ئه‌ڤرۆنيوز:
برياره ل حه‌فتيا بهێت، نێچيرڤان بارزانى سه‌رۆك وه‌زيرێن هه‌رێما كوردستانێ سه‌ره‌دانا وه‌لاتێ ئه‌لمانيا بكه‌ت.
كونسۆلخانا ئه‌لمانيا ل سه‌ر به‌رپه‌رێ خوه ل تويته‌رى به‌لاڤكر” ئۆرزولا فۆن دێرلاين وه‌زيرا به‌رگريا ئه‌لمانيا سه‌ره‌دانا شيرةتكارێن ئه‌لمانيا وبنگه‌هه‌كێ مه‌شق ونه‌خوه‌شخانه‌كا تايبه‌ت ب پێشمه‌رگه‌ى ل هه‌ولێرێ كر كر ويا خوه‌شحاله ل هه‌فتيا داهاتى ل ميۆنشن ل گه‌ل نێچيرڤان بارزانى سه‌رۆك وه‌زيرێن هه‌رێما كوردستانێ كۆمببيت”.
ئه‌ڤرۆ نیوز ، نه‌وزاد هلۆرى:
به‌رى ده‌مه‌كى گه‌نجه‌كێ ل گونده‌كێ سه‌ر ب قه‌زا به‌رده‌ره‌ش ڤه ل سنوورێ پارێزگه‌ها دهۆكێ ژ به‌ر ئه‌گه‌ره‌كێ نه‌دیار، ب پارچه‌كا په‌رۆكى خوه خه‌ندقاند.
عه‌قید (زه‌كى كوچه‌ر) رێڤه‌به‌رێ پۆلیسێن به‌رده‌ره‌ش بۆ ئه‌ڤرۆ نیوز گۆت” ئێڤاره دره‌نگى یا ئه‌ڤرۆ، گه‌نجه‌كێ گوندێ (قادسیه) یيێ سه‌ر ب قه‌زا به‌رده‌ره‌شێ ڤه، ب پارچه‌كا په‌رۆكى خوه خه‌ندقاند “
زێده‌تر گۆت” ژیێ وى گه‌نجى 25 سال بوون و هه‌تا نها ئه‌گه‌رێ خوه خه‌ندقاندنا وى يێ دیار نینه ، به‌لێ پۆلیسێن به‌رده‌ره‌ش يێ دووڤچوونێ ل سه‌ر روودانێ دكه‌ن بۆ زانینا ئه‌گه‌ران”.
جهێ ئاماژه‌پێكرنێ یه كو دوهى ژى گه‌نجه‌كێ ل سه‌نته‌رێ قه‌زا به‌رده‌ره‌ش ب گوله‌يه‌كێ خوه كوشت و پێر ژى چه‌ند كه‌سه‌كان ته‌قه ل ماموستایه‌كێ كربوو و ب دژوارى برینداركربوو.
ئه‌ڤرۆنيوز:
ده‌زگه‌هێن راگه‌هاندنێ ل ئيسرائيلێ به‌لاڤكرن كو بنيامين ناتانياهۆ سه‌رۆك وه‌زيرێن ئيسرائيلێ ژده‌ستپێكا روودانێن ئه‌ڤرۆ يێ مژوولێ دانوستاندن وكۆمبوونێن ئه‌منى يه، هه‌روه‌سا ئيمزار ل سه‌ر به‌رده‌وامبوونا ئۆپه‌راسيۆنێن له‌شكرى كر كو له‌شكرێ ئيسرائيلێ ل سووريێ ئه‌نجام دده‌ت.
راگه‌هاندنا ئيسرائيلێ ئاماژه ب وێ چه‌ندێ دده‌ت كو فه‌رماندێن له‌شكرێ ئيسرائيلى ب به‌رده‌وامى هوورده‌كاريێن ئۆپه‌راسيۆنان ب سه‌رۆك وه‌زيرێن ئيسرائيلێ رادگه‌هينن وناتانياهۆ ب هوورى چاڤدێريا ره‌وشێ دكه‌ت.
