ئه‌ڤرۆ نیوز ، نه‌وزاد هلۆرى:

 هه‌تا نها دناڤ خه‌لكى دا وه‌سا هاتیه‌ به‌لاڤكرن كو ئه‌و مرۆڤێ ل شكه‌فتا شانه‌ده‌ر یا سه‌ر ب ده‌ڤه‌را بارزان ڤه‌ ژیای، مرۆڤێ نیانده‌رتال بوویه‌، دیسان دهێته‌ گوتن كو كه‌ڤنترین گوند و ده‌ڤه‌ر ل كوردستانێ كو هاتیه‌ ئاشكراكرن چاندن تێدا هاتیه‌كرن گوندێ چه‌رمویه‌ ل ده‌ڤه‌را گه‌رمیان به‌لێ ڤه‌كوله‌ره‌كێ ده‌ڤه‌را بارزان ئه‌ڤ هه‌ردوو زانیاریه‌ ره‌تكرن و نووترین ئه‌و مرۆڤێ ل شانه‌ده‌ر ژیایى و ئه‌و ده‌ڤه‌را بۆ ئێكه‌م جار چاندن تێدا هاتیه‌كرن ئاشكرا دكه‌ت.

كرمانج چالى، ڤه‌كوله‌رێ جڤاكى و نڤیسه‌ر ل ده‌ڤه‌را بارزان بۆ ئه‌ڤرۆ نیوز گۆت: (شكه‌فتا شانه‌ده‌ر ل ده‌ڤه‌را بارزان ب ئێك ژ كه‌ڤنترین جهێن شوونوارى ل هه‌رێما كوردستانێ دهێته‌ هژمارتن كو نێزیكه‌ ل رووبارى و چه‌ندین كانیێن ئاڤێ و ژیانا مرۆڤان یا ده‌ستپێكى ل ڤێره‌ بوویه‌ ،  ب گوره‌ى ئه‌وان ڤه‌كۆلینێن كو ل ڤێ دوماهیێ ل سه‌ر شكه‌فتا شانه‌ده‌ر ل سه‌ر گورێن وان كه‌سان هاتینه‌كرن ئه‌وێن كو ل ڤێره‌ هاتینه‌ دیتن دیاربوویه‌ كو ئه‌و مرۆڤێ ل شانه‌ده‌ر ژیای مرۆڤێ نیانده‌رتال نه‌بوویه‌، به‌لكو مرۆڤه‌ك بوویه‌ گه‌له‌ك كه‌ڤنتر ژ مروڤێن نیانده‌رتال و ئه‌ڤه‌ د ده‌مه‌كێ دایه‌ كو هه‌تا نها خه‌لك وه‌سا هزر دكه‌ت كو ئه‌و مرۆڤێ ل شكه‌فتا شانه‌ده‌ر ژیای مرۆڤێ نیانده‌رتال بوویه‌ “.

كرمانجى دياركر ژى” روخسارێ وان مرۆڤێن ل ڤێره‌ هاتینه‌ دیتن ژ یێن نیانده‌رتال جودایه‌ و ڤه‌كۆلینێ دایه‌ دیاركرن كو چه‌ند ده‌سته‌ گوله‌ك ل سه‌ر گورێن وان هه‌بوون مینا گوله‌ بووك و نێرگز و به‌یبین و چه‌ند جۆره‌كێن دن بوون “.

 زێده‌تر گۆت: (دووماهى ڤه‌كۆلینێ 29 مه‌تران گورێن ناڤا شكه‌فتا شانه‌ده‌ر كولاینه‌ كو ئه‌ڤ یه‌ك ژى تشته‌كێ حێبه‌تى یه‌ وهه‌كه‌ ئه‌وان گور 29 مه‌تران كوور كولابن ژ خوه‌ تشته‌ك حێبه‌تى یه‌ ، و ده‌ستپێكا په‌یدابوونا مرۆڤان و ژیانا وان ل شكه‌فتان بوویه‌ ب تایبه‌تى ژبه‌ر خوه‌پاراستنێ ، ل ده‌ردورێن شكه‌فتا شانه‌ده‌ر رووبار و كانیێن زور هه‌نه‌ و ئه‌ڤ یه‌ك بوویه‌ ده‌ستپێكا ده‌ركه‌فتنا شوره‌شا چاندنێ) .

چالى د درێژاهیا ئاخفتنێن خوه‌دا دیاركر ژى، ژبه‌ركو ده‌ستپێكا ژیانێ ل شكه‌فتا شانه‌ده‌ر بوویه،‌ ئه‌ڤ یه‌ك بویه‌ سه‌ده‌م كو ئێكه‌م جار چاندن ژى ل ده‌ڤه‌را بارزان ده‌ربكه‌ڤیت و گۆت : (كه‌ڤنترین گوند و چه‌مێ كوردستانێ چاندن تێدا هاتیه‌كرن چه‌مێ جێرموو بوویه‌ ل ده‌ڤه‌را بارزان نه‌كو گوندێ چه‌رموو بوویه‌ ل ده‌ڤه‌را گه‌رمیان وه‌كو دهێته‌ گوتن).

