ئه‌ڤرۆ نیوز:

پشتى چه‌ند روژان ل به‌رزه‌بوونا وه‌لاتیه‌كێ كومه‌لگه‌ها چره‌ یا سه‌ر ب ناحیا قه‌سروك ل سنوورێ قه‌زا شێخان ، ئه‌ڤرۆ سپێدێ ته‌رمێ وى ل نێزیك ناحیا زێلكان ل بن چیایێ مه‌قلوب ب كوشتى هاته‌ دیتن.

ژێده‌ره‌كێ ل نێزیك روودانێ بو ئه‌ڤرۆ نیوز گۆت: (ئه‌ڤرۆ سپێدێ ، و ب ده‌مه‌كێ كێم به‌رى نوكه‌ وه‌لاتى محه‌مه‌د شه‌عبان كو چه‌ند روژه‌ ل مال ده‌ركه‌فتى و به‌رزه‌بووى، ده‌مه‌ك به‌رى نها ب كوشتى ل بن چیایێ مه‌قلوب یا سه‌ر ب ناحیا زێلكان ل سنوورێ قه‌زا شێخان هاته‌ دیتن).

زێده‌تر گۆت: (هه‌تا نها ئه‌گه‌رێن ره‌ڤاندن و كوشتنا وى وه‌لاتى نه‌هاتیه‌ زانین ، و خه‌لكێ ده‌ڤه‌رێ و كه‌س و كارێن وى رابوینه‌ ب زڤراندنا ته‌رمێ وى و دێ بو نه‌خوشخانا داد هێته‌ ره‌وانه‌كه‌ن داكو ئه‌گه‌رێن روودانێ بزانن).

ب گوره‌ى ئاخفتنێن وى ژیێ وى وه‌لاتى 43 ساله‌ و خه‌لكێ كومه‌لگه‌ها چره‌ یا سه‌ر ب ناحیا قه‌سرۆكێ یه‌ و چوو كێشه‌یێن ده‌روونى و كه‌سى ل گه‌ل كه‌سێ نه‌بوینه‌ و دوهى ژى ترومبێلا وى ل نێزیك چیایێ مه‌قلوب هاته‌ دیتن كو ره‌نگێ وێ ژ ره‌شى بو سوورى هاتبویه‌ گوهرین..

ئه‌ڤرۆنيوز:

به‌رى ده‌مه‌كێ كێم ل سه‌ر جادا سه‌ره‌كى زاويته‌ – دهۆك ترومبێله‌ك وه‌رگه‌ريا ودو كه‌س برينداربوون.

راگه‌هاندنا رێڤه‌به‌ريا هاتنوچونا دهۆكێ دياركر كو ترومبێله‌كا كرێ ژ جۆرێ تويۆتا كورۆلا ل بن كونترۆلا شوفێرى ده‌ركه‌فت ووه‌رگه‌ريا ودو كه‌س برينداربوون وهاتن ڤه‌گوهاستن بۆ نه‌خوه‌شخانا ته‌نگاڤيا ل دهۆكێ.

ئه‌ڤرۆ نيوز:

پشتى راگه‌هاندنا ئه‌نجامێن فه‌رمى يێن كۆمسيۆنا بلندا سه‌ربه‌خۆيا هه‌لبژارتنان به‌ربژارێن سه‌ركه‌فتى ديار بوون و ل هه‌رێما كوردستانێ هنده‌ك به‌ربژاران رێژه‌كا گه‌له‌ك كێم يا ده‌نگان ب ده‌ست خوه‌ ڤه‌ ئينايه‌ و ده‌رباس بوويه‌، به‌لێ به‌ربژاران ئه‌و به‌خت ل پارێزگه‌ها دهۆكێ نه‌بوو.

هەولێر
سرووە یونس عومەر رەشید، ژ لیستا نەوەی نوێ: هەزار و 992 دەنگ

سلێمانيێ
یوسرا رەجەب، ژ لیستا نەوەی نوێ: دو هەزار و 643 دەنگ

دهۆک
دالیا فەرهاد حاجی حەمەد ژ لیستی پارتی: 15 هەزار و 203 دەنگ

کەرکووک
خەدیجە عەلی عەباس، ژ بەرەی تورکمانی: دو هەزار و 161 دەنگ

ئه‌ڤرۆ نيوز:

كۆمسيۆنا بلندا سه‌ربه‌خۆيا هه‌لبژارتنان ل عيراقێ ئه‌نجامێن دووماهيێ يێن هه‌لبژارتنێن جڤاتێن نوونه‌رێن عيراقێ به‌لاڤكرن و تێدا هنده‌ك كه‌سان ژماره‌كا زۆر يا ده‌نگان ژ ده‌ست داينه‌ هنده‌ك كه‌ساتيێن گه‌له‌ك به‌رنياس ژى نه‌گه‌هشتنه‌ جڤاتا نوونه‌ران و به‌رنياسترين كه‌س ژى سه‌رۆكێ جڤاتا نوونه‌ران سه‌ليم جبۆرى و حه‌نان فه‌تلاوى سه‌رۆكا ليستا ئيراده‌ و نوونه‌را به‌رێ يا جڤاتا نوونه‌رێن عيراقێ.

