ئه‌ڤرۆنيوز:
ريڤه‌به‌رێ پۆليسێن پارێزگه‌ها هه‌ولێرێ ل دۆر روودانا ته‌قه‌كرنا ڤێ سپێدێ ل به‌رده‌م دادكه‌ها هه‌ولێرێ پێزانينان ئاشكرا دكه‌ت ودبێژيت، ئه‌و كه‌سێ ته‌قه‌كرى يێ هاتيه ده‌سته‌سه‌كرن.
ليوا (عه‌بدولخالق ته‌لعه‌ت) رێڤه‌به‌رێ پۆليسێن هه‌ولێرێ دداخۆيانيه‌كا رۆژنامه‌ڤانى دا گۆت” وى كه‌سى ب چه‌كێ كلاشنكۆفێ ته‌قه به‌ر ب ئه‌سمانى دا كريه نه‌كو ل ئاڤاهيێ دادگه‌هێ”.
دياركر ژى”هێزێن پۆليس وئاسايشێ شيان وى كه‌سێ ته‌قه كرى ده‌سته‌سه‌ر بكه‌ن، چو زيانێن گيانى ژى ژ ئه‌گه‌رێ وێ ته‌قه‌كرنێ نه‌بوون”.
ئه‌ڤرۆنيوز:
سپێده‌يا ئه‌ڤرۆ ئێكشه‌مبى 10/6/2018 دو كه‌سان ته‌قه ل دادگه‌ها هه‌ولێرێ كر، به‌رپرسێ لقێ هه‌ولێرێ يێ سه‌نديكا پارێزه‌رێن كوردستانێ ژى دكۆنگره‌كێ رۆژنامه‌ڤانى دا دياركر كو ئه‌و هه‌ردو كه‌ه‌سه هاتنه ده‌سته‌سه‌ركرن وراده‌ستكرن بۆ پۆليسان.
ئه‌ياد كاكه‌يى، به‌رپرسێ لقێ هه‌ولێرێ يێ سه‌نديكا پارێزه‌رێن كوردستانێ دكۆنگره‌كێ رۆژنامه‌ڤانى دا گۆت” ترومبێله‌كا سه‌ربازى كو شۆفێر وكه‌سه‌كى دى تێدابوون، سپێده‌يا ئه‌ڤرۆ ئێكشه‌مبى ته‌قه ل ئاڤاهيێ دادگه‌ها تێهه‌لچوونا هه‌ولێرێ كر”.
كاكه‌يى گۆت ژى” ئه‌و ل ده‌ف كابينا عه‌رزحالچيان راوه‌ستابوون وته‌قه ل دادگه‌هێ كر وپاشى بزاڤا ره‌ڤينێ كر، به‌لێ هه‌ردو تۆمه‌تبار هاتنه ده‌سته‌سه‌ركرن وراده‌ستكرن بۆ پۆليسان”.
ئه‌ڤرۆنيوز:
سه‌رۆكا لژنا كاروبارێن پێشمه‌رگه وشه‌هيدان وقوربانيێن جينوسايدێ وزيندانيێن سياسى ل په‌رله‌مانێ كوردستانێ، شيلان جه‌عفه‌ر ئه‌گه‌رێن گيرۆبوونا به‌لاڤكرنا مووچێ وه‌زاره‌تا پێشمه‌رگه‌ى ئاشكرا دكه‌ت.
شيلان جه‌عفه‌ر،ل دووڤ مالپه‌رێ كوردستان تى ڤى، دبێژيت، پشتى روودانێن 16 ئوكتۆبه‌رێ، هاريكاريا هه‌ڤپه‌يمانان بۆ پێشمه‌رگه‌ى راسته‌وخوه ناهێته هه‌رێما كوردستانێ، به‌لكو دچيته به‌غدا وپشتى رازيبوونا حوكمه‌تا عيراقێ ئه‌و پاره دهێته به‌نكا كوردستان، حوكمه‌تا عيراقێ ژى ئه‌و كوژمێ پاره‌ى كو پێدڤيه وه‌كو مووچه بۆ هێزا پێشمه‌رگه‌ى ب هنێريت، هه‌تا نوكه نه هنارتيه.
