ئه‌ڤرۆ نيوز:
بەری دەمەکێ کێم د.مەردان خەلیل ھیدایەت، تایبەتمەندێ نەخۆشیێن دل و ھناڤان گیانێ خوە ژ دەست دا.
مالپه‌رێ نوش نيوز به‌لاڤكريه كو د. مەردان خەلیل ھیدایەت وەک تایبەتمەندێ نەخۆشیێن دل و ھناڤا ئێک ژ نوشدارێن پێشەنگ بوویە د وارێ خوە دا و بو دەمێ چەندین سالان ل ھژمارەکا نەخۆشخانێن دھۆکێ خزمەت کریە.
ھەر ل دانانا کولیژا پزیشکی یا دھۆکێ ژی وەک ماموستایێ زانکۆیێ خزمەت کریە.
ئەڤرۆ نيوز، نیوار محەمەد سەلیم:
سەرۆکێ ژوورا بازرگانی ل دھۆکێ راگەھاند کو رێیا سەرەکی یا د ناڤبەرا پارێزگەھا دھۆک و نەینەوا دا بۆ مەرەمێن بازرگانی ھێشتا نەھاتیە ڤەکرن.
شێخ ئەیاد شێخ حەسەن، سەرۆکێ ژوورا بازرگانی ل دھۆکێ د داخۆیانیەکێ دا بۆ رۆژناما ئەڤرۆ ئاشکەرا کر کو ھێشتا رێیا د ناڤبەرا پارێزگەھا دھۆک و نەینەوا دا نەھاتیە ڤەکرن و گۆت: “ھەردولا ل سەر ڤەکرنا وێ رێ رێکەفت بوون، بەلێ فەرماندەیا ھێزێن چەکدار یا نەینەوا رێ نەدا ئەو رێ بھێتە ڤەکرن”.
زێدەتر گۆت: “مە وەکو پارێزگەھا دھۆکێ چو ئاریشە ل سەر ڤەکرنا وێ رێ نینن، ھەر تشتێ پێدڤی ھاتیە کرن، ب تنێ لایەنێ لەشکری یێ سەر ب بەغدا ڤە رێ نادەت ئەو رێ بھێتە ڤەکرن”.
ل رۆژا دوشەمبی رێکەفتی 5ی ئادارا 2017ێ ھەردو پارێزگەرێن دھۆک و نەینەوا راگەھاندبوو کو رێیا د ناڤبەرا دھۆک و نەینەوا ب رەنگەکێ فەرمی ھاتیە ڤەکرن.
رێیا دھۆک بۆ نەینەوا گرنگیەکا زۆر ل سەر ئاستێ بازرگانی بۆ پارێزگەھا دھۆکێ ھەیە ھەر وەکو بەری نوکە پارێزگارێ دھۆکێ ژی راگەھاندی، ژ پشتی ریفراندۆمێ و ڤەگەریانا لەشکرێ عیراقێ بۆ دەڤەرێن کوردستانی یێن دەرڤەی ھەرێما کوردستانێ ئەو رێ ھاتیە گرتن و لێکگوھاڕتنا بازرگانی د ناڤبەرا ھەردو پارێزگەھان دا ھاتیە راوەستاندن.
ئه‌ڤرۆ نيوز:
شارەزایەکێ ژینگەھێ ھۆشداریا مەترسیا بیابوونێ ددەت ل ھەرێما کوردستانێ و دیارکر کو پێدڤیە بیرێن ئاڤێ یێن نەقانوونی بھێنەگرتن و حوکمەت دارستانێن دەستکرد چێکەت بۆ رێگریێ ل توزبارینێ و د یاردەیا بیابوونا ھەرێما کوردستانێ.
