ئه‌ڤرۆ نیوز:
راكان جبوورى پارێزگه‌رێ كه‌ركووكێ ب وه‌كاله‌ت فه‌رمانا چولكرنا دو تاخێن كوردنشین یێن كه‌ركووكێ ده‌ردكه‌ت و بۆ ڤێ مه‌ره‌مێ ژى ب تنێ ماوێ حه‌فتیه‌كێ موله‌تێ دده‌ته ئاكنجییان.
ل دووڤ نڤیساره‌كا فه‌رمى كو ب ئیمزا راكان جبوورى ئاراسته‌ى فه‌رمانگه‌ها پولیسێن میقداد كریه، ب تنێ موله‌تا حه‌فتیه‌كێ دایه كوردنشینێن هه‌ردو تاخێن، كوردستان و نه‌ورۆز كو تاخێن خوه چۆل بكه‌ن ، ر به‌هانا وێ یه‌كێ كو خانیێن وان ب زێده‌گاڤى هاتینه دروستكرن.
ئه‌ڤرۆنيوز:
ل ڤێ هه‌فتيێ شانده‌كێ حوكمه‌تا عيراقێ دێ سه‌ره‌دانا ده‌رگه‌هه‌كێ سنورى ل هه‌رێما كوردستانێ كه‌ت وه‌كو ده‌ستپێكه‌ك بۆ نێڤده‌وله‌تيكرنا وى ده‌رگه‌هێ سنورى.
عومه‌ر ئيبراهيم به‌رپرسێ راگه‌هاندنا ئيدارا راپه‌رين ل قه‌زا رانيا، ل دووڤ (بغداد اليوم) راگه‌هاند” شاندێ عيراقى دێ سه‌ره‌دانا ده‌رگه‌هێ كێلێ يێ سنورى ل ده‌ڤه‌را راپه‌رين ل قه‌زا رانيا كه‌ت ب مه‌ره‌ما نێڤده‌وله‌تيكرنا وى ده‌رگه‌هێ سنورى ل گه‌ل ئيرانێ”.
گۆت ژى” به‌رى نوكه ژى دانوستاندن هه‌بوون ژبۆ نووژه‌نكرنا رێيا دناه‌بار وى ده‌رگه‌هێ سنورى و باژێرێ سلێمانيێ وقه‌زايێن ب سه‌ر پارێزگه‌ها سلێمانيێ ڤه” دياكر ژى” ل ڤێ دووماهيێ نووژه‌نكرن يا ب دووماهى هاتى”.
ئه‌ڤرۆنيوز:
دكۆمبوونا دناڤبه‌را په‌رله‌مانێ كوردستانێ وكۆمسيۆنا بلند يا هه‌لبژارتن وراپرسيان ل هه‌رێمێ، دانوستاندن ل سه‌ر چاوانيا هه‌لبژارتنان ورێكارێن قانوونى هاته كرن بۆ ئه‌نجامدانا هه‌لبژارتنان وئه‌ندامه‌كا په‌رله‌مانێ كوردستانێ دبێژيت، كۆمسيۆنێ داخوازا 105 رۆژێن پێشه‌كى كريه بۆ ئه‌نجامدانا هه‌لبژارتنان.
ئه‌ڤرۆ سێشه‌مبى 23/1/2018، شوكريه شێخانى ئه‌نداما په‌رله‌مانێ كوردستانێ پشتى ب دووماهى هاتنا كۆمبوونا په‌رله‌مانێ كوردستانێ وكۆمسيۆنا هه‌لبژارتن وراپرسيان ل كوردستانێ، دكۆنگره‌كێ رۆژنامه‌ڤانيدا راگه‌هاند”ددانوستاندنێن دناڤبه‌را مه وبه‌رپرسێن كۆمسيۆنێ، وان بۆمه دياركر كو بۆ ئه‌نجامدانا هه‌لبژارتنان، حوكمه‌تا هه‌رێمێ بريارا مه‌زاختنا 29 مليار ديناران دايه ب سێ قستان”.
گۆت ژى” به‌رپرسێن كۆمسيۆنێ دياركرژى كو بۆ ئه‌نجامدانا هه‌لبژارتنان ئه‌و پێدڤى ب 105 رۆژانه، ئه‌ڤجا په‌رله‌مانێ كوردستانێ هه‌ر ژڤانه‌كى ديار بكه‌ت، كۆمسيۆن يا به‌رهه‌ڤه به‌لێ به‌رى 105 رۆژان نه‌بيت”.
