ئه‌ڤرۆ نيوز:
ل هژمارا خوه يا تايبه‌ت ل تورا تويته‌رى، سه‌رۆك بارزانى په‌يامه‌ك ب هه‌لكه‌فتا هاتنا هه‌يڤا ره‌مه‌زانێ به‌لاڤكريه و تێدا هاتيه: ب هه‌لكه‌فتا هاتنا هه‌يڤا ره‌مه‌زانێ، پيرۆزباهيێ ل موسلمانێن كوردستانێ و عيراقێ و جيهانێ دكه‌م، هيڤى خوازم ژ خودايێ مه‌زن ئه‌ڤ هه‌يڤه يا پر بيت ژ به‌ره‌كه‌تێ، عيباده‌تێ هه‌موو لايه‌كێ قه‌بوول بيت.
ئه‌ڤرۆنيوز:
رۆژنامه‌ڤان ئازاد گۆله‌يى ب ناڤێ رۆژناما ئه‌ڤرۆ دێ به‌رهه‌ڤى ياريا دووماهيا قاره‌مانيا يوروپا ليگ كو ئه‌ڤ شه‌ڤه ل باژێرێ ليون يێ فه‌ره‌نسى دناڤبه‌را يانا ئه‌تله‌تيكۆ مه‌دريد يا ئيسپانى ومارسيليا يا فه‌ره‌نسى هێته ئه‌نجامدان.
ل دۆر رۆمالكرنا راگه‌هاندنێ بۆ ڤێ ياريێ كو دێ ل ده‌مژمێر 9:45 ب ده‌مێ كوردستانێ هێته ئه‌نجامدان، ئازاد گۆله‌يى دبێژيت” رۆژناما ئه‌ڤرۆ تاكه ده‌زگه‌هێ رۆژنامه‌ڤانى يێ عيراقى وكوردستانى يه كو ڤێ ياريێ دێ رۆمال كه‌ت”.
ئازادى گۆت ژى” رۆژنامه‌ڤانێن 330 ده‌زگه‌هێن راگه‌هاندنێ يێن جيهانى ژ چه‌ندين وه‌لاتان دێ ڤێ ياريێ رۆمال كه‌ن”.
ئه‌ڤرۆ نیوز ، نه‌وزاد هلۆرى:
ئێڤاریا ئه‌ڤرۆچارشه‌مبى 16/5/2018 ل گوندێ گه‌ویلان سه‌ر ب ناحیا بجیل ل قه‌زا ئاكرێ ، ژ ئه‌گه‌رێ وه‌رگه‌ریانا ترومبێله‌كێ سێ كه‌سان گیانێ خوه ژ ده‌ست دا و چار ژى برینداربوون.
كاروان زێوه‌ر، رێڤه‌به‌رێ هاتنوچۆنا ئاكرێ بۆ ئه‌ڤرۆ نیوز گۆت” ئێڤاریا ئه‌ڤرۆ ل گوندێ گه‌ویلان ل ناحیا بجیڵ يا سه‌ر ب قه‌زا ئاكرێ ڤه ، ژ ئه‌گه‌رێ وه‌رگه‌ریانا ترومبێله‌كێ ژ جۆرێ(پیكئاب ، بارهه‌لگر) سێ كه‌سان گیانێ خوه ژ ده‌ست دا و چار ژى برینداربوون”.
زێده‌تر گۆت” ئه‌و كه‌سێن گیانێ خوه ژ ده‌ستداين ژنه‌ك و دو زه‌لامن و خه‌لكێ ده‌وروبه‌رێ ناحیا بجيل بوون وژيێن وان دناڤبه‌را 18 سالى هه‌تا 50 سالى بوون”.
ئاماژه دا” بریندارێن روودانێ كو چار كه‌س بوون هاتنه ره‌وانه‌كرن بۆ نه‌خوه‌شخانا ته‌نگاڤیان ل ئاكرێ”.
ئه‌ڤرۆنيوز:
رۆژنامه‌كا سعودى دراپۆرته‌كێ دا به‌لاڤكر، پشتى دياركرنا ئه‌نجامێن هه‌لبژارتنان هه‌ڤپه‌يمانيى دناڤبه‌را ليستێن سه‌ركه‌فتى ب له‌ز دێ هينه دروستكرن، هه‌ر ئێك ژ حه‌يده‌ر عه‌بادى وعه‌لى دواى پاريزگه‌رێ مه‌يسان ب هيزترين دو به‌ربژارن بۆ وه‌رگرتنا پۆستێ سه‌رۆك وه‌زيرێن عيراقێ.
