ئه‌ڤرۆنيوز:
رێڤه‌به‌ريا پاسپۆرتان ل پارێزگه‌ها هه‌ولێرێ بريارا راگرتنا ده‌رئينان ونووكرنا پاسپۆرتان بۆ ده‌مێ هه‌شت رۆژان راگه‌هاند.
رێڤه‌به‌ريا ناڤبرى دياركر كو ژ رۆژا 25/12/2017 هه‌تا 2/1/2018 دێ مامه‌لێن پاسپۆرتان هێته راگرتن.
ئاماژه دا، ئه‌گه‌رێ راگرتنێ دزڤريت بۆ جه‌ردا سالانه وداخواز ژوه‌لاتيێن دخوازن پاسپۆرتێن نوو ده‌ربكه‌ن، يان ژى پاسپۆرتێن خوه نوو بكه‌ن، به‌رى 25/12/2017 سه‌ره‌دانا رێڤه‌به‌ريا پاسپۆرتان بكه‌ن.
ئه‌ڤرۆنيوز:
وه‌زاره‌تا ساخله‌ميا عيراقێ، هوشداريێ ژهه‌بوونا جۆره‌كێ شيرێ فه‌ره‌نسى يێ مه‌ترسيدار ل بازارێن عيراقێ دكه‌ت كو دبيته ئه‌گه‌رێ چه‌ند نه‌خوه‌شيان ل ده‌ف زارۆكان.
وه‌زاره‌تا ساخله‌ميا عيراقێ دنڤيسارا خوه يا هژمار( 3215) ل 13/12/2017، كو هاتيه ئاراسته‌كرن بۆ وه‌زاره‌تا ساخله‌ميێ ل هه‌رێما كوردستانێ ورێڤه‌به‌ريێن ساخله‌ميێ ل هه‌موو پارێزگه‌هێن عيراقێ، هوشداريێ دده‌ت ژ شێرێ زارۆكان ژ جۆرێ (سيليا) كو ژ به‌رهه‌مێ كۆمپانيا لاكتلوس يا فه‌ره‌نسى يه.
نڤيسارا وه‌زاره‌تا ساخله‌ميا عيراقێ داخوازێ ژوه‌زاره‌تا ساخله‌ميێ ل هه‌رێمێ ورێڤه‌به‌ريێن ساخله‌ميێ ل هه‌موو پارێزگه‌هێن عيراقێ دكه‌ت كو هوبێن چاڤدێريا ساخله‌ميێ ل هه‌موو پارێزگه‌هێن عيراقێ هنده‌ك نموونێن وى شيرى ره‌وانه‌ى هه‌ردو تاقيگه‌هێن (په‌يمانگه‌ها ڤه‌كۆلينێن خوارنێ وتاقيگه‌ها ساخله‌ميا گشتى يا ناڤه‌ندى) ل به‌غدا بكه‌ن ژبۆ ئه‌نجامدانا پشكنينان ل سه‌ر وان نموونه‌يان، ئايا كا دێ ب كێر خوارنێ هێن يان نه، ديسا بۆ وه‌رگرتنا پێرابوونێن پێدڤى ل دووڤ قانوون ورێنمايان ودووڤچوونا ده‌رگه‌هێن سنورى ب مه‌ره‌ما كونترۆلكرنا وى جۆرێ شيرى.
كۆمپانيا (لاكتلوس) يا فه‌ره‌نسى بۆ دروستكرنا شيرى، ب هه‌ڤكاريا ده‌ستهه‌لاتا ساخله‌ميا فه‌ره‌نسى، پشتى تووشبوونا 26 زارۆكان ب نه‌خوه‌شيا (سالمۆنيلا)، ب گومانا وێ چه‌ندێ كو ئه‌و شيره ئه‌گه‌رێ وێ نه‌خوه‌شيێ يه، داخوازيه‌كا نێڤده‌وله‌تى يا مه‌زن راگه‌هانديه بۆ ڤه‌كێشانا وى جۆرێ شيرێ زارۆكان ژبازارێن جيهانێ.
