ئه‌ڤرۆ نيوز:
پشتى 5 سالان، ئه‌ڤرۆ نه‌فتێ بها و ريكورده‌كا نوو تومار كر و بهايێ ئێك به‌رميلا نه‌فتا برێنت گه‌هشته 65 دولار و 25 سه‌نتان.
ل دووڤ پێشبينيا شاره‌زايێن بوارێ ئابوورى، دهێته چاڤه‌رێكرن ل چارێكا سالا بهێت بهايێ نه‌فتێ زێده‌تر بلند ببيت.
كوردان ژبه‌ر ژ ده‌ستدانا نه‌فتا كه‌ركووكێ، خێر ژ بلندبوونا بهايێ نه‌فتێ نه‌ديت.
بلندبوونا بهايێ نه‌فتێ پشتى درێژكرنا رێككه‌فتنا ناڤبه‌را ئوپێك و به‌رهه‌مهێنه‌رێن ده‌رڤه يێن وێ رێكخراوێ دهێن تاوه‌كو دووماهيا سالا 2018 ێ.
ئه‌ڤرۆنيوز:
برياره‌ك بۆ وان فه‌رمانبه‌رێن دخوينن كو مۆله‌تا خواندنێ بۆ نه‌هاتيه دان دێ هێته ده‌ركرن، به‌رپرسه‌ك ژى ئاشكرا دكه‌ت كو پشتى برياردانێ دێ باوه‌رنامين وان بۆ هێنه هژمارتن.
ل دووڤ نڤيساره‌كا وه‌زاره‌تا خواندنا بلند وڤه‌كۆلينێن زانستى، وه‌زيرێ خواندنا بلند رازيبوونا خوه دياركريه ب پێكئينانا لژنه‌كێ بۆ كۆمكرنا داتا وپێزانينان سه‌باره‌ت وان فه‌رمانبه‌رێن نوكه دخوينن ومۆله‌تا خواندنێ بۆ نه‌هاتيه دان.
ب گۆره‌ى وێ بريارێ، هه‌موو ئه‌و فه‌رمانبه‌رێن ل ناڤخوه وده‌رڤه‌ى هه‌ريمێ دخوينن، به‌لێ ب فه‌رمى مۆله‌ت پێ نه‌هاتيه دان، دشێن باده‌كێن خوه پێشكێشى وه‌زاره‌تێ بكه‌ن بۆ برياردانێ ل سه‌ر.
ئه‌و فه‌رمانبه‌رێن دخوينن، باده‌كێن خوه پێشكێشى پشكا يه‌كسانكرنا باوه‌رنامان ل ديوانا وه‌زاره‌تا خواندنا بلند ب مه‌ره‌ما تۆماركرنا ناڤان، هه‌تا نوكه ژى ب سه‌دان فه‌رمانبه‌ران ناڤێن خوه يێن تۆماركرين بۆ وێ مه‌ره‌مێ، ئه‌و بريار ژى ژهه‌موو فه‌رمانبه‌ران دگريت، نه تنێ فه‌رمانبه‌رێن وه‌زاره‌تا خواندنا بلند.
ل دووڤ برياره‌كا به‌رى نوكه يا وه‌زاره‌تا دارايى ل هه‌رێمێ، هه‌ر قوتابيه‌كێ ل ده‌رڤه دخوينيت ومۆله‌تا خواندنێ نه‌بيت، باوه‌رناما وى بۆ ناهێته يه‌كسانكرن وچو ئيمتياز ژى پێ ناهێن دان.
به‌رى نوكه، هيوا فه‌رزنده سه‌رۆكێ فه‌رمانگه‌ها ته‌كنه‌لوژيا وپێزانينان ل جڤاتا وه‌زيران بۆ ده‌زگه‌هێن راگه‌هاندنێ گۆتبوو” 120 هزار قوتابى كو فه‌رمانبه‌رن ل ده‌رڤه‌ى وه‌لاتى دخوينن كو هنده‌ك ژوان مۆله‌تا خواندنێ پێ نه‌هاتبوو دان”.
ئه‌ڤرۆنيوز:
شيره‌تكارێ ئه‌لمانيا، سباستيان كورتس، راگه‌هاند،هندى توركيا يا به‌رده‌وام بيت ل سه‌ر سياسه‌تا خوه يا نوكه، ئه‌و دئێكه‌تيا ئورۆپى دا ناهێته وه‌رگرتن وه‌كو ئه‌ندام.
