ئه‌ڤرۆ نيوز، هوشه‌نگ تاجر:
مالپه‌رێ مێهر نيوز يێ ئيرانى راگه‌هاند كو وه‌زيرێ ناڤخۆ يێ ئيرانێ عه‌بدولرزا ره‌حمان فه‌زلى د كۆمبوونا ل گه‌ل ژوورێن بازرگانى يێن ئيرانێ دياركر كو ئه‌ڤرۆ هه‌ردو ده‌رگه‌هێن سنورى يێن ل گه‌ل ئيرانێ هاتينه ڤه‌كرن و ژ ئه‌ڤرۆ پێڤه چاوانيا ڤه‌كرنا وان ده‌رگه‌هان كريه د ده‌ستێ پارێزگه‌هان دا.
ئەڤرۆ نیۆز ، زنار تۆڤی:
ل شه‌ڤا 16-12-2017 ل كوچكا مێهڤانداریێ فه‌رهاد ئه‌مین ئه‌تروشی پارێزگه‌رێ دهوكێ پێشوازیا (جان ڤیكتال) بالیوزێ وه‌لاتێ چیك ل به‌غدا و شاندێ ل گه‌لدا كر.
دهه‌ڤدیتنه‌كێدا به‌حسێ په‌یوه‌ندیێن دوو قولی دناڤبه‌را هه‌رێما كوردستانێ و ده‌وله‌تا چیك و ئه‌و هاریكاریێن وه‌لاتێ ناڤبری بو پرۆژێن خزمه‌تكاری پێشكێشدكه‌ت و چاوانیا پێشئێخستنا ئاستێ وان په‌یوه‌ندی و هاریكاریا هاته كرن.
پارێزگه‌رێ دهوكێ سوپاسیا حكومه‌تا چیك و بالیوزخانا وی وه‌لاتی ل به‌غدا كر هه‌مبه‌ر ئه‌و هاریكاریێن بو پروژێن مروڤایه‌تی ل پارێزگه‌هێ پێشكێشدكه‌ت وخواست ئه‌و هاریكاری به‌رده‌وام بهێنه كرن وقه‌بارێ وان ژی بهێته زێده‌كرن .
پاش پارێزگه‌رێ دهوكێ و بالیوزێ وه‌لاتێ چیك گرێبه‌سته‌ك بو ئاڤاكرنا ئاڤاهیێ ئوتیزمێ ب كوژمێ (400) هزار دولاران واژوكر كو بریاره ل تاخێ ئێتیتێ ل روژهه‌لاتێ باژێرێ دهوكێ بهێته ئاڤاكرن وپارێ دیاركری ژلایێ حكومه‌تا چیك دێ هێته دابینكرن.
هه‌ژی گوتنێ یه به‌ری نوكه ژی وه‌لاتێ چیك كوژمێ (208) هزار دۆلارا بو چێكرنا ئاڤاهیێ كچێن بێ سه‌میان دابینكربوون.
ئه‌ڤرۆ نيوز:
رۆژا ئالایێ كوردستانێ ئه‌ڤرۆ 17/12/2017ل ژێر چاڤدێریا فه‌رهاد ئه‌مین ئه‌ترووشی پارێزگه‌رێ دهۆكێ د رێوره‌سمه‌كێ تایبه‌ت دا ل ئاماده‌یا هه‌لز هاته ساخكرن.
ئه‌ڤ رێوره‌سمه ب به‌رهه‌ڤبوونا به‌هزاد عه‌لی ئاده‌م جێگرێ پارێزگه‌رێ دهۆكێ و به‌هجه‌ت ئاڤده‌ل و د. نه‌وزات جه‌میل كارگێرێن لقێ ئێكێ پارتی دیمۆكراتی كوردستان و عومه‌ر عه‌لی تاها رێڤه‌به‌رێ گشتی یێ په‌روه‌ردا پارێزگه‌ها دهۆكێ ب وه‌كاله‌ت و هه‌ردو هاریكاری وی و عومه‌ر ئه‌حمه‌د قاسم رێڤه‌به‌رێ په‌روه‌ردا دهۆك رۆژئاڤا و سه‌میر عه‌بدولعه‌زیز رێڤه‌به‌رێ په‌روه‌ردا دهۆك رۆژهه‌لات و هژماره‌كا ئه‌ندامێن جڤاتا پارێزگه‌ها دهۆكێ و سه‌رپه‌رشتیار و مامۆستا و سه‌میانێن قوتابیان هاتنه ئه‌نجامدان.
