ئه‌ڤرۆ نيوز:
ل دووڤ پێشبينيێن كه‌شناسيا هه‌رێمێ، ئه‌ڤرۆ و سوبه دێ ئه‌سمان عه‌ور بيت، ل گه‌ل ئه‌گه‌رێ باران بارينێ ل ده‌ڤه‌رێن جودا جودا يێن پارێزگه‌هێن كوردستانێ.
سه‌باره‌ت سه‌قايێ دهۆكێ هاتيه دياركرن كو ئه‌سمان دێ ئه‌ور بيت ل گه‌ل ئه‌گه‌رێ باران بارينێ ل پرانيا ده‌مان،
سه‌باره‌ت سه‌قايێ سوبه، پێشبينى كريه كو ئه‌سمان ب تمامى عه‌ور بيت و ئه‌گه‌رێ بارانێ ل هه‌مى ده‌مێن روژێ و ل ده‌ڤه‌رێن چيايى ژى دێ به‌فر باريت.
ئەڤرۆ نیۆز ، زنار تۆڤی:
تورکیا دێ دەست ب گرتنا ئاڤێن عێراقێ کەت، لایەنێن پەیوەندیدار ژی دبێژن،ب گرتنا ئاڤێن عێراقێ دێ کاریگەریێ ل سەر ھەرێما کوردستانێ دروست کەت.
عەباس غەزالی، ئەندامێ پەرلەمانێ کوردستانێ د لیژنا چاندندنێ و ئاڤدێریێ دا دبێژیت:تورکیا ل سەر رووبارێن دیجلە و فوراتی دەست ب دروستکرنا چەند بەنداڤان کریە، بەنداڤا حەسەن کەیف،ل باژێرێ باتمانێ ل باکۆرێ کوردستانێ د قۆناغا دوماهیێ دایە،ئەڤێ ژی کاریگەری ل سەر ئاڤا عێراقێ ھەیە، چونکی هەکە ئەو بەنداڤە تەمام بن دێ ئاستێ ژێدەرێن ئاڤا عێراقێ، ب تایبەتی یا دیجلە و فورات کێم کەت.
هەروەسا گوتیە:گرتنا ئاڤان دێ کاریگەریەکا زێدەتر ل سەر پارێزگەها سلێمانیێ هەبیت، چونکی ھەردوو بەنداڤێن ئاڤێ ل سلێمانیێ نە و ئاڤا ڤەخوارنا خەلکێ وێ پارێزگەهێ ل سەر ھەردو بەنداڤانە، کو ئەڤە ژی دێ مەترسیێ ل سەر ژێدەرێن ئاڤا وێ پارێزگەهێ دروست کەت.
دکتۆر کەیوان عەلی، شارەزا د پرسێن ئابووری و ژێدەرێن ئاڤێدا بۆ باس گوتیە:گرتنا ئاڤێ ژلایێ تورکیاڤە دێ کاریگەریێ ل سەر کوردستانێ دروست کەت،ب تایبەتی ل پارێزگەها سلێمانیێ، چونکی ژ ئیران و تورکیا 12 ملیار مەترێن سێجا یێن ئاڤێ دهێنە ھەرێما کوردستانێ،ئەڤ ئاڤێن دهێنە ھەرێما کوردستانێ،مەزنترین بەنداڤ ژێ هاتینە دروست کرن، ئەو ژی بەنداڤێن دوکان و دەربەندیخانن، بەلێ ب ئەگەرێ وان ھەلمەتێن ئیران و تورکیا ئاڤ گەلەک کێم بوویە.
ئه‌ڤرۆ نیۆز:عه‌زیز هه‌ورامی
سپێده‌يا سوباهى دوشه‌مبى 1/1/2018، فيسته‌ڤالا كێمكرنا بهايان ل باژێرێ سلێمانيێ ب پشكداريا هژماره‌كا مه‌زن يا كۆمپانيان دێ هێته گێران.
بنار هیدایه‌ت، په‌يڤدارێ فيسته‌ڤالێ بۆ ئه‌ڤرۆنيوز گۆت”سوباهى دوشه‌مبى ب پشكداريا زێده‌تر ژ 100 كۆمپانيان، دێ فيسته‌ڤالا كێمكرنا بهايان هيته سازكرن”.
بنارى گۆت ژى” ژئه‌گه‌رێ ڤێ قه‌يرانا دارايى ل هه‌رێما كوردستانێ كو بوويه بارگرانيه‌ك ل سه‌ر وه‌لاتيێن هه‌رێمێ، بريار هاته دنا فيسته‌ڤاله‌كا ب ڤى جۆرى بهێته رێكخستن تاكو هاريكاريا وه‌لاتيان بهێته كرن كو پێدڤيێن خوه ب بهايێن ئه‌رزانتر ژ بازارى بده‌ستڤه‌بينن”.
