ئه‌ڤرۆنيوز:
ته‌رمێ گه‌نجه‌كێ 19 سالى ئه‌ڤرۆ شه‌مبيێ 10/3/2018 هاته ديتن كو خه‌لكێ ناحيا سيده‌كانه يا ب سه‌ر قه‌زا سۆران ڤه.
رائيد (هه‌وار ئه‌رگۆشى) په‌يڤدارێ رێڤه‌به‌ريا پۆليسێن سۆران دداخۆيانيه‌كا رۆژنامه‌ڤانى دا گۆت” ل سپێده‌يا ئه‌ڤرۆ شه‌مبيێ، ئه‌م هاتينه ئاگه‌هداركرن ب هه‌بوونا ته‌رمه‌كى، پشتى گه‌هشتنا تيمێن مه دياربوو كو ته‌رمێ گه‌نجه‌كێ 19 ساليێ يه وب گوله‌يان گيانێ خوه ژده‌ست دايه”.
گۆت ژى” ته‌رمێ وى گه‌نجى هاته هنارتن بۆ نوشداريا داد وڤه‌كۆلينێ ل دۆر روودانێ يا ده‌ستپێكرى”.
ئه‌ڤرۆنيوز:
راهێنه‌رێ يانا ريال مه‌دريد ده‌رگه‌هێن ئيمزاكرنا گرێبه‌ستێ ل گه‌ل يارێكه‌رێ به‌رازيلى نيمار هێرشبه‌رێ يانا باريس سان جيرمان يا فه‌ره‌نسى ڤه‌كرن.
چه‌ندين گۆتن ل دۆر پاشه‌رۆژا نيمارى ل گه‌ل يانا خوه يا فه‌ره‌نسى دهێنه به‌لاڤكرن كو ب گۆژمێ 222 مليۆن يورۆيان ژ به‌رشه‌لونا كرى بوو وبوويه گرانترين ياريكه‌ر دديرۆكێ دا، به‌لێ ل دووڤ راپۆرتێن رۆژنامه‌ڤانى، نيمار يێ كه‌يفخوه‌ش نينه ل گه‌ل يانا باريس سان جيرمان ب تايبه‌تى پشتى ده‌ركه‌فتنا وێ ژ خۆلا قاره‌مانێن ئورۆپا دقۆناغا 16 دا ل سه‌ر ده‌ستێ ريال مه‌دريد.
ژێده‌رێن رۆژنامه‌ڤانى ئاماژێ دده‌ن كو يانا فه‌ره‌نسى داخوازا 400 مليۆن يورۆيان بۆ فرۆتنا نيمارى دكه‌ت وريال مه‌دريد يا به‌رهه‌ڤه بۆ دانا وى گۆژمێ پاره‌ى بۆ ئينانا نيمارى بۆ ناڤ رێزێن خوه، لدۆر ڤێ چه‌ندێ ژى رۆژنامه‌ڤانه‌كى پرسيار ژ زێنلدين زێدان راهێنه‌رێ ريال كر كا ئايا ريال يا به‌رهه‌ڤه كوژمێ 400 مليۆن يورۆيان بۆ ئينانا نيمارى بده‌ت، دبه‌رسڤێ دا زێدانى ب دوور نه‌ديت ئه‌ڤ چه‌نده بهێته كرن.
زێدانى دياركر ژى، به‌رى چه‌ند هه‌يڤان 222 مليۆن يورۆ بۆ ڤه‌گوهاستنا نيمارى هاتن دان وئه‌ڤ گۆژمێ مه‌زن نوكه يێن هه‌ين بۆ ڤه‌گوهاستنا ياريكه‌رێن دوى ئاستى دا وده‌مێ ريال مه‌دريد ب گۆژمێ 72 مليۆن يورۆيان گرێبه‌ست ل گه‌ل من ئيمزاكرى، وى ده‌مى من هزركر كو ئه‌ڤه تشته‌كێ ئه‌سته‌مه ونيمار ژى ياريكه‌ره‌كێ گونجايه بۆ هه‌ر تيمه‌كێ.
