ئه‌ڤرۆنيوز:
پارتى ديموكراتى كوردستان پتريا ده‌نگێن كوردێن هوله‌ندا بده‌ستڤه‌ئينان وئێكه‌تى نشتمانى كوردستان ل پلا سيێ هات.
ل دووڤ ئه‌نجامێن ده‌ستپێكى يێن ده‌نگدانا وه‌لاتيێن كورد يێن هه‌رێما كوردستانێ ل هوله‌ندا ل هه‌لبژارتنێن جڤاتا نوونه‌رێن عيراقێ، پارتى وبزاڤا گۆران وئێكه‌تيێ هه‌موو ده‌نگ بده‌ستڤه‌ئيناينه.
ل چار بنگه‌هێن ده‌نهاخ، رۆتردام، ئايندهۆڤن وگرۆنيگێن ل هوله‌ندا، هه‌ر ئێك ژ پارتى 513 ده‌نگ ، گۆران 324 ده‌نگ، ئێكه‌تيێ 197 ده‌نگ بده‌ستڤه‌ئينان.
ئه‌ڤرۆنيوز:
گه‌له‌ك ژ په‌رله‌مانتارێن عيراقى يێن به‌رده‌وام دژايه‌تيكرنا گه‌لێ كورد ومافێن هه‌رێما كوردستانێ دكر، نه‌شياينه باوه‌ريا ده‌نگده‌رێن عيراقى بده‌ستڤه بينن، ژوان ژى حه‌نان فه‌تلاوى وعاليا نسه‌يف وچه‌ندين كه‌سێن دى.
حه‌نان فه‌تلاوى كو ب هه‌ر شێوه‌كى دژى خواستێن گه‌لێ كورد وهه‌رێما كوردستانێ دراوه‌ستيا، دهه‌لبژارتنێن ڤێ دووماهيێ يێن جڤاتا نوونه‌رين عيراقێ نه‌شيا ده‌نگێن پێدڤى بده‌ستڤه بينيت.
ژبلى حه‌نان فه‌تلاوى، هه‌ڤده‌م عه‌لى عه‌لاق سه‌ركردێ نێزيك ژ حه‌يده‌ر عه‌بادى، كو ب دارێژه‌رێ سزايێن ل سه‌ر هه‌رێما كوردستانێ هاتينه سه‌پاندن پشتى ريفراندۆمێ دهيته نياسين، ب هه‌مان شێوه نه‌شيايه باوه‌ريێ بده‌ستڤه‌بينيت ود هه‌لبژارتنان دا شكه‌ستن ئينايه.
سه‌ركرده‌كێ دى يێن شيعێن عيراقێ كو خوه ب نه‌يارێ دژوارێ هه‌رێما كوردستانێ دزانى وب به‌رده‌وامى دهه‌لويستێن خوه دا دژى هه‌رێما كوردستانێ دراوه‌ستيا، په‌رله‌مانتارێ خۆلا بۆرى (هه‌يسه‌م جبوورى) يه كو ئه‌وژى نه‌شيا دهه‌لبژارتنان دا ب سه‌ركه‌ڤيت.
ديسا عاليا نسه‌يف كو ب به‌رده‌وامى دژايه‌تيا خواستێن گه‌لێ كورد وهه‌رێما كوردستانێ كريه، ل دووڤ پێزانينان ئه‌وژى نه‌شيا بۆ جڤاتا نوونه‌رێن عيراقێ ب سه‌ركه‌ڤيت دڤان هه‌لبژارتنان دا
ئه‌ڤرۆنيوز، عه‌زيز هه‌ورامى:
به‌رپرسه‌كێ پارتى ل سلێمانيێ راگه‌هاند، 50% ژ ده‌نگێن مه ل سلێمانيێ يێن هاتينه دزين وئه‌و ده‌نگێن مه بده‌ستڤه‌ئيناين ده‌نگێن راسته‌قينه يێن پارتى نينن ول پتريا بنگه‌هێن ده‌نگدانێ ژى ل سلێمانيێ بريكارێن مه ژلايێ هێزه‌كا چه‌كدار ڤه هاتينه ده‌ركرن.
