ئه‌ڤرۆنيوز:
كۆمسيۆنا بلند يا هه‌لبژارتنان ل عيراقێ ناڤێن كارمه‌ندێن سه‌ر سندووقێن ده‌نگدانێ به‌لاڤكرن.
بۆ ديتنا ناڤێن كارمه‌ندێن سه‌ر سندووقێن ده‌نگدانێ ل دهۆكێ :
نووترين نووچه
- رێكێ نادەین هیچ كەسەك دەستێوەردانێ د كاروبارێن مە دا بكەت
- بەرهنگاربوونا مادەیێن هۆشبەر ئەركەكێ نیشتمانی و ئەخلاقی یێ مە هەموویانە
- مەسرور بارزانی: هیڤیدارین د زووترین دەمدا، حوكمەتەكا نوو و ب هێز و خزمەتگوزار پێكبینین
- فڕەنسا کار بۆ دەستپێکرنا قۆناغەکا نوو ل رۆژئاڤایێ کوردستانێ دکەت
- پێدڤییە ئیراق ژ ململانێیێن رۆژهەلاتا ناڤین دوور بكەڤیت
- هیڤیدارم كاربدەست مفای ژ بۆچوون و بڕیارێن كۆڕبەندێ مێپس وەربگرن
- سەرۆك بارزانی: دانوستاندنێن ئالییان بۆ پێكئینانا حوكمەتێ دێ ب سەركەفتییانە هێنە ئەنجامدان
- نێچیرڤان بارزانی: كریارا تیرۆرستییا خورماتوو سەلماند كو تیرۆر هێشتا مەترسییەكا راستەقینەیە
- دوپاتیێ ل پێشڤەبرنا هەماهەنگیێ د ناڤبەرا پێشمەرگەی و لەشكرێ ئیراقێ دا بۆ چەسپاندنا ئارامیێ ل دەڤەرێن كوردستانی دكەین
- سەرۆكێ حوكمەتا هەرێمێ: پێدڤییە ب زووترین دەم، پرۆسەیا هنارتنا پەترۆلێ دەست پێ بكەت
سه‌ره‌كى نووترين نووچه
وه‌زاره‌تا دارايى برياره‌كێ ل دۆر پشكه‌كا داهاتێ كاره‌بێ ده‌ردكه‌ت
ئه‌ڤرۆنيوز:
وه‌زاره‌تا دارايى بريار دا، پشكه‌ك ژ داهاتێ كاره‌بێ ب كارمه‌ندێن وه‌زاره‌تا كاره‌بێ بهێته دان.
محه‌مه‌د ئه‌مين هه‌ورامى، په‌يڤدارێ وه‌زاره‌تا كاره‌بێ ل هه‌رێما كوردستانێ راگه‌هاند، پشتى كو پشكه‌ك ژداهاتێ باژێرڤانيان، ب رێنمايه‌كێ پشكه‌ك ژ داهاتێ كاره‌بێ ژى دێ بۆ وه‌زاره‌تا كاره‌بێ بيت وگۆت” وه‌زاره‌تا دارايى وئابوورى ل هه‌رێما كوردستانێ هاريكاريا وه‌زاره‌تا كاره‌بێ كريه بۆ حاله‌تێن ته‌نگاڤيان ول دووڤ دووماهى رێنما ژنوكه وپێڤه رێژا 8% ژ وى پارێ ژ پارێزگه‌هێن هه‌رێمێ دهێته كۆمكرن، دێ بۆ دابينكرنا پێدڤيێن تۆرا كاره‌بێ هێته ته‌رخانكرن ورێژا 2% ژى دێ بۆ كارمه‌ندێن وى سێكته‌رى هێنه مه‌زاختن”.