ئاسۆ شکاک، بەرپرسێ رێکخراوا ئاڤیار بۆ ھشیاریا ژینگەھێ بۆ رۆژناما ئەڤرۆ گۆت: “ب ئەگەرێ ئەڤان روویدانێن ژینگەھێ چێبویە ل دەڤەرێن عیراق و سعودیێ پێشبینی دھێتەکرن کو ھەرێما کوردستانێ ژی بەرەف بیابوونێ بچیت، لەوڕا مەترسی ھەیە کو ئەف دیاردە ل ھەرێما کوردستانێ ڤەگریت و ئەف توز بارین و ئاخبارینا سالانە دووبارە دبیت نیشانێن ڤێ چەندێ نە دێ ئەف گۆھڕینا ژینگەھێ چێبیت و ھەرێم ببیتە پشکەک ژ بیابانێ، لەوڕا پێدڤیە حوکمەتا ھەرێما کوردستانێ و لایەنێن پەیوەندیدار کار بۆ رێگریکرنێ ل دیاردەیا بیابوونێ بگرن.
ئاسۆ شکاک گۆتژی: “ل ھەرێما کوردستانێ 50 ھزار بیرێن ئاڤێ یێن نەقانوونی ھەنە و دڤێت بھێنە گرتن و مفا ل ئاڤا سەر ئەردی بھێتە وەرگرتن نەک وەکو نوکە ئاڤا بن ئەردی بھێتە بکارئینان، ھەروەسا دارستانێن دەستکردن بھێنە زێدەکرن، ب تایبەتی ل دەوروبەرێن باژێڕێن مەزن و رێگری بھێتەکرن ل بڕینا دارێن سرۆشتی، ھەروەسا رێژەیا کەسکاتی بھێتە زێدەکرن بگەھیتە ئاستێ ستانداردێ جیھانی.
ئه‌ڤرۆ نيوز:
بەرپرسێ دەزگەھێ ئێزدیان ل ھۆلەندا دیارکر کو پەیکەرێ کچەکا رزگاربوویا ئێزدی دێ نەتەوێن ئێکگرتی ھێتە دانان، نوکە ئەڤ پرۆژە د قووناغێن دانوستاندنێ دایە ل گەل رێکخراوان و دەولەتێن ئەندام نەتەوەیێن ئیکگرتی دا.
حەسۆ ھورمی، بەرپرسێ دەزگەھێ ئێزدیان ل ھۆلەندا دیارکر کو ھەتا نوکە 16 رێکخراوێن دەولەتی پشتەڤانیێ ل سەر دانانا پەیکەرێ رزگاربوویەکا ئێزدی ل نەتەوێن ئێکگرتی کریە و دەولەتەکا ئەندام ژی پشتەڤانی کریە، دێ پرۆژە ب رێیا وێ دەولەتێ ھێتە رەوانەکرن بۆ جنێف ل نەتەوێن ئێکگرتی، ئەم یێ ھەول ددەین پەیکەرێ دھێتە دانان دەربڕینێ ژ زۆرداری و دەردەسەریا کچێن ئێزدی بکەت کچا ئێزدی شیا خورابگریت و چیرۆکێن رەڤاندنان خوە بۆ جیھانێ بەحس بکەت ئەڤە نەتشەکێ کێمە کچ و ژن رەڤاندیێن ئێزدی ئەنجام دەن.
ئاشکەرا کر کو لژنەکا تەکنیکی ل نەتەوێن ئێکگرتی دێ بڕیارێ ل سەر پرۆژێ دانانا پەیکەری دەت ئەو پەیکەر دێ بیتە ھێمایێ خوراگری و سمبولا ئاشتیێ، ھەر کەسەکێ قەستا نەتەوێن ئێکگرتی بکەت دێ جینوسایدا ب سەری ئێزدیان ھاتی ل تەباخا سالا 2014ێ ژ لایێ تیرۆرستێن داعش ڤە بینت.
