ئه‌ڤرۆ:

بودجه‌یا سالا نوو یا به‌رهه‌ڤه‌ و تنێ پێداچوون دێ بۆ هێته‌ كرن و پێدڤیه‌ به‌ری ده‌ستپێكرنا بێهنڤه‌دانا جڤاتا نوونه‌رێن ئیراقێ بهێته‌ په‌سه‌ندكرن

بریكارێ پێشتر یێ وه‌زاره‌تا دارایی ل ئیراقێ ڕاگه‌هاند، پرۆژه‌ قانوونا بودجه‌یا گشتی یا ئیراقێ یا به‌رهه‌ڤه‌ و تنێ پێداچوون دێ بۆ هێته‌ كرن و دشیاندایه‌ به‌ری د ده‌مه‌كێ زوو دا ئانكو به‌ری ده‌ستپێكرنا بێهنڤه‌دانا جڤاتا نوونه‌ران بهێته‌ په‌سه‌ندكرن و یا گرنگه‌ هه‌رێما كوردستانێ و حوكمه‌تا ئیراقێ ژی ڕێككه‌فتنه‌كا نوو بكه‌ن، چونكه‌ وه‌زیرێ دارایی یێ نوو ل ئیراقێ گه‌له‌ك یێ قانوونی یه‌ و هه‌ر ڕێككه‌فتنه‌كا بهێته‌ ئه‌نجامدان دناڤ بودجه‌ی دا ئه‌و دێ بجهئینیت.

د. فازل نه‌بی دیاركر ژی” حوكمه‌تا ئیراقی یا پێشتر ب سه‌رۆكایه‌تیا مسته‌فا كازمی پرۆژه‌یێ قانوونا بودجه‌یا گشتی یا ئیراقێ به‌رهه‌ڤ كربوو و نوكه‌ بودجه‌ یا ئاماده‌یه‌ و تنێ پێداچوون دێ بۆ هێته‌ كرن و پێدڤیه‌ به‌ری ده‌ستپێكرنا بێهنڤه‌دانا جڤاتا نوونه‌رێن ئیراقێ ئه‌و پرۆژه‌ قانوونه‌ بهێته‌ په‌سه‌ندكرن. له‌وما د ده‌مه‌كێ كێم دا وه‌زاره‌تا دارایی ل ئیراقێ دشێت پێداچوونێ د پرۆژه‌یێ قانوونا بودجه‌یا گشتی ل ئیراقێ بكه‌ت و بهێته‌ هنارتن بۆ جڤاتا نوونه‌ران بۆ وێ چه‌ندێ بهێته‌ په‌سه‌ندكرن كو گۆژمێ بودجه‌یا گشتی 180 ترلیۆن دینارن، به‌لێ یا دیار نینه‌ كا حوكمه‌تا نوو ب سه‌رۆكایه‌تیا محه‌مه‌د شیاع سودانی دێ هه‌مان گۆژمێ پاره‌ی د بودجه‌ی دا دیاركه‌ت، یان دێ گوهۆڕین ب سه‌ردا هێن”.

بریكارێ پێشتر یێ وه‌زاره‌تا دارایی ل ئیراقێ گوت ژی” هه‌مان ڕێككه‌فتنا به‌ری د ناڤبه‌را هه‌رێما كوردستانێ و به‌غدا د ناڤ بودجه‌ی دا یا هه‌ی و ڕاسته‌ ژ ئه‌گه‌رێ زێده‌بوونا بودجه‌ی دێ پشكا هه‌رێما كوردستانێ هێته‌ زێده‌كرن، به‌لێ یا باشتره‌ ڕێككه‌فتنه‌كا نوو بهێته‌ كرن و شاندێ هه‌رێما كوردستانێ بچیته‌ به‌غدا و ڕێككه‌فتنێ بكه‌ن، چونكه‌ ڕێككه‌فتنا پێشتر د به‌رژه‌وه‌ندیا كوردان دا نینه‌، له‌وما یا گرنگه‌ كورد هه‌ر ژ نوكه‌ خه‌ما خوه‌ بخوه‌ن و لسه‌ر هوورده‌كاریێن بودجه‌ی دانوستاندن ل گه‌ل حوكمه‌تا به‌غدا بهێنه‌ كرن”.

