ئەڤرۆ نیوز،زنار تۆڤی :
كه‌نالێ ئارتى یێ رووسیا ئاشكرا كریە،کو ئه‌ڤرۆ هێزەکا دیتر یا سه‌ر ب رژێما سووریێ ڤە گه‌هشته عه‌فرینێ و هێزێن سووریا ب سه‌ر سێ دەڤەرێن عه‌فرینێ دا دابه‌ش بووینە.
هنارتیێ ئارتى یێ رووسى ل عه‌فرینێ را‌گه‌هاندیە،کو ئه‌ڤرۆ چارشه‌مبی هێزەکا دیتر یا سه‌ر ب رژێما سووریێ ڤە گه‌هشتیه عه‌فرینێ.
ئێڤاریا دوهی سێشه‌مبێ ئێکه‌م كاروانێ هێزێن ملی یێن سه‌ر ب رژێما ئه‌سه‌دی ڤە گه‌هشتینه عه‌فرینێ،سه‌ره‌راى نەرازیبوونا توركیا ئه‌ڤرۆ كاروانەکێ دیتر گه‌هشته عه‌فرینێ.
كه‌نالێ ئارتى یێ رووسی گوتیە، هێزێن سووریێ ل نێزیك عه‌فرینێ ب سه‌ر سێ سه‌نگه‌ران دا دابه‌ش بووینە، ئه‌و ژی دەڤەرێن جه‌نده‌یس و بولبوله و راجۆن،وان هێزان ل وان دەڤەران سه‌نگه‌رێن قائیم چێکرینە و ئالایێ سووریێ هه‌لدایە.
ئارتی ئاماژه ب هندێ کریە،کو وان زانیاری ژ به‌رپرسەکێ یه‌په‌گێ پشتراست كرینه و دووپاتى ل هندێ كریه،کو هێزێن ملی یێن به‌شار ئه‌سه‌دی ل عه‌فرینێ سه‌نگه‌ر گرتینه.
هنارتنا وان هێزێن سه‌ر ب به‌شار ئه‌سه‌دی،پشتی رێككه‌فتنەکێ دهێت،کو هێزێن سووریا دیموكرات ل گه‌ل ئه‌سه‌دی ل دژى ئۆپەراسیۆنا سه‌ربازی یا توركیا ئه‌نجام دایە.
ئه‌ڤرۆنيوز:
رۆژناما (المدى) يا عيراقى دراپۆرته‌كا خوه‌دا كو ئه‌ڤرۆ چارشه‌مبى 21/2/2018 به‌لاڤكرى، ئاماژێ دده‌ت كو دانوستاندنێن به‌غدا وهه‌ولێرێ يێ به‌ر ب چاره‌سه‌ريێ دچن وئاماژێ دده‌ت كو ئه‌و ديدارا دناڤبه‌را عه‌بادى ونێچيرڤان بارزانى ل ئه‌لمانيا هاتيه كرن يا سه‌ركه‌فتى بوو.
رۆژناما (المدى) يا عيراقى كو ل به‌غدا ده‌ردكه‌ڤيت و فه‌خرى كه‌ريم سه‌رنڤيسه‌رێ وێ يه، دهژمارا خوه (4140) كو ئه‌ڤرۆ ده‌ركه‌فتى به‌لاڤكر” هه‌ردو ئالى رێككه‌فتنه‌كا ده‌ستپێكى يا ئه‌نجامداى ل دۆر ڤه‌كرتا هه‌ردو فرۆكخانێن هه‌ولێرێ وسلێمانيێ يێن نێڤده‌وله‌تى بۆ ئه‌نجامدانا گه‌شتێن ده‌رڤه، به‌لێ بجهئينانا ڤێ رێككه‌فتنێ يا گرێداى سه‌ره‌دانه‌كا شاندێ كوردى يه بۆ به‌غدا ژبۆ تمامكرنا دانوستاندنان ل دۆر هنده‌ك خالێن ناكۆكى ل سه‌ر هه‌ى”.
ژيده‌رێن ئاگه‌هدار ل به‌غدا ب رۆژناما ناڤبرى گۆتيه كو نێزيكبوونه‌كا باش دناڤبه‌را حوكمه‌تا فيدرالى وهه‌رێما كوردستانێ يا په‌يدابووى بۆ ده‌ست بكاربوونا هه‌ردو فرۆكخانێن هه‌ولێرێ وسلێمانيێ بۆ ئه‌نجامدانا گه‌شتێن نێڤده‌وله‌تى وهه‌ردو ئالى دكۆمبوونا عه‌بادى ونێچيرڤان بارزانى ل باژێرێ ميونيخ يێ ئه‌لمانى ل سه‌ر ئێكلاكرنا گه‌له‌ك خالێن ناكۆكى ل سه‌ر هه‌ى رێككه‌فتن.
