. هەروەسا دیاركر» ل جڤاتا پارێزگەها نەینەوا دێ‌ كار ل سەر چاڤدێریا دامو دەزگەهێن نەینەوا كەین بۆ بجهئینانا پڕۆژەیان و خزمەتكرنا وەلاتیان ودێ‌ ب هەموو شیانێن خوە كاركەین كو ب باشترین شێوە خزمەتا خەلكێ‌ نەینەوا بهێتە كرن».
ئاماژەكر» ل سەر بابەتێن تەناهیێ‌ وقەرەبووكرنا خەلكێ‌ زیاندار و ڕزگاربوویێن دەستێ‌ تیرۆرستێن داعشێ دێ‌ كار كەین ومە بەرنامەیەكێ‌ گەلەك باش د ڤی بواری دا هەیە وئاوارە ژی ڤەگەرنە سەر مالێن خوە وئاڤەدانی ل هەموو دەڤەران بهێتە كرن وپڕۆژەیێن گرنگ د وارێ‌ ئاڤێ‌ و كارەبێ‌ و ساخلەمیێ‌ و پەروەردێ‌ وچاندنێ دا بهێنە بجهئینان».

سەرۆك مەسعود بارزانی ل دۆر ئاگربەربوونا سۆران پەیامەك بەلاڤكر و دبێژیت» ب گوهلێبوونا دەنگوباسێ ناخهەژینێ ئاگربەربوونێ ل ئاڤاهیەكێ ئاكنجیبوونێ ل باژێرێ سۆران گەلەك خەمبار بووم، كو ب مخابنی ڤە د وێ ڕوودانێ دا هەژمارەكا وەلاتیان گیانێ خوە ژ دەستدا و هژمارەكا دی ژی بریندار بوون».
سەرۆك بارزانی د پەیاما خوە دا سەرەخوەشی ل كەسوكارێن قوربانیان دكەت و دبێژیت» خوە ب هەڤپشكێ خەما وان دزانم» هەروەسا دبێژیت» ژ خودێ مەزن دخوازم گیانێ قوربانیێن وێ ڕوودانا دلتەزین ب بەهشتێ شاد بكەت و سەبر و ئارامیێ ب مالباتێن وان ببەخشیت و شیفایا بلەز بۆ برینداران بدەت».

سەرۆكێ هەرێما كوردستانێ، نێچیرڤان بارزانی پەیامەكا بەهیداریێ ئاراستەی كەسوكارێن قوربانیێن ڕوودانا دلتەزینا یا سۆران دكەت و هیڤیا زوو چاكبوونێ بۆ برینداران خواست و بەرهەڤیا خوە نیشا دا بۆ هەر هاریكاریەكا پێدڤی بۆ برینداران.
سەرۆكایەتیا هەرێما كوردستانێ د بەیاننامەیەكێ دا دبێژیت» نێچیرڤان بارزانی، سەرۆكێ هەرێما كوردستانێ ب تەلەفۆنێ ل گەل هەلگورد شێخ نەجیب، سەرپەرشتێ ئیدارەیا سەربخوە یا سۆران ئاخڤت و ئیدارەیا سۆران و ئالیێن پەیوەندیدار ڕاسپاردن بۆ وەرگرتنا هەموو پێرابوونێن پێدڤی بۆ وێ چەندێ ڕوودانێن وەسا دلتەزین دوبارە نەبن».
ژ ئەنجامێ ئاگربەربوونێ ل ئاڤاهیەكی ل سۆران كو هەمژارەكا قوتابی، مامۆستا و وەلاتیێن ئاسایی تێدا د ئاكنجی بوون، 14 كەسان گیانێ خوە ژ دەستدا و چەند كەسێن دی ژی بریندار بوون.

سەرۆكێ حوكمەتا هەرێما كوردستانێ، مەسرۆر بارزانی بۆ دووڤچوونا ڕوودانا دلتەزین یا ئاگربەربوونێ ل ئاڤاهیەكێ ئاكنجیبوونێ ل سۆران، ب ڕێكا تەلەفۆنێ پەیوەندی ب هەلگورد شێخ نەجیب، سەرپەرشتێ ئیدارەیا سەربخوە یا سۆران كر.
مەسرۆر بارزانی، هەڤخەمیا خوە ل گەل كەسوكارێن قوربانیان دەربری و سەرپەرشتێ ئیدارەیا سۆران و دەزگەهێن پەیوەندیدارێن حوكمەتێ ڕاسپاردن هەر چ یا پێدڤیە بۆ هاریكاریا لێقەومیێن ڕوودانێ بكەن و ڤەكۆلینا هوور ل دۆر هۆكارێ ڕوودانێ بكەن، دووڤچوون ژی بۆ پێرابوونێن سلامەتیێ ل ئاڤاهی و جهێن گشتی و تایبەت بهێتە كرن.

