ئه‌ڤرۆ نيوز:
ئه‌نجوومه‌نێ وه‌زیرێن عیراقێ، رۆژا 22/12/2018 وه‌كو رۆژا هه‌لبژارتنێن جڤاتێن پارێزگه‌هێن عیراقێ دیاركر.
رۆژا هه‌لبژارتنێن جڤاتێن پارێزگه‌هێن عیراقێ هاتنه دیاركرن
نووترين نووچه
- سەرۆك بارزانی دوپاتی ل ئێكڕێزییا ئالیێن كوردی ل سووریێ كر
- حوكمەتا هەرێمێ ب زەلالی پێگیرییا ب رێككەفتنێن ل گەل بەغدایێ كری
- دڤێت دەستهەلاتا دادوەری رۆلێ خوە د دابینكرنا شایستەیێن دارایی یێن هەرێما كوردستانێدا بگێڕیت
- نێچیرڤان بارزانی ل بەغدایێ دوپاتیێ ل ماف و شایستەیێن قانوونی و دستووری یێن هەرێما كوردستانێ دكەت
- ئاڤـاکرنا دهولـهتەکـا کـوردی بۆ ئارامیـا رۆژهـهلاتا ناڤین یا پێدڤیه
- سەرۆكێ حوكمەتا هەرێمێ چار بڕیار بۆ پاقژ راگرتنا ژینگەها کوردستانێ دەركرن
- د.ڤیان سەبری: چەندین سالە بەغدا رەفتارەكا دروست ل گەل هەرێما كوردستانێ ناكەت
- ئیخلاس دلێمی: میكانیزمەك د ناڤبەرا هەرێمێ و بەغدایێ دا بۆ خەرجكرنا مووچەیێ مەها 12 دێ هەبیت
- نەجیبە نەجیب: 10 سالە ئیراقێ بۆدجەیا هەرێما كوردستانێ ب تمامی نە هنارتییە
- مەحما خەلیل: پێدڤییە كورد ل بەرانبەر بەغدا د ئێكدەنگ بن
سه‌ره‌كى نووترين نووچه
مه‌سرور بارزانی:مه‌ره‌مه‌ك بۆ بچووكرنا ده‌ستهه‌لات وسنورێ هه‌رێما كوردستانێ هه‌بوو
ئه‌ڤرۆنيوز:
شيره‌تكارێ جڤاتا ئاسايشا هه‌رێما كوردستانێ، مه‌سرور بارزانى،راگه‌هاند، ئه‌مريكى به‌رده‌وام دووپاتيێ ل سه‌ر گرنگيا په‌يوه‌نديان وبه‌رده‌واميا وان ل گه‌ل هه‌رێما كوردستانێ دكه‌ن وهه‌رده‌مێ گرفت بكه‌ڤيته وان په‌يوه‌نديان، دبه‌رهه‌ڤن بۆ چاره‌سه‌ركرنێ، دياركر ژى ئه‌مريكا دوي باوه‌ريێ دايه، هه‌رێما كوردستانێ پێگه‌هه‌كێ گرنگ ل رۆژهه‌لاتا ناڤه‌راست يا هه‌ى ودێ گرنگيێ ژى پێ ده‌ن.
دداخۆيانيه‌كا رۆژنامه‌ڤانى دا،مه‌سرور بارزانى شيره‌تكارێ جڤاتا ئاسايشا هه‌رێما كوردستانێ، ل دۆر سه‌ره‌دانا خوه بۆ ئه‌مريكا گۆت” مه‌ره‌ما مه ژ وێ سه‌ره‌دانێ، دانوستاندن بوو ل دۆر چه‌ند پرسێن گرنگ وه‌كو په‌يوه‌نديێن هه‌رێما كوردستانێ وئه‌مريكا وئه‌و ره‌وشا نوكه ل عيراقێ هه‌ى، زێده‌بارى به‌حسێ په‌يوه‌نديێن هه‌ولێرێ وبه‌غدا”.
زێده‌تر گۆت” هه‌تا نوكه مه چه‌ندين ديدار وكۆمبوون ل دۆر وان پرسان ل گه‌ل به‌رپرسێن كوچكا سپى وئه‌مريكا ب گشتى ئه‌نجامداينه، ژوان ژى روونشتنه‌كا تايبه‌ت ل گه‌ل هێربرت ماك ماسته‌ر شيره‌تكارێ ئاسايشا نه‌ته‌وى يا ئه‌مريكى هه‌بوو، هه‌روه‌سا مه چه‌ندين ديدار ل وه‌زاره‌تا ده‌رڤه يا ئه‌مريكى ئه‌نجامدان ول پاشه‌رۆژێ ژى دێ مه چه‌ندين ديدار ل گه‌ل سيناتۆر وئه‌ندامێن كونگرسێ ئه‌مريكى هه‌بن”.