ژلايێ خوه‌ڤه ئه‌ندامێن جڤاتا بچووككرى يا وه‌زيران بۆ كاروبارێن سياسى وئه‌منى كۆمبووينه بۆ به‌حسكرنا روودانێن ئه‌ڤرۆ.
په‌يامنێرێ كه‌نالێ روسيا تو ده‌ى يێ رووسى ل ته‌ل ئه‌بيب پايته‌ختا ئيسرائيلێ راگه‌هاند كو ئيسرائيلێ بياڤێ ئه‌سمانى ل باكوورێ ئيسرائيلێ يێ داخستى، هه‌ڤده‌م له‌شكرێ ئيسرائيلێ راگه‌هاند كو هێرش يا كريه سه‌ر 3 بنگه‌هێن به‌رگريا ئه‌سمانى يا سوورى وچار ئارمانجێن سه‌ر ب ئيرانێ ڤه ل ئاخا سووريێ وله‌شكرێ ئيسرائيلێ يێ دحاله‌تا ئاماده‌باشيا تمام دا بۆ هه‌ر سيناريۆيه‌كێ ودێ دلڤينێن به‌رده‌وام دابيت.
ئه‌ڤرۆنيوز:
وه‌زاره‌تا به‌رگريا ئه‌مريكى دانپێدان كر كو گرۆپێن حه‌شدا شه‌عبى چه‌كێن ئه‌مريكى ژوان ژى تانكێن ئه‌برامز يێن تايبه‌ت ب له‌شكرێ عيراقێ ڤه، دژى كوردان بكارئيناينه.
ئه‌ريك باهۆن، په‌يڤدارێ وه‌زاره‌تا به‌رگريا ئه‌مريكى راگه‌هاند” تانكێن ژجۆرێ (ئه‌برامز ئێم 1) بۆ حوكمه‌تا عيراقێ يێن هاتينه فرۆتن د10 سالێن بۆرى دا دچارچۆڤێ به‌رنامه‌كێ فرۆتنا چه‌كى كو ب سه‌رپه‌رشتيا وه‌زاره‌تا ده‌رڤه يا ئه‌مريكى بوو، به‌لێ ئه‌و چه‌ك هاتنه بكارئينان ژلايێ گرۆپێن حه‌شدا شه‌عبى ڤه كو لايه‌نگرين ئيرانێ نه، دشه‌رێ دژى داعشێ دا”.
ل دووڤرێككه‌فتنا ل گه‌ل ئه‌مريكا، پێدڤيه ئه‌و تانك ژلايێ له‌شكرێ عيراقێ ب خوه‌ڤه بهێنه بكارئينان، به‌لێ وى په‌يڤدارى گۆت” مه ئاشكراكر كو چه‌كێ ئه‌مريكى ئه‌وێ هاتيه فرۆتن ژوان ژى تانكێن ئه‌برامز گه‌له‌ك جاران دده‌ستێ هنده‌ك كرۆپێن حه‌شدا شه‌عبى دا هاتينه ديتن”.
گۆت ژى” دێ به‌رده‌وامبين دچاڤدێريا هه‌موو وان چه‌ك وكه‌لوپه‌لێن له‌شكرى يێن ئه‌مريكى تاكو پشت رات بين كو يێن دده‌ستێ له‌شكرێ عيراقى ب تنێ دا”.
ئاماژه دا ژى كو هه‌موو تانكێن ئه‌برامز ل ڤێ دووماهيێ يێن هاتينه ڤه‌گه‌راندن بۆ له‌شكرێ عيراقێ.
حه‌شدا شه‌عبى چه‌كێن ئه‌مريكى دشه‌رێ دژى داعشێ دا بكارئينابوون وديسا ل هێرشێن ل سه‌ر كه‌ركووكێ وده‌ڤه‌رێن ناكۆكى ل سه‌ر ژى بكارئينابوون.
به‌رى نوكه به‌رپرسێن كورد راگه‌هاندبوو كو حه‌شدا شه‌عبى ب چه‌كێن ئه‌مريكى ژوان تانكێم ئه‌برامز هێرش كربوو سه‌ر جهێن پێشمه‌رگه‌ى ودو تانكێن ئه‌برامز ژلايێ پێشمه‌رگه‌ى ڤه هاتبوونه ژناڤبرن.
