ئه‌ڤرۆ نیوز ، نه‌وزاد هلۆرى:
رێڤه‌به‌ریا پۆلیسێن هاتنوچوونێ ل پارێزگه‌ها دهۆكێ دیاركر كو دده‌مێ 14 رۆژێن بۆرى دا یێن سالا 2018 ل سنورێ پارێزگه‌ها دهۆكێ 37 كه‌س بووینه قوربانى.
ئازاد ته‌ها به‌رپرسێ راگه‌هاندنا رێڤه‌به‌ریا هاتنوچوونێ ل پارێزگه‌ها دهۆكێ بۆ ئه‌ڤرۆ نیوز گۆت” دده‌مێ14 رۆژێن بۆرى یێن سالا 2018 ژ ئه‌گه‌رێن جودا جودا ل سنۆرێ پارێزگه‌ها دهۆكێ 32 روودانێن هاتنوچوونێ درۆست بوینه و د ئه‌نجامدا 37 كه‌س بووینه قوربانى ژ وانان پێنج كه‌سان گیانێ خوه ژ ده‌ستدایه و يێن دى ژى برینداربووینه”.
ئه‌ڤرۆ نیۆز،عه‌زیز هه‌ورامی:
پشتى كو شاسوار عه‌بدوالواحد راگه‌هاندى كو كه‌نالێن ئێن ئار تى وهه‌موو به‌هرێن وى دكۆمپانيا ناليا بۆ راگه‌هاندنێ وبازرگانيێ يێن فرۆشتين ووى چو په‌يوه‌ندى پێڤه نه‌مايه، به‌لێ ل دووڤ پێزانينێن گه‌هشتينه ئه‌ڤرۆ نيوز، ئاخڤتنێن شاسوارى سيناريۆنه وچو راستى بۆ نينه.
ژێده‌ره‌كێ نێزيك ژ شاسوار عه‌بدولواحد بۆ ئه‌ڤرۆ نيوز ئاشكراكر” چو راستى بۆ وێ چه‌ندێ نينه ئه‌وا شاسوار بانگه‌شێ بۆ دكه‌ت كو هه‌موو كۆمپانيێن خوه يێن راگه‌هاندنێ وبازرگانى يێن فرۆشتينه دو كۆمپانيێن بيانى ئه‌وان ژى ل هسه‌ر ناڤێ ئاوات عه‌لى رێڤه‌به‌رێ گشتيێ به‌رێ يێن ئێن ئار تى”.
ل دووڤ پێزانينێن ژێده‌رێ ئه‌ڤرۆنيوز” ئاوات عه‌لى نوكه يێ ژ شاسوارى دووركه‌فتى، له‌وما شاسوار ب رێيا پارێزه‌رێن خوه مژوولى ڤه‌گۆهاستنا هه‌موو ئه‌و به‌هرێن كۆمپانيا ناليايه ژسه‌ر ناڤێ ئاوات عه‌لى بۆ سه‌ر ناڤێ كه‌سه‌كى ژ بنه‌مالا شاسوارى
ئه‌ڤرۆ نیوز، نه‌وزاد هلۆرى:
هژماره‌كا په‌نابه‌رێن ل هه‌رێما كوردستانێ دژين ب پێدڤى ب پێدڤى دبينن كو دادگه‌هه‌كا تایبه‌تمه‌ند ب په‌نابه‌ران ڤه ب بهێته‌دانان بۆ ب رێڤه‌برنا مامه‌له و كێشه‌یێن وان.
سه‌روان شێخومه‌ر ئێكه ژ په‌نابه‌رێن سورى و ل سنوورێ قه‌زا ئامێدیێ ئاكنجیه دده‌تن دیاركرن كو ئه‌ڤه زێده‌ترى چوار سالایه ئه‌و ل هه‌رێما كوردستانێ وه‌كو په‌نابه‌ر دژیت و بۆ ئه‌ڤرۆ نیوز گۆت” هه‌رده‌ما كێشه‌یه‌كا قانوونى بۆمه درۆست دبیت، ئه‌م نكارین هه‌وارا خوه بۆ كیڤه ببه‌ین و چه‌وا ئه‌رك و مافێن خوه بزانین ، به‌لێ هه‌كه دادگه‌هه‌كا تایبه‌تمه‌ند ب په‌نابه‌ران ڤه بهێته دانان، ئه‌م ژى دێ شێن زێده‌تر كاروبارێن خوه یێن قانوونى ب رێڤه ببه‌ین “.
