ئەڤرۆ نيوز:‏
وەزارەتا بازرگانیا عیراقی دیار کر، فەرمانگەھا پلاندانان و دووڤچوونێ ل وەزارەتا ‏بازرگانی دوھی بریارەک خستە د وارێ بجھئینانێ دا، د وێ بریارێ دا دەست ب زێدەکرنا ‏زمانێ کوردی ل سەر پلیتا ئەرزاقی ھاتە کرن.‏

د راگەھاندنەکا وەزارەتا بازرگانیا عیراقێ دا ھاتیە، ل دەستپێکێ نڤیسینا زمانێ کوردی ‏دێ ل سەر پلیتێن ئەرزاقی ل پاریزگەھا سلێمانیێ ھێتە دەستپێکرن و پاشی ل ھەردو ‏پارێزگەھێن ھەولێر و دھۆکێ ئەو بریارە دێ ھێت بجھئینان.‏

ھەژی گۆتنێ یە کو بەری نوکە پلیتێن ئەرزاقی یێن سالا 2018 ھاتبوونە چاپکرن، لێ ‏ژ بەر نەنڤیسینا زمانێ کوردی ل سەر وان پلیتان وەزارەتا بازرگانیا ھەرێمێ رەتکربوو ‏وەربگرن.‏

ئەڤرۆ نيوز:‏
سەرۆکێ فراکسیۆنا پارتی دیمۆکراتی کوردستان ل پەرلەمانێ عیراقێ راگەھاند، ئەڤرۆ ل ‏دەمژمێر ئێکی نیڤرۆ حەیدەر عەبادی سەرۆکوەزیرێن عیراقێ دێ ل گەل سەرۆک ‏فراکسیۆنێن کوردستانی و لیژنا دارایی یا پەرلەمانی ل دۆر پرۆژە قانوونا بودجێ کۆم بیت. ‏

د. عەرەفات کەرەم ئاشکرا ژی کر کو بایکۆتا ھەموو فراکسیۆنێن کوردستانی د روونشتنا ‏دوھی دا کاریگەریەکا مەزن ھەبوو و ب ڤێ چەندێ کورد ب تمامی ل گەل پرۆژە قانوونا ‏بودجێ نینن، لەورا بڕیارە عەبادی ل گەل فراکسیۆنێن کوردستانی کۆم ببیت. ‏

پشتی بایکۆتا روونشتنا پەرلەمانی، فراکسیۆنێن کوردستانی ل پەرلەمانێ عیراقێ د پرێس ‏کۆنفرانسەکی دا راگەھاند، ھاتنا عەبادی بۆ پەرلەمانی جۆرەکە ژ نیشادا سیاسی و ب چو ‏رەنگەکی پشکداری روونشتنا پەرلەمانی نابین ھەکە گوھۆڕین د پرۆژە قانوونا بودجێ دا ‏نەھێنە کرن. ‏

د. موسەننا ئەمین سەرۆکێ فراکسیۆنا ئێکگرتوویا ئیسلامی یا کوردستانێ دەقێ راگەھاندن ‏فراکسیۆنێن کوردستانی ب زمانێ کوردی خواند و راگەھاند، مە بەری نوکە داخواز ژ سەرۆک ‏وەزیرێن عیراقێ کربوو دانوستاندنێن رژد ل دۆر بودجێ بکەین، لێ بەرسڤا وان نەرێنی بوو، ‏لەورا ھاتنا عەبادی بۆ پەرلەمانی بۆ دانوستاندنان ل دۆر پرۆژە قانوونا بودجێ رەنگەکە ژ ‏نیشادا سیاسی. و گۆت:(ھەموو فراکسیۆنێن کوردستانی د ھەڤڕانە ل سەر وێ چەندێ کو ‏پرۆژە قانوونا بودجێ “کارەساتە” و پشکداریێ د چو رەوونشتنان دا ناکەین ھەکە چاکسازیێن ‏تمام تێدا نەھێنە کرن).‏

ھەروەسا ئارێز عەبدوللا سەرۆکێ فراکسیۆنا ئێکەتی نیشتیمانی کوردستان ل پەرلەمانێ ‏عیراقێ راگەھاند، مە بڕیار یا دای پشکداریێ د چو روونشتنێن پەرلەمانێ عیراقێ دا نەکەین ‏یێن تایبەت ب بودجێ ڤە ھەتا وی دەمێ داخوازیێن مە نەھێنە بجھئینان.‏

 ئه‌ڤرۆنيوز:

ده‌سته‌يا نيشتمانى بۆ وه‌به‌رهێنانێ ل عيراقێ، راگه‌هاند كو 950 كۆمپانى ژ 42 وه‌لاتان دێ پشكداريێ دكۆنگرێ نێڤده‌وله‌تى يێ ئاڤه‌دانكرنا عيراقێ دا كه‌ن كو برياره‌ ل 12/2/2018 ل وه‌لاتێ كوێتێ بهێته‌ ئه‌نجامدان.