عه‌تا شێخ حه‌سه‌ن، په‌يڤدارێ جڤاتا سه‌ركردايه‌تيا سلێمانيێ- هه‌له‌بجه يا پارتى ديموكراتى كوردستان بۆ ئه‌ڤرۆنيوز گۆت” ئه‌و ده‌نگێن پارتى دڤان هه‌لبژارتنان دا ل سلێمانيێ بده‌ستڤه‌ئيناين دبنه نيڤا ده‌نگێن سالا 2014 وژئه‌گه‌رێ دزينا ده‌نگێن مه، ئه‌و ده‌نگ يێن هاتينه كێمكرن نه‌كو ده‌نگێن مه كێم بووينه”.
گۆت ژى” ل سلێمانيێ 54% وه‌لاتيان پشكدارى دده‌نگدانێ دا كر، ل دووڤ وان ئامارێن مه ژ ناوچێن خوه وه‌رگرتين پتر ژ 85% ئه‌ندام ولايه‌نگرێن پارتى پشكدارى دپرۆسا ده‌نگدانێ دا كريه، به‌لێ دئه‌نجامان دا وژئه‌گه‌رێ سه‌خته‌كاريا ئێكه‌تيێ، ده‌نگێن پارتى كێمكرن، ل گه‌ل وێ چه‌ندێ ل ده‌هان بنگه‌هێن ده‌نگدانێ چاڤدێرێن پارتى ژ بنگه‌هێن هه‌لبژارتنێ هاتنه ده‌ركرن وبنگه‌هێن ناڤبرى بوونه سه‌ربازخانه ومه ژ سالا 2014 پتر ده‌نگ بده‌ستڤه‌ئينان، به‌لێ ده‌نگێن مه هاتنه دزين”.
ئه‌ڤرۆنيوز:
په‌رله‌مانتاره‌كێ پارتيا داد وگه‌شه‌پێدان (ئاكه‌په) يا ده‌ستهه‌لاتدار ل توركيا راگه‌هاند، حوكمه‌تا توركيا شاشى ل به‌رامبه‌ر هه‌رێما كوردستانێ كريه.
ل دووڤ ده‌زگه‌هێن راگه‌هاندنێ يێن توركه، ئۆرهان ميرئۆگلۆ په‌رله‌مانتارێ كورد ل فراكسيۆنا ئه‌كه‌پێ راگه‌هانديه” ب دژايه‌تيكرنا كوردان، توركيا نه‌شێت چو پێنگاڤه‌كێ ل رۆژهه‌لاتا ناڤين ب هاڤێژيت”.
ئۆرهان كو خه‌لكێ باژێرێ مێردينێ يه ل باكوورێ كوردستانێ ب ئاماژه‌كرن ب وێ چه‌ندێ كو نوكه توركيا مژوولى راستكرنا سياسه‌تا خوه يا شاشه گۆت” حوكمه‌تا توركيا شاشى ل به‌رامبه‌ر سه‌رۆك بارزانى وهه‌رێما كوردستانێ ل ده‌مێ ئه‌نجامدانا ريفراندۆما سه‌ربخوه‌يا كوردستانێ كر”.
دياركر ژى” ب هيزكرنا په‌يوه‌نديێن ئه‌نقه‌ره وهه‌ولێرێ دبه‌رژه‌وه‌نديا توركيا دايه”.
ئه‌ڤرۆ نيوز:
سه‌فا جابرى،رێڤه‌به‌رێ كاروبارێن كومسيونا بلندا سه‌ربخوه‌يا هه‌لبژارتنان ل عيراقێ، دياركر ، ل چه‌ند ده‌مژمێرێن بهێت، ئه‌نجامێن هه‌لبژارتنان بۆ په‌رله‌مانێ عيراقێ دێ هێنه راگه‌هاندن و گۆت: ڤه‌كولينا ل دۆر ئه‌نجامێن هه‌لبژارتنان ل كه‌ركووكێ چو كاتێكرنێ ل سه‌ر راگه‌هاندنا ئه‌نجامان ناكه‌ت.
