ئه‌ڤرۆ نيوز، نيوار محه‌مه‌د سه‌ليم:

لژنا دووڤچوونا بازارى ل قايمقاميا قه‌زا دهۆكێ راگه‌هاند كو ئه‌وان ئه‌ڤرۆ سه‌ره‌دانا چه‌ندين جهان كريه‌ و د سه‌ره‌دانێن خوه‌ دا هه‌ردو خوارنگه‌هێن دادێ و بابۆ بۆ ماوێ سێ رۆژان داخستن و ب گۆژمه‌كێ پاره‌ى سزادان.

به‌رپرسێ لژنا دووڤچوونا بازارى خۆيا كر كو لژنا دووڤچوونا بازارى ل قايمقاميا قه‌زا دهۆكێ ئه‌ڤرۆ 24ى خزيرانا 2018ێ سه‌ره‌دانا چه‌ندين خوارنگه‌هـ و كافتريا و گۆشفرۆشان كر.

يوسف محه‌مه‌د حه‌سه‌ن، به‌رپرسێ لژنا دووڤچوونا بازارى ئاشكه‌را كر كو دڤێ گه‌ريانێ ب پشكداريا هژماره‌كا رێڤه‌به‌ريان لژنا دووڤچوونێ شيان دو خوارنگه‌هان ب ناڤێ “دادێ و بابۆ” ژ به‌ر پێگرينه‌كرن ب رێنمايێن ساخله‌ميێ بۆ ماوێ سێ رۆژان بهێنه‌ دايخستن و ب گۆژمه‌كێ پاره‌ى بهێنه‌ سزادان.

ئەڤرۆ نیوز ، نەوزاد ھلۆری:

ب مەرەما ھوشیارکرنا وەلاتیان ژ روودانێن خەندقینێ ، ئەنجامدانا مەلەڤانیان لسەر ھەردوو رووبارێن ئاڤا شین و زیێ مەزن ل سنوورێ ناحیا شێلادزێ و ناحیا دێرەلوک یا سەر ب قەزا ئامێدیێ ھاتە قەدەغەکرن.

ھەوار رێکانی خودانێ ھاڤینگەھا ڤین ل شێلادزێ بو ئەڤرۆ نیوز گۆت: (ب گورەی رێنمایێن بەرەڤانیا باژێری و لایەنێن شولەژێ کو ئەم ئاگەھدارکرینە ل بارا ھوشیارکرنا وەلاتیان لسەر ئەنجامدانا مەلەڤانیان لسەر رووبارێ زێ مەزن ، مە پێرابوونێن ھوشیارکرنا وەلاتیان ھاڤێتن و ئەڤرۆ وێڤە ئەنجامدانا مەلەڤانیان و خوە ھاڤێتنا د رووباری دا لسەر پرا ڤین ب ھەموو شێوەیان ھاتە قەدەغەکرن و یپێدڤی یە وەلاتی گیانێ خوە ب پارێزن و ل ھەموو جھان خوە نەڤێژن رووباری).

زێدەتر گۆت: (ژبلی کو لسەر رووبارێ زێ مەزن مەلەڤانی لسەر رووبارێ ئاڤا شین ژی ھاتیە قەدەغەکرن و مە وەکو ھاڤینگەھا ڤین ب پێدڤی زانی کو نیشانێن ھوشیارکرنا مەلەڤانیان ژی بدانین ب تایبەتی بو گەشتیاران چونکی شارەزایی ل رووبارێن دەڤەرێ نینن و د ئەنجامێ مەلەڤانیان د حەندقن و بەری چەندەکێ ژی ھەند کەس ژ ئەنجامێ نە شارەزایێ خەندقینە).

ئەو جھێن کو ھاتنە قەدەغەکرن بو مەلەڤانیان چەند جھەکن ژ وانان ل خوار پرا کڤانیا دێرەلوک ، ل تەنشت پرا گوندێ ھاریکا ، ل نێزیک خارنگەھا بەروی ، و ل ئاڤا مارک ل دەڤەرا نێروەورێکان ، و ل ھاڤینگەھا ڤین ل ناحیا شێلادزێ ، چونکی مەترسیەکا ئێکسەر بو سەر گیانێ وەلاتیان ھەیە و پێشتر چەندین کەس ل وان جھان خەندقینە.

