ئه‌ڤرۆ نيوز:
ب هه‌لكه‌فتا ده‌ربازبونا (103) سالا ل سه‌ر جینوسایدكرنا گه‌لێ ئه‌رمه‌نی ژلایێ ده‌ستهه‌لادارێن ئیمبراتوریا ئوسمانی دوهى ئێڤاری 24-4-2018 ل هولا دێرا ئه‌رمه‌نان ل باژێرێ دهوكێ وب ئاماده‌بونا به‌رێزان فه‌رهاد ئه‌مین ئه‌تروشی پارێزگه‌رێ دهوكێ وكونسلێ ئه‌رمه‌نستانێ ل كوردستانێ وپه‌رله‌مانته‌رێن كوردستانێ وعیراقێ وچه‌ند به‌رپرسێن حزبی وئیداری وزانایێن ئاینی وكه‌سایه‌تیێن ئه‌رمه‌نی وكوردستانی یادا 103سالیا جینوسایدكرنا گه‌لێ ئه‌رمه‌نی هاته ساخكرن.
ل به‌راهیێ وارتكێس موسێس ب خێر هاتنا به‌رهه‌ڤبویان كر ورونكرن دانه سه‌ر مێژویا گه‌لێ ئه‌رمه‌نستانێ وئه‌و نه‌هامه‌تیێن ب سه‌رێ وان هاتین به‌رچاڤكرن هه‌روه‌سا ئاماژه دا مێژویا ئه‌نجامدانا كوشتارا ئه‌رمه‌نیا یا كو ل سالێن 1915هه‌تا سالا 1919ده‌وله‌تا ئوسمانی ئه‌نجامدای وپتر ژملیونه‌ك وپێنچ سه‌د هزار كه‌سێن بێ گونه‌ه هاتینه كوشتن وگوت هه‌ر سال ل 24 نیسانێ ئه‌ڤ كاره‌ساته ژلایێ گه‌لێ ئه‌رمه‌نی دهێته ساخكرن وهه‌ول دهێنه دان كو دان پێدان بڤێ جینوسایدێ بهێته كرن.
پاش پارێزگه‌رێ دهوكێ په‌یڤه‌ك پێشكێشكر وگوت كه‌س وه‌كو ملله‌ت كورد هه‌ست ب ئێش وئازارێن ڤان جوره كاره‌ستان ناكه‌ت چونكو ملله‌ت كورد ل هه‌ر چار پارچێن كوردستانێ توشی گه‌له‌ك نه‌هامه‌تی وكوشتارێن بڤی ره‌نگی بویه ودوماهی كوشتار ژی ئه‌بو یا ڤێ دوماهیێ تیرورستێن داعش هه‌مبه‌ر كوردێن ئێزدی ئه‌نجامدای .
هه‌روه‌سا گوت ئه‌م ب دل وگیان دگه‌ل مله‌تێ ئه‌رمه‌نی نه و بناڤێ كارگێریا پارێزگه‌هێ سه‌رخوشی ل گه‌لێ ئه‌رمه‌نی كر وئه‌ڤ تاوانا مه‌زن یا هه‌مبه‌ر ئه‌رمه‌نیا هاتیه ئه‌نجامدان ئیدانه‌كر وهه‌ڤخه‌میا خو دگه‌ل خه‌لكێ ئه‌رمه‌نی دیاركر وسوپاسیا وان كه‌سان ولایه‌نان كر كو ئه‌ڤ چالاكیه ئه‌نجامدای.
پاش چه‌ند سرودێن تایبه‌ت هاتنه پێشكێشكرن ده‌ربرین ژكاره‌ساتێ دكر.
هه‌ر ب ڤێ هه‌لكه‌فتێ به‌رێز (یروانت نیسان) ئه‌ندامێ په‌رله‌مانێ كوردستانێ په‌یڤه‌ك خاند وسوپاسیا هه‌موو به‌رهه‌ڤبویان كر وته‌كه‌زكر كو گه‌لێ ئه‌رمه‌نی وگه‌لێ كوردستانێ زور نه‌هامه‌تی ونه‌خوشی یێن وه‌ك هه‌ڤ دیتی نه وگوت هه‌تا ملله‌تێ ئه‌رمه‌نی سه‌ربخویا خو نه‌وه‌رگرتی جینوساید به‌رده‌وام ل دژی وان دهاتنه ئه‌نجامدان هه‌روه‌سا هه‌تا كوردستان ژی نه‌بیته ده‌وله‌ت جینوساید به‌رده‌وام دێ ل دژی وان هێنه كرن .
