ئه‌ڤرۆ نيوز:
ھاریکارێ سەرۆکێ زانکۆیا دھۆک بۆ کاروبارێن کارگێڕی و دارایی دیار کر، داھاتێ ژ قوتابیێن ئێڤاران و پەرالێل دھێتە وەرگرتن 70% بۆ زانکۆیێ یە و 30% بۆ وەزارەتا خواندنا بلند و وەزارەتا دارایی یە.
د. حەجی موسا حەسەن، بۆ ئەڤرۆ راگەھاند، ژ 70% یا پشکا زانکۆیێ، کریا وانێن مامۆستایان و وان فەرمانبەرێن دەواما ئێڤاری دکەن پێ دھێتە دان، ئەو پارێ دمینیت ژ وی داھاتی ل پێدڤیێن زانکۆیێ یێن فەر دھێتە مەزاختن، چونکو ئەڤە دو سالە پێشینا زانکۆیێ گەلەکا کێم بووی کو 40% ژێ ئینایە خوارێ، ھەر ژ ڤی داھاتێ ژ قوتابیان بۆ زانکۆیێ دھێت گازا سپی بۆ پشکێن ناڤخوە ژی پێ دھێتە دابین کرن.
ھاریکارێ سەرۆکێ زانکۆیا دھۆک بۆ کاروبارێن کارگێڕی و دارایی ئەو ژی ئاشکرا کر کو ژ بەر قەیرانا دارایی ھندەک پرۆژێن ئاڤاکرنێ ل زانکۆیێ ھاتینە راوەستاندن ژ وان ژی پرۆژێ ئاڤاکرنا ئاڤاھیێ سەرۆکاتیا زانکۆیا دھۆک ل ناڤ کەمپێ زانکۆیێ کو نێزیکی ٤٠% ژێ ھاتیە بجھئینان و ھاتیە راوەستاندن.
ل دۆر دامەزراندنا سەرکەفتیان ھاریکارێ سەرۆکێ زانکۆیا دھۆک بۆ کاروبارێن کارگێڕی و دارایی گۆت: “وەزیرێ خواندنا بلند داخواز ژ جڤاتا وەزیران کر بۆ دامەزراندنا وان کو دەرچوویێن ئێکێ و دویێ و سێیێ یێن ھەموو سالان ل دووڤ پلانا حوکمەتێ و شیانێن وان بھێنە دامەزراندن، لێ ژ بەر ڤێ قەیرانا دارایی ئەڤ سالە یێن 2014 – 2015 ھاتنە دامەزراندن، ئەم ب ئومێدین پشتی ئەڤ قەیرانە پیچەک سڤک دبیت سەرکەفتیێن سالا خواندنێ 2015- 2016 ژی بھێنە دامەزراندن و یێن ل دووڤ را ژی سال بۆ سالێ بھێنە دامەزراندن.
نيشاندان