په‌يڤدارێ وه‌زاره‌تا كاره‌بێ زێده‌تر بۆ باس گۆت” وه‌زاره‌تا كاره‌بێ ب نڤيساره‌كا فه‌رمى داخوازا 15% ژ داهاتێ خوه كربوو، به‌لێ وه‌زاره‌تا دارايى وئابوورى رازيبوون ل سه‌ر 10% كريه كو ژ وێ 10% دێ رێژا 8% بۆ نووژه‌نكرنا تۆرێن كاره‌بێ وچاره‌سه‌ريا كێشێن كاره‌بێ ودابينكرنا بگۆران بيت ووه‌كو جاران پێدڤى ناكه‌ت نڤيسار پێ بهێته چێكرن وبلندكرن ورازيبوونا وه‌زاره‌تا دارايى بهێته وه‌رگرتن بۆ مه‌زاختنێ، به‌لكو فه‌رمانگه وده‌زگه‌هێن كاه‌بێ دشێن ژلايێ خوه‌ڤه ب مه‌زێخن”.
ئاشكرا كر ژى” كوژمه‌كێ باش يێ پارێ كاره‌بێ ژ داهاتێ وى ب هنده‌ك كارمه‌ندێن كاره‌بێ دهێته دان، ئه‌وێن ژمێريار وپاره‌ى كۆم دكه‌ن، يان باشترين پاره‌ى كۆم دكه‌ن، هه‌روه‌سا فه‌رمانبه‌رێن ده‌زگه‌هێن وزێ ل گه‌ل كارمه‌ندێن وه‌ستياى ولژنێن نه‌هێلانا سه‌رپێچيێن كاره‌بێ، كۆژمه‌كێ پاره‌ى دێ بۆ وان هێته مه‌زاختن وئه‌و پاره تشته‌كێ باشه بۆ نموونه هنده‌ك هه‌يڤانه دێ كوژمێ 250 هزار ديناران وه‌رگرن وهنده‌ك ژى 200 هزار ديناران وهنده‌كێن دى 150 هزار ديناران”.
ل دووڤ پێزانينان، داهاتێ سالانه يێ وه‌زاره‌تا كاره‌بێ ل هه‌رێما كوردستانێ دناڤبه‌را 200 بۆ 300 مليار دينارايه.
هه‌ورامى رۆهنكر ژى” ژبه‌ر كێميا مووچه‌ى داهاتێ كاره‌بێ كێم ببوو، به‌لێ ئه‌م پێشبينيێ دكه‌ين ژئه‌گه‌رێ سيسته‌مێ نوو يێ مووچان وباشتركرنا پاشكه‌فتێ مووچان، داهاتێ كاره‌بێ ژى زێده ببيت”.
سه‌فين دزه‌يى: سوباهى مووچێ چه‌ند وه‌زاره‌تان دێ هێته به‌لاڤكرن
ئه‌ڤرۆنيوز:
په‌يڤدارێ فه‌رميێ حوكمه‌تا هه‌رێما كوردستانێ راگه‌هاند، سوباهى سێشه‌مبى 10/4/2018 دێ مووچێ چه‌ند وه‌زاره‌تان هێته به‌لاڤكرن.
سه‌فين دزه‌يى، په‌يڤدارێ فه‌رميێ حوكمه‌تا هه‌رێما كوردستانێ بۆ چه‌ند ده‌زگه‌هێن راگه‌هاندنێ ل هه‌رێمێ گۆت” خشته‌كێ نوو يێ مووچه‌ى دێ هێته به‌لاڤكرن وسوباهى ژى مووچێ چه‌ند وه‌زاره‌تێن دى دێ هێته به‌لاڤكرن”. بێ كو ناڤێن وان وه‌زاره‌تان ديار بكه‌ت.
گۆت ژى” وه‌زاره‌تا دارايى ده‌ست ب به‌لاڤكرنا مووچه‌ى يا كرى ودێ به‌رده‌وام بيت، به‌لێ مووچێ هه‌موو وه‌زاره‌تان پێكڤه ناهێته به‌لاڤكرن، به‌لكو به‌لاڤكرنا مووچه‌ى هه‌يڤانه پێدڤى ب 15 هه‌تا 20 رۆژانه”.
دياركر ژى” ل دووڤ وى داهاتێ دگه‌هيته ده‌ستێ وه‌زاره‌تا دارايى ژفرۆشتنا په‌ترۆلێ، حوكمه‌تا هه‌رێمێ دێ به‌رده‌وامبيت ل سه‌ر به‌لاڤكرنا مووچه‌ى”.