ئه‌ڤرۆنيوز:
جه‌نه‌راله‌كێ به‌رێ يێ له‌شكرێ سعوديێ، ل دۆر ئێخستنا فرۆكه‌كا ئيسرائيلى ژ جۆرێ F16 ژلايێ له‌شكرێ سوورى ڤه، راگه‌هاند ڤێ روودانێ دێ كاريگه‌ريه‌كا مه‌زن ل سه‌ر رۆژهه‌لاتا ناڤين هه‌بيت.
ئه‌نوه‌ر عه‌شقى، جه‌نه‌رالێ به‌رێ يێ له‌شكرێ سعوديێ د به‌رپه‌رێ خوه ل سه‌ر تۆرا تويته‌رى به‌لاڤكر” ئێخستنا فرۆكا ئيسرائيلى ل سووريێ، بنه‌مايێ ياريێن رۆژهه‌لاتا ناڤين دێ گوهۆريت”.
دوهى شه‌مبيێ 10/2/2018، له‌شكرێ ئيسرائيلێ كه‌فتنا خوارا فرۆكه‌كا خوه راگه‌هاندبوو، پشتى چىد ئارمانجه‌ك ل سووريێ توپبارانكرين وهه‌ردوو فرۆكه‌ڤانێن وێ ژى رزگاربوون.
ئه‌ڤرۆنيوز:
ئێكه‌تيا ته‌پا پێى ل كێشوه‌رێ ئاسيا رازيبوو ل سه‌ر وێ چه‌ندێ كو ياريگه‌ها زاخۆ يا نێڤده‌له‌تى ياريێن نێڤده‌وله‌تى يێن هه‌لبژارتيان ويانان مێهڤان بكه‌ت.
شيره‌تكارێ ئێكه‌تيا ئاسيا يێ ته‌پا پێى، شامل كامل، ئه‌ڤرۆ ئێكشه‌مبى 11/2/2018 راگه‌هاند” ئێكه‌تيا ئاسيا رازيبوويه ل سه‌ر مێهڤانكرنا سێ يارێگه‌هێن دى يێن عيراقى بۆ ياريێن نێڤده‌وله‌تى بۆ هه‌لبژارتى ويانان ل دووڤ بيڤه‌ر وسيسته‌مێن ئاسيا”.
شامل كامل دبه‌ياننامه‌كێ دا گۆت ژى” نوونه‌رێن ئێكه‌تيا ئاسيا يا ته‌پا پێى ئه‌وێ ل ڤێ دووماهيێ سه‌ره‌دانا هژماره‌كا ياريگه‌هێن عيراقێ كر وه‌كو ده‌ستپێكه‌ك بۆ راكرنا دۆرپێچا ل سه‌ر يارێگه‌هێن عيراقێ هه‌ى، رێ ب ئه‌نجامدانا ياريێن نێڤده‌وله‌تى ل يارێگه‌هێن زاخۆ وميسان وشه‌عب يێن نێڤده‌وله‌تى دايه، كو ب ڤێ چه‌ندێ ئه‌و هه‌رسێ ياريگه‌هێن نێڤده‌وله‌تى دێ چنه پال سێ ياريگه‌هێن دى يێن نێڤده‌وله‌تى ل عيراقى كو پێشتر ئێكه‌تيا ئاسيا رازيبوويه ل سه‌ر ئه‌نجامدانا ياريێن نێڤده‌وله‌تى تێدا ئه‌وژى هه‌ر ئێك ژ ياريگه‌هێن به‌سرا وكه‌ربه‌لا وئه‌ربيل يێن نێڤده‌وله‌تى، ئانكو ئێكه‌تيا ئاسيا رێ ب ئه‌نجامدانا ياريێن نێڤده‌وله‌تى ل شه‌ش ياريگه‌هێن نێڤده‌وله‌تى ل عيراقێ دايه”.
