ئه‌ڤرۆ نيوز:
فه‌رمانده‌يا پۆليسێن ديوانيه نووچێ دامه‌زراندنا فه‌رماندێ پۆليسێن پارێزگه‌ها ديوانيه وه‌كو رێڤه‌به‌رێ ئه‌منى يێ فرۆكخانا نێڤده‌وله‌تى يا هه‌ولێر ره‌ت دكه‌ت.
د به‌ياننامه‌كێ دا، فه‌رماندێ پۆليسێن ديوانيه، راگه‌هاند كو ئه‌و ده‌نگويێ د تۆڕێن جڤاكى دا به‌لاڤ بوويى ل دۆر وێ چه‌ندێ كو ليوا فه‌رقه‌د زغێر مه‌جهول، فه‌رماندێ پۆليسێن ديوانيه كريه رێڤه‌به‌رێ ئه‌منى يێ ئێك ژ فرۆكخانان راست نينه، “ره‌ت دكه‌ين”.
ئه‌ڤرۆ نيوز:
جه‌ميل بايك هه‌ڤسه‌رۆكێ كۆما جڤاكێن كوردستانێ “كه‌جه‌كه” راگه‌هاند كو د داهاتى دا دێ شه‌رێ ناڤبه‌را په‌كه‌كێ و توركيا دا كه‌ڤيته د قووناغه‌كا به‌رفره‌هتر دا.
بايك بۆ ئێك ژ ميديايێن نێزيك په‌كه‌كێ راگه‌هانديه كو د پێناڤى به‌رفره‌هكرنا ده‌سته‌لاتێ، ئاكه‌په شه‌رى به‌رفره‌هـ دكه‌ت، ئاكه‌په و مه‌هه‌په بۆ وێ چه‌ندێ دا كو ژمارا ده‌نگده‌رێن خوه زێده كه‌ت، هێرش كريه سه‌ر عه‌فرينێ و نوكه گه‌فێن مه‌نبج و سه‌رانسه‌رى رۆژئاڤايێ كوردستانێ دكه‌ت.
بايك راگه‌هانديه ژى كو ئاكه‌په و مه‌هه‌په هه‌ر بۆ ده‌سته‌لاتا خوه و هه‌ر ژى بۆ نه‌هێلانا كوردان شه‌رى دكه‌ن، ژ به‌ر وان ئه‌گه‌ران ژى په‌كه‌كه شه‌رى دژى توركيا ل ده‌مێن بهێت دێ به‌رفره‌هتر لێ هێت.
ماوێ 55 رۆژه توركيا ئۆپه‌راسيۆنا “چيلكێ زه‌يتۆنێ” بۆ سه‌ر عه‌فرينێ ده‌سپێكريه و هه‌تا نوكه ژ ئه‌گه‌رێ بۆردۆمانێن سۆپايێ توركيا نێزيكى 230 وه‌لاتيێن سڤيل شه‌هيد بووين و زێده‌ترى 680 كه‌سان ژى بريندار بووينه.
ئه‌ڤرۆ نيوز:
ئيبراهيم كالن راگه‌هاند كو ئه‌مريكا يا نه‌چاره پێگريێ ب رێكه‌فتناما مه‌نبج بكه‌ت و دا زانين ژى كو ئه‌و عه‌فرينێ راده‌ستى سوريا ناكه‌ت.
ئيبراهيم كالن، ئاخفتنكه‌رێ ب ناڤێ سه‌رۆكاتيا كۆمارا توركيا راگه‌هاند كو گوهۆڕينا تيله‌رسۆن كارتێكرنێ ل سه‌ر رێكه‌فتنناما مه‌نبج ناكه‌ت و گۆت: “ئه‌مريكا يا نه‌چاره پێگريێ ب رێكه‌فتناما مه‌نبج بكه‌ت”.
