ئه‌ڤرۆ نيوز:
په‌رله‌مانێ كوردستانێ ب پرانيا ده‌نگان قانوونا لێبورينا گشتى په‌سه‌ند كر و ئه‌و سزاداييێن بريارا سێداره‌دانێ بو ده‌چووى، سزايێ وان بۆ 15 سالان زيندانى هاته كێمكرن ، به‌لێ ژ پشكه‌كێ ز زيندانيان ناگريت.
ل دووڤ قانوونا هاتيه په‌سه‌ندكرن، ئه‌ڤ لێبورينه ژ تاوانێن وه‌كو تيرور و يێن سه‌را كوشتنا ژنان هاتيه سزادان ناگريت.
ئه‌ڤرۆنيوز:
سه‌رۆك وه‌زيرێن عيراقێ، حه‌يده‌ر عه‌بادى، ئه‌ڤرۆ ئێكشه‌مبى 17/12/2017، پێشوازى ل بابا شێخ مه‌رجه‌عێ بلند يێ ئێزديان كر وبۆ دياركر كو به‌غدا يا رژده ل سه‌ر ڤه‌گه‌راندنا ئاوارێن ئێزدى بۆ جهێن وان.
ئوفيسا راگه‌هاندنا سه‌رۆك وه‌زيرێن عيراقێ راگه‌هاند، حه‌يده‌ر عه‌بادى دچارچۆڤێ پێشوازيێ ل باباشێخ (خرتو ئيسماعيل) مه‌رجه‌عێ بلند يێ ئێزديان وشاندێ دگه‌لدا، گۆت” چو پێكهاتێن گه‌لێ عيراقێ ژ تاوانێن تيرۆرستێن داعشێ رزگار نه‌بووينه، ژوان ژى پێكهاتێ ئێزدى”.
عه‌بادى گۆت ژى” به‌غدا يا رژده ل سه‌ر دووڤچوونا تاوانێن دژى ئێزديان هاتينه كرن، ژ ده‌ربه‌ده‌ركرن وكوشتنێ، ودێ حوكمه‌تا عيراقێ كارى بله‌ز ل سه‌ر ڤه‌گه‌راندنا ئاوارێن ئێزدى بۆ ده‌ڤه‌رێن وان كه‌ت، پشتى پشت راستبوونێ ژ پاقژكرنا وان ده‌ڤه‌ران ژ مين وته‌قه‌مه‌نيان وبجهئينانا پلانا پشته‌ڤانيا سه‌قامگيريێ ل وێ ده‌ڤه‌رێ ب هاريكاريا جڤاكێ نێڤده‌وله‌تى، زێده‌بارى لێگه‌ريانا به‌رده‌وام ل قوربانيێن تيرۆرێ”.
ئه‌ڤرۆ نیوز:
نێچیرڤان بارزانى سه‌رۆك وه‌زیرێن هه‌رێما كوردستانێ سه‌باره‌ت هه‌لبژارتنێن په‌رله‌مان و سه‌رۆكاتیا هه‌رێمێ، ئه‌ڤرۆ نامه‌ك ئاراسته‌ى په‌رله‌مانێ كوردستانێ كریه و داخواز ژێ كریه د ژڤانێ ئه‌نجامدانا هه‌ردو هه‌لبژارتنان دیاركر بكه‌ن ب مه‌رجه‌كێ ژ سێ هه‌یڤێن بهێت دا ده‌رباز نه‌بیت.
نێچیرڤان بارزانى ئاماژه ب وێ یه‌كێ كریه كو ئه‌ڤ داخوازیا وى پشتى سه‌ره‌دانا لایه‌نێن سیاسى یێن كوردى دهێت كو گه‌هشتینه رێككه‌فتنه‌كێ بۆ پاراستنا ئێكرێزیا ناڤخویى و ڤه‌گه‌ریان بۆ ده‌ستهه‌لاتا گه‌لى باشترین بژارده هه‌لبژارتنن.