ئه‌ڤرۆ نيوز:
دەزگەھێن راگەھاندنا عەرەبی ئاماژە ب ھاتنا جان بۆلتۆنی وەکو شیرەتکارێ نوو یێ جڤاتا ئاسایشا نیشتمانی یا ئەمریکا دکەن و دیار دکەن کو بۆلتۆنی نێرینەکا باش ل ھەمبەر کوردان ھەیە و رەنگە ب ھاتنا بۆلتۆنی ئەمریکا وەکو بەرێ پشتەڤانیێ ل عەبادی نەکەت و ھەکە وەسا بیت دێ پێگەھێ ھەرێما کوردستانێ ب ھێز کەڤیت.
رۆژناما حەیات یا لەندەنی دوھی د راپۆرتەکێ دا ئاماژە ب ھندێ کر کریە کو ھاتنا بۆلتۆنی دێ گەلەک تشتان گوھۆریت، چونکو بۆلتۆن دخوازیت دەستێ ئیرانێ ل رۆژھەلاتا ناڤین ب تایبەتی ژی د کاروبارێ ناڤخوەیی یێ عیراقێ کورت کەت، بەری نھا ژی ناڤبری دیار کربوو کو دڤێت ئەم نەھێلین ب چو رەنگەکێ ئیران دەستێوەردانێ د کاروبارێ ناڤخوەیی یێ عیراقێ دا بکەت و دڤێت ئەم عیراقێ ل ژێر کاریگەریا ئیرانێ نەھێلین، ژ بەر ھندێ ژی بۆلتۆن ناھێلیت ئەمریکی وەکو بەری نھا پشتەڤانیێ ل عەبادی بکەن، ئەو یەک دێ بیتە ئەگەرێ ھندێ کو جارەکا دی پێگەھێ ھەرێما کوردستانێ د ئاستێ عیراقێ و دەڤەرا دا ب ھێز کەڤیت.
د بەردەوامیا راپۆرتێ دا ئاماژە ب ھندێ ژی ھاتیە کرن کو بەری نھا ژی جان بۆلتۆنی چەندین جاران نەرازیبوونا خوە ل ھەمبەر سیاسەتا ئەمریکا ل ھەمبەر ئیرانێ دیار کریە و گۆتیە دڤێت ئەمریکا ب زۆرا چەکی ئیرانێ ژی عیراقێ دەرخینیت و نەھێلیت بەغدا بکەڤیتە ژێر کاریگەریا ئیرانێ، ژ بەر ھندێ ژی دھێتە پێشبینی کرن کو ب ھاتنا جۆن بۆلتۆنی گوھۆرینەکا باش د سیاسەتا دەرڤە یا ئەمریکا ب تایبەتی ژی ل عیراقێ دروست بیت و ئەو یەک دێ کاریگەریەکا خوە یا باش بۆ ھەرێما کوردستانێ ھەبیت.
ل ئالیێ دی گەلەک دەزگەھێن دی یێن راگەھاندنا عەرەبی ئاماژە ب ھندێ دکەن کو جۆن بۆلتۆن پشتەڤانی ل ریفراندۆما ھەرێما کوردستانێ دکر و وەکو بەرپرسێن دی یێن ئەمریکی ل دژی مافێ کوردان نەبوو، ژ بەر ھندێ ژی ب ھاتنا جان بۆلتۆنی دێ گەلەک تشت ل عیراقێ ھێنە گوھۆرین و ئەو یەک دێ بیتە ئەگەرێ ھندێ کو جارەکا دی پێگەھێ ھەرێما کوردستانێ ب ھێز بیت، چونکو عەبادی ب پشتەڤانیا ئەمریکا و ھندەک وەلاتێن دی پشتی ریفراندۆمێ سزایێن مەزن ل سەر ھەرێما کوردستانێ سەپاندن و ھەتا نھا ژی کاریگەریا وان سزایان بەردەوامە و چو وەلاتەکێ ژی پشتەڤانی ل ھەرێما کوردستانێ نەکر، لێ رەنگە ب ھاتنا جان بۆلتۆنی گەلەک تشت د بەرژەوەندیا کوردان دا بھێنە گوھۆرین.