وان ژيده‌ران ئاشكراكر ژى كو ئه‌و رێككه‌فتنه دێ نێزيك ل به‌غدا هێته ئه‌نجامدان وبه‌غدا وهه‌ولێر يێن رێككه‌فتين ژى ل سه‌ر چاره‌كرنا به‌لاڤكرنا مووچێن فه‌رمانبه‌رێن هه‌رێما كوردستانێ كو ب رييا حوكمه‌تا فيدرالى دێ هێنه دان و شاندێ كوردى داخواز ژ عه‌بادى كر كو له‌ز د كارێ لژنان دا بهێته كرن بۆ چاره‌كرنا ئاريشا به‌لاڤكرنا مووچان.
هه‌مان ژێده‌ران ئاشكرا كر ژى كو دكۆمبوونا ميونيخ دا، حه‌يده‌ر عه‌بادى داخواز ژ شاندێ كوردى كر هێزه‌كا پۆليسێن فيدرالى بهێنه هنارتن دا پشكداريێ د رێڤه‌برنا فرۆكخانێن هه‌ولێرێ وسلێمانيێ دا بكه‌ن، ئاماژه دا ژى كو حوكمه‌تا هه‌رێما كوردستانێ دێ ل حه‌فتيا داهاتى به‌رسڤا عه‌بادى ده‌ت.
وان ژێده‌ران دياركر كو ئه‌و ديدارا دناڤبه‌را عه‌بادى وشاندێ كوردى ل ميونخ هاتيه كرن، ديداره‌كا سه‌ركه‌فتى بوو وئێكلاكرنا وان خالێن هاتينه به‌حسكرن پێدڤى ب گه‌ره‌كا دى يا دانوستاندنێن ئێكلاكه‌ره كو ل ده‌مه‌كێ نێزيك دێ ل به‌غدا هێنه ئه‌نجامدان.
رۆژناما (المدى) ل 7 ڤێ هه‌يڤێ ئاشكرا كربوو كو نێچيرڤان بارزانى سه‌رۆك وه‌زيرێن هه‌رێما كوردستانێ دێ سه‌ره‌دانه‌كا چاڤه‌رێكرى بۆ به‌غدا كه‌ت بۆ به‌رده‌وميدانێ ب دانوستاندنان ل گه‌ل حوكمه‌تا فيدرالى بۆ چاره‌سه‌كرنا هه‌موو كێشه وناكۆكيان.
ژێده‌رێن ئاگه‌هدار دياركرن ژى كو جۆره رێككه‌فتنه‌ك يا هه‌ى بۆ دانانا ميكانيزمه‌كێ بۆ هنارتنا په‌ترۆلا كه‌ركووكێ ب رێيا حوكمه‌تا فيدرالى ودووپاتكرن كو” ده‌رگه‌هێن سنوورى يێن ئيبراهيم خه‌ليل وپێشابيرێ ل سه‌ر مێزا دانوستاندنان نه‌بوون د كۆمبوونا ڤێ دووماهيێ دا”.
ئه‌ڤرۆنيوز:
ئه‌ڤرۆ چارشه‌مبى 21/2/2018، ل بروكسل پایته‌ختێ وه‌لاتێ به‌لجیكا، هه‌رسێ پارێزگه‌رێن (دهۆك وهه‌ولێر و سلێمانیێ) پشكداربوون ل كونفرانسێ وزا شوینگر و وزا تيشكا رۆژێ.
ئه‌ڤ كۆنفرانسه ب پشكداریا چه‌ندین پارێزگار وسه‌رۆك باژێرڤانیێن ئورۆپی وبیانی دهێته گێران و دانوستاندن وڤه‌كۆلین ل دۆر لێگه‌ریان و شروڤه‌كرنا بابه‌تێ وزا شوینگر و وزا تیشكا رۆژێ كو ل شوونا وزه‌یێن كاره‌بێ وگازێ بهێته ب كارئینان .
