ئه‌ڤرۆنيوز:
وه‌زاره‌تا ناڤخوه يا عيراقى ب فه‌رمى بريار دا فه‌رمانگه‌هه‌كا فيدرالى ل پارێزگه‌ها هه‌له‌بجه ب دامه‌زرينيت.
وه‌زاره‌تا ناڤخوه يا عيراقێ ب نڤيسارا خوه يا هژمار 22918 كو ل رێككه‌فتى 19/4/2018 ده‌ركه‌فتيه رازيبوونا خوه دياركريه ل دۆر دامه‌زراندنا رێڤه‌به‌ريا پاسپۆرتان ل پارێزگه‌ها هه‌له‌بجه.
ئه‌ڤرۆنيوز:
ب هه‌لكه‌فتا ده‌ربازبوونا 25سالا ل سه‌ر ڤه‌كرنا زانكۆیا دهوكێ ویوبیلا زیڤی یا وێ زانكۆیێ، ئه‌ڤرو سپێدێ 24-4-2018 ل ناڤه‌ندا قوتابیان ل زانكۆیا دهوك وب ئاماده‌بونا فه‌رهاد ئه‌مین پارێزگه‌رێ دهۆكێ وچه‌ند به‌رپرسێن حزبی وئیداری وسه‌رۆك زانكۆیان ل سنورێ پارێزگه‌ها دهۆكێ ڤیستیڤالا یوبیلا زیڤی یا زانكۆیا دهۆكێ‌هاته ڤه‌كرن.
د.مصلح دهۆكی، سه‌رۆكێ زانكۆیا دهۆكێ بخێر هاتنا مێهڤانان كر وئاماژه دا وێ یه‌كێ كو ل ڤان 25 سالێن ده‌ربازبووی زانكۆیا دهۆكێ ده‌ست كه‌فتێن مه‌زن هه‌بوینه‌و22گه‌رێن قوتابیان ده‌رچوینه كو هژمارا وان پتره ژ30هزار قوتابیان دبوارێن جودا جودا ، دڤی ژیێ خوه‌دا زانكۆیا دهوكێ گه‌له‌ك پێشڤه‌چون ب خوه‌ڤه دیتینه وشیایه په‌یوه‌ندیێن زانستی ل گه‌ل گه‌له‌ك زانكۆیێن بیانی گرێده‌ت وسوپاسیا حوكمه‌تا كوردستانێ كر هه‌مبه‌ر ئه‌و پشته‌ڤانیا به‌رده‌وام یا بۆ زانكۆیا دهۆكێ دكه‌ت….
پارێزگه‌رێ دهۆكێ دپه‌یڤه‌كێ دا پیروزباهی ل زانكۆیا دهۆكێ وهه‌موو ستافێ كاری وقوتابیێن وێ كر ویوبیلا زیڤی لێ پیروز كر وخواست ده‌ستكه‌فتێن زانستی یێن باشتر ب ده‌ست ڤه‌بینیت.
هه‌روه‌سا گوت” زانكۆیا دهۆكێ پشتی سه‌رهلدانا سالا 1991هاتیه ڤه‌كرن وئه‌ڤرۆ ب پشته‌ڤانیا حوكمه‌تا هه‌رێما كوردستانێ ب ده‌هان زانكۆ وپه‌یمانگه‌ه ل دهۆكێ وجهێن دى یێن هه‌رێما كوردستانێ هاتینه ڤه‌كرن وده‌ست كه‌فتێن مه‌زنن بۆ خه‌لكێ كوردستانێ”.
پارێزگه‌رێ دهوكێ دیاركر” نه‌یا جوان ودورسته گه‌له‌ك كه‌س ئه‌ڤرۆ يێن هه‌ين ژبه‌ر ب ده‌ستڤه‌ئینانا هنده‌ك ده‌نگ وكورسیان ده‌ست كه‌فتێن خه‌لكێ كوردستانێ دكه‌نه تشته‌كێ چونه”.
