ئه‌ڤرۆ نيوز، فاتما مزوورى:

مالباتا حسێن په‌ناهی راگه‌هاند كو بریار بوو رۆژا پێنجشه‌میێ رامین حسێن په‌ناهی بهێته‌ بدارڤه‌كرن، به‌لێ ب سه‌ده‌ما نه‌رازیبوونا وه‌لاتیان ل به‌ر ده‌ریێ گرتیگه‌ها سنه‌، جێبجێكرنا وی سزايى هاتیه‌ پاشخستن.

برایێ رامین حسێن په‌ناهی، ئە‌مجه‌د حسێن په‌ناهی ژ رووداو را‌ راگه‌هاند كو شه‌ڤا چارشه‌میێ هژماره‌كا‌ وه‌لاتیان ژ بۆ ده‌ما دو ده‌مژمێران و ژ ده‌مژمێر 10 هه‌تا 12ێ شه‌ڤ ل دژی بجیكرنا سزايێ بدارڤه‌كرنا رامین حسێن په‌ناهی، ل به‌ر زیندانا سنه‌ نه‌رازیبوون نیشان دان و داخوازا هه‌لوه‌شاندنا وێ بریارێ كرن، ژ به‌ر ڤێ یه‌كێ، بجیكرنا سزايێ رامین هاته‌ پاشخستن.

ئه‌مجه‌د حسێن په‌ناهی گۆت: “د ده‌ما برێڤه‌چوونا وێ كۆمبوونا نه‌رازیبوونێ دا‌ ئالۆزی ده‌ركهف‌تیه‌ و هه‌ری كێم سێ چالاكڤانێن سڤیل يێن سنه‌ ژ ئالیێ هێزێن ئەوله‌كاریێ یێن ئیرانێ ڤه‌ هاتنه‌ گرتن”.

ژ ئالیه‌كێ دن ڤه‌، بابێ رامین حسێن په‌ناهی د تۆماره‌كا‌ ڤیدیۆیی دا راگه‌هاندیه‌ كو هێزێن ئەوله‌كاری ئەو نه‌چار كریه‌ كو ل به‌ر كامیرایێ ل دژی چالاكیێن سیاسی یێن كورێن خوه‌ باخڤيت.

ئه‌مجه‌د حسێن په‌ناهی هه‌روه‌سا دبێژيت: “رۆژا سێشه‌میێ هێزێن ئیتیلاعات یا ئیرانێ ب سۆزا كو دێ رامین ئێ كورێ خوه‌ ببینه‌، بابێ وان ب خوه‌ ره‌ بۆ جهه‌كی نه‌دیار برنه‌ و ب گه‌فان ژ وی را گۆتنه‌ كو ئەگه‌ر ل دژی چالاكیێن سیاسی یێن كورێ خوه‌ باخڤيت رامین ناهێته‌ سێداره‌دان.

ب گۆتنا ئە‌مجه‌د، هێزێن ئەوله‌كاریێ یێن ئیرانێ دخوازن وان گۆتنێن بابێ وان د فیلمه‌كێ‌ به‌لگه‌یی یا ل دژی رامین دا‌ ب كار بینن كو ل سه‌ر چالاكیێن رامین و مالباتا حسێن په‌ناهی دهێته‌ چێكرن.

بابێ رامین حسێن په‌ناهی ژی د داخویانیه‌كێ دا‌ گۆتیه‌: گه‌له‌ك جاران ئەو ژ ئالیێ هێزێن ئیرانێ ڤه‌ هاتیه‌ نه‌چاركرن كو به‌رۆڤاژى خواسته‌كا خوه‌ باخڤيت‌.

رۆژا سێشه‌میێ 19ێ خزیرانێ ل هه‌ولێرێ ژی چالاكیه‌ك ل دژی بریارا سێداره‌دانا رامین حسێن په‌ناهی ل به‌ر ده‌ریێ ئوفیسا نه‌ته‌وێن یه‌كگرتی هاتبوو سازكرن.

ئه‌ڤرۆ نيوز، فاتما مزوورى:

هه‌ڤسه‌رۆكێ كۆما جڤاكێن كوردستانێ راگه‌هاند كو توركيا ئه‌و له‌شكر نينه‌ ل سه‌ر ئه‌ردى شه‌رێ په‌كه‌كێ بكه‌ت.

جه‌ميل بايك، هه‌ڤسه‌رۆكێ كۆما جڤاكێن كوردستانێ، د داخۆيانيه‌كێ دا بۆ رۆژنامه‌كا نێزيكى په‌كه‌كێ ده‌رباره‌ى ئۆپه‌راسيۆنا قه‌نديلى گۆت: “ده‌وله‌تا توركيا ئه‌و هێز نه‌مايه‌ كو له‌شكرێ وێ بشێت ل سه‌ر ئه‌رد شه‌رێ چه‌كدارێن په‌كه‌كێ بكه‌ت”.

زێده‌تر گۆت: “سه‌رۆك كۆمار يان سه‌رۆك وه‌زير چه‌ند داخۆيانيان ژى بده‌ن، ئيرادا له‌شكرێ توركيا نه‌مايه‌ و ئه‌و نه‌شێت ل سه‌ر ئه‌ردى شه‌رێ گه‌ريلايان بكه‌ت”.

خۆيا ژى كر كو توركيا بوويه‌ خودان هنده‌ك شيانێن ته‌كنيكى ب رێيا وان خوه‌ ل سه‌ر پيان گرتيه‌ و بزاڤێ دكه‌ت شه‌رى بكه‌ت، “فرۆكێن وان بۆمبان دبارينن و هنده‌ك له‌شكرى دداننه‌ وان جهێن بۆمبه‌ باران دكه‌ن”.

هه‌ڤسه‌رۆكێ كۆما جڤاكێن كوردستانێ ئاماژه‌ ب وێ چه‌ندێ ژى كر كو توركيا ئێك دو گر يێن ل سنورێ چه‌لێ و گرێ لێليكانێ ل هه‌رێما برادۆست گرتى و ئالايێ خوه‌ يێ لێداى و گۆت: “به‌لێ وێ ئه‌و هێز نينه‌ كو هه‌رێمه‌كێ كونترۆل بكه‌ت”.