ئه‌ڤرۆنيوز:
وه‌زاره‌تا خواندنا بلند وڤه‌كۆلينێن زانستى ل هه‌رێما كوردستانێ برياره‌كا نوو بۆ قوتابيێن ماسته‌رێ ودكتۆرايێ ده‌ردكه‌ت.
ل دووڤ نڤيسارا وه‌زاره‌تا خواندنا بلند يا هژمار 710 ل 14/1/2018، رينماييه‌ك ل دۆر قوتابيێن ماسته‌رێ ودكتۆرايێ ده‌ركريه وتێدا ده‌مێ سێ هه‌يڤێن دى ده‌ليڤه دايه وان قوتابيان بۆ بده‌ستڤه‌ئينانا مه‌رجێ شيانا زمانێ ئێنگليزى.
ديسا گوهۆرينه‌ك ژى كريه كو ژ نوكه وپێڤه ناڤێن قوتابيان ناهێنه ژێبرن، به‌لكو ناڤێن به‌ربژارێن خواندنا بلند دێ هێنه هه‌لوه‌شاندن و پێدڤيه به‌ربژارێن پارالێل 10% كريا خواندنێ بده‌ن.
ئه‌ڤرۆنيوز:
ژێده‌ره‌كێ ئاگه‌هدار ئاشكراكر كو دانوستاندن دناڤبه‌را ليستا ده‌وله‌تا قانوونێ ب سه‌رۆكاتيا نورى مالكى وليستا فه‌تح ب سه‌رۆكاتيا هادى عامرى يا ده‌ستپێكرى بۆ پشكداريێ ب ئێك ليست دهه‌لبژارتنێن عيراقێ دا
وى ژێده‌رى گۆت ژى” پشتى خوه‌ڤه‌كێشانا چه‌ند لايه‌نێن سه‌ره‌كى ژ ليستا حه‌يده‌ر عه‌بادى، هادى عامرى ونورى مالكى ده‌ست ب دانوستاندنان كريه”.
دياركر” دانوستاندنێن عامرى ومالكى بۆ وێ چه‌ندێ يه هه‌ردو ليستێن ده‌وله‌تا قانوونێ وفه‌تح ببنه ئێك ليست وهه‌تا نوكه نه‌گه‌هشتينه رێككه‌فتنێ ودانوستاندنێن وان دبه‌رده‌وامن”.
ئه‌ڤرۆنيوز:
رێكس تێله‌رسن وه‌زيرێ ده‌رڤه‌يێ ئه‌مريكا، ئێڤاريا دوهى دوشه‌مبى 15/1/2018، په‌يوه‌نديه‌كا ته‌له‌فۆنى ل گه‌ل نێچيرڤان بارزانى سه‌رۆك وه‌زيرێن هه‌رێما كوردستانێ ئه‌نجامدا.
مالپه‌رێ فه‌رميێ سه‌رۆكاتيا جڤاتا وه‌زيرێن هه‌رێمێ، ئه‌ڤرۆ سێشه‌مبى به‌حسێ په‌يوه‌نديا ته‌له‌فۆنى يا دوهى دكه‌ت ودبێژيت” وه‌زيرێ ده‌رڤه‌يێ ئه‌مريكا دوێ په‌يوه‌نديا ته‌له‌فۆنى دا دياركر كو ئه‌مريكا به‌رده‌واميێ ب گرنگيدانێ ب په‌يوه‌نديێن خوه ل گه‌ل هه‌رێما كوردستانێ دده‌ت”.
تيله‌رسنى خوه‌شحاليا خوه دياركر ب وان ديدار وكۆمبوونێن ئاڤاكه‌ر ئه‌وێن دناڤبه‌را شاندێن هه‌رێما كوردستانێ وحوكمه‌تا عيراقێ ب مه‌ره‌ما چاره‌سه‌ركرنا كێشان دهێنه ئه‌نجامدان، دستوورێ عيراقێ ژى ب رێ چاره بۆ چاره‌سه‌ركرنا كێشان زانى وبه‌رهه‌ڤيا خوه بۆ پشته‌ڤانيكرنێ ل دانوستاندنێن دناڤبه‌را به‌غدا وهه‌ولێرێ نشان دا بۆ به‌رهنگاريا هه‌ر مه‌ترسيه‌گێ ژى پشتى ب دووماهى هاتنا داعشێ ورێگرتنێ ل سه‌رهلدانا هه‌ر جۆره توندوتيژيه‌كێ، دووپاتى ل سه‌ر گرنگيا هاريكاريێ وهه‌ماهه‌نگيا زێده‌تر يا هه‌رێما كوردستانێ وحوكمه‌تا عيراقا فيدرال وئه‌مريكا كر.