خوياكر ژى، بۆ ئێكه‌مین جار ڤه‌كۆلین ل سه‌ر شكه‌فتا شانه‌ده‌ر هاتیه‌كرن دزڤریت بۆ سالێن 1951-1960 ل سه‌ر ده‌ستێ زانایه‌كێ ئه‌مریكى و زێده‌تر گۆت: (نها هه‌ستیكێن وان مرۆڤێن كو ل شكه‌فتا شانه‌ده‌ر هاتینه‌ دیتن ل زانكۆیێن ئه‌مریكا دهێنه‌ پاراستن و ڤه‌كۆلینێن زێده‌تر ل سه‌ر دهێنه‌كرن).

ل دۆر خزمه‌تگوزارییێن كو ژلایێ جهێن شوله‌ژێ بۆ شكه‌فتا شانه‌ده‌ر هاتینه‌كرن داكو ببیته‌ ئێك ژ جهێن گه‌شتوگوزارى ، چالى گۆت: (شكه‌فتا شانه‌ده‌ر زێده‌بارى كو جهه‌كێ گرنگه‌ وه‌كو شوونوار و شارستانى ، دهه‌مان ده‌م دا دكه‌ڤیته‌ جهه‌كێ خوه‌ش و سه‌رنجراكێش وسیمایه‌كێ گه‌شتوگۆزار ژى هه‌یه‌ ، و پشتى كو چه‌ند ره‌وشه‌نبیر و نڤیسكارێن ده‌ڤه‌را بارزان چالاكیێن جودا جودا ل شكه‌فتا شانه‌ده‌ر ئه‌نجامداین، ئه‌ڤ یه‌ك بوویه‌ ئه‌گه‌ر كو كۆمه‌لا دوستينيا كوردستانى- بریتانى كۆمه‌كا خزمه‌تگوزاریێن مینا رێیا ترومبێلێ ، پاركا ترومبێلان ، رێیا پیاده‌ ، چه‌ند كه‌پر و خزمه‌تگوزاریه‌كێن دى ، درۆستكه‌ن ، به‌لێ دیسان دبێژم ئه‌ڤ یه‌ك ل پێدڤى بناڤ و ده‌نگى و گرنگى یا شكه‌فتێ نینه‌  و پێدڤیه‌ پێزانينێن پێدڤى ل گه‌له‌ك جهێن شكه‌فتێ بهێنه‌ هه‌لاویستن داكو ئه‌و كه‌سانێن سه‌ره‌دانا شكه‌فتێ دكه‌ن بێ پێزانين نه‌زڤرن و تشته‌كێ ژ شكه‌فتێ بزانن، ژبه‌ركو رێژه‌یه‌كا زورا گه‌شتیاران سه‌ره‌دانا شكه‌فتا شانه‌ده‌ر دكه‌ن).

ئه‌ڤرۆنيوز:

دكۆمبوونه‌كا وه‌زاره‌تا چاندنێ وژێده‌رێن ئاڤێ ل هه‌رێما كوردستانێ، رێڤه‌به‌ريا گشتى يا سامانێ ئاژه‌لى وڤێتێرنه‌رى چه‌ند برياره‌ك ل دۆر ئينانا به‌رهه‌مێن كوشتى ده‌ركرن.

وه‌زاره‌تا چاندنێ وژێده‌رێن ئاڤێ ئه‌ڤرۆ ئێكشه‌مبى 3/6/2018 به‌لاڤكر” رێباز حه‌ملان وه‌زيرێ چاندنێ وژێده‌رێن ئاڤێ ب وه‌كاله‌ت سه‌رپه‌رشتيا كۆمبوونه‌كێ كر ب به‌رهه‌ڤبوونا رێڤه‌به‌رێ گشتيێ سامانێ ئاژه‌لى وڤێتێرنه‌رى ب وه‌كاله‌ت وريڤه‌به‌رێ گشتيێ پلان ودوڤچوونێ  وچه‌ندين ريڤه‌به‌رێن په‌يوه‌نديدار”.

وه‌زاره‌تا ناڤبرى رۆهنكر” دوێ كۆمبوونێ دا چه‌ند برياره‌ك هاتنه‌ ده‌ركرن، وه‌كو قه‌ده‌غه‌كرنا مۆله‌تا هاورده‌كرنا گوشتێ گامێشێ هندى وهه‌روه‌سا زێده‌كرنا پشكا پارێزگه‌هان ژ هاورده‌كرنا ئاژه‌لێ زيندى ب رێژا 100% زێده‌تر بۆ پشكا ته‌رخانكرى، ئه‌ڤ چه‌نده‌ ژى تنێ بۆ هه‌ردو هه‌يڤێن 6 و7 سالا 2018″.

زێده‌تر تێدا هاتيه‌، پشكا پارێزگه‌هان ل هاورده‌كرنا مريشكێن جه‌مدى ب رێژا 100% زێده‌تر بۆ پشكا ته‌رخانكرى، ئه‌ڤ چه‌نده‌ ژى تنێ بۆ هه‌ردو هه‌يڤێن 6 و 7 سالا 2018.