رۆژناما (عوكاز) يا سعودى دراپۆرته‌كێ دا به‌لاڤكر” وه‌لاتيێن عيراقێ داخواز دكه‌ن هه‌ڤپه‌يمانى دناڤبه‌را وان لايه‌نان دا بهێته پێكئينان كو دهه‌لبژارتنان دا سه‌ركه‌فتين، تاكو ئه‌و حوكمه‌تا داهاتى پێكبينن، دانوستاندن بۆ دامه‌زراندنا حوكمه‌تا نوو كاره‌كێ ب ساناهى نابيت چونكى ئه‌نجامێن هه‌لبژارتنان به‌روڤاژى پێشبينيان بوون ، ژلايه‌كێ دى ڤه گرژىێن دناڤبه‌را واشنتۆن وته‌هرانێ يێن زێده‌تر بووين، پشتى ڤه‌كێشانا ئه‌مريكا ژ رێكه‌فتنا ئه‌تۆمى،كو هه‌ردو وه‌لاتان كاريگه‌رى ل سه‌ر عيراقێ يا هه‌ى”.
ده‌زگه‌هێن راگه‌هاندنێ يێن عيراقى به‌لاڤكر كو هه‌ر ئێك ژ ده‌وله‌تا قانوونێ وفه‌تح ووه‌ته‌نيه ده‌ست ب دانوستاندنان كريه وچاڤه‌رێ ليستا چارێ نه تاكو ل گه‌ل وان بهێته دناڤ هه‌ڤپه‌يمانيێ دا ومه‌زنترين فراكسيۆنا دناڤ جڤاتا نوونه‌ران دا دروست بكه‌ن، هه‌ڤپه‌يمانيا سائيرون كو ژ ره‌وتێ سه‌درى وحزبا شيوعى يا عيراقى پێكهاتيه، سه‌ركه‌فتيا ئێكێ يه دهه‌لبژارتنان دا ومافێ وێ يێ هه‌ى سه‌رۆك وه‌زيرێن داهاتى ديار بكه‌ت، هه‌كه به‌رى روونشتنا ئێكێ يا جڤاتا نوونه‌ران مه‌زنترين هه‌ڤپه‌يمانى دروست بكه‌ن، بۆ وێ چه‌ندێ هه‌مان چاره‌نڤيسێ ليستا ئه‌ياد عه‌لاوى ب سه‌رێ وێ دووباره نه‌بيته‌ڤه كو ل هه‌لبژارتنێن 2010 .
ل دۆر سه‌رۆك وه‌زيرێن داهاتى يێ عيراقێ، رۆژناما (عوكاز) يا سعودى دبێژيت” عه‌بادى باشترين ده‌ليڤه هه‌بوو كو دوباره وى پۆستى وه‌ربگريت، به‌لێ نه بده‌ستڤه‌ئينانا ده‌نگێن پێدڤى دهه‌لبژارتنان دا وبده‌ستڤه‌ئينانا رێزا پێنجێ ل به‌غدا وسيێ ل ئاستێ عيراقێ، ئه‌و ده‌ليڤه كێمكر له‌وما تاكه ده‌ليڤه ل به‌رده‌م عه‌بادى مابيت، دروستكرنا هه‌ڤپه‌يمانيێ يه ل گه‌ل سه‌درى، به‌لێ ئه‌ڤ چه‌نده ژى يا رۆهن نينه كو سه‌در دان پێدانێ ب عه‌بادى وسياسه‌تا وى ل ناڤخوه وده‌رڤه دكه‌ت تا پشته‌ڤانيێ لێ بكه‌ت، يان ژى چاوان هزر دوێ چه‌ندا دا دكه‌ت”.
ئاماژه دا”ئێك ژوان كه‌سێن به‌رێ ده‌ركه‌فتنا ئه‌نجامێن هه‌لبژارتنان ژى ژلايێ سه‌درى ڤه هاتيه پێشنيازكرن بۆ وه‌رگرتنا پۆستێ سه‌رۆك وه‌زيرێن عيراقێ ئه‌وژى (عه‌لى دواى) كو نوكه پارێزگه‌رێ مه‌يسانه، هه‌كه به‌ره‌يێ حيكمه ب سه‌رۆكاتيا عه‌مار حه‌كيم وسه‌در هه‌ڤپه‌يمانيێ پێكبينن، به‌ربژارێ حيكمه دێ عه‌بدولحسێن عه‌بتان بيت كو نوكه وه‌زيرێ وه‌رزش ولاوانه ل عيراقێ”.