گۆت ژى” به‌رقراربونا ئارامی وته‌ناهیێ و په‌یدابوونا ڤی كه‌ش وهه‌وایێ دیموكراتی ل كوردستانێ وئازادیا ده‌ربرینێ و هه‌لبژارتنا وبانگه‌شه‌یا به‌ربژار وقه‌وارێن سیاسی ئه‌ڤه بخو به‌لگه‌نه كو حوكمه‌تا هه‌رێما كوردستانێ گه‌له‌ك گرنگیێ دده‌ته هه‌موو بوارێن ژیانێ وهيڤى خوازم هه‌لبژارتن ب ره‌نگه‌كێ رێكوپێك وساخله‌م بهێنه ئه‌نجامدان”..
ددووڤدا جودا جودا پێشانگه‌هێن 18كولیژێن زانكوۆیا دهۆكێ هاتنه ڤه‌كرن .
بریار ئه‌وه ل رۆژێن 25و26/4/2018به‌رده‌وامی ب به‌رنامێن ڤیستیڤالا یوبیلا زیڤی یا زانكۆیا دهۆكێ بهێته دان وچه‌ندین ڤه‌كۆلین وچالاكیێن ره‌وشه‌نبیری وكلتوری بهێنه ئه‌نجامدان.
زانكۆیا دهۆك ل 31-10-1992هاتیه دامه‌زراندن ول ده‌ستپێكێ دو كولیژه ب خوه‌ڤه دگرتن و149قوتابی هه‌بوون ونوكه 18كولیژه يێن هه‌ين كو ژ78پشكان پێك دهێت و(20428) قوتابی و(1433) ماموستا و(2515) فه‌رمانبه‌ر يێن هه‌ين و22 گه‌رێن قوتابیان ژێ ده‌رچوینه كو هژمارا وان دگه‌هیته (30000) قوتابیان.
ئه‌ڤرۆنيوز:
په‌رله‌مانێ عيراقێ، ئه‌ڤرۆ سێشه‌مبى 24/4/2018 ب فه‌رمى مووچێ ئه‌ندامێن خوه ئاشكراكر كو بلندترين مووچه 10 مليۆن دينارن.
پشتى كو چه‌ندين پێزانينێن جودا جودا ل دۆر مووچێ ئه‌ندامێن په‌رله‌مانێ عيراقێ هاتينه به‌لاڤكرن، ڤيديۆيا ئه‌ندامه‌كێ په‌رله‌مانى هاته به‌لاڤكرن كو تێدا دبێژيت هنده‌ك په‌رله‌مانتار 45 مليۆن ديناران وه‌ردگرن، بۆ به‌رسڤدانا وى په‌رله‌مانتارى، راگه‌هاندنا په‌رله‌مانێ عيراقێ ئه‌ڤرۆ مووچێ ئه‌ندامێن په‌رله‌مانى ئاشكراكر.
ل دووڤ رۆهنكرنه‌كا فه‌رمى، فه‌رمانگه‌ها راگه‌هاندنا په‌رله‌مانێ عيراقێ دبێژيت” پێشتر ئه‌ندامێن په‌رله‌مانى 11 مليۆن و900 هزار دينار وه‌ردگرت، ئه‌ڤه به‌رى ئه‌نجامدانا چاكسازيان بوو، به‌لێ پاشى وب گۆره‌ى بريارا 333 چاكسازى هاته كرن وبلندترين مووچێ په‌رله‌مانتاران دگه‌هيته 10 مليۆن ديناران.
هه‌ڤده‌م ل گه‌ل وێ رۆهنكرنێ، په‌رله‌مانێ عيراقێ چاوانيا مه‌زاختنا مووچێ ئه‌ندامێن په‌رله‌مانى دياركر كو ب ڤى شێوه‌يه: مووچێ بنه‌ره‌تى 4 مليۆن دينار، ده‌رمالا پۆستى 2 مليۆن دينار، ده‌رمالا باوه‌رنامێ: دكتورا 100%، ماسته‌ر 75% ، به‌كالۆريۆس 45%، په‌يمانگه 35%، ئاماده‌يى 25%.
