ئه‌ڤرۆ نيوز:
سه‌رۆك وه‌زيرێن هه‌رێما كوردستانێ په‌يامه‌ك ئاراسته‌ى خونيشاده‌رێن باشوورێ كوردستانێ كرن و راگه‌هاند: نوكه هه‌رێما مه يێ د ره‌وشه‌كا نازك دا ده‌رباز دبيت، ئه‌ز ژ داخوازيێن وه تێدگه‌هم و هه‌ڤسوزم ل گه‌ل وه، ده‌برينا ئاشتيانه يا بيروبوچوونان مافه‌كێ شه‌رعى و ديموكراسى يه، به‌لێ توندوتيژى چ ده‌مه‌كى يا په‌سه‌ند نينه، له‌وما داخوازێ ژ هه‌وه دكه‌م ب ئاشتيانه داخوازيێن خوه ده‌رببرن.
ئه‌ڤرۆنيوز، عه‌زيز هه‌ورامى
ئه‌ڤرۆ ل هه‌له‌بجه خوه‌نيشادان هاته ئه‌نجامدان وخوه‌نيشانده‌ر چوونه سه‌ر هژماره‌كا باره‌گێن حزبى ژوان باره‌گايێ ئێكه‌تى نيشتمانى كوردستان، به‌لێ هه‌ر زوو زێره‌ڤانێن مه‌لبه‌ندێ 9 يێ شاره‌زوورێ ئێكه‌تيێ ته‌قه ل خوه‌نيشانده‌ران كر وبه‌لاڤه‌كرن، ئه‌ڤ شه‌ڤه ژى ده‌سته‌سه‌ركرنا چالاكڤانان ل هه‌له‌بجه ژلايێ ده‌زگه‌هێن ئه‌منى يێن وى سنورى ده‌ستپێكر.
چالاكڤانێ مه‌ده‌نى (دره‌و مه‌هدى) ئه‌ندامێ گرۆپێ شه‌قام بۆ ئه‌ڤرۆنيوز گۆت” ئه‌ڤ شه‌ڤه هێزه‌كا ئاسايشێ مال ب مالێن ئه‌ندامێن گرۆپێ شه‌قام گه‌ريان كو هاتن سه‌ر مالا من ژى به‌لێ ل وى ده‌مى ئه‌ز ل مال نه‌بووم”.
وى چالاكڤانى گۆ ژى” نوكه ئێك ژ ئه‌ندامێن گرۆپێ مه ب ناڤێ (شه‌مال محه‌مه‌د) يێ هاتيه ده‌سته‌سه‌ركرن ژلايێ وێ هێزێ ڤه وئه‌م هه‌موو ئه‌ندامێن دى يێن گرۆپێ ژترسێن ده‌سته‌سه‌ركرنێ يێن ژمالێن خوه ده‌ركه‌فتين”.
گۆت ژى” پاراستنا گيانێ مه د ستوويێ ده‌زگه‌هێن ئه‌منى ل هه‌له‌بجه دايه”
ئه‌ڤرۆنيوز:
ل رۆژا دويێ ژ خوه‌نيشادانان، ئه‌ڤرۆ ل سنورێ پارێزگه‌ها سلێمانيێ وئيدارا راپه‌رين وگه‌رميان هێرش هاتنه كرن ل سه‌ر باره‌گايێن پارتى وهنده‌ك لايه‌نێن دى.
كوسره‌ت نه‌جات كادرێ پێشكه‌فتيێ پارتى دناڤ لقێ 11 پارتى ل رانيا بۆ مالپه‌رێ فه‌رميێ پارتى گۆت” هنده‌ك چه‌كداران هێرش ب كلاشينكوف وبيكه‌يسيان كريه سه‌ر باره‌گايێ لقێ”.