ل هه‌رێما كوردستانێ سێ سه‌د و 12 هزار په‌نابه‌رێن سورى يێن هه‌ين و هه‌ر ئێك ژ ڤان خودانێ كێشه و كاروبارێن خوه‌یێن قانوونى نه ، هه‌موو ئه‌و په‌نابه‌ر نه‌شێن وه‌كو پێدڤى كاروبارێن خوه ب رێڤه ببه‌ن.
شڤان محه‌مه‌د ئێكه ژ شاره‌زایێن قانوونى دیاركر” په‌نابه‌ر كو ژ وه‌لاته‌كێ دى هاتینه هه‌رێما كوردستانێ و شێوازه‌كێ قانوونیێ تایبه‌ت بۆ سه‌حكرنا باده‌ك و سكالایان هه‌یه ، تووشى كێشه‌یێن زور بووینه و گۆت” په‌نابرن بۆ هه‌موو پێرابوونێن قانوونى یێن باده‌كێن خوه، په‌نابه‌ر پێدڤى ب ده‌مه‌كێ زۆره هه‌تاكو بشێن كێشه‌یێن خوه ژ روویێ قانوونى ڤه ب رێڤه ببه‌ن و ئه‌ڤه سه‌ره‌راى كو كێشه ب زه‌حمه‌ت ژى دهێنه ب رێڤه‌برن، به‌لێ هه‌كه جڤاتا بلند یا دادوه‌ریێ دادگه‌هه‌كا تایبه‌تمه‌ند پێكبینیت بۆ سه‌حكرنا باده‌كێن وان دێ ب ساناهیتر كاروبارێن وان ب رێڤه‌چن و ژ روویێ قانوونى ڤه ژى دێ باشتر بیت و مافێن وان باشتر ب ده‌ستڤه‌هێن”.
زێده‌تر گۆت”هه‌ر چه‌نده رێكخراوا ئینته‌رسۆس كو ئێكه ژ رێكخراوێن راوێژكارى و سه‌ر ب كۆمسیۆنا بلند یا په‌نابه‌رايه ل نه‌ته‌وه‌یێن ئێگرتى خزمه‌تگوزاریێن قانوونى پێشكێشى په‌نابه‌ران دكه‌ت ، به‌لێ ل گه‌ل ڤێ یه‌كێ ژى هه‌بوونا دادگه‌هه‌كا تایبه‌تمه‌ند گه‌له‌ك گرنگ و پێدڤیه، دیسان نه‌بوونا قانوون و دادگه‌هه‌كا تایبه‌ت ل عیراقێ ژى دیسان كێشه بۆ هه‌رێمێ درۆستكرینه و نها بتنێ په‌نابه‌ریا سیاسى ل هه‌رێمێ و عیراقێ هه‌یه كو داكوكیێ ل پاراستنا مافێن په‌نابه‌ران دكه‌ت و هه‌رێما كوردستانێ دكاریت بۆ دانانا دادگه‌كا تایبه‌تمه‌ند هه‌ر دناڤا دادگه‌هێن خوه‌دا پشكه‌كا تایبه‌ت ڤه كه‌ت”.
ئه‌ڤرۆنيوز:
وه‌زاره‌تا خواندنا بلند وڤه‌كۆلينێن زانستى ل هه‌رێما كوردستانێ، ده‌نگباسه‌ك ل دۆر شايستێن دارايى يێن قوتابيێن به‌رنامێ تواناسازى راگه‌هاند.
عه‌باس ئه‌كره‌م په‌يڤدارێ وه‌زاره‌تا خواندنا بلند وڤه‌كۆلينێن زانستى دبه‌ياننامه‌كێ دا راگه‌هاند”پشتى رازيبوونا هاتێه كرن ل سه‌ر مه‌زاختنا كوژمێ 30 مليۆن دۆلاران بۆ قوتابيێن تواناسازى، لژنا به‌لاڤكرنا شايستێن دارايى يێن قوتابيێن به‌رنامێ تواناسازى بريار دا ب مه‌زاختنا ليستا ئێكێ يا سالا 2018 ژ شايستێن دارايى يێن قوتابيێن به‌رنامێ تواناسازى.
