ئه‌ڤرۆ نیوز:
فرۆكخانه‌كا سه‌ربازی یا رژێما سووریێ ل گونده‌وارێن حۆمسێ كه‌فته به‌ر هێرشا چوار مۆشه‌كان و ژ ئه‌گه‌رێ وێ یه‌كێ ئاگر به‌ربوو فرۆكخانێ.
زیانێن گیانی نه‌هاتنه زانین و چ ئالییان به‌رپرسیارییا خوه ژ هێرشێ رانه‌گه‌هاندنییه لێ ل گۆری گۆتنا رژێمێ وێ چه‌ندین مۆشه‌ك برێیا سیسته‌مێ به‌رگریێ هه‌لوه‌شاندنه.
ئه‌ڤرۆ نیوز:
پارتییا راستروو یا ئه‌لمانیا یا دژی كۆچبه‌ران داخواز كر موسلمانێن ئه‌لمانیا یێن د كاری دا برۆژی د مه‌ها ره‌مه‌زانێ دا ژ كاركرنێ بهێنه قه‌ده‌غه‌كرن.
په‌رله‌مانتاره‌كێ پارتییا (ئه‌ی ئێف دی) ل په‌رله‌مانێ ئه‌لمانیا پێشنیاز كر، نۆشدار و په‌رستیار و فرۆكه‌ڤان و شۆفێرێن پاس و ترێنان یێن موسلمان كو ل مه‌ها ره‌مه‌زانێ رۆژییان دگرن، رێ پێ نه‌هێته دان د وێ مه‌هێ دا كاربكه‌ن.
ل گۆری وی په‌رله‌مانتاری پێدڤییه موسلمان هنده‌ك ژ ده‌ستوورییا خوه یا سالانه بكاربینن دا مه‌ها ره‌مه‌زانێ كار نه‌كه‌ن ب تایبه‌ت ئه‌وێن نه‌شێن شێفتێن شه‌ڤێ ل كاری بده‌ستڤه بینن.
ئەڤرۆ نیوز، باسم قاسم شنگالی:
ئێڤاریا ئه‌ڤرۆ ژ ئه‌نجامێ شورته‌كێ كاره‌بێ ئاگر ب كه‌مپا خانكێ یا ئاوارێن شنگالێ كه‌فته و د ئه‌نجام دا پێنج خیڤه‌ت ب تمامى هاتنه سوتن و كه‌سه‌كێ ژى گیانێ خوه ژ ده‌ست دا.
ژێده‌ره‌كێ ژ كه‌مپا خانێ كو جیرانێن روودانێ نه بۆ ئەڤرۆ نیوز گۆت: (ئێڤاریا ئه‌ڤرۆ ده‌ردورێن ده‌مژمێر 4ێ ئێڤارى ژ ئه‌نجامێ شوته‌كێ كاره‌بێ ئاگر ل كه‌مپا خانكێ یا ئاوارێن شنگالێ كه‌فت و د ئه‌نجام دا كچه‌كێ بناڤێ شلیناز خالد خدر كو دژیێ 16 سالیێ دابوو گیانێ خوه ژ ده‌ست دا و پێنج خیڤه‌ت ژى ب تمامى هاتنه سوتن و زیانێن زور یێن ماددى پشت خوه هێلان).
ئه‌ڤرۆ نیۆز ، عه‌زیز هه‌ورامی :
ئه‌ڤرۆ ب فەرمی دەرگەهێ نیڤ فه‌رمیێ پشته دناڤبەرا پارێزگەها هه‌ڵه‌بجه و ئیرانێ هاتە ڤەكرن،كو ڕۆژانه (300 بۆ 400) ترۆمبێلێن بارهه‌لگر دێ هاتنوچوونێ لێ کەن و ئەڤ،چەندە دێ بزاڤا بازرگانی ل ڤێ دەڤەرێ خۆرت کەت.
عادل مه‌لا سالح رێڤه‌به‌رێ شارەدێی بۆ ئه‌ڤرۆ نیۆز راگه‌هاند:ل هەیڤا دوو یا ئه‌ڤساله ب هاریكاریا حوکمه‌تا هه‌رێما كوردستانێ ئه‌ڤرۆ ب فەرمی جارەکادی مه‌رزێ پشته هاتە ڤەكرن و ب ڤەکرنا ڤی دەرگەهی دێ کاریگەریەکا باش هەبیت بۆ دابەزاندنا بوهایێ کەرەستێن ئافاکرنێ ،دیسا دێ گەلەک دەلیڤێن کاری ژی بۆ خەلکێ سلێمانیێ و هەلەبجە و گەرمیان ژی پەیدا بن .
ئه‌ڤرۆ نيوز:
لژنا سه‌رپه‌رشتيا مواليدان يا سه‌ر ب پارێزگه‌ها دهۆكێ ڤه، ده‌مژمێرێن كاركرنێ بۆ هه‌يڤا خزيرانێ ئاشكه‌را كرن.