شيره‌تكارێ جڤاتا ئاسايشا هه‌رێمێ ل دۆر ناڤه‌رۆكا ديدار وكۆمبوونين خوه ل گه‌ل به‌رپرسێن ئه‌مريكى، گۆت” زێده‌تر مه به‌حسێ ره‌وشا گشتى يا هه‌رێما كوردستانێ كريه، په‌يوه‌نديێن دناڤبه‌را مه وبه‌غدا ته‌وه‌ره‌كێ سه‌ره‌كى يێ وان دانوستاندنان بوو، مه به‌حسێ وێ چه‌ندێ كر كو ئه‌وا ل سه‌ر ملێ هه‌رێما كوردستانێ مه يێ بجهئيناى، ب تايبه‌ت بجهئينانا دستوورێ عيراقێ ژ مادێ ئێكێ هه‌تا دووماهى برگه، ب ديتنا مه ئه‌وبوو كو ئێدى پێدڤي حوكمه‌تا به‌غدا ئه‌ركێ خوه بجهبينيت، ب تايبه‌تى دهنارتنا مووچێ خه‌لكێ كوردستانێ وڤه‌كرنا فرۆكخانێن هه‌رێمێ”.
ل دۆر هه‌وليستێ به‌رپرسێن ئه‌مريكى د وان ديدار وكۆمبوونان دا، مه‌سرور بارزانى گۆت” ئه‌مريكى به‌رده‌وام به‌حسێ وێ چه‌ندێ دكه‌ن كو په‌يوه‌نديێن وان ل گه‌ل هه‌رێما كوردستانێ گرنگيا خوه يا تايبه‌ت يا هه‌ى ودێ دبه‌رده‌وام بن ل سه‌ر ب هێزكرنا وان په‌يوه‌نديان، هه‌تا نوكه هه‌كه ل هنده‌ك جهان گرفت دوان په‌يوه‌نديان دا دروست ببيت، دبه‌رهه‌ڤن بۆ چاره‌سه‌ريا وان گرفتان وئه‌و دوێ باوه‌ريێ دانه كو هه‌رێما كوردستانێ پشكه‌كا گه‌له‌ك گرنگه ل رۆژهه‌لاتا ناڤه‌راست وئه‌مريكا ژى گرنگيێ ب وى پێگه‌هێ گرنگ دده‌ت”.
ل دۆر داعشێ، مه‌سرور بارزانى گۆت” داعشێ ژ روويێ له‌شكرى ڤه شكه‌ستن يا ئيناى وئه‌و جهێن داگيركرين هاتينه رزگاركرن، به‌لێ ئه‌ڤه رامانا وێ چه‌ندێ نينه كو داعش ب تمامى هاتبيته شكاندن، چونكى ل چه‌ندين جهان سه‌رێ خوه يێ هلداى وهه‌تا نوكه چه‌ندين هێرش ل سنورێ كه‌ركووكێ ل سه‌ر هێزێن ئه‌منى يێن ئه‌نجامداين” دووپات كر ژى” بۆ وێ چه‌ندێ كو داعش وهه‌ڤشێوێن وێ نه‌مينن، پێدڤيه ئه‌و فاكته‌رێن دبنه هوكارێ سه‌رهلدانا وان گرۆپێن تيرۆرستى، بهێنه چاره‌سه‌ركرن، به‌لێ هه‌تا نوكو عيراقێ پێنگاڤ بۆ چاره‌سه‌ركرنێ نه‌هاڤێتينه”.
