ئه‌ڤرۆ نیوز:
ل دۆر دابه‌ش نه‌كرنا مووچێ پشكه‌كا هێزێن پێشمه‌رگه‌ى كو بریاربوو ئه‌ڤرۆ بهێته به‌لاڤكرن، نڤیسینگه‌ها رۆژنامه‌ڤانى یا ئه‌مینداریا گشتى یا وه‌زاره‌تا پێشمه‌رگه‌ى دیاركر كو وه‌زاره‌تا دارایى یا حوكمه‌تا هه‌رێمێ ئه‌و ئاگادار كرن كو مووچێ پێدڤى ل به‌ر ده‌ست نینه بۆ به‌لاڤكرنا مووچه‌ى، له‌ومان ژى مووچه نه‌هاتنه به‌لاڤكرن.
ئه‌ڤرۆنيوز:
كۆمپانيه‌كا ئه‌مريكى يا په‌ترۆلى يا مه‌زن ئه‌ڤرۆ سێشه‌مببى 16/1/2018 راگه‌هاند دێ ده‌ست ب كارێن خوه يێن پشكنينێ ل دووڤ په‌ترۆلێ وغازێ ل هه‌رێما كوردستانێ كه‌ت.
په‌يڤدارێ كۆمپانيا شيڤرۆن يا په‌ترۆلى يا ئه‌مريكى دداخۆيانيه‌كێ دا گۆت” ل ڤان نێزيكان ل ده‌ڤه‌را (سارته 3) ل هه‌رێما كوردستانێ، دێ كۆمپانى ده‌ست ب كارێن خوه كه‌ت”.
كۆمپانيا شيڤرۆن يا ئه‌مريكى پشتى روودانێن 16 ئوكتۆبه‌رێ ب شێوه‌كێ ده‌مكى ل هه‌يڤا ئوكتوبه‌را 2017 كارێن خوه راگرتبوون.
كۆمپانيا ناڤبرى كو ئێك ژ كۆمپانيێن زه‌به‌لاحه دبوارێ په‌ترۆلێ دا ل جيهانێ، ل 180 وه‌لاتان كاردكه‌ت وب ئێك ژ مه‌زنترين شه‌ش كۆمپانيێن په‌ترۆلى ل جيهانێ دهيته هژمارتن.
ئه‌ڤرۆنيوز:
باليۆزێ بريتانيا عيراقێ ئه‌ڤرۆ سێشه‌مبى دكۆنگره‌كێ رۆژنامه‌ڤانى دا ل هه‌ولێرێ راگه‌هاند، ل ڤان نێزيكان فرۆكخانێن هه‌رێما كوردستانێ دێ هێنه ڤه‌كرن ول ده‌مه‌كێ نێزيك دا ره‌وشا هه‌رێما كوردستانێ دێ پێشڤه‌چوونه‌كا باش ب خوه‌ڤه بينيت.
جۆن ويلكس باليوزێ بريتانيا ل عيراقێ دياركر ژى” پێدڤيه كورد ب تێمه‌كا ب هێزڤه به‌ر ب به‌غدا ڤه بچن”.
گۆت ژى” مه به‌رنامه يێ هه‌ى بۆ پشته‌ڤانيا پێشمه‌رگه‌ى وئه‌م دخوازين مه هه‌ماهه‌نگيه‌كا ئابوورى يا باش ل گه‌ل كوردستانێ هه‌بيت وكۆمپانيا بريتش پترۆليۆم ژى به‌رهه‌مئينانا دبوارێ په‌ترۆلێ دا ل كه‌ركووكێ دكه‌ت”.
ل دۆر رۆژێن بۆرى دا باليۆزێ بريتانيا ل عيراقێ چه‌ندين كۆمبوون ل گه‌ل به‌رپرٍسێن بلند ل هه‌رێما كوردستانێ ئه‌نجامدابوون.
ئه‌ڤرۆنيوز:
وه‌زاره‌تا خواندنا بلند وڤه‌كۆلينێن زانستى ل هه‌رێما كوردستانێ برياره‌كا نوو بۆ قوتابيێن ماسته‌رێ ودكتۆرايێ ده‌ردكه‌ت.