پێشتر ره‌خنه ل په‌رله‌مانتارێن عيراقێ دهاته كرن كو هه‌ر ئێك ژوان چه‌ندين پاسه‌وان يێن هه‌ين وئه‌و پارێن وان پاسه‌وانان بۆ خوه وه‌ردگرن، دبه‌رسڤا وێ چه‌ندێ دا ژى رۆهنكرنا په‌رله‌مانێ عيراقێ ئاماژه دا كو بۆ پاسه‌وانێن ئه‌ندامێن په‌رله‌مانى سيسته‌مه‌كێ دياركرى دهێته په‌يره‌وكرن بێ كو پێزانينێن زێده‌تر ل دۆر وێ چه‌ندێ بهێنه دان.
ئه‌ڤرۆنيوز:
شيره‌تكارێ جڤاتا ئاسايشا هه‌رێما كوردستانێ ل گه‌ل شانده‌كێ دبلوماسى وله‌شكرى يێ ئه‌مريكى كۆمبوو.
مه‌سرور بارزانى، شيره‌تكارێ جڤاتا ئاسايشا هه‌رێما كوردستانێ، ئه‌ڤرۆ سێشه‌مبى 24/4/2018 ل گه‌ل جه‌نه‌رال پاول فانك وشاندێ دگه‌لدا كو پێكهاته‌كێ دبلوماسى وله‌شكرى بوو كۆمبوو ودديداره‌كێ دا دووماهى ره‌وشا ده‌ڤه‌رێ وپه‌يوه‌نديێن ئه‌مريكا وهه‌رێما كوردستانێ دبوارێن جودا جودا هاتنه به‌حسكرن.
شاندێ ئه‌مريكى دووپاتكر كو وه‌كو كيانه‌كێ دستوورى پشتگيريێ ل هه‌رێما كوردستانه‌كا ب هێز وئێكگرتى دكه‌ن ودخوازن په‌يوه‌نديێن وان ل گه‌ل هه‌رێمێ ب هێزتر بن.
ل دۆر مه‌ترسيێن په‌يدابوونا كريارێن تيرۆرستى، شاندێ ئه‌مريكى پشتگيريا خوه بۆ هه‌ماهه‌نگيێ دناڤبه‌را هێزا پێشمه‌رگه‌ى وهێزێن هه‌ڤپه‌يمانان وهێزێن عيراقى دوباره كر وراگه‌هاند كو دخوازن ئه‌و هه‌ماهه‌نگى يه ل هه‌موو ده‌ڤه‌ران په‌يدا بيت.
دبه‌رامبه‌ر دا، مه‌سرور بارزانى دووپاتى ل سه‌ر پێدڤيا هاريكاريا هه‌موو لايه‌نه كر تاكو هه‌ر چ زووتره ده‌ليڤا گونجاى بۆ ئاساييكرنا ره‌وشێ ب ره‌خسيت وب چاره‌سه‌ريا كێشێن سياسى وئيدارى ودستوورى هوكارێن په‌يدابوونا توندوتيژيێ بهێنه ژناڤبرن.
ئه‌ڤرۆنيوز:
سه‌رۆكێ ليستا نه‌سر ل پارێزگه‌ها سلێمانيێ رادگه‌هينيت، برياره دده‌مێ دۆ رۆژێن داهاتى دا، عه‌بادى سه‌ره‌دانا باژێرێ سلێمانيێ بكه‌ت، هه‌ڤده‌م نڤيسينگه‌ها سه‌رۆك وه‌زيرێن عيراقێ دبێژيت، حه‌يده‌ر عه‌بادى سه‌ره‌دانا سلێمانيێ ناكه‌ت ووى سه‌رۆك ليست ژى ل سلێمانيێ نينه.
ل دووڤ مالپه‌رێ سه‌ته‌لايتا كوردستانێ، ئيبراهيم ره‌شيد، سه‌رۆكێ ليستا نه‌سر ل پارێزگه‌ها سلێمانيێ بۆ ده‌زگه‌هێن راگه‌هاندنێ يێن عيراقى گۆتيه” دچارچۆڤێ بانگه‌شا هه‌لبژارتنان دا، حه‌يده‌ر عه‌بادى سه‌رۆك وه‌زيرێن عيراقێ وسه‌رۆكێ ليستا نه‌سر دده‌مێ دۆ رۆژێن داهاتى دا دێ سه‌ره‌دانا سلێمانيێ كه‌ت”.