كوريتسى بۆ رۆژنامه‌ڤانان گۆت” ئه‌م ل توركيا سه‌رپێچيێن دژى مافێن مرۆڤى وئازاديێن وى دبينين، ونه‌رازيبوونا خوه دياردكه‌م ل سه‌ر هه‌لويستێ ئێكه‌تيا ئورۆپى كو تنێ ته‌ماشه‌كاره”.
گۆت ژى” ل دووڤ روودانێن ڤێ دووماهيێ دبينم كو جهێ توركيا دئێكه‌تيا ئورۆپى دا نينه وپێدڤيه دانوستاندنێن ئه‌ندامبوونا وێ بهێنه راوه‌ستاندن”.
ئه‌ڤرۆنيوز:
جڤاتا ناڤه‌ندێ يا ئێكه‌تى نيشتمانى كوردستان، سانسۆر خسته سه‌ر لاهور شێخ جه‌نگى وداخوازكر داخويانيێن دژى هنده‌ك ژ سه‌ركردێن ئێكه‌تيێ وحزبێن سياسى رابگريت.
ژێده‌ره‌كێ بلند ژئێكه‌تى نيشتمانى كوردستان دياركر” مه‌كته‌با سياسى يا ئێكه‌تيێ، جڤاتا ناڤه‌ندى يا ئێكه‌تيێ ئاگه‌هداركريه كو سنوره‌كى بۆ لاهور شێخ جه‌نگى دانيت، بۆ وێ چه‌ندێ ئێدى ل ده‌زگه‌هێن راگه‌هاندنێ هێرشان ل سه‌ر هنده‌ك سه‌ركردێن ئێكه‌تيێ وپارت ولايه‌نێن سياسى نه‌كه‌ت”.
وى ژێده‌رى بۆ باسنيوز ئاشكراكر” ئه‌و تۆمه‌ت وناڤزراندنا دناڤ ئاخڤتنێن لاهور شێخ جه‌نگى دا هه‌ين، ئێكه‌تى تووشى ئيحراجه‌كا مه‌زن كريه”.
ئه‌ڤرۆنيوز:
حوكمه‌تا عيراقێ برياردا هه‌ركه‌سێ پرۆسا بايۆمه‌ترى يا هه‌لبژارتنان ئه‌نجام نه‌دابيت، پلێتا ئاهێن خوارنێ دێ ژێ هێته برين.
سه‌عد حه‌ديسى، په‌يڤدارێ ئۆفيسا راگه‌هاندنێ يا سه‌رۆك وه‌زيرێن عيراقێ ئاشكراكر” ئه‌و كه‌سێ كارتا بايۆمه‌ترى يا هه‌لبژارتنان دروست نه‌كربيت، دێ پلێتا وى يا ئاهين خوارنێ هيته برين”.
حه‌ديسى بۆ كه‌نالێن راگه‌هاندنێ يێن عيراقى گۆت” بريارا هه‌لوه‌شاندن پلێتا ئاهين خوارنێ يا وان كه‌سێن بايۆمه‌تريا هه‌لبژارتنان ئه‌نجام نه‌داى، بۆ هووربينيێ يه دپێزانينێن وه‌زاره‌تا بازرگانى وكۆمسيۆنا هه‌لبژارتنين عيراقێ”.
دياركر ژى” ئه‌و كاره بۆ هووربينيێ يه ژى دتۆمارێن ده‌نگده‌ران دا ل ناڤخوه وده‌رڤه‌ى عيراقێ، چونكى كۆمسيۆنا بلند يا هه‌لبژارتنان بۆ وێ تۆمارى پشت به‌ستنێ ب پلێتا ئاهێن خوارنێ دكه‌ت”.