ئه‌ڤرۆنيوز:
نوشداره‌كێ تایبه‌تمه‌ندێ نه‌خوه‌شیێن دل و هناڤان دبێژيت، گه‌له‌ك كه‌س يێن هه‌ين هنده‌ك جۆرێن ڤیتامینان د ناڤ له‌شێ وان دا گه‌له‌ك دكێمن، ژوان ژى ڤيتامين D و ئه‌و كه‌س به‌رده‌وام حه‌ز دكه‌ن له‌شه‌كێ ساخله‌م هه‌بیت”.
رێبه‌ر حه‌جى قادر، نوشدارێ تایبه‌تمه‌ندێ نه‌خوه‌شیێن دل و هناڤان بۆ نوش نيوز گۆت “راوه‌ستیانا به‌ر هه‌تاڤێ بۆ وان كه‌سێن ڤيتامينD يا كێم د له‌شێ وان دا، گه‌له‌ك یا باشه كو حه‌فتییێ (2 هه‌تا 3) رۆژان و هه‌ر جاره‌كێ نیڤ ده‌مژمێرێ ب راوه‌ستیت و هه‌تاڤا باش ئه‌وه كو ئيكسه‌ر هه‌تاڤ بگه‌هیته له‌شى نه‌كو ل به‌ر په‌نجه‌ره‌كێ ب راوه‌ستیت”.
ئاشكه‌را ژى كر كو خوارنا سپیاتیان ب گشتى مینا (نیڤشك، په‌نیر، قه‌یماغ و كتكێن هژیرا) د باشن بۆ زێده‌بوونا وى جۆرێ فیتامینێ.
ئه‌ڤرۆنيوز:
شه‌ره‌كێ گران ل پارێزگه‌ها زيقار ل باشوورێ عيراقێ دروست بوو وحوكمه‌ت نه‌شيت كونترۆل بكه‌ت، ژێده‌ره‌ك ژى ئاماژه دا كو شه‌ر دناڤبه‌را ئاكنجيێن دو پاريزگه‌هان دايه ويا بوويه شه‌رێ ناڤخوه‌يى.
ژێده‌ره‌كى بۆ هنده‌ك ده‌زگه‌هێن راگه‌هاندنێ يێن عيراقى گۆت شه‌ره‌كێ گران دناڤبه‌را هه‌ردو عه‌شيره‌تێن ئه‌لبوزياد وهه‌ساسيره بكارئينانا ئارپيچى ومۆشه‌كان وهاونان دروست بوويه”.
شه‌ر ل باژێرێ سه‌يد ده‌خيل بوو وهێزه‌كا له‌شكرێ عيراقێ بزاڤا كونترۆلكرنا شه‌رى كر، به‌لێ نه‌شيا وخوه ڤه‌كێش، وى ژێده‌رى دياركر” شه‌ر گه‌له‌ك يێ گرانه وچه‌كێن هێزێن ئه‌منى ل ئاستێ وان چه‌كان نينه كو دشه‌رى دا دهێنه بكارئينان”.
هه‌ڤده‌م ژێده‌ره‌كى دى دياركر كو ئه‌و شه‌ره يێ ناڤخوه‌يى يه دناڤبه‌را ئاكنجيێن دو پارێزگه‌هێن شيعه نشين دا ل ميسان وزيقار وگۆت” ئه‌ڤرۆ هێزێن ئه‌منى يێن عيراقى نه‌شيان كونترۆلا وى شه‌رى بكه‌ن، له‌وما خوه ڤه‌كێشا ژ جهێ شه‌رى”.
ئه‌ڤرۆنيوز:
شيره‌تكارێ جڤاتا ئاسايشا هه‌رێما كوردستانێ، مه‌سرور بارزانى، ئه‌ڤرۆ شه‌مبيێ 9/6/2018 پێشوازى ل جه‌نه‌رال (برادلى بيكه‌ر) به‌رپرسێ نڤيسينگه‌ها هاريكاريا ئاسايشێ ل باليۆزخانا ئه‌مريكى ل عيراقێ كر كو ب هه‌لكه‌فتا ب دووماهى هاتنا ئه‌ركێ وى وناساندنا جێگرێ خوه جه‌نه‌رال (شۆن جێنكينس) سه‌ره‌دانا هه‌رێما كوردستانێ كربوو.