رۆژناما ئاس يا ئيسپانى ئه‌ڤ داخۆيانيا زێدانى وه‌كو ئاماژه‌ك هژماره‌ت بۆ نيه‌تا ريال مه‌دريد بۆ ئيمزاكرنا گرێبه‌سته‌كێ ل گه‌ل نيمارى.
ئەڤرو نیوز، نەوزاد هلۆری:
وەلاتیەكێ ناحیا دێرەلوكێ یا سەر ب قەزا ئامێدیێ ڤه، ب داهێنانەكێ كارەبا مالا خوە كریە 24 دەمژمێری و دياركر كو هەر كەسەكێ بخوازیت ئەو دێ كارەبا مالا وی كەت 24 دەمژمێری.
عوبەید مێزی، ئاكنجیێ ناحیا دێرەلوكێ يه كو چەندین سالە وەكو هوستایێ كارەبايی و میكانیكی كاردكەت بۆئەڤرۆ نیوز گۆت” من گەلەك داهێنانێن گرنگ دوارێ كارەبايێ و میكانیكی درۆستكرینە ، دووماهی جار ژی رابوویمە ب داهێنانەكێ ل سەر ئامیرێ لەحیمێ ئەو ژی ب زێدەكرنا كارەبا ناڤا UPS وێ یە داكو بكاریت كارەبا 24 دەمژمێری بدەت وشيام سەركەفتنێ بینم و كارەبا خوە بكەم 24 دەمژمێری هەتا ئەز نوزانم كەنگی كارەبا نیشتمانی ويا موه‌ليدێ هه‌يه”.
زێدەتر گۆت” من نەڤێت هوورده‌كاریێن چاوانیا چێكرنا كارەبا 24 دەمژمێری رۆهن بكەم ، بەلێ دكارم هنده‌ك پێزانینان بدەم ، ل دەستپێكێ من بگورەك ئینایە و پاشى من لەف كریە و كارەبا وی كریە 12 ڤولت ، پاشى پاتریەكا باش و مەزن من ئینایە و نەخشە و پاوەرەكێ تایبەت بۆ درۆستكریە داكو هێرتزێ درۆست بكەت ژ بەركو ئامیرێ لەحیمێ كارەبا ژ جۆرێ DC ددەت و مە كریە AC ، بڤی رەنگی داهێنانا من یا سەركەفتی بوو و هەموو ئامیرێن كارەبايى یێن مال وەكو بەفرگر و گلوپ و تێلەڤزیۆن و پانك و چەند ئامیرەكێن دن پێ كاردكەن و هەتا نها من بۆ كەسێ نەچێكریە، بەلێ هه‌كه كەسەك بخوازیت، دكارم ب كوژمێ 800 هزار دیناران بۆ درۆست بكەم و كارەبا مالا وی بكەم 24 دەمژمێری و تنێ دبيت ساڵی جارەكێ یان دو سالان جارەكێ ب گورەی قەبارێ پاترێ دێ پاتریەكێ كریت”.
ب گۆرەی ئاخڤتنێن ناڤبری، چەند پاتریا داهێنانا وی یا باش بیت، دێ كارەبا زێدەتر دەت و زێدەتر گۆت” بۆ نیاسینا كارەبا داهێنانێ ل گەل كارەبا نیشتمانی و موه‌لیدێ، من گلوپێن كەسك و سۆر بكارئیناینە و هه‌كه كارەبا نیشتمانی هات، دێ گلوپا كەسك هەلبیت و كارەبا داهێنانا من ب شێوەیەكێ ئوتوماتیكی دهێتە ڤەمراندنو هه‌كه كارەبا نیشتمانی چو ، دێ گلوپا سۆر هەلبیت و وەكو ئاماژەیەك بۆ هاتنا كارەبا داهێنانێ و هەردەما كو كارەبا نیشتمانی هات ژی ئێكسەر پاتریا داهێنانا من دهێتە شەحكرن”.
دهێتە زانین كو عوبێد مێزی خێزاندارە و ل دێرەلوكێ ئاكنجیە و چو ژ خواندن و نڤیسانێ نوزانیت و ب هزر و بیرێن خوە فێربوویە و هەتا نها نێزیكێ 15 داهێنانان درۆستكرینە.