وه‌زيرێ ده‌رڤه‌ىێ ئه‌مريكى پشته‌ڤانيا وه‌لاتێ خوه ل پرۆسا ديموكراسى وهه‌لبژارتنان ل عيراقێ وهه‌رێما كوردستانێ ده‌ربرى، هه‌روه‌سا هێڤي خواست حوكمه‌تا هه‌رێما كوردستانێ د به‌رهنگاريا وان قه‌يرانێن تووشبوويێ يا سه‌ركه‌فتى بيت ودڤى بوارى دا پشته‌ڤانيا وه‌لاتێ خوه دووپاتكر.
ژلايێ خوه‌ڤه سه‌رۆك وه‌زيرين هه‌رێما كوردستانێ سوپاسيا وه‌زيرێ ده‌رڤه‌يێ ئه‌مريكى كر بۆ پشته‌ڤانيێ ل هه‌رێما كوردستانێ ودياركر كو نوكه ژى مه‌ترسيا سه‌رهلدانا توندوتيژيێ يا هه‌ى وب پێدڤى زانى هه‌رسێ لايه‌نێن هه‌رێما كوردستانێ وحوكمه‌تا عيراقا فيدرال وئه‌مريكا ل سه‌ر ميكانيزمه‌كێ هه‌ڤپشك كاربكه‌ن بۆ به‌رهنگاريا وێ دنوكه دا و ل پاشه‌رۆژێ ژى.
نێچيرڤان بارزانى دياركر كو هه‌رێما كوردستانێ به‌رده‌وام يا به‌رهه‌ڤبوو بۆ ده‌ستپێكرنا دانوستاندنێ وچاره‌سه‌ركرنا كێشان ل گه‌ل به‌غدا ودانوستاندنێن شاندێن به‌غدا وهه‌ولێرێ ل رۆژێن بۆرى ب ئه‌رێنى هژمارتن وبۆ به‌ر ب پێشڤه‌برنا زێده‌تر يا دانوستاندنان ژى پشته‌ڤانيا هه‌موو لايه‌كى ب پێدڤى زانى.
سه‌رۆك وه‌زيرێن هه‌رێمێ دياركر ژى كو هه‌ولێر، واشنتۆن ب هه‌ڤپه‌يمانا خوه دزانيت وبۆ ده‌ربازكرنا ڤێ ره‌وشا نوكه ژى، پێدڤى ب پشته‌ڤانيا دۆستێن خوه يا هه‌ى، هه‌روه‌سا دياركر كو پرۆسا سياسى ل هه‌رێما كوردستانێ وهه‌لبژارتن پرۆسه‌كا جدى يه.
ئه‌ڤرۆنيوز:
وه‌زيرێ دارايى وئابوورى ل هه‌رێما كوردستانێ راگه‌هاند، پێدڤيه ئێدى مووچه‌خۆرێن راسته‌قينه نه‌بنه قوربانيێن ب نه‌ره‌وا مووچه‌ى وه‌ردگرن.
رێباز حه‌ملان، وه‌زيرێ دارايى وئابوورى ل هه‌رێمێ، ل دووڤ مالپه‌رێ فه‌رميێ وه‌زاره‌تێ، ئه‌ڤرۆ سێشه‌مبى دپێشوازيا كونسۆلێ فه‌ره‌نسا ل هه‌رێمێ (دۆمه‌نيك ماس) راگه‌هاند” هه‌رێما كوردستانێ پێدڤى ب ريفۆرمه‌كا جدى يا هه‌ى بۆ وێ چه‌ندێ ئێدى مووچه‌خۆرێن راسته‌قينه نه‌بنه قوربانيێن وان كه‌سێن ب نه‌ره‌وا مووچه‌ى وه‌ردگرن”.
گۆت ژى” بۆ ڤێ بابه‌تى دێ پێنگاڤێن گرنگ هاڤێژين”.
ئه‌ڤرۆنيوز:
دبرياره‌كێ دا كو ئه‌ڤرۆ سێشه‌مبى 16/1/2018 هاتيه ده‌ركرن، قايمقاميا قه‌زا سۆران يا سه‌ر ب پارێزگه‌ها هه‌ولێرێ ڤه بهايێ گوشتى ئه‌رزانكر.
