ئه‌ڤرۆ نيوز:
ل گۆر ده‌نگوباسه‌كێ مالپه‌رێ حوكمه‌تا هه‌رێما كوردستانێ د كومبوونا ئه‌ڤرۆ يا جڤاتا وه‌زيران دا كو سه‌رۆك وه‌زيرين هه‌رێمێ ژى ئاماده‌بوو، رێباز حه‌ملان وه‌زيرێ دارايى و ئابوورى دياركريه،كو وه‌زاره‌تا وان يا پابه‌نده ب پرۆسا به‌لاڤكرنا مووچان و ئاشكرا كر حه‌فتيا بهێت دێ ده‌ست ب به‌لاڤكرنا مووچان كه‌ن.
ئه‌ڤرۆ نیوز ، نه‌وزاد هلۆرى:
پشتى كو لژنا موه‌لیدان ل پارێزگه‌ها دهۆكێ و لایه‌نێن شوله‌ژێ خشته‌یێ بهایێ كاره‌با موه‌لیدان بۆ هه‌یڤا گولانێ به‌لاڤكرى ، ل باتیفا بهایێ زێده ژ وه‌لاتیان هاته وه‌رگرتن.
حه‌مید ره‌مه‌زان، وه‌لاتیه‌كێ تاخێ شیلانه ل باتیفا بۆ ئه‌ڤرۆ نیوز گۆت: (ل چه‌ند رۆژێن بۆرى لیژنا موه‌لیدان ل پارێزگه‌ها دهۆكێ خشته‌یێ بهایێ پارێ كاره‌با موه‌لیدان بۆ هه‌یڤا پێنج به‌لاڤكر و بهایێ هه‌ر ئه‌مپێره‌كێ ل ناحیا باتیفا پێنج هزار و 750 دینار بوون ، به‌لێ موه‌لیدان باتیفا بۆ هه‌ر ئه‌مپێره‌كێ حه‌فت هزار و 500 دینار وه‌رگرتینه، ئانكو بۆ هه‌ر ئه‌مپێره‌كێ هزار و 750 دینار زێده هاتینه وه‌رگرتن).
زێده‌تر گۆت: (وه‌رگرتنا پارێ زێده ل باتیفا بوویه جهێ نه‌رازیبوونا وه‌لاتیێن ده‌ڤه‌رێ و پێدڤى بوو كێمتر هاتبایه وه‌رگرتن نه‌كو زێده‌تر ، ئه‌م دخوازین كو ئه‌ڤ بابه‌ته ب زووترین ده‌م بهێته چاره‌سه‌ركرن).
ژلایێ خوه‌ڤه به‌شیر محه‌مه‌د، ئه‌ندامێ لژنا بلند یا موه‌لیدان ل پارێزگه‌ها دهۆكێ بۆ ئه‌ڤرۆ نیوز گۆت: (به‌لێ راسته و مه ئاگه‌هى لێ هه‌یه كو پارێ زێده ل باتیفا ژ وه‌لاتیان هاتیه وه‌رگرتن و ئه‌ڤ یه‌ك ژى دزڤریت بۆ كێشه‌یه‌كا ته‌كینكى د كونوسێ پسولا موه‌لیدان ، و ئه‌و پارێ زێده كو ئه‌و ژى هزار و 750 دینارن ، ئه‌و ژبه‌ر برینا ده‌ینێ موه‌لیدان بوو ل سه‌ر وه‌لاتیان كو به‌رى نها ژلایێ وه‌لاتیان ڤه نه‌هاتبوو دان و نها بهایێ درۆست یێ ئه‌مپێرێ كاره‌با موه‌لیدان ل باتیفا هه‌ر پێنج هزار و 750 دینارن ، به‌لێ هزار و 250 دینار قه‌رێ موه‌لیدان ژ وه‌لاتیان هاتیه وه‌رگرتن و تنێ 500 دینار زێده‌یه و ئه‌و ژى دێ بۆ وه‌لاتیان دوباره هێته ڤه‌گه‌راندن).