پشتى وان چه‌كداران باره‌گايێ لقێ 11 دۆرپێچكرى رابوون ب سۆتنا وى، عومه‌ر خدر كارگێرێ لقێ 11 گۆت” ئه‌وا رووداى خوه‌نيشادان نه‌بوو، به‌لكو ب شێوه‌كێ رێكخستى ته‌قه ل باره‌گايێ پارتى هاته كرن”.
ئه‌ڤرۆنيوز:
ل دووڤ داخوازا پارێزگه‌رێ سلێمانيێ ، وه‌زاره‌تا ره‌وشه‌نبيرى ولاوان ل هه‌رێما كوردستانێ بريارا راگرتنا به‌خشێ كه‌نالێ NRT دايه.
ل دووڤ نڤيسارا وه‌زاره‌تا ره‌وشه‌نبيرى ولاوان يا هژمار 5002 ل 19/12/2017 كو ب ئيمزايا وه‌زيرێ ره‌وشه‌نبيرى ولاوان (خالد عه‌بدولره‌حمان دۆسكى) يه، هاتيه” ئاماژه ب برگا دو ژ مادێ 5 ژرينمايێن رێكخستنا فريكوانس ل هه‌رێما كوردستانێ هژمار (1) ل سالا 2014 و ل سه‌ر داخوازا به‌شێ مۆنيته‌رينگ ل وه‌زاره‌تا ره‌وشه‌نبيرى ولاوان وپه‌يوه‌نديا ته‌له‌فونى يا هه‌ڤال ئه‌بوبه‌كر پارێزگه‌رێ سلێمانيێ كو كه‌نالێن NRT كوردى وعه‌ره‌بى خه‌لكى هاندده‌ن بۆ خوه‌نيشادانان ولڤاندنا وان بۆ كارێن توندوتيژيێ كو ئه‌ڤه ژى بوويه ئه‌گه‌رێ سوتنا فه‌رمانگه‌هێن حكومى وجهێن گشتى”.
دوێ نڤيسارا وه‌زاره‌تا ره‌وشه‌نبيرى دا هاتيه ژى” مه برياردا ب داخستنا كه‌نالێن NRT بۆ ده‌مێ هه‌فتيه‌كێ ژ رۆژا راگرتنا وان”.
ئه‌ڤرۆنيوز، عه‌زيز هه‌ورامى
ئه‌ڤ شه‌ڤه ده‌ست ب سه‌ر كه‌نالێ NRT دا هاته گرتن كو سه‌ر ب بزاڤا نه‌وه‌ى نوێ ڤه‌يه.
كارمه‌نده‌كێ كه‌نالێ NRT كو نه‌ڤيا ناڤێ وى به‌لاڤ ببيت بۆ ئه‌ڤرۆنيوز گۆت” نوكه هيزه‌كا مه‌زن يا ئه‌منى هاتيه دناڤ گوندێ ئه‌لمانى دا وده‌ست ب سه‌ر هه‌ردو كه‌نالێن NRT كوردى و NRT عه‌ره‌بى دا گرتوبه‌خشێن وان راوه‌ستاندن.
وى كامه‌ندى دياركر ژى، وي هيزێ چه‌ند كه‌لوپه‌لێن كه‌نالى ژى برن وهه‌موو كارمه‌ندێن NRT ژى هاته ده‌سته‌سه‌ركرن ژلايێ وێ هێزا ئه‌منىڤه.
ل دو رۆژێن بۆرى ل سنورێ سلێمانيێ ورانيا وگه‌رميان وهه‌له‌بجه خوه‌نيشادان هاتن كرن كو چه‌ندين كارێن ئاژاوه‌گێرى تێدا هاتن ئه‌نجامدان وكه‌نالێ NRT هه‌موو روودان به‌خش دكرن.
پارێزگارێ سلێمانيێ دداخۆيانيه‌كێ دا داخواز ژ ده‌زگه‌هێن راگه‌هاندنێ كربوو به‌رپرسيارانه ره‌فتارێ بكه‌ن، هه‌كه نه دێ نه‌چاربين ده‌ست ب سه‌ر وان ده‌زگه‌هان دا بگرين ئه‌وين ئاژاوه‌گێريێ به‌لاڤ دكه‌ن.
