ئه‌ڤرۆ نيوز، نه‌وزاد زاده:
ھەموو رۆژانێن شەمبی کەگیرڤانێن شێلادزێ و دەڤەرا ئامێدیێ ، پێشوازیێ ل کەوگیرڤانێن سنوورێ پارێزگەھا دھۆک و پارێزگەھا ھەولێر دکەن، زێدەباری ڤێگرابەردانا کەوان و زەوق و خوشی دھەمان دەم دا کەوێن خوە ژی دفروشن و ھندەک کەو ھەنە ھەتا دوو ھزار و 500 دولاران ھاتیە فروتن.
فەرزندە سدقی ھێتوتی ئێکە ژ کەوگیرڤانێن دەڤەرێ دیارکر کو ئەڤە نێزیکێ سێ سالایە ئەو ل دارا کەوان پێشوازیا کەوگیرڤانێن سنوورێ ھەردوو پارێزگەھێن ھەولێر و دھۆک دکەن و بۆ ئەڤرۆ نیوز گۆت: ( ھەموو رۆژانێن شەمبی ئەم وەکو کەوگیرڤانێن سنوورێ قەزا ئامێدیێ پێشوازیێ ل کەوگیرڤانێن دەڤەرێن دن دکەین ، و مەرەم ل شەرە کەو ب تنێ زەوق و خوشیە و ھەلسەنگاندنەکێ بو بھایێ کەوێن خوە بکەین ، و کەو ھەبوویە ھەتا دوو ھزار و 500 دولاران ل دارا کەوا ھاتیە فروتن ).
زێدەتر گۆت: (ھندەک جاران 80 بو 100 جوتێن کەوا ل دارا کەوا دھێنە دیتن ، و ئەم ناھێین چو کەرب و کین دناڤبەرا کەوگیرڤانا درۆست بن ).
ئیدریس سیتەی ئەو ژی کەوگیرڤانەکێ دەڤەرێ یە دوپات ل وێ یەکێ کر کو بتنێ بو خوشی و زەوق ئەو رۆژانێن شەمبی ل شێلادزێ ل گەل کەوگیرڤانێن دن شەرە کەوان دکەن و بۆ ئەڤرۆ نیوز گۆت: ( زور جاران ھەبویە کەوەکێ چوو بھا نەبویە ، بەلێ د گورەپانا کەواندا سەرکەفتن ئینایە بھایێ وی بلندبوویە ،و دیسان ھەبویە کەو گەلەکێ خورت و شەرکەربویە و بھایەکێ زور ژی ھەبویە بەلێ د گورەپانێ دا شکەستن ئینایە ئێکسەر پارێ وی ھاتیە خوار ، ئانکو ل دارا کەوا ھەلسەنگاندنا بھایێ کەوی ژلایێ دارایی دھێتەکرن).
زێدەتر گۆت: ( ژبلی ناحیا شێلادزێ ، دارێن کەوان ل چەند دەڤەرێن دن ژی ھەنە مینا دھۆک ، ھەولێر ، رانیێ ، حەریرێ ، زاخو و سوران و گەلەک دەڤەرێن دن ).
نيشاندان