سه‌رۆك وه‌زیرێن هه‌رێما كوردستانێ داخواز ژ كۆمسیونا بلندا سه‌ربخوه‌یا هه‌لبژارتن و راپرسیێن هه‌رێمێ ژى كریه كو ل گۆر پیڤه‌رێن قانوونى و نێڤده‌وله‌تى خوه بۆ هه‌لبژارتنان به‌رهه‌ڤ بكه‌ت.
ئه‌ڤرۆنيوز:
جڤاتا وه‌زارى بۆ ئاسايشا نيشتمانى يا عيراقێ ب سه‌رۆكاتيا سه‌رۆك وه‌زيران وفه‌رماندێ گشتيێ هێزێن چه‌كدار، ئه‌ڤرۆ ئێكشه‌مبى 17/12/2017، دته‌وه‌ره‌كێ كۆمبوونا خوه دا دانوستاندن ل دۆر فرۆكخانا وده‌رگه‌هێن سنورى ورێكخستنا هاتنا رۆژنامه‌ڤانێن عه‌ره‌ب وبيانى بۆ عيراقێ كرن.
ئوفيسا سه‌رۆك وه‌زيرێن عيراقێ، ل دۆر وێ كۆمبوونێ راگه‌هاند” فه‌رماندێ گشتيێ هێزێن چه‌كدار حه‌يده‌ر عه‌بادى سه‌ركێشيا كۆمبوونه‌كا جڤاتا وه‌زارى بۆ ئاسايشا نيشتمانى كر كو تێدا گفتوگو ل دۆر قۆناغا پشتى سه‌ركه‌فتنێ ل سه‌ر داعشێ وڤه‌گه‌راندنا ئاواران، زێده‌بارى هنده‌ك باده‌كێن گريداى ب پلانێن پاشه‌رۆژێ”.
ئوفيسا سه‌رۆك وه‌زيران، دياركر ژى” دكۆمبوونێ دانوستاندن ل دۆر ئاسايشا فرۆكخانا وده‌رگه‌هێن سنورى وپرۆسا رێكخستنا هاتنا رۆژنامه‌ڤانێن عه‌ره‌ب وبيانى بۆ عيراقێ “.
ئەڤرۆ نیۆز،زنار تۆڤی:
پەیڤدارێ ملیشیاتێن عەسائیب ئەهل حەق دوپاتكریە،کو گرووپێ وان حەز و هیڤیا وانە کو د هەلبژارتنێن داهاتیدا پۆستێ سەرۆك وەزیرێن عێراقێ وەربگرن و ب چری ژی كار و هەولددەن بۆ وەرگرتنا ڤی پۆستی.
مەحمود روبەیعی پەیڤدارێ ملیشیاتێن عەسائیب ئەهل حەق ئاشكراكر،کو عەسائیب ئەهل حەق كار دكەن بۆ وەرگرتنا پۆستێ سەرۆك وەزیرێن داهاتی یێن عێراقێ، ئەڤە ژی بۆ هندێ یە كو ئەم سەركردایەتیا سیستەمێ سیاسی یێ عێراقێ بكەین،لەورا ئەم ب چری كار بۆ گەهشتنا دەستهەلاتێ و وەرگرتنا ڤی پۆستی دكەین
.
هەروەسا گوتیە، هەڤپەیمانیەك دناڤبەرا لایەنێن شیعی هەیە و پێکڤە كار دكەین،دیسا وەلاتێ مە ژی پێدڤی ب چاكسازیێ د سیستەمێ سیاسی دا هەیە،کو د بنەرەت دا گرفت و كێشێن مەزن هەنە.
هەروەسا پێشتر حەیدەر عەبادی سەرۆك وەزیرێن عێراقێ دووپاتكریە،کو پشکداریا گرووپێن چەكداری یێن حەشدێ د هەلبژارتنان دا ب هەموو شێوەیەكێ قەدەغەیە و نوکە ژی وی دڤێت چەكی ژ وان وەرگریت و وان بێخیتە ناڤا رێزێن سوپا و هێزێن تەناهی یێن عێراقێ.