ئه‌ڤرۆنيوز:
يانا به‌رشه‌لونا يا ئيسپانى دبه‌ياننامه‌كێ دا كو ل سه‌ر مالپه‌رێ خوه يێ فه‌رمى به‌لاڤكريه ره‌تكر كو نێزيك ببيت ژ گرێدانا گرێبه‌سته‌كێ ل گه‌ل ئه‌نتوان گريزمان ياريكه‌رێ هه‌لبژارتيێ فه‌ره‌نسا و يانا ئه‌تله‌تيكۆ مه‌دريد.
يانا به‌رشه‌لونا دياركر” وان پێزانينێن د هنده‌ك ده‌زگه‌هێن راگه‌هاندنێ دا به‌لاڤبووين ره‌ت دكه‌ين كو گرێزمان دێ هێته يانا مه”.
ئه‌ڤرۆنيوز:
سه‌ركرده‌كێ ده‌وله‌تا قانوونێ ونێزيك ژ حه‌يده‌ر عه‌بادى راگه‌هاند، ل نيزيك گه‌ره‌كا نوو وبه‌رفره‌هتر يا دانوستاندنان دناڤبه‌را حوكمه‌تا عيراقێ وحوكمه‌تا هه‌رێما كوردستانێ ب شێوه‌كێ فه‌رمى تر دێ ده‌ستپێكه‌ن.
په‌رله‌مانتار عه‌لى عه‌لاق كو ئێكه ژ سه‌ركردێن ده‌وله‌تا قانوونێ ونێزيكى سه‌رۆك وه‌زيرێن عيراقێ يه گۆت” عه‌بادى بزاڤێ دكه‌ت دچارچۆڤێ دستوورێ عيراقى دا كێشان ل گه‌ل هه‌رێما كوردستانێ چاره بكه‌ت”.
گۆت ژى” هه‌موو شايستێن دارايى يێن هه‌رێما كوردستانێ، ب مووچه‌ى ژى ڤه، وه‌كو پارێزگه‌هين دى يێن عيراقێ دێ هێنه مه‌زاختن، ته‌نها مه‌رج ژى ئه‌وه كو هه‌رێما كوردستانێ پێگيريێ ب وان ئه‌ركان بكه‌ت كو دچارچۆڤێ عيراقێ دا ل سه‌ر ملێن وێ نه”.
عه‌لى عه‌لاق دداخۆيانيا خوه‌ا بۆ ده‌زگه‌هێن راگه‌هاندنێ ل عيراقێ دياركر” دانوستاندنێن لژنێن ته‌كنيكى وديدارا عه‌بادى ونێچيرڤان بارزانى دانوستاندن يێن گه‌هاندينه قۆناغه‌كا باش وگه‌شه‌كا ڤه‌كرى دناڤبه‌را وان دا يا دروست كرى”.
ئه‌ڤرۆنيوز:
شيره‌تكارێ بلند يێ فه‌رماندێ گشتيێ هيزێن چه‌كدارێن ئيرانى، ليوا يه‌حيا ره‌حيم سه‌فه‌وى، راگه‌هاند، ئيران يا بزاڤێن پێكئينانا هه‌ڤپه‌يمانيه‌كا له‌شكرى ل گه‌ل عيراقێ وپاكستانێ دژى تيرۆرێ ل به‌رامبه‌ر هه‌ڤپه‌يمانيا ئه‌مريكى.
ل دووڤ ئاژانسا (ته‌سنيم) يا ئيرانى، ليوا سه‌فه‌وى گۆت” ئه‌مريكا داعش يا دروستكرى وسعوديێ وئيماراتێ وقه‌ته‌رى پشته‌ڤانيا دارايى وله‌شكرى يا داعشێ كريه وتوركيا وئوردنێ مه‌شق پێ كريه”.
گۆت ژى” داعش ل عيراقێ وسووريێ په‌قيژك بوو وهاته په‌قاندن وقوربانيێن حوكمه‌تێن عيراقێ وسووريێ وپشته‌ڤانيا شيره‌تكارى يا ئيرانێ وهاريكاريا رووسيا ئه‌گه‌رێن شكه‌ستنا داعشێ بوون”.