خوياكر ژى كو لايه‌نه‌كێ دى يا بزاڤان بۆ پێكئينانا حوكمه‌تێ، دروستكرنا مه‌زنترين هه‌ڤپه‌يمانيه ژلايێ عامرى ومالكى ل گه‌ل فراكسيۆنێن سونى وهنده‌ك حزبێن كوردستانى وفشار خستن ل سه‌ر هه‌ڤپه‌يمانيا نه‌سر ب سه‌رۆكاتيا عه‌بادى بۆ چوونا دناڤ وێ هه‌ڤپه‌يمانيێ دا، تاكو مالكى يان عامرى بكه‌نه سه‌رۆك وه‌زيرێن عيراقێ، به‌لێ ئه‌ڤ چه‌نده ژى ئه‌سته‌مه وكێمترين ئومێدا دروستبوونێ يا هه‌ى.
ئه‌ڤرۆنيوز:
هژماره‌كا سه‌ركردێن عيراقى، ل گه‌ل سه‌رۆك بارزانى، ب رێيا ته‌له‌فۆنێ، ئه‌نجامێن هه‌لبژارتنێن جڤاتا نوونه‌رێن عيراقێ به‌حس دكه‌ن.
ل رۆژێن سێشه‌مبى 15/5/2018 وچارشه‌مبى 16/5/2018، هه‌ر ئێك ژ موقته‌دا سه‌در سه‌رۆكێ ره‌وتى سه‌درى وهه‌ڤپه‌يمانيا سائيرون، هادى عامرى سه‌رۆكێ هه‌ڤپه‌يمانيا فه‌تح، عه‌مار حه‌كيم سه‌رۆكێ ره‌وتێ حيكمه، حه‌يده‌ر عه‌بادى سه‌رۆك وه‌زيرێن عيراقێ وسه‌رۆكێ ليستا نه‌سر ووئاد مه‌عسووم سه‌رۆك كۆمارا عيراقێ ب رێيا په‌يوه‌نديێن ته‌له‌فۆنى ئه‌نجامێن هه‌لبژارتنان ل گه‌ل سه‌رۆك بارزانى به‌حس كرن.
هه‌ر دوان په‌يوه‌نديێن ته‌له‌فۆنى دا، سه‌ركردێن عيراقێ پيرۆزباهيا سه‌ركه‌فتنا ليستا پارتى ديموكراتى كوردستان دهه‌لبژارتنان ل سه‌رۆك بارانى كر وهزروبۆچوونێن خوه ل دۆر قۆناغا پشتى هه‌لبژارتنان ل گه‌ل سه‌رۆك بارزانى ئالوگۆركر.
ئه‌ڤرۆ نیوز، ره‌وان نهێلى
ئیدریس هه‌ركى سه‌رۆكێ لژنا یاسایى ل جڤاتا پارێزگه‌ها دهۆكێ بۆ ئه‌ڤرۆ نیوز دیاركر كو ل سه‌ر داخوازیا وان بۆ ئه‌نجامدانا گوهۆرینێن ئیدارى ل سنورێ پارێزگه‌ها دهۆكێ، رۆژا 8/4/2018 پارێزگه‌رێ دهۆك نڤیساره‌ك ئاراسته‌ى جڤاتێ كر بۆ گوهۆرینا پێنج رێڤه‌به‌رێن گشتى ل پارێزگه‌ها دهۆك و گۆت” ئه‌ڤرۆ مه ده‌نگدان ل سه‌ر ناڤێ به‌ربژاران كر و كه‌سێ پرانیا ده‌نگان بده‌ستڤه دئینیت، ل دووڤ عورفێ یاسایى ئه‌و دێ بیته رێڤه‌به‌ر كو دێ ب نڤيساره‌كا فه‌رمى ئه‌ڤ ناڤێن ل خوارێ و ل دووڤ رێژا ده‌نگێن بده‌ستڤه ئيناى، ناڤێن وان ل رێزبه‌نديا ئێكێ و دوێ و سيێ هێنه بلندكرن ، ب مه‌ره‌ما ده‌ستنيشانكرنا كه‌سه‌كى.
ئه‌ڤرۆنيوز:
پشتى كو جڤاتا پارێزگه‌ها دهۆكێ ئه‌ڤرۆ چار شه‌مبى 16/5/2018 كۆمبووى ، ب دووماهى ئينانا كارێ پێنج رێڤه‌به‌رێن گشتى ل پارێزگه‌ها دهۆكێ كو ده‌مێ وان يێ قانوونى دوان پۆستان ب دووماهى هاتيه.