ل دووماهی كۆمبوونا جڤاتا وەزیرێن هەرێما كوردستانێ ب سەرپەرشتیا مەسرۆر بارزانی، سەرۆكێ حوكمەتا هەرێمێ و ب بەرهەڤبوونا قوباد تالەبانی، جێگرێ سەرۆكێ حوكمەتا هەرێمێ، دبڕگەیەكا كۆمبوونێ دا دانوستاندن ل دۆر دوماهی پێشهاتێن پشكا بودجە و مووچەیێن هەرێما كوردستانێ هاتە كرن ل دۆر سەرەدانا شاندێ دانوستاندكارێ هەرێمێ بۆ بەغدا.
شاندێ دانوستاندكار ڕۆهنكرنێن پێدڤی بۆ جڤاتا وەزیران بەرچاڤكرن و تێدا ئاماژەكر كو سەرەرای دروستبوونا تێكگەهشتنەكا هەڤپشك ل بەغدا سەبارەت وێ چەندێ كو مووچەیێن فەرمانبەرێن هەرێمێ، شایستەیێن دارایی یێن فەرمانبەرانە و پێدڤیە ژ ناكۆكیێن سیاسی و پێگیریان بهێتە جوداكرن و پێدڤیە گۆژمەیێن پارەیێن د خشتەیێن بودجەی دا هاتین، وەكو خوە بهێنە مەزاختن و ب هیچ شێوەیەكی پیڤەرێ خەرجیێن ڕاستەقینە ل سەر نەهێنە بجهئینان و شایستەیێن دارایی یێن فەرمانبەران، تێكهەلی پرسێن سیاسی نەهێنە كرن.
شاندێ دانوستاندكار ئاماژە كر كو د دانوستاندنێن ڤێ دوماهیێ دا، ئەو چەندە بۆ شاندێ هەرێمێ هاتە بەرچاڤكرن، چارەسەریا بنەڕەتی یا ڤی بابەتی و كێشەیا مووچەیێن هەموو فەرمانبەرێن هەرێما كوردستانێ ناكەت كو مەهانە 944 ملیار دینارن و بۆ سالەكا دارایی زێدەتر ژ 11 ترلیۆن دینارانە، لەوما ئەوا بەغدا دكەت پێشێلكرنەكا ئاشكرا و بێ بهانەیە بۆ مافێن دەستووری یێن خەلكێ كوردستانی.
جڤاتا وەزیرێن هەرێمێ داخواز ژ حوكمەتا فیدرالی كر كو د نێزیكترین دەلیڤەدا، پڕۆژەیێ قانوونا ڕاستڤەكرنا قانوونا بودجەیا فیدرالی ل جڤاتا وەزیران پەسەند بكەت و ب هنێریتە جڤاتا نوونەران ب ئاراستەیا دابینكرنا مووچەیێن فەرمانبەرێن هەرێمێ وەكو د خشتەیێن قانوونا بودجەی دا هاتی دوور ژ پیڤەرێ خەرجیێن فعلی و ناكۆكیێن پەترۆلی و داهاتێن نە پەترۆلی. هەروەسا ل سەر ئاستێ سیاسی ژی پێدڤیە هەموو ئالیێن سیاسی یێن كابینەیا سودانی پێكئینای، پشتەڤانیا پڕۆژەیێ ڕاستڤەكرنا قانوونا بودجەی بكەن تاكو فەرمانبەرێن هەرێمێ هەڤشێوەیێ دەڤەرێن دی یێن ئیراقێ، مووچەیێن خوە ل دەمێ خوە وەربگرن و ئیدی نە دادپەروەری بەرامبەر فەرمانبەرێن هەرێمێ نەهێتە كرن و د چارچۆڤەیێ ڕێككەفتنان و قانوونا بودجەی دا، شایستەیێن دارایی یێن هەرێما كوردستانێ بهێنە هناترنن و ب ڕێكا وەزارەتا دارایی و ئابۆری ل هەرێما كوردستانێ مووچەیێن وان بهێنە دان.
ژ ئالیەكی دی ڤە، هەرێما كوردستانێ هەموو ئەركێن خوە بەرامبەر حوكمەتا فیدرالی بجهئیناینە و دەستەیا هەڤپشك یا هەردو دیوانێن چاڤدێریا دارایی یا فیدرالی و هەرێمێ، هووربینی و پێداچوون بۆ هەموو داهات و خەرجیان و میلاكێ فەرمانبەریێ ل هەرێمێ كریە، ژبلی وێ چەندێ ژی، هەرێمێ پێگیریا خوە یا پەترۆلی بەرامبەر وەزارەتا پەترۆلا فیدرالی بجهئینایە ب ڕێكا ڕادەستكرنا پەترۆلی بۆ بكارئینانا ناڤخوەیی، بەلێ حوكمەتا فیدرال، هیچ گۆژمەیەكێ پارەی بۆ كۆمپانیێن پەترۆلی خەرج نەكریە، لەوما هیچ بەهانەیەك بۆ حوكمەتا فیدرال نەمایە كو شایستەیێن دارایی یێن فەرمانبەرێن هەرێمێ خەرج نەكەت و حوكمەتا فیدرال تاكە بەربرسە ژ گیرۆبوونا مووچەیان.