عەسائیبی ئەهل حەق ئێکە ژ گرووپێن چەكداری یێن ناڤا ریزێن حەشدا شەعبی و ژلایێ قەیس خەزعەلی ڤه سەركردایەتی لێ دهێتە کرن،پشتی جۆدابوونا خەزعەلی ژ سوپایێ مەهدی یێ سەر ب موقتەدا سەدری ڤە ل سالا 2004 دەست ب دانانی ملیشیاتێن عەسائیب ئەهلی حەق كریە،هەروەسا ئارمانج و بەرنامێ ڤی گرووپێ ملیشیاتی خزمەتكرنا ویلایەتا فەقی یێ ئیرانێ یە و پشتی راگەهاندنا حەشدا شەعبی وەك پشکەک ژ حەشدا شەعبی ل دژی داعشێ شەرکریە و چەكدارێن وێ ل سووریا ل پال هێزێن ئیرانی ل دژی داعشێ دجەنگن.
ئه‌ڤرۆنيوز:
سه‌رۆك وه‌زيرێن هه‌رێما كوردستانێ، ئه‌ڤرۆ ئێكشه‌مبى 17/12/2017 ب داخوازيه‌كا فه‌رمى ژ وه‌زاره‌تا ده‌رڤه يا ئه‌لمانى، گه‌هشته به‌رلين په‌يته‌ختێ ئه‌لمانيا.
فه‌رمانگه‌ها په‌يوه‌نديێن ده‌رڤه يێن حوكمه‌تا هه‌رێما كوردستانێ به‌رى نوكه راگه‌هاندبوو” نێچيرڤان بارزانى سه‌رۆك وه‌زيرێن هه‌رێما كوردستانێ دێ ل رۆژا دوشه‌مبى 18/12/2017 ده‌ست ب ديدارێن خوه ل گه‌ل به‌رپرسێن ئه‌لمانيا كه‌ت، ژوان ژى ئه‌نگێلا مێركل شيرىتكارا ئه‌لمانيا، ووه‌زيرا به‌رگريا ئه‌لمانى ودێ سه‌ره‌دانا په‌رله‌مانێ ئه‌لمانى ژى كه‌ت”.
ئه‌ڤرۆنيوز:
سه‌رۆكێ ده‌سته‌يا ده‌ستپاكيێ ل هه‌رێما كوردستانێ ئاشكراكر كو وان داخوازكريه ئه‌و برياره بهێته هه‌لوه‌شاندن كو كه‌سێن ب نه‌شايسته پێ هاتينه خانه‌نشينكرن، به‌لێ حوكمه‌تێ پێ باشه ب قانوون مووچێن وان كه‌سان بهێته برين كو شايسته نينن، له‌وما ل قۆناغا ئێكێ دێ مووچێن وان كه‌سان هێته راگرتن ئه‌وێن ب شێوه‌كێ نه‌قانوونى هاتينه خانه‌نشينكرن.
ئه‌حمه‌د ئه‌نوه‌ر، سه‌رۆكێ ده‌سته‌يا ده‌ستپاكيێ ل هه‌رێمێ راگه‌هاند” بۆ وان كه‌سێن كو ب شێوه‌كێ نه‌قانوونى هاتينه خانه‌نشينكرن وپلێن له‌شكرى ب شێوه‌كێ نه‌قانوونى وه‌رگرتين، دێ ژێ هێنه وه‌رگرتن، به‌لێ پاشى هه‌تا قانوونا برينا مووچه وپله‌يان وچاكسازيێن حوكمه‌تێ ده‌ستپێ دكه‌ن، دێ مووچێن وان ژى هێنه راگرتن”.
ئه‌نوه‌رى زێده‌تر بۆ دوارۆژ گۆت” برياره ل ڤان نێزيكان ل گه‌ل ديوانا چاڤدێريا دارايى وپه‌رله‌مانى كۆمبوونه‌كێ ئه‌نجام بده‌ين دا ميكانيزما برينا مووچێن كه‌سانێن نه‌شايسته ڤه‌گريت”ظ
سه‌رۆكێ ده‌سته‌يا ده‌ستپاكيێ رۆهنكر ژى” هه‌ر كه‌سه‌ك ب شێوه‌كێ نه‌قانوونى هاتبيته خانه‌نشينكرن، دێ هووربينى دباده‌كا وى دا هێته كرن، هه‌كه دياربوو ب نه‌قانوونى يێ هاتيه خانه‌نشينكرن، دێ مووچێ وى هێته برين، چونكى دقانوونا خانه‌نشينيێ دا، مه‌رج ب رۆهنى يێن تێدا هاتينه به‌حسكرن”.
