ئه‌ڤرۆنيوز
به‌رپرسێن وه‌لاتێن په‌ترۆل فرۆش يێن ئه‌ندام درێكخراوا ئۆپێك دا ئاماژێ دده‌ن كو پشتى سالا 2018 دێ به‌رده‌وام بن ل سه‌ر كێمكرنا رێژا هنارتنا په‌ترۆلى.
هاتنا خوارا ئاستێ يه‌ده‌كێ په‌ترۆلا ئه‌مريكى وشه‌ر وپێكدادانێن سنورى يێن دناڤبه‌را له‌شكرێ توركيا وشه‌رڤانێن يه‌په‌كێ كاريگرى كريه سه‌ر بهايێن په‌ترۆلێ وبلندكرينه.
ئه‌ڤرۆ بهايێ به‌رميله‌كا په‌ترۆلا برێنت ل بازارێن جيهانى ب (68،81) دۆلاران بوو وبهايێ به‌رميله‌كا په‌ترۆلا خام ژى ب (63،55) دۆلاران بوو.
ئه‌ڤرۆنيوز:
وه‌زاره‌تا دارايى وئابوورى ل هه‌رێما كوردستانێ، هه‌موو رێڤه‌به‌ريێن گشتى يێن ب سه‌ر وه‌زاره‌تێ ڤه ئاگه‌هدار دكه‌ت كو بێ زڤرين بۆ وه‌زاره‌تێ چو داخۆيانيان نه‌ده‌ن.
ل دووڤ نڤيسارا وه‌زاره‌تا دارايى وئابوورى هژمار 143 ل 15/1/2018، كو ئاراسته‌ى هه‌موو رێڤه‌به‌ريێن گشتى يێن ب سه‌ر وه‌زاره‌تا دارايى ڤه هاتيه كرن، ئاگه‌هدار كرينه كو بۆ هه‌ر داخۆيانيه‌كا ل سه‌ر كار وچالاكيێن خوه بۆ ده‌زگه‌هێن راگه‌هاندنێ دده‌ن، پێدڤيه پێشوه‌خت رازيبوونا وه‌زاره‌تا دارايى وئابوورى بهێته وه‌رگرتن.
ئه‌ڤرۆنيوز:
برياره سوباهى سێشه‌مبى 23/1/2018، شانده‌كێ ته‌كنيكى يێ ده‌سته‌يا فرۆكه‌ڤانيا مه‌ده‌نى يا عيراقى ووه‌زاره‌تا ڤه‌گۆهاستنا عيراقى سه‌ره‌دانا هه‌رێما كوردستانێ وهه‌ردو فرۆكخانێن هه‌ولێرێ وسلێمانيێ بكه‌ت وئارمانج ژ وێ سه‌ره‌دانێ ئه‌وه كو بريار ل دۆر ده‌ستپێكرنا گه‌شتێن نێڤده‌وله‌تى بهێته دان.
ژێده‌رێن ده‌نگوباسێن عيراقى ژزارێ ژێده‌ره‌كى ژ شاندێ دانوستاندكارێ ته‌كنيكى يێ ده‌سته‌يا فرۆكه‌ڤانيا مه‌ده‌نى يا عيراقى به‌لاڤكر” برياره سوباهى سێشه‌مبى شانده‌كێ ته‌كنيكى يێت تايبه‌ت ب فرۆكخانه وده‌سته‌يا فرۆكه‌ڤانيا مه‌ده‌نى ووه‌زاره‌تا ڤه‌گۆهاستنا عيراقێ سه‌ره‌دانا هه‌رێما كوردستانێ بكه‌ت وبريارا دووماهيێ ل دۆر ڤه‌كرنا فرۆكخانێن هه‌رێمێ بده‌ن”.
وى ژێده‌رى ئاماژى دا” چو كێشه ل به‌رده‌م ده‌ستپێكرنا گه‌شتێن نێڤده‌وله‌تى نه‌ماينه وهه‌ردو لا ل سه‌ر هه‌ماهه‌نگيێ وشێوازێ ب رێڤه‌برنا فرۆكخانه‌يان يێن رێككه‌فتين وگه‌هشتينه ئه‌نجامێ دووماهيێ”.