ل دووڤ نڤيسارا وه‌زاره‌تا خواندنا بلند يا هژمار 710 ل 14/1/2018، رينماييه‌ك ل دۆر قوتابيێن ماسته‌رێ ودكتۆرايێ ده‌ركريه وتێدا ده‌مێ سێ هه‌يڤێن دى ده‌ليڤه دايه وان قوتابيان بۆ بده‌ستڤه‌ئينانا مه‌رجێ شيانا زمانێ ئێنگليزى.
ديسا گوهۆرينه‌ك ژى كريه كو ژ نوكه وپێڤه ناڤێن قوتابيان ناهێنه ژێبرن، به‌لكو ناڤێن به‌ربژارێن خواندنا بلند دێ هێنه هه‌لوه‌شاندن و پێدڤيه به‌ربژارێن پارالێل 10% كريا خواندنێ بده‌ن.
ئه‌ڤرۆنيوز:
ژێده‌ره‌كێ ئاگه‌هدار ئاشكراكر كو دانوستاندن دناڤبه‌را ليستا ده‌وله‌تا قانوونێ ب سه‌رۆكاتيا نورى مالكى وليستا فه‌تح ب سه‌رۆكاتيا هادى عامرى يا ده‌ستپێكرى بۆ پشكداريێ ب ئێك ليست دهه‌لبژارتنێن عيراقێ دا
وى ژێده‌رى گۆت ژى” پشتى خوه‌ڤه‌كێشانا چه‌ند لايه‌نێن سه‌ره‌كى ژ ليستا حه‌يده‌ر عه‌بادى، هادى عامرى ونورى مالكى ده‌ست ب دانوستاندنان كريه”.
دياركر” دانوستاندنێن عامرى ومالكى بۆ وێ چه‌ندێ يه هه‌ردو ليستێن ده‌وله‌تا قانوونێ وفه‌تح ببنه ئێك ليست وهه‌تا نوكه نه‌گه‌هشتينه رێككه‌فتنێ ودانوستاندنێن وان دبه‌رده‌وامن”.
ئه‌ڤرۆنيوز:
رێكس تێله‌رسن وه‌زيرێ ده‌رڤه‌يێ ئه‌مريكا، ئێڤاريا دوهى دوشه‌مبى 15/1/2018، په‌يوه‌نديه‌كا ته‌له‌فۆنى ل گه‌ل نێچيرڤان بارزانى سه‌رۆك وه‌زيرێن هه‌رێما كوردستانێ ئه‌نجامدا.
مالپه‌رێ فه‌رميێ سه‌رۆكاتيا جڤاتا وه‌زيرێن هه‌رێمێ، ئه‌ڤرۆ سێشه‌مبى به‌حسێ په‌يوه‌نديا ته‌له‌فۆنى يا دوهى دكه‌ت ودبێژيت” وه‌زيرێ ده‌رڤه‌يێ ئه‌مريكا دوێ په‌يوه‌نديا ته‌له‌فۆنى دا دياركر كو ئه‌مريكا به‌رده‌واميێ ب گرنگيدانێ ب په‌يوه‌نديێن خوه ل گه‌ل هه‌رێما كوردستانێ دده‌ت”.
تيله‌رسنى خوه‌شحاليا خوه دياركر ب وان ديدار وكۆمبوونێن ئاڤاكه‌ر ئه‌وێن دناڤبه‌را شاندێن هه‌رێما كوردستانێ وحوكمه‌تا عيراقێ ب مه‌ره‌ما چاره‌سه‌ركرنا كێشان دهێنه ئه‌نجامدان، دستوورێ عيراقێ ژى ب رێ چاره بۆ چاره‌سه‌ركرنا كێشان زانى وبه‌رهه‌ڤيا خوه بۆ پشته‌ڤانيكرنێ ل دانوستاندنێن دناڤبه‌را به‌غدا وهه‌ولێرێ نشان دا بۆ به‌رهنگاريا هه‌ر مه‌ترسيه‌گێ ژى پشتى ب دووماهى هاتنا داعشێ ورێگرتنێ ل سه‌رهلدانا هه‌ر جۆره توندوتيژيه‌كێ، دووپاتى ل سه‌ر گرنگيا هاريكاريێ وهه‌ماهه‌نگيا زێده‌تر يا هه‌رێما كوردستانێ وحوكمه‌تا عيراقا فيدرال وئه‌مريكا كر.