به‌رچاڤكر ژی” وه‌زیرێ دارایی یێ نوو ل ئیراقێ 10 سالان ل ده‌ف من كاركریه‌ و كه‌سه‌كێ باشه‌ و گه‌له‌ك یێ پێگیره‌ ب قانوونێ، له‌وما هه‌ر ڕێككه‌فتنه‌ك دناڤ بودجه‌ی دا د ناڤبه‌را هه‌رێما كوردستانێ و به‌غدا بهێته‌ كرن، ئه‌و دێ بجهئینیت، چونكه‌ ئه‌و قانوونێ بجه دئینیت”.

هه‌ولێر، قائید میرۆ

په‌رله‌مانتاره‌كێ فڕاكسیۆنا پارتی دیموكراتی كوردستان ل جڤاتا نوونه‌رێن ئیراقێ ئاشكراكر، مه‌ترسیێن مه‌زن لسه‌ر وه‌لاتیێن ئیراقێ و هه‌رێما كوردستانێ یێن هه‌ین و به‌رده‌وام ژئالیێ وه‌لاتێن ده‌وروبه‌ر گه‌ف و مه‌ترسی یێن هه‌ین، له‌وڕا مه‌ سه‌رۆكایه‌تیا جڤاتا نوونه‌رێن ئیراقێ نه‌چاركریه‌ ڕۆژا سێشه‌مبی كۆمبوونه‌كا تایبه‌ت لدۆر مه‌ترسیێن سه‌ر ئاخا ئیراقێ بهێته‌ گرێدان و دبێژیت، پێدڤیه‌ بڕیارێن پێدڤی ژی بهێنه‌ ده‌ركرن.

سیپان شێروانی، ئه‌ندامێ جڤاتا نوونه‌رێن ئیراقێ ژ فڕاكسیۆنا پارتی بۆ ڕۆژنامه‌یا (ئه‌ڤرۆ) كوت” مه‌ وه‌كی په‌رله‌مانتارێن كورد و بتایبه‌تی په‌رله‌مانتارێن فڕاكسیۆنا پارتی ڕێگری ل كارنامه‌یا كۆمبوونا جڤاتا نوونه‌رێن ئیراقێ كر، چونكه‌ به‌رده‌وام مه‌ترسی و گه‌ف لسه‌ر سه‌روه‌ریا ئاخا ئیراقێ و هه‌رێما كوردستانی یا هه‌ی و جڤاتا نوونه‌ران یا به‌رهه‌ڤ نه‌بوو ڤان مه‌ترسیێن مه‌زن باس بكه‌ت، ڕۆژانه‌ وه‌لاتێن ده‌وروبه‌ر ئاخا هه‌رێما كوردستانێ دكه‌نه‌ ئارمانج، هه‌تا نوكه‌ جڤاتا نوونه‌ران و حوكمه‌تا ئیراقێ چو هه‌لویستێن ڕژد نه‌بووینه‌ لسه‌ر ڤان گه‌فێن لسه‌ر هه‌رێما كوردستانێ، چونكه‌ گه‌ف و مه‌ترسیێن لسه‌ر وه‌لاتیێن ئیراقێ و هه‌رێما كوردستانێ ژ هه‌موو بابه‌تێن دی گرنگتره‌، و پێدڤیه‌ جڤاتا نوونه‌رێن ئیراقێ دڤێت هه‌لویست هه‌بیت و كار لسه‌ر بكه‌ت، له‌وڕا ئه‌م نه‌چاربووینه‌ گڤاشتنان بكه‌ینه‌ سه‌ر جڤاتا نوونه‌ران و مه‌ په‌یاما خوه‌ گه‌هانده‌ ده‌سته‌یا سه‌رۆكایه‌تیا جڤاتا نوونه‌ران و بڕیاره‌ ئێك ژ مژارێن كۆمبوونا ڕۆژا سێشه‌مبی دانوستاندن بیت لسه‌ر بابه‌تێ تۆپبارانكرنا ئاخا ئیراقێ كو دڤێت بڕیارێن پێدڤی ژی ل دۆر ڤی بابه‌تی  بهێنه‌ ده‌ركرن”.