ئه‌ڤرۆ نیوز:
رۆژنامه‌ڤانێ رووسی یێ دژی ده‌ستهه‌لاتا پۆتینی پشتی كوشتنا وی هاتییه راگه‌هاندن و به‌هی ژی بۆ هاتییه دانان ئه‌ڤرۆ ژ نشكه‌كێ ڤه د پرێسكۆنفرانسه‌كی دا ساخ و سه‌لیم دیار بوو، ئوكراینا ژی ئاشكرا كر كو تیرۆركرنا وی یا ساخته بوو و وان بمه‌ره‌ما هه‌لوه‌شاندنا پیلانه‌كا كوشتنا وی ژ ئالیێ رووسیا ڤه ئه‌و یه‌ك كربوو.
به‌ری بیست و چوار ده‌مژمێران ئوكراینا وه‌سا راگه‌هاندبوو كو ئه‌ركه‌دی باچێنكۆ، ل كیێڤ هاتییه تیرۆركرن و مۆسكۆ ب كوشتنا وی سووچبار كر، لێ پاشی د پرێسكۆنفرانسه‌كی دا دیاربوو، رۆژنامه‌ڤانان ژی ب حێبه‌تی ڤه ته‌ماشه كر و ده‌ست بۆ قوتان.
باچێنكۆ گۆت: ئه‌ز یێ بسلامه‌تم و ئه‌ڤا چێبووی یا چێكری بوو دا پیلانگێرییه‌كا رووسیا ل سه‌ر كوشتنا من ئاشكرا بكه‌ن و ژناڤ ببه‌ن.
رووسیا هه‌ر زوو ئه‌و گاڤا ئوكراینا شه‌رمزار كر و ب ئازراندنه‌كا دژی مۆسكۆ ناڤ كر، هه‌ڤده‌م رێكخستنا په‌یامنێرێن بێسنۆر ژی كوشتنا ساخته یا پاچێنكۆ ب “لبه‌ربه‌رزه‌كرنه‌كا ئاستنزم و نه‌دجهێ خوه دا” ناڤكر.
ئەڤرۆ نیۆز، رێوار مزیری:
رێڤەبەرێ کارگێریا نەخۆشخانا ئازادی ل دھۆکێ بۆ ئەڤرۆ نیۆز دیار کر کو ئەو کەسێ ئەکرەم کۆنفۆیی ل شەڤا 22 ی گۆلانا سالا2018ێ ب ناڤێ (کەمال رەمەزان) د ژیێ 35 سالیێ دا بریندارکری ئەڤرۆ رۆژا 30 گۆلانا سالا2018ێ گیانێ خوە ژ دەست دا.
نزار سالح، رێڤەبەرێ کارگێریا نەخۆشخانا ئازادی ل دھۆکێ ئاشکرا کر کو پشتی ئەکرەم کۆنفۆیی کورمەتێ خوە یێ ب ناڤێ (کەمال رەمەزان) بریندارکری و بۆ دەمێ نەە رۆژان د ھۆلا چاڤدێریا چر ڤە ل بن چاڤدێریا نۆشداران ڤە مای و نیشتەرگەریەک بۆ ھاتیە ئەنجامدان ئەڤرۆ رۆژا 30/5/2018ێ گیانێ خوە ژ دەست دا.
ژ ئالیێ خوە ڤە ھێمن سلێمان، بەرپرسێ پشکا پەیوەندی و راگەھاندنێ ل رێڤەبەریا پۆلیسێن پارێزگەھا دھۆکێ بۆ رۆژناما ئەڤرۆ دیار کر کو پشتی ئەکرەم کۆنفۆیی ئەڤ تاوانە ئەنجامدایی بۆ جھەکێ نەدیار رەڤیە و ھەتا نوکە نەھاتیە دەستەسەرکرن، بەلێ دووڤچوون ژ ئالیێ پۆلیسان ڤە بۆ دەستسەرکرنا وی یا بەردەوامە.
.