ئەڤرۆ نيوز:‏

بەرپرسێ پەیوەندی و راگەھاندنا بەرەڤانیا باژێرێ دھۆکێ بۆ رۆژناما ئەڤرۆ دیار کر کو ‏گەلەک ژ وان کەسێن د بەنداڤ و رووباران دا دخەندقن، ئەون یێن د دەمێ مەلەڤانیکرنێ دا ‏دکەڤنە تۆڕ و شۆکێن ماسیگران و نەشێن خوە ژێ قورتال بکەن و تێڕا دمیننە ئاسێ و ‏دخەندقن.‏

رائید بێوار عەبدولعەزیز، بەرپرسێ پەیوەندی و راگەھاندنا بەرەڤانیا باژێرێ دھۆکێ ‏ئاشکرا ژی کر، کارێ تیمێن وان ئەوە دەمێ گەشتیار قەستا سەر ئاڤێ دکەن و ئێک بکەڤیتە ‏د ئاڤێ دا تیمێن وان بشێن قورتال بکەن یان لێگەڕیانێ ل تەرمەکی د ئاڤێ دا بکەن و ژ ‏ئاڤێ بیننە دەر و گۆت: “گەلەک جاران ژ بەر وان تۆڕ و شۆکێن د ئاڤێ دا دمینن نقۆمڤانێن ‏مە کەفتی نە تێدا و خوە ژێ قورتال کریە، لێ ئەو کەسێن دچیتە مەلەڤانیا نەشێن خوە ژ ‏تۆرا ماسیا قورتال بکەن و دێ خەندقن”.‏

گۆتژی: “مە گەلەک تەرم د ئاڤێ ئیناینە دەر پێ وان کەفتی یە د تۆڕێ یان شۆکێ دا و ئێک ‏ژ وان ل بەنداڤا دھۆکێ و ئێک ل زاخۆ ب ڤی شێوەی مە حالەت ھەبووینە، ژ بەر ھندێ ‏ئەم داخوازێ ژ خەلکی و ماسیگران دکەین کو ژ ھاڤێتا تۆرێن ماسیا ھشیار بن و تۆڕ و ‏شۆکێن خوە د ئاڤێ دا نەھێلن و پرتێن تەنەکا نەھاڤێنە د ئاڤێ دا، چونکی ئەڤە ‏خەلەتیەکا مەزنە و مەترسیە ل سەر گیانێ خەلکەکی و دڤێت ئەو کەسێن مەلەڤانیا دکەن ‏ھشیاری وان جھان بن”.‏

دیسا رائید فیراس یاسین، بەرپرسێ پشکا پەیوەندی و راگەھاندنا بەرەڤانیا باژێری ل قەزا ‏ئاکرێ بۆ ئەڤرۆ خویا کر کو گەلەک ژ وان کەسێن دچنە سەر ئاڤێ ب مەرەما ماسیگرتنێ ‏تۆڕێن خوە د ئاڤێ دا دھێلن یان ھندەک جاران لێ بەرزە دبن، ئەڤە ژی دبیتە ئەگەر کو ‏مەترسی ل سەر ژیانا وان کەسێن مەلەڤانیا دکەن پەیدا ببیت، دیسا کارێ تیمێن نقۆمڤانان ‏ژی ب زەحمەتر لێ دھێت و گۆت: “جارەکێ نقۆمڤانەکێ مە کەفتە د تۆڕەکا ماسیا دا، لێ ‏وان کەلوپەلێن پێدڤی ل گەل ھەنە کو بشێن خوە ژێ قورتا بکەن، لێ خەلکێ مەدەنی ‏بکەڤیتێ دێ خەندقیت و نەشێت دەرکەڤیت”. ‏

رائید فیراس ئاماژە ب وێ چەندێ ژی کر، ھەتا نوکە سێ پشکا وان کەسێن دکەڤنە د ئاڤێ ‏دا ئەون کو د تۆڕێن ماسیا دا دمیننە ئاسێ و دخەندقن و گۆت: “ئەم داخوازێ ژ وان ‏کەسان دکەین ھەکە تۆڕێن وان ژ دەستا چوونە دەر بلا مە ئاگەھدار بکەن، داکو ژ ئاڤێ ‏بیننە ژ دەرڤە و مەترسی ل سەر ژیانا وەلاتیان نەمینیت و مە تابلۆیێن ئاگەھداریێ ل وان ‏جھان داناینە، داکو ھشیاری وان جھان بن”.‏