ئاخفتنكه‌رێ ب ناڤێ سه‌رۆكاتيا كۆمارا توركيا زێده‌تر گۆت: “ئه‌م يێ ل گه‌ل ئه‌مريكا رێكه‌فتين كو مه‌نبج بكه‌ينه ده‌ڤه‌ره‌كا ئارام”.
ده‌رباره‌ى داگيركرنا عه‌فرينێ ئيبراهيم كالن ژى گۆت: “پشتى عه‌فرين ئه‌م راناوه‌ستين و دێ روو كه‌ينه ده‌ڤه‌رێن دى”.
د به‌رامبه‌ر دا، بينالى يلدرم سه‌رۆك وه‌زيرێن توركيا راگه‌هاند كو ئه‌وان رێ ل 55 هزار چه‌كدارێن داعش كرينه كو روو بكه‌نه سوريا.
ئه‌ڤرۆ نيوز:
ماهر نزار يێ شه‌ش سالى كو دوهى ل گه‌ل سێ خووشك و برايه‌كى ل ئاكرێ ژ لايێ بابێ وان ڤه هاتينه سۆتن، ئه‌ڤرۆ ل نه‌خۆشخانێ گيانێ خوه ژ ده‌ست دا.
قادر دوسكى جێگرێ رێڤه‌به‌رێ نه‌خۆشخانا سۆتن و جوانكاريێ ل دهۆكێ راگه‌هاند كو پشتى بۆرينا 18 ده‌مژمێران ل سه‌ر سۆتنا وان، ده‌مژمێر 7:20 ده‌قيقه‌ى ئه‌ڤرۆ ماهر نزار يێ شه‌ش سالى ل نه‌خۆشخانێ گيانێ خوه ژ ده‌ست دا.
جێگرێ رێڤه‌به‌رێ نه‌خۆشخانا سۆتن و جوانكاريێ دا زانين ژى كو ره‌وشا ساخله‌ميا ئارام يێ نه‌هـ سالى ژى نه‌يا بنه‌جهه، به‌لێ ره‌وشا مه‌تين به‌ر ب باشبوونێ ڤه چوويه.
ئەڤرۆ نیوز ، زنار تۆڤی :
لدووڤ ڤەکۆلینەکا تۆرا چاره‌سه‌ریا گه‌شه‌پێدان و به‌رده‌وامیپێدانێ یا نه‌ته‌وێن ئێکگرتی UNSDSN، فینله‌ندی دلخۆشترین گه‌لن ل جیهانێ.
تۆرا چاره‌سه‌ریا گه‌شه‌پێدان و به‌رده‌وامیپێدانێ ل نه‌ته‌وێن ئێكگرتی ئه‌نجامێ وێ ڤەکۆلینێ بەلاڤکریه،کو ژ ١٥٦ وەلاتاندا و د 18 مین راپۆرتا خوە یا ب ناڤێ دلخۆشی ل جیهانێ WHR ئه‌نجام دابوو.
لدووڤ وان دا هه‌ر ئێک ژ وەلاتێن نه‌رویج، دانیمارك، ئایسلاند، سویسرا، هۆله‌ندا، كه‌نه‌دا، نیوزیلاند، سوید و نه‌مسا دهێن.
ئه‌مریكا ژی چار پلەیان د وێ رێزبه‌ندیێ دا هاتیه خوارێ و ئه‌ڤسالە د پلەیا ١٨ دهێت.
ئەڤرۆ نیوز ، زنار تۆڤی :
پشتی شه‌ش هەیڤان ژ پاشخستنا ماوێ خوە،بۆ جارا چارێ ئه‌نجێلا مێركل وەک راوێژكارا ئه‌لمانیا ده‌ست ب خولا چارێ یا ده‌ستهەلاتێ دکەت.
وەسا بریاره ئه‌و په‌رله‌مانتارێن کو ل 24 سپتێمبه‌رێ هاتینه هه‌لبژارتن،كۆم ببن بۆ هندێ کو ئه‌نجێلا مێركل، سویندا قانوونی بخوت وه‌ك راوێژكارا ئه‌لمانیا ده‌ستبكار بیت، به‌ری کو ئێكه‌م كۆمبوونا حوکمه‌تێ بهێتە ئه‌نجام دان.