ئه‌ڤرۆنيوز:
مالپه‌ره‌كێ جيهانى يێ تايبه‌ت ب پێشبينيێن سه‌قاى ڤه، دياردكه‌ت كو پێله‌كا باران بارينێ دێ پارێزگه‌ها دهۆكێ ڤه‌گريت.
مالپەرێ (accuweather) يێ ئەمریکی، كو مالپه‌ره‌كێ تايبه‌ته ب سه‌قاهى ڤه، ئاماژه كريه كو سوباهى سێشه‌مبى 23/1/2018، پێله‌كا باران بارينێ دێ به‌ر ب پارێزگه‌ها دهۆكێ ڤه هێت ول رۆژا ئه‌ينيێ 26/1/2018 دێ ئه‌و پێله ب دووماهى هێت.
ئه‌ڤرۆنيوز:
سه‌رۆك وه‌زيرێن هه‌رێما كوردستانێ، ئه‌ڤرۆ دوشه‌مبى 22/1/2018، دكونگره‌كێ رۆژنامه‌ڤانى دا ل هه‌ولێرێ راگه‌هاند، ل به‌غدا ل گه‌ل حه‌يده‌ر عه‌بادى سه‌رۆك وه‌زيرێن عيراقێ به‌حسێ سێ ته‌وه‌رێن كێشێن دناڤبه‌را به‌غدا وهه‌ولێرێ دا كريه
نێچيرڤان بارزانى گۆت”ل گه‌ل حه‌يده‌ر عه‌بادى سه‌رۆك وه‌زيرێن عيراقێ مه به‌حسێ مووچه‌ێ وپه‌ترۆلێ وفرۆكخانه وده‌رگه‌هێن سنورى كر، به‌غدا لژنه بۆ يێن داناين وئه‌م به‌رده‌وام دێ دپه‌يوه‌نديێ دابين، ب وێ هيڤيێ بگه‌هينه چاره‌سه‌ريه‌كێ بۆ هه‌موو كێشان”.
ل دۆر مووچێ فه‌رمانبه‌ران، گۆت” نه تنێ وه‌زاره‌تێن په‌روه‌ردێ وساخله‌ميێ، به‌لكو مه به‌حسێ مووچێ وه‌زاره‌تێن دێ ژى كر، به‌لێ ئه‌وا گرنگ بلا يێ وان هه‌ردو وه‌زاره‌تان ب دووماهى بهيت، هيڤيدارين يێن وه‌زاره‌تێن دى ژى ڤه‌گريت”.
سه‌باره‌ت ڤه‌كرنا هه‌ردو فرۆكخانێن هه‌ولێرێ وسلێمانيێ، نێچيرڤان بارزانى گۆت” چو ژڤانه‌كێ دياركرى نينه، هنده‌ك كێشێن ته‌كنيكى يێن هه‌ين وهيڤيدارين ب زووترين ده‌م دا بهێنه چاره‌سه‌ركرن وڤه‌كرن”.
نێچيرڤان بارزانى كو ئێك ژ پشكداربوويێن كۆربه‌ندێ داڤوسه ل سويسرا وسوباهى سێشه‌مبى 23/1/2018 دێ ده‌ستپێكه‌ت وبۆ ده‌مێ سێ رۆژان دێ يێ به‌رده‌وام بيت، ئاشكراكر كو جاره‌كا دى دێ ل گه‌ل حه‌يده‌ر عه‌بادى كۆمبيت ودێ ديدارێ ل گه‌ل وه‌زيرێ په‌ترۆلا عيراقێ ژى كه‌ت وئه‌و كۆمبوونه به‌رده‌وامى دانا كۆمبوونێن به‌رێ يه”.
ل دۆر وێ چه‌ندێ ئايا دسه‌ره‌دانێن خوه دا بۆ به‌غدا وته‌هرانێ چ رێككه‌فتن ل گه‌ل عيراقێ وئيرانێ ئيمزا كرينه، نێچيرڤان بارزانى گۆت” نه‌خێر، تنێ بۆ ئاساييكرنا په‌يوه‌نديان بوو ومه چو رێككه‌فتن ئيمزا نه‌كرينه”.