ل ئالیێ دی دەزگەھێن راگەھاندنا ئیرانێ ژی دیار دکەن کو ترامپی دڤێت ب رێیا جان بۆلتۆنی رێککەڤتنا ئەتۆمی ھلوەشینیت و دەست ب سزادانا ئیرانێ بکەت، ئەو یەک دێ بیتە ئەگەرێ دەستپێکرنا قۆناغەکا نوو یا ئالۆز ل رۆژھەلاتا ناڤین و د بەرژەوەندیا چو ئالیەکێ دا نابیت، چونکو بەری نھا ژی گەلەک جاران بەرپرسێن ئیرانێ راگەھاندینە کو ب سزادانێ چو ھێزەک نەشێت ئیرانێ لاواز کەت و یێن بەری ترامپی ژی گەلەک بزاڤ کرن کو ئیرانێ ژناڤ ببەن لێ نەشیان.
چاڤدێرێن سیاسی ژی دیار دکەن کو ھەکە ترامپ و بەرپرسێن دی یێن ئەمریکی ب گشتی سیاسەتا خوە ل ھەمبەر رۆژھەلاتا ناڤین و کوردستانێ نەدەنە گوھۆرین ب ھاتنا کەسەکێ وەکو جان بۆلتۆنی گەلەک تشت ناھێنە گوھۆرین، چونکو ئەمریکا ئێکە ژ وان وەلاتێن جیھانێ کو سیستەمەکا خوە یا دیار کری یا ھەی و ب ھاتنا کەسەکێ ھەموو تشت ناھێنە گوھۆرین، لێ دیسان ژی ھاتنا بۆلتۆنی وەکو کەسەکێ کو پشتەڤانیێ ل مافێ کوردان دکەت دشێت ھندەک گوھۆرینان د سیاسەتا ئەمریکا دا دروست بکەت، لێ یا گرنگ ئەڤە کو ئەمریکا ب گشتی سیاسەتا خوە ل ھەمبەر ھەرێما کوردستانێ بدەتە گوھۆرین، چونکو ھەکە ئەمریکا پشتەڤانی ل عەبادی نەکربا عیراقێ نەدشیا پشتی ریفراندۆمێ سزایێن وەسا گران ل سەر ھەرێما کوردستانێ بسەپینیت.
ئەڤرۆ نيوز:
ل گۆڕ دیتنا سیاسەتمدار و چاڤدێرێن سیاسی، تاکە رێیا دەرکەفتنا ژڤێ قەیرانا کوردان، رێکخستنا ناڤمالیا کوردایە، ھەروەسا دبێژن دڤێت سەرکردێن کوردان نوکە بزاڤا ئێکرێزی و ئێکگرتنا مللەتی دروست بکەن، چونکی چارەسەریا دووماھیێ رزگاربوونا مە ژ ڤێ رەوشا ئالۆز یا ئەم تێدا دژین.
چاڤدێرێ سیاسی محەمەد ئەمین پێنجوینی تایبەت بۆ رۆژناما ئەڤرۆ راگەھاند، حوکمەتا عیراقێ ب سیاسەتا فێلبازی کاری بۆ ھندێ دکەت، کو ھەموو کێشێن کوردان د چارچۆڤێ مووچێ فەرمانبەران ڤە گرێدەت، کو ئەڤە دەمەکە کاری ل سەر وی پرۆژەێ سیاسی دکەت، کو بتنێ دخوازیێن کوردان ب مووچەی ڤە ھەبن، و ل سالا 2014 پێنگاڤا ئێکێ یا سیاسەتا برسیکرنا خەلکێ کوردستانێ و بڕینا قوتێ وەلاتیان ھاڤێتیە، ھەموو ب مەرەما ھندێ بوویە کورد ھزر دژیانا رۆژانەدا بکەن و ھزرا سەربخوەیا کوردستانێ و جودابوونا ژ عیراقێ پشتگۆھبێخن.