قايمقاميا قه‌زا سۆران ب نڤيسارا هژمار 74 ل 16/1/2018 بريارا ئه‌رزانكرنا گوشتى ده‌ركريه وئاراسته‌ى هه‌ر ئێك ژ هوبا ئابوورى ل رێڤه‌به‌ريا ئاسايشا سۆران وريڤه‌به‌ريا پۆليسێن سۆران ولژنا ئابوورى يا قايمقاميێ وهه‌موو قه‌ساب ودوكانێن گوشت فرۆشان كريه.
دوێ بريارێ دا هاتيه” مه بريار دا بهايێ گه‌شتى ل سۆران وده‌وروبه‌ران ب ڤى شێوێ ل خوارێ بهێته فرۆشتن هه‌ر ژ رۆژا ده‌ركرنا ڤێ بريارێ” :
ئه‌ڤرۆنيوز:
به‌رپرسه‌كێ وه‌زاره‌تا دارايى دياركر، بۆ به‌لاڤكرنا مووچێ فه‌رمانبه‌ران ئه‌و چاڤه‌رێ 20 هه‌تا 25 ڤێ هه‌يڤێ دكه‌ن.
مه‌ولود سابر عه‌لى، رێڤه‌به‌رێ به‌نكێ ل وه‌زاره‌تا دارايى ل هه‌رێما كوردستانێ راگه‌هاند” بۆ ده‌ستپێكرنا به‌لاڤكرنا مووچێ فه‌رمانبه‌ران، ئه‌م چاڤه‌رێ هه‌فتيا داهاتى دكه‌ين”.
مه‌ولودى زێده‌تر بۆ باس گۆت” هه‌كه به‌غدا ل 20 هه‌تا 25 ڤێ هه‌يڤێ مووچێ هه‌ردو وه‌زاره‌تێن په‌روه‌ردێ وساخله‌ميێ بده‌ت، وى ده‌مى وه‌زاره‌تا دارايى ل هه‌رێمێ دشێت ب ساناهى مووچێ وه‌زاره‌تێن دى به‌لاڤ بكه‌ت”.
ئاماژه دا” هه‌كه به‌غدا مووچێ وان هه‌ردو وه‌زاره‌تان ب هنێريت يان نه هنێريت، دێ ل پشتى 20 ڤێ هه‌يڤێ ده‌ست ب به‌لاڤكرنا مووچه‌ى هێته كرن”.
ديسا گۆت” ئه‌م هه‌تا 20 هه‌تا 25 هه‌يڤێ دێ چاڤه‌رێ كه‌ين بزانين ئه‌و ئاخڤتنێن به‌غدا دكه‌ت دێ به‌ته سه‌رى يان نه، هه‌كه مووچێ هه‌ردو وه‌زاره‌تێن په‌روه‌ردێ وساخله‌ميێ بده‌ت، دێ به‌لاڤكرنا مووچه‌ى ب ساناهى تر بيت، هه‌كه مووچێ وان ژى نه هنێريت، به‌لاڤكرنا مووچه‌ى ناراوه‌ستيت، به‌لكو دێ به‌رده‌وام بيت”.
ئه‌ڤرۆنيوز:
به‌رى نيڤرۆيا ئه‌ڤرۆ سێشه‌مبى 16/1/2018، هاولاتيه‌كى خوه خه‌ندقانديه ودووماهى ب ژيانێ خوه ئينايه.
رێڤه‌به‌ريا پۆليسێن پارێزگه‌ها سلێمانيێ به‌لاڤكر كو ئه‌ڤرۆ ل سه‌نته‌رێ باژێرێ سلێمانيێ هاولاتيه‌كێ 63 سالى خوه خه‌ندقانديه.
دياركر ژى كو ئه‌گه‌رێ وێ روودانێ يا ديارنينه وته‌رمێ وى يێ هاتيه هنارتن بۆ نوشداريا داد وڤه‌كۆلين ژى يا به‌رده‌وامه.
هه‌ر دوهى دوشه‌مبى 15/1/2018، رێڤه‌به‌ريا پۆليسێن سلێمانيێ به‌لاڤكربوو كو وه‌لاتيه‌كێ 53 سالى كو زێره‌ڤانێ مه‌ده‌نى بوو ل كومپا نوو يا زانكۆيا سلێمانيێ خوه خه‌ندقانديه.
ئه‌ڤرۆ نيوز، نيوار محه‌مه‌د سه‌ليم:
پشتى به‌لاڤبوونا ده‌نگويێ وێ چه‌ندێ كو بيڤه‌له‌رزه‌كێ ل پارێزگه‌ها دهۆكێ دايه، رێڤه‌به‌ريا سه‌قاناسى و بيڤه‌له‌رزێ ل پارێزگه‌ها دهۆكێ راگه‌هاند كو چو تشتێ وه‌سان نينه.