ئه‌ڤرۆنيوز:
فه‌رماندێن له‌شكرى يێن عيراقێ وتوركيا وئه‌مريكا ل باره‌گايێ سه‌رۆكاتيا ئه‌ركانێن له‌شكرێ توركيا ل ئه‌نقه‌ره كۆمبوون.
سه‌رۆكاتيا ئه‌ركانێن له‌شكرێ توركيا دبه‌ياننامه‌كێ دا، ل دووڤ ئاژانسا ئه‌نادۆل يا ده‌نگوباسان يا توركى، دياركر هه‌ر ئێك ژخه‌لوسى ئه‌كار سه‌رۆك ئه‌ركانێن له‌شكرێ توركيا وعوسمان ئه‌لغانمى سه‌رۆك ئه‌ركانێن له‌شكرێ عيراقێ و كوتيس سكاباروتى فه‌رماندێ هێزێن ئه‌مريكى ل ئورۆپا وجوزێف فوتيل فه‌رماندێ فه‌رمانده‌يا ناڤين ل له‌شكرێ ئه‌مريكى، پشكدارى دوێ كۆمبوونێ دا كر.
ل دووڤ وێ به‌ياننامێ، كۆمبوون ل دۆر ره‌وشا ئه‌منى بوو ل ده‌ڤه‌رێ، ب تايبه‌تى ل عيراقێ وسووريێ، زێده‌بارى پێرابوونێن پێدڤى بۆ به‌رهنگاريا رێكخراوێن تيرۆرستى.
ئەڤرۆ نیۆز،زنار تۆڤی:
وه‌زاره‌تا په‌روه‌ردێ یا حوکمه‌تا هه‌رێما كوردستانێ بریار ل سه‌ر بهێنڤه‌دانێن رۆژێن شه‌مبی دا و دیارکر:کو دێ ئه‌زموونێن وه‌رزێ ئێكێ و دویێ د رۆژێن شه‌مبی ژی دا هێنه ئەنجامدان.
د راگه‌هاندنه‌كێ دا كو بۆ هه‌موو په‌روه‌ردێن باژێران هاتیه ئاراسته‌كرن،وه‌زاره‌تا په‌روه‌ردا هەرێما کوردستانی دیاركریە،کو بهێنڤه‌دانێن رۆژێن شه‌مبیان دێ د به‌رده‌وامبن، لێ ئه‌زموونێن وه‌رزێ ئێكێ و دویێ دێ هه‌ر د رۆژێن شه‌مبی ژی دا هێنه ئەنجامدان.
ئه‌ڤ نووچەیە د ده‌مه‌كێ دایه كو به‌ری نوکە وەزارەتا پەروەردێ پێشنیاز كربوو،کو بهێنڤه‌دانێن رۆژێن شه‌مبی ل قوتابخانه‌یان بهێنه راكرن،لێ نەرازیبوون ژڤێ بریارا پەروەردێ هاتبوو نیشاندان.
ئه‌ڤرۆنيوز:
حه‌شدا شه‌عبى هه‌بوونا هه‌ڤكاريه‌كێ ل گه‌ل پێشمه‌رگه‌ى ژبۆ ده‌ستپێكرنا ئوپه‌راسيۆنه‌كا له‌شكرى يا هه‌ڤپشك ژبۆ دووركرنا مه‌ترسيا چكدارێن داعشێ ژسنورێ قه‌زا خورماتوو ل پارێزگه‌ها سه‌لاحه‌دين، راگه‌هاند.
مه‌هدى ته‌قى، فه‌رماندێ ليوا 52 يا حه‌شدا شه‌عبى ، دداخۆيانيه‌كا رۆژنامه‌ڤانى دا گۆت” ب مه‌ره‌ما دوورخستنا گه‌فێن چه‌كدارێن داعشێ ل ده‌وروبه‌رێن قه‌زا خورماتوو، مه هه‌ڤكارى ل گه‌ل پێشمه‌رگه‌ى كريه بۆ ئه‌نجامدانا ئوپه‌راسيۆنه‌كا هه‌ڤشپك ل وێ ده‌ڤه‌رێ”.
ته‌قى دياركر” ل رۆژێن بۆرى توپبارانكرن ب هاونان ل سه‌ر باژێرێ خورماتوو هاته كرن ودئه‌نجامدا زيانێن گيانى ل دووڤ خوه هێلان”.