دياركر ژى” ئێك ژ ئه‌گه‌رێن دى يێن سازكرنا ڤێ فيسته‌ڤالێ ئه‌وه به‌رهه‌مێن خۆمالى ب وه‌لاتيێن كوردستانێ بده‌ينه نياسين تاكو پتر پشت ب به‌رهه‌مێ خۆمالى ببه‌ستيت”.
په‌يڤدارێ فيسته‌ڤالا كێمكرنا بهايان ئاماژه دا” كۆمپانيێن خۆراكى وپاقژكرنێ وئاميرێن كاره‌بێ وناڤه‌ندێن په‌رتۆكان دێ پشكداريێ دڤێ فيسته‌ڤالێ دا كه‌ن وبۆ ده‌مێ هه‌يڤه‌كێ دێ يا به‌رده‌وام بيت”.
ئه‌ڤرۆنيوز:
پشتى ل سه‌رانسه‌رى ئيرانێ ژبه‌ر ره‌وشا ئابوورى يا نه جهگير وگرانيێ، خوه‌نيشادانێن نه‌رازيبوونێ هاتينه كرن، دونالد ترامب سه‌رۆكێ ئه‌مريكا داخواز ژ حوكمه‌تا ئيرانێ كر رێزێ ل مفێن خه‌لكى وب تايبه‌تى ل ئازاديا راده‌ربرينێ بگريت.
ترامبى ل سه‌ر تويته‌رێ خوه نڤيسى يه” گه‌له‌ك راپۆرت ل سه‌ر خوه‌نيشادانێن ئاشتيانه يێن وه‌لاتيێن ئيرانێ كو ژ به‌ر گه‌نده‌ليێ وب هه‌ده‌ردانا سه‌روه‌ت وسامانێ وه‌لاتى بۆ پشته‌ڤانيێ ل تيرۆرێ ل ده‌رڤه‌ى وه‌لاتى، خه‌لك يێن بێزاربووين”.
سه‌رۆكێ ئه‌مريكى دياركر” پێدڤى بوو حوكمه‌تا ئيرانى رێز ل مافێ خه‌لكى بۆ ده‌ربريناحه‌زێن خوه گرتبا، چونكى جيهان يا ڤان روودانان دبينيت وتۆمار دكه‌ت”.
پشكه‌كا به‌رچاڤ يا وه‌لاتيێن ئيرانێ ل سێ رۆژێن بۆرى ل باژێرێن مه‌شهه‌د، نه‌يشابوور، شاهروود، كاشمه‌ر، كرماشان، ته‌هران، ئه‌هواز، قووچان وقوم دژى ره‌وشا خراب يا ئابوورى وبێكاريێ ونه‌بوونا خزمه‌تگوزاريان رژيانه سه‌ر جادان ودرووشمێن دژى حه‌سه‌ن روحانى وخامه‌نه‌ئى دگۆتن ول باژێرێ كرماشانێ روو ب رووبوون دناڤبه‌را خوه‌نيشانده‌ران وهێزێن ئه‌منى دا په‌يدابوون چه‌ندين بنگه‌هێن حكومى وله‌شكرى هاتن سۆتن.
ئه‌ڤرۆنيوز
رۆژنامه‌كا بريتانى ئاشكراكر كو ياريكه‌رێ پورتۆگالى كريستيانۆ رونالدۆ داخواز ژ يانا خوه ريال مه‌دريد كر كو بهايێ ڤه‌گۆهاستنا وى ديار بكه‌ت ورێ پێ بهێته دان ژ ريال مه‌دريد بچيت.
رۆژناما (زه سه‌ن) يا بريتانى به‌لاڤگر” رونالدۆ دخوازيت ريال مه‌دريد رازى بيت ل سه‌ر فرۆشتنا وى ب بهايێ 89 مليۆن جونه‌هێن سترلينى”.
دياركر ژى” ده‌مێ رێككه‌فتن دناڤبه‌را رونالدۆى وريال مه‌دريد ل سه‌ر بهايێ ڤه‌گۆهاستنا وى دهێته كرن، رونالدۆ دێ يانا خوه يا به‌رێ مانشسته‌ر يونايتد ويانا پاريس سان جيرمان ئاگه‌هداركه‌ت، كو ئه‌و هه‌ردو يانه بزاڤێن مه‌زن دكه‌ن بۆ ڤه‌كۆهاستنا رۆنالدۆى بۆ ناڤ رێزێن خوه”.
