ئه‌ڤرۆنيوز:

حه‌يده‌ر عه‌بادى سه‌رۆكێ ليستا ئه‌لنه‌سر وتيما وى يا هه‌لبژارتنان، ل باژێرێن عيراقێ دگه‌ريێت ومولكێ گشتى بكاردئينيت بۆ بانگه‌شا هه‌لبژارتنێ وئه‌ڤ چه‌نده‌ بوويه‌ دلته‌نگيا چه‌ندين پێكهاتێن عيراقێ.

عه‌بادى دهه‌وا بانگه‌شا هه‌لبژارتنان دا ده‌ستهه‌لاتا خوه‌ وه‌كو سه‌رۆك وه‌زيريان بكاردئينيت وئامرازێن ڤه‌گوهاستنا ده‌وله‌تا عيراقێ ژفرۆكه‌ وئامرازێن دى بكاردئينيت.

ژێده‌ره‌كێ ئه‌منى ل كه‌ركووكێ راگه‌هاند” ئه‌ڤرۆ شه‌مبى 28/4/2018 حه‌يده‌ر عه‌بادى سه‌رۆكێ ليستا نه‌سر گه‌هشته‌ كه‌ركووكێ وهێزێن دژه‌ تيرۆر وپۆليسێن فيدرالى هاتن به‌لاڤكرن وپێرابوونێن ئه‌منى يێن توند ل كه‌ركووكێ هاتن وه‌رگرتن.

عه‌بادى دسه‌ره‌دانێن خوه‌ يێن ڤێ دووماهيێ دا بۆ سلێمانيێ وهه‌ولێرێ وكه‌ركووكێ وتكريتێ، كو وه‌كو سه‌رۆكێ ليسته‌كا هه‌لبژارتنان سه‌ره‌دانا وان باژێران كربوو نه‌كو سه‌رۆك وه‌زيرێن عيراقێ، به‌لێ دهاتن وچوونێن خوه‌دا بۆ وان باژێران فرۆكه‌كێ له‌شكرى بكاردئينا.

مه‌به‌ستا سه‌ره‌دانا عه‌بادى بۆ كه‌ركووكێ، بانگه‌شه‌كرن بوو بۆ ليستا خوه‌، دده‌مه‌كى دا په‌رله‌مانێ عيراقێ ل هه‌يڤا چريا ئێكێ سالا 2013، قانوونا هه‌لبژارتنێن عيراقێ ده‌ركربوو وتێدا دبرگا هژمار 27 دبێژيت ” نابيت كارمه‌ندێن ده‌زگه‌هێن ده‌وله‌تێ وده‌ستهه‌لاتێن ناڤخوه‌يى، ده‌ستهه‌لاتا پۆستێن خوه‌ يان ژێده‌رێن دارايى يێن ده‌وله‌تى يان ئامراز وئاميرێن ده‌وله‌تى دمفايێ خوه‌ يان هه‌ر به‌ربژاره‌كێ دى بهێنه‌ بكارئينان”.

ئه‌ڤرۆنيوز:

كۆمسيۆنا بلند يا هه‌لبژارتنان ل عيراقێ ل دۆر هه‌لبژارتنێن په‌رله‌مانێ عيراقێ كو به‌رياره‌ ل 12/5/2018 بهێنه‌ ئه‌نجامدان، برياره‌كا نوو ده‌ركر.

سه‌عيد كاكه‌يى، ئه‌ندامێ جڤاتا كۆمسيارێن كۆمسيۆنا بلند يا هه‌لبژارتنان ل عيراقێ راگه‌هاند” كۆمسيۆنێ برياردايه‌ برنا موبايلێ بۆ بنگه‌هێن ده‌نگدانێ بهێته‌ قه‌ده‌غه‌كرن ودێ پێرابوونێن قانوونى يێن توند به‌رامبه‌ر سه‌رپێچكاران هێنه‌ وه‌رگرتن”.