وه‌كو د راگه‌هاندنان دا دهێتە بەحس کرن،د چه‌ند رۆژێن بهێت دا مێركل دێ به‌ره‌ف پاریس چیت، بۆ هندێ کو ل گه‌ل ئیمانۆیل ماكرۆنی دەر‌باره‌ى ریفۆرما ئێکەتیا ئورۆپا باخڤن.
ئه‌نجێلا مێركل ل سالا 1954 ژ دایك بوویه، ل سالا 1990 ئێكه‌م ده‌ركه‌فتنا وێ یا سیاسى بوو،دەمێ بوویە جێگرا پەیڤدارا حوکمه‌تا ئه‌لمانیا،ئەڤە جارا چارێ یە دبیته راوێژكارا ئه‌لمانیا.
ئه‌ڤرۆنيوز:
سه‌رۆك وه‌زيرێن عيراقێ ب توندى به‌رسڤا سه‌رۆك كۆمارا عيراقێ دده‌ت ورادگه‌هنيت، بۆ كه‌سێ نينه بودجه‌ى راوه‌ستينيت.
حه‌يده‌ر عه‌بادى، سه‌رۆك وه‌زيرێن عيراقێ د به‌رپه‌رێ خوه يێ تايبه‌ت دا ل سه‌ر تۆرا جڤاكى يا فه‌يسبووكى گۆت” چاڤه‌رێ دكه‌ين وێنه‌كێ ئيمزاكرى يێ قانوونا بودجا گشتى يا عيراقێ بۆ سالا 2018 بهێته هنارتن بۆ جڤاتا وه‌زيران”.
عه‌بادى ب شێوه‌كێ نه‌راسته‌وخوه به‌رسڤه‌كا توند يا فوئاد مه‌عسوومى دده‌ت ودبێژيت” چو كه‌سه‌كى ماف نينه بودجا گشتى يا وه‌لاتى پشتى په‌سه‌ندكرنى ل په‌رله‌مانى، رابگريت”.
ل رۆژا سێشه‌مبى 13/3/2018، ده‌زگه‌هێن راگه‌هاندنێ يێن عيراقى به‌لاڤكر كو فوئاد مه‌عسووم سه‌رۆك كۆمارێ عيراقێ قانوونا بودجا گشتى يا عيراقێ بۆ سالا 2018 يا ره‌تكرى وڤه‌گه‌رانديه په‌رله‌مانى.
فوئاد مه‌عسوم ل شه‌ڤا شه‌مبيێ 10/3/2018 دديداره‌كێ دا ل گه‌ل كه‌نالێ (السومه‌ريه) گۆتبوو كو ئه‌و تنێ ڤه‌كۆلينێ دكێشێن ته‌كنيكى يێن قانوونا بودجا عيراقێ دكه‌ت وپه‌يوه‌ندى ب كێمكرنا پشكا بودجا هه‌رێما كوردستانێ نينه.
بودجا عيراقێ بۆ سالا 2018 دگه‌هيته 104 ترليۆن و158 مليار دينار كو ژوێ شه‌ش ترليۆن و597 مليار دينار بۆ بودجا هه‌رێما كوردستانێ هاتينه ته‌رخانكرن، دده‌مه‌كى دا دكۆمبوونا هه‌رسێ سه‌رۆكاتيێن عيراقێ (سه‌رۆكاتيا وه‌زيران، سه‌رۆكاتيا كۆمارێ، سه‌رۆكاتيا په‌رله‌مانى) بريار هاتبوو دان ئێك ترليۆن ل سه‌ر پشكا بودجا كوردستانێ بهێته زێده‌كرن، به‌لێ په‌رله‌مانى ئه‌و برياره بجهنه‌ئينا.