هه‌ڤده‌م، به‌رپرسه‌كى ژ نڤيسينكه‌ها سه‌رۆك وه‌زيرێن عيراقێ راگه‌هاند” حه‌يده‌ر عه‌بادى سه‌ره‌دانا سلێمانيێ ناكه‌ت ووى سه‌رۆك ليست ژى ل سلێمانيێ نينه”.
ئه‌ڤرۆنيوز:
فه‌رهاد ئه‌مین پارێزگه‌رێ دهوكێ، ئه‌ڤرۆ سێشه‌مبى 24/4/2018 پێشوازیا شانده‌كێ كۆمسیۆناهه‌لبژارتنان ل عیراقێ ب سه‌رۆكاتیا (د.ریاز ئه‌لبه‌دران) سه‌رۆكێ كارگێریا هه‌لبژارتنان كر.
دهه‌ڤدیتنه‌كێ دا ب ئاماده‌بونا یوسف سه‌لمان رێڤه‌به‌رێ ئۆفيسا دهۆكێ يا كومسیونێ به‌حسێ كاروبارێن كومسیونێ وئاریشه وئاسته‌نگێن دهێنه پێش كاری ورێژا وه‌رگرتنا كارتێن ده‌نگدانێ ل سنورێ ئۆفیسا كۆمسیۆنا هه‌لبژارتنان ل پارێزگه‌ها دهۆكێ هاته كرن.
دته‌وه‌ره‌كێ دى دا به‌حس هاته كرن ل دۆر ده‌ستپێكرنا هه‌وا هه‌لبژارتنان وبه‌ربژا وقه‌وارێن سیاسی ل سنورێ پارێزگه‌ها دهۆكێ وهه‌ڤكاری وهاریكاری دناڤبه‌را كارگێریا پارێزگه‌ها دهۆكێ وكۆمسيۆنا هه‌لبژارتنان ل دهۆكێ ژبۆنه‌هێلانا ئاسته‌نگ وئاریشه‌یان ل بنگه‌هێن وه‌رگرتنا كارتێن ده‌نگدانێ وراكرنا وان زێده‌گاڤیێن ل سه‌ر جهێن گشتی وخزمه‌تكاری هاتینه كرن.
پارێزگه‌رێ دهۆكێ دياركر كو رگێريا كپارێزگه‌ها دهۆكێ دێ هه‌موو هاریكاریه‌كێ پێشكێش كه‌ت بۆ وێ یه‌كێ هه‌موو ئاریشه بهێنه چاره‌سه‌ركرن وهه‌لبژارتن ب ره‌نگه‌گێ جوان بهێنه ئه‌نجامدان.
ئه‌ڤرۆنيوز:
كۆمسيۆنا بلند يا هه‌لبژارتنان ل عيراقێ وتۆرا خه‌لك بۆ ماف وئازاديان، پێشيلكاريێن بانگه‌شا هه‌لبژارتنان به‌لاڤ دكه‌ن وهوشداريا به‌ربژار وليستان دهێته كرن.
تۆرا خه‌لك بۆ ماف وئازاديان ل گه‌ل كۆمسيۆنا بلند يا هه‌لبژارتنان ل عيراقێ، ئه‌ڤرۆ سێشه‌مبى 24/2/2018 دكۆنگره‌كێ رۆژنامه‌ڤانى دا، پێشيلكاريێن قانوونى ئاشكراكرن.
دوى كۆنگرێ رۆژنامه‌ڤانى دا، به‌ربژارێن پێشيلكارى ئه‌نجامداين هاتنه ئاگه‌هداركرن، كو ل قۆناغا ئێكێ ناڤێن وان ناهێنه به‌لاڤكرن وهه‌كه پێشيلكارى دوباره كرن، دێ ناڤێن وان هێنه به‌لاڤكرن.