بەربژارێ هەژمار 35 ل سەر لیستەیا 197 یا پارتی دیموكراتی كوردستان بۆ هەلبژارتنێن جڤاتا پارێزگەها نەینەوا ڕاگەهاند، دێ‌ ل سەر پلانێن ستیراتیژی و گرنگ بۆ خزمەتكرنا هەموو دەڤەرێن سەر ب پارێزگەها نەینەوا ڤە كار كەین ب تایبەتی ژی دۆسێیا وەبەرئێنانێ‌ وپەروەردێ ساخلەمیێ‌ وباژێرڤانیێ و ڕزگاربوویێن ژ دەستێ داعشێ وقەرەبووكرنا زیاندارێن نەینەوا و پێشڤەبرنا نەینەوا د هەموو بوارەكی دا.
ڕەفعەت سمۆ ، بەربژارێ هەژمار 35 ل سەر لیستا 197 پارتی بۆ هەلبژارتنێن جڤاتا پارێزگەها نەینەوا گوت» دێ‌ ل جڤاتا پارێزگەها نەینەوا ب ڕژدی ل سەر دۆسێیا چاڤدێریا دامودەزگەهێن حوكمەتێ‌ كاركەین بۆ وی چەندێ‌ ب باشترین شێوە بكەڤنە دخزمەتا هەموو خەلكێ‌ نەینەوا دا وبێ‌ جوداهی خزمەتا هەموو دەڤەران بهێتە كرن وبۆ بدەستڤەئینانا مافێن خەلكێ‌ كوردستانێ‌ ل هەموو دەڤەرێن سەر ب نەینەوا ڤە دێ كاركەین كو نەهێلین ستەم ل خەلكێ‌ كوردستانێ‌ بهێتە كرن و ل جڤاتا پارێزگەها نەینەوا دێ‌ بینە بەرگریكارێن ڕاستەقینە ژ مافێن دەنگدەرێن خوە».
ڕەفعەت سمۆی گوت ژی»دێ‌ بۆ بڕێڤەبرنا ئێدارەكا دروست بۆ ئاڤەدانكرنا نەینەوا كاركەین ب تایبەتی ژی د وارێن ساخلەمیێ‌ وپەروەردێ‌ و وەبەرئێنانێ‌ دا و دۆسێیا ئاوارەیان وئاڤەدانكرنا هەموو دەڤەرێن كوردستانی دەست پێ‌ بكەت و دەلیڤەیێن كاركرنێ‌ بۆ گەنجان پەیداببن».
زێدەتر گۆت» هەروەسا دێ كار كەین بۆ نەهێلانا ئاریشەیا ئاكنجیبوونێ‌ ب ڕێكا پڕۆژەیێن وەبەرئێنانێ‌ ودێ‌ كار كەین پڕۆژەیێن ئاكنجیبوونێ‌ بهێنە دروستكرن وخەلكێ‌ مفاداربیت وئاڤەدانێ دەست پێ‌ بكەت وخەلكێ‌ زیاندار بهێنە قەرەبووكرن «.
ئاماژەكر» پارتی دیموكراتی كوردستان هەردەم خزمەتا وەلاتیان دكەت بێی جوداهیێ‌ ل هەموو دەڤەران لەورا ژی خەلكێ‌ نەینەوا دێ‌ دەنگ ب لیستەیا 197 دەن ژ بەر كو لیستەیا پارتی لیستەیا ئاڤەدانی وئاشتیێ‌ و پێكڤەژیانێ‌ یە».
خویاكر» دێ‌ ل جڤاتا پارێزگەها نەینەوا گەلەك گرنگیێ‌ ب ئاڤەدانكرنا شنگالێ و زڤرینا ئاوارەیێن شنگالێ‌ دەین ودێ‌ كار كەین بۆ ئاڤەدانكرنا گوندێن شنگالێ ب تایبەتی ژی ( گوندێ كۆچۆ) ئەوژی گوندەكێ‌ نوو ب ڕەخ گوندێ‌ كۆچۆ بهێتە ئاڤاكرن وهەموو پڕۆژەیێن خزمەتگوزارێ‌ ل دەڤەرا شنگالێ‌ بهێنە بجهئینان ومە پلانەكا مەزن بۆ خزمەتكرنا خەلكێ‌ خوە ل نەینەوا هەیە ودێ‌ كار ل سەر بجهئینانا پلان وبەرنامەیێن پارتا خوە كەین بۆ خزمەتكرنا وەلاتیان».