ل دوماهیێ ته‌كه‌زی ل سه‌ر پێكڤی ژیانێ كر وسوپاسیا گه‌لێ كورد وحكومه‌تا كوردستانێ وپارێزگه‌ها دهوكێ وهه‌موو په‌له‌مانته‌رێن كورد ل په‌رله‌مانێ عیراقێ وكوردستانێ كر كو هه‌رده‌م پشته‌ڤانبوینه بو گه‌لێ ئه‌رمه‌ن.
پاش خه‌لاتێن رێزگرتنێ ل سه‌ر پارێزگه‌رێ دهوكێ وپه‌رله‌مانته‌رێن به‌رهه‌ڤبوی وچه‌ند سازیێن را گه‌هاندنێ هاتنه به‌لافكرن.
هه‌ربڤێ هه‌لكه‌فتێ كونسلێ ئه‌رمه‌نستانێ ل هه‌ولێرێ په‌یڤه‌ك پێشكێشكر وگوت: بومن جهێ شانازیێ یه پشتی 103 سالا ژ وان كوشتارێن ل دژی ئه‌رمه‌نا هاتینه ئه‌نجامدان ئه‌ز بهێمه كوردستانێ ومروڤێن خو ببینم كو ب ئازادی ل ڤی وه‌لاتی دژین وسوپاسیا گه‌لی كورد دكه‌م كو به‌ری 103 سالا ده‌رگه‌هێن خو هه‌مبه‌ر وه‌لاتیێن مه ڤه‌كربون وحه‌واندینه و گوت هه‌ر سال ئه‌م ڤێ كاره‌ساتێ ساخدكه‌ین ولبیرا خو دئینین وته‌كه‌زكر كو دڤێت هه‌موو ملله‌ت ده‌ستێ هه‌ڤدوو بگرن كو ئه‌ڤ جینوسایده دوباره ل دژی چ ملله‌تان نه‌هێنه ئه‌نجامدان .
ل دوماهیێ به‌رهه‌ڤبویا قه‌فته گول دانانه سه‌ر مێنومینته‌كێ تایبه‌ت .
هه‌ربڤێ هه‌لكه‌فتێ پێشانگه‌هه‌كا وێنێن جینوسایدێ هاته نیشادان.
ئه‌ڤرۆ نيوز:
سالانە نێزیکی دو ھزار پەنابەرێن ھەرێما کوردستانێ لدەرڤە ڤەدگەڕن و رێڤەبەرێ کۆچ و کۆچبەرانژی ئاماژە بڤێ چەندێ دکەت، بزاف یێ تێنەکرن گوژمەکێ پارەی بۆ پەنابەرێن ڤەگەڕیێن بھێتە مەزاختن و دیارکر، ئاستەنگا سەرەکی لھەمبەر ڤەگەڕیانا پەنابەران نەبوونا کاریە.
شاکر یاسین، رێڤەبەرێ گشتیێ کۆچ و کۆچبەرێن ھەرێما کوردستانێ بۆ رۆژناما ئەڤرۆ گۆت” سالانە ب رێکێن جودا دو ھزار پەنابەرێن ھەرێما کوردستانێ ل دەرڤە ڤەدگەڕن، بەلێ ب ئەگەرێ نەبوونا کاری و گەرەنتی نەکرنا ژیانا وان ھژمارەکا زۆرا پەنابەران بەرھەڤنینە ڤەگەڕن، چونکە پتریا پەنابەران دەمێ ڤەدگەڕن بۆ ھەرێما کوردستانێ ئاریشا نەبوونا کاری ھەیە، لەوڕا نوکە ئەم یێ کار بۆڤێ چەندێ دکەین دگەل ھژمارەک رێکخراوێن نێڤدەولەتی ھاریکاریا پەنابەرێن ڤەگەڕیای بھێتەکرن و گوژمەکێ پارەی بۆ بھێتە مەزاختن ھەتا بشێن ژیانا خوە دەربازبکەن و کارەکی بخوە پەیدا بکەن.