ئه‌ڤرۆ سپێدێ ده‌نگويێ وێ چه‌ندێ به‌لاڤبوو كو بيڤه‌له‌رزه‌كێ ل پارێزگه‌ها دهۆكێ دايه و وه‌لاتيان هه‌ست پێكريه و ڤێ چه‌ندێ ژى ده‌نگڤه‌دانه‌كا مه‌زن ل تۆڕێن جڤاكى ڤه‌دا.
ئۆمێد مايى، رێڤه‌به‌رێ سه‌قاناسى و بيڤه‌له‌رزێ ل پارێزگه‌ها دهۆكێ راگه‌هاند كو ئه‌ڤرۆ چو بيڤه‌له‌رزان ل دهۆكێ نه‌دايه و ئاميرێن تايبه‌تمه‌ند ژى چو پله نه‌خواندينه.
ئاشكه‌را ژى كر كو ژبلى ئاميرێن وان ئه‌وان ته‌ماشه‌ى ژێده‌رێن خوه ژى كريه، به‌لێ ل چو جهه‌كى چ رێژه نه‌هاتينه تۆماركرن و چو تشتێ وه‌سان نه‌بوويه.
ئه‌ڤرۆ نيوز:
رێڤه‌به‌ريا گشتى يا سه‌قاناسى و بيڤه‌له‌رزێ ل هه‌رێما كوردستانێ راگه‌هاند كو ل دووماهيا ڤێ حه‌فتيێ دێ پێله‌كا به‌فر و بارانان ب سه‌ر هه‌رێما كوردستانێ دا هێت.
پشكا پێشبينيان ب رێڤه‌به‌ريا گشتى يا سه‌قاناسى و بيڤه‌له‌رزان ل هه‌رێما كوردستانێ راگه‌هاند كو رۆژا پێنجشه‌مبى 18ى كانوونا دويێ 2018 ل ده‌مێ سپێدێ زوو دێ هه‌وايه‌كێ سار ل ناڤه‌راستنا ئورۆپا كار كه‌ته سه‌ر ده‌ڤه‌رێ ب ته‌مامى.
ئاشكه‌را ژى كريه كو هه‌ر رۆژا پێنجشه‌مبى باران بارين دێ ب ره‌نگه‌كێ ڤه‌قه‌تيايى ل ده‌ڤه‌رێن جودا باريت و به‌فر بارين ژى دێ ل ده‌ڤه‌رێن چيايى و بلند ده‌سپێكه‌ت.
پشكا پێشبينيان خۆيا ژى كر كو رۆژا ئه‌ينى ژى ئاستێ باران و به‌فرێ دێ زێده‌تر لێ هێت و پاش كارتێكرنا ڤێ پێلێ دێ زێده بيت ب ره‌نگه‌كى كو ل هه‌موو ده‌ڤه‌رێن چيايى ئه‌وێن ژ هزار مه‌تران زێده‌تر دێ به‌فر باريت ل گه‌ل زێده‌بوونا كارتێكرنا ڤێ فشارێ دێ ل پارێزگه‌هێن دهۆك و سلێمانيێ به‌فر باريت.
رێڤه‌به‌ريا گشتى يا سه‌قاناسى و بيڤه‌له‌رزێ ل هه‌رێما كوردستانێ ئاماژه ب وێ چه‌ندێ ژى كريه كو توز ژى دێ ژ ده‌ڤه‌رێن باشوور و ناڤه‌راستنا عيراقێ ژ ئه‌گه‌رێ زێده‌بوونا باى كو دگه‌هيته زێده‌ترى 30كم د ده‌مژمێره‌كێ دا دێ ب سه‌ر ده‌ڤه‌رێ دا هێت.
نه‌ڤه‌شارتيه ژى كو پلێن گه‌رمێ ژى دێ هێنه خار و ل ده‌ڤه‌رێن چيايى دێ چيته د بن سفرێ دا، رێژا باران بارينێ دێ ل سه‌نته‌رێ پارێزگه‌هان ب ڤى ره‌نگى بيت:
هه‌ولێر زێده‌ترى 20ملم.
دهۆك زێده‌تر 30ملم.
سلێمانى زێده‌ترى 30 ملم.
کرکووک 15-20 ملم.
هەڵەبجە زێده‌ترى 25 ملم.
پشكا پێشبينيان دايه زانين ژى كو ل رۆژا شه‌مبى كارتێكرنا ڤێ فشارێ دێ ل دانێ پشتى نيڤرۆ ل سه‌ر هه‌رێما كوردستانێ ب دووماهى هێت.
نيشاندان