ئه‌ڤرۆنيوز:
به‌رپرسێ فه‌رمانگه‌ها په‌يوه‌نديێن ده‌رڤه ل حوكمه‌تا هه‌رێما كوردستانێ ئاشكراكر، پێدڤيه به‌غدا ده‌ستپێكه‌كا نوو ده‌ستپێ بكه‌ت وپێدڤيه حوكمه‌تا نوو يا عيراقێ ژى پرسا دستوورى وبودجه‌ى وپێشمه‌رگه‌ى وزمانى وهه‌موو كێشێن ل گه‌ل هه‌رێما كوردستانێ چاره بكه‌ت.
فه‌لاح مسته‌فا، به‌رپرسێ فه‌رمانگه‌ها په‌يوه‌نديێن ده‌رڤه ل حوكمه‌تا هه‌رێما كوردستانێ بۆ پێگه‌هێ ” euractiv” گۆت” خالا سه‌ره‌كى ل دۆر حوكمه‌تا نوو يا به‌غدا ئه‌وه كو ب هه‌مان عه‌قلێ پێشتر هزر نه‌كه‌ت ومه‌نه‌ڤێت بريارا پێشوه‌خت بده‌ين، به‌لێ وه‌سا هزر دكه‌ين كو پتريا وان هه‌مان خواستا مه يا هه‌ى دئاشتيێ وئاراميێ سه‌قامگيريا ره‌وشا ئه‌منى يا عيراقێ وكار دكه‌ن بۆ به‌رژه‌وه‌نديا عيراقێ ب هه‌رێما كوردستانێ ڤه، له‌وما پێدڤيه ئه‌و حوكمه‌ته نامه‌يه‌كا دروست بۆ كورد وتوركمان ومه‌سيحى وئێزدى وسونه وشيعان ب هنێريت، كو هه‌موو دهه‌ڤپشكن دوه‌لاتى دا”.
فه‌لاحى زێده‌تر گۆت” بۆ مه وه‌كو كوردستان، چه‌ندين پرس يێن هه‌ين كو پێدڤيه بهێنه چاره‌كرن، وه‌كو بجهئينانا دستوورى ب تمامى ودانانا ميكانيزمه‌كا هه‌ڤپشك دبه‌لاڤكرنا بودجه‌ى وپشكا كوردستانێ وپرسا پێشمه‌رگه‌ى وزمانى، دده‌مه‌كى دا رێگرى ل خه‌لكێ كوردستانێ دهێته كرن ببنه خودان ده‌وله‌تا خوه، پێدڤيه رۆل دعيراقێ وسياسه‌تا وه‌لاتى دا هه‌بيت، پێدڤيه ئه‌و باوه‌ريێ دروست بكه‌ن وده‌ستپێكه‌كا نوو دروست بكه‌ن”.
ل دۆر پرسا هه‌لبژارتنان ژى، فه‌لاح مسته‌فا دبێژيت” هه‌لبژارتنێن 12 ئه‌يارێ دو خالين جودا ژێ ده‌ركه‌فتن ئه‌وژى هاتنا خوار يا ئاستێ پشكداريا ده‌نگده‌ران وسه‌ركه‌فتنا موقته‌دا سه‌در كو دپێشبينيا كه‌سێ دا نه‌بوو.
ئه‌ڤرۆنيوز:
په‌يڤدارێ پارتى ديموكراتى كوردستان درۆهنكرنه‌كێ دا راگه‌هاند كو پارتى ب شێوه‌كێ فه‌رمى دبه‌يانناما مه‌كته‌با سياسى دا دياركريه كو گومان ژ ئه‌نجامێن هه‌لبژارتنان يا هه‌ى وغه‌دره‌كا مه‌زن يا ل پارتى هاتيه كرن.