شاکر یاسین دیارکر” نوکە مە ھەماھەنگی دگەل ھژمارەک وەلاتێن بیانی پەیداکریە بۆ ڤەگەڕیانا ئارەزوومەندا بمەرجەکی ھاریکاریا وان پەنابەرا بھێتەکرن یێن دخوازن ڤەگەڕن ھەرێما کوردستانێ، بتایبەتی دگەل وەلاتێ ئەلمانیا و سوید بزاف ھەنە ھندەک پارە بھێتە مەزاختن بۆھەر پەنابەرەکێ بخوازیت ڤەگەڕیت و لھەرێما کوردستانێ ژی کار بۆ بھێتە دیتن، چونکە نەبوونا کاری ئاستەنگە لھەمبەر ڤەنەگەڕیانا پەنابەران.
ئه‌ڤرۆ نيوز:
پێکھاتەیا ئەرمەن ل کۆرسیا کۆتا ھاتینە بێ بەھرکرن بۆ پەرلەمانێ عیراقێ و نوونەرەکێ ئەرمەنێن دھۆکێ ژی دبێژیت، پەرلەمانێ عیراقێ رەتکر مە کۆرسیا کۆتا ھەبیت و گۆت دڤێت کۆرسیەکا کریستیانا بۆ ھەوە بیت.
یەروانت نیسان، نوونەرێ ئەرمەنێن کوردستانێ بۆ رۆژناما ئەڤرۆ گۆت” سەرەرای ھەبوونا 10 ھزار وەلاتیێن ئەرمەن ل ھەرێما کوردستانێ و عیراقێ، بەلێ بەغدا یا بەرھەڤنەبو نوونەرەکێ کۆتا بۆ پێکھاتا ئەرمەنان دەستنیشان بکەت، ئەڤەژی بۆیە جھێ دلگرانیا وەلاتیێن ئەرمەن، چونکە مللەتێ ئەرمەن چو نوونەرێن خوە نابن لپەرلەمانێ بھێت یێ عیراقێ، سالا بۆری بزاڤێن زۆر ھاتنەکرن کۆرسیەکا کۆتا بۆ پێکھاتا ئەرمەن ددەمێ راستڤەکرنا قانوونا ھەلبژارتنان بەلێ مخابن ژلایێ کۆتلەیێن پەرلەمانی ھاتە رەتکرن.
یەروانت نیسان گۆتژی” بزاڤێن مە دێ بەردەوامبن بۆ ھەلبژارتنێن داھاتی کۆرسیەکا کۆتا بۆ ئەرمەنا بیت ژبەرکو مافێ مەیە، چونکە لھەرێما کوردستانێ کۆرسیەکا کۆتا ھاتیە دیارکرن، ئەگەر بەغداژی مینا ھەرێما کوردستانێ کۆرسیەکێ بۆ پێکھاتێن ئەرمەن دیاری نەکەت ئەڤە رامانێن خوە ھەنە و بێدەنگنابین، چونکە بەری نوکە دەمێ مە داخوازا کۆرسیەکێ بۆ پەرلەمانێ عیراقێ کری بەغدا گۆتنە مە بلا کۆرسیەکا کریستیانان بۆ ھەوە بیت، لەو پێکھاتا ئەرمەن کو پتریا وان ل پارێزگەھا دھۆکێ نە دلگرانن ل بێ بەھرکرنا وان .
ئه‌ڤرۆ نيوز:
دیدار رەمەزان رێڤەبەرێ گەشتوگوزارێ ل قەزا ئاکرێ ددەتە دیارکرن کو وان 63 جە کرینە د ماستەر پلانا گەشتوگوزارێ دا، ئەڤ ماستەر پلانە ل سەر سێ قووناغا دەرباز دبیت؛ قووناغا ئێکێ دیزاینکرنە کو وان چار جە دەست نیشانکرینە کو بھێنە چێکرن چ ژ لایێ حوکمەتێ یان وەبەرھێنەران ڤە بیت.