وه‌زيرێ ده‌رڤه‌ىێ ئه‌مريكى پشته‌ڤانيا وه‌لاتێ خوه ل پرۆسا ديموكراسى وهه‌لبژارتنان ل عيراقێ وهه‌رێما كوردستانێ ده‌ربرى، هه‌روه‌سا هێڤي خواست حوكمه‌تا هه‌رێما كوردستانێ د به‌رهنگاريا وان قه‌يرانێن تووشبوويێ يا سه‌ركه‌فتى بيت ودڤى بوارى دا پشته‌ڤانيا وه‌لاتێ خوه دووپاتكر.
ژلايێ خوه‌ڤه سه‌رۆك وه‌زيرين هه‌رێما كوردستانێ سوپاسيا وه‌زيرێ ده‌رڤه‌يێ ئه‌مريكى كر بۆ پشته‌ڤانيێ ل هه‌رێما كوردستانێ ودياركر كو نوكه ژى مه‌ترسيا سه‌رهلدانا توندوتيژيێ يا هه‌ى وب پێدڤى زانى هه‌رسێ لايه‌نێن هه‌رێما كوردستانێ وحوكمه‌تا عيراقا فيدرال وئه‌مريكا ل سه‌ر ميكانيزمه‌كێ هه‌ڤپشك كاربكه‌ن بۆ به‌رهنگاريا وێ دنوكه دا و ل پاشه‌رۆژێ ژى.
نێچيرڤان بارزانى دياركر كو هه‌رێما كوردستانێ به‌رده‌وام يا به‌رهه‌ڤبوو بۆ ده‌ستپێكرنا دانوستاندنێ وچاره‌سه‌ركرنا كێشان ل گه‌ل به‌غدا ودانوستاندنێن شاندێن به‌غدا وهه‌ولێرێ ل رۆژێن بۆرى ب ئه‌رێنى هژمارتن وبۆ به‌ر ب پێشڤه‌برنا زێده‌تر يا دانوستاندنان ژى پشته‌ڤانيا هه‌موو لايه‌كى ب پێدڤى زانى.
سه‌رۆك وه‌زيرێن هه‌رێمێ دياركر ژى كو هه‌ولێر، واشنتۆن ب هه‌ڤپه‌يمانا خوه دزانيت وبۆ ده‌ربازكرنا ڤێ ره‌وشا نوكه ژى، پێدڤى ب پشته‌ڤانيا دۆستێن خوه يا هه‌ى، هه‌روه‌سا دياركر كو پرۆسا سياسى ل هه‌رێما كوردستانێ وهه‌لبژارتن پرۆسه‌كا جدى يه.
ئه‌ڤرۆنيوز:
وه‌زيرێ دارايى وئابوورى ل هه‌رێما كوردستانێ راگه‌هاند، پێدڤيه ئێدى مووچه‌خۆرێن راسته‌قينه نه‌بنه قوربانيێن ب نه‌ره‌وا مووچه‌ى وه‌ردگرن.
رێباز حه‌ملان، وه‌زيرێ دارايى وئابوورى ل هه‌رێمێ، ل دووڤ مالپه‌رێ فه‌رميێ وه‌زاره‌تێ، ئه‌ڤرۆ سێشه‌مبى دپێشوازيا كونسۆلێ فه‌ره‌نسا ل هه‌رێمێ (دۆمه‌نيك ماس) راگه‌هاند” هه‌رێما كوردستانێ پێدڤى ب ريفۆرمه‌كا جدى يا هه‌ى بۆ وێ چه‌ندێ ئێدى مووچه‌خۆرێن راسته‌قينه نه‌بنه قوربانيێن وان كه‌سێن ب نه‌ره‌وا مووچه‌ى وه‌ردگرن”.
گۆت ژى” بۆ ڤێ بابه‌تى دێ پێنگاڤێن گرنگ هاڤێژين”.
نيشاندان