هوشیار فه‌ریق گولى، سه‌رۆكێ فراكسيۆنا پارتى ل جڤاتا پارێزگه‌ها دهۆك بۆ ئه‌ڤرۆ نیوز گۆت” ئه‌ڤرۆ جڤاتا پارێزگه‌ها دهۆكێ كومبوو و تێدا بریارا ب دووماهى ئينانا كارێ پێنج رێڤه‌به‌رێن گشتى ل دهۆكێ په‌سه‌ندكر ول شوينا وان هژماره‌كا كه‌سان وه‌كو به‌ربژار بۆ وه‌رگرتنا وان پۆستان ده‌ستنیشانكرن و دێ بۆ جڤاتا وه‌زيرێن هه‌رێما كوردستانێ هێنه هنارتن تاكو هه‌لبژێرن”.
زێده‌تر گۆت” ئه‌ڤ هه‌ر پێنج پۆسته پێشتر بۆ پارتى بوون و دێ هه‌ر بۆ پارتى ژى بن و رۆژانێن داهاتى دێ كار ل سه‌ر ده‌ستنیشانكرنا كه‌سه‌كێ بۆ پوستێ جێگرێ پارێزگارێ دهوكێ ژى كه‌ین”.
ل دۆر ناڤێن وان به‌ربژاران بۆ پێنج پۆستان، گۆت” هه‌ر ئێك ژ دیار به‌حرى ره‌سول ، نزار سه‌عید ته‌مه‌ر و خه‌ڵات ئه‌بوبه‌كر عوسمان هاتینه به‌ربژاركرن بۆ وه‌رگرتنا پۆستێ رێڤه‌به‌ريا گشتى گشتى یا باژێرڤانیێن پارێزگه‌ها دهۆكێ ، دژوار شه‌وكه‌ت تاهیر ، به‌هجه‌ت عه‌لى ئیبراهیم و كوردو ئێحسان عه‌بدولسه‌مه‌د هاتینه به‌ربژاركرن بۆ وه‌رگرتنا پوستێ رێڤه‌به‌ریا گشتى یا وه‌به‌رهێنانێ ل پارێزگه‌ها دهۆكێ ، و هه‌ر ئێك ژ عومه‌ر عه‌لى ته‌ها ، زیاد عابد سه‌لیم و حه‌سه‌ن سه‌لیم چه‌له‌بى هاتینه به‌ربژاركرن بو وه‌رگرتنا پۆستێ رێڤه‌به‌ریا گشتى یا په‌روه‌ردێ ل پارێزگه‌ها دهۆكێ ، هه‌ر ئێك ژ رزا نائیف قادر ، شێرزاد حه‌مید حه‌سه‌ن و داود موراد خودێدا هاتینه به‌ربژاركرن بۆ وه‌رگرتنا پوستێ رێڤه‌به‌ریا گشتى یا چاڤدێرى و گه‌شه‌پێدانا جڤاكى ل پارێزگه‌ها دهۆكى ، و هه‌ر ئێك ژ ژیان موسته‌فا ته‌ها ، ره‌جه‌ب ئیبراهیم جاسم و ژیان سه‌عید ئیسماعیل هاتینه به‌ربژاركرن بۆ وه‌رگرتنا پۆستێ رێڤه‌به‌ریا گشتى یا كاروبارێن شه‌هید و ئه‌نفالكریان ل پارێزگه‌ها دهۆكێ”.
ئه‌ڤرۆنيوز:
ڤه‌كۆله‌ر ونڤيسه‌ره‌كێ عێراقى راگه‌هاند، دهه‌لبژارتنێن جڤاتا نوونه‌رێن عێراقێ دا (زه‌لامێ چيا) سه‌ركه‌فتنه‌كا مه‌زن بده‌ستڤه ئينا.
فايز خه‌فاجى، نڤيسه‌ر وڤه‌كۆله‌رێ ديرۆكى كو خه‌لكێ به‌سرايه دبه‌رپه‌رێ خوه ل سه‌ر تۆرا فه‌يسبووكى به‌لاڤكر” سه‌رۆك مه‌سعود بارزانى كو ژچيايان هاتيه، سه‌ره‌راى نسكۆيان، به‌رده‌وام ب هێز دمينيت”.
خه‌فاجى دياركر” سه‌رۆك بارزانى هژماره‌كه وديارده‌كا سياسى يه ودشيان دا نينه گوه ل وى نه‌هێته گرتن” نموونه ژى بۆ ڤێ چه‌ندێ ئينا وگۆت” دهه‌لبژارتنێن جڤاتا نوونه‌رێن عێراقێ دا ب تنێ وبێ چو هه‌ڤپه‌يمانيه‌ك پشكدارى كر”.
