ئەڤرۆ نیوز،باسم قاسم
ئەڤرۆ شه‌مبيێ 27/1/2017 ، ل گوندێ سکێنیی سەر ب کۆمه‌لگەها سیباشێخدرێ ل قەزا شنگالێ خانیەك پەقی و دو گەنچ بوونه قووربانی.
ژیده‌رەکی ژ شنگالێ بۆئەڤرۆنيوزگۆت”ئەڤه نە بتنێ جارە ئێکێ یە بەلکو ئەڤ حالەت یێن بەردوامن ل قەزا شنگالێ ب تایبەتێ د وان گوندێن دبن دەستهەلاتا حەشدا شەعبی دا ل شنگالێ، ئەڤرۆ ژی د گوندێ سکێنیێ سەر ب کۆمه‌لگەها سیباشێخدرێ ڤە خانیەك پەقی و دو گەنچ بوونە قوربانی”.
ئه‌ڤرۆنيوز:
پشتى ليستێن هه‌ردو وه‌زاره‌تێن په‌روه‌ردێ وساخله‌ميێ هاتينه هنارتن بۆ به‌غدا، ليسته‌كا دى ژى هاته هنارتن بۆ به‌غدا ب مه‌ره‌ما مه‌زاختنا مووچێن وان ژلايێ حوكمه‌تا عيراقێ ڤه.
فوئاد عوسمان په‌يڤدارێ وه‌زاره‌تا كاروبارێن شه‌هيدان وئه‌نفالكريان ل هه‌رێما كوردستانێ ئه‌ڤرۆ شه‌مبيێ 27/1/2018، راگه‌هاند” وه‌زيرێ كاروبارێن شه‌هيدان وئه‌نفالكريان گه‌ل كۆمه‌لا زيندانيێن سياسى كۆمبوويه وبۆ وان دياركر كو ب رێيا جڤاتا وه‌زيرێن هه‌رێمێ داخوازه‌ك پێشكێشى جڤاتا وه‌زيرێن عيراقێ وجڤاتا نوونه‌ران كريه بۆ وێ چه‌ندێ مادێ 132 ژ دستوورێ عيراقێ وقانوونا هژمار 4 يا جڤاتا نوونه‌ران بهێنه بجهئينان”.
فوئادى زيده‌تر بۆ دوارۆژ گۆت” بجهئينانا وێ قانوونێ دێ مووچه وئيمتيازاتێن زيندانيێن سياسى وكه‌سوكارێن شه‌هيدان وه‌كو به‌غدا لێ هێن”.
گۆت ژى” ليستا مووچێن زيندانيێن سياسى يا هاتيه هنارتن بۆ به‌غدا ونوكه ژى ليستا مووچێن كه‌سوكارێن شه‌هيدان يا دهێته به‌هه‌ڤكرن كو ئه‌وژى بهێته هنارتن بۆ به‌غدا ومووچه وئيمتيازاتێن زيندانيێن سياسى وكه‌سوكارێن شه‌هيدان وه‌كو يێن به‌غدا لێ بهێن”.
ئه‌ڤرۆنيوز:
سه‌رۆكێ جڤاتا پارێزگه‌ها نه‌ينه‌وا، بشاركيكى، داخوازا پاشخستنا هه‌لبژارتنێن جڤاتا نوونه‌رێن عيراقێ وجڤاتێن پاريزگه‌هان ل نه‌ينه‌وا كر وئاماژه ب پێدڤيا نه‌ينه‌وا ب پلانه‌كا رۆهن بۆ ڤه‌گه‌راندا ئاواران كر وداخواز ژ جڤاكێ نيڤده‌وله‌تى كر كو فشارێ ل سه‌ر حوكمه‌تا ناڤه‌ندى بكه‌ت بۆ مه‌زاختنا شايستێن پارێزگه‌ها نه‌ينه‌وا يێن سێ سالێن بۆرى.
نڤيسينگه‌ها راگه‌هاندنێ يا سه‌رۆكێ جڤاتا پارێزگه‌ها نه‌ينه‌وا دبه‌ياننامه‌كێ دا به‌لاڤكر” بشار كيكى سه‌رۆكێ جڤاتا پارێزگه‌ها نه‌ينه‌وا پێشوازى ل باليۆزێ بريتانيا ل عيراقێ جۆن ويكلس كر وبه‌حسێ چه‌ندين باده‌كان هاته كرن ژوان ژى ڤه‌كرنا كونسۆلخانا بريتانى ل مووسلێ وباليۆزێ بريتانى تيمه‌كا تايبه‌تمه‌ندان ژ شيره‌تكارێن ئابوورى وئه‌منى وكاروبارێن هه‌لبژارتنان ومافێن مرۆڤى وهژماره‌كا شاره‌زايێن دى دبوارێن جودا جودا بۆ دانوستاندنێ ل گه‌ل حوكمه‌تا خوه‌جهى يا نه‌ينه‌وا ل دۆر ڤه‌گه‌راندنا سه‌قامگيريێ وئاڤه‌دانكرنێ ل وێ پارێزگه‌هێ”.