سامى ئه‌ه‌عره‌جى، سه‌رۆكێ ده‌سته‌يا نێشتمانى بۆ وه‌به‌رهێنانێ ل عيراقێ گۆت”  چه‌ندين به‌رپرسێن وه‌لاتان ونوونه‌رێن به‌نكا نيڤده‌وله‌تى وئێكه‌تيا ئورۆپى دێ پشكداريێ د كۆنگرێ نێڤده‌وله‌تى يێ  ئاڤه‌دانكرنا  عيراقێ دا كه‌ن”.

سامى زێده‌تر بۆ راديوا سه‌وا يا ئه‌مريكى گۆت” رۆژا ئێكێ ژكۆنگره‌ى دێ يا تايبه‌ت بيت بۆ رێكخراوێن نێڤده‌وله‌تى ورۆژا دويێ دێ ل دۆر وه‌به‌رهێنانێ وئاڤه‌دانكرنێ ل عيراقێ بيت ول رۆژا سيێ دێ داخواز ژ وه‌لاتان وسه‌رۆكێن وه‌لاتان وحوكمه‌تان هێته‌ كرن كو پشكداريێ دوێ روودانێ دا بكه‌ن”.

دياركر ژى”ئه‌و پرۆژێن دێ د كۆنگره‌ى دا هێنه‌ به‌رچاڤكرن دێ مفاى گه‌هينه‌ مرۆڤ وئابوورى ل عيراقێ و12 كه‌رتان ب خوه‌ڤه‌ دگرن وه‌كو پرۆژێن دبياڤێ په‌ترۆكيمياوياتان وپيشه‌سازيێن ئه‌ندازيارى وكه‌ره‌ستێن ئاڤه‌دانكرنێ وچاندنێ، زێده‌بارى پرۆژێن مه‌زن يێن چاندنێ وپرۆژێن دبياڤێ ئاڤا گران وئاكنجيبوونێ ونه‌خوه‌شخانان دا، ل گه‌ل چه‌ندين بياڤێن دى”.

سه‌رۆكێ ده‌سته‌يا نيشتمانى بۆ وه‌به‌رهێنانێ ئاماژه‌ دا كو ئه‌و پرۆژه‌ دێ هه‌موو پارێزگه‌هان ڤه‌گريت ب تايبه‌تى ئه‌و ده‌ڤه‌رێن ژ داعشێ هاتينه‌ ئازادكرن.

 ئه‌ڤرۆنيوز:

ژێده‌ره‌كى ژفرۆكخانا نه‌جه‌ف يا نێڤده‌وله‌تى بۆ ئه‌ڤرۆنيوز راگه‌هاند، حه‌يده‌ر عه‌بادى ووزاره‌تا ڤه‌گۆهاستنێ ل عيراقێ چو ده‌ستهه‌لات ل سه‌ر فرۆكخانا نه‌جه‌ف نينه‌ وعه‌بادى بزاڤێن مه‌زن دكه‌ت كو وێ فرۆكخانێ بكه‌ته‌ دبن ده‌ستهه‌لاتا ده‌سته‌يا فرۆكه‌ڤانيا مه‌ده‌نى ل عيراقێ.

وى ژێده‌رى بۆ ئه‌ڤرۆنيۆز ئاشكراكر، فرۆكخانا نه‌جه‌ف ب پارێ ده‌وله‌تا عيراقى نه‌هاتيه‌ دروستكرن، به‌لكو ب پارێ چه‌ندين وه‌به‌رهێنه‌ران يا هاتيه‌ دروستكرن، ژوان ژى هژماره‌كا وه‌به‌رهێنه‌رێن كوێتى ‌، له‌وما عه‌بادى ده‌ستهه‌لات ل سه‌ر نينه‌ وپتر ب رێيا جڤاتا پارێزگه‌ها نه‌جه‌ف ڤه‌ دهێته‌ سه‌رپه‌رشتيكرن وهه‌تا داهاتێ وێ ژى ناچيته‌ به‌غدا.

ئاماژه‌ دا ژى، عه‌بادى رێڤه‌به‌ره‌كێ نوو بۆ فرۆكخانا نه‌جه‌ف يا نێڤده‌وله‌تى دامه‌زراندبوو، به‌لێ ده‌مێ گه‌هشتيه‌ نه‌جه‌ف، رێ پێ نه‌هاته‌ دان بهێته‌ فرۆكخانێ.

دياركر ژى، حه‌يده‌ر عه‌بادى ئه‌ڤرۆ چارشه‌مبى هێزه‌كا تايبه‌ت هنارتيه‌ بۆ كونترۆلكرنا فرۆكخانا نه‌جه‌ف يا نێڤده‌وله‌تى ئه‌وا ل سالا 2008 هاتيه‌ ڤه‌كرن وگۆت” مه‌ره‌ما عه‌بادى ب هنارتنا وێ هێزا تايبه‌ت ئه‌وه‌ كو فرۆكخانێ بكه‌ته‌ دبن ده‌ستهه‌لاتا حوكمه‌تا ناڤه‌ندى وده‌سته‌يا فرۆكه‌ڤانيا مه‌ده‌نى ل عيراقێ”.