ناڤبرى ره‌تكر ژڤانێ ئه‌نجامدانا وێ ئوپه‌راسيۆنا هه‌ڤپشك ووان ده‌ڤه‌رێن دێ ڤه‌گريت دياربكه‌ت.
ئەڤرۆ نیۆز ، زنار تۆڤی:
راوێژکارێ ئاسایشا نیشتمانی یا ئەمریکا دیارکر، چارەسەرکرنا کێشێن دناڤبەرا هەولێر و بەغدا ئارمانجا سەرەکی یا سەرۆکێ ئەمریکا و وەزیرێ دەرڤەیە و دبێژیت،ل سالا 1991 مە پشتگیریا کوردێن عێراقێ کریە و نوکەژی پابەندین ب ئێکپارچەیی و سەروەریا هەرێما کوردستانێ.
ل دامەزراوەیا جەیمس تاونل واشنتن دی سی، جەنەرال هێربەرت ماک ماستەر، راوێژکارێ ئاسایشا نیشتمانی یا ئەمریکا دەربارەی چارەسەریا کێشێن هەولێر و بەغدا راگەهاند، ئەمریکا یا پابەندە ب سەرکەفتنا کوردێن عێراقێ،ل سالا 1991 ئەمریکا هاریکاربوو کو چو کارێن درندانە بەرامبەر کوردان ل باکۆرێ عێراقێ نەهێنە ئەنجامدان.
راوێژکارێ ئاسایشا نیشتمانی یا ئەمریکا دبێژیت ژی، هێشتا ئابوورێ هەرێما کوردستانێ یێ لاوازە بەلێ ئەو پێنگاڤێن کو واشنتن و هەڤپەیمانان ل سالا 1991 ئەنجامەکێ گەلەک باش هەبوو،ئەڤ چەندە بوویە ئەگەرێ پێشکەفتنا هەرێما کوردستانێ،لەورا ئەوا دهێته دیتن موعجیزەیە،ژ وان ژی پێشکەفتنا باژێرێن جوان یێن هەولێر، سلێمانی و دهۆکێ.
ماک ماستەر دبێژیت ژی، واشنتن ب ئێکپارچەیا عێراقێ و ئێکپارچەیا هەرێما کوردستانێ یا پابەندە،گوت ژی،ئەمریکا یا پابەندە ب کارکرن ل گەل سەرکردایەتیا هەرێما کوردستانێ و سەرکردایەتیا عێراقێ و تەماما هەولێن خۆ دێ ئێخیتە گەر بۆ هندێ نێوەندگیریێ دناڤبەرا واندا بکەت.
راوێژکارێ ئاسایشا نیشتمانیا ئەمریکا ئاماژەدا رۆلێ ئیرانێ گوت، واشنتن کار دکەت بۆ سنوردارکرنا کاریگەریا نەرێنی یا وەلاتێن دیتر یێن ڤێ دەڤەرێ،کو ئەو وان گرژیان بۆ مفایێ خۆ ب کار دئینن.
ئه‌ڤرۆ نيوز:
ل گۆندێ گورزه‌يان يێ سه‌ر ب ناحيا ديگه‌له، سۆپه‌كا دارا په‌قى و ژ ئه‌گه‌رێ وێ حه‌فت كه‌س ب رێژێن جودا سۆتن.
روودان سپێيده‌هيا ئه‌ڤرۆ ل ده‌مژمێر 3:30 ده‌قيقه روودايه و ب گۆره‌ى پێزانينان ژ ئه‌گه‌رێ فشارا گه‌رمێ بوويه.
ژ ئه‌گه‌رێ ڤێ روودانێ حه‌فت كه‌س كو هه‌موو ئه‌ندامێن ئێك خێزانن ب رێژێن جودا هاتينه سۆتن و پێنج بۆ نه‌خۆشخانێن هه‌ولێر هاتينه ره‌وانه‌كرن.
ژێده‌ر: K24
ئەڤرۆ نیۆز ، زنار تۆڤی:
ئەڤرۆ ئەینیێ 15.12.2017 ل سەر جادا گشتی یا دچیتە ناحیا کانی ماسێ تی ئێن تییەک پەقیە و زیانێن مەزن گەهاندینە جادێ.