دادگه‌ها فيدرالى دێ برياره‌كێ ل دۆر په‌ترۆلێ كوردستانێ ده‌ت
ئه‌ڤرۆنيوز:
ل سه‌ر سكالايا وه‌زيرێ په‌ترۆلا عيراقێ، دادگه‌ها فيدرالى يا عيراقى دێ برياره‌كێ ل دۆر هنارتنا په‌ترۆلا هه‌رێما كوردستانێ ده‌ركه‌ت.
دادگه‌ها فيدرالى يا عيراقى ئه‌ڤرۆ دوشه‌مبى 9/4/2018 ب سه‌رۆكايه‌تيا مه‌دحه‌ت مه‌حموود وبه‌رهه‌ڤبوونا ئه‌ندامێن دادگه‌هێ، روونشتنه‌ك سازكر وتێدا بريار دا روونشتن بۆ رۆژا 6/5/2018 بهێته پاشخستن.
دروونشتنا ئه‌ڤرۆ يا دادگه‌ها فيدرالى دا، وه‌كو دمالپه‌رێ فه‌رميێ دادگه‌ها ناڤبرى دا هاتيه به‌لاڤكرن، دادگه‌هێ بريار دا گوه ل حه‌يده‌ر عه‌بادى سه‌رۆك وه‌زيرێن عيراقێ ونێچيرڤان بارزانى سه‌رۆك وه‌زيرێن هه‌رێما كوردستانێ ووه‌زيرێ داراييا عيراقێ (وه‌كو لايێ سيێ) يێ كه‌يسێ بگريت.
پێشتر وه‌زيرێ په‌ترۆلا عيراقێ سكالا دژى وه‌زيرێ سامانێن سروشتى ل هه‌رێما كوردستانێ تۆماركربوو وتێدا داخواز ژ دادگه‌هێ كربوو، بريارا راگرتنا هنارتنا په‌ترۆلێ ژلايێ حوكمه‌تا هه‌رێما كوردستانێ ڤه بده‌ت.
ئومێد خوشناو دانوستاندنه‌كا سه‌رۆك بارزانى وعوسمان بايده‌مير ئاشكرا دكه‌ت
ئه‌ڤرۆنيوز:
سه‌رۆكێ فراكسيۆنا پارتى ديموكراتى كوردستان ل په‌رله‌مانێ كوردستانێ، دانوستاندنه‌كا سه‌رۆك بارزانى وعوسمان بايده‌ميرى ئاشكرا دكه‌ت.
ل ئێڤاريا رۆژا شه‌مبى 7/4/2018، په‌روين بۆلان هه‌ڤسه‌رۆكا پارتيا ديموكراتيا گه‌لان (هه‌ده‌په) ب سه‌رۆكاتيا شانده‌كێ حزبا خوه وئه‌ندامه‌تيا عوسمان بايده‌مير وفه‌له‌كناس ئۆجا وبه‌ردان ئۆزتورك وئيمام تاشجينه‌ر ل سه‌لاحه‌دين ل گه‌ل سه‌رۆك مه‌سعود بارزانى كۆمبوون.
دوێ كۆمبوونێ دا، سه‌رۆك بارزانى وشاندێ هه‌ده‌پێ به‌حسێ پرسێن په‌يوه‌نديدار ب هه‌رێما كوردستانێ ورۆژئاڤا وباكوورێ كوردستانێ وره‌وشا ده‌ڤه‌رێ ب گشتى كر.
ئومێد خوشناو، سه‌رۆكێ فراكسيۆنا پارتى ديموكراتى كوردستان ل په‌رله‌مانێ كوردستانێ كو دوێ كۆمبوونێ دا به‌رهه‌ڤ ببوو، دبه‌رپه‌رێ خوه يێ تايبه‌ت ل سه‌ر تۆرا جڤاكى يا فه‌يسبووكى به‌حسێ دانوستاندنه‌كا سه‌رۆك بارزانى وعوسمان بايده‌ميرى كر.
ئومێد خوشناو پشكه‌ك ژ وێ دانوستاندنێ به‌حس دكه‌ت ودبێژيت، سه‌رۆك بارزانى گۆته عوسمان بايده‌ميرى”هه‌كه كوردستان ددلێ ته‌دا بيت، پشت راست به توژى يێ ددلێ مه‌دا”.