سیپان شێروانی ئاماژه‌كر” ڕۆژا سێشه‌مبی دێ كۆمبوونا جڤاتا نوونه‌رێن ئیراقێ یا تایبه‌ت بیت ب گه‌ف و مه‌ترسیێن ئیرانێ و توركیا لسه‌ر خه‌لكێ هه‌رێما كوردستانێ، چونكه‌ ژ زاخۆ هه‌تا به‌سرا ئه‌ركێ حوكمه‌تا ئیراقێ یه‌ ب گۆره‌ی دستوورێ به‌رگریێ ژ ئاخ و خه‌لكێ خوه‌ بكه‌ت و سه‌روه‌ریا ئیراقێ یا پاراستی بیت ژهه‌ر گه‌ف و مه‌ترسیه‌كا ده‌ره‌كی، ئانكو قۆناغا ئێكێ تنێ ئه‌م دخوازین مه‌ترسی نه‌مینن، به‌لێ بێگومان قۆناغێن ددوڤدا دێ كار لسه‌ر قه‌ره‌بووكرنا وان كه‌سان بیت یێن ژبه‌ر هێرش و گه‌فێن وه‌لاتێن ده‌وروبه‌ر زیان گه‌هشتینی، ئه‌ڤجا ئه‌و زیانه‌ چ گیانی بن یان ژی زیانێن مادی بن، مافه‌كێ قانوونی و دستووریێ وه‌لاتیانه‌ بهێنه‌ قه‌ره‌بووكرن ژهه‌ر زیانه‌كا هه‌بیت لسه‌رده‌ستێ ده‌ره‌كی، ئه‌م دبینین سالانه‌ خه‌لكێ مه‌ ل هه‌رێما كوردستانێ دبیته‌ قوربانی و زیانێن مادی ژی هه‌ر ناهێنه‌ هه‌ژمارتن ئه‌وژی ژبه‌ر هێرشێن توركیا و ئیرانێ، مخابن هه‌تا نوكه‌ مه‌ترسی لسه‌ر ده‌ڤه‌رێن سنوری بوو  به‌لێ نوكه‌ مه‌ترسی لسه‌ر هه‌موو ده‌ڤه‌ران یا هه‌ی”.

ئه‌ڤرۆ:

ئه‌ندامێ ده‌سته‌یا كارگێری یا مه‌كته‌با سیاسی پارتی دیموكراتی كوردستان، هشیار زێباری ڕاگه‌هاند” په‌یاما ئێكه‌تیێ و حزبێن دی ژی یا ئه‌رێنی یه‌ و ئه‌م ژی ب ئه‌رێنی د هه‌لسه‌نگینین، ئه‌ڤه‌ ده‌لیڤه‌یه‌كا باش دروست دكه‌ت بۆ وێ چه‌ندێ بشێین دانوستاندنێن داهاتی د ڕژد بن”.

ل دۆر ئه‌نجامدانا هه‌لبژارتنێن په‌رله‌مانێ كوردستانێ، هشیار زێباری گوت” پارتی ل گه‌ل وێ چه‌ندێ بوو هه‌لبژارتنێن په‌رله‌مانێ كوردستانێ د ده‌مێ خوه‌ دا بهێنه‌ ئه‌نجامدان، چونكه‌ پێگه‌هێ هه‌رێما كوردستانێ دا بهێزتر بیت و دا پارتی ده‌نگێن زێده‌تر بده‌ستڤه‌ئینیت، به‌لێ ماده‌م ژیێ په‌رله‌مانی هاته‌ درێژكرن، پێدڤیه‌ بزاڤێ بكه‌ین قانوونه‌كا نوو بۆ هه‌لبژارتنان ده‌ربكه‌ین، د ڕاستیدا وێ چه‌ندێ پرۆسه‌یا هه‌لبژارتنان پاشخست، هه‌كه‌ نه‌ مه‌ دشیا ئه‌نجام بده‌ین، ل گه‌ل وێ چه‌ندێ ژی هه‌لبژارتنێن داهاتی یێن هه‌رێما كوردستانێ د چاره‌نڤیسسازن”.