ئه‌ڤرۆنيوز:
جێگرێ سه‌رۆكێ فراكسيۆنا پارتى ل جڤاتا نوونه‌رين عيراقێ راگه‌هاند، فشاره‌كا نێڤده‌وله‌تى وناڤخوه‌يى يا مه‌زن ل سه‌ر حه‌يده‌ر عه‌بادى يا هه‌ى بۆ هنارتنا مووچێن خه‌لكێ هه‌رێما كوردستانێ.گ
شاخه‌وان عه‌بدوللا جێگرێ سه‌رۆكێ فراكسيۆنا پارتى ل جڤاتا نوونه‌رين عيراقێ، ل دۆر هاتنا شانده‌كێ عيراقى بۆ هه‌ولێرێ ب سه‌رۆكاتيا مه‌هدى عه‌لاق ئه‌ميندارێ گشتيێ سه‌رۆكاتيا وه‌زيرێن عيراقێ وعه‌قيل خه‌زعه‌لى بريكارێ وه‌زاره‌تا ناڤخوه‌يى كو نوكه ل هه‌ولێرێ نه، بۆ باسنيوز گۆت” ئه‌و دو كه‌سه ژ نڤيسينگه‌ها عه‌بادى نه وسه‌ره‌دانا وان پتر يا سياسى يه، چونكى نوكه فشاره‌كا مه‌زن يا ل سه‌ر حوكمه‌تا عيراقێ دروست بووى كو دڤان ئێك دو هه‌يڤان دا هنارتنا مووچه‌ى وهنده‌ك پاران بۆ هه‌رێما كوردستانێ ئێكلا بكه‌ت”.
ئەڤرۆ نیۆز، سالار دۆسكی
رێڤه‌به‌رێ ئۆفيسا دهۆكێ يا كۆمسیۆنا بلند يا هەلبژارتنان ئاشكراكر كو دەست ب بەهەرڤیێن هەلبژارتنێن 2018 هاتیەكرن، بۆ ڤێ مەرەمێ ئەڤرۆ 24/12/2017 كو رۆژا بهێنڤەدان بوویە كۆمبوونەك ل گەل پارێزگەرێ دهۆكێ ئەنجامدایە.
یوسف سەلمان رێڤه‌به‌رێ ئۆفيسا دهۆكێ يا كۆمسیۆنا بلند يا هەلبژارتنان بۆ ئەڤرۆ نیۆز دياركر كو ئەڤرۆ كومبوونەك ل گەل فەرهاد ئەمین ئەنجامدایە ب وێ مەرەمێ كو بەرهەڤیێن هەلبژارتنان بۆ سالا 2018 و دیسا دانوستاندن ل سەر كارێن كۆمسیۆنێ.
زيده‌تر گۆت، بۆ هه‌لبژارتنين 2018 كۆمسيۆن دێ (41) بنگەهێن دنگدانێ ل سەرتاسەری پارێزگەها دهۆكێ ڤه‌كه‌ت، ديسا يا كار دكه‌ت ل سه‌ر كارتا ده‌نگدانێ.
ئه‌ڤرۆنيوز:
ژئه‌گه‌رێ نه‌خوه‌شيا دلى، په‌يامنێره‌كى د 55 ساليێ دا وه‌غه‌ركر.
په‌يامنێرێ كه‌نالێ (الجزيره) ل چينێ ” عزه‌ت شه‌حرۆر” دژيێ 55 ساليێ دا ژئه‌گه‌رێ نه‌خوه‌شيا دلى ل په‌كين پايته‌ختێ چينێ وه‌غه‌ركر.
ل دووڤ وى كه‌نالى، شه‌حرۆر راگه‌هاندكار ودبلۆماتكاره‌كێ فلستينى بوو، ده‌رچوويي زانكۆيا چينى بۆ زانستێن نوشدارى بوو، ده‌مێ 30 سالان بوو ل چينێ دژيا.
ئه‌ڤرۆنيوز:
مالپه‌ره‌كێ بريتانى به‌حسێ بريارا ترامپى ل دۆر دانپێدانێ ب قودسێ وه‌كو پايته‌ختێ ئيسرائيلێ دكه‌ت وئاماژێ دده‌ت كو ئه‌و بريار هاتيه دان ل دووڤ پێشبينيه‌كا ته‌وراتێ كو گرۆپێ ئه‌نجيليان ل ئه‌مريكا پشت به‌ستنێ ل سه‌ر دكه‌ن، كو ئه‌و چه‌نده بوويه پالده‌ره‌ك بۆ ترامپى وێ بريارێ بده‌ت.