ئه‌و ئاخڤتنا سه‌رۆك بارزانى پشتى ئاخڤتنه‌كا عوسمان بايده‌مير دهێت كو دناڤ كۆمبوونه‌كا په‌رله‌مانێ توركيا دا، سه‌رۆكێ په‌رله‌مانێ توركى ب سڤكايه‌تى ڤه پرسيار ژبايده‌ميرى كرى (كوردستان ل كيرێ يه؟) وبايده‌ميرى دبه‌رسڤا وى دا، ده‌ستێ خوه دا سه‌ر دلێ خوه وب ئاماژه‌كرن گۆت (كوردستان يا دناڤ دلێ من دا).
شاره‌زايه‌كێ ژينگه‌هێ:نەخوه‌شیێن مرۆڤان 80% ژ ژینگەھێ پەیدا دبن
ئه‌ڤرۆنيوز:
شاره‌زايه‌كێ بوارێ ژینگەھێ دبێژيت، کێمبوونا رێژا کەسکاتیێ، CO2 دناڤ ھەوای دا زێدە دکەن، غازاتێن نیترۆجین دناڤ ھەوای دا زێدە دبن، پیسبوونا خوارنێ و ڤەخوارنێ 80% ئەگەرێن پەیدابوونا نەخوه‌شیێن مرۆڤانە.
د. عومەر محەممەد، سەرۆکێ پشکا ژینگەھێ ل زانکۆیا زاخۆ، بۆ نوش نیۆز دیار کر رەوشا ژینگەھێ ل ھەرێما کوردستانێ ب گشتی ل پارێزگەھا دھۆکێ ب تایبەت یا خرایە، چونكى ل گۆرەی ستاندەرێن جیھانی، پێدڤیە رێژا کەسکاتیێ د باژێران دا دناڤبەرا 20 بۆ 25% ژ ئەردێ کەسکاتیێ بھێتە تەرخانکرن و گۆت: “نۆکە ل زاخۆ 2% ژ ئەردێ بو ژینگەھێ ھاتیە تەرخانکرن، ئەڤە ئێك ژ ئەگەرانە کو نەخوه‌شیێن مینا پەنجەشێرێ زێدەبن”.
ژینگە ژ پێنج تشتان پێکدھێن، خوارن، ئاڤ، ھەوا، رووەك و ئاژەل. ل دووڤ راپۆرتێن ساخلەمیا جیھانی، 80% ژ نەخوه‌شێن مرۆڤى و ئاژەلی ژ ژینگەھێ پەیدا دبن، ئانكو ئاڤا پیس ئه‌وا دھێتە دناڤ ئاڤا ڤەخوارنێ دا و چاندن ب ئاڤێن پیس دھێتەکرن، ئاژەل ب ئاڤ و عەلەفێ پیس دھێتە ب خۆدانکرن، گیانەوەر گیایێ پیسبووی دخۆن، و گژوگیا ب ئاڤا نەپاقژ مەزن دبن و مرۆڤ بکاردئینن، ئەڤە ھەموو ب رێيا ڤایرۆس و میکرۆباتان بۆ ناڤ گیانێ مرۆڤان دھێنە ڤەگۆھاستن.
د. عومەر محەممەد دياركر ژى، ھەر دارەك ئۆکسجینێ بۆ چار مرۆڤان درۆست دکەت، ھەتا شەش مەتران ئۆکسجینێ ددەتە دەورۆبەرێن خوە و گۆت:” پێدڤیە مرۆڤ د حەوشا خوه‌دا داران بچینيت، گۆل و دارێن بچووك دژۆرێن خوڤە بدانن، دەرگەە و پەنجەرێن ژۆران ل سپێدە و ئێڤاران بھێنە ڤەکرن، دا رێژا ئۆکسیجینێ دناڤ ھەوای دا بەردەوام بھێتە گوهۆرین و زێدەکەت”.