ل دۆر هه‌لويستى ل دۆر عه‌فرينێ، سه‌رۆك وه‌زيرێن هه‌رێما كوردستانێ گۆت” ئه‌وا ل عه‌فرينێ روودده‌ت جهێ دلگرانيا مه‌زن يا هه‌رێما كوردستانێ يه وهيڤيدارين وداخواز دكه‌ين ب زووترين ده‌م ب كێمترين زيان بگه‌هنه رێككه‌فتنێ، دلگرانيا مه يا مه‌زن ئه‌و وه‌لاتيێن سڤيلن كو د عه‌فرينێ دانه”.
ئەڤرۆ نیوز، نەوزاد هلوری:
رێڤەبەریا پۆلیسێن هەولێرێ دیارکر کو ئەو یێ ل دووڤ تەرمێ کەسەکێ دگەریێن بناڤێ هتلەر کو ب ترومبێل ڤە کەفتیە د رووبارێ زێى مەزن دا و خەندقیە.
رێڤەبەریا پۆلیسێن هەولێرێ راگه‌هاند ژى” ئەو گەنج دژیێ 18 سالیێ دایە و ب ترومبێل ڤە کەفتیە د رووبارێ زێی مەرن ل ناحیا کەلەک دناڤبەرا هەردو پارێزگەهێن هەولێرێ و دهۆکێ و دەملدەست خەندقیە”.
ل دۆر ئەگەرێن روودانێ ژی، پۆلیسێن هەولێر گۆت”ئەوی شوفێر گه‌له‌ك بلەز ترومبێل دهاژۆت و نەشیا کونترۆلێ ل سەر بکەت و ئەم یێ ڤەکۆلینێ ل سەر روودانێ و دیتنا تەرمێ هتلەری دکەین”.
ئەڤرۆ نیوز، نەوزاد ھلوری:
سەرۆک بارزانی ھەلویستێ خوە ل بارا بوردومانێن تورکیا بو سەر باژێرێ عەفرینێ و شەھیدبوونا خەلکێ سڤێل راگەھاند ، و دیارکر کو تنێ رێیا ئاشتێ کێشەیان چارەسەر دکەت.
ئەڤا ل خوارێ دەقا پەیاما سەروک بارزانی یە.
دلگرانین ب ھێرش و بوردومانێن سوپایێ تورکیا و چەند لایەنگێرێن وان بو سەر باژێرێ عەفرینێ و گیان ژ دەستدان و قوربانیدانا خەلکێ سڤێل.
ھیڤیدارین کو ب زوترین دەم ئەو پەلامار بھێنە راوستاندن و گیانێ وەلاتیان یێ ب سلامەت بیت و ئێدی ژ ئەڤا روودایی زێدەتر نەبیت ، داکو کارەسات و ئەنجامێن خراپ نەبن ، ژبەرکو ب گورەی ھەموو ئەزمونێن دەڤەرێ ب شەر و ئالوزیان کێشە کویرتر و فەرھتر دبن ، باشترین چارەسەری ، رێیا ئاشتیانەیە بو چارەسەرکرنا کێشە و قەیرانان ل دەڤەرێ.
مەسعود بارزانی
22-1-2018
ئەڤرۆ نیوز، نەوزاد ھلۆری:
پەرلەمانێ عیراقێ رۆژا ھەلبژاردنان پەسەندکر ، بەلێ بەحس ل وێ یەکێ دھێتەکرن کو دێ کورد پشتی روودانێن 16ێ ئوکتوبەرا سالا بوری و داگیرکرنا کەرکوک و دەڤەرێن سەر ب کارگێریا ھەرێما کوردستانێ (دەڤەرێن کێشەدار)، دێ دەنگان کێم ئینن ، و چاڤدێرەک ئەگەرێن کێمبوونا دەنگێن کوردان بو چوار ئەگەران دزڤرینیت.
رێنجبەر شێخو چاڤدێرێ سیاسی ل دھۆکێ بو ئەڤرۆ نیوز گۆت: ( ھەلبژاردنێن پارێزگەھا کەرکوک و دەڤەرێن سەر ب کارگێریا ھەرێما کوردستانێ ئەڤێن کو ژلایێ حەشد شەعبی و ئیرانێ ڤە ھاتیە داگیرکرن چوو شەرعیەت نەھێلایە و ب چوو شێوەیان ژی کورد نکارن دناڤ ھێزەکا داگیرکاردا دەنگێن خوەیێن راستەقینە دەستخوڤە بینن).