ئه‌ڤرۆنيوز:
وه‌زاره‌تا ساخله‌ميێ ل هه‌رێما كوردستانێ رادگه‌هينيت، قه‌يرانا ده‌رمانان وپێدڤيێن نوشدارى ل نه‌خوه‌شخانێن هه‌رێما كوردستانێ دێ ب دووماهى هێت وژنوكه وپێڤه به‌غدا دێ پشكا ده‌رمانێن پێدڤى بۆ هه‌رێما كوردستانێ هنێريت.
خالس قادر، په‌يڤدارێ وه‌زاره‌تا ساخله‌ميێ ل هه‌رێما كوردستانێ گۆت” گرفتا ده‌رمانان وپێدڤيێن نوشدارى دده‌مێ سالێن بۆرى دا ب تايبه‌تى سالا بۆرى كو ل هژماره‌كا مه‌زن يا نه‌خوه‌شخانان وبنگه‌هێن ساخله‌ميێ هه‌بوو، نوكه به‌ر ب چاره‌سه‌ربوونێ دچيت، چونكى ل دووڤ قانوونا بودجا گشتى يا عيراقێ يا سالا 2018 ده‌ست ب ته‌رخانكرنا ده‌رمانان وپێدڤيێن نوشدارى بۆ هه‌رێما كوردستانێ كريه”.
خالسى دداخۆيانيه‌كا رۆژنامه‌ڤانى دا گۆت ژى” هنارتنا ده‌رمانان پشتى په‌سه‌ندكرنا بودجه‌ى به‌رده‌وامه ورێژا هه‌رێمێ ل دووڤ بودجێ په‌سه‌ندكرى يێ سالا 2018 رێژا 17% يا ماى وژسالا بۆرى پتره”.
دياركر” نوكه تنێ ئه‌و ده‌رمانان دابين دكه‌ين كو گه‌له‌ك دپێدڤى نه بۆ وه‌لاتيان، چونكى دشيان دا نينه ژوى پارێ دناڤ هه‌ريمێ دا بۆدهێته دابينكرن، هه‌موو پێدڤيان دابين بكه‌ين”.
ئه‌ڤرۆ نیوز، نه‌وزاد هلۆرى:
ب هه‌لكه‌فتا ژدایكبوونا بارزانیێ نه‌مر و رۆژا دار چاندنێ ، ئه‌ڤرۆ داموده‌زگه‌هێن ده‌ڤه‌رێن ئامێدیێ و ئاكرێ هه‌وێن دار چاندنێ ئه‌نجام دان.
بارین نهێلى ، به‌رپرسا جڤاتا ئافره‌تێن دێره‌لوكێ بۆ ئه‌ڤرۆ نیوز گۆت” ئه‌ڤرۆ ئه‌م وه‌كو ئافره‌تێن ده‌ڤه‌رێ ب هه‌ڤكاریا هه‌موو داموده‌زگه‌هێن ده‌ڤه‌رێ ، ب هه‌لكه‌فتا ژدایكبوونا بارزانیێ نه‌مر و رۆژا چاندنا داران، رابوین ب چاندنا داران ل سه‌ر رێیێن گشتى و فه‌رمانگه‌ه و قوتابخانه و چه‌ند جهه‌كێن گشتى”.
زێده‌تر گۆت”مه‌ره‌م ژ چاندنا داران بۆ هندێ بوویه كو رێژا داروبارى بهێته زێده‌كرن و ژینگه‌ه جوان ببیت و تێگه‌هێ وه‌لاتیان ژ برینا داران و پیسكرنا ژینگه‌هێ بهێته گوهۆرین ژ بوو ژینگه‌هه‌كا ساخله‌م و جوان”.
ژلایه‌كێ دى ڤه باژێرڤانیا ئاكرێ و داموده‌زگه‌هێن ئاكرێ ژى رابوون ب هه‌وه‌كا مه‌زن یا چاندنا داران ل سه‌ر رێیا گشتى و چه‌ند جهێن دى.
نيشاندان