ل دووڤ پێشنیازا ڤى شاره‌زايێ بوارێ ژينگه‌هێ ل زانکۆیا زاخۆ، پێدڤيه حوكمەتا ھەرێما کوردستانێ و وەزارەتا ساخلەمیێ کادرەکێ بسپۆرێ ژینگەھێ پەیدا بکەن و دەرفەتەکا زێدەتر ب ژینگەھێ بھێتەدان و گۆت:”بۆ ھندێ رێژا CO2 دناڤ ھەوای دا بھێتە کێمکرن، غازاتێن نیترۆجین، و دۆکێلا ترۆمبێلان ھەموو مادێن ژەھراوی نە وبۆ مرۆڤى و ئاژەلان زیانبەخشن، پێدڤیە ھێزەکا دى یا ژینگەھێ پەیدا بکەین، بۆ ھندێ کێمترین زیان ب بەر مرۆڤى و ئاژەلان بکەڤن”.
داعشێ باژێره‌كێ عيراقى داگيركر
ئه‌ڤرۆنيوز:
رێكخراوا داعش يا تيرۆرستى، ئه‌ڤرۆ دوشه‌مبى 9/4/2018 هێرش كره سه‌ر باژێره‌كێ عيراقى وداگيركر.
ل دووڤ ده‌نگوباسێن ده‌زگه‌هێن راگه‌هاندنێ ل عيراقێ، چه‌كدارێن داعشێ ل سپێده‌يا ئه‌ڤرۆ هێرش كريه سه‌ر باژێرێ حه‌ديسه ل پارێزگه‌ها ئه‌نبار ل رۆژئاڤايێ عيراقێ وداگيركريه.
پێزانينێن ده‌ستپێكى ئاماژێ دكه‌ن كو چه‌كدارێن داعشێ چووينه دناڤ وى باژێرى دا وهه‌تا نوكه چار كه‌س هاتينه كوشتن وپێنج كه‌س ژى بريندار بووينه.
ل هه‌يڤا حزيرانا 2014، نێزيكى دو هزار چه‌كدارێن داعشێ هێرش كره سه‌ر عيراقێ ودده‌مێ چه‌ند ده‌مژمێران دا له‌شكرێ عيراقێ شكاند ودچه‌ند رۆژێن كێم دا، پتريا باژێر وده‌ڤه‌رێن پارێزگه‌هێن نه‌ينه‌وا وديالا وسه‌لاحه‌دين وئه‌نبار داگيركرن.
هێرشا ئه‌ڤرۆ يا داعشێ دده‌مه‌كى دايه كو حه‌يده‌ر عه‌بادى سه‌رۆك وه‌زيرێن عيراقێ ل هه‌يڤا 12 يا سالا 2017 راگه‌هاندبوو” هه‌موو ئاخا عيراقێ ژ داعشێ هاته رزگاركرن وئه‌و رێكخراوا تيرۆرستى ل عيراقێ نه‌مايه”.
بێهنڤه‌دانا رۆژێن شه‌مبيێ ل قوتابخانێن پاريزگه‌هه‌كا هه‌رێمێ هاته هه‌لوه‌شاندن
ئه‌ڤرۆنيوز:
رێڤه‌به‌ريا گشتى يا په‌روه‌ردێ ل پارێزگه‌ها سلێمانيێ بريار دا ل رۆژێن شه‌مبيێ قوتابخانه بۆ تمامكرنا خواندنێ بهێنه ڤه‌كرن وده‌وام بهێته كرن.
مه‌ريوان عومه‌ر، په‌يڤدارێ رێڤه‌به‌ريا گشتى يا په‌روه‌ردێ ل پارێزگه‌ها سلێمانيێ، دداخۆيانيه‌كا رۆژنامه‌ڤانى دا راگه‌هاند، ل سنورێ په‌روه‌ردا مه رۆژێن شه‌مبى دێ ده‌وام ل قوتابخانان هيته كرن ب مه‌ره‌ما تمامكرنا پرۆگرامێ خواندنێ.
وه‌زاره‌تا دارايى برياره‌ك ده‌ركر
ئه‌ڤرۆنيوز:
وه‌زاره‌تا دارايى وئابوورى ل هه‌رێما كوردستانێ بريار دا ژ نوكه وپێڤه پارێ مامۆستايێن وانه‌بێژ ل هه‌رێمێ هه‌يڤانه بهێنه به‌لاڤكرن.