ئه‌ڤرۆنيوز:
شه‌ش حزبێن كوردستانى ل باژێرێ سلێمانيێ به‌رى ده‌مه‌كێ كێم كۆمبوون ودووپاتى ل سه‌ر ره‌تكرنا ئه‌نجامێن هه‌لبژارتنان كر وروودانێن شه‌ڤا بۆرى ژى ل سلێمانيێ خسته سه‌ر ستويێ هێزێن ب سه‌ر ئێكه‌تيێ ڤه.
دبه‌ياننامه‌كا هه‌ڤپشك دا كو هه‌ر ئێك ژ ( بزاڤا گۆران، كۆمه‌لا ئيسلامى، ئێكگرتووى ئيسلامى، حزبا شيوعى يا كوردستانى، بزاڤا ئيسلامى وهه‌ڤپه‌يمانيا ژبۆ ديموكراسيێ ودادپه‌روه‌ريێ) پشتى كۆمبوونێ به‌لاڤكرى، هێرشكرنا ل سه‌ر باره‌گايێ سه‌ره‌كى يێ بزاڤا گۆران ژلايێ چه‌ند چه‌كداران ڤه شه‌رمزاركر وراگه‌هاند” ڤى كارى دئێخينه ستوويێ هێزێن ئێكه‌تيێ وئه‌ڤ ره‌فتاره نه‌ديموكراسى ونه‌شارستانى ناڤوده‌نگيا ملله‌تێ مه كێم دكه‌ت”.
ژلايێ خوه‌ڤه، موسه‌نا ئه‌مين نوونه‌رێ ئێكگرتوو ئيسلامى دوێ كۆمبوونێ دا د كونگره‌كێ رۆژنامه‌ڤانى دا پشتى كۆمبوونێ گۆت” مه ڤان چه‌ند حزبان بريار دايه ل رۆژێن داهاتى پێنگاڤێن توندتر وئێكلاكه‌رتر ئه‌نجام بده‌ين وپێدڤيه ئه‌و ئه‌نجامانه بهێنه هه‌لوه‌شاندن وئه‌نجامێن راسته‌قينه بهێنه راگه‌هاندن”.
ل دۆر هێرشا شه‌ڤا بۆرى ل سه‌ر باره‌گايێ سه‌ره‌كى يێ گۆران ، گۆت” دهێرشكرنێ دا ل سه‌ر بزاڤا گۆران، ته‌قه ل وێ ژۆرێ هاته كرن كو سه‌ركردان تێدا دكۆمبوونێ دا بوون، ئه‌ڤه بكارئينانا هێزا چه‌كدارى يا حزبى يه وبزاڤه‌كا تيرۆرستى يه وژئه‌گه‌رێ وێ هێرشێ شۆفێرێ مالپه‌رێ خه‌ندان گيانێ خوه ژده‌ست دا”.
ئه‌ڤرۆ نيوز، نيوار محه‌مه‌د سه‌ليم:
به‌رپرسێ مه‌كته‌با هه‌لبژارتنێن پارتى ديموكراتى كوردستان ل لقا شنگال راگه‌هاند كو هێشتا ده‌نگێن كه‌مپێن ئاواران نه‌هاتينه هژمارتن و هه‌تا ئه‌و ده‌نگ نه‌هێنه هژمارتن هێزا دروست يا پارتى ديار نابيت.
جه‌عغه‌ر شنگالى، به‌رپرسێ مه‌كته‌با هه‌لبژارتنێن پارتى ديموكراتى كوردستان ل لقا شنگال بۆ ئه‌ڤرۆ نيوز گۆت: “هێشتا ده‌نگێن ئاوارێن شنگال ل ناڤا كه‌مپان نه‌هاتينه ژێك جودا كرن و ژ به‌ر هندێ ژى نه‌شێين رێژا دروست يا ده‌نگدان ل شنگال رابگه‌هينين”.