ئه‌ڤرۆنيوز:
په‌يڤدارێ به‌نكا ناڤه‌ندى يا عيراقى راگه‌هاند چه‌ند جۆره قه‌ره‌ك دێ ب وه‌لاتيێن هه‌رێما كوردستانێ هێنه دان ودياركر كو عيراقێ 48 مليار دۆلار و83 ته‌نێن زێرى وه‌كو يه‌ده‌ك يێن هه‌ين.
ئه‌يسه‌ر جه‌بار، په‌يڤدارێ به‌نكا ناڤه‌ندى يا عيراقى بۆ (باس) گۆت” لقێ هه‌ولێرێ يێ به‌نكا ناڤه‌ندى يا عيراقى يێ هاتيه ڤه‌كرن وكوژمێ 250 مليار دينار ژى يێن بۆ هاتينه هنارتن وئه‌و پاره بۆ كاراكرنا لقێ به‌نكا ناڤه‌ندى يا عيراقێ يه ل هه‌ولێرێ وپێدانا پارايه بۆ كۆمپانى وبه‌نكان”.
گۆت ژى” دپاشه‌رۆژه‌كا نێزيك دا، چه‌ند جۆره خزمه‌تگۆزاريه‌كێن به‌نكى ژ قه‌رێن جۆرا وجۆر دێ پێشكێشى وه‌لاتيێن هه‌رێما كوردستانێ كه‌ين”.
ئاشكراكر ژى” سولفێن عه‌قارى وچاندنێ وپيشه‌سازى وچه‌ند سولفێن دى يێن جۆرا وجۆر كو ل پارێزگه‌هێن دى يێن عيراقێ يێن هه‌ين، ل ڤێرێ ژى دێ هێنه دان ب وه‌لاتيان وفه‌رمانبه‌ران”.
دياركر” گۆژمه‌كێ پاره‌ى وه‌كو قه‌ر دێ ب وان كه‌سان ده‌ين كو پرۆژێن بچووك وناڤه‌ندى ومه‌زن هه‌بن، ئه‌و پاره ژى ب رێيا به‌نكێن ئه‌هلى دێ هيته دان”.
ئاماژه دا ژى كو ل ده‌مه‌كێ نێزيك لقێ به‌نكا ناڤه‌ندى يا عيراقێ دێ ل سلێمانيێ ژى هێته ڤه‌كرن وگۆت” ب شێوه‌كێ ده‌مكى لقێ هه‌ولێرێ يێ به‌نكا ناڤه‌ندى يا عيراقێ يێ د ئاڤاهيێ كه‌ڤن يێ به‌نكا هه‌رێمێ دا وبرياره ئاڤاهيه‌كێ تايبه‌ت ب به‌نكا ناڤه‌ندى يا عيراقى بهێته دروستكرن وكارێن خوه تێدا ب رێڤه ببه‌ين”.
ل دۆر يه‌ده‌كێ پارێ عيراقێ، گۆت” يه‌ده‌كێ پاره‌ى يێ جێگيره، ل دووڤ گۆتنا به‌رپرسان ورێكخراوا دراڤا نێڤده‌وله‌تى، نوكه يه‌ده‌كێ پارێ عيراقێ 48 مليار دۆلاره”.
زێده‌تر گۆت”پێشتر ل سالا 2014، يه‌ده‌كێ به‌نكا ناڤه‌ندى يا عيراقێ 80 مليار دۆلار بوو، ل گه‌ل وێ چه‌ندێ پاره‌كێ مه‌زن يێ يه‌ده‌ك يێ كێمكرى، به‌لێ ئه‌و يه‌ده‌كێ نوكه هه‌ى يێ سه‌قامگيره وجهێ نيگه‌رانيێ نينه وزێده‌بوونا وى ژى په‌يوه‌ندى ب ب بهايێن په‌ترۆلێ ڤه يا هه‌ى”.
سه‌باره‌ت يه‌ده‌كێ زێرى ل به‌نكا ناڤه‌ندى يا عيراقێ، دبێژيت”عيراقێ 83 ته‌نێن زێرى يێن هه‌ين ودرێزبه‌ندا عه‌ره‌بى دا يا پێنجێ يه ول جيهانێ ژى ل پلا 37 دهێت”.
ل دۆر وێ چه‌ندێ بۆچى پشكا هه‌رێما كوردستانێ ژ وى يه‌ده‌كى ناهێته دان” گۆت” ئه‌و يه‌ده‌كه يێ هه‌موو عيراقێ يه وپشكا هه‌موويان يا تێدا ول ده‌مێ قه‌يرانێ مه هاريكاريا هه‌رێما كوردستانێ كريه”.
