ئه‌ڤرۆنيوز:
وه‌زاره‌تا دارايى وئابوورى ل هه‌رێما كوردستانێ برياره‌كا نوو ل دوور وه‌رگرتنا مۆله‌تا بێ مووچه ده‌ردكه‌ت.
وه‌زاره‌تا دارايى ب نڤيسارا خوه يا هژمار 3615 ل 19/4/2018 به‌حسێ راستڤه‌كرنا خالا چارێ ژ رێنماييا هژمار 14 يا تايبه‌ت ب مۆله‌تا بێ مووچه بۆ خودانێن پلێن تايبه‌ت دكه‌ت.
وه‌زاره‌تا دارايى دياركريه، ل رۆژا ده‌رچوونا ڤێ بريارێ هه‌ر كه‌سه‌ك ب پله‌يا وه‌زير داخوازا موله‌تا بێ مووچه بكه‌ت، پێدڤيه رازيبوونا جڤاتا وه‌زيران وه‌ربگريت.
ئه‌ڤرۆنيوز:
رێڤه‌به‌ريا گشتى يا كه‌شناسيێ وبيڤه‌له‌رزان ل هه‌رێما كوردستانێ دبه‌ياننامه‌كێ دا هوشداريێ دده‌ته وه‌لاتيێن هه‌رێما كوردستانێ.
رێڤه‌به‌ريا ناڤبرى دياركر كو ژ ئه‌گه‌رێ هه‌ردو نزمه پاله‌په‌ستويێن ده‌ريا ناڤه‌راست وده‌ريا سور، پێله‌كا دى يا باران بارينێ وسه‌رمايێ دێ به‌ر ب هه‌رێما كوردستانێ ڤه هێت.
كه‌شناسيا هه‌رێمێ خوياكر ژى” شه‌ڤا دوشه‌مبى ل سه‌ر سێشه‌مبى باران بارين ل باكوورێ رۆژئاڤايێ هه‌رێمێ دێ ده‌ستپێكه‌ت “.
دياركر ژى” كاريگه‌ريا مانا باران بارينێ ل هه‌ردو پارێزگه‌هێن هه‌ولێرێ ودهۆكێ زێده‌تره وئه‌گه‌رێ رابوونا ئاڤێ وله‌هيێ ل وان هه‌ردو پارێزگه‌هان زێده‌تره ژبه‌ر باران بارينا زۆر ل وان هه‌ردو پارێزگه‌هان”.
ئەڤرۆ نیوز ، زنار تۆڤی :
لیژنا ئاسایش و به‌رگریێ د په‌رله‌مانێ عێراقێ دا، هۆشداریێ ددەت کو هندەك لایه‌نێن ده‌ستهەلاتدار دڤێت ئامیرێن ده‌نگدانێ، پێش ده‌ستپێكرنا وێ پرۆسێ ژ كار بێخن.
هەروەسا گوتیە، زانیاریێن هه‌والگریێ گه‌هشتینە لیژنا مە،کو بزاڤەک هه‌یه ژلایێ هندەك لایه‌نێن ده‌ستهه‌لاتدار ڤە بۆ ژ كارخستنا ئامیرێن ئه‌لیكترۆنی یێن ده‌نگدانێ، ب مه‌به‌ستا په‌نابرنێ بۆ جۆداکرنا ب ده‌ستى و سەخته‌كرنا ئه‌نجامان.
گوتیە ژی،به‌رنامەکێ دارێژتی هه‌یه بۆ هندێ کو ئامیرێن ده‌نگدانێ، چه‌ند دەمژمێران پێش ده‌ستپێكرنا پڕۆسا ده‌نگدانێ بهێنە ژ كار خستن،لەوما پێدڤیه كۆمسیۆنا هه‌لبژارتنان پابه‌ندى به‌رپرسیارەتیا خوە بیت، ژبۆ پاراستنا دروست یا ئامیران.
حاكم زاملى سه‌رۆكێ لیژنا ئاسایش و به‌رگریێ گوتیە، ئه‌و زانیاریێن ده‌ست ب لیژنا وان كه‌فتین، ل دەمێ گه‌ریانا لیژنا وان بۆ پارێزگەهان ده‌ستكه‌فتینە،ب تایبه‌ت وان پارێزگەهێن ململانا گەرم تێدا،دیسا وان زانیاری هه‌نە،کو نیڤ رێكکه‌فتنەک هه‌یه دناڤبەرا هندەک رێڤەبەرێن وێستگه‌هان و هندەك لایه‌ن و حزبێن ده‌ستهەلاتدار كو زێدەتر پشت ب سەخته‌كاریێ دبه‌ستن،بۆ ژ كارخستنا ئامیران رۆژەکێ بەری ده‌نگدانێ.