وه‌زاره‌تا دارايى وئابوورى ب نڤيسارا خوه يا هژمار (2999) كو ل رۆژا پێنجشه‌مبى 5/4/2018 ب ئيمزا رێباز حه‌ملان وه‌زيرێ دارايى وئابوورى ده‌ركرى، بريار دا ژ نوكه وپێڤه هه‌يڤانه پارێ وانه‌بێژيێ بهێته به‌لاڤكرن.
دپشكه‌كا دى يا بريارا وه‌زاره‌تا دارايى دا هاتيه، پارێ وانه‌بێژيا سپێده‌يان وپارێ سه‌ره‌دانا وه‌زاره‌تا خواندنا بلند، ئانكو ئه‌و مامۆستايێن ل زانكۆيان وه‌كو وانه‌بێژ وانان دبێژن، دێ ب شێوه‌كێ هه‌يڤانه بيت، به‌لێ هه‌كه دحاله‌ته‌كى دا ژبه‌ر رۆتينێن كارگێرى مه‌زاختنا پاره‌ى هاته پاشخستن، دێ ل هه‌يڤا پاشتر دا بۆ هێته مه‌زاختن.
پارێ وانه‌بێژێن باوه‌رناما دكتۆرايێ حه‌فت هزار دينارن ويێن ماسته‌رى شه‌ش هزار دينار ويێن به‌كالوريۆس ودبلۆما بلند پێنج هزار دينار ودبلۆمێ چار هزار دينار، به‌لێ پارێ وانه‌بێژيێ ل وه‌زاره‌تا په‌روه‌ردێ بۆ هه‌ر ده‌مژمێره‌كێ ل دووڤ باوه‌رنامێن وان دناڤبه‌راسێ هه‌تا شه‌ش هزار دينارايه.
ئەڤرۆ جڤاتا ئاسایشێ دێ دەربارەی هێرشا كێمیایی یا سووریێ كۆم بیت
ئەڤرۆ نیوز ، زنار تۆڤی :
هژمارەکا دبلۆماتكاران پێشبینی دكەن كو پشتی نیڤرۆیا ئەڤرۆ دوشەمبی جڤاتا ئاسایشا نێڤدەولەتی ب مەرەما گوتۆبێژکرنا هێرشا كیمیایی یا سووریێ بۆ سەر باژێرێ دۆما ل غوتەیا رۆژهەلات كۆم بیت.
ئەو كۆمبوونا کو بریارە ئەڤرۆ بهێتە ساز کرن ل سەر داخوازیا ئەمریكا و فرنسا بوویە،ئەڤ چەندە پشتی هێرشا شەڤا بوری یا سوپایێ سووریێ دهێت بۆ سەر باژێرێ دۆما ل غوتەیا رۆژهەلات،کو بوویە ئەگەرێ كوشتنا 150 كەسان و برینداربوونا زێدەتر ژ هزار كەسێن دیتر.
هنارتیێ بریتانیا ل نەتەوێن ئێكگرتی ل تویتەری نڤێسیە،کو هەر ئێک ژ بریتانیا و فرنسا و ئەمریكا و پۆلۆنیا و هۆلەندا و سوید و كوێت و پیرۆ و كۆتدیفوار داخوازا كۆمبوونەکا ب لەز یا جڤاتا ئاسایشێ كریە بۆ گفتوگۆكرنێ دەربارەی راپۆرتێن بەحس ل بكارئینانا چەكێ كێمیایی ل سووریێ دكەن.
ژلایێ خوەڤە جان ئیف لۆدریان، وەزیرێ دەرڤە یێ فرنسا راگەهاندیە،کو كە وەلاتێ وی خوە ژ بەرپرسیارەتیێ ل هەمبەری سووریێ ڤەنادزیت و داخوازا كۆمبوونا جڤاتا ئاسایشا نێڤدەولەتی دڤی باریدا دکەت.
نيشاندان
WP Facebook Auto Publish Powered By : XYZScripts.com