ب گۆره‌ى لژنا سه‌رپه‌رشتيكرنا مواليدان ل پارێزگه‌ها دهۆكێ ل هه‌ر ژ ده‌مژمێرێ 7:00ى سپێدێ هه‌تا ده‌مژمێر 1:00ى نيڤرۆ دێ كاره‌ب هه‌بيت و ژ ده‌مژمێر 2:00ى پشتى نيڤرۆ هه‌تا 5:00ى سپێدێ.
ل قه‌زا و ناحيێن سه‌ر ب پارێزگه‌ها دهۆكێ ڤه ل دووڤ ره‌وشا و داخوازيا كارگێريێن وان دێ هێنه دياركرن.
ئه‌ڤرۆ نيوز:
لژنا سه‌رپه‌رشتيا مواليدان يا سه‌ر ب پارێزگه‌ها دهۆكێ ڤه، بهايێ ئه‌مپێرێ كاره‌بێ بۆ هه‌يڤا گۆلانێ ئاشكه‌را كر.
ب گۆره‌ى لژنا سه‌رپه‌رشتيكرنا مواليدان ل پارێزگه‌ها دهۆكێ ل قه‌زايێن دهۆك و سێمێل 7:00 هزار دينارن و ل زاخۆ 7:500 دينارن.
ب گۆره‌ى لژنا سه‌رپه‌رشتيا مواليدان ژ 250 ديناران هه‌تا 1750 ديناران وه‌كو قه‌ر ل سه‌ر ئه‌مپێرێ كاره‌بێ هاتينه زێده‌كرن ل جهێ وان هه‌يڤێن بۆرى يێن بهايێ وان گه‌له‌ك و هاتيه كێمكرن.
ل ده‌ڤه‌رێن دژى ل دووڤ ڤى خشتێ ل خوارێ يه.
ئه‌ڤرۆنیوز:
جڤاتا كۆمسیۆنا بلند یا هه‌لبژارتن وراپرسیان ل هه‌رێما كوردستانێ ب تێكرایا ده‌نگان بریار دا دهه‌لبژارتنێن كوردستانێ دا ب چو جۆره‌كى سیسته‌مێ ئه‌لكترۆنى بۆ ده‌نگدانێوجوداكرنا ده‌نگان ژى نه‌هێته بكارئینان.
كۆمسیۆنا بلند یا هه‌لبژارتن وراپرسیان ل هه‌رێما كوردستانێ ئه‌ڤرۆ پێنجشه‌مبى 24/5/2018 ل دۆر چه‌ندین پرسان كۆمبوو كو ئێك ژوان ره‌تكرنا بكارئینانا سیسته‌مێ ئه‌لكترۆنى بوو دهه‌لبژارتنێن هه‌رێما كوردستانێ دا.
پشتى كۆمبوونێ، شێروان زرارى په‌یڤدارێ كۆمسیۆنا بلند یا هه‌لبژارتن وراپرسیان ل هه‌رێمێ دكۆنگره‌كێ رۆژنامه‌ڤانى دا راگه‌هاند” دكۆمبوونا ئه‌ڤرۆ دا بریار هاته دان ل هه‌لبژارتنێن په‌رله‌مانێ كوردستانێ كو بریاره ل 30/9/2018 بهێنه ئه‌نجامدان ده‌نگ ب ده‌ستى بهێنه هژمارتن”.
شێروانى گۆت ژى” دێ بزاڤێ كه‌ین هه‌لبژارتنێن هه‌رێما كوردستانێ گه‌له‌ك دجودا بن ژ هه‌لبژارتنێن عیراقێ وسیسته‌مێ ئه‌لكترۆنى نه‌هێته بكارئینان”.
دیاركر ژى” كۆمسیۆنا كوردستانێ به‌رهه‌ڤیان دكه‌ت بۆ وێ چه‌ندێ رێگریێ ل هه‌ر كه‌م وكوریه‌كێ وهه‌ولێن سه‌خته‌كاریێ دهه‌لبژارتنێن هه‌رێما كوردستانێ بكه‌ت”.
ئه‌ڤرۆنیوز:
كۆمسیۆنا بلند یا هه‌لبژارتن وراپرسیان ل هه‌رێما كوردستانێ دبه‌یانه‌كێ دا ژڤانێ تۆماركرنا قه‌وارێن سیاسى یێن هه‌رێما كوردستانێ راگه‌هاند.
كۆمسیۆنا بلند یا هه‌لبژارتن وراپرسیان ئه‌ڤرۆ پێنجه‌شه‌مبى 24/5/2018 دیاركر كو تۆماركرنا قه‌وارێن سیاسى دێ ل 27/5/2018 ده‌ستپێكه‌ت هه‌تا 7/6/2018.
ل سه‌ر راسپاردا سه‌رۆك وه‌زیرێن هه‌رێما كوردستانێ، رۆژا 30/9/2018 وه‌كو ژڤانێ ئه‌نجامدانا هه‌لبژارتنێن په‌رله‌مانێ كوردستانێ هاته دیاركرن.