ل دووڤ وێ رۆژناما بريتانى” په‌يوه‌نديێن رونالدۆى وسه‌رۆكێ يانا ريال مه‌دريد فلورنتينۆ بێرێز وه‌كو به‌رێ نه‌ماينه ويێ به‌ر ب خرابيێ ڤه چووين ويێن گه‌هشتينه وى راده‌ى رونالدۆى نه‌ڤێت ل گه‌ل باخڤيت”.
رۆنالدۆى دخواست ريال مه‌دريد گرێبه‌ستا وى باشتر لێ بكه‌ت ومووچێ وى ژى بلندتر بكه‌ت، ب تايبه‌تى پشتى ناسناڤێ باشترين ياريكه‌رێ جيهانێ بۆ سالا 2017 ب ده‌ستڤه ئيناى كو سالا 2016 ژى هه‌مان ناسناڤ بده‌ستڤه‌ئينابوو ل سه‌ر كيستێ ميسى يێ ئه‌رجه‌نتينى، به‌لێ سه‌ره‌راى ڤێ چه‌ندێ هێشتا مووچێ رونالدۆى كێمتره ژ ميسى ونيمارى.
ئه‌ڤرۆنيوز:
سه‌رۆك مه‌سعود بارزانى په‌يامه‌كێ ب هه‌لكه‌فتا سالا نوو به‌لاڤ دكه‌ت.
دپه‌ياما خوه دا، كو دبه‌رپه‌رێ خوه ل سه‌ر تۆرا جڤاكى يا تويته‌رى به‌لاڤكرى، سه‌رۆك بارزانى سالا نوو ل گه‌لێ كوردستانێ پيرۆز دكه‌ت. هه‌روه‌سا هيڤى خواست ل سالا 2018 ئاشتى وپێشكه‌فتن هه‌موو جيهانێ ڤه‌گريت.
ئه‌ڤرۆنيوز:
د ئينفۆگرافيه‌كا سايتێ سپۆتنيك يێ روسى، خه‌ملاندن بۆ هيزێن چه‌كدارێن كوردى ل هه‌ر چار پارچێن كوردستانێ هاتيه كرن، ل دووڤ وێ ئينفۆگرافيێ كوردان 471 چه‌كدار يێن هه‌ين.
نه‌خشێ سه‌ره‌كيێ ئاژانسا سپۆتنيك يا روسى ب ناڤێ ” نه‌خشێ دابه‌شبوونا كوردان وهێزێن وان يێن چه‌كدارى”هاتيه دانان وه‌سا پێناسا كوردان دكه‌ت كو مه‌زنترين نه‌ته‌وا بێ ده‌وله‌ته، پاشى به‌حسێ هژمارا چه‌كدارێن كورد دكه‌ت كو ب ڤى شێوه‌ى ل خوارێ ئاماژه بۆ هاتيه كرن، ل دووڤ وێ ئاژانسێ كوردان نێزيكى نيڤ مليۆن چه‌كدار ل رۆژهه‌لاتا ناڤين يێن هه‌ين، هژمارا كوردان ژى ب 32 مليۆن كه‌سان دخه‌ملينيت.
ئه‌وا دئينفۆگرافيكا ئاژانسا سپۆتنيك گرنگ بيت، ئه‌و هژمارا هێزێن كوردى يه كو گه‌له‌ك جاران چاڤدێران دووپاتى كريه كورد ب هۆكارێ هێزێن خوه دشێن هه‌ڤكێشێن رۆژهه‌لاتا ناڤين ب گوهۆرن، ل دووماهى شه‌ر كو شه‌رێ داعشێ بوو، دياربوو كورد ل سووريێ ول عيراقێ ئه‌و هێزا تيرۆرستى شكاند كو مه‌زنترين هێزا تيرۆرستى بوو دديرۆكێ دا.
ئه‌ڤه ژى خه‌ملاندنا هێزين چه‌كدار يێن كوردى يه ل دووڤ ئاژانسا سپۆتنیك:
پێشمه‌رگێ هه‌رێما كوردستانێ: 200000- 250000
پارتيا كرێكارێن كوردستانێ: 5000-10000
پێشمه‌رگه ل رۆژهه‌ڵاتێ كوردستانێ: 10000 – 15000
په‌ژاك: 1000-2000
یه‌كینه‌يێن پاراستنا گه‌ل 75000
یه‌كینه‌يێن پاراستنا ژنان: 10000
هێزێن سووريا ديموكرات (هه‌سه‌ده) : 90000
ئەڤرو نیوز، سالار دوسکی:
شارەزایەکێ ئابووری دیارکر کو تێکچوونا کاداونێن سیاسی ل ئیرانێ وەک سیاسی بۆ کوردان دێ باش بیت لێ وەک ئابووری دێ نەباش بیت چونکە پتریا کەل و پەلێن ھەرێما کوردستانێ ژ ئیرانێ دھێن و ئەڤە دێ کارتێکرنێ ل عیراقێ بگشتی کەت، ئەگەر کاودانێن ئیرانێ گەلەک تێکچوون چونکە وەلاتەکێ مەزنێ پەترۆلێ یە دێ کارتێکرن ل سەر بھایێ پەترۆلێ ھەبیت ل جیھانێ و پەترۆل دێ گران بیت.