ل دووڤ وێ به‌ياننامى، كيكى داخواز ژ باليۆزێ بريتانيا كر كونسۆلخانه‌كا بريتانى ل نه‌ينه‌وا بهێته ڤه‌كرن وهاريكاريا حوكمه‌ت وگه‌لێ بريتانيا يا له‌شكرى ومرۆڤايه‌تى بۆ عيراقێ بلند نرخاند”.
كيكى دياكركو” پێدڤيه هه‌لبژارتن ل نه‌ينه‌وا بهێنه پاشخستن ژبه‌ر چه‌ندين ئه‌گه‌ران ژوان هه‌تا نوكه گره‌نتيێن دروست نينن بۆ ده‌نگدانا ده‌نگده‌ران ل پارێزگه‌ها نه‌ينه‌وا وئه‌و پارێزگه‌هه يا پێدڤى ب سه‌قامگيريا جڤاكى دناڤبه‌را پێكهاتێن وێ دا وپێدڤيا كريارى بۆ رێنماكرنا وه‌لاتيان بۆ پشكداريێ دهه‌لبژارتنان دا تاكو ئه‌نجام ده‌ربرينێ ژ بۆچوونا جادێ بكه‌ن”.
سه‌رۆكێ جڤاتا پاريزگه‌ها نه‌ينه‌وا ئاماژه ب پێدڤيا پارێزگه‌ها ناڤبرى ب پلانه‌كا رۆهن بۆ ڤه‌گه‌راندنا ئاواران كر ل دووڤ خشته‌كى وب گره‌نتيێن خزمه‌تگوزارى وئه‌منى وكارگێرى.
ل دۆر په‌يوه‌نديێ ل گه‌ل به‌غدا، سه‌رۆكێ جڤاتا پاريزگه‌ها نه‌ينه‌وا دياركر” پارێزگه‌ها نه‌ينه‌وا يا تووشى پشت گوه هاڤێتني بووى دبابه‌تێ سندوقا ئاڤه‌دانكرنا ده‌ڤه‌رێن زياندار ژ شه‌رێ دژى داعشێ” ديسا ناڤبرى پێگيريا پارێزگه‌هێ ب دستوورى وب پرسا ڤه‌گۆهاستنا ده‌ستهه‌لاتان ژ ناڤه‌ندێ بۆ حوكمه‌تێن خوجهى به‌رچاڤكر.
بشار كيكى داخوازكر ژى كو” پێدڤيه فشارا نێڤده‌وله‌تى ل سه‌ر حوكمه‌تا ناڤه‌ندى بهێته كاراكرن ژبۆ مه‌زاختنا شايستێن نه‌ينه‌وا ژ بودجا گشتى يا سێ سالێن بۆرى وزياندار بهێنه قه‌ره‌بووكرن وئه‌ڤ چه‌نده ژ كارێن فه‌ر يێن وه‌لاتێن پاره به‌خش بيت”.
ئه‌ڤرۆنيوز:
ياريكه‌ره‌كێ به‌رنياس يێ يانا به‌رشه‌لونا چو ناڤ رێزێن يانه‌كا چينى پشتى بۆ ده‌مێ چه‌ندين سالان يارى دناڤ رێزێن به‌رشه‌لونا دا كرى.
ياريكه‌رێ ئه‌رجه‌نتينى خافيێر ماسكيرانۆ، ل دووڤ مالپه‌رێ كوره، گرێبه‌ست ل گه‌ل يانا هيبى تشاينا يا چينى گرێدايه ونوكه ب فه‌رمى ياريكه‌رێ وێ يانا چينى يه.
ماسكيرانۆى به‌رى ئه‌نجامدانا يانا به‌رشه‌لونا وئيسپانيۆل دجاما شاهێ ئيسپانيا دا ل هه‌فتيا بۆرى، خاترا خوه ژ يانا به‌رشه‌لونا و ياريكه‌رێن وجه‌ماوه‌رێ وى دناڤ ياريگه‌ها نوكامب دا خواست، ياريكه‌رێن به‌رشه‌لونا ژى جلكێن ب رسته‌يا ( سوپاس ماسكيرانۆ) ل سه‌ر نڤيسى ل به‌رخوه كربوون.