ھەروەسا قووناغا دویێ دەست نیشانکرنا وان جھانە کو ئەو ژی 25 جە وان دەست نیشان کرینە و کار ل سەر دکەن کو وان جھان بکەنە دبن دەستێ گەشتوگوزارێ دا، ئەڤجا چ وەزارەتا دارایی بن یان وەزارەتا چاندنێ و تایبەت بھێنە بکارئینان بۆ پرۆژێن گەشتوگوزارێ ب تنێ، ھەروەسا قووناغا سیێ جھێن درێژ خایەنن کو گەلەک جە ھەنە و رێیێن وان د دوورن، بەلێ بۆ گەشتوگوزارێ د گونجاینە کو ئەڤە ژی د ماستەپلانێ دانە.
ئاماژە دا ھندێ کو نھا کار ل سەر ھندەک پرۆژێن گەشتیاری دھێتەکرن و دێ دبەرڤبن ئەڤ سالە بۆ گەشتیاران ئەگەر ئەو جە ب داوی ھاتن دێ ئەڤ سالە 13جھێن گەشتیاری ھەبن بۆ گەشتیاران، بەلێ کێشا زەڤیان و کێشا ھندەک گوندان گەلەک جاران دبنە ئاستەنگ کو ب دروستی پرۆژێن گەشتیاری ل ھندەک جھان نەھێنە چێکرن، “ئەو پرۆژێن نوکە کار ل سەر دھێتەکرن ئەگەر ب دووماھی ھاتن دێ ئەم شێین رۆژانە پێشوازیا 20 ھزار گەشتیارا بکەین”.
رێڤەبەرێ گەشتوگوزارا ئاکرێ گۆتژی: “ئاکرێ پێنج جورێن گەشتیاران دێ ھەبن ئەگەر ب دروستی کار سەر وان جوران بھێتەکرن، گەشتوگوزارا ئاینی کو مە ل ئاکرێ گەلەک جھێن ئاینی ھەنە ئەگەر کار ل سەر بھێتە دێ گەشتیارێ ئاینی ژی ھەبیت، ھەتا کو ل سالا 2012ێ 140 گەشتیارێن ئاینی ل باشوورێ ئەفریقیا ھاتن سەرەدانا مەزارێ شێخ (عەبدولعەزیز گەیلانی) کر کو ئێک ژ ھێمایێن دینێ ئیسلامێ یە ل سەر تەریقا قادری پەیرەو دکەن، ئەڤە بۆ ئەگەر کو ھزر د گەشتیارێ ئاینی ژی دا بکەین، ژ بەر ھندێ مە ھندەک پرۆژێن تایبەت ب وان جھێن ئاینی ڤە دانان و دا کو ژ ڤی لایەنی ژی مفا ل گەشتیاران وەربگرین، بەلێ ئەو قەیرانا ڤێ داویێ کاریگەریەکا مەزن کرە سەر چێکرنا جھێن گەشتیاری”.
ئەڤرۆ نيوز:
سەرۆکێ فرەنسا ئیمانوێل ماکرۆن ب سەرەدانا فەرمی گەھشتە ئەمریکا، بەری کو ماکرۆن بەر ب ئەمریکا ڤە بچیت ل پاریسێ راگەھاند کو ئێک ژ خالێن گرنگ یێن سەرەدانا وی بۆ ئەمریکا ل دۆر ئیرانێ یە، چونکو ئیران ل رۆژھەلاتا ناڤین رۆژ ب رۆژێ پتر مەترسیێ بۆ بەرژەوەندیێن مە و وەلاتێن رۆژئاڤایی دروست دکەت و ئیران ناھێلیت رەوشا سووریێ ئارام بیت، ئەز دێ ڤان بابەتان ل گەل بەرێز ترامپی گەنگەشە کەم و دەم یێ ھاتی سنورەکێ بۆ زێدەگاڤیێن ئیرانێ دانێین.