ئه‌ڤرۆنيوز:

رێڤه‌به‌ريا گشتى يا كاروبارێن ئێزدى ل وه‌زاره‌تا ئه‌وقافێ وكاروبارێن ئاينى ل هه‌رێما كوردستانێ، دووماهى ئامارا قوربانيێن ئێزدى ل سه‌ر ده‌ستێ تيرۆرستێن داعشێ به‌لاڤكر.

ل دووڤ داتا وئامارێن رێڤه‌به‌ريا ناڤبرى، كو ژلايێ نه‌ته‌وێن ئێكگرتى ژى هاتيه‌ ديكيومێنتكرن، هژمارا ئێزديان نێزيكى 500 هزار كه‌سانه‌، هژمارا ئاواران ژئه‌گه‌رێ هێرشێن داعشێ نێزيكى 360 هزار كه‌سانه‌، هژمارا شه‌هيدان ژى هه‌ر ژ رۆژا ئێكێ يا هێرشا داعشێ 1293 كه‌سن.

هه‌ر ل دووڤ وان ئاماارن، هژمارا زارۆيێن ماينه‌ بێ باب 1759 زارۆنه‌، ئه‌وێن ماينه‌ بێ دايك ژى 407 زارۆنه‌، هه‌ڤده‌م 359 زارۆ ماينه‌ بێ دايك وباب، هه‌روه‌سا باب ودايكێن 220 زارۆكان ژى يێن ژلايێ داعشێ ڤه‌ هاتينه‌ ره‌ڤاندن وب ڤێ چه‌ندى سه‌رجه‌مێ قوربانيێن زارۆ دگه‌هيته‌ 2745 زارۆيان.

ئامارا ناڤبرى دياركريه‌ كو هه‌تا نوكه‌ 68 گۆرێن ب كۆم ل شنگالێ يێن هاتينه‌ ئاشكراكرن، ژبلى ب ده‌هان گۆرێن تاك تاك، هژمارا مه‌رقه‌د ومه‌زارێن ژلايێ داعشێ ڤه‌ هاتينه‌ ته‌قاندن 68 مه‌زارن.

هه‌ر ل دووڤ وان ئامارێن رێڤه‌به‌ريا گشتى يا كاروبارێن ئيزديان، زێده‌تر ژ 100 هزار وه‌لاتيێن سه‌ر ب ئاينێ ئێزدى ڤه‌، ب نه‌چارى يێن مشه‌ختى ده‌رڤه‌ بووين.

دهێته‌ زانين دهێرشا داعشێ دا بۆ سه‌ر شنگالێ وده‌وروبه‌رێن وێ ل 3/8/2014 نێزيكى 6417 كه‌س هاتنه‌ ره‌ڤاندن ژوان 3548 كچ وژن و2869 زه‌لام، پشتى بزاڤێن حوكمه‌تا هه‌رێما كوردستانێ وهێزێن ئه‌منى وپێشمه‌رگێ كوردستانێ، 3300 ژن و1150 زه‌لام و337 زارۆك ژ ده‌ستێ داعشێ هاتنه‌ رزگاركرن.

ئه‌ڤرۆنيوز:
برياره‌ سوباهى دوشه‌ه‌مبى 5/6/2018 لژنا كاروبارێن قانوونى ولژنا دارايى وكاروبارێن ئابوورى ووه‌به‌رهێنانێ ل په‌رله‌مانێ كوردستانێ كۆمبن ودانوستاندنێ ل دۆر پرۆژێ چاكسازيێ بكه‌ن.
ڤالا فه‌ريد، سه‌رۆكا لژنا كاروبارێن قانوونى ل په‌رله‌مانێ كوردستانێ گۆت” دێ هه‌موو بزاڤان كه‌ين بۆ وێ چه‌ندێ پرۆێ قانوونا چاكسازيێ په‌رله‌مانێ كوردستانێ بهێته‌ ده‌ربازكرن كو ئه‌ڤ چه‌نده‌ دبه‌رژه‌وه‌نديا وه‌لاتيێن هه‌رێما كوردستانێ دايه‌”.
دهيته‌ زانين به‌رى ئه‌نجامدانا هه‌لبژارتنێن جڤاتا نوونه‌رێن عيراقێ ل 12 هه‌يڤا بۆرى، هژماره‌كا فراكسيۆنێن په‌رله‌مانێ كوردستانێ ب هيجه‌تا بانگه‌شا هه‌لبژارتنان، رێگر بوون ل په‌سه‌ندكرنا پرۆژێ قانوونا چاكسازيێ وكۆمبوون بۆ پشتى هه‌لبژارتنان هاتبوونه‌ پاشخستن.
دده‌مێن بۆرى دا، فراكسيۆنا پارتى ديموكراتى كوردستان ل په‌رله‌مانێ كوردستانێ ب هه‌ماهه‌نگى ل گه‌ل فراكسيۆنێن دى، دووپاتى ل سه‌ر ده‌ربازكرنا پرۆژێ قانوونا چاكسازيێ كربوو.