كۆمسیۆنا بلند یا هه‌لبژارتن وراپرسیان ئه‌ڤرۆ دكۆنفرانسه‌كێ رۆژنامه‌ڤانى دا راگه‌هاند كو هژمارتنا ده‌نگان دهه‌لبژارتنێن په‌رله‌مانێ كوردستانێ دێ ب ده‌ست بیت.
ئه‌ڤرۆنیوز:
ئه‌ڤرۆ پێنج شه‌مبى 24/5/2018 ل به‌غدا شاندێ پارتى ب سه‌رۆكاتیا فازل میرانی ل گه‌ل ئیره‌ج مه‌سجدى بالیۆزێ ئیرانێ ل عیراقێ كۆمبوو.
فازل میرانى سه‌رۆكێ شاندێ پارتى دكۆنگره‌ێ رۆژنامه‌ڤانى دا پشتى كۆمبوونێ راگه‌هاند، مه په‌یوه‌ندیه‌كا دۆستانه ل گه‌ل ئیرانێ یا هه‌ى ول گه‌ل وى وه‌لاتى هه‌ڤكارێن هه‌ڤدو بووینه، ئیران رۆله‌كێ گرنگ ل ده‌ڤه‌رێ دبینیت وخوه‌شبه‌ختانه خالێن هه‌ڤپشك وبۆچوونێن مه دپرسان دا ئێكجار دزۆر بوون، ئه‌م هه‌ردو لایه‌ن گه‌هشتینه وێ باوه‌ریێ كو نابیت له‌زێ بكه‌ین دقۆناغا نوكه یا عیراقێ پشتى هه‌لبژارتنان، به‌لكو دانوستاندنه‌كا به‌رده‌وام هه‌بیت باشه، چ ل ڤێرێ بیت وچ ل هه‌ولێرێ، یان جهێن دى ژبۆ وێ چه‌ندێ بشێن بریارێن سه‌ركه‌فتى بده‌ین بۆ خزمه‌تا عیراقێ وهه‌رێمێ وئاشتیێ ل ده‌ڤه‌رێ.
هه‌ر دوى كۆنگرێ رۆژنامه‌ڤانى دا، ئیره‌ج مه‌سجدى بالیۆزێ ئیرانێ ل عیراقێ گۆت” مه وه‌كو كۆمارا ئیسلامى یا ئیرانێ په‌یوه‌ندى وهه‌ماهه‌نگیه‌كا باش ل گه‌ل هه‌رێما كوردستانێ یا هه‌ى ودكۆمبوونا مه‌دا ل گه‌ل شاندێ بلندێ پارتى مه هیڤى خواست حوكمه‌تا داهاتى یا عیراقێ یا ب هیز بیت ومه دیاركر كو جارێ زوویه به‌حسێ پێكئینانا حوكمه‌تا نوو یا عیراقێ بهێته كرن.
ئەڤرۆ نیوز ، زنار تۆڤی :
ل شەڤا ئێکشەمبی 27 گولانا 2018 سالڤەگەرا پارێزگەهبوونا دهۆکێ ل پارکا نەورۆز ل دهۆکێ دێ هێتە ساخکرن.
د ڤی واری دا کاوا نوری رێڤەبەرێ تیپ و سەنتەران ل پارێزگەها دهۆکێ بۆ مالپەرێ ئەڤرۆ نیوز دا دیارکرن : کو ب هەلکەفتا رۆژا پارێزگەهبوونا دهوکێ 27/5/2018 و ب پالپشتیا پارێزگەها دهوکێ ، رێڤەبەریا گشتی یا رەوشەنبیری و هونەری دهۆک ب پرانیا سازیێن خوەڤە ،ل گەل کۆمەکا سازیێن دی یێن حکومی و جەماوەری دێ ڤێ هەلکەفتێ ساخکەتن ، دیسا دێ کومەکا چالاکیان وەکی پێشانگەهێن شێوەکاری وکەلتۆری و پێشانگەهێن پرتووکان تێدا هێنە ئەنجامدان .
ناڤهاتی گوت ژی :د 39 سالیا پارێزگەها دهۆکێ دا دێ یاریێن سیرکێ ژی هێنە ئەنجامدان ،دیسا دێ ئاهەنگەکا هونەری ژی ب پشكداريا تيپا رووباد يا موزيكێ و ب پشکداریا سترانبێژان عەبدولقهار زاخويى و رێكێش سەيرانى و ديلانار و ئاشڤان فەرەج هێتە ئەنجامدان ، هەروەسا دێ کۆمەکا دی یا چالاکیان و نمایشکرنا جل و بەرگان ژی تێدا هێتە ئەنجامدان.
دهۆک ل سالا 1969 بوویە پارێزگەه و ژ حەفت قەزایان پێک دهێت.
نيشاندان