بەھرام قاسمی پەیڤدارێ وەزارەتا دەرڤە یا ئیرانێ ژی دوھی راگەھاند کو سەرۆکێ نھا یێ فرەنسا کەفتیە بن کاریگەریا سعوودیێ و ئەمریکا و دخوازیت رەوشا رۆژھەلاتا ناڤین ئالۆزتر بکەت، ماکرۆن ژ بەر بەرژەوەندیێن خوە یێن تەنگ وەسا کر کو ئەمریکا و بریتانیا ھێرشی سووریێ بکەن و نھا ژی خوە بۆ شەرەکی ل دژی مە بەرھەڤ دکەن، ئەو یەک د بەرژەوەندیا چو ئالیەکێ دا نینە و دڤێت فرەنسا خوە نەکەتە پشکەک ژ کریارێن نە مرۆڤی یێن ئەمریکا، چونکو ئەمریکا ب سالانە ل رۆژھەلاتا ناڤین ب بەھانا شەرێ تیرۆرێ خەلکێ مەدەنی دکوژیت و ناھێلیت رەوشا رۆژھەلاتا ناڤین ئارام ببیت.
ئه‌ڤرۆ نيوز:
سەرۆکێ کۆمپانیا ڤەکۆلینان ل تورکیا راگەھاند کو دێ ٥٠ پەرلەمانتارێن ئاکپارتیێ بچنە د ناڤا رێزێن پارتا سەعادەتێ و ئەو یەک دێ بیتە سەدەمێ کێمبوونا دەنگێن ئاکپارتی و د ڤێ مژارێ دا بەرپرسێن ئاکپارتیێ بێدەنگن.
حلمی تاشدەمیر سەرۆکێ کۆمپانیا ڤەکۆلینان ل تورکیا د بەرنامێ گەنگەشێ یێ تەلەفزیۆنا خەبەرتورک دا راگەھاند کو راپرسی و ڤەکۆلینێن د ناڤا ڤێ ھەفتیێ دا ددەنە خوەیا کرن کو دەنگێ ئاکپارتی و مەھەپێ کێم بووینە و گۆت: (پارتا سەعادەت دخوازیت عەبدوللا گویل سەرۆک کۆمارێ بەرێ یێ تورکیا بۆ سەرۆک کۆماریێ بەربژار بکەت و ئەو یەک ژ ئالیێ ئاکپارتیێ ڤە بوویە جھێ نەرازیبوونێ و ترسا ئاکپارتی ئەڤە کو عەبدوللا گویل ببیتە سەدەمێ کێمبوونا دەنگێ پارتا وان و بۆ ڤێ چەندێ ژی بزاڤێ دکەن کو عەبدوللا گویلی رازی بکەن دا نەبیتە بەربژارێ سەرۆک کۆماریێ و پشتەڤانیا ئەردۆگانی بکەت لێ ئەڤ بزاڤا ئاک پارتیێ ھەتا نھا سەر نەگرتیە).
سەرۆکێ کۆمپانیا ڤەکۆلینان ھەروەسا راگەھاند ژی کو د ناڤا ھۆلا پەرلەمانی دا گەنگەشەکی گەلەک سەرنجراکێش ھەیە کو دبێژن ٥٠ پەرلەمانتارێن ئاکپارتیێ بریارا دەست ژ کارکێشانێ ژ پارتا خوە داینە و گۆت: (ل دووڤ ئەنجامێن ڤەکۆلینێن مە ٥٠ پەرلەمانتارێن ئاکپارتیێ ئالیگرێن سەرۆک کۆمارێ بەرێ یێ تورکیا عەبدوللا گویلن و پەیوەندی ل گەل گویل و سەرۆکاتیا پارتا سەعادەتێ ھەنە دا کو بچنە د ناڤا رێزێن ڤێ پارتیێ دا و ئەڤ داخوازا وان ژ ئالیێ سەرکردێن سەعادەتێ و عەبدوللا گویل ڤە ب گەرمی ھاتیە پێشوازی کرن و رەنگە ئەو یەک ببیتە سەدەمێ سەرەکی یێ بنکەڤتنا ئاکپارتیێ و ئەردۆگانی د ھەلبژارتنێن ٢٤ خزیرانێ دا).