دیسا مەحمەد ئەمین گۆت:ڕاستە نوکە جادا کوردی، رۆژانە ل دووڤ دەنگۆباسێ ھاتنا موچەی ژ بەغدا دپرسیت، بەلێ کورد جو جارەکێ دەستان ژ ھزرا نەتەوەیی و سەربخوەیا دەولەتا کوردستانێ بەرنادەت، چونکی ئەو قوناغا برسیکرنا وەلاتیان یا ژئالیێ بەغدا ڤە بۆ کوردان ھاتیە دروستکرن دێ دەرباز بیت، و مەسەلا ئازادی و سەربخوەیا مللەتێ کورد کو 100 سالە شۆرەشێن ئێک ل دووڤ ئێک خوین بۆ ھاتیە رشتن چو دەمەکی ناھێنە ژبیرکرن و دەستان ژێ بەرنادەین.
ژئالیەکێ دیڤە، ئەندامێ مەکتەبا ڕاگەھاندنا ئێکەتی نیشتیمانی کوردستان ئازاد تەوفیق بۆ رۆژناما ئەڤرۆ دبێژت، کێشە مە ل گەل حوکمەتا عیراقێ کێشا بزاڤا رزگاریخوازا مللەتێ مەیە وەک ناسنامە و ئاخ و مللەتەکێ بندەستێ داگیرکری، د 100 سالێن بۆری دا، ئەو ھاتیە بەردەست پشتی نەمانا رژێما سەدام حسێن، مە ھیڤی خواستن ھەموو کێشێن مە ل گەل عیراقا نوو بھێنە چارەسەرکرن، بەلێ ئەوا مە کوردان ژ سەرکردێن حوکمەتا عیراقێ چاڤەرێ دکر، وەسا بجە نەھات و کێشێن مە ل گەل عیراقێ د بەردەوامن.
ئازاد تەفیق ھەروەسا دیاکر، ھەرێما کوردستانێ ل دستوورێ عیراقێ یا ھاتیە چەسپاندن لەورا دڤێت ئەو ھەرێم بودجە و موچەێ خوە ھەبیت، چو دەمەکی نابیت بھێتە گرێدان ب ھەڤڕکیێن سیاسی ڤە وەکی یا نوکی حوکمەتا عیراقێ ب کاردئینیت، قوتێ وەلاتیێن کوردستانێ ل سالا 2014 ب بڕیارەکا سیاسی ھاتیە بڕین، وپێشێلکرنا دستوری ھاتیە کرن، ب وێ ئەگەرێ قەیرانەکا ئابۆریا مەزن ھەمبەری وەلاتیێن کوردستانێ پەیداگرن.
ناڤبری ھەروەسا گۆت: ئەم وەک مللەتێ کورد کێشا مە ل گەل حوکمەتا عیراقێ کێشا سەلماندنا ناسناما کورد و پاراستنا سەنگا تەرازیا حوکمەتا ھەرێما کوردستانێ یە، لەورا نابیت ئەم بتنێ ھزرا بودجە و موچەی بکەین، و پاراستنا ناسناما کوردی و ئاخ و نەتەویی پشتگوە بێخین، ئەو مافێن نەتەویی یێن ل دستووری عیراقێ ھاتینە چەساپاندن داخوازا بجھیئینانا وانا بکەین.
ئازاد تەوفیق ئاشکرا کر، چەند حزبێن کوردی ب مەرەمێن تایبەتێن سیاسی یێن بەرتەسک رۆژانە کارێن وانا ل سەر کەنالێن راگەھاندنێ بووینە، پرسا موچەی و پەیوەندیێن ب سەرۆک وەزیرێن عیراقێ بەلاڤدکەن، وەکی ریکلامەکا نوو بۆ ھەلبژارتنان، بەلێ سەرۆک وەزیرێن عیراقێ حەیدەر عەبادی بخوە یا گۆتی: ئەو حزبێن کوردستانێ چوینە بەغدا داخواز ژ من کریە بۆدجێ ھەرێما کوردستانێ نەھنێرە، لەورا ئەو حزب دخەمسارن ب کارێ خوەیێ نیشتیمانی و نەتەویی کوردی.