ئه‌ڤرۆنيوز:
ژبه‌ر پرسا بابه‌تێ مووچێن رێڤه‌به‌ريێن ره‌گه‌زنامه وپاسپۆرت وپێزانينان، ئه‌ڤرۆ شه‌مبيێ 10/3/2018 شانده‌كێ هه‌رێما كوردستانێ دێ به‌ر ب به‌غدا ڤه چيت.
ل دووڤ پێزانينێن ئه‌ڤرۆنيوز، نوونه‌رێن پارێزگه‌هێن هه‌ولێرێ وسلێمانيێ ودهۆكێ ب مه‌ره‌ما دووڤچوونا مووچێن وان رێڤه‌به‌ريان يێن سێ هه‌يڤێن دووماهيا سالا 2017 دێ سه‌ره‌دانا به‌غدا كه‌ن.
دهێته زانين به‌رى نوكه ژى مووچێن وان رێڤه‌به‌ريان ژئاليێ حوكه‌تا به‌غدا ڤه دهاته خه‌رجكرن.
ئەڤرۆ نیوز ، زنار تۆڤی :
عەلی عەونی دبێژیت:من گوهلێبوویە کو ئاراسی ل بەرە عه‌ریزه‌کێ بدەت بۆ هندێ کو ئەو سترانا حه‌سه‌ن زیره‌كی ب نه‌ورۆز گوتی قەدەغە ل سەر بهێتە راکرن.
ئەندامێ سەرکردایەتیا پارتی دیمۆکراتی ب دژواری رەخنە ل ئاراس جەنگی گرتیە،کو وی ئالایێ کوردستانێ ب پارچەکا قۆماشی بناڤکریە،دڤی واریدا گوتیە،هەکە ئێکەتی ل سەر ڤان ئاخفتنان بێدەنگ بیت،ئەڤە وەسا دیارە هەموو پێکڤە شریکن.
عەلی عەونی ئەندامێ سەرکردایەتیا پارتی دیمۆکراتی کوردستان دەربارەی ئاخفتنێن ئاراس جەنگی كو گوتبوو“بلندکرنا پارچە قۆماشەکێ،هندێ، نائینیت کو ئارامیا کەرکووکێ بهێته تێکدان”، گوتیە ژی “ئەڤە ب وێ مانایێ دهێت،کو نیشتیمانێ کوردستانێ ژی پارچە زەڤیەکە و ئەڤە وێ نائینیت،کو خەلک شۆرەش و قوربانیێ بۆ بدەت،هەروەسا ئالایێ کوردستانێ پارچە پەرۆکەک نینە،ئالایێ مە رەمزا مللەتەکێیە، هەروەسا ئالایێ مە گەلەکێ موقەدەسە بۆ مە،کو هزاران گەنجان ژ پێناڤێ وی دا گیانێ خوە بەخشیە بۆ هندێ کو ل ڤێ پارچا کوردستانێ گەلێ مە ب ئازادی ئالایێ خوە بلند بکەن”.
هەروەسا عەلی عەونی دیارکریە ژی “ ئاراس شێخ جەنگی ل بەرە ب هاریکاریا عەسائیب و بەرەیێ تورکومانی عەریزەیەکێ بدەن، بەلکی ئەو سترانا حەسەن زیرەکی بۆ نەورۆزی گوتی، قەدەخە ل سەر بهێتە راکرن، بەلێ هەکە بلندکرنا ئالایێ کوردستانێ ئەوێ نەئینیت،ئێدی چو تشتی دێ بوهایێ خوە مینیت؟،لەورا ستران ژی ئەوێ چەندێ نائینیت،ئەرێ نوکە چو جۆداهی هەیە ل گەل سەردەمێ سەدام حوسێنی؟.
عەلی عەونی گوتیە ژی “ئەرێ ئەو تێکۆشان و خەباتا مە بۆ کری؟،ژنوو تۆ دبێژیە ئالایێ کوردستانێ پارچە پەرۆک،ئەڤە ئەو پەرێ دۆراندنێ و خوە بدەستڤە بەردانە،هەکە تۆ بێژیە ئالایێ کوردستانێ پارچە پەرۆک،لێ ئالایێ عێراقێ ئەو پارچە قۆماش ژی نینە و چو نینە ژی”.