ئه‌و ياريكه‌رێ ژيێ وى 34 سال، ل سالا 2010 ژ يانا لێڤه‌رپول يا ئيينگليزى هاتبوو رێزێن به‌رشه‌لونا و334 يارى بۆ كرينه ودگه‌ل وێ يانێ 18 ناسناڤ بده‌ستڤه‌ئيناينه.
ئه‌ڤرۆنيوز:
رۆژنامه‌كا سعودى ژزارده‌ڤێ ژێده‌رێن عيراقى، به‌لاڤكر كو سه‌رۆك وه‌زيرێن عيراقێ وفه‌رماندێ گشتيێ هێزێن چه‌كدار حه‌يده‌ر عه‌بادى دێ ل نێزيك بريارێن له‌شكرى يێن گرنگ ده‌ت.
رۆژناما عوكاز يا سعودى به‌لاڤكر ژى كو وان ژێده‌ران هووربينيێن وان برياران ديارنه‌كرن وئاماژه ب پێرابوونێن عه‌بادى كر كو بزاڤێ دكه‌ت چه‌ك تنێ دده‌ستێ ده‌وله‌تێ دابيت وگرۆپێن چه‌كدار يێن شيعى ئه‌وێن شه‌رێ داعشێ كرى نه‌هێليت.
رۆژناما سعودى ئاماژه ب ئاخڤتنێن عه‌بادى ل دۆر حه‌شدا شه‌عبى كر ده‌مێ ل رۆژا سێشه‌مبيا بۆرى پێشوازى ل شانده‌كێ رۆژنامه‌ڤانێن كوێتى كرى وگۆتى” په‌سه‌ندكرنا قانوونا حه‌شدا شه‌عبى دێ رێ ده‌ته ده‌وله‌تێ كۆنترۆلێ ل سه‌ر گرۆپێن چه‌كدار ل به‌غدا بكه‌ت وبێخيته دبن قانوونێن حكومى وله‌شكرى”.
ل دووڤ رۆژناما عوكاز، عه‌بادى ئاشكراكر ژى كو حوكمه‌تا وى ل ده‌مێ بۆرى ژبه‌ر گه‌فێن داعشێ نه‌دخواست چه‌كى ڤه‌كێشيت وتنێ دده‌ستێ ده‌وله‌تێ دا بيت، به‌لێ نوكه خواسته‌كا راست ژلايێ هه‌موو ليستێن سياسى ڤه هه‌ى بۆ ڤه‌كێشانا چه‌كى” عه‌بادى ديسا گۆت” ئه‌و ده‌ڤه‌رێن پێكهاتێ شيعى كو پتريا حه‌شدا شه‌عبى ژوان ده‌ڤه‌رانه پتر حه‌زدكه‌ن چه‌ك دده‌ستێ ده‌وله‌تێ دا بيت”.
دياركر ژى كو هنده‌ك دخوازن له‌ز دهه‌لوه‌شاندنا حه‌شدا شه‌عبى دا بهێته كرن، به‌لێ ئه‌و دخوازيت چاره‌سه‌ريه‌كا جۆره‌يى بهێته ديتن ب رێيا تێكهه‌لكرنا حه‌شدا شه‌عبى ل گه‌ل سيسته‌مێ ئه‌منى.
ئه‌ڤرۆنيوز:
كۆمسيۆنا بلند يا هه‌لبژارتنان ل عيراقێ داخواز ژ هه‌موو وه‌لاتيێن عيراقى كر يێن مافێ ده‌نگدانێ دهه‌لبژارتنان دا هه‌ى و ل ده‌رڤه‌ى وه‌لاتى دئاكنجينه، فۆرمه‌كا ئه‌لكترۆنى يا تايبه‌ت ب تۆماركرنا ده‌نگده‌ران ل ده‌رڤه‌ى عيراقێ داگرن، به‌رۆڤاژى نه‌شين ده‌نگێ خوه بده‌ن.
ئه‌ڤرۆنيوز:
رۆژناما (القدس العربي) ئاشكراكر كو فه‌رمانده‌كێ گشتيێ حه‌شدا شه‌عبى ل به‌ره ل گه‌ل بزاڤا گۆران وكۆمه‌لا ئيسلامى كوردستان هه‌ڤپه‌يمانيێ گرێده‌ت.