ئه‌ڤرۆنيوز:
ئه‌ندامه‌كا په‌رله‌مانێ كوردستانێ راگه‌هاند، كێشا كێمكرنا مووچێ پێشمه‌رگێن شه‌هيد ل شه‌رێ دژى داعشێ يا هاتيه چاره‌سه‌ركرن وئێدى پاشكه‌فتكرن ژمووچێ وان ناگريت.
حه‌يات مه‌جيد، ئه‌نداما په‌رله‌مانێ كوردستانێ ژ فراكسيۆنا پارتى ديموكراتى كوردستان بۆ مالپه‌رێ فه‌رميێ پارتى راگه‌هاند” ل گه‌ل په‌ره‌له‌مانتار كه‌ژال هادى، مه سه‌ره‌دانا كه‌ريم شنگالى وه‌زيرێ پێشمه‌رگه ب وه‌كاله‌ت كر ول دۆر پاشكه‌فتكرنا مووچێ شه‌هيدێن شه‌رێ داعشێ دانوستاندن كر ومه پێ راگه‌هاند كو مالباتێن سه‌ربلندين شه‌هيدان دڤى ره‌وشى دانه‌شێن ب وى مووچه‌ى بژين ونابيت پاشكه‌فت دمووچێن واندا بهێته كرن، چونكى بارێ ژيارا پتريا وان يا باش نينه ويێن د كريان ڤه”.
دياركر ژى” دوێ ديدارێ دا، وه‌زيرێ پێشمه‌رگه‌ى په‌يوه‌ندى ب ئاليێ شوله‌ژێ كر وبه‌رسڤا وى ژى وه‌رگرت كو ب چو شێوه‌كى پاشكه‌فت مووچێ شه‌هيدێن شه‌رێ داعشێ ناگريت وئه‌م پشت راستكرين كو دێ نڤيساره‌ك بۆ وه‌زاره‌تا دارايى هێته ئاراسته‌كرن وئێدى كێشا كێمكرنا مووچێن شه‌هيدين شه‌رێ داعشێ دێ ب دووماهى هێت”.
ئه‌ڤرۆنيوز:
دبلوماسيه‌كێ ئيسرائيلى راگه‌هاند، ئيسرائيل ل گه‌ل وێ چه‌ندێ يه كوردان كو نه‌ته‌وه‌كێ 40 مليۆن كه‌سى يه، ده‌وله‌تا سه‌ربخوه هه‌بيت.
دۆرى گۆلد، دبلوماسيێ ئيسرائيلى، دسميناره‌كێ دا ل كۆربه‌ندێ ڤالداى بۆ دانوستاندنا نێڤده‌وله‌تى كو ل موسكۆ دهێته گرێدان، گۆت” ئيسرائيل دخوازيت چاوانيا چاره‌سه‌كرنا كێشا كوردى بزانيت كو 40 مليۆن كه‌سن وب سه‌ر ده‌ڤه‌رێ يێن هاتينه به‌لاڤكرن”.
وى دبلوماسيێ ئيسرائيلى دياركر كو هه‌تا نوكه ژى ئه‌و وه‌لاتێن كورد ل سه‌ر هاتينه به‌لاڤكرن، شاشيان ل به‌رامبه‌ر كوردان دكه‌ن.
گۆت ژى” ناتانياهۆ سه‌رۆك وه‌زيرێن ئيسرائيلێ دبێژيت كو پێدڤيه كوردان ده‌وله‌تا سه‌ربخوه هه‌بيت، له‌وما ئه‌م ددلگرانين ژ وێ ره‌وشا ل به‌رامبه‌ر كوردان ل ده‌ڤه‌رێ دهێته ئه‌نجامدان”.
ئه‌ڤرۆنيوز:
كونسولخانا ئيرانێ ل هه‌رێما كوردستانێ دبه‌ياننامه‌كێ دا كو ئه‌ڤرۆ چارشه‌مبى 21/2/2018 ده‌ركرى، راگه‌هاند خزمه‌تگوزاريێن ڤيزێ دێ زێده‌كه‌ت وبهايێ ڤيزا ئاسايى ژى بوويه 38 دۆلار.
دبه‌يانناما كونسولخانه ئيرانێ دا هاتيه” بۆ هاريكاريا زێده‌تر گه‌شتيارێن هه‌رێما كوردستانا عيراقێ، دێ خزمه‌تگوزاريێن تايبه‌ت پێشكێش كه‌ين”.