وی ئەندامێ سەرکردایەتیا پارتی ئاماژە ب هندێ ژی کریە، بێدەنگیا ئێکەتیێ هەمبەری ئاراس شێخ جەنگی هندێ نیشان ددەت،کو هەموو شریکن و ئەو دەمێ وان قەرەبالغ و هۆسە ژی دکر، وان درەو دكرن، باشە بۆچی ئەو شیان وی کوری بگرن،یێن کو هێرش ل مەکتەبا سیاسی یا وان د كر،ل چەند رۆژێن بوریدا، بۆچی نەشێن ئاراسی و لاهوری و باڤێلی بگرن،کو د ئامادەنە چارەنڤیسێ ڤی مللەتی وە؛لێ بکەن،لەوما ئەڤە وێ چەندێ نیشان ددەت،کو ئەو هەموو شریکن”.
عەلی عەونی هەروەسا گوتیە “خیانەتا مەزن ئەو نینە،کو ئێک ببیتە جاش یان دەرگەهێ کەرکووکێ بۆ دوژمنی ڤەکەت، بەلکو خیانەتا مەزن ئەوە،کو ئەوێن نوکە مژۆلی هندێ کو بەهانەیا بۆ خیانەتێ دئینن و مژۆلی هندێ نە،کو قەباحەت و نەشرینیا خیانەتێ نەهێلن و ب تشتەکێ ئاسایی دناڤا مللەتێ مەدا بەحس دکەن، هەروەسا خیانەتا مەزن ئەوە کو ئەو نڤیسەرێن دناڤا سەركردایەتیا وان دا یێن کو بۆ وان وێ خیانەتێ پنی دکەن،لەوما هەر کەسەکێ بۆ وان پنی بکەت، شریکێ وێ خیانەتێ یە.
ئەڤرۆ نیوز ، زنار تۆڤی :
ئەڤرۆ ترۆمبێلێن بارکری یێن ئینسکلۆپیدیا پارێزگەها دهۆکێ ژ ستەمبۆلێ دایە رێ و بریارە ل رۆژا دوشەمبی بگەهنە ئاخا هەرێما کوردستانێ.
دڤی واری دا موسەدەق تۆڤی سەرپەرشتیار و سەرنڤیسەرێ ئینسکلۆپیدیا پارێزگەها دهۆکێ بۆ ئەڤرۆ نیوز دیارکر:کو ئینسیکلۆپیدیا پارێزگەها دهۆکێ ل ستەمبۆلێ هاتیە چاپکرن و نوکە ژ چاپکرنێ ب دوماهی هاتیە و بریارە ل رۆژا دوشەمبی 12 ئادارا 2018 بگەهیتە پارێزگەها دهۆکێ و گوت ژی: 4 هزار دانە ژێ هاتینە چاپکرن،کو ژ 9 بەرگان پێک دهێت و کو هەموو بەرگێن وێ دبنە 5 هزار بەرپەر.
هەروەسا گوت ژی:د ڤێ هه‌لكه‌فتێدا ئەز سوپاسيا هه‌ڤكارێ خوه خالد سالح و هه‌ر كه‌سه‌كى ژ نڤيسكار و ڤه‌كۆله‌ر و ديزاینه‌ر و هۆنه‌رمه‌ندان و هه‌موو ستافێ رێڤه‌به‌ريا گشتی یا ره‌وشه‌نبيرى و هونه‌رى ل پارێزگه‌ها دهۆكێ،دیسا سوپاسیا وان رێڤه‌به‌ر و فه‌رمانگه‌هێن پارێزگه‌هێ دكه‌م يێن هه‌ر ئێكى ب ره‌نگه‌كى هاريكاريا مە كرى ژبۆ ئه‌نجامدانا ڤى كارێ مه‌زن دکەم،ل به‌راهيا هه‌موو يان سوپاسیا پارێزگارێ دهۆکێ فه‌رهاد ئه‌ترووشى دكه‌م،کو ب پشته‌ڤانيا وى ئه‌ڤ به‌رهه‌مه هاتيه چاپكرن.