كه‌نالێ NRT سه‌ر ب شاسوار عه‌بدولواحد ڤه‌يه كو حزبه‌ك دامه‌زرانديه ب ناڤێ نه‌وه‌ى نوێ، دراگه‌هاندنا خوه دا داخوازا خوه‌نيشادانان ژ خه‌لكێ دكه‌ت.
ئه‌ڤرۆنيوز:
سه‌رۆك وه‌زيرێن عيراقێ، ئه‌ڤرۆ سێشه‌مبى 19/12/2017، دچارچۆڤێ كۆنگرێ رۆژنامه‌ڤانيێ هه‌فتيانه يێ خوه دا به‌حسێ مووچين فه‌رمانبه‌رين هه‌رێما كوردستانێ كر.
حه‌يده‌ر عه‌بادى، سه‌رۆك وه‌زيرين عيراقێ دكۆنگرێ خوه يێ رۆژنامه‌ڤانى دا گۆت” ئه‌م نه‌شێين مووچێن هه‌موو فه‌رمانبه‌رێن هه‌رێما كوردستانێ ب مه‌زێخين”.
ئه‌ڤرۆنيوز:
حوكمه‌تا ئيرانێ چه‌ندين رۆژه به‌رهه‌ڤيا خوه بۆ ڤه‌كرنا خالێن سنورى ل گه‌ل هه‌رێما كوردستانێ دياركريه، به‌لێ هه‌تا نوكه نه‌هاتينه ڤه‌كرن، به‌رپرسه‌كێ پارتى ديموكراتى كوردستان، ئه‌گه‌رێ نه‌ڤه‌كرنا خالێن سنورى ئاشكرا دكه‌ت.
ره‌حمان فه‌زلى وه‌زيرێ ناڤخوه‌يا ئيرانێ ل رۆژا 17/12/2017، راگه‌هاندبوو كوده‌رگه‌هێن سنورى يێن په‌رويز خان وحاج عومران دێ هێنه ڤه‌كرن، ئه‌ڤه سێ رۆژ ب سه‌ر وێ داخۆيانيا وه‌زيرێ ناڤخوه‌يا ئيرانێ ده‌ربازبوون، به‌لێ هه‌تا نوكه ئه‌و هه‌ردو ده‌رگه‌هێن سنورى ل گه‌ل هه‌رێمێ نه‌هاتينه ڤه‌كرن.
كاكه‌مين نه‌جار به‌رپرسێ جڤاتا سه‌ركردايه‌تيا هه‌ولێرێ يا پارتى ديموكراتى كوردستان ئاشكرا دكه‌ت كو حوكمه‌تا به‌غدا ئه‌گه‌رێ سه‌ره‌كيێ نه ڤه‌كرنا وان هه‌ردو ده‌رگه‌هێن سنورى يه.
كاكه‌مين نه‌جار بۆ مالپه‌رێ فه‌رميێ پارتى دبێژيت” ئيرانێ به‌رهه‌ڤيا خوه بۆ ڤه‌كرنا ده‌رگه‌هين سنورى يا دياركرى، به‌لێ ئه‌و داخوازيه ژلايێ سه‌رۆك وه‌زيرێن عيراقێ حه‌يده‌ر عه‌بادى ڤه يا هاتيه ره‌تكرن”.
پشتى چه‌ند رۆژان ژ ئه‌نجامدانا ريفراندۆما سه‌ربخوه‌يا كوردستانێ ل 25/9/2017، ئيرانێ ل سه‌ر داخوازا حه‌يده‌ر عه‌بادى، سێ ده‌رگه‌هێن سنورى يێن هه‌ڤپشك ل گه‌ل هه‌رێما كوردستانێ داخستن، نوكه تنێ ده‌رگه‌هێ سنووريێ پاشماخ يێ ڤه‌كريه.