ل ده‌ستپێكێ و پشتی په‌یڤا بخێرهاتنێ ژ لایێ یوسرا عیسی رێڤه‌به‌را قوتابخانێ ڤه هاتیه پێشكێشكرن، ل دووڤ دا رێڤه‌به‌رێ گشتیێ په‌روه‌ردا گشتی یا په‌روه‌ردا پارێزگه‌ها دهۆك په‌یڤه‌ك ب ڤێ هه‌لكه‌فتێ پێشكێشكر پاشی جێگرێ پارێزگه‌رێ دهۆكێ په‌یڤه‌ك ب ڤێ هه‌لكه‌ڤتێ پێشكێشكر، هه‌روه‌سا به‌هجه‌ت ئاڤده‌ل په‌یڤه‌ك پێشكێشكر و به‌حسێ دیرۆركا ئالایێ كوردستانێ و ئه‌و قوربانیێن بۆ پاراستنا وی هاتینه دان كر.
ل دووماهیا رێوره‌سمان چه‌ند هه‌لبه‌سته‌ك ژ لایێ قوتابیه‌كا قوتابخانا ناڤبری ڤه ب ڤێ هه‌لكه‌فتێ هاته پێشكێشكرن.
ئه‌ڤرۆ نيوز:
ئه‌ڤرۆ جه‌عفه‌ر ئێمينكى جێگرێ سه‌رۆكێ په‌رله‌مانێ كوردستانێ راگه‌هاند: نه حوكمه‌تێ نياز هه‌يه ده‌ستێ خوه بۆ پاشكه‌فتنا مووچێ پێشمه‌رگه‌ى ببه‌ت و نه په‌رله‌مانى ژى، مه هه‌ردويان دڤێت پێكڤه ڤێ قوناغێ ده‌رباز بكه‌ين و گۆت: پاشكه‌فت ب تنێ دێ ژ كه‌سێن پله‌دار ژ ڤان دو هێزان گريت.
جه‌عفه‌ر ئێمنكى جێگرێ سه‌رۆكێ په‌رله‌مانێ كوردستانێ دياركر نوكه ئه‌و مژوولى به‌رهه‌ڤكرنا پرۆژه‌كێ نه بۆ مووچان كو ژ 30 مادان پێك دهێت و ب وى پرۆژه‌ى و ئه‌نجامدانا چاكسازيان دێ شێن هه‌موو كێشێن دارايى چاره‌سه‌ر كه‌ين.
ئەڤرۆ نیوز:
بەرپرسەکێ پارتی دیموکراتی کوردستان وەسا دبینە باشترین چارەسەر بۆ ئاریشەیێن نوکە لھەرێما کوردستانێ ھەی ئەنجامدانا ھەلبژارتنێن بەروەختن و دیارکر، پارتی ژبەر ئەڤی جەماوەرێ خورسکێ ھەی ژ پڕۆسا ھەلبژارتنان ناترسیت و دبێژیت، ئەگەر بەغدا بڤی دەستوداری سەردەریێ دگەل ھەرێمێ بکەت مانا نوونەرێن مە ل بەغدا چو واتەیەکێ ناگەھینیت.