ئەڤرۆ نیوز ، زنار تۆڤی :
سكرتێرێ گشتى یێ میلیشیاتێن عه‌سائیبی ئه‌هل حه‌ق بریارا حه‌یده‌ر عه‌بادى سه‌رۆك وه‌زیرێن عێراقێ دەرباره‌ى تێكه‌لكرنا حه‌شدا شه‌عبى ل گەل هێزێن عێراقی ب فێل دزانیت و دبێژیت،ئەو بریار دێ حه‌شدا شه‌عبى کەتە ئارمانج.
پشتی رۆژەکێ ژ بریارا حه‌یده‌ر عه‌بادى سه‌رۆك وه‌زیرێن عێراقێ بۆ تێكه‌لكرنا میلیشیاتێن حه‌شدا شه‌عبى ب هێزێن عێراقی ڤه، قه‌یس خه‌زعه‌لى سكرتێرێ گشتى یێ میلیشیاتێن عه‌سائیبى ئه‌هل حه‌ق گومانێ ژڤێ بریارێ دکەت و دبێژیت ئەڤ بریارە نەیا پەسەندە.
ل دەمێ په‌سه‌ندكرنا بودجەی خه‌زعه‌لى د به‌یاننامه‌كێدا هێرش كریه سه‌ر حكوومه‌تێ و په‌رله‌مانی،چونكی پشكا حه‌شدێ د بودجەی دا دیار نه‌كریە،نوکە ژی پشتی ده‌رچوونا وێ بریارا عه‌بادى، خه‌زعه‌لى دبێژیت، ده‌رکرنا بڕیارە بێی دیاركرنا بودجه‌کێ تایبه‌ت، لێدانا حه‌شدێ و هاڤێتنا وێیە،لەورا میلیشیاتێن حه‌شدا شه‌عبى دێ ل دژی بڕیارا حه‌یده‌ر عه‌بادى سه‌رۆك وه‌زیران راوەستیت.
حه‌شدا شه‌عبى ژ 62 گرووپێن چه‌كدار یێن شیعی یێن جۆدا پێك دهێت،کو هژمارا چه‌كدارێن وێ دگەهیتە 115 هزار كه‌سان، ل سالا 2014 ب فه‌توایەکا عه‌لی سیستانی مەزنە لێڤەگەرێ شیعێن عێراقێ بۆ به‌رهنگاربوونا رێكخراوا تیرۆریستى یا داعش هاتیە دامه‌زراندن.
ئه‌ڤرۆ نیوز:
چه‌كداره‌كی ل باكۆرێ ویلایه‌تا كالیفۆرنیا یا ئه‌مریكی هێرشی ماله‌كا حه‌واندنا دانعه‌مران كر و چه‌ندین كه‌س ب بارمته برن.
پۆلیسێن كالیفۆرنیا راگه‌هاند، چه‌كداره‌كی كو جلكێن دژه‌گولـله‌یان لبه‌رن و ره‌شاشه‌ك ڤێیه هێرشی ماله‌كا دانعه‌مران كر و پتری شازده گولـله هاڤێتن و چه‌ندین كه‌س ب بارمته برینه.
پتری هزار كه‌س د وێ مالا دانعه‌مران ڤه‌نه و ب مه‌زنترین مالا ب وی ئاوایی ل ئه‌مریكا دهێته هه‌ژمارتن.
ئه‌ڤرۆ نیوز:
شه‌رڤانه‌كێ هێزا دژه‌تیرۆرا یه‌په‌گێ ل ناوچه‌یا جندرێسێ یا عه‌فرینێ ل رۆژئاڤایێ كوردستانێ، دا كو ب ساخی نه‌كه‌ڤیته ده‌ستێ سوپایێ توركیا و ملیشیایێن وێ یێن سووری، خوه په‌قاند و داوی ب ژیانا خوه ئینا.
ئیلان دارا، ژ هێزا دژه‌تیرۆرا یه‌په‌گێ پشتی شه‌ره‌كێ دژوار دژی سوپایێ توركیا چه‌كدارێن سوپایێ ئازادێ سووریێ ل جندرێسێ كری، به‌ری بكه‌ڤیته ده‌ستێن وان هێزان دا خوه په‌قاند ژبه‌ركو ره‌ت كر ئه‌و هێزه وی ئێخسیر بكه‌ن.
یه‌په‌گێ د به‌یانه‌كێ دا ئه‌و یه‌ك پشتراست كر.
نيشاندان