كاكه‌يى دداخۆيانيه‌كا رۆژنامه‌ڤانى دا ئه‌ڤرۆ شه‌مبيێ 28/4/2018 گۆت ژى” نابيت چو موبايله‌كا زيره‌ك وئه‌و موبايلێن وێنان دگرن بچنه‌ دناڤ بنگه‌هێن وناڤه‌ندێن ده‌نگدانێ دا، ئه‌ڤ برياره‌ ژى ده‌نگده‌ران وكارمه‌ندێن كۆمسيۆنێ ڤه‌دگريت”.

ئاشكراكر ژى” بريارا قه‌ده‌غه‌كرنا موبايلێ هێزێن ئه‌منى ژه‌ ڤه‌دگريت وهه‌ر كه‌سه‌كێ به‌روڤاژى ڤێ چه‌ندێ بكه‌ت، دێ تووشى پێرابوونێن قانوونى بيت”.

ئه‌ڤرۆنيوز:

پشتى به‌لاڤكرنا نڤيسينه‌كا ره‌خنه‌يى، نڤيسينگه‌ها حه‌يده‌ر عه‌بادى سه‌رۆك وه‌زيرێن عيراقێ په‌يوه‌ندى ب په‌رله‌مانتاره‌كێ كورد دكه‌ت وداخواز ژێ دكه‌ت وێ نڤيسينێ ژێ ببه‌ت وبۆ دياردكه‌ن كو نڤيسينا وى عه‌بادى يێ نيگه‌ران كرى.

شاخه‌وان عه‌بدوللا، ئه‌ندامێ په‌رله‌مانێ عيراقێ ژفراكسيۆنا پارتى ديموكراتى كوردستان رۆهنكرنه‌ك ل به‌رپه‌رێ خوه‌ يێ فه‌رمى ل سه‌ر تۆرا جڤاكى يا فه‌يسبووكێ به‌لاڤكريه‌ وتێدا ئاشكرا دكه‌ت كو پشتى به‌لاڤكرنا نڤيسينه‌كێ ل دۆر سه‌ره‌دانا حه‌يده‌ر عه‌بادى بۆ هه‌رێما كوردستانێ، ژئاليێ نڤيسينگه‌ها عه‌بادى ڤه‌ داخواز ژوى هاتيه‌ كرن وێ نڤيسينا ره‌خنه‌يى ژێ ببه‌ت چونكى عه‌بادى يێ نيگه‌ران كرى.

 شاخه‌وانى درۆهنكرنا خوه‌دا ئاماژه‌ دا كو پشتى به‌رهه‌ڤ نه‌بووى نڤيسينا خوه‌ ژێ ببه‌ت، نڤيسينگه‌ها عه‌بادى په‌نا بريه‌ كۆمپانيا فه‌يسبووكى ودبێژيت” ئه‌و رادا بێ ده‌ستهه‌لاتيێ يه‌ ده‌مێ نڤيسينگه‌ها عه‌بادى وداروده‌سته‌كا وى په‌نايێ بۆ فه‌يسبووكێ ببه‌ن وسكالايێ ل وێرێ تۆمار بكه‌ن وبێژن بابه‌تێ من نڤيسى بێهنا تايفگه‌ريێ ژێ دهێت وكۆمپانيا فه‌يسبووكێ ژى ژئاليێ خوه‌ڤه‌ سه‌ره‌راى هنارتنا چه‌ند نامێن ئاگه‌هداركرنێ، بابه‌تێ من ژى ژێ بر”.

وى په‌رله‌مانتارێ فراكسيۆنا پارتى دياركر” ل ڤێره‌ دبێژم ئه‌و تاوانێن هوون دژى كوردان ئه‌نجام دده‌ن، تايفگه‌رى وره‌گه‌زپه‌رستى وتاوانه‌ وب ده‌هان جارانژى دێ تاوانێن هه‌وه‌ ل دژى گه‌لێ من به‌رچاڤ كه‌م”.