سه‌باره‌ت پرۆسا ريفراندۆما سه‌ربخوه‌يا كوردستانێ، مه‌سرور بارزانى دياركر” ريفراندۆم ده‌ربرينا هه‌ستێ نه‌ته‌وه‌كى يه بۆ وێ چه‌ندێ بژارده‌يا ژيانا خوه ل پاشه‌رۆژێ ديار بكه‌ت، كو دخوازيت چاوان بژيت، ئه‌ڤه رامانا وێ چه‌ندێ نينه كو ئه‌م واقعى نينين، يان ژى نه‌شێن لێكدانێن نوكه يێن جيهانێ بخوينين، ئه‌م دوێ باوه‌ريێ دابووين كو ريفراندۆم دێ رێگريێ ل وێ هێرشا نه‌ره‌وا كه‌ت ئه‌وا ل سه‌ر هه‌رێما كوردستانێ هاتيه كرن، مه پێدڤى ب گره‌نتيا نێڤده‌وله‌تى هه‌بوو، بۆ وێ چه‌ندێ رێگريێ ل خوينرشتنێ ووان كاره‌ساتان بكه‌ين، كو ب ده‌هان ساله تووشى نه‌ته‌وێ كورد بووين، به‌لێ مخاين ب روويه‌كى دى شرۆڤه بۆ هاته كرن، ئه‌م يێ دوێ باوه‌ريێ دا ئه‌و شرۆڤه‌كرنه يا مه‌به‌ستدار بوو، چونكى به‌رده‌وام مه‌ره‌مه‌م بۆ بچووكرنا ده‌ستهه‌لات وسنورێ هه‌رێما كوردستانێ هه‌بوو، بۆ وێ مه‌ره‌مێ ژى مه ريفراندۆم وه‌كو بيانۆ بكارئينا، هه‌كه نه ده‌ره‌نجامێن ريفراندۆمێ ب چو شێوه‌كى دوى ئاستى دا نه‌بوون كو هيرشه‌كا نه‌ره‌وا ژ وى جۆرى ل سه‌ر هه‌رێما كوردستانێ بهێته كرن “.
به‌غدا دێ هووربينيه‌كا دى يا درێژ خايه‌ن ئه‌نجام ده‌ت
ئه‌ڤرۆنيوز:
وه‌زيرێ ساخله‌ميێ ل هه‌رێما كوردستانێ راگه‌هاند” دو لژنێن هوربينيێ ژ به‌غدا يێن هاتينه هه‌رێمێ ولژنه‌كێ ئه‌ركێ خوه يێ ب دووماهى ئيناى وهووربينيا دويێ ژى دێ پرۆسه‌كا درێژ خايه‌ن بيت.
رێكه‌وت حه‌مه ره‌شيد، وه‌زيرێ ساخله‌ميێ ل هه‌رێما كوردستانێ دكونفرانسه‌كێ رۆژنامه‌ڤانى دا ئه‌ڤرۆ سێشه‌مبى 27/2/2018، ل هه‌ولێرێ گۆت” لژنێن به‌غدا دو جۆرێن هووربينيێ دكه‌ن، هووربينيا ئه‌لكترۆنى كو ل سه‌ر بنه‌مايێ سيسته‌مێ بايۆمه‌تريێ هه‌رێمێ كار ل سه‌ر كرى ول دووڤ ئاخڤتنا نوونه‌رێ مه دوێ لژنێ دا، ئه‌و كاره يێ ب دووماهى هاتى”.
گۆت ژى” هووربينيا دويێ، هووربينيا ده‌ستى يه كو ل سه‌ر دوسێيا كه‌سى دهيته كرن وئه‌ڤه پرۆسه‌كا درێژخايه‌نه ووه‌سا زوو ب دووماهى ناهێت”.
دياركر” راپۆرتا لژنێن هووربينيێ يێن هاتينه بلندكرن بۆ سه‌رۆكاتيا حوكمه‌تا عيراقێ، چاڤه‌رێى سه‌رۆك وه‌زيرێن عيراقێ نه بۆ برياردانێ ل سه‌ر وهنارتنا مووچێ فه‌رمانبه‌ران”.
ب ڤیدیۆ – تاكه مامۆستایه‌كا كچ و موسلمان ل قوتابخانه‌كا مه‌سیحیان ده‌وامێ دكه‌ت
ئه‌ڤرۆ نیوز، نه‌وزاد هلۆرى:
تاكه مامۆستایا كچ و موسلمان دناڤا قوتابخانه‌كا مه‌سیحیان ( زمانێ سریانى ) ل سنورێ قه‌زا ئامێدیێ ده‌وامێ دكه‌ت و هه‌تا كو هنده‌ك ژ كه‌لتور و زمان و داب و نه‌ریتێن وان ژى فێربوویه و ب ئێك ژ نموونه‌یا پێكڤه‌ژیانا ئولى و نه‌ته‌وى ل ده‌ڤه‌رێ دهێته نیاسین.
جیهان ئه‌حمه‌د، بۆئه‌ڤرۆ نیوز گۆت” بۆ ده‌مێ10 سالایه ئه‌ز وه‌كو كچه‌كا موسلمان ل ئاماده‌یا زه‌هریرا یا تێكه‌ل كو قوتابخانه‌یه‌كا تایبه‌ته ب زمانێ سریانى و مه‌سیحیان ل ناحيا ديرالۆكێ ده‌وامێ دكه‌م و گه‌له‌ك دلخوه‌ش و ئارامم و چو كێشه بو من درۆست نه‌بووینه و ئه‌ز ل گه‌ل مامۆستا و قوتابیان وه‌كو خوشك و برا دژین و هه‌موو چالاكیێن ئاینى و نه‌ته‌وى يێن مه‌سیحیان ژى پشكداردبم”.
