ئه‌ڤرۆنيوز:
ئه‌ڤرۆ ئێكشه‌مبى 25/3/2018 وه‌لاتيه‌كى ل قه‌زا دوكان يا ب سه‌ر پارێزگه‌ها سلێمانيێ ڤه خوه كوشت.
رێڤه‌به‌ريا پۆليسێن پارێزگه‌ها سلێمانيێ ل به‌رپه‌رێ خوه يێ فه‌رمى ل سه‌ر توۆرا جڤاكى يا فه‌يسبووكى به‌لاڤكر” ئه‌ڤرۆ سپێدێ، پشكا پۆليسێن دوكان ئه‌م ب هه‌بوونا روودانه‌كا خوه‌كوشتنێ ل قه‌زا دوكان ئاگه‌هداركرين”.
دياركر ژى” پشتى هيزێن پۆليسان وتيمێن به‌لگێن تاوان چووينه جهێ روودانێ، كه‌شف بۆ جهێ روودانێ هاته كرن وڤه‌كۆلين ل دۆر روودانێ يا به‌رده‌وامه”.
ئه‌ڤرۆنيوز:
سه‌رۆكێ ژكار لاداى يێ هه‌رێما كاتالونيا يا ئيسپانى، كارليس پۆژيدمۆند، ل ئه‌لمانيا هاته ده‌سته‌سه‌ركرن.
ئالۆنسۆ كويڤيلاسى پارێزه‌رێ پۆژيدمۆندى، ل دووڤ رووداو، راگه‌هاند كو سه‌رۆكێ به‌رێ يێ هه‌رێما كاتالونيا ل فينلاندا بوو وژده‌ستێ پۆليسێن وى وه‌لاتى ره‌ڤى ودخواست بچيته برۆكسل پايته‌ختێ به‌لجيكا، به‌لێ ل ئه‌لمانيا ژئاليێ پۆليسێن ئه‌لمانى ڤه هاته ده‌سته‌سه‌ركرن.
پشتى ئه‌نجامدانا گشتپرسيێ بۆ سه‌ربخوه‌يا هه‌رێما كاتالونيا وجودابوونێ ژ ئيسپانيا ل هه‌يڤا ئوكتوبه‌را 2017، حوكمه‌تا ئيسپانى تۆمه‌تا جوداخوازيێ ئاراسته‌ى پۆژيدمۆندى كر وژپۆستێ سه‌رۆكاتيا هه‌رێما كاتالونيا هاته لادان وفه‌رمانا ده‌سته‌سه‌ركرنا وى ده‌ركر.
ژبلى پۆژيدمۆندى، حوكمه‌تا ئيسپانيا دوسێيا تاوانێ دژى نێزيكى 30 كه‌سايه‌تيێن سياسى يێن كاتالونى ڤه‌كريه، هه‌كه تۆمه‌تا ياخيبووني ب سه‌ردا بهێته ساخكرن، دبيت ب زيندانيكرنێ هه‌تا 25 سالان بهێنه سزادان.
ئه‌ڤرۆ نیوز، نه‌وزاد هلۆرى:
شه‌ڤا بورى هروبایه‌كێ ب هێز ده‌ڤه‌را سۆران ڤه گرت و زیان ب داروبارى و یاریگه‌هه‌كا وه‌رزى گه‌هاندن.
عەبدلقادر حاجی، به‌رپرسێ یاریگه‌هه‌كا وه‌رزشى يا ده‌ستكردا بۆ ئه‌ڤرۆ نیوز گۆت” شه‌ڤا بورى هروبایه‌كێ ب هێز ده‌ڤه‌را سۆران بخوڤه گرت و زیان گه‌هاندن چه‌ند مال و خێزان و جهێن گشتى ل سۆران ژ وانان یاریگه‌ها وه‌رزشى یا ده‌ستكرد كو ژلایى ناڤه‌ندا بلندا لاوان بۆ گه‌نجێن ده‌ڤه‌رێ هاتبوو چێكرن”.
زێده‌تر گۆت” هژماره‌كا گوندان و تیمێن وه‌رزشى یاریێن خوه ل ڤێ یاریگه‌هێ ئه‌نجام ددان و دخوازین كو جهێن شوله‌ژێ ڤێ ياريگه‌هێ نووژه‌ن بكه‌ن داكو گه‌نجێن مه بێ به‌هر نه‌بن ژ وه‌رزشێ”.