دوێ ديدارێ دا، به‌رنامێ درێژخايه‌نێ مه‌شق وراهێنانێ ودابينكرنا پێدڤيێن له‌شكرى بۆ هێزێن پێشمه‌رگه‌ى هاته به‌حسكرن، ديسا ئه‌نجامێن هه‌لبژارتنێن 12/5/2018 يێن عيراقێ به‌حس ل سه‌ر هاته كرن، ل دۆر وێ چه‌ندێ مه‌سرور بازرانى ئاماژه ب گرنگيا پێكئينانا هه‌ڤپه‌يمانيا كوردستانێ دناڤبه‌را هه‌موو لايه‌نێن كوردستانى دا وگۆت” ب پێكئينانا فراكسيۆنا هه‌ڤپه‌يمانيا كوردستانى دێ باشتر به‌رگرى ژمافێن خه‌لك وهه‌رێما كوردستانێ هێته كرن”.
ل دۆر قانوونا جڤاتا نوونه‌رێن عيراقێ به‌رامبه‌ر ئه‌نجامێن هه‌لبژارتنان، مه‌سرور بارزانى ئاماژه ب وێ چه‌ندێ دا كو هه‌رێما كوردستانێ لارى نينه كو هژمارتن وجوداكرنا ده‌نگان ب ده‌ست بهێته ئه‌نجامدان ونيگه‌رانيا خوه‌ژى به‌رامبه‌ر ره‌تكرنا ده‌نگێن هه‌لبژارتنا تايبه‌ت ل هه‌رێما كوردستانێ نيشاندا وراگه‌هاند” ئه‌ڤه بزاڤه‌كا سياسى يه دژى هه‌رێما كوردستانێ.
د ته‌وه‌ره‌كێ دى دا دانوستاندن ل دۆر به‌رنامێ چاكسازيێ ورێكخستنا وه‌زاره‌تا كاروبارێن پێشمه‌رگه‌ى هاته كرن وژلايێ خوه‌ڤه جه‌نه‌رال بيكه‌ر راگه‌هاند” نڤيسينگه‌ها هاريكاريا ئاسايش دچارچۆڤێ ستراتيژيا ئاسايشا هه‌رێمى وسه‌رپه‌رشتيكرنا به‌رنامێن خوه دپشته‌ڤانيكرن ولبه‌رچاڤ وه‌رگرتنا پشكا عاديلانه يا هاريكاريان بۆ هێزێن پێشمه‌رگه‌ى دێ به‌رده‌وام بيت.
ئه‌ڤرۆنيوز:
به‌رپرسێ ب رێڤه‌برنا هه‌لبژارتنان ل كۆمسيۆنا بلند يا هه‌لبژارتنان ل عيراقێ هوشداريێ دده‌ت كو پرۆسا هژمارتنا ده‌نگان كاره‌كێ ب ساناهى نابيت ودبێژيت، 800 هزار كاخه‌زێن به‌تال وسه‌خته يێن دناڤ سندووقێن ده‌نگدانێ دا.
رياز ئه‌لبه‌دران، به‌رپرسێ ب رێڤه‌برنا هه‌لبژارتنان ل كۆمسيۆنا بلند يا هه‌لبژارتنان ل عيراقێ، ل دووڤ مالپه‌رێ (بغداد اليوم) دانپێدان ب وێ چه‌ندێ كر كو هژمارتنا ده‌نگان يا ب ساناهى نابيت ودێ كاره‌كێ ب زه‌حمه‌ت بيت.
رۆژا پێنجشه‌مبيا بۆرى، كۆمسيۆنا بلند يا هه‌لبژارتنان دبه‌ياننامه‌كێ دا گۆت” مه رێگرى نينه كو هژمارتنا ب ده‌ست بۆ ئه‌نجامێن هه‌لبژارتنێن جڤاتا نوونه‌رێن عيراقێ بهێته كرن”.
ل گه‌ل وێ چه‌ندێ، ئه‌ڤرۆ شه‌مبيێ 9/6/2018، وى به‌رپرسێ كۆمسيۆنێ گۆت” پرۆسا هژمارتنا ده‌نگان ب ده‌ست هه‌ستيارى وترسا خوه يا هه‌ى”.