ئه‌و بريارا حوكمه‌تا به‌غدا، ب هزاران خه‌لك ل هه‌ردو لايێن ده‌رگه‌هين سنورى بێكار كرينه.
ره‌سول خزرى نوونه‌رێ باژێرێن خانێ وسه‌رده‌شت ل په‌رله‌مانێ ئيرانێ ئاشكراكربوو كو تنێ ل لايێ ئيرانێ يێ ده‌رگه‌هێ سنوريێ حاج عومران، نێزيكى 40 هزار كه‌س بێكاربووينه.
وى په‌رله‌مانتارى دياركر، ب مه‌ره‌ما ڤه‌كرنا ده‌رگه‌هێن سنورىێ حاج عومران، ل گه‌ل هاريكارێ سه‌رۆك كۆمارى ووه‌زيرێ ناڤخوه‌يى وكۆمسيۆنا په‌يوه‌نديدار ل په‌رله‌مانێ ئيرانێ كۆمبوويه.
ئه‌ڤرۆنيوز:
مالپه‌رێ (مه‌علومه) ژزارده‌ڤێ ژێده‌ره‌كێ بلند به‌لاڤكر كو باليۆزێ ئه‌لمانيا ل عيراقێ داخوازا سه‌ره‌دانا نێچيرڤان بارزانى بۆ ئه‌لمانيا كربوو، سه‌ره‌دانا سه‌رۆك وه‌زيرێن هه‌رێما كوردستانێ بۆ ئه‌لمانيا ژى، پێشكێشكرنا چه‌كى بۆ كوردان ب خوه‌ڤه دگريت.
وى ژێده‌رى دياركريه ژى، وه‌زاره‌تا ده‌رڤه‌يا ئه‌لمانيا نامه‌ك بۆ به‌غدا هنارتبوو ل دۆر حه‌زا وه‌زيرێ ده‌رڤه‌يێ ئه‌لمانيا “زيگمار گابريێل” بۆ سه‌ره‌دانا عيراقێ، به‌لێ وه‌زاره‌تا ده‌رڤه‌يا عيراقێ نه‌رازيبوونا خوه دياركر پشتى ئاگه‌هدارى خشتێ كارێن وى بووين ل عيراقێ كو سه‌ره‌دانا هه‌رێما كوردستانێ ب خوه‌ڤه دگرت”.
ژێده‌رى ناڤبرى ئاماژه دا” وه‌زاره‌تا ده‌رڤه‌يا ئه‌لمانى ب وێ چه‌ندێ رانه‌وه‌ستيا، به‌لكو داخواز ژباليۆزێ ئه‌لمانى ل عيراقێ كر سه‌ره‌دانا هه‌رێما كوردستانێ بكه‌ت سه‌رۆك وه‌زيرێن هه‌رێما كوردستانێ بۆ سه‌ره‌دانا ئه‌لمانيا داخواز بكه‌ت” دياركر ژى كو مه‌ره‌مێ سه‌ره‌دانا بارزانى” رێككه‌فتنه ل سه‌ر دانا چه‌كى بۆ كوردان كو موشه‌كێن هه‌مه‌جۆر وچه‌كێن گران ب خوه‌ڤه دگريت”.
ئه‌ڤرۆنيوز:
ئه‌ندامه‌كا په‌رله‌مانێ كوردستانێ ژ فراكسيۆنا پارتى ديموكراتى كوردستان، نڤيساره‌كێ ئاراسته‌ى هه‌موو ده‌زگه‌هێن ئه‌منى ل سنوێ پاريزگه‌ها سلێمانيێ دكه‌ت وتێدا داخوازا پاراستنا گيانێ كادرێن پارتى دكه‌ت.
حه‌يات مه‌جيد ئه‌نداما په‌رله‌مانێ كوردستانێ ژفراكسيۆنا پارتى دوێ نڤيسارێ دا، داخوازێ ژپاريزگه‌هێن سلێمانيێ وهه‌له‌بجه وئيدارا راپه‌رين دكه‌ت كو ئه‌ركێ وان پاراستنا گيانێ كادرێن پارتى بيت .