دياركر ژى” دێ بزاڤێن به‌رده‌وام هێنه كرن بۆ راكرنا ئێكجارى يا دۆرپێچێ ل سه‌ر ئه‌نجامدانا ياريێن نێڤده‌وله‌تى ل عيراقێ كو ژلايێ ئێكه‌تيا ته‌پا پێى يا نێڤده‌وله‌تى ڤه هاتيه سه‌پاندن، ژبه‌ر بارێ ئه‌منى ل عيراقێ”.
ئه‌ڤرۆنيوز:
رێڤه‌به‌ريا گشتى يا كه‌شناسيێ وبيڤه‌له‌رزان ل هه‌رێما كوردستانێ، ئاگه‌هداريه‌كێ ل دۆر سه‌قايێ چه‌ند رۆژێن داهاتى به‌لاڤ دكه‌ت.
رێڤه‌به‌ريا ناڤبرى ل سه‌ر به‌رپه‌رێ خوه يێ فه‌رمى ل تۆرا فه‌يسبووكى دبێژيت” ژئه‌نجامێ هاتنا كاريگه‌ريا هه‌ردو پاله‌په‌ستۆيێن ئێكگرتى ژ ده‌ريا ناڤه‌راست وده‌ريا سور، پێله‌كا به‌فر وبارانێ وبايێ ب هێز دێ هه‌رێما كوردستانێ ڤه‌گريت كو دێ ل شه‌ڤا ئێكشه‌مبى 11/2/2018 ده‌ستپێكه‌ت”.
دياركريه ژى” كاريگه‌ريا وێ پێلا به‌فر وبارانێ وباى دێ يا ب هێز بيت، هه‌روه‌سا تاكو رۆژێن دوشه‌مبى وسێشه‌مبى دێ يا به‌رده‌وامبيت ول پشتى نيڤرۆيا چارشه‌مبى 14/2/2018 دێ ب دووماهى هێت”.
رێڤه‌به‌ريا گشتى يا كه‌شناسيێ ل هه‌رێمێ، پێشبينيێ دكه‌ت كو پێله‌كا به‌فرێ ل ده‌ڤه‌رێن چيايى وبارانه‌كا ب هێز ل باژێر وباژێركێن هه‌رێمێ ڤه‌گريت، ديسا بايه‌كێ ب هێز ژى دێ هێت وپلێن گه‌رمێ ژى ب شێوه‌كێ به‌رچاڤ دێ نزم بن ب تايبه‌تى ل رۆژێن چارشه‌مبى وپێنجشه‌مبى”.
ئه‌ڤرۆنيوز:
نوشداره‌كا تايبه‌تمه‌ندا ژن و زارۆبوونێ دیارکر کو کچێن ل ژیەکێ درەنگ شوو دکەن زووتر جێمک ل دەف پەیدا دبن.
سیلاڤ بەکر یەحیا، نوشدارا تایبەتمەندا نەخوه‌شیێن ژن و زارۆبوونێ بۆ (نوش نيوز) گۆت” دو جۆرێن جێمکا یێن ھەین، ئەوژی یێن وەکو یەک د سەرو سیمایدا و یێن جیاواز د سەرو سیمایدا ئەڤەژی ڤەدگەریت بۆ قۆناغا (تلقیح)ێ دمالبچووکێ ژنێ دا، جۆرێ ئێکێ دەمێ د خولا ھەیڤانەدا ھێک مەزن بوو دگەل سپێرمەکا زەلامی دێ ھێک دو کەربیت ئەڤ جۆرێ جێمکا وەکی ئێکن.
جۆرێ دوێ دەمێ پتر ژ ھێکەکێ مەزن بوو دگەل دو سپێرمیت زەلامی ئەڤ جۆرێ جێمکا ب سەرو سیمای ڤە وه‌كو ئێك نينن.
دياركر دا کو ژن ب دوگیان بکەڤیت پێدڤیە رێژا ھێَزا مەزنبوونا ھێکێ دناڤبەرا 18 تا 22 دابیت ل دەمێ ھێکەک تنێ مەزن بوو، دێ بیتە ئێک بچووك ودەمێ دو یان پتر دێ بیتە جێمك.