رياز ئه‌لبه‌دران ئاشكرا دكه‌ت كو 800 هزار كاخه‌زێن دناڤ سندووقێن ده‌نگدانێ دا يێن هه‌ين دبه‌تال وسه‌خته‌نه وتنێ ل به‌غدا 170 هزار كاخه‌زێن به‌تال دناڤ سندووقان دا يێن هه‌ين.
ل رۆژا چارشه‌مبيا بۆرى، جڤاتا نوونه‌رێن عيراقێ راستڤه‌كرنا سيێ بۆ قانوونا هه‌لبژارتنان كر كو دبرگه‌كێ دا بريار هاتيه دان ده‌نگێن هه‌لبژارتنێن 12/5/2018 بهێنه هژمارتن.
ئه‌ڤرۆنيوز:
ئه‌ندامێ جڤاتا نوونه‌رين عيراقێ ژفراكسيۆنا پارتى ديموكراتى كوردستان، شاخه‌وان عه‌بدوللا، ب توندى ره‌خنه ل بزاڤا گۆران دگريت ودبێژيت، گۆران خودانا پرۆژێ ره‌شكرنا ده‌نگێن پێشمه‌رگێ كوردستانێ يه بۆ هه‌لبژارتنێن جڤاتا نوونه‌رێن عيراقێ، دياركر ژى كو به‌لگه دده‌ست وى دا هه‌نه ل سه‌ر وێ چه‌ندێ.
شاخه‌وان عه‌بدوللا دبه‌رپه‌رێ خوه دا ل سه‌ر تۆرا جڤاكى يا فه‌يسبووكى گۆت” پارتى چو كێشه‌ك نينه هه‌كه جڤاتا نوونه‌رێن عيراقێ يان كۆمسيۆن يان هه‌ر لايه‌نه‌كێ دى ده‌نگێن هه‌لبژارتنان جاره‌كا دى ب ده‌ست بهێنه هژمارتن، به‌لێ ب تاوانه‌كا مه‌زن دزانين كو په‌رله‌مان ل ده‌رڤه‌ى ده‌ستهه‌لاتا قانوون دانانێ وچاڤدێريێ بيت وجهێ دادگه‌هێ بگريت وده‌نگێن ئاواره وپێشمه‌رگه‌ى وده‌رڤه ره‌ش بكه‌ت، كو به‌روڤاژى مادێ 4 برگا 5 ژ قانوونا هژمار 11 يا سالا 2007 يا كۆمسيۆنێ، كو ئه‌و ده‌ستهه‌لات هاتيه دان ب ده‌سته‌يا دادوه‌رى ته‌مييز بۆ وێ چه‌ندێ هه‌كه ل جهه‌كى سه‌خته‌كارى هاته كرن، ئه‌و سندوقان ره‌ش بكه‌ت، به‌لێ ئه‌وا جهێ نيگه‌رانيێ ئه‌وه تو بهێى ده‌نگێ هه‌موو پێشمه‌رگان ره‌ش بكه‌ى بێ كو ڤه‌كۆلينێ بكه‌ى كا ئايا سه‌خته‌كارى هاتيه كرن يان نه”.
شاخه‌وان عه‌بدولاى دياركر ژى” ئه‌و چه‌ندا ئه‌ز گه‌له‌ك نيگه‌ران كريم دوى بابه‌تى دا، پشتى په‌يوه‌نديكرن ب لژنا ئاسايش وبه‌رگريێ ولژنا قانوونى يا جڤاتا نوونه‌ران، وان رۆهنكر كو بزاڤا گۆران خودانا پرۆژێ ره‌شكرنا ده‌نگێن پێشمه‌رگه‌يه وبه‌لگه ژى يێن گه‌هشتينه ده‌ستێ من، ل ڤێرێ دبێژم نزانم گۆران جاره‌كێ پێشمه‌رگه‌ى دكه‌ته ميليشيا وجاره‌كێ دكه‌ته ئه‌نفالچى، جاره‌كێ رێگريێ دكه‌ت كو بودجه بۆ 100 هزاران ژ به‌غدا بهێته دابينكرن وگۆت ئه‌ڤه هێزا حزبى يه ويا كوردان نينه، ڤێ جارێ ژى ب سه‌خته‌كارچى ناڤ دكه‌ن، ب ديتنا من پێدڤيه ئێدى سنوره‌ك بۆ بهێته دانان وئێدى زێده‌تر سڤكاتيێ ب پێشمه‌رگه‌ى وكوردان نه‌كه‌ت.