وى به‌رپرسێ له‌شكريێ ئيرانى دياركر” ستراتيژيه‌تا ئه‌مريكا بۆ سالا 2018 پاراستن ولاوازكرنا ده‌ڤه‌رێن شه‌ر لێ بۆ بكارئينانا وان ژلايێ ئابوورى وسياسى ڤه”.
خوياكر ژى” ئيرانێ ل به‌ره هه‌ڤپه‌يمانيه‌كێ ل به‌رامبه‌ر هه‌ڤپه‌يمانيا ئه‌مريكى پێكبينيت وپێدڤيه به‌ر ب گريدانا هه‌ڤپه‌يمانيه‌كێ ل گه‌ل عيراقێ وپاكستانێ ڤه بچين بۆ به‌هنگاريا تيرۆرێ وتوندره‌ويێ”.
ئاماژه دا ژى” 20 ليوايێن حه‌شدا شه‌عبى ل گه‌ل له‌شكرى ل عيراقێ سه‌قامگيريێ دابين دكه‌ن”.
ل دووماهيێ گۆت” سعوديه بزاڤێن بده‌ستڤه‌ئينانا شيان وجهان بكه‌ت ب رێيا ده‌ستێوه‌ردانێ ل عيراقێ ويه‌مه‌نێ ولوبنانێ كو چو جاران ئه‌ڤ چه‌نده دروست نابيت وهه‌ڤركيێن هه‌رێمى ونێڤده‌وله‌تى بۆ چه‌ندين سالان دێ دبه‌رده‌وام بن”.
ئەڤرۆنيوز:
دلاوەرئاژگەیی نوونەرێ حوكمەتا هەرێما كوردستانێ ل ئێكەتیا ئورۆپی راگەهاند، ئێكەتیا ئورۆپی ستراتیژیەتا نوو ل دۆر عیراقێ دارێشت وپەسەندكر.
دلاوەر ئاژگەیی دبەرپەرێ خوە ل سەر تۆرا جڤاكی یا فەیسبووكی بەلاڤكر” دخالا پێنجێ دا دستراتیژیەتا نوو یا ئێكەتیا ئورۆپی ل دۆر عیراقێ، داخواز ا دەستپێكرنا دانوستاندنان دناڤبەرا حوكمەتا عیراقێ وحوكمەتا هەرێما كوردستانێ دكەت ل دووڤ دستوورێ بەردەوامێ عیراقی”.
دیاركر یە” ئێكەتیا ئورۆپا دووپاتیێ ل سەر مانا قەوارێ هەرێما كوردستانێ دكەت وداخوازا بجهئینانا هەموو برگە ومادێن دستووری دكەت، ژبلی داخوازیا رێككەفتنا بەغدا وهەولێرێ ب جۆرەكی عیراق وهەرێما كوردستانێ ژێ مفادار بن”.
ئه‌ڤرۆنيوز:
فراكسيۆنا پارتى ل په‌رله‌مانێ كوردستانێ ئه‌ڤرۆ سێشه‌مبى 23/1/2018، داخواز ژ سه‌رۆكاتيا په‌رله‌مانى كر كۆمبوونه‌كا نه ئاسايى يا په‌رله‌مانى هيرشێن ل سه‌ر عفرينێ دهێنه كرن، بهێته گريدان.
فراكسيۆنا پارتى ديموكراتى كوردستان ل په‌رله‌مانێ كوردستانێ داخوازه‌كا فه‌رمى ب ئيمزايێن سرۆكێ فراكسيۆنێ وجێگرا وى و9 ئه‌ندامێن فراكسيۆنێ، ئاراسته‌ى سه‌رۆكاتيا په‌رله‌مانێ كوردستانێ كريه وتێدا هاتيه” داخوازێ ژ هه‌وه دكه‌ين ب گۆره‌ى برگا ئێك ژ مادێ 6 يێ په‌يره‌وێ ناڤخوه‌يێ په‌رله‌مانێ كوردستانێ، روونشتنه‌كا نه‌ئاسايى بهێته ئه‌نجامدان ل سه‌ر وان هێرشێن دهێنه كرن ل سه‌ر خه‌لكێ سڤيلێ عفرينێ ل رۆژئاڤايێ كوردستانێ”.