بلند ئیسماعیل، بەرپرسێ لقێ 16 یێ پارتی دیموکراتی کوردستان بۆ رۆژناما ئەڤرۆ گۆت” ئەم وەکی پارتی وەسا دبینین بۆ چارەسەرکرنا ئاریشەیێن نوکە ل ھەرێما کوردستانێ ھەی باشترین چارەسەر ئەنجامدانا ھەلبژارتنێن بەروەختە، نە وەکی نوکە ھندەک لایەنێن سیاسی داخوازا پێکئینانا حوکمەتا بەروەخت دکەن بۆچارەسەرکرنا پرسێن سیاسی و ئەم وەکی پارتی پێکئینانا حوکمەتا بەروەخت و کار فڕێکەر ب چارەسەر نوزانین، بەلکو ھەتا ھەر لایەنەک قەبارێ خوە بزانیت ھەتا ھەلبژارتنێن داھاتی تێنەکرن پێدڤی رێڤەچوونا ھەلبژارتنان و پشتی ھەلبژارتنان ھەر لایەنەک دێ رێژەیا خوە زانیت، لەوڕا بۆ ڤێ مەرەمێ باشترین چارەسەر ھەلبژارتنن، نوکە رەنگە یا ب ساناھی نەبیت مرۆڤ پێشبینیا بدەستڤە ئینانا کۆرسیان و دەنگان بکەت بۆ ھەلبژارتنێن داھاتی، بەلێ راستە ئاریشەیێن زۆر لھەرێما کوردستانێ ھەنە و لێ پارتی دڤێ باوەریێ دایە ژبەر جەماوەرێ خوە یێ خۆڕسک ترس نینە ل ھەلبژارتنان و رەوشا پارتی ل ھەموو لایەنێن پارتی باشترە ھەگەر ھەلبژارتن بھێنە رێڤەبرن.
ئەڤی بەرپرسێ پارتی گۆتژی” بزاڤێن مە بەردەوامن بۆ گەھشتن ب رێکەفتنێ دگەل لایەنێن سیاسیێن ھەرێما کوردستانێ،نوکە ئەف حوکمەتا مە ھەی یا کار فڕێکەرە و دەم نەمایە ئەم حوکمەتێ ھەلوەشینین و حوکمەتا دەمکی بھێتە پێکئینان، چونکە دەم زۆر نەمایە، بەلێ پارتی یا بەرھەڤە گۆھڕینان دڤێ حوکمەتا نوکەدا بکەت و ھەر لایەنەکێ بخوازیت ل پشکا خوە گۆھڕینان بکەت، ھەر پێشنیارەکا ھێز و لایەنێن سیاسی بھێتەکرن تنێ بۆ کوشتنا دەمی بیت تەسلیمی ڤێ نەبین باشترە، بەرۆڤاژی ھەر پێشنیارەکا دجھێ خوەدا بھێتەکرن بۆ دەربازکرنا ڤێ قۆناغێ تشتەکێ سرۆشتیە و پارتی پێشوازیێ لێدکەت، چونکە ھەگەر ئەف حوکمەتە بھێتە ھەلوەشاندن ب پێنج ھەیڤاژی ناھێتە پێکئینان حوکمەتا نوو.
لدۆر مانا کوردان ل بەغدا و بۆچوونا پارتی دیموکراتی کوردستان بلند ئیسماعیل دیارکر” ئەگەر بەغدا بڤی دەستوداری سەرەدەریێ دگەل ھەرێما کوردستانێ بکەت و چو حیسابا بۆ شەراکەت و تەوافقێ نەکەت و ھەر ب جاڤێ زۆرینە و کەمینە کار بکەت مانا مە ل بەغدا چو واتایەکێ ناگەھینە، ئەگەرژی پەیوەندییێن ناڤبەرا ھەرێما کوردستانێ و عێراقێ بەرەف پێشڤەبچن و رێکەفتن بھێتەکرن لدۆر پرسێن ھەلاویستی بێگومان وی دەمی بۆچوونامە جودایە.
ئەڤرۆ:
ل گۆر راپۆرتەکا رۆژناما واشنتۆن پۆست رۆژانە سەرباز و ئەفسەرێن ئیرانی ل سووریا د شەرێ ل گەل ھێزێن بەرھنگاریا سووریا دھێنە کوشتن لێ ئیرانێ ھەتا نھا بۆ رایا گشتی یا وەلاتێ خوە ھژمارا دروست یا کوشتیێن خوە ل سووریێ ئاشکرا نەکرینە، ئەو یەک د دەمەکێ دایە کو ھەتا نھا ب دەھان جەنەرال و ب سەدان ئەفسەرێن پایەبلند یێن ئیرانێ ل سووریا ھاتینە کوشتن.