د.نێرەت بەرواری مامۆستایێ زانکۆیا دھۆکێ زێدەتر بۆ ئەڤرۆ نیۆز گۆت: کاوادانێن ئابووری دێ 2018 باشتر بن چونکە سەرۆک وەزیرێن عیراقێ حەیدەر عەبادی و نوری مالکی سەرۆکێ حزبا دعوە ژ بەر نێزیکبوونا ھەلبژارتنان و چێبوونا ھەڤپەیمانیان ل گەل کوردان دێ بزاڤا کەن خوە نێزیک بکەن و ئەڤە وەک ئابوور دێ بەرژوەندیا کوردان دابیت.
ھێشتا گۆت: بریارا جڤاتا وەزیرێن کوردستانێ دورستکرنا لژنەکێ ماوێ (90) رۆژان دا بۆ دیارکرنا بن دیواران بتنێ دبینم کوشتنا دەمی یە و نەزێدەتر چونکە کێمکرن یان زێدەکرنا چەند دولاران کارتێکرن نابیت و بتنێ ئارمانجەکا سیاسی ھەیە.
ئه‌ڤرۆنيوز:
ل دووڤ بريارا هژمار 126 يا سالا 2017، جڤاتا وه‌زيرێن هه‌رێما كوردستانێ، كو ل رۆژا 29/12/2017 ل رۆژناما (وه‌قائيع كوردستان) هاتيه به‌لاڤكرن، حوكمه‌تا هه‌رێما كوردستانێ ب فه‌رمى هه‌موو باج ورسوماتێن ل سه‌ر كه‌لوپه‌لان دياركر.
ئه‌و باج ورسومات ژلايێ وه‌زاره‌تا دارايى وئابوورى بۆ وه‌زاره‌تا باژێرڤانان دياركرن ب هه‌ماهه‌نگى ول دووڤ رێككه‌فتنێ دناڤبه‌را هه‌ردو وه‌زاره‌تان دا وجڤاتا وه‌زيران ژى رازيبوون ل سه‌ر كر.
ل ده‌ستپێكا ڤێ سالێ ، ل دووڤ وێ بريارىێ باج ورسومات دێ هێنه وه‌رگرتن وبۆ پێشڤه‌چوونا كاروبارێن باژێرڤانيان ول بن رۆناهيا قانوون ورێنمايێن دارايى، راسته‌وخوه ژلايێ وه‌زيرێ باژێرڤانيان دێ هێنه خه‌رج كرن وبۆ كه‌رتێ گشتى دێ هێنه بكارئينان.
جڤاتا وه‌زيران، هوشدارى دا ل وێ چه‌ندێ هه‌كه ل ده‌مێ سه‌رپێچيكرنێ يان نه‌دانا كرێ ورسوماتان، باژێرڤانى ول دووڤ قانوونا داهاتيێ باژێرڤانيان دێ ره‌فتارێ ل گه‌ل سه‌پێچكاران كه‌ت.
ئه‌ڤرۆنيوز:
پارێزگه‌رێ دهۆكێ فه‌رهاد ئه‌مين ب هه‌لكه‌فتا هاتنا سالا زاينێ يا نوو 2018 ئه‌ڤ پيرۆزباهى يه به‌لاڤكر، ئه‌ڤه ژى ده‌قێ وێ يه:
ب هه‌لكه‌فتا هاتنا سه‌رێ سالا زاینی یا نوو ب ناڤێ كارگێریا پارێزگه‌ها دهوكێ گه‌رمترین وجوانترین پیروزباهیا ل پێشمه‌رگێن قه‌هره‌مان ول مالباتێن سه‌ربلندێن شه‌هیدان و خه‌لكێ پارێزگه‌هێ ب هه‌موو ئول و نه‌ته‌وه‌ڤه دكه‌ین.
هیڤیدارین سالا نوو یا زاینی ببیته سالا خێر و خۆشی و به‌ره‌كه‌تێ بۆ ملله‌تێ مه و هه‌موو ئاسته‌نگ و قه‌یران و ئالۆزی ب دووماهی بهێن و گه‌لێ مه ب هیڤیێن خوه شاد ببیت.
دوباره سالا نوو ل هه‌وه پیرۆز بیت
فه‌رهاد ئه‌مین ئه‌تروشی
پارێزگه‌رێ دهوكێ
31/ 12 /2017
نيشاندان