ئه‌ڤرۆنيوز:

سه‌رۆك بارزانى، ئه‌ڤرۆ چارشه‌مبى 21/2/2018،  ل گه‌ل ده‌سته‌يا سه‌رۆكاتيا جڤاتا كوردێن سوورى كۆمبوو ودانوستاندن ل سه‌ر دووماهى پێشهاتێن سياسى وئه‌منى ل رۆژئاڤايێ كوردستانێ وباژێرێ عه‌فرينێ هاته‌ كرن.

دوێ كۆمبوونێ دا، بير وبۆچوون ل دۆر پاشه‌رۆژا رۆژهه‌لاتێ رووبارێ فورات وهه‌ڤكێشێن له‌شكرى وسياسى ل وان ده‌ڤه‌ران هاتنه‌ ئالوگۆركرن.

شاندێ مێهڤان كورتيه‌ك ل دۆر په‌يوه‌نديێن خوه‌ ل گه‌ل هێزێن سياسى يێن رۆژئاڤا ولايه‌نێن سوورى وچالاكيێن سياسى يێن جڤاتا كوردێن سووريێ بۆ سه‌رۆك بارزانى به‌رچاڤكرن، سه‌رۆك بارزانى ژى دپه‌يڤه‌كێ رۆناهى خسته‌ سه‌ر پاشه‌رۆژ وته‌حه‌ديێن به‌رده‌م گه‌لێ كورد ل سووريێ وشيره‌تێن پێدڤى ل دۆروێ چه‌ندێ ئاراسته‌ى شاندێ مێهڤان كرن.

ئه‌ڤرۆ نيوز:

هه‌ڤسه‌رۆكێ به‌رێ یێ په‌یه‌دێ راگه‌هاند كو ده‌مه‌كه‌ ب ناڤبژیڤانیا روسیا هه‌ڤدیتن د ناڤبه‌را مه‌ و رژێما سووریێ دا دهێنه‌ كرن، لێ هه‌تا نها چو رێككه‌ڤتنه‌ك نه‌هاتیه‌ كرن، چونكو رژێما به‌شاری ژی وه‌كو حوكمه‌تا توركیا دانپێدانێ ب مافێ‌ كوردان ناكه‌ت و دخوازیت ئیرادا كوردان ژناڤ ببه‌ت، ژ به‌ر هندێ ژی رێككه‌ڤتنا ل گه‌ل رژێما به‌شاری كاره‌كێ وه‌سا رحه‌ت نینه‌.

سالح موسلم هه‌ڤسه‌رۆكێ به‌رێ یێ پارتیا ئێكه‌تیا دیموكراتیك ل سووریێ‌ (په‌یه‌دێ) بۆ ئاژانسا دویچه‌ یا ئه‌لمانیا راگه‌هاند كو ده‌مه‌كه‌ ب ناڤبژیڤانیا روسیا هه‌ڤدیتن د ناڤبه‌را مه‌ و رژێما سووریێ ل دۆر عه‌فرینێ دهێنه‌ كرن، هه‌تا نها ژی هه‌ڤدیتن به‌رده‌وامن و گۆت: (هنده‌ك ده‌زگه‌هێن راگه‌هاندنێ به‌حسێ هندێ كرینه‌ كو دێ له‌شكرێ سووریێ چیته‌ عه‌فرینێ و رێككه‌ڤتن ل دۆر هندێ هاتیه‌ كرن، چو راستی بۆ هندێ نینن و هه‌تا نها چو رێككه‌ڤتنه‌ك د ناڤبه‌را مه‌ و رژێما به‌شاری دا نه‌هاتیه‌ كرن، لێ هه‌ڤدیتن ب ناڤبژیڤانیا روسیا هه‌تا نها ژی به‌رده‌وامن).

ل دۆر رێككه‌ڤتنێ و داخوازیێن رژێما سووریێ ژی سالح موسلم راگه‌هاند كو رژێما به‌شاری ژی وه‌كو ده‌وله‌تا توركیا دخوازیت كوردان ژناڤ ببه‌ت و ئه‌م دزانین كو هه‌تا نها ل سووریێ چاوا سه‌ره‌ده‌ری ل گه‌ل كوردان هاتیه‌ كرن، هنده‌ك داخوازیێن وان هه‌نه‌ كو ب چو ره‌نگه‌كێ ناهێنه‌ قه‌بوول كرن، ژ به‌ر هندێ ژی هه‌تا نها دانوستاندنان به‌رده‌وامن، چونكو كورد ب چو ره‌نگه‌كێ ده‌ستان ژ ده‌ستكه‌فتێن خوه‌ به‌رناده‌ن و هه‌كه‌ رژێما سووریێ داخوازیێن كوردان قه‌بوول نه‌كه‌ت ئه‌م ژی نه‌چار نینین كو رێككه‌ڤتنان ل گه‌ل وێ رژێمێ بكه‌ین و گۆت: (دانوستاندن هه‌تا نها ژی به‌رده‌وامن لێ هێشتا چو رێككه‌ڤتن نه‌هاتیه‌ كرن، هه‌كه‌ رێككه‌ڤتن بهێته‌ كرن دێ بۆ رایا گشتی ئاشكرا كه‌ین و چو تشته‌كێ نهێنی نینه‌ كو ئه‌م ژ خه‌لكێ خوه‌ ڤه‌شێرین).