هه‌روه‌سا گوت” پارتی دگه‌ل وێ چه‌ندێ دایه‌ دانوستاندن ل گه‌ل ئالیێن كوردستانی هه‌بیت، بتایبه‌تی ئێكه‌تی نیشتمانی كوردستان  و حزبێن كوردستانی یێن دی ژی، ژ به‌ر كو سه‌قایه‌كێ باش نینه‌ ل كوردستانێ، كێشه‌ یێن هه‌ین و هێرشێن میدیایی دژی هه‌ڤدو یێن هه‌ین و ئه‌و سه‌قایه‌ یێ ساخله‌م نینه‌، هه‌م بۆ حوكمڕانیێ و هه‌م بۆ به‌رژه‌وه‌ندیا هه‌موو ئالیێن كوردستانی، دڤێت هزره‌كێ بكه‌ین چاوان كێشه‌یان چاره‌سه‌ر بكه‌ین كو ئه‌وژی دێ ب دانوستاندنێ بیت، په‌یاما پارتی ئه‌ڤه‌یه‌، ئانكو ئه‌م ئالیێ دروستكه‌رێ ئالۆزیان نینین، هه‌كه‌ كێشه‌ د ناڤبه‌را حزبان دا هه‌یه‌ وه‌رن دا لسه‌ر باخڤین، هه‌كه‌ كێشه‌ د حكومڕانیێ دا هه‌یه‌، هه‌موو ئالی د حكومڕانیێ دا د پشكدارن و دا د ناڤبه‌را خوه‌ دا چاره‌سه‌ر بكه‌ین”.

هشیار زێباری ڕۆهنكر ژی” د ڕۆژانێن كۆنفرانسێ زانكۆیا ئه‌مریكی ل دهۆكێ ژی ئه‌ڤ مژاره‌ هاته‌ باسكرن، هنده‌ك ژ نوونه‌ران كو نوونه‌راتیا بۆچوونا ئێكه‌تیێ و پارتی دكر و نوونه‌رێن حزبێن دی پشكداربوون، پێداگیریه‌كا مه‌زن ل سه‌ر وێ چه‌ندێ یا هه‌ی كو دڤێت ئه‌م ناڤمالا خوه‌ ڕێكبێخین، دبیت ڕێككه‌فتنا 100% نه‌بیت، به‌لێ ب كێمی بشێین پێكڤه‌ كار بكه‌ین، ژبه‌ركو  ڕێگریێن زۆر ل ده‌وروبه‌رێن مه‌ و ل جیهانێ یێن هه‌ین، ڤێ چه‌ندێ ژی دێ كاریگه‌ریا خوه‌ لسه‌ر هه‌رێما كوردستانێ و پاشه‌ڕۆژا وێ هه‌رێمێ هه‌بیت له‌وما پێدڤیه‌ ئه‌م خوه‌ به‌رهه‌ڤ بكه‌ین”.