د ڤێ مژارێ دا بورھان کوزو ئەندامێ سەرکردایەتیا ئاکپارتیێ د ھەمان بەرنامێ دا بەرسڤا سەرۆکێ کۆمپانیا ڤەکۆلینان دا و راگەھاند کو چو پەرلەمانتارێن وان ناچنە د ناڤا رێزێن پارتیا سەعادەتێ دا و گۆت: (ئەم دێ د ھەلبژارتنێن ئەڤسالە دا جارەکا دی سەرکەڤتنا خوە راگەھینین و نە عەبدوللا گویل و نە ژی چو کەسەکی دی نەشێت ببیتە سەرۆک کۆمار).
ئه‌ڤرۆ نيوز:
رێڤەبەرێ ناحیا دێرەلۆکێ بۆ ئەڤرۆ دیار کر کو کار د پرۆژێ ھایدروپاوەرێ دێرەلۆکێ دا یێ بەردوامە و قووناغا ئێکێ 100% ب دووماھی ھاتیە و قووناغا دویێ ژی ھەتا دۆرێن 35% ھاتیە بجھئینان و رەتکر کار د پرۆژەی دا ھاتبیتە راوەستاندن.
سامی ئوشانە، رێڤەبەرێ ناحیا دێرەلۆکێ ئاشکرا ژی کر، نوکە کار د پرۆژێ ھایدروپاوەرێ دێرەلۆکێ دا یێ بەردەوامە و ھەردو کۆمپانیێن ئیرانی و ئیتالی بەردەوام کار تێدا دکەن، ب تنێ و ژ بەر ئەگەرێن ھاتنوچوونێ و دائێخستنا فڕۆکەخانان بۆ دەمێ دو ھەیڤان کار تێدا ھاتبوو راوەستاندن و گۆت: “پرۆژێ ھایدروپاوەرێ دێرەلۆکێ ئێک ژ پرۆژێن ستراتیژی یە ل دەڤەرا ئامێدیێ و د کەڤیتە سەر رووبارێ زێ ل گەلیێ رەشاڤە ل دێرەلۆکێ و ب چێکرنا وێستەگەھەکا بەرھەمئینانا کارەبێ 38 میگاواتێن کارەبێ ل سەر کارەبا نیشتیمانی یا ھەرێمێ دێ ھێنە زێدە کرن”.
سامی زێدەتر گۆت: “ڤی پرۆژەی گرنگیەکا تایبەت بۆ خەلکێ دەڤەرێ یا ھەی، ژ بەر کو دێ شێت کارەبا نیشتیمانی بۆ دەڤەرێ دابینکەت ل دەمێ کو ئاریشەک د کارەبا نیشتیمانی دا دروست دبیت”.
خویا ژی کر، پرۆژێ ھایدروپاوەرێ دێرەلۆکێ ژ لایێ دو کۆمپانیێن ئیرانی و ئیتالی ڤە دھێتە دروستکرن و دۆرێن 167 ملیۆن دۆلار ل سەر قەرێن ژاپۆنی بۆ ھاتینە تەرخانکرن و بڕیارە ل دووماھیا سالا 2019 ب دووماھی بھێت و بکەڤیتە د خزمەتا وەلاتیان دا.
ئەڤرۆ نيوز:
نڤیسەرەکێ ناڤدرێ بریتانیا دیار دکەت کو رەوشا ئالۆز یا سووریێ و پاشەرۆژا نەدیار یا رۆژھەلاتا ناڤین خالێن خرابن ژ بۆ کوردان و ھەتا نھا ژی ئەمریکا و روسیا چو بەرنامە بۆ کوردان نینن و دڤێت کورد خوە بۆ ھەر گوھۆڕینەکێ ل رۆژھەلاتا ناڤین بەرھەڤ بکەن.