ئه‌ڤرۆ نيوز:
سەرۆکێ لیستا برایەتی ل جڤاتا پارێزگەھا نەینەوا ئاشکراکر، داعش ل مووسل دەرکەفتیە و دوبارە دەست ب ھێرشێن خوەکریە بۆسەر ھێزێن عێراقێ ھەروەسا دیارکر، پێشبینی تێتەکرن رۆژێن داھاتی ھێرشێن داعش زێدەببن و کریارێن تیرۆرستی ئەنجامبدەن.
سەیدو چەتۆ، سەرۆکێ لیستا برایەتی ل جڤاتا پارێزگەھا نەینەوا بۆ رۆژناما ئەڤرۆ گۆت: ئەڤێ دووماھیێ چەکدارێن تیرۆرستێن داعش ل سنورێ پارێزگەھا نەینەوا دەست ب لڤینانکریە و گورەی زانیاریێن گەھشتینەمە و لیژنا ئەمنی یا مووسل، چەکدارێن داعش ب رێیا شانەیێن خوە یێن نڤستی چالاکیان کریە، لڕۆژێن بۆری ل سنورێ ناحیا بادۆش و ھندەک دەڤەرێن ناڤا سەنتەرێ باژێڕێ مووسل چەندین شەڕۆ پێکدادان دگەل لەشکرێ عێراقێ و ھێزێن حەشدا شەعبی ھەبووینە،نوکە داعش یا ھێرشا دکەتە سەر ھێزێن عێراقێ و ل زۆر دەڤەرێن نەینەوا خوە دیارکریە و چالاکی ھەنە،بدیتنامە داعش ل مووسل دوماھی نەھاتیە و ھێشتا ھەر مایە بەھرا خوە، چونکە چەکدارێن داعش پتریا وان عەشایەرێن سونەیێن دەڤەرێ نە و تنێ رھێن خوە ژێڤەکرینە و ھەردەمێ بخوازن ئەڤە دێ چالاکیان بکەن،گورەی زانیاریێن سەرۆکێ لیژنا ئەمنی ل جڤاتا پارێزگەھێ بەری نوکە ژی زانیاری لدۆر خوە رێکخستنا گروپا تیرۆرستی داعش ھەبوون.
سالا 2014ێ دەستپێکا دەرکەفتنا گروپا تیرۆرستیا داعش باژێڕێ مووسل و ھەموو سنورێ سەنتەرێ پارێزگەھا نەینەوا داگیرکر، پشتی سێسالێن حوکمێ ھێزێن عێراقی ب ھەڤکاریا ھێزێن پێشمەرگەی شیان داعش دەربکەن ل مووسل، بەلێ وەک چاڤدێر ئاماژە بۆڤێ چەندێ دکەن، ھێشتا داعش بتەمامی نەھاتیە ژناڤبرن و ھەردەمێ دەلیڤە ھەبیت دێ دەست ب کارێن خوە یێن تیرۆرستی بکەن.
سەیدو چەتو گۆت: نوکە ھژمارا چەکدارێن داعش ل سنورێ پارێزگەھا نەینەوا ناھێتە زانین، بەلێ زانیاری ئەڤێ راستیێ پشتڕاست دکەن داعش ماینە، ھژمارا وان ھەرچەندژی بیت بەھرا ھندێ ھەیە جار جار دەستێ خوە دانن ل ھێزێن عێراقی، بەلێ بێگومان داعش وەک بەرێ نەشێت چو دەڤەرێن بەرفرەە داگیربکەت و پێخیت بندەستێ خوە، پێشبینی تێتەکرن ھێرشێن داعش بەرەف زێدەبوونێ بچن ل مووسل، چونکە ئەم یێ بەرەف پڕۆسا ھەلبژارتنان دچین و داعش ل دەلیڤێ دگەڕیت شکستێ ب ھەلبژارتنانبینیت و ھێزێن عێراقێ ژی وەک پێدڤی نەشێن بەرسینگا تیرۆرستێن داعش بگرن، تایبەتی داعش دێ گرانیا خوە کەتە سەر ئەنجامدانا کریارێن تیرۆرستی و مەترسی ھەیە تەقین بھێنە ئەنجامدان و رەوشێ زێدەتر ئالۆز بکەن.