رۆژناما ناڤبرى به‌لاڤكر، هادى عامرى سه‌رۆكێ ريكخراوا به‌در وفه‌رماندێ گشتيێ حه‌شدا شه‌عبى بزاڤێن خوه خورتتر لێكرينه كو ژئه‌گه‌رێ ناكۆكيێن شيعه و سونه‌يان زورترين ده‌نگان بده‌ستڤه‌بينيت.
دياركر ژى كو ژبه‌ر ناكۆكيێن دناڤمالا شيعى دا ب تايبه‌تى دناڤبه‌را سه‌ركردێن حزبا ده‌عوه يا ئيسلامى وحه‌يده‌ر عه‌بادى سه‌رۆك وه‌زيرێن عيراقێ ونورى مالكى سه‌رۆكێ حزبا ده‌عوه وهه‌ڤپه‌يمانيا ده‌وله‌تا قانوونێ كو دێ ب دو ليستێن جودا پشكداريێ دهه‌لبژارتنان دا كه‌ن وعامرى خه‌ونا ب ده‌ستڤه‌ئينانا زورترين ده‌نگان يا هه‌ى.
سه‌ركرده‌كێ ده‌وله‌تا قانوونێ بۆ رۆژناما (القدس العربي) راگه‌هاند كو ده‌وله‌تا قانوونێ بزاڤێ دكه‌ت پشتى ئه‌نجامێن هه‌لبژارتنان، حوكمه‌تا زورينه پێكبينيت وبۆ ڤێ چه‌ندێ ژى چه‌ند لايه‌نه‌ك دياركرينه تاكو هه‌ڤپه‌يمانيێ ل گه‌ل بكه‌ت.
وى سه‌ركردێ ده‌وله‌تا قانوونێ ئه‌وژ ئاشكراكر” هه‌ڤپه‌يمانيا (فه‌تح) ب سه‌رۆكاتيا هادى عامرى ل به‌ره بۆ قه‌ره‌بووكرنا ده‌نگێن سونه‌يان، مفاى ژ كوردێن سلێمانيێ وه‌رگريت وهه‌ڤپه‌يمانيێ ل گه‌ل بزاڤا گۆران و كۆمه‌لا ئيسلامى بكه‌ت”.
ئه‌ڤرۆنيوز:
وه‌زاره‌تا ساخله‌ميێ ل هه‌رێما كوردستانێ راگه‌هاند، حوكمه‌تا عيراقێ ده‌ست ب هنارتنا پشكا ده‌رمانێن هه‌رێما كوردستانێ كر.
خالس قادر په‌يڤدارێ وه‌زاره‌تا ساخله‌ميێ ل هه‌رێما كوردستانێ گۆت” وه‌زاره‌تا ساخله‌ميا عيراقێ ل رۆژا پێنج شه‌مبى 25/1/2018 ده‌ست ب هنارتنا پشكا ده‌رمانێن هه‌رێما كوردستانێ كريه”.
قادر دداخۆيانيه‌كا رۆژنامه‌ڤانيدا زێده‌تر گۆت” پشكا هه‌رێما كوردستانێ ژده‌رمانان دێ 17% بيت وهنارتنا ده‌رمانان دێ ب چه‌ند قۆناغان بيت”.
دياركر ژى” رێژه وجۆرێ وان ده‌رمانێن ژلايێ به‌غدا ڤه دگه‌هنه هه‌رێمێ گه‌له‌ك دباشن وئه‌و رێژا دمينيت ژى دێ ب رێيا حوكمه‌تا هه‌رێمێ هێته دابينكرن”.
ئاشكراكر ژى” وه‌زاره‌تا ساخله‌ميا عيراقێ بريار دايه هه‌موو ئامير وپێدڤيێن ساخله‌ميێن هه‌ريمێ بۆ سالا 2018 دابين بكه‌ت”.
ئه‌ڤرۆ نيوز:
ته‌قينه‌كێ ده‌ڤه‌ره‌كا كابۆل يا پايته‌ختێ ئه‌ڤغانستانێ كره ئارمانج ل نێزيك بالوێزخانێن وه‌لاتێن بيانى و ئاڤاهيێن حوكمه‌تێ هه‌ر وه‌كو رۆیتەرز دايه دياركرن.
هه‌تا نوكه ژمارا قوربانيان و زيانێن وێ ته‌قينێ ئاشكه‌را نه‌بووينه، ئه‌و ته‌قين پشتى حه‌فتيه‌كێ يه ژ هێرشا خويناوى يا سه‌ر ئوتێله‌كا نێڤده‌وله‌تى ل كابۆل يا پايته‌ختێ ئه‌ڤغانستانێ.