ئه‌ڤرۆنيوز:
وه‌زاره‌تا دارايى وئابوورى ل هه‌رێما كوردستانێ پێشنيازه‌كێ بۆ كێمكرنا پاشكه‌فتكرنا مووچێ فه‌رمانبه‌ران دده‌ته سه‌رۆك وه‌زيرێن هه‌رێما كوردستانێ.
ئه‌ڤرۆ ئێكشه‌مبى 25/3/2018، لژنا بلند يا په‌ترۆل وغازێ ل هه‌رێما كوردستانێ ب سه‌رۆكاتيا نێچيرڤان بارزانى سه‌رۆك وه‌زيرێن هه‌رێمێ كۆمبوو.
دڤێ كۆمبوونێ دا، ل دووڤ باسنيوز، دێ دانوستاندن ل سه‌ر پێشنيازه‌كا وه‌زاره‌تا دارايى وئابوورى يا هه‌رێمێ بۆ كێمكرنا پاشكه‌فتكرنا مووچێ ژ 70% بۆ 30% هێته كرن.
به‌رى نوكه رێكه‌وت حه‌مه ره‌شيد، وه‌زيرێ ساخله‌ميێ ل هه‌رێمێ راگه‌هاندبوو كو ب پشتراستيڤه پشتى بێهنڤه‌دانێن نه‌ورۆزێ، جڤاتا وه‌زيرێن هه‌رێما كوردستانێ دێ كۆمبوونه‌كێ ئه‌نجامده‌ت وده‌ستكاريێ دپاشكه‌فتكرنا مووچێ فه‌رمانبه‌ران دا كه‌ت.
ئه‌ڤرۆ نیوز :
پشتى ئه‌ڤرۆ ل رێكه‌فتى 25-3-2018 نوشدارێن سه‌رجه‌م نه‌خوشخانان خوپیشاندان ده‌ستپێكرى و نیشانداى , ئه‌ڤرۆ ل ده‌مژمێر (11) سپێدێ ل گوره‌پانا نه‌خوشخانا گشتى یا ئازادى ل دهوكێ ، هژمارەکا نوشدارێن دهوكێ خوپیشاندانه‌كا ئاشتیانه نیشاندا و داخازا مافێن خو كر.
د. ئه‌حمه‌د موختار به‌رپرسێ سه‌ندیكا نوشدارێن دهوكێ بو نوش نیوز دا دیاركرن: قه‌یرانا داراى كارتێكرن ل سه‌ر هه‌مو فه‌رمانبه‌ران كریه لێ كارتێكرنه‌كا مه‌زن ل سه‌ر كه‌رتێ ته‌ندروستى بویه و ژین و ژیارا نوشداران بزه‌حمه‌ت كه‌فتیه چونكه ل شه‌ڤ و رۆژ نوشدار خزمه‌تا خه‌لكى دا هه‌نه و خزمه‌تا خه‌لكى دكه‌ن له‌ورا ئه‌م داخازا مافێن خو دكه‌ین.
د. ئه‌حمه‌د موختار به‌رپرسێ سه‌ندیكا نوژدارێن دهوكێ بو نوش نیوز گوت ژى: ئه‌م ژ حكومه‌تا هه‌رێما كوردستانێ دخوازین پێداچونه‌كێ د سیسته‌مێ موچێن كه‌رتێ ته‌ندروستى دا بكه‌ت و ئه‌م وه‌ك نوشدارێن دهوكێ به‌رۆڤاژى ده‌ڤه‌رێن دیتر دێ ل سه‌ر ده‌واما خو به‌رده‌وام بین و ناهێلین چ ڤالاهى د نه‌خوشخانان دا دروست بیت و د هه‌مان ده‌م دا داخازا مافێن خو یێن ره‌وا ژى دكه‌ین.
ئه‌ڤرۆ نيوز، نيوار محه‌مه‌د سه‌ليم:
رێڤه‌به‌ريا گشتى يا سه‌قاناسى و بيڤه‌له‌رزێ ل هه‌رێما كوردستانێ راگه‌هاند كو ل پارێزگه‌ها دهۆكێ د ماوێ 24 ده‌مژمێرێن بۆرى دا 0.6ملم باران باريه و د ئه‌ڤ ساله ژى دا كێمترين رێژا بارانێ ل دهۆك باريه.