ئه‌ڤرۆنيوز:
رێڤه‌به‌رێ گشتيێ ساخله‌ميێ ل پارێزگه‌ها دهۆكێ، ئه‌ڤرۆ سێشه‌مبى 23/1/2018، راگه‌هاند، قەیرانا دارایی یا سەخت کارتێکرنەکا گه‌له‌ك نەرینی ل سەر پلانێن مە ھەبوویە و ب تایبەت ژی راوەستاندنا پرۆژێن ستراتیژی بۆ ب ھێزکرنا ژێرخانا ساخلەمیێ.
نزار عسمه‌ت رێڤه‌به‌رێ گشتيێ ساخله‌ميێ ل پارێزگه‌ها دهۆكێ دچارچۆڤێ كونفرانسێ سالانه يێ رێڤه‌به‌ريا گشتى يا ساخله‌ميا دهۆكێ گۆت” دومدرێژى وسه‌ختيا قه‌يرانين دارايى وئاكامێن شه‌رێ داعشێ دده‌مێ سێ سالێن بۆرى دا شيانين مه سنوردار كرينه وكارێ مه ژ ئاڤه‌دانكرنێ وگه‌شه‌پێدانێ گوهارتيه بۆ به‌رهنگاريا قه‌يرانان وبه‌رده‌واميا پێشكێشكرنا خزمه‌تێن ساخله‌مى يێن گرنگ”.
نزارى گۆت ژى” قه‌يرانا دارايى بوويه ئه‌گه‌رێ راوه‌ستاندنا پرۆژێ ئاڤاكرنا پێنج نه‌خوه‌شخانان ل پارێزگه‌ها دهۆكێ ب سه‌رجه‌مێ 900 ته‌ختان و لاوازکرنا پرۆژێن پەرەپێدان و چاکسازیکرنێ د ساخلەميێ دا، وەکو ژێک جۆداکرنا کەرتێ تایبەت و گشتی، ھەروەسا سیستەمێ بیما ساخلەميێ و ئەلکترۆنیکرنا پێزانێنێن ساخلەمیێ و ئەنجامدانا ڤەکۆلینان و پیدڤیا ژێرخانا ساخلەمیێ بۆ سەخبیریکرنێ و چاکسازیکرن و ئێدارەکرنا دەرمان و پێدڤى و ئامیرێن نوشدارى”.
دياركر ژى” قه‌يران بوويه ئه‌گه‌رێ راوەستاندنا پرۆژێ پەرەپێدانا مرۆڤی کو پێک دھات ژ کورسێن خاندنا تایبەتمەندیێن ھو وربينيێن نوشدارى بۆ 50 نوشدارێن تایبەتمەند و پەرپێدانا شیانێن پەرستاری بۆ 500 پەرستاران”.
ئەڤرۆ نیوز ، نەوزاد هلوری:
ژبەر ئەگەرەکێ تەکنیکى ل چەند روژێن بۆری بهایێ غازێ ب رێژەیەکا بەرچاڤ ل قه‌زا سۆران بلند بوو، پشتی چەندین گازندە ل سەر بلندبوونا بهایێ قەنیتێ غازێ هاتیەکرن ، لایەنێن شولەژێ بریاردا کو بهایێ قەنینێ غازێ بۆ 7500 دیناران ئەرزان بیت.
لژنا ئابووریا قەزا سۆران دياركر کو ژبەر کێشەیەکا ، ل چەند رۆژێن بۆری هاتنا غازێ بۆ سوران گیروبو و گوت” لژنا ئابووریا سۆران ل گەل لایەنێن شولەژێ هەر زوو دەست ب چارەسەرکرنا کێشا غازێ کر ونها جاره‌كادى بهایێ قەنینێ غازێ بۆ 7500 دینار”.
زێدەتر گوت”رۆژا شەمبیا بۆری، دو هزار و 600 قەنینێن غازێ و ئەڤرو ژی دو هزار و 600 قەنینێن دى يێن گەهشتینە سۆران و نها چو قەیرانێن غازێ ل سۆران نینن و هەر کەسێ سەرپێچیەکێ بکەت دێ هێتە سزادان”.
نيشاندان