ئه‌ڤرۆ چارشه‌مبى 30/5/2018 مه‌حموود محه‌مه‌د، په‌يڤدارێ پارتى رۆهنكرنه‌ك به‌لاڤكر وتێدا دبێژيت” پشتى راگه‌هاندنا ئه‌نجامێن پرۆسا هه‌لبژارتنێن جڤاتا نوونه‌رێن عيراقێ،نيگه‌رانى وگومان ژئه‌نجامێن وان به‌لاڤبوو، مه ژى وه‌كو پارتى ديموكراتى كوردستان ب شێوه‌كێ فه‌رمى دبه‌يانناما مه‌كته‌با سياسى دا دياركر كو مه گومان ژ ئه‌نجامان يا هه‌ى وغه‌دره‌كا مه‌زن ژى يا ل پارتى هاتيه كرن، له‌وما ڤه‌ره‌ڤاندنا هه‌موو گومان نه‌رازيبوونا لايه‌نان ب باشى دزانين كۆمسيۆنا هه‌لبژارتنان دچارچۆڤێ قانوونێ دا كارێ پێدڤى ئه‌نجام بده‌ت”.
په‌يڤدارێ پارتى دياركر كو هه‌ر برياره‌ك بهێته دان ب رێيا قانوونى بۆ هژمارتنا ده‌نگان ب ده‌ستى، بۆ مه‌ره‌ما ڤه‌گه‌راندنا باوه‌ريا لايه‌نێن سياسى وده‌نگده‌ران، ئه‌و ب باشى دزانن وپشته‌ڤانيێ لێ دكه‌ن.
ئاشكراكر ژى كو پارتى ديموكراتى كوردستان بريارا جڤاتا نوونه‌رێن عيراقێ كو ب تنێ ئه‌نجامێن هه‌رێما كوردستانێ وكه‌ركووكێ ره‌ت دكه‌ت، ب برياره‌كا سياسى دزانيت وره‌ت دكه‌ت.
ئەڤرۆ نیوز ، زنار تۆڤی :
كۆمسیۆنا بلند یا هه‌لبژارتنان ل عێراقێ ئه‌نجامێن پتری 1000 وێستگه‌هێن ده‌نگدانێ ل ناڤ و ده‌رڤه‌ی عێراقێ ره‌تكرن، هەروەسا 400 ژ وان وێستگەهان ل هه‌رێما كوردستانێ نه.
لدووڤ راپۆرته‌كا كۆمسیۆنا بلندا سه‌ربەخۆ یا هه‌لبژارتنان ل عێراقێ ، کو ئه‌نجامێن 954 وێستگه‌هێن ده‌نگدانا تایبه‌ت و مه‌رجدار ل عێراقێ، هاتینه ره‌تكرن ، دیسا 400 ژ وان ل پارێزگه‌هێن هه‌ولێر ، سلێمانی و دهۆكێ نه.
لدووڤ راپۆرتا كۆمسیۆنێ، ژ وان وێستگه‌هێن هه‌رێما كوردستانێ یێن كو هاتینه ره‌تكرن ، 224 ل پارێزگه‌ها دهۆكێ نه، 96 ل سلێمانیێ و هه‌روه‌سا 80 ل هه‌ولێرێ نە.
دیسان 186 وێستگه‌هـ ل كه‌ركووكێ، 23 ل به‌غدا، 47 ل سه‌لاحه‌ددین، 196 ل نه‌ینه‌وا هاتینه ره‌تكرن.
كۆمسیۆنێ دیاركریه ، کو 67 وێستگه‌هێن ده‌نگدانێ ل ده‌رڤه‌ی وه‌لاتی ژی هاتینه ره‌تكرن، ژ وان، ده‌هـ ل ئه‌لمانیا، 22 ل ئوردن، 31 ل ئه‌مریكا، دوو ل سوێد و هه‌روه‌سا دوو وێستگه‌هـ ل توركیا و بریتانیا.
ئه‌ڤرۆنيوز:
پارتى ديموكراتى كوردستان ئه‌ڤرۆ چارشه‌مبى 30/5/2018 وه‌كو ئێكه‌مين قه‌وارێ سياسى يێ كوردستانێ ناڤێ خوه بۆ هه‌لبژارتنێن په‌رله‌مانێ كوردستانێ كو برياره ل 30 ئه‌يلولێ بهێنه ئه‌نجامدان، ل كۆمسيۆنا بلند يا هه‌لبژارتن وراپرسى ل هه‌رێما كوردستانێ تۆماركر.