ب گۆره‌ى خشته‌يێ رێڤه‌به‌ريا گشتى يا سه‌قاناسى و بيڤه‌له‌رزێ ل هه‌رێما كوردستانێ د ماوێ 24 ده‌مژمێرێن بۆرى دا ل پارێزگه‌ها دهۆكێ 0.6ملم باران باريه و ل هه‌ولێر 1.2ملم باران باريه، ل سلێمانيێ و هه‌له‌بچه و كه‌ركووك ژى نه‌باريه.
ده‌رباره‌ى رێژێن باران بارينێ ژى د ئه‌ڤ ساله دا ئاشكه‌را كريه كو ل هه‌رێما كوردستانێ كێمترين رێژا باران بارينێ يا پارێزگه‌ها دهۆكێ بوويه كو 267.8ملم بوويه، ل سلێمانيێ ژى پترترين رێژه هاتيه تۆماركرن كو 616.6ملم بوويه و ل هه‌له‌بچه ژى 385.6ملم باران و پاشان ژى هه‌ولێر 276.6ملم باران باريه. هه‌ر ب گۆره‌ى ڤێ ئامارێ خرابترين باژێرێ كوردستانى كه‌ركووك بوويه كو 226ملم بارانێ ئه‌ڤ ساله لێ بارينه.
ئه‌ڤرۆ نيوز:
جڤاتا بلندا نه‌فت و گازێ ب سه‌رۆكاتيا نێچيرڤان بارزانى، سه‌رۆك وه‌زيرێن هه‌رێمێ، ئه‌ڤرۆ ل باژێرێ هه‌ولێرێ سه‌باره‌ت پێداچوون ب پاشكه‌فتنا مووچه‌ى دێ كۆم بيت.
كومبوون پتر يا راوێژكارى يه بۆ وێ يه‌كێ بزاننن داهاتێ هه‌رێمێ چه‌نده و دێ چاوان شێن ده‌ستكاريا پاشكه‌فتێ مووچه‌ى كه‌ن.
ل دووڤ پێزانينان، د كومبوونێ دا، وه‌زيرێ دارايى دێ پێشنيازا كێمكرنا پاشكه‌فتنا مووچه‌ى ژ 70% بۆ 30% ده‌ته جڤاتا وه‌زيرێن هه‌رێمێ.
كومبوونا جڤاتا وه‌زيران، هه‌ڤده‌مه ل گه‌ل خونيشادانێن ماموستا و كارمه‌ندێن ساخله‌ميێ دژى پاشكه‌فتنا مووچه‌ى ئه‌نجام دده‌ن و ئه‌ڤرۆ ئه‌و پێلا خونيشادانان به‌رفره‌هتر لێ هاتيه.
ئه‌ڤرۆ نيوز:
رێڤه‌به‌ريا گشتى يا سه‌قاناسى و بيڤه‌له‌رزێ ل هه‌رێما كوردستانێ راگه‌هاند كو سوبه‌هى رۆژا دوشه‌مبى رێكه‌فتى 25ى ئادارا 2018ێ دهێته پێشبينيكرن ئه‌سمان دێ ساهى بيت ل گه‌ل هنده‌ك ئه‌ورێن كێم.
پشكا پێشبينيان ل رێڤه‌به‌ريا گشتى يا سه‌قاناسى و بيڤه‌له‌رزێ ل هه‌رێما كوردستانێ د نڤيساره‌كێ دا راگه‌هانديه كو ژ ئه گه‌رێ هاتنا فشارێن بلندێن وه‌لاتێ توركيا دهێته پێشبينيكرن ئه‌سمان ساهى بيت ل گه‌ل هنده‌ك ئه‌ورێن كێم.
پشكا پێشبينيان خۆيا ژى كريه كو نزمترين پلا گه‌رما پێشبينيكرى دێ 14 پله بيت و بلندترين پله ژى دێ 22 پله بيت.
هه‌ر ب گۆره‌ى ڤێ راپۆرتا رێڤه‌به‌ريا ناڤبرى له‌زاتيا باى ژى دێ د ناڤبه‌را 10 بۆ 20كم بيت د ده‌مژمێره‌كێ دا و ماوێ ديتنێ ژى دێ د ناڤبه‌را 8 بۆ 10كم دا بيت.
نيشاندان