ئه‌ڤرۆنيوز:
فه‌رماندێ فه‌رمانده‌يا پێشمه‌رگێ شنگالێ راگه‌هاند، دوور نينه ل شنگالێ شه‌ره‌ك روو بدان، چونكى حه‌شدا شه‌عبى يا به‌ربوويه گيانێ خه‌لكى وگه‌فان دكه‌ت.
قاسم شه‌شۆ، فه‌رماندێ فه‌رمانده‌يا پێشمه‌رگێ شنگالێ بۆ مالپه‌رێ فه‌رميێ پارتى گۆت” ل شنگالێ ئه‌و لايه‌نێن كو ب ناڤ پارێزگاريێ ل خه‌لكى دكه‌ن، يێن به‌ربووينه گيانێ خه‌لكى وگه‌فان لێ دكه‌ن وباش ژى دزانن كو خه‌لى باوه‌رى پێ نينه”.
شه‌شۆى گۆت ژى” پشتى هاتنا هێزێن ئه‌مريكى وپشكه‌ك ژ هێزێن عيراقى، نوكه حه‌شدا شه‌عبى رۆژه‌كێ دهێت وداخوازا چه‌كدانانێ ژ هێزێن ئيزدى دكه‌ت ورۆژه‌كێ ژى چه‌كى ژ خه‌لى وه‌ردگريت، ره‌وشا خه‌لكى گه‌له‌ك يا مه‌ترسيداره وحه‌شدا شه‌عبى كه‌سه‌كێ دسه‌ر خوه‌دا نابينيت وحيسابێ بۆ چو هێزه‌كێ ژى ناكه‌ت”.
خوياكر” نابيت ئه‌م چاڤه‌رێ تشته‌كێ باش بين ژ وێ حه‌شدا نوكه ل شنگالێ هه‌ى، چونكى هه‌موو ئه‌ون يێن كاره‌ساتا دژى ئێزديان ل سالا 2014 ئه‌نجامداى وپێدڤيه خه‌لكێ شنگالێ چو باوه‌ريه‌ك ب وان هيزان نه‌بيت”.
ئەڤرۆ نیوز:
مرۆڤێن قه‌له‌و حه‌ز دكه‌ن ب هه‌ر رێیه‌كا هه‌بیت سه‌نگێ خۆ كێم بكه‌ن، له‌ورا دێ په‌نایێ به‌نه ب كارئینانا گه‌له‌ك رێكان و پرانیا وان رێكان ژی چ مفایێ خۆ نینه و نوكه هنده‌ك ژوان هزرێن شاش ده‌رباره‌ی خو زه‌عیفكرنێ دێ ده‌ینه خویاكرن.
ته‌دلیك: هنده‌ك كه‌س وه‌سان هزر دكه‌ن كۆ ته‌دلیككرنا له‌شی هاریكاره بۆ حه‌لاندنا چه‌وریان د له‌شیدا، ئه‌ڤه هزره‌كا شاشه و كه‌سێ ئێكانه مفای ژ ته‌دلیكێ دكه‌ت ئه‌و كه‌سه یێ ب ڤی كاری رادبیت ژبه‌ركۆ د وه‌ستیێت و رێكا ئێكانه یا نه‌هێلانا چه‌وریان د له‌شیدا ئه‌وه مرۆڤ ب وه‌ستیێت و ل ده‌مێ ته‌دلیكێ چ وه‌ستیان په‌یدانابیت.
