ئەڤرۆ نیوز ، زنار تۆڤی :

سه‌رۆكێ لیژنا به‌رگری و ئاسایشێ ل په‌رله‌مانێ عێراقێ مه‌رجێن لایەنێن كوردستانی بۆ پشكداریكرنێ د حوکمه‌تا نوو یا عێراقێ دا ئاشكراكرن و راگه‌هاندیه ،کو كوردان دوو مه‌رجێن سه‌ره‌كی هه‌نه‌ بۆ پێکئینانا حوکمەتا نوو ، لێ مه‌حاله ئەو مەرج‌ بهێنه‌ بجهئینان.

حاكم زاملی سه‌رۆكێ لیژنا به‌رگری و ئاسایشێ ل پەرلەمانێ عێراقێ بۆ میدیایێن عێراقی گۆتیه ژی : شاندێن جۆدا یێن لایەنێن سه‌ركه‌فتی یێن هه‌رێما كوردستانێ سه‌ره‌دانا به‌غدا كریه‌ و ب تایبه‌ت شاندا پارتی و ئێكه‌تیێ كو د كۆمبوونێن وان یێن ل گه‌ل هه‌موو لایەنێن عێراقی دا وه‌سا دیاربوویه‌ ، كو كوردان دوو مه‌رجێن سه‌ره‌كی هه‌نه ‌، ئه‌و ژی ئاسایكرنا ده‌ڤه‌رێن كێشه‌ ل سه‌ر‌ و مه‌رجێ دویێ ژی، بجهئینانا دستووری و دابینكرنا پشكا 17% ژ بوودجا گشتی یا بۆ هه‌رێما کوردستانێ.

ناڤهاتی گۆت ژی ، ئه‌ڤ هەردو مه‌رجه‌ گه‌له‌ك ب زه‌حمه‌تن و مه‌حاله‌ بهێنه‌ بجهئینان و هه‌ر سه‌رۆك وه‌زیره‌كێ سۆزا بجهئینانێ بده‌تە کوردان ، دێ به‌رپرسیاریەكا مه‌زن كه‌ڤیته ‌ستوویێ وی.

ئەڤرۆ نیوز ، زنار تۆڤی :

كۆمسیۆنا بلند یا سەربەخۆیا هه‌لبژارتنێن عێراقێ ئه‌ڤرۆ راگه‌هاندیە ، کو قانوون رێكێ ناده‌ت ئه‌نجامێن هه‌لبژارتنێن ده‌رڤه‌ بهێنە هه‌لوه‌شاندن ، هەروەسا بریارا په‌رله‌مانێ عێراقێ ژی دێ شه‌ره‌كێ ناڤخوه‌ لدووڤ خوه‌ دا ئینیت.

ریاز به‌دران سه‌رۆكێ جڤاتا كۆمسیاران ل كۆمسیۆنا بلندا سه‌ربەخۆ یا هه‌لبژارتنان ل عێراقێ ئه‌ڤرۆ به‌رسڤا بڕیارا په‌ڕله‌مانی یا هه‌لوه‌شاندنا ئه‌نجامێن هه‌لبژارتنێن ده‌رڤه‌ دا و راگه‌هاند ، کو قانوون رێكێ ناده‌ت ئه‌و داخوازیا په‌رله‌مانێ عێراقێ بهێتە جێبه‌جێكرن.

هه‌روه‌سا دیارکر ژی : هه‌ر گوهۆرینەکا د ئه‌نجامێن هه‌لبژارتنێن پەرلەمانێ عێراقێ دا بهێتە كرن، دێ شه‌ره‌كێ ناڤخوه‌یی ل عێراقێ پەیدا کەت.

په‌رله‌مانێ عێراقێ د روونشتنا خوه‌ یا رۆژا دوشەمبیێ دا، بریار دا کو ئه‌نجامێن هه‌لبژارتنێن ده‌رڤه‌ و ئاواره‌یان بهێنە ره‌ت كرن ، هه‌روه‌سا ل هەر پارێزگەهەکێ دێ رێژا 10% یا دەنگان دێ ب دەست هێنە هژمارتن ، دیسا پەرلەمانی روونشتنا خوە ژی بۆ ده‌مه‌كێ نه‌دیار پاشخست.

ئەڤرۆ نیوز، فاتما مزووری:

به‌رپرسه‌كێ عیراقێ ئاشكه‌را دكەت، كو پتر ژ سێ به‌ربژارێن كو د هه‌لبژارتنان دا سه‌ركه‌فتین، ژ ترسا گڤاشتنانێن ئیرانێ دا موبایلێن خوه‌ گرتینه‌ و جهێ روونشتنا خوه‌ گوهاڕتیە.

به‌ربژاره‌كێ سه‌ركه‌فتی د هه‌لبژارتنان دا كو د حوكمه‌تا نوکە یا عیراقێ پلا وه‌زیر هه‌یه‌، ژبۆ سایتێ كه‌نالێ ره‌شید ئاشكه‌راا كریه‌، ئیران به‌رده‌وام گڤاشتنان ل سه‌ر به‌ربژارێن سه‌ركه‌فتی دکەت، دا كو ب ب یا وان بکەن و بچنە ناڤ وێ هه‌ڤپه‌یمانیا كو ئیران دخوازیت.

وی وه‌زیری كو ناڤێ خوه‌ ئه‌شكه‌را نه‌كریه‌ گۆتیه‌ ژی: پتر ژ سێ به‌ربژارێن سه‌ركه‌فتی موبایلێن خوه‌ گرتینه‌ و جهێ روونشتنا خوه‌ ژی گوهارتینه‌.

ئاماژه‌ ب وێ یه‌كێ ژی كریه‌ كو چار به‌رپرسێن ئیرانێ گڤاشتنێ ل سه‌ر به‌ربژارێن سه‌ركه‌فتی دكه‌ن، ئه‌و ژی قاسم سوله‌یمانی فه‌رمانده‌رێ فه‌یله‌قا قودس یا سه‌ر ب سوپایێ پاسداران، ئیره‌ج مه‌سجدی بالیۆزێ ئیرانێ ل عیراقێ، مه‌حمود شاهره‌وه‌ردی كو زه‌لامه‌كێ ئۆلی یێ به‌رنیاسه‌ ل تەهران و ره‌زا ئازادی ئه‌و ژی به‌رپرسه‌كێ بلندێ سوپایێ پاسدارانه‌.

هه‌مان ژێدەر گۆت ژی: ڤێ جارێ ئیران پێكئانینا حوكمه‌تێ وه‌كو شەرەکی د هەژمێریت.