زێده‌تر گۆت” ئه‌ز ب وانه‌یا زمانێ كوردى دچم ، ده‌ستپێكێ هنده‌ك كێشه‌یێن ساده هه‌بوون ژ روویێ تێگه‌هشتن و زمانى ڤه، ژ به‌ركو كه‌لتوور و ئاینێ مه ژێكجودایه ، به‌لێ ب هه‌ڤكاریا مامۆستا و قوتابیێن مه‌سیحى و ژ ئه‌نجامێ تێكه‌لیێ ئه‌ز شیام ل سه‌ر هه‌موو كێشه‌یان زال بم و نها گه‌له‌ك دلخوه‌شم و ب چو شێوه‌یان ناخوازم ل ڤێ قوتابخانێ بهێمه ڤه‌گۆهاستن”.
ئه‌ترا برخۆ، رێڤه‌به‌رێ ئاماده‌یا زه‌هریرا یا تێكه‌ل دیاركر كو ل ئاماده‌یا وان 45 قوتابى دخوونن و بۆ ئه‌ڤرۆ نیوز گۆت” قوتابیێن قوتابخانا مه ژ ئامێدیێ و كوانێ و دێره‌لوكێ دهێن و هه‌موو ژى مه‌سیحى نه و ب زمانێ سریانى دخوونن، و مامۆستا جیهان ژى ئێكه ژ وان مامۆستایێن كچ و موسلمان كو ل قوتابخانا مه ده‌وامێ دكه‌ت و مه هه‌موو پێدڤى بۆ وێ ل به‌رده‌ست و ساناهى كرینه و هه‌ڤكاریا وێ دكه‌ین وه‌كو چه‌وا هه‌ڤكاریا مامۆستایێن دى دكه‌ین”.
زێده‌تر گۆت” ده‌ڤه‌را ئامێدیێ ب گشتى و دێره‌لوك و قوتابخانا مه ب تایبه‌تى نموونه‌كا زێندى یا پێكڤه ژیانا ئولى و نه‌ته‌وى یه ل كوردستانێ و پێدڤیه زێده‌تر ژى گرنگیى ب كه‌لتور و فه‌رهه‌نگا پێكڤه ژیانێ بهێته‌دان ژبه‌ركو ئه‌ڤ یه‌ك كه‌لتوره‌كێ دیروكى و شارستانیا د جڤاكێ كوردى دا ب تایبه‌تى ل سه‌ر گوندان”.
ل سنوورێ قه‌زا ئامێدیێ نێزیكێ حه‌فت قوتابخانه‌یێن بنه‌ره‌تى و ئاماده‌یى هه‌نه و ئاماده‌یا زه‌هیریرا ژى ئێكه ژ وان قوتابخانه‌یان كو رۆله‌كێ به‌رچاڤ د پێگه‌هاندنا زارۆكێن مه‌سیحى دا هه‌ی ل ده‌ڤه‌رێ و تایبه‌ته ب زمانێ سریانى ڤه و تێدا جودا ژ وانه‌ێن زانستى ، چه‌ند وانه‌یێ، تایبه‌ت ژى ب كه‌لتور و ئولا مه‌سیحى دهێنه گوتن.
ئه‌گه‌رێن بێهن نه‌خوشییا ده‌ڤى
ئه‌ڤرۆنيوز:
بێهنا نه‌خوش يا ده‌ڤى ژ ئه‌نجامێ هنده‌ك ئه‌گه‌رێن دیاركرى په‌یدا دبیت، ژ كه‌سه‌كى بۆ ئێكى جیاوازه. ل دووڤ نوش نيوز، دبیت ئه‌ڤه حاله‌ته‌كێ ده‌مكى بیت و دهنده‌ك ده‌مان دا په‌یدا ببیت، یان ژى دبیت یا دوم درێژ بیت.
ئه‌گه‌ر چنه؟
خوارن: مانا خوارنێ د ناڤ ددانا دا دبیته ئه‌گه‌رێ بێهنه‌كا نه‌خوش ل ده‌ڤى، دیسان خوارنا زۆرا پیڤاز، سیر و خوارنێن زۆر تیژ و ڤه‌خوارنا قه‌هوێ.
جگاره: جگاره كێشان دبیته ئه‌گه‌رێ بێهنا نه‌خوشا جگارێ بخۆ ژ به‌ر ئه‌و مادێن كیمیاى دمیننه د ده‌ڤى دا، دیسان كارتێكرنێ ل نه‌خوشیێن پیدیا ژى دكه‌ت كو ئه‌ڤه ژى ئه‌گه‌ره‌كێ دى یه.