خسرۆ گۆران، به‌رپرسێ ده‌زگه‌هێ هه‌لبژارتن يێ پارتى ديموكراتى كوردستانێ دكۆنگره‌كێ رۆژنامه‌ڤانى دا راگه‌هاند” پارتى دێ پێگيريێ ب هه‌موو رێنما وقانوونێن كۆمسيۆنێ بيت، چ ب ده‌ستى ئه‌نجامێن هه‌لبژارتنان بهێنه هژمارتن يان ژى ب شێوه‌كێ ئه‌لكترۆنى”.
خسرۆى گۆت ژى” هه‌تا نوكه ئه‌وا ديار وه‌كو ئێك كيانێ سياسى يێ سه‌ربخوه دێ پشكداريێ دهه‌لبژارتنان دا كه‌ين، به‌لێ جارێ ده‌مێ هه‌ڤپه‌يمانيان يێن ماى، ئه‌ڤرۆ تنێ تۆماركرنا كيانێن سياسى يه”.
ناڤبرى راگه‌هاند ژى” پارتى دێ يا پێگير بيت ب هه‌موو رێنما وقانوونێن كۆمسيۆنێ، چ ب ده‌ستى ئه‌نجامێن هه‌لبژارتنان بهێنه هژمارتن يان ژى ب شێوێ ئه‌لكترۆنى وئاميرێ زيره‌ك، مه ژى گازنده ژ كۆمسيۆنێ هه‌بوو ومه گۆمان يا هه‌ى كو ل هنده‌ك جهان سه‌خته‌كاريه‌كا مه‌زن هاتبيته كرن وئه‌م قوربانى وێ سه‌خته‌كاريێ نه”.
دياركر ژى” پشكه‌كا مه‌زن يا ده‌نگێن مه به‌رزه‌بوون وهاتن خوارن چ ل مووسل وچ ل سلێمانيێ وچ ل جهه‌كێ دى، له‌وما ئه‌م ژى پشته‌ڤانيێ ل هه‌ر پێنگاڤه‌كێ دكه‌ين كو لايه‌نێن دى يێن سياسى ب هاڤێژن، ل لايێ كۆمسيۆنێ يان دادگه‌هێ ده‌نگ بهێنه هژمارتن”.
خوياكر ژى” ل هه‌ر جهه‌كى وهه‌ر لايه‌نه‌كێ سياسى گۆمان هه‌بيت يان بزانيت ل پرۆسا ده‌نگدانێ ل وان جهێن پارتى پتريا ده‌نگان هه‌بن، بلا ب فه‌رموون سندووقان ڤه‌كه‌ن”.
ل دۆر هه‌لبژارتنێن كوردستانێ، به‌رپرسێ ده‌زگه‌هێ هه‌لبژارتن يێ پارتى گۆت” قانوونا هه‌لبژارتنان ل هه‌رێما كوردستانێ يا جودايه ل گه‌ل يا عيراقێ، كوردستان ئێك بازنه‌يه كو هه‌ولێر وسلێمانى ودهۆك ب ئێك زۆن هاتينه دياركرن وخه‌لكێ دهۆكێ دشێن ده‌نگى ب به‌ربژارێ هه‌ولێرێ يان سلێمانيێ بده‌ت وخه‌لكێ هه‌له‌بجه دشێت ده‌نگى ب به‌ربژارێ هه‌ولێرێ يان دهۆكێ بده‌ت، هه‌روه‌سا به‌روڤاژى ژى”.
ئاماژه دا وێ چه‌ندێ كو پارتى دێ 100 به‌ربژار هه‌بن ول دووڤ شيانان وهژمارا ده‌نگێن پارتى ل وان جهان، دێ به‌ربژاران به‌لاڤكه‌ين.
ئه‌ڤرۆنيوز:
سه‌رۆك مه‌سعود بارزانى ئه‌ڤرۆ چارشه‌مبى 30/5/2018 پێشوازى ل جۆن ويلكس باليۆزێ بريتانيا ل عيراقێ كر.