ئەڤرۆ نیوز، نەوزاد ھلۆری:
سێ پرێن ئاسنی ل گەلیێ زنتا یا سەر ب ناحیا دینارتە ھەنە و ئاکرێ و دینارتە ل گەل زێدەتری 200 گوندان پێکڤە گرێددەن ، بەلێ خرابپوونا ئەوان پران بویە سەدەم کوت ایرێن ترومبێلان ب پەقن و کارتێکرنێ ل ھاتن و چوونا ترۆمبێلان بکەت ، رێڤەبەرێ رێک و پرا ل قەزا ئاکرێ ژی دیارکر کو پرێن گەلیێ زنتا بو ھاتن و چونێ د باش نینە و پێدڤی یە بھێنە گوھرین.
موسلح تاھیر شوفێرەکێ سنوورێ ناحیا دینارتێ یە و رۆژانە ھاتن و چوونێ ب رێیا گەلیی َزنتا بو ئاکرێ دکەت بۆ ئەڤرۆ نیوز گۆت: (رێیا گەلیێ زنتا زێدەباری کو رێیەکا تەنگە و یا گونجای نینە بو ھاتن و چوونێ دھەمان دەم دا ئەو پرێن کو لسەر رووبارێ زنتا لگەلیێ زنتا ژی ھاتینە چێکرن ب چوو شێوەیەکێ ب کێر ھاتن و چوونی َناھێن و تایرێن ترومبێلان دپەقینن و کارتێکرن ل ھاتن و چوونێ کریە).
زێدەتر گۆت: (رێیا گەلیێ زنتا دزڤریت بو سالێن شێستا و رژێما عیراقێ بو مەرەمێن لەشکرکێشی و سەربازی بو داگیرکرنا دەڤەرا بارزان و زێبار و نەھێلانا شورەش و بزاڤێن کوردی چێکریە ، و ھێشتا ھەر ئەو رێکە و ھەتا نھا نەھاتیە بەرفەرھکرن و ھەمان پر ژی لسەر سیستەمێ کەڤن و ب شێوەیێ ئاسن ھاتیە چێکرن ژبەرڤێ گرنگە دووبارە سەر ژ نوو بھێنە چێکرن و نوکە چەند تیک کەفتینە پرێ و برغیێن وێ سست بووینە و دەرکەفتینە).
ئەندازیار محەمەد سەعید عەبدولکەریم رێڤەبەرێ رێک و پرا ل قەزا ئاکرێ بو ئەڤرۆ نیوز گۆت: (رێیا گەلیێ زنتا رێیەکا گرنگ و قەرەبالغ و ستراتیجیە ، بەلێ ژ ئەگەرا نەبوونا پرێن رێک و پێک و کونکرێتی ل سەر رووبارێ گەیێ زنتا کارتێکرن لسەر ھاتن و چونێ کریە).
زێدەتر گۆت: ( شوفێر زور گلەیێ لسەر پرێن گەلیێ زنتا دکەن، بەلێ ژ بەر قەیرانا دارایی ھەتا نھا مە نەشیایە ئەوان پران بو کونکرێتی بگوھرین ، و دنھادا بتنێ دکارین سەخبێریێ لسەر وان پران بکەین و ھەردەما تیک و شەق کەفتنێ یان برغی سست بوون دووبارە پەیت بکەین ڤە و نەھێلین ببیتە سەدەم کوت ایرێن ترومبێلان ب پەقن).
ناڤبری دیارکر ژی کو د پلان دایە ھەرسێ پرێن گەلیێ زنتا بھێنە راکرن و ل شوونا وان سێ پرێن دن یێن کونکرێتی بھێنە درۆستکرن و گۆت: (ھەردەما قەیرانا دارایی نەما ژبلی چێکرنا ئەوان ھەرسێ پرا ، دھەمان دەم دا دێ رێیا گەلیێ زنتا ژی ھێتە بەفرھکرن و ل زور جھێن گەلیێ زنتا رێک دێ بیتە جوتساید و ل ھەردوو لایێن رووباری دێ جاددە چیت و ھندەک جھان ژی دی َھەر ئێک ساید بیت بەلێ دێ ھێتە بەفرەھکرن ژ بەرکو رێیا گەلیێ زنتا رێیەکا گرنگ و ستراتیجیە و سالانە ھزاران گەشتیار ب تایبەتی گەشتیارێن ناڤەراست و باشوورێ عیراقێ قەستا ھاڤینگەھێن گەلیێ زنتا و سرۆشتێ وێ دکەن و ب شەڤ ژی دمینن.
نيشاندان