ل دۆر جۆرێ وان پێشيلكاريێن دبانگه‌شا هه‌لبژارتنان دا هاتينه تۆماركرن، ب ڤى شێوه‌ى دانه دياركرن:
ئه‌ڤرۆنيوز:
په‌يمانگه‌ها كوردستان بۆ راپرسيان ل پارێزگه‌هێن هه‌ولێرێ وسلێمانيێ ودهۆكێ پرسيار ژ 2986 كه‌سان كريه ول دووڤ ئه‌نجامێ راپرسيێ، پارتى ب جوداهيه‌كا مه‌زن ل رێزا ئێكێ دهێت وئێكه‌تى ل رێزا دويێ وگۆان ل رێزا سيێ.
ژ وێ هژمارا پشكدارى دراپرسيێ دا كرى، زێده‌تر ژ 58% دياركريه كو دێ پشكداريێ دهه‌لبژارتنێن جڤاتا نوونه‌رێن عيراقێ دا كه‌ن، 27.9% گوتيه كو پشكداريێ ناكه‌ن.
ل دووڤ ئه‌نجامێ وێ راپرسيێ، پارتى ديموكراتى كوردستان ب جوداهيه‌كا مه‌زن ل رێزا ئێكێ يه وئێكه‌تى ل رێزا دويێ وگۆران ل رێزا سيێ.
بەپێی ئەنجامی پەیمانگای کوردستان بۆ راپرسی، پارتی بەجیاوازیێکی زۆر لە ریزبەندی یەکەمە و یەکێتی دووەم و گۆڕانیش لە ریزی سێیەمدایە.
پارتی: 41.85%
گۆڕان: 13.78%
ئێکه‌تی: 7.92%
هه‌ڤپه‌يمانى: 4.65%
ئێکگرتوو: 4.48%
نەوەی نوێ: 4.42%
کۆمەل: 1.95%
هه‌ر ل دووڤ وێ راپرسيێ، پێشبينى بۆ كورسيێن حزبان ل هه‌رێما كوردستان وده‌ڤه‌رێن ناكۆكى ل سه‌ر ب ڤى شێوه‌يه:
پارتی: 21 – 22
ئێکه‌تی: 7 – 8
گۆڕان: 6 – 7
هه‌ڤپەیمانی: 5 – 6
ئێکگرتوو: 4- 5
نەوەی نوێ: 3 – 4
کۆمەل: 2 – 3
ئه‌ڤرۆ نيوز:
ئه‌ڤرو سپێدێ 23/4/2018 فه‌رهاد ئه‌مین ئه‌تروشی پارێزگه‌رێ دهوكێ پێشوازیا به‌رێز( گێرد موله‌ر) وه‌زیرێ هاریكاری و گه‌شه‌پێدانا ئه‌لمانیا ل نه‌خوشخانا ئازادی ل باژێرێ دهوكێ كر دیڤدا ب ئاماده‌بونا رێڤه‌به‌رێ گشتی یێ ساخله‌میا پارێزگه‌ها دهوكێ وچه‌ند په‌رله‌مانته‌رێن ئه‌لمانی به‌رێ بنیاتی بو پشكا ته‌نگاڤیا ل نه‌خوشخانا ئازادی ل باژێرێ دهوكێ دانا كو ژلایێ رێكخراوا ( giz ) یا ئه‌لمانی ڤه پارێ پێدڤی بو هاتیه دابین كرن درێ و ره‌سمێن دانانا به‌رێ بنیاتی دا (به‌رێز فه‌رهاد ئه‌مین ئه‌تروشی) دپه‌یڤه‌كێ دا به‌راهیێ بخێرهاتنا وه‌زیرێ ئه‌لمانی و شاندێ دگه‌لدا كر و سوپاسیا حكومه‌ت و خه‌لكێ ئه‌لمانیا كر بو هاریكاری و پشته‌ڤانیا وان یا به‌رده‌وام دگه‌له‌ك بوارا دا بو كوردستانێ و تایبه‌ت بو دهوكێ ب رێكا رێكخراوێن ئه‌لمانی و تایبه‌ت رێكخراوا giz كو روله‌كێ به‌رچاڤ دگه‌له‌ك بوارا ل سنورێ پارێزگه‌ها دهوكێ دا دبینیت و تایبه‌ت بیاڤێ ساخله‌میێ دا و دیاركر ئاڤاكرنا پشكا ته‌نگاڤیا ل نه‌خوشخانا ئازادی یا دهوكێ دێ باشتر خزمه‌تا ساخله‌میێ هێته پێشكێشكرن , هه‌روه‌سا دیار كر كو 60% یا ئاوارێن ئێراقی ل سنورێ پارێزگه‌ها دهوكێ هاتینه ئاكنجیكرن ژ سه‌رجه‌مێ 39 كه‌مپا 21 كه‌مپێن ئاوارا ل سنورێ پارێزگه‌ها دهوكێ نه .و داخاز كر كو حكومه‌تا ئه‌لمانیا باشتر و زێدجه‌تر هاریكاریێ بو كوردێن ئێزدی بكه‌ت چونكی ده‌ڤه‌رێن وان هێشتا نه‌هاتینه رزگار كرن و پێدڤی ب هاریكاریێ نه .