ده‌ڤ هشكى: لیكه(تف) ب شێوه‌كێ سروشتى دبیته ئه‌گه‌رێ پاقژ كرنا ده‌ڤى، ئه‌ڤجا ده‌ڤ هشكى ژ ئه‌نجامێ هه‌ر نه‌خوشیه‌كێ دێ بێهنه‌كا نه‌خوش دویڤ دا هێت.
كێم ددان شووشتن: شووشتن و پاقژ كرنا ددانا ب ده‌زى یێ تایبه‌ت رێكه‌كه بۆ ژ ناڤبرنا ئه‌و پارچێن بچووك یێن خوارنێ دناڤ ددانا دا، كو نه شووشتن دبیته ئه‌گه‌رێ په‌یدابوونا به‌كتریا یان و بێهن نه‌خوشیێ.
ده‌رمان: هنده‌ك ده‌رمانێن تایبه‌ت دبنه ئه‌گه‌رێ بێهنه‌كا نه‌خوش دیسان وه‌رگرتنا زۆرا فیتامینا ژى ئێك ژ ئه‌گه‌را یه.
هه‌وكرن د ده‌ڤى دا: پیچبوونا ددانا و نه‌خوشیێن پیدیا ژى ئه‌گه‌ره‌كێ سه‌ره‌كى یه.
هنده‌ك نه‌خوشى: نه‌خوشیا په‌نجه‌شێرێ، هه‌وكرنا سیهان، هه‌وكرنا گه‌وریێ، نه‌خوشیا شه‌كرێ، هنده‌ك ئاریشێن گرێداى ب گولچیسكان و ده‌ماران ڤه، ئاریشه د گه‌ده‌ى یان هه‌رسكرنێ دا و گه‌له‌ك نه‌خوشیێن دى، دبنه ئه‌گه‌رێ بێهن نه‌خوشیا ده‌ڤى.
چاره‌سه‌رى:
شووشتنا ددان و ئه‌زمانى دوو جار د روژێ دا
پاقژ كرن ب رێكا ده‌زى
كێم كرن/نه‌كێشانا جگارا
جوویتنا به‌نیشتێ بێ شه‌كر
زۆر ڤه‌خوارنا ئاڤێ بۆ ده‌ڤ ته‌ربوونێ
چه‌ند شيره‌تێن گرنگ ل دۆر ب كارئينانا ته‌كنۆلۆژيايێ
ئه‌ڤرۆنيوز:
بێگومان ته‌کنولوژیا نوو زۆر تشت ب ساناهی خستینه و مفایه‌کێ ئێکجار زۆر هه‌یه، هه‌لبه‌ت یا بێ زیان ژی نینه ل سه‌ر ساخله‌میا مرۆڤی، به‌لێ زۆر زه‌حمه‌ته دڤی سه‌رده‌می دا دوور ژ ته‌کنولوژیاێی بژین (موبایل، لاپتوب، ئامیرێن کاره‌بێ، مایکروێڤ، WiFi). کو ئه‌ڤه هه‌موو ژێده‌رێن پێلێن که‌هرۆمۆگناتیسی نه.
دكتور عه‌بدولره‌حمان عه‌بدوللا د (نوش نيوز) دا دبێژيت، هه‌ر چه‌نده هه‌تا نوکه گه‌له‌ک بۆچوون و دیتنێن جودا ل سه‌ر زیانێن ڤان پێلان هه‌نه. گه‌له‌ک ڤه‌کۆلین د گه‌ل وێ ئێکێ نه کو ئه‌ڤ پێله دبنه ئه‌گه‌رێ (سه‌رئێشان، خه‌موکی، نه‌زوکی، ئێشێن خوینێ، په‌نجه‌شێر… هتد). به‌لێ هه‌تا نوکه چ به‌لگه‌يێن زانستی ێین موکوم ل سه‌ر ڤێ چه‌ندێ نینن. ژ به‌ر کو بابه‌ته‌کێ نوو یه دبیت سالێن بهێت زیانێن وێ ب به‌لگه بێنه دیارکرن.
به‌لێ هه‌موو ڤه‌کۆله‌ر شیره‌تا وێ چه‌ندێ دكه‌نکو به‌رکه‌فتنا ڤان ئامیران کێم بکه‌ن. ئه‌ڤه ژی هنده‌ک رێنمایی نه بۆ کێمکرنا به‌رکه‌فتنا ڤان پێلان.