زاملى گوت ژی دێ نڤێسینەکێ ئاراسته‌ى كۆمسیۆنێ كه‌ین،کو هه‌ر وێستگه‌هەکا پشت ب ده‌نگدانا ئه‌لیكترۆنى نه‌به‌ستیت،دێ ئه‌نجامێن وێ هێنه هەلوەشاندن.
رۆژناما شه‌رقولئه‌وست ئاماژه ب هندێ دایە،کو پێشتر نورى مالكى سه‌رۆكێ ئیئتلافا ده‌ولە‌تا قانوونێ و سه‌رۆك وه‌زیرێن بەرێ گوتیە،مە به‌لگەیێن ته‌مام هەنە کو ئامیرێن جۆداکرنێ و هژماركرنا ده‌نگان ده‌رفه‌تا سەخته‌كارێێ تێداهەیه،ژ پێخەمەت دەنگان ب دەستی ب هژمێرن.
ئه‌ڤرۆ نيوز:
ب ئامادەبوونا ئیسماعیل محمد ئەحمد ھاریکارێ پارێزگارێ دھۆکێ بۆ کارو بارێن ئاواران و پەنابەران و رێزدار ئەدریس نەبی صالح رێڤەبەرێ جێ بەجێ کار یێ بۆردێ کارو بارێن مرۆڤایەتی و خانم مەنال رێڤەبەرا نڤیسینگەھا بەرسڤ دانا قەیرانا ل پارێزگەھا دھۆکێ JCC، ل رێکەفتی ٦/٥/٢٠١٨ کۆمبوونەک لەز دگەل ژمارەکا رێکخراوێن نیڤ دەولی هات ئەنجام دان بۆ دیڤچۆنا رەوشا کەمپێن ئاواران و پەنابەران ل سنورێ پارێزگەھا دھۆکێ پشتی باران بارینا زۆر و زیان گەھشتنه چەندیین خیڤەتان ل ناڤ کەمپان
ئیسماعیل داخواز ژ رێکخراوێن بەشداری کۆمبوونێ کر کو ھاریکاریا بگەھینن وان خێزانێن زیان ب کەل و پەل و خیڤەتێن وان کەفتی، ژلایێ خۆڤە رێکخراوێن ئامادەی کۆمبوونێ بەرھەڤیا خۆ دەربرین بۆ دابیتکرنا ھەمی پیداویستیان ب زوترین دەم، ئارمانجا ڤێ کۆمبوونا بلەز داکو زوترین دەم ھاریکاری پێشکێشی وان خێزانا بھێت کرن
ئەڤرۆ نيوز:
ئەندامەکێ پەرلەمانێ عیراقێ پلانەکا سەختەکاریێ ژئالیێ ھندەک پارت و قەوارێن سیاسی ڤە ل عیراقێ دھەلبژارتنێن 12ی گولانێ دا ئاشکرادکەت.
دوھی رۆژا شەمبی رێکەفتی 5/5/2018 حاکم زاملی، سەرۆکێ لژنا ئاسایش و بەرەڤانیێ ل پەرلەمانێ عیراقێ د بەیاننامەکێ دا کو زانیاریێن ھەوالگیری دوێ پلانێ دا گەھشتینێ، ئاشکراکرکو حزب و ئالیێن سیاسی ل عیراقێ پلان ھەنە ئامیرێن ئەلکترونیێن دەنگدانێ ل رۆژا دەنگدانێ ژ کاربێخن و ب دەستی دەنگد بھێنە جوداکرن و دەست ب سەختەکاریێ بکەن، ھەمان ئەندامێ پەرلەمانی بێی ناڤێ چ ئالیان دیاربکەت ئەڤ چەندە ئاشکراکر، لێ ل دووڤ زانیاریێن ھەوالگێری گومان دھێـتەکرن کو ئەو پلان ژلایێ ھەر دو ھەڤپەیمانیا دەولەتا قانوونێ ب سەرۆکاتیا نوری مالکی و لیستا نەسر ب سەرۆکاتیا حەیدەر عەبادی بھێتە ئەنجامدان.
ئه‌ڤرۆ نيوز:
ل مەخموور دەست ھەلاتدارێن عێراقێ رێکێ نادەن ئوفیسا لیستا 184 یا پارتی بھێتە ڤەکرن و بەرپرسەکێ پارتیژی دبێژیت، پارتی دێ ل نەینەوا و مەخموور کۆرسیێن بەرێ ئینیت و دەنگێن پارتی دێ زێدەبن ل ھەلبژارتنێن ڤێجارێ.