دیڤدا ( گێرد موله‌ر) وه‌زیرێ هاریكاری و گه‌شه‌پێدانا ئه‌لمانی دپه‌یڤه‌كێ دا دیار كر كو ژ ئه‌گه‌رێ شه‌رێ ده‌ڤه‌رێ و گه‌ڤێن به‌رده‌وام یێن تیرورستا گه‌له‌ك خه‌لك ژ جهێن دی یێن ئێراقێ ئاواره‌ی پارێزگه‌ها دهوكێ بوینه و زێده‌بارێ خه‌لكه‌كێ دی ژ وه‌لاتێ سوریێ هاتیه پارێزگه‌ها دهوكێ و دیار كو ل دیف ئامارێن وان زێدجه‌تر ژ 700 هزار ئاوارێن نافخویی ل دهوك هه‌نه و باره‌كێ گران كه‌تیه سه‌ر ملێت دهوكێ ,
هه‌روه‌سا سوپاسیا خه‌لكێ دهوكێ و حكومه‌تا خوجهیا دهوكێ كر بو وی كاری مروڤایه‌تی یێ مه‌زن كو ئه‌ف هه‌می ئاواره و په‌نابه‌را حه‌واندین و خزمه‌ته‌كا مه‌زن بو كری ,
دلایه‌كی دیێ په‌یڤا خودا دیار كر كو حكومه‌ت و وه‌لاتێ ئه‌لمانیا به‌رده‌وام بویه ل سه‌ر هاریكاریا حكومه‌تا كوردستانێ دگه‌له‌ك بیاڤا دا و دێ به‌رده‌وام بیت و گوت ئه‌ڤرو روژه‌كا مه‌زنه بو من چونكی ئه‌ف پروژێ ئه‌ڤرو به‌رێ بنیاتی بو هاتیه دانان گه‌له‌ك یێ گرنگ و مه‌زنه و دێ خزمه‌تا مروڤایه‌تیێ كه‌ت و خه‌لكه‌ك ب رێكا ڤی پروژه‌ی ژ مرنێ هێته رزگار كرن ,, و هه‌ر كه‌سی بڤێت بزانیت كا هاریكاریێن خه‌لكێ ئ‌وه‌لمانیا و باجا وان ل ژ دهێته خه‌رج كرن بلا بهێت سه‌حكه‌ته ڤان پروژا دێ زانیت .