دكۆمبوونه‌كێ دا سه‌رۆك بارزانى وجۆن ويلكس رۆناهى خسته سه‌ر ره‌وشا سياسى ل عيراقێ وپرۆسا هه‌لبژارتنێن جڤاتا نوونه‌ران وپێكئينانا كابينا نوو يا حوكمه‌تا عيراقێ ورۆلێ هه‌رێما كوردستانێ دپێكئينانا وێ حوكمه‌تێ دا.
سه‌رۆك بارزانى دياركر”بۆ هه‌رێما كوردستانێ يا گرنگه بنه‌مايێ هه‌ڤپشكيا راسته‌قينه ل به‌غدا وته‌وافوق ل ده‌ستهه‌لاتا قانوون دانانێ دا وهه‌ڤسه‌نگى ل كه‌رتێن ئابوورى وئه‌منى وسياسى وله‌شكرى ل عيراقێ بهێته پاراستن.
جۆن ويلكس باليۆزێ بريتانيا عيراقێ دووپاتى ل ب به‌رفره‌هكرنا په‌يوه‌نديێن هه‌ولێرێ وله‌نده‌ن كر وداخواز ك بۆ رێگرتنێ ل سه‌رلهدانا تيرۆرێ، هه‌ماهه‌نگيا هه‌رێما كوردستانێ وبريتانيا دێ به‌رده‌وام بيت.
باليۆزێ بريتانيا هه‌روه‌سا راگه‌هاند كو وه‌لاتێ وى وجڤاكێ نێڤده‌وله‌تى پشته‌ڤانيا ل بنه‌ماگرتنا دستوورى ودانوستاندنێ بۆ پرۆسا سياسى ل عيراقێ دێ كه‌ن ب جۆره‌كى سه‌قامگيريا ئه‌منى وئابوورى ژى لێ په‌يدا بيت”.
ئه‌ڤرۆ نيوز، فاتما مزوورى:
روسنه‌فت مه‌زنه كۆمپانيا په‌ترۆلا رۆسى راگه‌هاند كو چه‌ندين پرۆژێن مه‌زن يێ ل به‌ر ده‌ستێ وێ كۆمپانيێ.
رێڤه‌به‌رێ ب جهئينه‌رێ وێ كۆمپانيێ د كۆنگره‌كێ رۆژنامه‌ڤانى دا ل مۆسكۆ يا پايته‌ختێ رۆسيا راگه‌هاند كو وان كار ل سه‌ر هنده‌ك پرۆژان ل گه‌ل هه‌رێما كوردستانێ كريه كو ژ وان راكێشانا بۆريه‌كا گازا سرۆشتى يه.
ئاماژه دا وێ چه‌ندێ ژى كو ئه‌و كار ژ بۆ وێ يه‌كێ دكه‌ن كو تێكه‌ليێن خوه ل گه‌ل هه‌رێما كوردستانێ باشتر لێ بكه‌ن و پێشڤه ببه‌ن.
ئاژانسا رۆيته‌رز راگه‌هاند كو كۆمپانيا روزنه‌فت ده‌ست ب ديزاينكرنا بۆريه‌كا گازێ ل گه‌ل هه‌رێما كوردستانێ كريه وه‌كو پشكه‌ك ژ پلانێن پێشڤه‌برنا به‌رهه‌مێن گازێ ل هه‌رێما كوردستانێ.
د كۆربه‌ندا ئابوورى يا سانپترسبۆرگ ل رۆسيا دا كو 24 هه‌تا 26ێ ڤێ هه‌يڤێ كارێن وێ ب رێڤه‌چووبوون، شاندێ هه‌رێما كوردستانێ ب سه‌رۆكاتيا ئاشتى هه‌ورامى دو پرۆتۆكۆل ل دۆر په‌ترۆلێ ل گه‌ل كۆمپانيا روزنه‌فت ئيمزا كربوون.
نيشاندان