ئه‌ڤرۆ نيوز:
شارەزایەکێ شوونواری ل دەڤەرا ئامێدیێ دیار کر، دورێن 10 مزگەفتێن کەڤن و شوونواری ل دەڤەرا ئامێدیێ ھەنە و مێژوویا ھندەک ژ وانا بۆ بەری ھاتنا ئاینێ ئیسلامێ ڤەدگەریت و گۆت: ھندەک ژ ڤان مزگەفتا نوکە ماینە ب دروستی کار و پەرستن لێ دھێتە کرن و ھندەک ژی ب تنێ شوونوار ماینە و ژناڤچووینە و ھندەک ژ ڤان شوونەواران ژی مەترسیا ژ ناڤچوونێ ل سەرە و داخاز کر، ئەڤ جھێن شوونەواری بھێنە پاراستن ژ بەر کو شوونوار ناسناما ھەر گەلەلکێ و کەڤنی و رەسەناتیا مللەتان نیشان ددەت.
کوڤان ئیسحان ئامێدی شارەزایێ شوونواری ل دەڤەرا ئامێدیێ بۆ رۆژناما ئەڤرۆ خویا کر، مزگەفتا ھەری بەرچاڤ و شوونەواری و کەڤن ل دەڤەرا ئامێدیێ مزگەفتا ئامێدیێ ب خوە یە کو مێژوویا وێ بۆ سەردەمێ بەدرەدین لوئلوئی ل چەرخێ 13 زاینی ڤەدگەریت و گۆت: ژ مزگەفتێن کەڤنێن دەڤەرا ئامێدیێ 3 مزگەفت ل بامەرنێ ھەنە و 2 ل ئامێدیێ و 3 ل قەدشێ و ئێک ل کیستە، لێ مزگەفتا ئامێدیێ ژلایێ قازیێ مووسلی یێ ب ناڤێ عەبدووللا کورێ دەراج مینبەرا وێ ھاتیە چێکرن.
ھەروەسا ناڤبری دیار کر، مزگەفتێن قەدشێ و یا ئسفکا ل دووڤ ئەندازەیا چێکرنا وێ دیار دبیت کو ئەڤە بەری ببنە مزگەفت دێر بووینە و پاشان پشتی ھاتنا ئیسلامێ بووینە مزگەفت، لێ خویا نینە کو ل چو سالەکێ ھاتینە گوھۆرین و بووینە مزگەفت.
دیار ژی کر، مزگەفتا گوندێ سەیداوا ل دووڤ وێ نڤیسارا ل سەر ھاتیە تومارکرن ل سەر 1221 مشەختی ھاتیە چێکرن کو نوکە ئەو نڤیسین ل سەر مایە و ھەروەسا مزگەفتا موئمنین ل بامەرنێ و ل دووڤ ژێدەرێن مێژویێ دیار دکەن ل چەرخێ 16 ھاتیە چێکرن، بەلێ ل دووڤ باوەریا من ھێشتا ل وێ مێژویێ کەڤنترە.
شوونەوار ناس کوڤان ئیحسان دا دیار کرن ژی کو ل دەڤەرا ئامێدیێ چوار تەکیا ھەنە یا ژ ھەموویان کەڤنتر تەکیا دێرەشێ یە یا گرێدایە ب تەسووفێ ڤە و مێژوویا وێ ڤەدگەریت بۆ سەر دەمێ عەباسیان و گۆت: (تەکیایێن ئامێدیێ و تەکیا مایێ ژی ئێک تەکیایێن دەڤەرا ئامێدیێ نە و ھەروەسا تەکیا بامەرنێ ژی ئێک تەکیایێن کەڤنێن دەڤەرا ئامێدیێ یە و ل سالا 1846 ھاتیە چێکرن).
دەربارەی قوتابخانەیێن ئاینی ژی ناڤبری دیار کر، دەڤەرا ئامێدیێ چەندین قوتابخانەیێن ئاینی ھەبووینە ژ وانا ژی قوتابخانا کیستە و قوتابخانا مەلا یەحیا مزیری و ھەروەسا قوتابخانا قوبەھان کو ئێک ژ قوتابخانەیێن گرنگێن دەڤەرێ بوویە و ب سەدان زانا و شاعیر و مەلا ل ڤێ قوتابخانێ دەرچووینە.
ناڤبری ئاشکرا کر، ھندەک ژ ڤان مزگەفتا نوکە ماینە ب دروستی کار و پەرستن لێ دھێتە کرن و ھندەک ژی ب تنێ شوونوار ماینە و ژناڤچووینە و ھندەک ژ ڤان شوونەواران ژی مەترسیا ژ ناڤچوونێ ل سەرە و داخاز کر، ئەڤ جھێن شوونەواری بھێنە پاراستن ژ بەر کو شوونوار ناسناما ھەر گەلەلکێ و کەڤنی و رەسەناتیا مللەتان نیشان ددەت.
نيشاندان