ئاماژه دايه” ئه‌و گه‌شتيارێن ڤيزا ئيرانى دڤێت، دشێن راسته‌وخوه سه‌ره‌دانا كونسولخانا ئيرانێ ل هه‌ولێرێ بكه‌ن وئه‌و گه‌شتيارێن رێيا وان دوور، دشێن ب رێيا كۆمپانيێن مۆله‌تداى ڤيزا ئيرانى وه‌رگرن”.
به‌لا
كريه ژى كو ڤيزا ئێكسه‌ر ب كێمتر ژ 30 خۆله‌كان دهێته به‌رهه‌ڤكرن وبازرگان ژى دشێن پشتى چاڤپێكه‌فتنێ ل گه‌ل كارناسێن ئابوورى ل كونسولخانێ ڤيزا متعدد يا سێ هه‌يڤێ وشه‌ش هه‌يڤى وه‌ربگرن”.
دياركريه ژى” بۆ وه‌رگرتنا ڤيزا عادى، وه‌لاتى دشێن ژ ده‌مژمێر 8:30 هه‌تا 11:30 سپێدێ سه‌ره‌دانا كونسولخانێ بكه‌ن ودهه‌مان رۆژ دا ل ده‌مژمێر 3 ئێڤارى وه‌ربگرن وبۆ وه‌رگرتنا ڤيزا ئێكسه‌ر وبله‌ز ژبلى سپێده‌يان دشێن ل ده‌مژمێر 3 ئێڤارى سه‌ره‌دانا كونسولخانێ بكه‌ن وبهايێ ڤيزا عادى ژ 42 دۆلاران بۆ 38 دۆلاران هاتيه كێمكرن
ئه‌ڤرۆنيوز:
وه‌زاره‌تا په‌يوه‌نديێن عيراقێ راگه‌هاند، دست ب كيمكرنا بهايێ ئه‌نترنێتێ ب رێژه‌يا 50% هاته كرن وئه‌و بريارهه‌موو بهايێن كه‌ڤن وئه‌وێن ل ڤێ دووماهيێ هاتينه زيده‌كرن ڤه‌دگريت.
حازم محه‌مه‌د عه‌لى، په‌يڤدارێ وه‌زاره‌تا ناڤبرى دبه‌ياننامه‌كێ دا راگه‌هاند” وه‌زاره‌تا نه ده‌ست بجهئينانا بريارا كيمكرنا بهايێ ئه‌نترنيتێ كر ورێژا كێمكرنێ ژى 50% يه وهه‌موو وان كۆمپانيان ڤه‌دگريت يێن كو ل گه‌ل كۆمپانيا گشتى بۆ په‌وه‌نديان وكۆمپانيا گشتى بۆ خزمه‌تگوزاريێن تۆرا ئه‌نترنيتێ وپێزانينان گرێبه‌ست هه‌ين”.
ئه‌ڤرۆنيوز:
سكرتێرێ جڤاتا وه‌زيرێن هه‌رێما كوردستانێ، راگه‌هاند، پرۆژه قانوونا خانه‌نشينيێ ومووچه‌ى وده‌رمالان وئيمتيازاتان ل هه‌رێما كوردستانێ، يێ ل به‌ر دانوستاندنێ ل په‌رله‌مانێ كوردستانێ.
ئامانج ره‌حيم، سكرتێرێ جڤاتا وه‌زيران گۆت” بريار ئه‌وه ئه‌ڤرۆ دانوستاندن ل سه‌ر قانوونا خانه‌نشينێێ ومووچه‌ى وده‌رمالان وئيمتيازاتان ل هه‌رێما كوردستانێ ل په‌رله‌مانێ كوردستانێ بهێته كرن وده‌نگ ل سه‌ر بهێته دان”.
ئامانجى زێده‌تر بۆ باسنيوز گۆت” لژنێن په‌يوه‌نديدار ل په‌رله‌مانێ كوردستانێ كو دپێكهاتينه ژ لژنێن قانوونى، دارايى، كاروبارێن پێشمه‌رگه‌ى، كاروبارێن شه‌هيدان، كاروبارێن په‌رله‌مانى وده‌ستپاكيێ. دووماهى كۆمبوون ل سه‌ر وێ پرۆژه قانوونێ يا كرى وراپۆرتا هه‌ڤپشك يا خوه پێشكێشى ده‌سته‌يا سه‌رۆكاتيا په‌رله‌مانى كريه”.
نيشاندان