عه‌باسى گۆت ژى” ليستا ئێكێ يا شايستێن دارايى يێن قوتابيێن تواناسازى ل سالا 2018 كۆژمێ پارێن وێ دگه‌هيته (947،827) دۆلار وتێدا 40 قوتابيێن به‌رنامێ تواناسازى ل هه‌ر ئێك ژ زانكۆيێن جيهانێ دێ مفادار بن كو دبه‌رده‌وامن ل سه‌ر خواندنێ”.
وه‌زاره‌تا خواندنا بلند وڤه‌كۆلينێن زانستى هه‌موو قوتابيێن به‌رنامێ تواناسازى ئاگه‌هداردكه‌ت كو ناڤێن وان دليستا هژمار ئێك دا يا سالا 2018 هه‌بيت كو هژمارا وان 40 قوتابى نه، ئه‌و ب خوه، يان بريكارێن وان سه‌ره‌دانا ژۆرا هژمار 56 ل ديوانا وه‌زاره‌تا خواندنا بلند بكه‌ن بۆ وه‌رگرتنا چه‌كێ مه‌زاختنا شايستێن دارايى.
په‌يڤدارێ وه‌زاره‌تا خواندنا بلند رۆهنكر ژى” پێشتر ول چه‌ندين قۆناغێن جودا دا، وه‌زاره‌تا خواندنا بلند كوژمێ 19 مليۆن دۆلار مه‌زاختينه”.
ئەڤرۆ نیۆز ، زنار تۆڤی:
لدووڤ پێشبینیێن دەستەیا سەقاناسیا عێراقێ،ل ڤێ حەفتیێ دێ تۆز و با ئەسمانی ھەموو دەڤەرێن ھەرێما کوردستانێ و عێراق ڤەگریت.
ھەروەکو وێ دەستەیێ راگەهاندی، بایێ باشۆری دێ بیتە ئەگەرێ دروستبوونا تۆز و بای ل دەڤەرێن ھەرێما کوردستانێ و باکۆرێ عێراقێ ل ھەموو رۆژێن ڤێ حەفتیێ.
ھەروەسا بۆ رۆژا چارشەمبی 17.1.2018، ئەسمان دێ یێ عەور بیت و دێ باران باریت، پێشبینییا بارینا بەفرێ ژی ھندەک دەڤەرێن چیایی دهێتە کرن.
ل رۆژا پێنجشەمبی ئاسمان دێ عەور بیت و باران ژی دێ باریت،ل گەل روودانا چەند عەور و بریسیا و بارینا بەفرێ.
ئەڤرۆ نیوز:
چاڤدێرێن سیاسی دبێژن نابیت رێ بۆ ھەر حزب و گرۆپەکێ بھێتە دان سەربخوو پەیوەندیی ل گەل بەغدا بکەن، بۆ موزایەدا سیاسی بناڤێ مللەتێ کوردستانێ باخڤن، دڤێت قەوارێ سیاسی کو حوکمەت و پەرلەمانە پەیوەندیی ل گەل بەغدا و جیھانێ بکەن.
چاڤدێرێ سیاسی مەشخەل کەڵۆسی راگەھاند، چوونا شاندێ حزبی ل سلێمانیێ بۆ بەغدا کارەکێ گەلەک شاشە، ژ دەرڤەیی قەوارێ سیاسیێ کوردستانێ یە چووینە بەغدا، ئەو نەشێن نوونەراتیا مللەتێ کوردستانێ بکەن، ب تنێ ڤەگەریانە بۆ پارڤەکرنا بەھرا حزباتیا لوکال کو دوبارە ئەو پەیوەندیە زیانێ د گەھینیتە بەرژوەندیێن بلندێن مللەتێ کوردستانێ.