پاتریک کۆکبورن نڤیسەرێ ناڤدارێ ئەمریکی دیار دکەت کو ل سووریێ و عیراقێ کوردان پتر ژ ھەر ھێزەکا دی شەرێ تیرۆرستان کرن و گەلەک قوربانی دان و ئێکانە ھێزا عەردی بوون کو شیان تیرۆرێ ژناڤ ببەن، کورد چاڤەرێ ھندێ بوون پشتی ژناڤچوونا تیرۆرێ جڤاکێ نێڤدەولەتی پشتەڤانیێ ل مافێ وان یێ رەوا بکەت، لێ مە دیت کا چاوا ل عیراقێ پشتەڤانی ل کوردان نەھاتە کرن نھا ژی ل سووریێ کورد ب تنێ ماینە، ئەمریکا و فرەنسا ھەتا نھا ژی بەحسێ مافێ رەوا یێ کوردان ناکەن و تنێ دبێژن بۆ شەرێ ل دژی تیرۆرێ دێ ھاریکاریا کوردان کەین و گۆت: (ئەو یەک ژی نیشا ددەت کو چو گەرەنتیەک بۆ پشتەڤانیا کوردان نینە و رەوشا نھا نیشا ددەت کو ھەتا شەرێ بەرژەوەندیان د ناڤبەرا روسیا و وەلاتێن رۆژئاڤا ب سەرکێشیا ئەمریکا ب دووماھی نەھێت کوردان چو دەستکەفتێن بەرچاڤ نابن).
ناڤبری ھەروەسا دیار دکەت کو سەرەرای ھندێ بەری نھا فرەنسا سۆز دابوو شاندێ رۆژئاڤایێ کوردستانێ کو دێ بەرگیریێ ل کوردان کەت، لێ عەفرین ل بەر چاڤێ وان کەفتە بن کۆنترۆلا تورکیا و وان دەنگێ خوە نەکر، ھەتا نھا ژی ل عەفرینێ و دەوروبەرێن وێ مالێن کوردان دھێنە تالانکرن و چەکدارێن سەر ب تورکیا کوردان دکوژن و کەس دەنگێ خوە ناکەت، ئانکۆ مرۆڤ دشێت بێژیت ھێزێن جیھانی تنێ کوردان بۆ بەرژەوەندیێن خوە بکار دئینن و ھەتا نھا ژی دیار نینە کا پشتی نەمانا بەشاری دێ ھەلویستێ ئەمریکا و روسیا ل ھەمبەر کوردان ل سووریێ چاوا بیت، چونکو ھەکە ھەر دو وەلاتێن زلھێز بگەھنە رێککەفتنەکێ و بەرژەوەندیێن خوە مسوگەر بکەن دێ کوردان ژبیر کەن، ئەو یەک ژی رێ بۆ مەترسیێن نوو ل سەر کوردان ڤەدکەت.
بەری نھا ژی گەلەک نڤیسەر و چاڤدێرێن سیاسی یێن رۆژئاڤایی دیار کربوون کو پشتی روودانێن ل کەرکووکێ و ھەلویستێ جیھانێ ل ھەمبەر کوردان ھەتا کورد د ناڤا خوە دا ئێکگرتی نەبن و بەرگیریێ ل خوە نەکەن دێ مەترسی ل سەر وان ھەبیت، چونکو ئاشکرا بوو ئەمریکا و وەلاتێن رۆژئاڤا چو بەرنامە بۆ پاراستنا کوردان نینن و وان دڤێت تنێ کوردان بۆ بەرژەوەندیێن خوە بکار بینن، چونکو ھەتا شەرێ ل دژی داعشێ ل عیراقێ گەرم بوو رۆژانە شاندێن وەلاتێن رۆژئاڤا سەرەدانا ھەرێما کوردستانێ دکرن و سۆزا پشتەڤانیێ ددانە کوردان، لێ دەمێ لەشکرێ عیراقێ ب پشتەڤانیا ئیرانێ و تورکیا بەرێ خوە دا کەرکووکێ و کەرکووک داگیر کر وان وەلاتان خوە بێدەنگ کرن و گەلەک ژ بەرپرسێن وان وەلاتان پشتەڤانی ل عەبادی و لەشکرێ وی و حەشدا شەعبی کرن و کورد ب تنێ مان، نھا ژی ھەمان سیاسەت ب رەنگەکێ جودا ل سووریێ ل دژی کوردان دھێتە دوبارە کرن.
ئەڤرۆ نيوز:
پشتی یوسف محەمەد داخوازا سزادانا مللەتێ کوردستانێ کری ژ بەر ئەنجامدانا ریفراندۆمێ، پەرلەمانتارەکێ کورد ل پەرلەمانێ عیراقێ راگەھاند، جھێ حێبەتیێ نینە، چونکی بزاڤا گۆڕان د بنەرەت دا بۆ دژاتیکرنا کورد و ھەرێما کوردستانێ دروست بوویە و ھەروەسا دبێژیت، چوونا وی بۆ پەرلەمانێ عیراقێ ژی ل سەر بنەمایێ ژ ناڤبرن و نەھێلانا پێگەھێ سەرەکیێ کوردستانێ یە.