زێدەتر گۆت: ( ھێزێن میلشیاتێن حەشد شەعبی کەرکوکێ ب رێڤە دبەن و بڤێ یەکێ ژی چەندان کارەسات و کاڤکاریێن مرۆڤایەتی و ماددی ل دەڤەرێ ئەنجامداینە ،و کورد د دەما ھەلبژاردنان دان کارن ئالایێ کوردستانێ بلند بکەن و بەرنامەیێ خوە بو خەکی شروڤە بکەن کو ئەڤ یەک د دەستورێ عیراقێ دا مافەکێ قانونیێ کوردایە ).
ناڤبری دیارکر ژی کو ڤەکێشان و بایکوتا پارتی د ھەلبژاردنێن بھێت ل کەرکوک و ئاوارەبوونا ھژمارەکا زور یا خەلکێ کەرکوک و دەڤەرێن کوردستانیێن دەرڤەیێ کارگێریا ھەرێما کوردستانێ ، و گرتنا بارەگایێن حزبان و شکاندنا رێکەفتنا و ب ئارمانج گرتنا پارتی و ھەبوونا ھێزەکا داگیرکاری ل کەرکوک و وان دەڤەران ، مەزنترین ئەگەرن کو کورد ل کەرکوکێ دەنگێن راستەقینەیێن خوە نەئینن و گۆت ژی: ( پێدڤی یە کورد ھەموو ئێک ھەلویست و ئێک دەنگ بن ل بارا کەرکوک و دەڤەرێن دن ، ژبەرکو دەلیڤەکا زور بو میلشیاتێن حەشد شەعبی و ھێزێن دن ل کەرکوک ھەیە کو تەزویران بکەن بەس دا شەرعیەتێ بدەن ھەلبژاردنێن کەرکوک ، و تاکە رێک کو شەرعیەتێ بدەت ھەلبژاردنان ل کەرکوک ڤەکێشانا ھێزێن میلشیاتن و ڤەگەراندنا حالەتێ کەرکوکێ یە بو بەری 16ێ ئوکتوبەرا سالا بوری).
ئه‌ڤرۆ نيوز:
سەرۆکێ جڤاتا پارێزگه‌ها دھۆکێ دیار کر، ھەرچەندە ڤەکێشانا یەکگرتوویێ ژ حوکمەتا ھەرێمێ ئەم گەلەک دلگرانکرینە، لێ ھێشتا زوویە بڕیارەکێ ل دۆر پۆستێن وان د ناڤ کارگێریا پارێزگەھا دھۆکێ دا بھێتە دان.
فەھیم عەبدوللا، سەرۆکێ جڤاتا پارێزگه‌ها دھۆکێ تایبەت بۆ ئەڤرۆ راگەھاند، ڤەکێشانا یەکگرتوویێ ئەم گەلەک دلگرانکرینە، ھەرچەندە ئەم رێزێ ژی ل بریارا وان دگرین، مەسەلا پۆستێن وان د پارێزگەھا دھۆکێ ژی دا ھێشتا زوویە بڕیارێ ل سەر بدەین، چونکو نھا چاڤێ مە ل کەش و ھەوایێ سیاسی یە و گۆت: “یەکگرتوویێ 24 پۆست وەکو رێڤەبەرێن گشتی و رێڤەبەر و رێڤەبەرێن فەرمانگەھان ل پارێزگەھا دھۆکێ وەرگرتینە، نھا ژی ئەو پۆست ھەر د دەستێ وان دانە و ئەو ب رێڤە دبەن”.
فەھیمی ئاشکرا ژی کر، ئەڤ لایەنێن ھەتا نوکە خوە ژ حوکمەتا ھەرێما کوردستانێ ڤەکێشاین چو پێگوھۆر و بەدیلێن باشتر ڤێ نینن، ئەڤ گڤاشتنا ئەو دکەن ب تنێ د بەرژەوەندا عەبادی و حوکمەتا عیراقێ دایە بۆ لاوازکرنا پێگەھێ کوردستانێ و ب تنێ رەڤینە ژ بەرپرساتیا وەلاتیان و گۆت: “ئەم وەکو فراکسیۆنا پارتی دپێگیرین ب بەرپرسیاتیێن خوە و تەحەمولا ھەموو ئاستەنگ و نەخۆشیان دکەین و رەوش بگەھیتە چو ئاست ژی دێ ھەر د خزمەتا وەلاتیێن خوە دا بین”.
نيشاندان