ئه‌و په‌رله‌مانتاره، پاراستنا گيانێ كادرێن پارتى دئێخيته ستوويێ پاريزگه‌رێ سلێمانيێ وده‌زگه‌هين ئه‌منى.
ل دووڤ وێ نڤيسارێ، باره‌گايێن پارتى ل سنورێ سلێمانيێ يێن بووينه ئارمانجا هێرشێن خوه‌نيشانده‌ران.
ئەڤرۆ نیوز، نەوزاد هلۆری:
ب هەلکەفتا روژا ئالایێ کوردستانێ ، رێڤەبەریا ڤیتەرنەریا پارێزگەها دهۆکێ ، کونفرانسێ پێنجێ یێ نەخۆشیێن پەلەوەران ل پارێزگەها دهۆک ئەنجامدا و تێدا کۆمەکا تەوەرێن گرێدای نەخۆشیێن مریشک و رێگریێن فروتنا بەرهەمێ وان و رێیێن چارەسەریێ هاتنە بەحسکرن.
دلشێر رەجەب، بەرپرسێ پشکا پەلەوەران ل رێڤەبەریا ڤیتەرنەريێ ل پارێزگەها دهۆکێ بۆ ئەڤرۆ نیوز گۆت” دكونفرانسى دا چه‌ندين تەوەرێن گرێدای نەخۆشیێن مریشک و رێگریێن فروتنا بەرهەمێ وان و رێیێن چارەسەریێ ژلایێ کەسانێن تایبەتمەند و بسپور و خودانێن کۆمپانی و پرۆژێن مریشکان هاتنە بەحسکرن و کونفرانس ژی بەردەوامە و ئەڤرۆ ئێڤاری دێ دووماهی ب کارێن خوە ئینیت و هەموو ئەنجام و راسپاردەیێن کونفراسی دێ بۆ جهێن شولەژێ هێنە بلندکرن ب مەرەما چارەسەرکرنێ”.
زێدەتر گۆت”ل پارێزگەها دهۆکێ 267 پرۆژێن مریشکان هەنە کو دو ژ وان تایبەتن ب درۆستکرنا چیچەلوکان ڤە ، هەموو مریشکێن پارێزگەها دهۆک د هێنە رەوانەکرن بۆ دەرڤەی هەرێما کوردستانێ ب تایبەتی بۆ باشوورێ عیراقێ ، بەلێ د بەرامبەر دا پارێزگەها دهۆک پشت بەستنێ ب مریشکا هاوردەکری دکەت بۆ دابینکرنا پێدڤیێن بازاری و وەلاتیان”.
دیارکر ژی کو خودان پرۆژێن مریشکان ل دهۆکێ دشێن 15 ملیون مریشکان سالانە بەرهەم بینن و گۆت ” سالانە ل دهۆکێ زێدەتر ژ 30 ملیون کیلویێن گوشتێ مریشکێ دهێتە بەرهەم ئینان ، دیسان سالانە 140 ملیون چیچەلوکان بەرهەم دئینن بەلێ ئەوان چیچەلوکان ژی وەکو مریشكان دهينه هنارتن بۆ دەرڤەی هەرێمێ “.
ل دۆر ئاریشەیێن خودانکرنا مریشک و پرۆژەیێن وان ، دلشێری گۆت” ئاریشا پارێزگەها دهۆک ئەوە کو ل سنورێ وێ چو بازار ل ناڤخوە نینن بۆ فروتنا مریشکان، ژبەرڤێ چه‌ندێ ب نەچاری هەمووان ژ دەرڤە دفروشن ، د کونفرانسا ئەڤرۆ دا دێ بەحس ل پەیداکرنا بازارەکێ ناڤخوەی هێتەکرن”.
نيشاندان