ل دووڤ ئامارێن رێڤەبەریا گشتی یا ساخلەمیا پارێزگەھا دھوکێ هژمارا جێمکێن ل سالا 2017 ژدايكبووين گەھشتیە 338 جێمکان.
ل دور زێدەبوونا جێمکان ، سيلاڤێ گۆت” ھەبوونا جێمکان مەترسی یا ھەی ل سەر ژیانا دایکێ و جێمکی، لەورا نوکە ل جیھانێ ھەمیێ دەمێ زارۆی دچینن پتر ژ دو سپێرما ناکەنە د زکێ دایکێ دا، چونکى کێناسیێن زکماکی پەیدادبن و زارۆ ژ بەر دایکێ دچیت”.
دیارکر ژی، ب ھەبوونا جێمکان بەری وەختی ژان دھێنە دایکێ، زارۆ دھێتە سەر دونیایێ ئەڤەژی ئاریشەکا مەزنە چونکى( فالنجا مەژی بو په‌يدا دبيت و مێشکێ وی تمام نابیت، یان بیردانکا وی دێ کێم بیت).
ل دور مەترسیا وێ ل سەر دایکێ گۆت” گەلەك ئاریشە و نەخوه‌شی بو پەیدادبن وەکو ئێشا دلی، جەلتە، خوین تیربوون، نەخوه‌شیا شەکرێ و دل رابوون و گێژاتیا دوگیانی دبیتە دوجارکی، ھەروەسا بێھنتەنگ بوون و خوینبەربوون بۆ پەیدادبیت و فشارا وێ بلند دبیت و پتر پێدڤی ب نشتەرگەریێ دبن ل دەمێ زارۆبوونێ و ژانێن وێ پترن و ھندەک دایك یێن ھەین زارۆیەك سروشتی دبیت یێ دويێ پێدڤی نشتەرگەریێ دبیت ئانکو زەحمەتا وێ دبیتە دوجارکی”.
تایبەتمەندا نەخۆشیێن ژنان و زارۆبوونێ دیارکر ژی جێمک ھەنە تووشی گەلەک ئاریشان دبن ئێک ژوانا، جێمکەك بمینيتە ساخ یێ دی بمریت، ھەکە ئەم بزانین چ کارتیکرنێ ل زارۆیێ دی ناکەت ئەم بەردەوام دووڤچوونا وی دکەین، چونکى ئەم نەشێین ئێکی ببەین و ئێك بمینيت.
گۆت ژى” ھەکە ل سێ ھەیڤێن دەستپێکێ مری، مەترسیا وێ کێمترە ژ ھەیڤێن دووماھیێ هه‌كه مەزانی مەترسی دێ ل سەر ژیانا دایکێ ھەبیت ھەودانا بۆ چێکەت یا ژەھراویبوونا دوگیانیێ دێ ل دەف پەیدابیت، ئەم نه‌چارين زارویێ ساخ و یێ مری ھەردویان ژ بەر ببەین ژبۆ پاراستنا ساخلەمیا وێ”.
خوياكر” ئەو کەسێن د خێزانێ دا جێمك ھەبن ژ لایێ دایکێ ڤە رێژا بوونا جێمکان پترە ل دەف و دیسا ئەو کچێن زوو شوو نەکەن(ئێف ئێس ئیچ) پتر دھێتە ھاڤێتن و پتری ھێکەکێ مەزن دبیت دڤی حالەتی دا دبیتە جێمك و يێن دژيه‌كێ مەزن دا شوو دکەن حەزدکەن زوو ب دوگیان بکەڤن ل سێ ھەیڤێن ئێکێ چارەسەریا بھێزبوونا ھێکا دخون رێژا جێمکا ل دەف وان گه‌له‌كه، دیسان ل ھندەك جھان ل جیھانێ رێژا جێمکان پتره ژ ھندەکان وەکو وەلاتێن هندستانێ و نایجیریا”.
ئه‌ڤرۆنيوز:
رێڤه‌به‌ريا هاتنوچوونا پارێزگه‌ها دهۆكێ راگه‌هاند، ژ ئه‌نجامێ لێگدانه‌كا دو ترومبێلان دناڤبه‌را شێخان وچره‌ى، پێنج كه‌س برينداربوون.