حەیدەر شێخ کەمال، کارگێڕێ لقێ پارتی ل مەخموور بۆ رۆژناما ئەڤرۆ گۆت” ئەڤا ئەم پێشبینی دکەین ل سنورێ قەزا مەخموور لیستا 184 یا پارتی دێ دەنگێن ئێکێ بدەستڤە ئینیت و لیستا ئێکێ بیت، ژبەرکو ژبلی کوردان وەلاتیێن عەرەبژی سۆزدایە دەنگێ وان ل رۆژا ھەلبژارتنان دێ بۆ لیستا پارتی بیت، چونکو ددەمێ ھێرشا داعش بۆسەر دەڤەرێ پارتی بەڕەڤانی ل ھەموو پێکھاتێن دەڤەرێ کریە و ھژمارەکا زۆرا ئاوارەیان حەواندینە، ژلایێ ئیداری ڤە قەزا مەخموور ب پێنج ناحیاڤە گرێدایی پارێزگەھا نەینەوایە، گورەی پێشبینیێن مە دێ پارتی ل نەینەوا کۆرسیێن بەرێ ئینیت و بگرە زێدەژی بکەت.
حەیدەر شێخ کەمال گۆتژی” چەندین لیستێن جودا پەیدابووینە بۆھەلبژارتنێن ئەڤسالە، بەلێ کۆرسیێن پارتی دێ ھەر بمینن، ژ بەر کو ھەڤڕک نینە، ئەڤە سەرەرای رێگریێن ل بەربژێرێن پارتی تێنەکرن بۆ بانگەشەیان ھەلبژارتنان، ھەتا ل سەنتەرێ قەزا مەخموور دەستھەلاتێن عێراقێ رێکێ نادەن ئوفیسا لیستا 184 یا پارتی بھێتە ڤەکرن و رێگریێن زۆر ھەنە ل ھەمبەر لیستا پارتی.
ئه‌ڤرۆ نيوز:
ھێزێن پێشمەرگەی و سۆپایێ عیراقێ رێککەفتن کو رێیا بەردەڕەش بۆ ناحیا باشیکێ و مووسلێ بێتە ڤەکرن.
بۆتان بۆتانی، بەرپرسێ ڕاگەھاندنا قایمەقامیا قەزا بەردەڕەش بۆ ئەڤرۆ دیار کر، دوھی 5\5\2018 ب فەرمی رێیا بەردەڕەش بۆ ناحیا باشیکێ و مووسلێ ھاتە ڤەکرن و گۆت: “ھەردو ئالیێن پێشمەرگەی و سۆپایێ عیراقێ ل سەر ڤەکرنا وێ رێیێ رێککەفتن”.
بۆتانی خویا ژی کر، دەمەکێ درێژە پێشمەرگەی دخواست ئەو رێیە بھێتە ڤەکرن، بەلێ حەشدا شەعبی و سۆپایێ عیراقێ رێگر بوو و گۆت: “خۆشبەختانە دوھی رێ ھاتە ڤەکرن و ھاتنوچوون تێدا ئاسایی بوویە”.
ئه‌ڤرۆ نيوز:
بەرپرسەکێ ئێمناھیێ ل ئەمریکا دیار دکەت کو دەمەکە بەرھەڤی دھێنە کرن و جارا یەکێ یە کو ئەمریکا دخوازیت تورکیا سزا بدەت، چونکو تورکیا نھا ب ھەموو رەنگەکێ ل دژی بەرژەوەندیێن ئەمریکا کار دکەت و بەرپرسێن ئەمریکی ژی دخوازن رێگریێ ل ھندێ بکەن دا کو تورکیا نەبیتە مەترسی ل سەر بەرژەوەندیێن ئەمریکا و سزادانا تورکیا د رۆژەڤا ئەمریکا دایە.