١. ڤه‌مراندنا هه‌ر ئامیره‌کى ده‌مێ کارێ ته پێ نه‌بيت، چونکو د ده‌مێ کاری دا پتر پێلا ده‌ردئێخيت.
٢. مۆبایل: سه‌ماعا ده‌ره‌كى یان يا گوهی ب کار بینه، ده‌مێ نڤستنێ دوور که ژ سه‌رێ خۆ و WiFi ڤه‌مرینه، ب کار نه‌ئینه ده‌مێ نێت لاواز دبيت و د جهێن گرتی دا (ئاسانسۆر و ترۆمبێل) چونکو پتر پێلا ده‌ردكه‌ت.
٣. لاپتوپی دوور كه ژ لاشێ خۆ، ده‌مێ پاتريێ دكه‌يه د كاره‌بێ دا كار پێ نه‌كه.
٤. راوته‌رێ WiFi ڤه‌مرینه ده‌مێ ته کار پێ نه‌بيت و ده‌مێ نڤستنێ.
٥. ژوورا نڤستنێ بلا یا ڤالا بیت ژ هه‌ر ئامیره‌کێ كاره‌بێ و مۆبایل و لاپتوپا.
٦. یا باشه بورجێن موبایلا ل سه‌ر بلندترین ئاڤاهی بن و ئه‌ریه‌ل گه‌له‌ک ژ بانی بلندتر بيت.
٧. خانی ژ بورجێن کاره‌بێ د دوور بن.
٨. یا باشه هنده‌ک جارا ب پێخاسی ل سه‌ر ئه‌ردێ بچی ب تایبه‌ت ل باخچا و ئه‌ردێ گیا لێ بۆ ڤاله‌کرنا ڤان پێلا.
٩. مایکرویڤێ بۆ گه‌رمکرنا خوارنا گه‌له‌ک ب کار نه‌ئینه.
تۆره‌كا دزيكه‌ران هاته ده‌سته‌سه‌ركرن
ئه‌ڤرۆنيوز، عه‌زيز هه‌ورامى:
پۆليسێن قه‌زا وناحيێن سلێمانيێ تۆره‌كا دزيكه‌ران كو ژ چار كه‌سان پێكدهيت ل قه‌زا شاره‌زور ده‌سته‌سه‌ركرن ونوكه دبن ڤه‌كۆلينێ دانه.
رائيد( ئيقبال محه‌مه‌د) په‌يڤدارێ پۆليسێن قه‌زا وناحيێن سلێمانيێ بۆ ئه‌ڤرۆنيوز گۆت” هێزێن پۆليسێن قه‌زا وناحيێن سلێمانيێ ل قه‌زا شاره‌زور شيان تۆره‌كا دويكه‌ران ده‌سته‌سه‌ربكه‌ن كو چه‌ندين تاوانێن دزيێ ئه‌نجامدابوون وئه‌و تۆره ژ هه‌ردو ره‌گه‌زان پێكدهێت”.
گۆت ژى” ئه‌و چار كه‌سێن هاتينه ده‌سته‌سه‌ركرن ئاكنجيێن ناحيا تانجه‌رۆنه سه‌ر ب قه‌زا شاره‌زورن كو دو زه‌لام ودو ژنن”.
دياركر” وان تاوانباران دانپێدان ب تاوانێن خوه كريه ول دووڤ مادێ 446 ژ سزايێن عيراقى هاتينه زيندانكرن”.
به‌غدا سزايه‌كا دى ل سه‌ر هه‌رێما كوردستانێ سه‌پاند
ئه‌ڤرۆنيوز:
به‌رپرسه‌كێ حكومى ل هه‌رێما كوردستانێ ئاشكرا دكه‌ت ب برياره‌كا حوكمه‌تا عرياقێ، ئالوگوركرنا پۆسته وگه‌هاندنا هه‌رێمێ بۆ جيهانێ هاته راگرتن.
ته‌ها زرارى رێڤه‌به‌رێ پۆسته وگه‌هاندنێ ل پارێزگه‌ها هه‌ولێرێ راگه‌هاند” حوكمه‌تا عيراقێ ب برياره‌كێ كارێن پۆسته وگه‌هاندنێ ل هه‌رسێ پاريزگه‌هێن هه‌رێما كوردستانێ ب روويێ جيهانێ ڤه راگرت وهه‌تا نوكه ژى چ ژڤانه‌ك بۆ ده‌ستپێكرنا كارێن پۆستێ يێ ديار نينه”.