سه‌باره‌ت حوكمه‌تا نوو یا ئیراقێ، هشیار زێباری گوت” ئه‌ڤه‌ حوكمه‌ته‌كا نوویه‌ و وه‌كو هاتیه‌ گوتن ب نشته‌رگه‌ریێ یا ژدایكبووی، دڤێت ده‌لیڤه‌ بۆ بهێته‌ دان بۆ وێ ئێكێ بزاڤێ بكه‌ت خوه‌ بسه‌لمینیت، ئه‌ڤجا 100 ڕۆژن، چار هه‌یڤن، شه‌ش هه‌یڤین.  وه‌كو ئالیێن سیاسی ڕێككه‌فتنه‌كا سیاسی یا هاتیه‌ ئیمزاكرن بۆ دامه‌زراندنا وێ حوكمه‌تێ، ئانكو ئه‌م ئالیه‌كین د دامه‌زراندنا وێ حوكمه‌تێ دا ل دووڤ وێ ڕێككه‌فتنا سیاسی و ده‌م بۆ هاتیه‌ دیاركرن، بۆ نموونه‌ ئه‌و كێشه‌ دڤێت د چ ده‌مه‌كی دا بهێته‌ چاره‌سه‌ركرن و ئه‌ڤ قانوونه‌ چه‌ند ده‌م بۆ دڤێت، ئه‌ڤه‌ دێ بیته‌ نموونه‌ بۆ پێگیریێ ب بجهئینانێ. سۆزێن به‌ری نوكه‌ نه‌هاتینه‌ بجهئینان به‌لێ ڤێجارێ جوداهی ل گه‌ل جارێن دی یا هه‌ی و جوداهی ئه‌وه‌ كو وان پێدڤی یا ب مه‌ هه‌ی، بێی كورد و سوننه‌ ئه‌ڤ حوكمه‌ته‌ بڕێڤه‌ناچیت.

ئه‌ڤرۆ:

وه‌زیرێ به‌رگیریێ یێ توركیا پشتی ئێرشێن ڤێ‌ دووماهیێ‌ راگه‌هاند كو ئێرشێن وان ل باكورێ سووریێ و ده‌ڤه‌رێن سنۆری یێن هه‌رێما كوردستانێ ل دژی په‌كه‌كێ دێ به‌رده‌وام بن و ئه‌و ناهێلن چو هێزه‌ك زیانێ بگه‌هینته‌ توركیا.

هولوسی ئاكار وه‌زیرێ به‌رگیریێ یێ توركیا بۆ ده‌زگه‌هێن راگه‌هاندنا وی وه‌لاتی دیار كر كو وان ل باكورێ سووریێ‌ و ده‌ڤه‌رێن سنۆری یێن هه‌رێما كوردستانێ ئێرشی بنگه‌هێن په‌كه‌كێ و یه‌په‌گێ كرینه‌ و د ئه‌نجاما ئێرشێن ئه‌سمانی دا گه‌له‌ك ئارمانجێن وان دیار كربوون هاتینه‌ ژناڤبرن و گۆت: (مه‌ به‌ری نها ژی گه‌له‌ك جاران ئێرشێ وان بنگه‌هان كرینه‌ و دێ ئێرشێن مه‌ د به‌رده‌وام بن، چونكی هه‌ر هێزه‌ك بڤێت ئاریشان بۆ توركیا دروست بكه‌ت ئه‌م دێ وان ژناڤ به‌ین).

ل ئالیێ دی مه‌زلوم عه‌بدی فه‌رماندارێ گشتی یێ هێزێن سووریا دیموكرات ژی راگه‌هاند كو وان به‌ری نها گه‌له‌ك جاران دیار كرینه‌ كو ب شه‌ری چو پرسه‌ك ناهێته‌ چاره‌سه‌ركرن، ئه‌و ده‌ڤه‌رێن كو توركیا دبێژیت بووینه‌ مه‌ترسی ل سه‌ر ئاسایشا وێ هه‌ر ئه‌و ده‌ڤه‌رن كو نها بووینه‌ جهه‌كێ ئارام بۆ هه‌موو پێكهاتێن كو ل سووریێ پێكڤه‌ دژین، توركیا بخوه‌ د ناڤ قه‌یرانه‌كا مه‌زن دایه‌ و دڤێت ب ئێرشێن وه‌سا هنده‌ك تشتان ژ بیرا خه‌لكی ببه‌ت، ژ به‌ر هندێ ژی ئه‌م داخواز ژ ئه‌مریكا و هه‌موو وه‌لاتێن هه‌ڤپه‌یمان یێن شه‌رێ ل دژی داعشێ دكه‌ین كو رێ نه‌ده‌ن توركیا ئێرشی خه‌لكێ سڤیل ل رۆژئاڤایێ كوردستانێ بكه‌ت و گۆت: (د ئه‌نجاما ئێرشێن توركیا دا زیان گه‌هشتینه‌ وه‌لاتیێن سڤیل ژی، ژ به‌ر هندێ دڤێت رێگری ل ئێرشێن توركیا بهێته‌ كرن، دڤێت سنۆره‌ك بۆ ئێرشێن ئه‌سمانی یێن له‌شكرێ توركیا بهێته‌ دانان، چونكی چه‌ندین سالن توركیا ئێرشی مه‌ و گه‌لێ كورد دكه‌ت و هه‌تا نها ژی توركیا نه‌شیایه‌ ب ئێرشێن سه‌ربازی چو پرسه‌كێ چاره‌سه‌ر بكه‌ت).