نیکۆلاس دانفۆرس ئەندامێ ناڤەندا ئێمناھیا ئەمریکا ل واشنتۆن دیارکر کو تورکیا ل سووریێ ب ھەموو رەنگەکێ ل دژی بەرژەوەندیێن ئەمریکا کار دکەت، خوە نێزیکی روسیا کر و تورکیا گەفان ل وەلاتێ یونانێ ژی دکەت، ئەو یەک ب چو رەنگەکێ ناھێتە قەبوول کرن، ب تایبەتی ژی پشتی کو ئەردۆگان وەکو کەسێ یەکێ ل تورکیا بوویە دەستھەلاتدار رۆژ ب رۆژێ تورکیا ژ رۆژئاڤا دوور دکەڤیت و دبیتە مەترسی، ژ بەر ھندێ ژی جارا یەکێ یە کو بەرپرسێن ئەمریکی گەنگەشێ ل دۆر ھندێ دکەن کو دڤێت تورکیا سزا بدەین و گۆت: (بێگومان سزادانا دەستپێکێ دێ ب رەنگەکێ جودا بیت، ئەو کەسێن کو فەرمانێن ئەردۆگانی بجە دئینن دێ ھێنە سزادان، رەنگە رێ بۆ وان نەھێتە دان کو سەرەدانا ئەمریکا بکەن یان ژی ھندەک وەلاتێن ئورۆپا و رەنگە مال و داھاتێ وان ل دەرڤەیی تورکیا بھێتە بلۆک کرن).
ناڤھاتی دیار کر کو ئەڤ سزایە ھەموو بۆ ھندێ نە دا کو ئەردۆگان تەنگاڤ ببیت و خوە نێزیکی ئەمریکا بکەت، ھەکە ئەردۆگان و حوکمەتا وی ل سەر شاشیێن خوە یێن نھا بەردەوام بن رەنگە پشتی دەمەکا دی ئەمریکا دەست ب سزایێن مەزن ژی بکەت، چونکو بەری نھا ژی ل سەردەمێ ئۆبامایی ھندەک بەرپرسێن ھەوالگیری و ئێمناھیێ داخواز ژ ئۆبامای کربوون کو سنورەکێ بۆ زێدەگاڤیێن ئەردۆگانی ل رۆژھەلاتا ناڤین دانێت.
ھەمان بەرپرسێ ئەمریکی ئەو یەک ژی دیار کر کو د گەلەک بیاڤان دا ئەردۆگان و ئیران نێزیکی ھەڤدو بووینە، ئەو یەک ژی مەترسیێن نوو بۆ مە دروست دکەت، دڤێت تورکیا خوە ژ ئیرانێ دوور بکەت. چەند بەرپرسێن تورکیا کو بەری نھا ل ئەمریکا ھاتنە دادگەھکرن وان دانپێدان ب ھندێ کریە کو ئەردۆگان ھاریکاریا ئیرانێ کریە دا بشێت خوە ژ سزایێن ئابووری یێن کو ئەمریکا ل سەر دانابوو قورتال بکەت، ئەو یەک بنپێکرنا قانوونێن نێڤدوەلەتی یە و ئەمریکا ل ھەمبەر ڤان کریارێن تورکیا بێدەنگ نامینیت و دێ دەست ب سزادانا حوکمەتا ئەردۆگانی و کەسێن نێزیکی وی کەت.
ناڤھاتی ئاماژە ب ھندێ ژی کر کو ل تورکیا دیموکراسی بەر ب نەمانێ ڤە دچیت، گەلەک کەسایەتیێن ناسکری یێن تورکیا و رۆژنامەڤانێن مەزن نھا ل زیندانێ دانە و تنێ تاوانا وان ئەڤە کو دژبەریا ئەردۆگانی کرینە، ئەمریکا ژ رەوشا ناڤخوەیی یا تورکیا دلگرانە و ھەکە رەوش وەسا بەردەوام بکەت دڤێت ھزر د ھندێ دا بھێتە کرن کو ئەمریکا د بیاڤێ سەربازی و سیاسی دا خوە ژ تورکیا دوور بکەت، چونکو نابیت ئەم ھاریکاریا وەلاتەکێ بکەین کو ب ھەموو رەنگەکێ نھا ل دژی بەرژەوەندیێن مە و ل گەل نەیارێن مە کار دکەت و گۆت: (ھەکە پشتی ھەلبژارتنێن ئەڤسالە ل تورکیا گوھۆرینێن بەرچاڤ روو نەدەن و ئەردۆگان ھەر وەکو نھا دژبەریا مە بکەت ئەو یەک بۆ تورکیا ژی باش نابیت، ئەنجامێ سیاسەتا شاش یا ئەردۆگانی وەسا کریە کو بارێ ئابووری یێ تورکیا ژی رۆژ ب رۆژێ خرابتر لێ دھێت).