زێده‌تر گۆت: “ئه‌م گه‌له‌ك د گه‌شبينين و پارتى دێ سه‌ركه‌فتنه‌كا گه‌له‌ك مه‌زن ب ده‌ست خوه ڤه ئينيت، به‌لێ ژ به‌ر كو هێزا ده‌نگێن شنگال د كه‌مپێن ئاواران دايه، هێشتا نه‌شيێن بێژين كا چه‌ند به‌ربژارێن شنگال سه‌ركه‌فتينه”.
ل سنورێ قه‌زا شنگال و كه‌مپێن ئاوارێن شنگال نێزيكى 185 هزار ده‌نگده‌ران مافێ ده‌نگدانێ هه‌بوو و رێژه‌كا باش ژ وان ده‌نگده‌ران ده‌نگێ خوه داينه.
پێشتر عسمه‌ت ره‌جه‌ب، به‌رپرسێ لقا 14 ل نه‌ينه‌وا بۆ ئه‌ڤرۆ نيوز راگه‌هاند كو پارتى ديموكراتى كوردستان ل سنورێ پارێزگه‌ها نه‌ينه‌وا حه‌فت كورسى مسوگه‌ر كرينه و شه‌رى بۆ كورسيا هه‌شتێ دكه‌ت و ليستا ئێكێ يا وێ پارێزگه‌هێ يه.
ب ره‌نگه‌كێ گشتى ل سنورێ پارێزگه‌ها نه‌ينه‌وا رێژا پشكداريكرن د هه‌لبژارتنێن گشتى يێ عيراقي دا گه‌هشتبوو 42%ێ.
ئه‌ڤرۆنيوز:
به‌رپرسه‌كێ پارتى ل به‌غدا راگه‌هاند، ب گۆره‌ى ئه‌و ئه‌نجامێن ده‌ستپێكى ئه‌وێن بده‌ست مه كه‌فتين، دگه‌شبينين كورسيه‌كێ بده‌ستڤه‌بينين.
سه‌باح ئاكره‌یی، كارگێرێ لقێ پێنج يێ پارتی دیموكراتی كوردستان ل به‌غدا گۆت” ل پارێزگه‌ها به‌غدا رێژا پشكداريا خه‌لكى دپرۆسا ده‌نگدانێ دا 35% بوو، ئه‌ڤه ژى دبيته ئه‌گه‌ر كو به‌ربژاران پێدڤى ب ده‌نگێ كێمتر هه‌بيت بۆ سه‌ركه‌فتنێ، چونكى هژمارا ده‌نگده‌ران يا كێمبوو كه ئه‌و چه‌نده دبه‌رژه‌وه‌نديا مه‌دا بوو ومه شه‌نسه‌كێ مه‌زن يێ هه‌ى كو به‌رژارێ مه سه‌ركه‌فتنێ ب ده‌ستڤه‌بينيت”.
سه‌باح ئاكره‌یی زێده‌تر بۆ مالپه‌رێ فه‌رميێ پارتى گوت” ب گۆره‌ى وان ئه‌نجامێن ده‌ستپێكى ئه‌وێن گه‌هشتينه مه، به‌ربژارێ مه ل سه‌رجه‌مێ ده‌نگێن بنگه‌هه‌كى گه‌له‌ك ده‌نگ يێن ب ده‌ستڤه‌ئيناين، له‌وما ئه‌م دگه‌شبينين كورسيه‌كێ ل به‌غدا ب ده‌ستڤه‌بينين، ئه‌ڤه ژى سه‌ركه‌فتنه‌كا مه‌زنه بۆ پارتى كو پشتى روودانێن 16 ئوكتۆبه‌رێ كورسيه‌كێ ل به‌غدا ب ده‌ستڤه بينين”.
دياركر” كوردێن به‌غدا ل پتريا ده‌ڤه‌رێن پارێزگه‌ها به‌غدا ده‌نگ ب به‌ربژارێ پارتى ديموكراتى كوردستان دايه”.
نيشاندان