ل پارێزگه‌ها دهۆكێ ژى نوونه‌رێ دووباره‌ خوه‌ به‌ربژار كرى، دكتور جه‌مال كۆچه‌ر، بوو وه‌كو سه‌رۆكێ ليستا ئێكگرتوو بۆ جڤاتا نوونه‌رێن عيراقێ، به‌لێ وى ژى ل گه‌ل پارتيا خوه‌، ئێكگرتوو ئيسلامى كوردستان ژماره‌كا زۆر يا ده‌نگان ژ ده‌ست دان.

ب گۆره‌ى ئامارێن فه‌رمى يێن كۆمسيۆنێ ل سالا 2014ێ ئانكو د هه‌لبژارتنێن بۆرى يێن جڤاتا نوونه‌رێن عيراقێ دا، ل پارێزگه‌ها دهۆكێ ئێكگرتوو ئيسلامى كوردستان شيابوو 84 هزار و 464 ده‌نگان ب ده‌ست خوه‌ ڤه‌ بينيت و به‌ربژارێ وێ جه‌مال كوچه‌ر كو ل وى ده‌مى ژى ژماره‌ ئێك بوو شيا بوو 51 هزار و 358 ده‌نگان ل ده‌ست خوه‌ ڤه‌ بينيت كو ده‌نگێن وى ب تنێ به‌هرا هندێ هه‌بوون ئێكگرتوو دو كورسيان ل پارێزگه‌ها دهۆكێ ب ده‌ست خوه‌ ڤه‌ بينيت.

د هه‌لبژارتنێن ئه‌ڤ ساله‌ يێن جڤاتا نوونه‌رێن عيراقێ دا، ئێكگرتوو ئيسلامى كوردستان ب هه‌موو هێزا خوه‌ ڤه‌ نه‌شيا هندێ ده‌نگێن به‌ربژاره‌كێ خوه‌ يێن هه‌لبژارتنێن بۆرى بينيت كو ده‌نگێن ئه‌ڤ ساله‌ يێن ئێكگرتوو هه‌موو بوونه‌ 43 هزار و 470 و كانديدێ ئێكانه‌ يێ ده‌ركه‌فتى ژى بۆ جڤاتا نوونه‌رێن عيراقێ، دكتور جه‌مال كۆچه‌ر 27 هزار و 744 ده‌نگ بوون.

ب گۆره‌ى چاڤدێران چه‌ند ئه‌گه‌رێن سه‌ره‌كى هه‌بوون بۆ كێمكرنا ده‌نگێن دكتور جه‌مال كۆچه‌ر و ئێكگرتوو ئيسلامى كوردستان كو به‌رچاڤترين ئه‌گه‌ر ژى ئه‌و بوو كو هه‌تا به‌رى چه‌ند هه‌يڤه‌كێن كێم يا پشكدار بوو د حوكمه‌تێ دا و پاشان ژى خوه‌ ڤه‌ كێشا دا بێژيت ئه‌ز د حوكمه‌تێ دا نه‌بووم و كێماسى يێن پارتيا ده‌سته‌لاتدار بوون، د ده‌مه‌كى دا د حوكمه‌تا خوه‌جهيا دهۆكێ دا يا پشكدار بوو.

ئه‌گه‌رێ دويێ يێ گه‌له‌ك به‌رچاڤ ئه‌و بوو هه‌لويستێ دكتورى بوو يێ ل ده‌مێ هه‌وا هه‌لبژارتنان ب كارئينايى، ده‌ما گۆتى كو ئه‌وى كۆژمه‌كێ پاره‌ى يێ بۆ كه‌رتێ په‌روه‌ردێ ل پارێزگه‌ها دهۆكێ دابين كرى و پاشان ژى چه‌ندين روونكرن ل سه‌ر بابه‌تى هاتينه‌ دان و گه‌له‌ك هاتى و چوويى و ل دووماهيێ ژى كه‌سێ راستيا بابه‌تى نه‌زانى.

ئه‌گه‌رێ سيێ ژى يێ كو گه‌له‌ك به‌حس لێ دهێته‌ كرن ئه‌وه‌ كو پشتى هاتنا چه‌كدارێن داعش باوه‌ريا وه‌لاتيان ب پارتيێن ئيسلامى كێم بوويه‌ و ئێدى خه‌لك پشته‌ڤانيا پارتيێن ئيسلامى ناكه‌ن و نموونا ڤێ چه‌ندێ ژى گه‌له‌ك ب ئاشكه‌رايى ل هه‌رێما كوردستانێ ديار بوو كو ئێكگرتوو نيڤا كورسيێن خوه‌ يێن جڤاتا نوونه‌رێن عيراقێ ژ ده‌ست دان.

هه‌ر گرۆڤه‌ ل سه‌ر ڤى بابه‌تى جارا ئێكێ يه‌ ژى ئێكگرتوو ده‌نگێن خوه‌ و جه‌ماوه‌رێ خوه‌ ژ ده‌ست دده‌ت، ب ره‌نگه‌كى د هه‌موو هه‌لبژارتنان دا ده‌نگێن ئێكگرتوو زێده‌ بووينه‌، به‌لێ د هه‌لبژارتنێن ڤێ جارێ دا ب تنێ ل دهۆك ئێكگرتوو زێده‌ترى نيڤا ده‌نگێن خوه‌ ژ ده‌ست داينه‌ و به‌ربژارێ وێ دكتور جه‌مال كۆچه‌ر ژى نێزيكى 25 هزار ده‌نگان ژ ده‌ست داينه‌.