ئه‌نجيلى، بزاڤه‌كا ئايينى يه يا كريستيانى يه، هنده‌ك گرۆپێن پرۆتستانتێن پارێزگار يا دامه‌زراندى و پشت به‌ستنێ ب شرۆڤه‌كرنا حه‌رفى يا ئه‌نجيلى دكه‌ت وكارى بۆ بده‌ستڤه‌ئينانا پێشبينيێن ته‌وراتێ دكه‌ت، ژوان پێشبينيان ژى زڤرينا دويێ يا عيسايێ مه‌سيح.
مالپه‌رێ بريتانى “ميدل إيست ئاى” ئاماژێ دده‌ت كو سه‌رۆكێ ئه‌مريكى، دونالد ترامپ شيره‌تێن هه‌ڤپه‌يمانێن خوه وهوشداريێن هه‌ڤرك ودوژمنان ژى ره‌ت كرن و ل رۆژا چارشه‌مبى 6/12/2017 پلانا ڤه‌گۆهاستنا باليۆزخانا ئه‌مريكى بۆ قودسێ راگه‌هاند.
ل دووڤ هنده‌ك شرۆڤه‌كاران، مافێ ئايينى يا ئه‌مريكى هێزه‌كا پالده‌ر بوو بۆ وێ پێنگاڤا واشنتۆن هێلايه ب تنێ ل جيهانێ ، وه‌كو جوۆنى مۆر ئاماژه پێ داى كو ئه‌وژى په‌يڤدارێ ده‌نگێن باوه‌ريێ يه، كو گرۆپه‌كا سياسى يا ئه‌نجيلى يا مه‌زنه، ناڤبرى بۆ رويته‌رز گۆتبوو” من گۆمان نينه كو ئه‌نجيليان رۆله‌كێ گرنگ دڤێ بريارا ترامپى دا هه‌بوو”.
مالپه‌رێ ناڤبرى دياردكه‌ت كو چه‌ندين گرۆپێن كريستانى به‌ياننامه وهوشدارى داينه ژبۆ كاركرنێ بۆ دانپێدانێ ب قودسێ وه‌كو پايته‌حتێ ئيسرائيلێ.
به‌لاڤكر ژى” به‌رێخودانا چالاكڤانێن سياسى يێن ئه‌نجيلى يێن ئه‌مريكى بۆ كێشا ئيسرائيلێ وفلستينێ ب رێيا توراتێ يه، ئێك ژباوه‌ريێن وان ژى ئه‌وه كو قودس دهه‌موو سه‌رده‌مان دا، يا گه‌لێ جوهى بوويه”.
ئاماژى ژێ دده‌ت كو لايه‌نێ لاهوتى يێ به‌رفره‌هتر بۆ پشته‌ڤانيا ئه‌نجيلى بۆ ئيسرائيلێ، دزڤريت بۆ وێ هزرێ كو دامه‌زراندنا ئيسرائيلێ وپاراستنا وێ وه‌كو ده‌وله‌ته‌كا جوهى، دێ له‌زێ دهاتنا دويێ يا عيسايێ مه‌سيح دا كه‌ت.
مالپه‌رێ ناڤبرى به‌حسێ شيره‌ته‌كا ئاييندارێ ئه‌نجيلى “روبێرت جيفريس” بۆ سه‌رۆكێ ئه‌مريكى ترامپى دكه‌ت، كو ب رێيا كه‌نالێ (CNNيێ ئه‌مريكى گۆتى” قودس بابه‌تێ حه‌زژێكرنێ ونێزيكبوونێ بوو بۆ جوهى وكريستيانان دديرۆكێ دا وجهێ پێشبينيان بوو، به‌لێ يا گرنگتر ژوێ چه‌ندێ ئه‌وه كو خودێ قودس وجهێن دى يێن پيرۆز يێن داينه گه‌لێ جوهى”.
مالپه‌رێ “ميدل إيست ئاى” يێ بريتانى به‌لاڤكريه ژى كو راستره‌وێن كريستيان يێن توندره‌و پشته‌ڤانيه‌كا ب هێز يا ترامپى د هه‌لبژارتنێن سه‌رۆكاتيا ئه‌مريكا دا ئه‌وێن ل چريا دويێ 2016 هاتينه ئه‌نجامدان دكر و ل دووڤ راپرسيان80% ژ ده‌نگده‌رێن ئه‌نجيلى يێن پيست سپى پشته‌ڤانێن وى بوون.