د راپۆرتێ دا ئەو یەک ژی ھاتیە دیار کرن کو د ناڤا دو ھەفتیێن بۆری دا چەندین ئەفسەرێن ئیرانێ ل سووریێ ھاتینە کوشتن لێ راگەھاندنا ئیرانێ بەحسێ وان کەسان ناکەت و دەمێ تەرمێ وان بۆ کەسوکارێ وان ژی دبەن ناھێلن دەزگەھێن راگەھاندنێ ل ناڤخوەییێ ئیرانێ بەحسێ وان کەسان بکەت.
ئه‌ڤرۆ نیۆز , ره‌مه‌زان هه‌رنى:
به‌رپرسێ راگه‌هاندنا به‌ره‌ڤانیا باژێرى ل قه‌زا ئاكرێ خویاكر , ئه‌م هاتینه هایداركرن ب هه‌بوونا روودانه‌كا ئاگر به‌ربوونێ ل گه‌ره‌كا سه‌رهلدان ل ناحیا بجیل سه‌ر ب قه‌زا ئاكرێ ڤه تیمین ئاگر ڤه‌مراندنێ گه‌هشتن جهێ روودانێ و شیان ئاگرى كۆنترول بكه‌ن.
رائید فیراس یاسین ئاكره‌یى به‌رپرسێ راگه‌هاندنا به‌ره‌ڤانیا باژێرى ل قه‌زا ئاكرێ بۆ ئه‌ڤرۆ نیۆوز دیاركر , ب ئه‌گه‌رێ ئاگر به‌ربوونا بتلێ غازێ ل گه‌ره‌كا سه‌ر هلدان ل ناحیا بجیل ئاگر به‌ربۆ مالا هاولاتى مسته‌فا ته‌ها ب وێ سه‌ده‌مێ ژى مالاوى هاته سوتن زیانێن مه‌زن به‌ر ب مالاوى كه‌فتن به‌لێ چۆ زیانین گیانى نه‌بۆن ئاگر به‌ربۆن ژى ژ سه‌ده‌مێ قلینێ غازێ بۆیه به‌لێ ئاگر هاته كنترول كرن.
ئەڤرۆ نیۆز، رێوار مزیری:
رۆژا ئالایێ کوردستانێ سوبەھی رۆژا 17/12/2017ێ دێ ب ئەنجامدانا چەندین چالاکیان ل سنوورێ پارێزگەھا دھۆکێ ھێتە ساخکرن و ھەر ب ڤێ ھەلکەفتێ دێ بلندترین ئالا یێ کوردستانێ ل پارکا بارزانیێ نەمر ل دھۆکێ ھێتە بلندکرن.
پەلەوان شێخ مەمی، بەرپرسێ گشتی یێ دەزگەھێ پاراستنا ئالایێ کوردستانێ بۆ ئەڤرۆ نیۆز ئاشکرا کر کو ب چاڤدێریا (سیروان بارزانی) بلندترین ئالایێ کوردستانێ سوبەھی ل دەمژمێر 11ی بەری نیڤرۆ دێ ل پارکا بارزانیێ نەمر ل دھۆکێ ھێتە بلندکرن و ھەموو لایەنێن سیاسی ژی بۆ ڤێ مەرەمێ یێن ھاتینە داخوازکرن گۆت: “سەرەرایی نەبوونا پشتەڤانیێ ژ ئالیێ جھێن پەیوەندیدار ڤە بۆ ساخکرنا رۆژا ئالایێ کورستانێ ئەم ل گورەیی شیانێن خوە شیاینە بەرھەڤیێن باش بۆ ساخکرنا ڤێ رۆژێ بکەین”.