ئه‌ڤرۆ نيوز:
پشتی راگەھاندنا ھەڤپەیمانیا جمھور یا کو ژ ئاکپارتی و مەھەپێ پێک دھێت، د ناڤبەرا چار پارتێن دی یێن تورکیا دا ژی ھەڤپەیمانیا (ھوزور) ھاتە راگەھاندن کو سەرکێشیا وێ پارتا کۆماریا گەل (جەھەپە) دکەت و پارت و ئالیێن سیاسی یێن کوردی ژی دخوازن ھەڤپەیمانیەکا کوردی و دیمۆکراتیک ئاڤا بکەن و ب رەنگەکی ب ھێز و یەکگرتی پشکداریێ د ھەلبژارتنێن سەرۆک کۆماریێ و پەرلەمانی دا.
د ڤێ مژارێ دا مستەفا ئۆزچەلیک سەرۆکێ گشتی یێ پارتا ئازادیا کوردستانێ راگەھاند کو ھەڤدیتنا وان یا ل گەل پارتا دیمۆکراسیا گەلان باش دەرباز بوویە و گۆت: (مە داخوازێن خوە پێشکێشی ھەدەپێ کر و د چارچۆڤێ ١٥ خالێن کو وەک دۆسیا مە دا ھەدەپێ ئەم دخوازین ھەڤپەیمانیەکا بەرفرەە یا کوردی دروست بکەین و وەک پێنگاڤا یەکەم ھەڤدیتنا مە گەلەک ئەرێنی بوو و ئەم دێ چاڤەرێی بەرسڤا برایێن خوە یێن ھەدەپێ بین و ھێڤیدارین کو ئەم بشێین د ھەلبژارتنان دا ب رەنگەکی یەکگرتی و ب ھێز پشکداریێ بکەین).
پەروین بولدان ھەڤسەرۆکا پارتا دیمۆکراسیا گەلان ژی پشتی ھەڤدیتنا سەرۆک و نوونەرێن پێنج پارتێن کوردستانی ل بەر ئاڤاھیا پارتا خوە بۆ رۆژنامەڤانان راگەھاند کو ئەو ژ سەرەدانا پارتێن کوردی کەیفخوەش بووینە و گۆت: (بۆ ھەلبژارتنێن ٢٤ێ خزیرانێ زێدە وەخت نەمایە و د ڤێ قۆناغێ دا دروست کرنا ھەڤپەیمانیەکا بەرفرەە یا دیمۆکراتیک بۆ پاشەرۆژا گەلێ کورد گەلەکێ گرنگە و ب واتەیە و خالێن کو شاندێ پارتێن کوردی داینە مە ھەمو خالێن گرنگن و بۆ پاشەرۆژا کوردان د جھێ خوە دانە و ئەم پشتەڤانیا داخوازێن وان دکەین و دشێم بێژم کو ھەڤدیتنەکا گەلەک ئەرێنی و سەرکەڤتی پێک ھاتیە و د پاشەرۆژێ دا ئەم دێ ب بەرفرەھی ل سەر ڤێ مژارێ راوەستین).
ئه‌ڤرۆ نیوز:
باران بارین و له‌هى ل سه‌نته‌رێ باژێرێ دهۆكێ و ده‌وروبه‌ران به‌رده‌وامه و به‌ره‌ڤانیا باژێرى ل دهوكێ زیانێن وێ بو ئه‌ڤرۆ نیوز به‌حس دكه‌ت.
بێوار عه‌بدولعه‌زیز به‌رپرسێ راگه‌هاندنا رێڤه‌به‌ریا به‌ره‌ڤانیا باژێرى ل دهوكێ بۆ ئه‌ڤرۆ نیوز گۆت” باراینا بارانێ و له‌هیان ل سه‌نته‌رێ باژێرێ دهۆكێ و ده‌وروبه‌ران به‌رده‌وامى هه‌یه وزێده‌تر ژ 50 خانیان زیانێن زور پێكه‌فتینه ژ وانان 27 خانى ب ئێكجارى كه‌فتینه به‌ر له‌هیێ و چو تشت نه‌ماینه تێدا ، و چار كه‌س ژى دبێ سه‌روشوينن و 30 ترومبێل ژى ژێر ئاڤ بووینه و زیانێن زور پێكه‌فتینه”.
زێده‌تر گۆت” 27 كه‌س ژلایێ تیمێن مه و تیمێن ساخله‌میێ هاتینه رزگاركرن و هه‌وا رزگاركرنا وه‌لاتیان به‌رده‌وامه ، و هه‌موو لایه‌نێن په‌یوه‌ندیدار لسه‌ر خه‌تن و ب هانا وه‌لاتیان چوینه”.
نيشاندان