شاخەوان عەبدوللا جێگرێ سەرۆکێ فڕاکسیۆنا پارتی ل پەرلەمانێ عیراقێ د داخویانیەکێ دا بۆ دەزگەھێن راگەھاندنێ گۆت: ژ ئالیێ من ڤە ئە گۆتنێن یوسف محەمەدی جھێ حێبەتیێ نینە، کو دبێژیت( دڤێت ریفراندۆمچی بھێنە سزادان)، ھەروەسا شاخەوان دبێژیت ل سالا 2012 نوری مالکی دڤیا دەڤەرێن کوردستانی یێن دەرڤەیی دەستھەلاتا کوردستانێ کونترۆل بکەت، پشکەکا مەزنا خەلکێ کوردستان ھاتن بەرەڤانیێ ژ کەرکووکێ بکەن، بەلێ ئەو نەھاتن، ھەروەسا د شەڕێ داعشێ دا ھەموو حزبێن سیاسی خوەبەخش ئینان، بەلێ وان نەخوەبەخش و نەچو کەسێن بۆ بەرەڤانیکرنا ژ کوردستانێ وان دەڤەران نەھاتن.
شاخەوەان عەبدواللای گۆت: ل خیانەتا 16 ئۆکتۆبەرێ نە بەحسێ خیانتکاریێ کرن و نە پرۆسا خیانەتکرنێ رسوا کرن، بەلکی ب بەرۆڤاژی چوونە ئالیێ حەیدەر عەبادی و دەستخوشی لێ دکرن و داخوازا وێ چەندێ ژێ دکرن کو ئەزموونا ھەرێما کوردستانێ بھێتە ھەلوەشاندن و سەرەدەری ل گەل پارێزگەھان بھێتە کرن.
ئەندامێ پەرلەمانێ عیراقێ ھەروەسا ئاشکرا کر، ئەو گۆتنێن یوسف محەمەدی ئاخفتنێن کەسوکی نینە، ھەروەسا ھندەک پەرلەمانتاران یێن خوە فرۆتین و دژی کوردستانێ دخولا سیێ دا ئەو ئاخفتن دکرن، و دگۆتن ئەڤە سیاسەتا حزبا وانا نینە، بەلکی سیاسەتا کەسایەتی یە، بەلێ دەمێ کەسەک ئینان ژ ھەموویان خوەفرۆشتن بوو و پۆستە دانێ، وی دەمی ئەز باوەرم وەسا کو سیاسەتا ئەو کەس پەیرەو دکەت سیاسەتا حزبا وی یە.
شاخەوان عەبدوللا ھەروەسا گوت: یوسف محەمەد باش وێ چەندێ تێگەھشتی یە، کو دێ چیتە ئالیێ دیتر یێ حەمرین، ئانکو بۆ دژاتیکرنا کوردستانێ، لەورا ھەموو کارێن ئەندام پەرلەمانێن عیراقێ یێن کورد خرابترین کاری کارێ جێگرێ سەرۆک پەرلەمانی بوویە و وەزیرێن بزاڤا گۆڕان، چونکی ب دەھان بڕیار ژ جڤاتا وەزیران دژی کوردستانێ دەرکەفتینە وەزیرێن وان چو ھەلویست ھەمبەری وێ نەبووینە، ل سەر دەمێ جێگرێ سەرۆک پەرلەمانێ گۆڕانێ ژی دا، پەرلەمانێ عیراقێ ب دەھان بڕیار دژی خەلکێ کوردستانێ دەرخستن.
ل دووماھیێ ژی گۆت: باوەر بکە بەغدا بەغدا بزاڤان بۆ دەرخستنا بڕیارەکێ دکەت کو بێژن چو تشتەک نینە بناڤێ دەڤەرێن ناکوکی ل سەر، ھەروەسا بزاڤان دکەن بۆ نەھێلانا حوکمەتا ھەرێما کوردستانێ.
نيشاندان