ئەڤرۆ نیوز ، زنار تۆڤی :
ژێدەرەکێ دیارکریە کو ل 25/ 3/ 2018 هادى عامری، ئه‌میندارێ رێكخراوا به‌در و سه‌ركرده ل میلیشیاتێن حه‌شدا شه‌عبى، 5 هزار و 600 پارچێن چه‌كى ب سه‌ر خەلکێ پارێزگەهێن سه‌لاحه‌دین و دیاله بۆ كرینا ده‌نگان دابه‌ش كرینه.
وی ژێدەرێ رۆژنامەڤانی دیارکریه، ئه‌و 5 هزار و 600 پارچێن چه‌كی یێن کو هادى عامری دابه‌ش كرین، چه‌كێن وه‌زاره‌تا نافخۆنە.
وه‌زاره‌تا نافخۆ یا عێراقێ،کو پشكا رێكخراوا به‌دره، كو عامری سه‌رۆكایه‌تیا وێ دکەت و ئەو وه‌زاره‌ته ژلایێ قاسم ئه‌عره‌جی دهێتە برێڤە برن،وی ژێدەری گوتیە، عامرى ب ڤێ كریارێ، ئه‌عره‌جی تووشى شه‌رمزاریێ كریه.
هادی عامری ئێكه ژ سه‌ركردێن نێزیکی ئیرانێ و رۆلەکێ بلند د خیانه‌تا 16 ئۆكتۆبه‌را 2017 و داگیركرنا كه‌ركووكێ و رێككه‌فتن ل گه‌ل بالەکێ ئێکەتیێ دا هەبوو، بۆ ڤەكشانا هێزێن وان ژ کەرکۆکێ.
ئەڤرۆ نیوز:
سكرتێرێ ئێکەتیا مامۆستایێن كوردستانێ گوت، ب کێمکرنا رێژا پاشەكەفتا مووچێ مامۆستایان دێ بارودۆخێ دارایی یێ مامۆستایان گوهۆرین ب سەردا هێت، بەلێ تا نوکە یا دیار نینە دێ چەند پاشەكەفتێ مووچەی هێتە كێم کرن،لەورا دڤێت چاڤەرێی هەلویستێ ماموستایان بکەین.
عەبدولواحد محەمەد سكرتێرێ ئێکەتیا مامۆستایێن كوردستانێ گوتیە، تا نوکە هیچ زانیاری نەدایه وان کو رێژا پاشەكەفتا مووچێ مامۆستایان دێ چەند هێتە كێم کرن، بەلێ وان زانیاری هەیە كو دێ پشکەک ژ پاشەكەفتا مووچەی هێتە کێمکرن.
دوهی بەیاننامەکا سێ خالی هاتیە بەلاڤکرن و راگەیاند، بریار هاتەدان، هەکە بەغدا مانگانە بەردەوام بیت ل سەر هنارتنا وی گۆژمێ پارەی 317 ملیا و 540 ملیۆن و 465 هەزار دینارن و برەکا پارەی یا كێمە، حوکمەمەتا هەرێما كوردستانێ ل گەل داهاتییێ نەوتێ و داهاتیێ نافخوژی یێ هەرێما كوردستان، دەستكاری پاشەكەوتێ مووچە دکەت ب جۆرەکێ كو ل بەرژەوەندیا مووچەخۆرێن هەرێما كوردستانێدا بیت.
نيشاندان