دياركر ژى” تاكو مه‌رجێ به‌غدا بۆ ده‌ستپێكرنا ئالوگوركرنا پۆسته‌ى تنێ ئه‌وه كو هه‌رێما كوردستانێ ب پۆلێن عيراقى كه‌لوپه‌لان ره‌وانه‌ى ده‌رڤه بكه‌ت، به‌لێ ب چو شێوه‌كى ئه‌م ڤێ چه‌ندێ قه‌بوول ناكه‌ين”.
گۆت ژى” حوكمه‌تا عيراقێ ده‌زگه‌هێ پۆستێ جيهانى يێ ئاگه‌هداركرى كو مامه‌له‌كرنێ ل گه‌ل سه‌نته‌رێ ئالوگوركرنا نێڤده‌وله‌تى ل هه‌رێما كوردستانى رابگريت ، دده‌مه‌كى دا ل سالا 2007 ل دووڤ رێككه‌فتنه‌كێ دناڤبه‌را هه‌ولێرێ وبه‌غدا ئه‌و سه‌نته‌ره هاتبوو دامه‌زراندن كو ب پۆلێ كوردستانى كه‌لوپه‌ل وپۆستێن مه دگه‌هشتنه هه‌موو جيهانێ”.
ل دۆر داهاتێ سالانه يێ پۆسته وگه‌هاندنا هه‌رێما كوردستانێ، وى به‌رپرسى دياركر كو به‌رى قه‌يرانا دارايى وشه‌رێ داعشێ سالانه ب كوژمێ زێده‌تر ژ دو مليار ديناران داهاتێ ئالوگوركرنا پۆسته‌ى هه‌بوو، پشتى سه‌رهلدانا قه‌يرانان ژى ئه‌و داهاته ب ئاسته‌كێ كێم هاته خوار”.
سه‌رۆكێ په‌رله‌مانێ عێراقێ دێ ل گه‌ل لیژنا دارایى كۆم بیت
ئەڤرۆ نیوز ، زنار تۆڤی :
ئه‌ڤرۆ سه‌رۆكێ په‌رله‌مانێ عێراقێ دێ ل گەل لیژنا دارایى یا په‌رله‌مانی كۆم بیت، بۆ هندێ کو بۆ روونشتنا سوبەهی بێخیته كارناما په‌رله‌مانی.
بریاره ئه‌ڤرۆ سێشه‌مبی سه‌لیم جبوورى سه‌رۆكێ په‌رله‌مانێ عێراقێ ل گه‌ل لیژنا دارایى یا په‌رله‌مان كۆم ببیت، بۆ هندێ کو دوماهی پێداچوون بۆ زێدەكرن و كێمكرنا برگێن پڕۆژه قانوونا بودجه‌ی دا بهێتە کرن.
هەروەسا ئارمانج ژ ڤێ كۆمبوونا سه‌رۆكێ په‌رله‌مانی ل گه‌ل لیژنا دارایى ئه‌وه،کو دوماهی‌پێداچوون بهێته کرن، بۆ هندێ کو د روونشتنا سوبەهی یا چارشه‌مبێ بێخیتە كارناما په‌رله‌مانی.
هه‌ر چه‌نده فراكسیۆنێن كوردستانی هەتا نوکە پێداگری ل سه‌ر هه‌لویستێ خوە دكه‌ن و بایكۆتا هەموو روونشتنێن پەرلەمانی کرینە یێن کو گوتۆبێژێ ل سەر پرۆژە قانوونا بودجێ سالا 2018 دكەت،ل گه‌ل هندێ ژی ئه‌شواق جاف راگه‌هاندیه،سوبەهی چارشه‌مبی فراكسیۆنێن كوردستانی دێ دانیشتنێ كه‌ن، بۆ هندێ دوماهی هەلویستێ خوە دەرباره‌ى بودجه‌ی ده‌رببرن.
لژنا هووربينيا به‌غدا ڤه‌كۆلينێ دمووچێ ڤان فه‌رمانبه‌ران دا دكه‌ت
ئه‌ڤرۆنيوز:
لژنا هووربينيا حوكمه‌تا عيراقێ بۆ مووچێ فه‌رمانبه‌رێن هه‌رێما كوردستان ل گه‌له‌ك فه‌رمانگه ووه‌زاره‌تان ڤه‌كۆلينا هوور ل وان فه‌رمانبه‌ران دكه‌ن كو پێشتر ملاكێ رێكخراوان بوون ونوكه دناڤ فه‌رمانگه‌هێن حكومى دانه.