چاڤدێرێ سیاسی ھەروەسا گۆت: پێدڤیە پەرلەمانێ کوردستانێ ل سەر ڤێ سەرەدانا ھەرسێ حزبان بۆ بەغدا کومبوونەکێ بکەت، ڤەکۆلێن ل دەرئەنجامێن وێ سەرەدانا وان حزبان بھێتە کرن، نەخاسم نوکە دۆژمن د بزاڤێن ژ ناڤبرنا قەوارێ سیاسیێ شەرعیێ کوردستانێ دکەت، ب دیتنا مە ژی چوونا شاندێ بڤی رەنگی خزمەتا ئەجیندایێن مەترسیدارێن دۆژمنێن مللەتێ مە دکەت، پێدڤیە چالاگڤانێن مەدەنی و رەوشەنبیر بەرامبەری وانا بێ دەنگ نەبن، ورێ ل ھەمبەری خواستێن حزبایێن بەرتەنگ ل سلێمانیێ بگرن، دەمێ ریفراندۆمێ وان حزبان بەحسێ شەرعیەتێ دکرن، کا بلا بێژنە مە کێ ئەو شەرعیەت دایە ھەرسێ حزبان نوونەراتیا مللەتێ بکەن.
ھندەک کەسان د ناڤا ئێکەتی نیشتیمانی کوردستان دا، پەیوەندی ل گەل دەستھەلاتدارێن بەغدا کرن، ە دەرئەنجامێ وێ خیانەتا 16 ئۆ کتۆبەرێ ئەنجامێ وێ چەندێ بوویە کو 51% ژ ئاخا کوردستانێ رادەستی ھێزێن حەشدا شەعبی و ھێزا پاسدارێن ئیرانێ و حزبوللا یا لوبنانی کرن، ئەو ھێرشا ژ ئالیێ قاسم سلێمانی ڤە سەرپەرشتیا وێ ھاتیە کرن.
میران حسێن مامۆستایێ زانکۆیێ بۆ رۆژناما ئەڤرۆ دبێژیت، پێدڤیە پەیوەندیێن کوردستانێ و عیراقێ ب رێیا دەزگەھێن شەرعیێن کوردستانێ بیت، کو ئەو ژی حوکمەت و پەرلەمانن، ژبلی وێ رەوشا نوکە یا ئلۆز یا کوردستان تێدا دەرباز دبیتن، کو ھەر حزبەکا بھانەکێ پەیوەندیی ل گەل بەغدا بەکەت، دێ ل سەر کیستێ مافێن مللەتێ کوردستانێ بیت.
مامۆستایێ زانکۆیێ ھەروەسا گۆت: بەری نوکە روونشتنێن ھندەک گرۆپان ل گەل بەغدا ھەبوون، کو باجا مەزن بۆ ھەرێما کوردستانێ ڤەگەراند، لەروا ئێدی نابیت رێ ب ھەر گرۆپ و حزبەکێ بھێتە دان، بەرژوەندیێن خوەیێن بەرتەسک سەر کیستێ بەرژوەندیێن مللەتێ کوردستانێ بێخنە مەترسیێ دا.
سەلام کەریم ئەندامێ سەکرداتیا بزاڤا ئیسلامی یا کوردستانێ دبێژیت، بزاڤا ئیسلامی یا کوردستانێ ب سەرەدانا وان حزبان یا گەلەک دلگرانە، کو بتنێ سێ حزب ل گەل بەغدا بناڤێ مللەتێ کوردستانێ بئاخڤن، ددەمەکی دا مە حوکمەت و پەرلەمان ھەنە، نوونەراتیا مللەتی دکەن نەک حزبێن سیاسی.
ناڤبرە ھەروەسا گۆت: دەمێ عەبادی ئامادەنەبیت پێشوازیا ل شەاندێ حوکمەتا ھەرێما کوردستانێ بکەت، ئێدی چەوا حزبەک رێ بخوە بدەت ل گەل کەسەکی دا کومبوونێ ئەنجام بدەتن، ھەکە دانپێدان ب حوکمەتا شەرعیا کوردستانێ نەبیت، زێدباری وێ چەندێ خوە بنوونەریا نەتەوەکی بزانیت، لەورا ھەر پەیوەندیەکا حزبی ل گەل بەغدا، چو ئەنجامێن باش بۆ پاشەرۆژا کوردستانێ ل گەل بەغدا نابن، بتنێ بۆ تێکدانا قەوارێ سیاسی یە نەزێدەتر.