ساونا: ل ده‌مێ ب كارئینانا گه‌رماڤێن ساونایێ هه‌لبه‌ت ژ ئه‌نجامێ خوهدانێ شله‌مه‌نی د له‌شیدا كێم دبن و مرۆڤێ قه‌له‌و هه‌ر زوو پشتی ساونایێ دێ قه‌ستا ئاڤ ڤه‌خوارنێ كه‌ت و ئه‌ڤه‌ژی دێ سه‌نگێ وی ڤه‌گه‌رینیته‌ڤه و پێدڤی یه مرۆڤێ قه‌له‌و بزانیت كۆ قه‌له‌وی ژ ئه‌نجامێ خوارنا زێده په‌یدادبیت نه كۆ ژ ئاڤا زێده و ئه‌گه‌ر تو هه‌ست بكه‌ی ئاڤ یا د له‌شێ ته دا كوم ڤه دبیت، پێدڤی یه قه‌ستا نوشداری بكه‌ی، ژبه‌ر كۆ ئه‌و نه‌خوشیه و پێدڤی ب چاره‌كرنێ هه‌یه و دیسان بزانه كۆ هه‌ستكرنا مرۆڤی ب تێهناتیێ پشتی ساونایێ بۆ له‌شێ مرۆڤی د زڤریته‌ڤه و ل وی ده‌می باشتره ئاڤێ ڤه‌خوی و خۆ ژێ دوور نه‌كه‌ی و ڤه‌خوارنا كوپه‌كێ شیری یان شه‌ربه‌تێ دیسان دێ له‌شێ ته ڤه‌گه‌رینه‌ته‌ڤه و بزانه هشكبوون مرۆڤی به‌رئاتافی به‌ركێن گولچیسكا و قه‌بزوونێ دكه‌ت.
سابوون و ملحه‌مێن سه‌نگ كێمكرنێ: ل ڤان دووماهیان ریكلامێن گه‌له‌ك جورێن سابوون و ملحه‌ما ده‌ردكه‌ڤن كۆ سه‌نگی كێم دكه‌ن، ئه‌ڤه سه‌ردابرنه و هشیاربه زوو ب سه‌ردا نه‌چه و ئه‌ڤ جورێ ملحه‌م و كریم و سابوونان گرامه‌كی ژی ژ سه‌نگێ مرۆڤی كێم ناكه‌ن.
چایا چینی و گیایێن تایبه‌ت: هنده‌ك جورێن تایبه‌ت یێن چایێ و گیایان هه‌نه كۆ پشتی دگه‌ل ئاڤێ تێكه‌ل دكه‌ن مرۆڤێن قه‌له‌و ب كاردئینن و هزر دكه‌ن دێ زه‌عیف بن، ئه‌ڤه وه‌كو هه‌موو جورێن چایا سروشتینه و هه‌ر چایه‌كا بێ شه‌كر تو ڤه‌خوی، بۆ ده‌مه‌كی دلێ ته ناچیته خوارنێ و هنده‌ك ره‌نگێن چا و گیایان بۆ مرۆڤی زكچوونێ په‌یدادكه‌ن و دبنه ئه‌گه‌رێ كێمبوونا شله‌مه‌نیان د له‌شیدا و ئه‌ڤه مه‌ترسینه ل سه‌ر ساخله‌میێ ژبه‌ركو مرۆڤی تووشی هشكبوونێ دكه‌ن و هنده‌ك ژێده‌رێن گرنگ وه‌كو خوێ یێن كانزایان و ئیتامینان ژ له‌شی كێم دبن و ب تایبه‌ت ل ده‌ڤ وان كه‌سێن ل دووڤ رێجێمه‌كا تایبه‌ت كاردكه‌ن و ل دووماهیێ نه‌كو روون دێ ژله‌شی كێم بیت، به‌لكو شله‌مه‌نی دێ كێم بن و ئه‌ڤه نه‌باشه.
ئامیرێن كاره‌بێ: ل بازاری هنده‌ك جورێن ئامیره‌یێن كاره‌بێ دهێنه فرۆتن و دبێژنه كه‌سێن قه‌له‌و كا چ جهێ ته بڤێت زه‌عیف ببیت بدانه ل سه‌ر وی جهی و دێ سه‌نگێ ته داهێت، به‌لێ هندی ڤه‌كولین هاتینه كرن ئه‌ڤ رێكه هه‌موو ب نێگتفی ل قه‌له‌م داینه.
نيشاندان