نێزيكى شه‌ش هزار فه‌رمانبه‌ر ل سه‌ر ميلاكێ فه‌رمانگه‌ها رێكخراوان بوون، ب بريارا رێباز حه‌ملان وه‌زيرێ دارايى ل سالا 2015 ل سه‌ر وه‌زاره‌تان هاتن به‌لاڤكرن، ل دووڤ رۆژناما باس، ئه‌و كه‌سێن پێشتر كارێ حزبى كرى، به‌لێ پاشى خستنه سه‌ر ميلاكێ حوكمه‌تێ وناڤونيشانێن مه‌زن ب گه‌له‌ك ژوان كه‌سان هاتينه دان، له‌وما لژنا به‌غدا ڤه‌كۆلينه‌كا هوور ل سه‌ر وان كه‌سان دكه‌ت.
ل هنده‌ك فه‌رمانگه‌هان، راسته‌وخوه پشتى ده‌ست بكاربوون لژنان، داخوازا دوسێ وسه‌ره‌تايێن وان فه‌رمانبه‌ران هاتيه كرن وپرسيار ل دۆر وان كريه كا ئه‌و ب سه‌ر چ حزبه‌كێ بوون، نێزيكى چار هزار كه‌س ل رێڤه‌به‌ريا كاروبارێن رێكخراوان ل سلێمانيێ مووچه وه‌ردگرت وپترياوان كادرێن ئێكه‌تيێ وگۆران بوون، ل هه‌ولێرێ ژى نێزيكى دو هزار كادر، ل ده‌زگه‌هێن راگه‌هاندنێ وريكخراوێن ب سه‌ر حزبان ڤه ده‌وام دكر، ب پلێن حوكمى مووچه ژوان رێڤه‌به‌ريان وه‌ردگرت.
سيروان ره‌سول، ژمێريارى ئێك ژوان فه‌رمانگه‌هان بۆ باس گۆت” لژنا هووربينيا به‌غدا ده‌مێ سه‌ره‌دانا مه كرى، گه‌له‌ك پرسيار ل سه‌ر فه‌رمانبه‌رێن رێكخراوان هه‌بوو، ئێك ژوان خالێن ل سه‌ر دراوه‌ستن، پله ومه‌رته‌به بوو ل گه‌ل باوه‌رنامێ، ئێكى باوه‌رناما سه‌ره‌تايى يا هه‌ى نابيت ژ پلا پێنج زێده‌تر ب سه‌ر بكه‌ڤيت، به‌لێ پشكه‌ك ژ فه‌رمانبه‌ران تاكو پله 2 يان پله ئێك يێن چووين، ب تايبه‌تى ئه‌و فه‌رمانبه‌رێن كو پێشتر ل رێكخراوان بوون”.
دووپات كر ژى” پشكه‌كا فه‌رمانبه‌رێن رێكخراوان سه‌ره‌راى نه‌بوونا باوه‌رنامێ يان نزميا ئاستێ باوه‌رنامێن وان، به‌لێ ب ناڤونيشانێ رێڤه‌به‌ر يان هاريكارێ رێڤه‌به‌رێ يێن خستينه سه‌ر فه‌رمانگه‌هان”.
ل دووڤ نڤيساره‌كێ، وه‌زاره‌تا دارايى وئابوورى ل هه‌رێما كوردستانێ ل رۆژا 31/3/2015، بريارا هه‌لوه‌شاندنا رێڤه‌به‌ريا كاروبارێن رێكخراوان ده‌ركر وهه‌موو مووچه‌خۆرێن وێ بۆ سه‌ر ميلاكێن داموده‌زگه‌هێن حوكمه‌تێ هاتنه ڤه‌گۆهاستن.
نه‌وزاد ئه‌دهه‌م، رێڤه‌به‌رێ گشته يه ل وه‌زاره‌تا بازرگانى وئاگه‌هدارى ل سه‌ر كاروبارێن لژنێن هووربينيا به‌غدا يا هه‌ى، دبێژيت”لژنا هووربينا به‌غدا گه‌له‌ك دووپاتيێ ل سالێن خزمه‌تێ وباوه‌رنامێ دكه‌ت، ئه‌و فه‌رمانبه‌رێن ناڤونيشان وخزمه‌تا وان ژێك دووره، ب تايبه‌ت هنده‌ك فه‌رمانبه‌رێن به‌رێ يێن فه‌رمانگه‌ها رێكخراوان، لژنا هووربينيا به‌غدا گه‌له‌ك دووپاتيێ ل سه‌ر دوسيێن وان دكه‌ت”.
گۆت ژى” پله‌يا هنده‌ك كه‌سان شاره‌زا وراوێژكاره، به‌لێ باوه‌رنامێن وان سه‌ره‌تايى نه، ئه‌ڤه ژى ل گه‌ل رێنمايان ناگونجيت”.
نيشاندان
WP Facebook Auto Publish Powered By : XYZScripts.com