سەلام کەریم دبێژیت، ئەو حزبێن شاندێ کوردی پێکئینایی کو سەرەدانا بەغدا بکەن، ھەر ئەو حزب بوون رەخنە ل پارتی و ئێکەتیێ دگرتن کو پەیوەندیێن بەغدا و ھەولێرێ ب حزبی کرینە، کو وی دەمێ بەرپسێن پارتی و ئێکەتیێ بۆ دانوستاندنێ دچوونە بەغدا و ھەر ئەو کەسێن دناڤا حوکمەتا ھەرێما کوردستانێ بوون، بەلێ نوکە یا ئەم دبینین وان حزبان دروشم و ئاخفتنێن خوە زبیر کرینە، پەیوەندیا حزبیا بەرتەسک ل گەل بەغدا دکەن.
ئەندامێ سەرکرداتیا بزاڤا ئیسلامی گۆت: دانوستاندنا ل گەل بەغدا ل سەر مووچە و بودجا ھەرێما کوردستانێ بتنێ ب ڕێیا حوکمەتا ھەرێما کوردستانێ دێ ھێتە ئەنجامدان، نە برێیا حزبەک یان دوو حزبان، کو وانا بۆ مەرمێن سیاسی دڤێت بچنە بەغدا ل سەر بوودجە و مووچەی دانوستاندنێ ل گەل بەغدا بکەن و چو ئەنجام ژی بۆ نابن.
ئەڤرۆ نيوز:
بەرپرسەکێ وەزارەتا ناڤخوە یا عیراقێ راگەھاند، پشتی دۆ رۆژێن دی ئەنجامێن کۆمبوونا دوھی یا ھەردو شاندێن حوکمەتێن عیراقێ و ھەرێمێ دێ راگەھینن.
پشتی دوھی شاندەکێ حوکمەتا ھەرێما کوردستانێ ب سەرۆکاتیا کەریم شنگالی وەزیرێ ناڤخوە، سەرەدانا بەغدا کری و ل گەل شاندەکێ حوکمەتا عیراقێ ب سەرۆکاتیا قاسم ئەعرەجی وەزیرێ ناڤخوەیا عیراقێ کۆمبووین کو وەزیرێ ڤەگۆھاستنا عیراقێ ژی د ناڤ شاندێ عیراقی دابوو.
شاندێ ھەرێما کوردستانێ ب سەرۆکاتیا کەریم شنگالی راگەھاندنەکا بەلاڤکر و تێدا ھاتیە” قاسم ئەعرەجی وەزیرێ ناڤخوە یێ عیراقێ رژدیا حەیدەر عەبادی سەرۆکوەزیرێن عیراقێ ل سەر چارەکرنا کێشا فرۆکخانان، دەرگەھێن سنووری، بەنداڤان و ڤەگەراندنا چالاکیان بۆ وان دامودەزگەھان دەربڕی.
لیوا سەعەد مەعەن پەیڤدارێ وەزارەتا ناڤخوە یا عیراقێ راگەھاند” کۆمبوونەکا باش و بەرھەمدار ھاتە ئەنجامدان و ل رۆژا 15ى كانوونا دويێ ژی کۆمبوونەکا دی بۆ ھووردەکاری و گەنگەشەکرنا زێدەتر یا کێشان دێ ھێتە ئەنجامدان و د دو رۆژێن داھاتی دا دێ ھەموو ئەو پێشنیاز و ئەنجامێن کۆمبوونێ راگەھینین”.
ھەروەسا تەلار فایەق رێڤەبەرا فرۆکخانا نێڤدەولەتی یا ھەولێرێ کو ل گەل شاندێ ناڤبریە بۆ رووداو راگەھاند، مە ل بەغدا کۆمبوونێن باش ئەنجامدان و ل رۆژا دوشەمبی شاندەک ژ بەغدا دێ سەرەدانا ھەرێما کوردستانێ کەت و دێ پتر دانوستاندنان کەین.
ل دۆر فرۆکخانان و دەرگەھێن سنووری تەلار خانێ گۆت: (ژ بەر ھەستیاریا رەوشا ھەی من نەڤێت بەحسێ ھووردەکاریان بکەم، لێ د کۆمبوونا دوھی دا بڕیارا دووماھیێ ل دۆر چو تشتان نەھاتیە دان و ل سەر کۆمبوونا بھێت یا راوەستیای).