ئه‌ڤ داخۆیانیێن هه‌ڤسه‌رۆكێ به‌رێ یێ په‌یه‌دێ د ده‌مه‌كێ دایه‌ كو دو رۆژ به‌رێ نها جێگرێ وه‌زیرێ ده‌رڤه‌ یێ روسیا میكائیل بۆگدانۆڤ بۆ ئاژانسا روسیا تۆدێی دیار كربوو كو مه‌ چو رۆل د دانوستاندنێن د ناڤبه‌را یه‌په‌گێ و حوكمه‌تا سووریێ دا نینن و هه‌كه‌ ژ مه‌ بهێته‌ خواستن ئه‌م به‌رهه‌ڤین ب رۆلێ ناڤبژیڤان رابین و ئارمانجا مه‌ ژی ئه‌ڤه‌ كو قه‌یرانا سووریێ دوور ژ شه‌ری و ب رێیێن سیاسی بهێته‌ چاره‌كرن.

ل دۆر هه‌مان بابه‌تی دوهی ئیبراهیم كالین په‌یڤدارێ سه‌رۆك كۆمارێ توركیا ژی راگه‌هاند كو چو رێككه‌ڤتن د ناڤبه‌را یه‌په‌گێ و رژێما سووریێ دا نینن و ئه‌و تشتێن كو هنده‌ك ده‌زگه‌هێن راگه‌هاندنێ ژی به‌لاڤ دكه‌ن تنێ بۆ ئاژاوه‌گه‌ریێ یه‌ و گۆت: (مه‌ هۆشداری دایه‌ رژێما سووریێ كو ب چو ره‌نگه‌كێ بزاڤێ نه‌كه‌ت به‌رگیریێ ژ یه‌په‌گێ بكه‌ت، چونكو هه‌كه‌ تشته‌ك وه‌سا روو بده‌ت ئه‌و یه‌ك بۆ به‌شاری و حوكمه‌تا وی باش نابیت، توركیا ده‌ست ب ئۆپه‌راسیۆنا عه‌فرینێ كریه‌ و ب چو ره‌نگه‌كێ ئه‌ڤ ئۆپه‌راسیۆنه‌ ناهێته‌ راگرتن هه‌تا كو نه‌گه‌هیته‌ ئارمانجا خوه‌).

ل ئالیێ دی كوردێن ل ئورۆپا و ئه‌مریكا رۆژانه‌ ب رێیا چالاكیێن مه‌ده‌نی دژبه‌ریا خوه‌ ل هه‌مبه‌ر ئۆپه‌راسیۆنا توركیا ل عه‌فرینێ دیار دكه‌ن و داخواز ژ جڤاكێ نێڤده‌وله‌تی دكه‌ن كو نه‌هێلن توركیا ب فرۆكێن شه‌ری وه‌لاتیێن سڤیل ل عه‌فرینێ بكوژیت، لێ هه‌تا نها د ئاستێ نێڤده‌وله‌تی دا چو هه‌لویسته‌كی وه‌سا دیار كری ل دژی توركیا نینه‌ و ژ بلی هنده‌ك پارتێن چه‌پ و كه‌سك و رێكخراوێن مافێ مرۆڤی هه‌تا نها چو وه‌لاته‌كێ زلهێز دژبه‌ریا خوه‌ ل هه‌مبه‌ر ئۆپه‌راسیۆنا توركیا ل عه‌فرینێ نیشا نه‌دایه‌، لاوازیا هه‌لویستێ نێڤده‌وله‌تی ژی بوویه‌ ئه‌گه‌رێ هندێ توركیا به‌رده‌وامیێ بده‌ته‌ ئۆپه‌راسیۆنا خوه‌.

چاڤدێرێن سیاسی ژی دیار دكه‌ن كو هه‌كه‌ رژێما به‌شاری و یه‌په‌گێ بگه‌هنه‌ رێككه‌ڤتنه‌كێ ئه‌و یه‌ك دێ بیته‌ شكه‌ستنه‌كا مه‌زن بۆ توركیا، چونكو د ده‌مه‌كا وه‌سا دا یان دێ توركیا نه‌چار بیت ژ ئاخا سووریێ ده‌ركه‌ڤیت یان ژی دێ نه‌چار بیت شه‌رێ حوكمه‌تا سووریێ بكه‌ت كو د ره‌وشه‌كا وه‌سا دا روسیا ناهێلیت توركیا ل سووریێ زێده‌گاڤیان بكه‌ت و رژێما به‌شاری ته‌نگاڤ كه‌ت، چونكو رژێما به‌شاری هه‌ڤپه‌یمانێ سه‌ره‌كی یێ روسیایه‌ و پوتین ژی به‌شاری ب تنێ ناهێلیت.