دیڤدا پارێزگه‌رێ دهوكێ و وه‌زیرێ هاریكاریا ئه‌لمانی سه‌ره‌دانا سه‌نته‌رێ تایبه‌تمه‌ندێ نه‌خوشیێن گه‌ها و شیاندانا نوژدار ری كر و گه‌ریانه‌ك دناڤ پشكێن وێدا كر و سه‌حكره كاری دهێته كرن و گوهداریا پێدڤی و كێم و كاسیان كر ل دیماهیێ هژماره‌كا ئامیره و كوره‌ستێن پێدڤه وه‌ك دیاری پێشكێشی سه‌نته‌رێ نافبری كرن ,
پاشی پێكڤه سه‌ره‌دانا كه‌مپا كه‌به‌رتو كر و ل ناف كه‌مپێ پروژێ چاره‌سه‌ركرنا ئاڤا ئاڤ رێژا و سولینا هاته ڤه‌كرن كو ژلایێ رێكخراوا giz یا ئه‌لمانی ڤه هاتیه بجهئینان ب كوژمێ 300 هزار دولارا ,
ل دیماهیێ سه‌نته‌رێ تایبه‌ت یێ ئافره‌تا هاته ڤه‌كرن كو ب پشته‌ڤانیا رێكخراوا giz هاتیه ئاڤا كرن هاته ڤه‌كرن و گه‌ریانه‌ك دناف پشكێن وێدا هاته كرن .
ئه‌ڤرۆنيوز:
جێگرێ سه‌رۆكێ كۆمسيۆنا بلند يا هه‌لبژارتنان ل عيراقێ راگه‌هاند، 600 هزار ناڤێن دوباره ومرى يان ژ تۆمارا ده‌نگده‌ران هاتينه لادان، وه‌لاتيان ژى پشت راست دكه‌ت كو ئه‌و ئاميرێ ڤێ جارێ بۆ هه‌لبژارتنان دهێته بكارئينان رێگريێ ل سه‌خته‌كاريێ دكه‌ت.
رزگار حه‌مه، جێگرێ سه‌رۆكێ كۆمسيۆنا هه‌لبژارتنان ل عيراقێ ئه‌ڤرۆ دوشه‌مبى 23/4/2018 دكۆنگره‌كێ رۆژنامه‌ڤانى دا راگه‌هاند” هه‌موو كه‌لوپه‌ل وپێدڤيێن ده‌نگدانێ يێن گه‌هشتينه كوگه‌هێن كۆمسيۆنێ ل هه‌رێما كوردستانێ وبه‌رهه‌ڤى ژى يێن ب دووماهى هاتين”.
گۆت ژى” ئاواره دشێن ل بنگه‌هێ تايبه‌ت يێ وان ده‌نگى بده‌ن، كو ل هه‌ولێرێ 15 بنگه‌هێن ده‌نگدانێ نه ول سلێمانيێ 20 “.
ل دۆر ئه‌گه‌رێ سه‌خته‌كاريكرنێ دهه‌لبژارتنان دا، گۆت” ئاميرێن ده‌نگدانێ رێگريێ ل سه‌خته‌كاريێ دگريت، ئه‌و قه‌له‌مێن دهێنه بكارئينان ژى بۆ ده‌نگدانێ حبرێ وێ ناهێته ژێ برن، ئه‌و ده‌نگوباسێن هاتينه به‌لاڤكرن ژى كو سه‌خته‌كارى دێ تێدا هێته كرن، ژبلى ساركرنا خه‌لكى، چو بنه‌مايه‌كێ دى نينه”.
دياركر ژى”ل سه‌رانسه‌رى عيراقێ هه‌تا نوكه 11 مليۆن كه‌سان بايۆمه‌تريا كۆمسيۆنێ ئه‌نجامدايه و9 مليۆن كارتێن ده‌نگدانێ ژى يێن هاتينه به‌لاڤكرن”.
سه‌باره‌ت ده‌نگدانێ ل ده‌رڤه‌ى وه‌لاتى ژى، گۆت” ل 19 وه‌لاتان دێ ده‌نگدان بۆ هه‌لبژارتنێن جڤاتا نوونه‌رێن عيراقێ هێته كرن”.
خوياكر” 100 به‌ربژار وقه‌واره يێن هاتينه سزادان كو ل ده‌مێ بانگه‌شا هه‌لبژارتنان دا، سه‌رپێچى كريه ب جۆره‌كى به‌ربژار ب كۆژمێ دو مليۆن ديناران وليست ژى ب كوژمێ پێنج مليۆن ديناران هاتينه سزادان”.
نيشاندان