رێڤه‌به‌ريا ناڤبرى دبه‌رپه‌رێ خوه ل سه‌ر فه‌يسبووكى به‌لاڤكر” دوهی شەمبيێ ٢٠١٨/٢/١٠ ل دەمژمێر ٧:٣٠ ب شەڤ ل جادا سەره‌کی یا دناڤبەرا شێخان و کومەلگەها چرەى دا، ل سێ ریانا کومەلگەها مەهەتێ، روودانه‌ك ژ جۆرێ لێگدان دناڤبەرا دو ترومبێلان ( بارهەلگر کیا ٢طن + تایبەت مازدا ) و دئەنجامدا ( ٥ ) کەس بریندار بوون زێدەباری زیانێن دراڤى ژی گەهشتنە ترومبێلان.
ئه‌ڤرۆ نیوز، زنار تۆڤى:
چاڤدێره‌كێ سیاسى ل دۆر هه‌لبژارتنێن داهاتى و هه‌لویستێ پارتێن كوردستانى و پشكداریا وان د په‌رله‌مانێ عێراقێ دا بۆ رۆژناما ئه‌ڤرۆ دبێژیت:هه‌تاكو نوكه حزبێن كوردستانى نه‌بووینه ئێك هه‌لویست ل سه‌ر پشكداریا وان د هه‌لبژارتنێن داهاتى یێن په‌رله‌مانێ عێراقێ دا،له‌ورا د ره‌وشه‌كا وه‌كى نوكه یا ئالۆز دا پێدڤیه كورد ل ده‌ڤه‌رێن كوردستانى یێن ده‌رڤه‌ى ئیدارا هه‌رێمێ دا ببنه ئێك لیست و دڤێت ل به‌غدا ژى د ئێكگرتى بن،هه‌روه‌سا پشكداریا كوردان ب ئێك لیست د وان ده‌ڤه‌ران دا دو تشتێن گه‌له‌ك ژێكجۆدا هه‌نه،له‌ورا هنده‌ك ژ خه‌لكێ كه‌ركوكێ ب مۆسلێ به‌راورد كه‌ن،لێ ئه‌ڤ چه‌نده یا ژێكجۆدایه،چونكى كه‌ركوك باژێره‌كێ كوردستانیه،لێ مۆسل باژێره‌كێ عێراقیه،هه‌ر چه‌ندین ده‌ڤه‌رێن كوردستانى سه‌ر ب وى باژێرى ڤه هه‌نه و كوردان چه‌ند كورسیێن په‌رله‌مانى ل ڤى باژێرى هه‌نه،ناڤهاتى ئه‌و ژى دیاركر:كوردان ئاریشه د كورسیان دا نینه،لێ مه ئاریشه د ئێك هه‌لویستى و ئێكرێزیا كوردان دا هه‌یه،له‌ورا دڤێت هه‌موو لایه‌ن د كۆكبن ل سه‌ر هندێ كو ب ئێك لیست ل ڤان ده‌ڤه‌ران دا پشكداریێ د هه‌لبژارتنێن په‌رله‌مانێ عێراقێ دا بكه‌ن،هه‌ر چه‌نده ل پێش عه‌ره‌بان ڤه كوردان كورسیێن كێم ل به‌غدا هه‌نه،لێ ئێكرێزى و ئێك هه‌لویستیا كوردان ل به‌غدا دێ وه كه‌ت،كو كورد دێ هێزه‌كا مه‌زن نیشا عێراقێ و هه‌موو جیهانێ ده‌ن،ئه‌م دێ بۆ وان دیاركه‌ین،كو كورد ئێك ده‌نگن،ب تایبه‌تى د وان پرسێن گرێدایى ب چاره‌نڤیسێ كوردان و ماددێ 140 ڤه،لێ مخابن هێشتا هنده‌ك حزبێن كوردستانى رێگرن كو ئه‌ڤ ئه‌جندایه سه‌ر بگریت،هه‌روه‌سا هه‌رده‌م كورد پرت و به‌لاڤه بووینه و ئێك هه‌لویست نه‌بووینه د ئاستێن بلند دا.