گۆت ژى” ژبه‌ركو بارزانى هه‌لگرێ هزرا سه‌ربخوه‌يا كوردستانێ يه، ريفراندۆما سه‌ربخوه‌يێ ئه‌نجامدا وبه‌رده‌وام ژى ئاستێ جه‌ماوه‌ريا وى بلند دبيت”.
فايز خه‌فاجى كو دنڤيسينا خوه دا ناڤێ سه‌رۆك بارزانى ب (زه‌لامێ چيا) ئينايه، دووپاتيێ ل وێ چه‌ندێ دكه‌ت كو سه‌ره‌راى دژايه‌تيا حوكمه‌تا عيراقێ ولايه‌نێن هه‌ڤرك، به‌لێ دهه‌لبژارتنێن جڤاتا نوونه‌رين عيراقێ دا (زه‌لامێ چيا) ب سه‌ركه‌فت”.
ئه‌ڤرۆنيوز:
به‌رپرسێن ساخله‌ميێ يێن باژێرێ خوره‌م ئاباد ناڤه‌ندا پارێزگه‌ها لورستان ل رۆژهه‌لاتا كوردستانێ، سێ وه‌لاتيێن كورد ژئه‌گه‌رێ خوارنا كڤاركێن ژه‌هراوى گيانێ خوه ژده‌ست دا.
سه‌عيد ره‌حيمى، رێڤه‌به‌رێ نه‌خوه‌شخانا خوره‌م ئاباد دياركر كو ل وه‌رزێ بهارێ وژئه‌گه‌رێ بارانێن زۆر، خه‌لك قه‌ستا كويستانان دكه‌ن وگژ وگياى وكڤاركان دئينن كو هنده‌ك ژوان كڤاركان دژه‌هراوى نه كو ل ڤى ده‌مى نێزيكى 130 وه‌لاتيان ژ ئه‌گه‌رێ خوارنا وان جۆره كڤاركان ژه‌هراوى بوون وسێ كه‌سان گيانێ خوه ژده‌ست دايه.
دياركر ژى” ئێك ژوان سێ كه‌سان، ل نه‌خوه‌شخانا خوره‌م ئاباد گيانێ خوه ژده‌ست دا ودو كه‌سێن دى بۆ ئه‌نجامدا نشته‌رگه‌ريا مێلاكێ هاتنه هنارتن بۆ نه‌خوه‌شخانا شيراز كو ل وێرێ هه‌ردويان گيانێ خوه ژ ده‌ست دا”.
ل چه‌ند رۆژێن بۆرى ل باژێرێ كه‌رمانشان ژئه‌گه‌رێ خوارنا كڤاركێن ژه‌هراوى پێنج كه‌سان گيانێ خوه ژده‌ست دابوو وزێده‌تر ژ 200 كه‌سان ژى ژه‌هراوى بوون.
ئه‌ڤرۆنيوز:
سه‌رۆك وه‌زيرێن هه‌رێما كوردستانێ ل دۆر به‌لاڤكرنا مووچان، مووچه‌خۆرێن هه‌رێما كوردستانێ پشت راست دكه‌ت.
ێچيرڤان بارزانى، سه‌رۆك وه‌زيرێن هه‌رێما كوردستانێ، ئه‌ڤرۆ چارشه‌مبى 16/5/2018 دكۆنفرانسه‌كێ رۆژنامه‌ڤانى دا ل هه‌ولێرێ به‌حسێ به‌لاڤكرنا مووچێ فه‌رمانبه‌ران كر وره‌تكر كو ل گه‌ل ب دووماهى هاتنا هه‌لبژارتنان، به‌لاڤكرنا مووچان ب دووماهى هاتبيت.
نێچيرڤان بارزانى دووپاتى ل سه‌ر وێ چه‌ندێ كر كو پاره وه‌كو خوه بۆ هه‌رێما كوردستانێ دهێت وچو كێشه دروست نه‌بووينه ودێ به‌رده‌وام ژى بين وب پێدڤى ژى نه‌زانى مووچه‌خۆر ل دۆر ڤێ چه‌ندێ دو دل ببن.
دياركر ژى” هه‌كه بزانين دێ كێشه ل دۆر به‌لاڤركرنا مووچان دا دروست بيت، هه‌ر ئه‌ز ب خوه دێ بێژمه خه‌لكى كو مه كێشه يا هه‌ى، به‌لێ ئه‌ز چو كێشان دڤى بابه‌تى دا نابينم”.
نيشاندان