ئه‌ڤرۆنيوز:
وه‌زيرێ ناڤخوه‌يا ئيرانێ عه‌بدولرزا فه‌زلى، ئه‌ڤرۆ ئێكشه‌مبى 17/12/2017، ڤه‌كرنا هه‌ردو ده‌رگه‌هێن حاج عومران وپه‌روێزخان يێن سنورى راگه‌هاند.
ل دووڤ ده‌زگه‌هێن راگه‌هاندنێ يێن ئيرانى، چاڤه‌رێ دهێته كرن سوباهى دوشه‌مبى بريارا ڤه‌كرنا وان هه‌ردو ده‌رگه‌هێن سنورى دێ هێته بجهئينان.
ئاژانسا (فارس) يا ده‌نگوباسان يا ئيرانى، به‌لاڤكر” عه‌بدولرزا فه‌زلى، ئه‌ڤرۆ دكۆمبوونه‌كێ دا ل گه‌ل ژۆرا بازرگانيا ئيرانى ئه‌ڤ برياره دا”.
پشتى ئه‌نجامدانا ريفراندۆما سه‌ربخوه‌يا كوردستانێ، ل سه‌ر داخوازا حوكمه‌تا عيراقێ، ئه‌و ده‌رگه‌هين سنورى ژلايێ ئيرانێ ڤه هاتبوونه داخستن.
ئه‌ڤرۆنيوز:
سه‌رۆكى توركيا ره‌جه‌ب ته‌يب ئه‌ردۆگان هوشداريا ژده‌ستدانا مه‌كێ وكه‌عبێ دكه‌ت، پشتى ژ ده‌ستدانا قودسێ.
ئه‌ردۆگانى دبه‌رنامه‌كێ ره‌وشه‌نبيرى دا ل سته‌نبۆلێ گۆت ژى” ” هه‌كه مه قودس ژده‌ستدا، ئه‌م نه‌شێين مه‌كه بپارێزين وهه‌كه مه‌كه كه‌فت، دێ كه‌عبێ ژى ژده‌ست ده‌ين”.
زێده‌تر گۆت” ده‌ڤه‌را رۆژهه‌لاتا ناڤين وهه‌موو موسلمان يێ تووشى هێرشه‌كا نوو دبيت ب رێيا قودسێ، پشتى دانپێدانا ئه‌مريكا ب قودسێ وه‌كو پايته‌ختێ ئيسرائيلێ”.
ئه‌ڤرۆنيوز:
نڤيسه‌ر وراگه‌هاندكارێ سعودى يێ ناڤدار جه‌مال خاشقجى به‌لاڤكر كو هژماره‌كا دى يا شازاده وسه‌رمايه‌دارێن سعودى ب تۆمه‌تا گه‌نده‌ليێ هاتنه ده‌سته‌سه‌ركرن.
خاشقجى دبه‌رپه‌رێ خوه ل سه‌ر تويته‌رى دا به‌لاڤكر كو ئه‌و شازاده وسه‌رمايه‌دارێن ده‌سته‌سه‌ركرى هاتينه هنارتن بۆ ئۆتێلا ريتز ل پايته‌ختێ سعوديێ رياز.
ده‌ستهه‌لاتدارێن سعوديێ ب سه‌رپه‌رشتيا مير “محه‌مه‌د كورێ سه‌لمان” ى، شازادێ جهنشينێ وه‌لاتى، هه‌وه‌كا مه‌زن يا ده‌سته‌سه‌ركرنا شازاده وسه‌رمايه‌دارێن مه‌زن يێن سعوديێ ل مه‌ها چريا ئێكێ يا بۆرى ده‌ستپێكريه كو 200 شازاده وسه‌رمايه‌ار ل ئۆتێلا ريتز كارلتۆن هاتن ده‌سته‌سه‌ركرن هه‌تا ئێكلاكرنا باده‌كێن وان يێن گه‌نده‌ليێ.
نيشاندان