سیروان گه‌ردى ئه‌و چاڤدێرێ سیاسیه زێده‌تر دبێژیت:نوكه هه‌موو لایه‌نێن سیاسى یێن كوردستانى دڤێن خوه نێزیكى هنده‌ك لایه‌نێن عێراقى بكه‌ن،داكو بشێن هه‌ڤپه‌یمانیان ل گه‌ل وان لایه‌نێن عێراقى دروست بكه‌ن،ژ پێخه‌مه‌ت بشێن هنده‌ك ده‌ستكه‌فتێن ماددى ب ده‌ست خوه‌ڤه بینن،هه‌روه‌سا هوكارێن ئێكنه‌گرتنا كوردان چو رێگرى ل هه‌مبه‌ر نینن،ژبه‌ركو بریاره‌كه هه‌موو لایه‌ن دێ ده‌ن ژبۆ به‌رژه‌وه‌ندا ملله‌تێ كوردستانێ،له‌ورا هه‌كه ب ئێك ده‌نگ ئه‌م نه‌چینه به‌غدا،دێ كورد پارچه پارچه بن و ب تایبه‌تى ل ڤان هه‌لبژارتنێن داهاتى دا دێ پێكئینانا حوكمه‌تا عێراقێ گه‌له‌ك یا ب زه‌حمه‌ت بیت،چونكى هیچ لایه‌نه‌ك و هه‌ڤپه‌یمانیه‌كا سیاسى ل عێراقێ 50 كورسیێن په‌رله‌مانى ب ده‌ستڤه نائینیت،ناڤهاتى ئه‌و ژى گوت:پێكئینانا حوكمه‌تا داهاتى ل به‌غدا دێ گه‌له‌ك ده‌م پێڤه چیت،له‌ورا د نوكه دا هه‌كه كورد ببنه ئێك لیست و پشكداریێ د هه‌لبژارتنێن عێراقێ دا بكه‌ن،دێ شێن ب ئێك پاكێج هه‌موو داخوازیێن خوه هه‌ر ژ ماددێ 140 و مووچێ پێشمه‌رگه‌ى و هه‌موو پرسێن گرێدایى كوردستانێ ب ره‌نگه‌كێ ب هێز ئاراسته‌ى به‌غدا كه‌ن،چونكى هه‌كه ئه‌و داخوازیێن كوردان نه‌هێنه بجه ئینان،دێ پێكئینانا كابینا نوو یا حوكمه‌تا عێراقێ گه‌له‌كا ب زه‌حمه‌ت بیت،هه‌كه كورد ئێك ده‌نگ و ئێك هه‌لویست بن،لێ هه‌كه ئێكرێز و ئێك هه‌لویست نه‌بن،هنده‌ك لایه‌ن بچنه به‌غدا و هنده‌ك ژى نه‌چن،ل وى ده‌مى دێ حوكمه‌تا عێراقێ پێكهێت و كورد ژى نه‌شێن د دانوستاندنان دا چو ب ده‌ستڤه بینن.
سیروان گه‌ردى هێشتا دبێژیت:پشتى كه‌ركوك و چه‌ندین ده‌ڤه‌رێن دیتر یێن كوردستانێ كه‌فتینه ژێر ده‌ستێ حوكمه‌تا عێراقێ دا،ڤێ جارێ دێ رێژا كورسیێن كوردان ل په‌رله‌مانێ عێراقێ دا كێمبن،هه‌ر چه‌نده كورسیان هند گرنگیا خوه نینه،لێ هه‌كه كورد ڤێ جارێ ب ئێك ده‌نگ و ئێك هه‌لویست و ئێك پاكێج نه‌چنه به‌غدا،ئه‌و هیڤیا كوردان ب ماددێ 140 ژى مایى ئێدى نامینیت و ده‌ڤه‌رێن كوردستانى یێن ده‌رڤه‌ى هه‌رێمێ ژى دێ هه‌موو ب ته‌مامى كه‌ڤنه ژێر ركێفا به‌غدا.
نيشاندان