ل دۆر ئێرشێن توركیا ناڤه‌ندا چاڤدێریا مافێن مرۆڤی یا سووریێ ژی راگه‌هاند كو د ئه‌نجاما ئێرشێن فرۆكێن شه‌ری یێن توركیا بۆ سه‌ر هنده‌ك ده‌ڤه‌ران ل باكورێ سووریێ و رۆژئاڤایێ كوردستانێ دا شه‌ش شه‌رڤانێن هێزێن سووریا دیموكرات و نه‌ه سه‌ربازێن سووریێ جانێ خوه‌ ژ ده‌ست داینه‌ و گه‌له‌ك كه‌س ژی بریندار بووینه‌ و د ناڤ برینداران دا هنده‌ك خه‌لكێ سڤیل ژی هه‌نه‌ و زیانێن مه‌زن گه‌هشتینه‌ جهێن سڤیل.

هه‌مان ناڤه‌ندێ ئه‌و یه‌ك ژی دیار كریه‌ كو توركیا ئێرشی ده‌ڤه‌ره‌كا به‌رفره‌ه ل باكورێ سووریێ كریه‌ و ل ره‌ققه‌ ژی ئێرشی هنده‌ك بنگه‌هێن سه‌ربازی یێن هێزێن سووریا دیموكرات هاتیه‌ كرن، د ئه‌نجاما ئێرشان دا هه‌تا نها ٣٠ كه‌س ژی بریندارن كو د ناڤ برینداران دا گه‌له‌ك كه‌سێن سڤیل ژی هه‌نه‌.

ناڤه‌ندا فه‌رمانداریا هێزێن سووریا دیموكرات ژی راگه‌هاند كو ئه‌و پێشبینی دكه‌ن دێ ئێرشێن توركیا د به‌رده‌وام بن، ژ به‌ر هندێ ژی دڤێت ئه‌مریكا و وه‌لاتێن ئێكه‌تیا ئۆرۆپا رێگریێ ل ئێرشێن توركیا بكه‌ن، چونكی ئێرشێن توركیا دێ بیته‌ ئه‌گه‌رێ هندێ كو جاره‌كا دی داعش خوه‌ ب رێكخستن بكه‌ت و هه‌ر ئالۆزیه‌ك ژی ل باكورێ سووریێ و رۆژئاڤایێ كوردستانێ روو بده‌ت دێ كارتێكرنا خوه‌ ل هه‌موو سووریێ و هه‌تا وه‌لاتێن دی یێن رۆژهه‌لاتا ناڤین ژی كه‌ت، چونكی ئاشكرایه‌ هه‌كه‌ داعش بهێز كه‌ڤیت دێ جاره‌كا دی ده‌ست ب كریارێن خوه‌ یێن تیرۆرستی ل هه‌موو جیهانێ كه‌ت، ژ به‌ر هندێ ژی نها ئه‌ركێ هه‌موو وه‌لاتانه‌ كو رێگریێ ل ئێرشێن توركیا بكه‌ن.