ئەڤرۆ نیۆز ، زنار تۆڤی:
وەسا بریار هاتیەدان کو مەلبەندێن، دهۆك – مووسل – شنگال – هەولێر یێن ئێکەتیا نیشتمانی یا كوردستانێ بریارێ ددەن کو ل دەڤەرێن جهێ ناکۆکیێ بۆ هەلبژارتنێن جڤاتا نوونەرێن عێراقێ و جڤاتێن پارێزگەهان ب لیستێن سەربەخۆ پشکدار بن.
دوهی شەمبیێ 13 كانوونا دوویێ،هەرێم كەمال ئاغا، بەرپرسێ مەلبەندێ دهۆكێ یێ ئێکەتیێ ل لاپەرێ تایبەتیێ خۆ ل فەیسبووكێ نڤێسیە، سەبارەت ب رێكخستنا لیستا كاندیدێن ئێكەتیێ بۆ جڤاتا نوونەرێن عێراقێ و جڤاتێن پارێزگەهان كو دێ ل بەرواری 12.5.2018 هێە ئەنجام دان بۆ ڤێ مەبەستێ هەموو مەلبەندێن ئامادەبووی د وێ كۆمبوونێدا پێشنیاز و بەرنامە و كارێ خۆ خستە بەرچاڤ.
د پشکەکا وێ نڤێسینێدا هاتیە،کو بتایبەتی دەڤەرێن کێشە ل سەر و پشتی کریارێن سەربازی یێن عێراقێ د دۆخەکێ تردایە،لەورا پێدڤیە ئەم هەموو ب ئێك دەنگ هەولدەین،کو مە زۆرترین نوونەر ل جفاتا نوونەرێن عێراقێ و جڤاتێن پارێزگەهان هەبیت و بشێین بەرگریێ ژ مافێن دستوری یێن خۆ بكەین،کو د دستوورێ عێراقێ دا هاتیە.
بەپرسێ مەلبەندێ دهۆكێ یێ ئێکەتیێ گوتیە ژی،د وێ كۆمبوونێدا دانوستاندن بۆ دیارکرنا كاندیدان بۆ هەلبژارتنێن داهاتی هاتیە کرن،کو دێ ئێکەتی ب لیستەکا سەربەخۆ پشکداریێ کەت، بۆ هندێ کو ببیتە تەعبیرەک ژ سیاسەتا وێ یا دروست،کو ل دەمێ بوریدا ل وان دەڤەران ئەنجامدایە.
ئه‌ڤرۆ نیوز:
ژبه‌ر بارانبارینا زۆر و چیبوونا له‌هیێ ل بۆربانك كالیۆفۆرنیا ئه‌مریكی هریانا ئاخێ ژی چێبوو، ل وی ده‌می تیمێن رزگاركرنێ دیمه‌نه‌كێ كێموێنه گرتییه كو دهێته نیشان دا شوفێره‌ك و هه‌ڤالا خوه د ترومبێلا خوه دانه ل ده‌مێ پێلا له‌هیێ وێ ترومبێ د گه‌ل خوه دا دبه‌ت، هه‌ردو كه‌سێن ترومبێلێ دا ب سلامه‌تن لێ ترسه‌كا مه‌زن ل ده‌ڤ په‌یدابوو.
ئه‌ڤرۆنيوز:
ئه‌ڤرۆ شه‌مبيێ 13/1/2018، وه‌زاره‌تا ناڤخوه ل هه‌رێما كوردستانێ به‌ياننامه‌ك ل دۆر كۆمبوونا ئه‌ڤرۆ يا هه‌ردو شاندێن عيراقێ وهه‌رێمێ ل به‌غدا به‌لاڤكر.
دوێ به‌يانناما وه‌زاره‌تا ناڤخوه دا هاتيه” ب مه‌ره‌ما بجهئينانا فه‌رمانا ديوانا سه‌رۆكاتيا جڤاتا وه‌زيران هژمار 137 ل 2017، كو حه‌يده‌ر عه‌بادى سه‌رۆك وه‌زيرێن عيراقێ لژنه‌كا بلند ب وێ فه‌رمانێ دروستكر بۆ چاره‌سه‌كرنا كێشێن ته‌كنيكى ل گه‌ل هه‌رێما كوردستانێ ب تايبه‌تى ده‌رگه‌هێن سنورى وفرۆكخانه و ب رێڤه‌برنا به‌نداڤان، بۆ وێ مه‌ره‌مێ سپێده‌يا ئه‌ڤرۆ شه‌مبيێ شانده‌كێ حوكمه‌تا هه‌رێما كوردستانێ ب سه‌رۆكاتيا كه‌ريم شنگالى وه‌زيرێ ناڤخوه‌يا هه‌رێمێ سه‌ره‌دانا به‌غدا كر”.