ئه‌ڤرۆنيوز:
سه‌ركردێن هژماركا حزبێن كوردستانى ب نهێنى ودوورى ده‌زگه‌هێن راگه‌هاندنێ، ل گه‌ل حوكمه‌تا عيراقێ كۆمبووينه ودخوازن پشته‌ڤانيا به‌غدا مسوگه‌ر بكه‌ن بۆ نه‌هێلانا حوكمه‌تا هه‌رێما كوردستانێ وپێكئينانا حوكمه‌ته‌كێ ژلايێ خوه‌ڤه ب پشته‌ڤانيا به‌غدا، ئه‌ڤه ژى پشتى خوه‌نيشادانێن ده‌ڤه‌رێن گه‌رميان وسلێمانيێ وراپه‌رين ل 18 ڤێ هه‌يڤێ وڤه‌كێشانا چه‌ند حزبان ژ حوكمه‌تێ.
به‌رپرسه‌كێ سياسى يێ بلند بۆ (العربي الجديد) راگه‌هاند” سه‌ركردێن پشكه‌ك ژ حزبێن ئوپوزسيۆنا كوردستانى، ب نهێنى كۆمبوون ل گه‌ل به‌رپرسێن حوكمه‌تا به‌غدا كرينه ب ئارمانجا بده‌ستڤه‌ئينانا پشته‌ڤانيا به‌غدا بۆ خوه‌نيشادانان وبكارئينانا خوه‌نيشادانان بۆ ژناڤبرنا حوكمه‌تا هه‌رێما كوردستانێ وپێكئينانا حوكمه‌ته‌كا سه‌ر ب به‌غدا ژلايێ وان حزبێن ئوپوزسيۆنێ”.
زێده‌تر گۆت” ئه‌و لايه‌ن دخوازن ناكۆكيێن دناڤبه‌را به‌غداوهه‌ولێرێ ب ده‌ليڤه ببينن وبه‌رژه‌وه‌نديێن خوه بده‌ستڤه‌بينن، جاده وخه‌لكێ كوردستانێ ژى بكه‌نه ئامرازه‌ك وبكاربينن، تاكو ب خوه حوكمه‌ته‌كا سه‌ر ب به‌غداڤه ل هه‌رێما كوردستانێ دروست بكه‌ن”.
وى ژێده‌رێ سياسى گۆت” وان لايه‌نان داخواز ژ به‌غدا كريه ده‌رگه‌هێ دانوستاندنێ ل گه‌ل حوكمه‌تا هه‌رێمێ ڤه‌نه‌كه‌ت وسزايێن ل سه‌ر كوردستانێ گرانتر بكه‌ت بۆ وێ چه‌ندێ جادێ وخه‌لكى زێده‌تر بلڤينن ودوماهيێ ب حوكمه‌تا هه‌رێمێ بينن ب توندوتيژى وب زۆرى حوكمه‌تا عيراقێ ژى دڤێت حوكمه‌تا هه‌رێمێ بێخيته دبن كونترۆلا خوه‌ڤه، لڤاندنا جادێ ژى دبه‌رژه‌وه‌نديا به‌غدا دايه بۆ زالبوونێ ب سه‌ر حوكمه‌تا هه‌رێمێ دا”.
(العربي الجديد) به‌لاڤكريه، بۆچوونێن حزبێن كوردى يێن ئوپوزسيۆن و هه‌ڤپه‌يمانيا نيشتمانى يا شيعه‌يه ژهه‌ڤدو دنيزيكن وسه‌ركرده وپه‌رله‌مانتارێن هه‌ڤپيه‌مانيا نيشتمانى يا شيعى ژى داخواز دكه‌ن ب چو شێوه‌كى دانوستاندن ل گه‌ل هه‌ولێرێ نه‌هێنه كرن، هه‌ڤده‌م حوكمه‌تا به‌غدا ژى ل دۆر پرسا دانوستاندنان ل گه‌ل هه‌ولێرێ دبێژيت، دێ ل گه‌ل وان لايه‌نان دانوستاندنێ كه‌ت كو نوونه‌راتيا گه‌لێ كورد دكه‌ن، نه‌كو وان حزبێن ده‌ستهه‌لاتا هه‌رێمێ دده‌ستدا، ڤێ چه‌ندێ ژى ئالۆزى كوورتر كرينه.
نيشاندان