ئه‌ڤرۆنيوز:
سه‌رۆك بارزانى ل گه‌ل به‌رپرسێن سياسى وحزبى وئيدارى ل ده‌ڤه‌را به‌هدينان كۆمبوو، ل دۆر ره‌وشا هه‌رێما كوردستانێ، سه‌رۆك بارزانى دووپاتى ل سه‌ر پێدڤيا ب ئه‌نجامدانا هه‌لبژارتنان كر وه‌كو چاره‌سه‌ريه‌كا گونجاى بۆ چاره‌سه‌ركرنا قه‌يرانا سياسى ل هه‌رێما كوردستانێ وبه‌رچاڤكر ژى كو پێدڤيه فه‌رهه‌نگا پێكڤه‌ژيانا پێكهاتێن نه‌ته‌وى وئايينيێن هه‌رێما كوردستانێ وه‌كو خوه بمينيت وبهێته پاراستن وئه‌رك ومافێ هه‌موو لايه‌كى ب يه‌كسانى بهێته دياركرن.
ئه‌ڤرۆ رۆژا شه‌مبيێ 16/12/2017، ل باژێرێ دهۆكێ، سه‌رۆك مه‌سعود بارزانى ل گه‌ل به‌رپرس وكارگێر وئه‌ندامێن لق وناوچه وئه‌ندامێن په‌رله‌مانێ وبه‌رپرسێن ئيدارى وسياسى وكادرێن پێشكه‌فتى يێن پارتى ديموكراتى كوردستان ل ده‌ڤه‌را به‌هدينان كۆمبوو.
د وێ كۆمبوونێ دا، سه‌رۆك بارزانى په‌يڤه‌ك بۆ به‌رهه‌ڤبوويان پێشكێشكر وتيدا سوپاسيا هه‌لويست وقوربانيدانا جه‌ماوه‌رێ سه‌ربلندێ ده‌ڤه‌را به‌هدينان دشه‌رێ تيرۆرێ وپشكداريا مه‌زن يا وێ ده‌ڤه‌رێ دپرۆسا ريفراندۆمێ دا كر.
سه‌رۆك بارزانى، سوپاس وپێزانين هه‌بوون بۆ خۆراگرى وقوربانيدان وپێگيريا خه‌لكێ ڤێ ده‌ڤه‌رێ بۆ پرسێن نه‌ته‌وى ونيشتمانى وسلاڤ بۆ گيانێپاقژێ شه‌هيدان هنارتن وهيڤيا چاكبوونێ بۆ پێشمه‌رگێن بريندارێن شه‌رێ دژى تيرۆرستێن داعشێ خواست.
ددرێژيا په‌يڤا خوه‌دا، سه‌رۆك بارزانى، رۆناهى خسته سه‌ر دووماهى گوهۆرينێن سياسى وهوورده‌كاريێن روودانێن 16 ئوكتۆبه‌رێ وقۆناغا پشتى ريفراندۆمێ وهه‌لويستێ جڤاكێ نێڤده‌وله‌تى وره‌فتارێن حوكمه‌تا عيراقێ بۆ به‌رهه‌ڤبوويان به‌حس وشرۆڤه‌كر.
سه‌رۆك بارزانى، زێده‌بارى ئاماژه‌دانێ ب وان هۆكارێن كو گه‌لێ كوردستانێ هانداى بريارا ريفراندۆمێ بده‌ت، دووپاتى ل وێ چه‌ندێ كر كو ريفراندۆم بجهگه‌هاندنا ئه‌رك وپه‌يامه‌كا راست وره‌وا بوو.
ل دۆر ره‌وشا هه‌رێما كوردستانێ ژى، سه‌رۆك بارزانى دووپاتى ل پێدڤيا ئه‌نجامدانا هه‌لبژارتنان كر وه‌كو چاره‌سه‌ريه‌كا گونجاى بۆ چاره‌سه‌ركرنا قه‌يرانا سياسى ل هه‌رێمێ وئه‌وژى به‌رچاڤكر كو پێدڤيه فه‌رهه‌نگا پێكڤه‌ژيانا پێكهاتێن نه‌ته‌وى وئايينيێن هه‌رێما كوردستانێ وه‌كو خوه بمينيت وبهێته پاراستن وئه‌رك ومافێ هه‌موو لايه‌كى ب يه‌كسانى بهێته دياركرن.
نيشاندان