زێده‌تر هاتيه” قاسم ئه‌عره‌جى وه‌زيرێ ناڤخوه‌يا عيراقێ دكه‌شه‌كێ دۆستانه‌دا سه‌رپه‌رشتيا كۆمبوونه‌كا گرنك دناڤبه‌را شاندێ هه‌رێمێ ولژنا بلند ب سه‌رۆكاتيا ئه‌ميندارێ گشتيێ جڤاتا وه‌زيرێن عيراقێ كر، ل ده‌ستپێكا كۆمبوونێ وه‌زيرێ ناڤخوه ته‌ئكيد ل سه‌ر گرنگيا ڤان جۆره كۆمبوونان كر ل گه‌ل دوباره‌كرنا گرنگيا به‌حسكرنا وان كێشێن ل بوارێن ده‌رگه‌هێن سنورى وگومرك وفرۆكخانان و ب رێڤه‌برنا به‌نداڤان ل سه‌ر بنه‌مايێ پێگيرى كرن ب دستوو وقانوونێن فيدرالى، هه‌روه‌سا پێداگرتنا سه‌رۆكێ جڤاتا وه‌زيران ل سه‌ر چاره‌سه‌ركرنا ڤان باده‌كان وڤه‌گه‌راندنا چالاكيان بۆ ڤان دامه‌ده‌زگه‌هان راگه‌هاند”.
ل دووڤ وێ به‌ياننامێ ” كه‌ريم شنگالى سوپاس وپێزانينێن خوه بۆ وێ ده‌ستپێشخه‌ريا سه‌رۆكێ جڤاتا وه‌زيران سه‌باره‌ت ب چاره‌سه‌ركرنا باده‌كێن هه‌لاويستى ب وى شێوه‌ى كو خزمه‌تا عيراقێ بكه‌ت وچاره‌سه‌ريا وان كێشان بكه‌ت كو ل هه‌رێما كوردستانێ رووداين”.
به‌يانناما وه‌زاره‌تا ناڤخوه، دياركريه” ددانوستاندنێن نوونه‌رێن وه‌زاره‌تا ناڤخوه، ده‌ستهه‌لاتا فرۆكه‌ڤانيا شارستانى، ده‌سته‌يا ده‌رگه‌هێن سنورى، رێڤه‌به‌ريا به‌نداڤان، ده‌زگه‌هێ هه‌والگيرى. هه‌موو تێبينيێن سه‌ره‌كى وبنه‌ره‌تى يێن تايبه‌ت ب رێكخستنا په‌يوه‌نديێ دناڤبه‌را حوكمه‌تا فيدرالى وهه‌رێما كوردستانێ به‌رچاڤكر ودانوستاندنه‌كا تێروته‌سه‌ل وراشكاوانه ل گه‌ل ئه‌ندامێن شاندێ حوكمه‌تا هه‌رێمێ هاته ئه‌نجامدان سه‌باره‌ت وان بابه‌تێن ئه‌ندامێن لژنا بلند به‌رچاڤكرين”.
ديسا تێدا هاتيه كو” ل دووماهيێ كۆمبوونێ، هه‌ردو لا رێكه‌فتن ل سه‌ر رێكخستنا كۆمبوونه‌كا دو قۆلى ل به‌ر رۆناهيا وان خالين ل سه‌ر رێككه‌فتين كو دێ ل 15/1/2018 ل هه‌ولێرێ هێته ئه‌نجامدان، تاكو پێكڤه كونۆسه‌ك بهێته به‌رهه‌ڤكرن ب وان چاره‌سه‌ريێن كو دێ رێككه‌فتن ل سه‌ر هێته كرن، ل گه‌ل بلندكرنا وان كێشێن پێدڤى ب بريارا جڤاتا وه‌زيرێن حوكمه‌تا فيدرالى هه‌ى وگرێداينه ب ڤه‌گه‌راندنا وان چالاكيێن كو ل ده‌رگه‌هێن سنورى وفرۆكخانان وبه‌نداڤان دا دهێنه ئه‌نجامدان”.
نيشاندان