دهۆك، نه‌وزاد هلۆری:

ئه‌ندامه‌كا كۆنگره‌یێ‌ 14 یێ پارتی دیموكراتی كوردستان ڕاگه‌هاند، د كۆنگره‌یێ‌ 14ێ‌ پارتی دا ڕێژه‌یا پشكداریا ئافره‌تان د پرۆسه‌یا ده‌نگدانێ‌ یا تایبه‌ت ب هه‌لبژارتنا  كومێتا ناڤه‌ندی یا نوو ژی دا ب رێژه‌یه‌كا به‌رچاڤ هه‌مبه‌ر كۆنگره‌یێن به‌رێ‌ زێده‌بویه‌، ئه‌ڤ چه‌ندێ ژی دێ‌ ڕه‌نگڤه‌دانه‌كا هه‌ری باش د پێشڤه‌برنا ئافره‌تان دا د پرۆسه‌یا سیاسی دا كه‌ت.

جوان رۆژبه‌یانی، ئه‌نداما كۆنگره‌یێ‌ 14ێ‌ یێ پارتی دیموكراتی ل كوردستان گوت” پێگه‌هێ‌ پارتی و بهێزبوونا وێ‌ دڤی ده‌می دا پێدڤیه‌كا هه‌ری گرنگه‌ بۆ پاراستنا قه‌وارێ‌ هه‌رێما كوردستانێ‌ و ده‌ستكه‌فتنێن وێ‌”.

ئاماژه‌كر ژی”ژبه‌ر چه‌ندین ئاریشه‌یێن هه‌رێمی و نێڤده‌وله‌تی و شه‌ڕ و ئالۆزی و قه‌یرانێن كو ب سه‌ر جیهانێ و ئیراقێ و هه‌رێما كوردستانێ‌ دا هاتین، پارتی نه‌شیا دده‌مێ خوه‌ دا كۆنگره‌ی بگێریت، به‌لێ‌ سوپاس بۆ خودێ‌ جاره‌كا دی پارتی كۆنگره‌یێ‌ خوه‌ ئه‌نجام دا ڤه‌ و سوپاسیا هه‌موو ئه‌ندامێن كۆنگره‌ی دكه‌ین وهیڤی دكه‌ین كۆنگره‌ ژ هه‌موو ئالیه‌كی ڤه‌ یێ سه‌ركه‌فتی بیت”.

زێده‌تر گۆت” د ڤی كۆنگره‌ی دا  چه‌ندین گوهۆڕین ل په‌یكه‌ر و سیاسه‌تا پارتی دیموكراتی كوردستان دا هاتینه‌كرن كو د به‌رژوه‌ندییا پارتی و گه‌لێ‌ كوردستانێ‌ دایه‌، ئێك ژ وان گوهۆڕینان بلندگرنا ڕێژه‌یا پشكداریا ئافره‌تایه‌ بۆ ڕێژه‌یا 15% كو ئه‌ڤ چه‌نده‌ ژی گاڤه‌گا باشه‌ و دێ‌ خزمه‌ته‌كا باشتر بۆ ڕه‌وشا ئافره‌تان كه‌ت ب تایبه‌ت پشكداریا ئافره‌تێ د كارێ‌ سیاسی دا ل هه‌رێما كوردستانێ‌، هه‌روه‌سا د كۆنگره‌ی دا ئه‌ندام و سه‌ركرده‌یێن باش و نایاب دێ هێنه‌ دیاركرن كو ب شێوه‌یه‌كێ‌ باشتر و ڕێكخستی كار بكه‌ن”.

جوانێ دیاركر ژی كو ده‌نگدان ل سه‌ر هه‌لبژارتنا ئه‌ندامێن كومێته‌یا ناڤه‌ندی یا پارتی بشێوه‌یه‌كێ سه‌ركه‌فتی هاته‌ ئه‌نجامدان  وپارتی دیتنه‌كا به‌رفرهه‌ بۆ هه‌موو سكته‌رێن سیاسی یا هه‌ی و ڤه‌خواندنه‌كا باشتر بۆ ڕه‌وشا سیاسی لسه‌ر ئاستێ‌ كوردستانێ و جیهانێ‌ یا هه‌ی، له‌وما بهێزبونا پێگه‌هێ‌ پارتی ئانكو پاراستنا قه‌وارێ‌ هه‌رێما كوردستانێ‌ و ده‌ستكه‌فتنێن وێ‌”.