ئەڤرۆ ئەینیێ و ل دەمژمێر 8:20 سپێدێ ل بن گوندێ ئەلکیشکێ و ل سەر جادا گشتی یا دچیتە ناحیا کانی ماسێ تی ئێن تییەک ب هێزێن سۆپایێ تورکیڤە پەقیە و هەروەسا وێ پەقینی زیان گەهاندینە ترۆمبێلەکا سەربازی و جادە ژی خرابکریه و دیسا سەربازەک ژی د وی روودانێ دا برینداربوویە.
ئەڤرۆ نیوز، نەوزاد ھلۆری:
دەما چەند رۆژایە سێ یان چار پارچێن رۆناھیان لە ئەسمانێ ده‌ڤه‌رێ دهێنه ديتن، وەلاتی تووشی حێبەتیێ کرینە و ھەموو شەڤان د ناڤبەرا دەمژمێر 6:00 بۆ 11:00 شەڤێ و ھندەک جاران ھەتا سپێدێ دمینیتە ل ئەسمانی و ھەر کەسەک ژی ب رەنگەکێ شرۆڤەکرنان بۆ دکەت، ھندەک ددەن دیارکرن کو روناھیا بیرێن په‌ترۆلێ یە و ھندەک دبێژین رۆناھیا لێزەری یە، بەلێ شارەزایەکێ زانست و تەکنۆلۆژیایێ ددەته دیارکرن کو ئەو رۆناھیە جورە زانستەکێ له‌شكرى یە و ل وان جھان دەردکەڤیت يێن کو شەر لێ دھێنەکرن.
عەبدوللا نەشوان وەلاتیەکێ سنوورێ قەزا ئامێدیێ یە دیارکر کو ئەوەی ب چاڤێ خوە ل چەند رۆژێن بوری چەندین جاران ئەو رۆناھی دیتیە و بۆ ئەڤرۆ نیوز گۆت: “ئەو پارچە رۆناھیێن ل ئەسمانى دەردکەڤن سێ رۆناھی نە و ھندەک جاران ژی چارن و ھەموو ژی ل نێزیکی ئێکن و گەلەک ژی ب روون و ئاشکرایی دھێنە دیتن، بەلێ ل جھێ خوە ناچن”.
زێدەتر گۆت: “ل دووڤ ئاخفتنێن خەلکی ئەو رۆناھی رۆناھیەکا لایتێ یە ب شێوەیێ لێزەری یان ژی رۆناھیا بیرێن پەترۆلێ یە ل شێخان، بەلێ ھەتا نھا ئەڤ یەک نەھاتیە پشتراستکرن ژ بەر کو ژ بلی دەڤەرا ئامێدیێ ل چەند دەڤەرێن دن ژی دھێتە دیتن کو گەلەک ژ بیرێن پەترولێ د دوورن، یا دویێ ژی رۆناھی ئێكسه‌ر ل ئەردی بەر ب ئەسمانان ناچیت، بەلکو ل ئەسمانان ب تنێ ب شێوەیەکی قەتکری دھێتە دیتن نەک تیڤەرێزەکا درێژ”.
رەمەزان حەمزە مامۆستایێ زانکۆیا دھۆک و بیسپۆر د وارێ زانست و تەکنۆلۆژیایێ دا دیارکر کو ئەو رۆناھیا ل سنوورێ پارێزگەھا دھۆک دھێتە دیتن ب چو ره‌نگان رۆناھیا بیرێن په‌ترۆلێ و لایتێن لێزەری نینە و بۆ ئەڤرۆ نیوز گۆت: “ل گەلەک جھێن جیھانێ ب تایبەتی ئەوان دەڤەرێن کو شەر لێ دھێنەکرن ئەڤ جورە رۆناھیە دھێتە دیتن و دیارە ل ئاسمانێ ئەوان دەڤەرێن سنوورێ پارێزگەھا دھۆک ب تایبەتی ئاسمانێ ئامێدیێ و ئاکرێ و لایێ دەڤەرا بارزان ژی چەدارێن پەکەکێ لێ ھەنە و ئەو رۆناھی ژی جورەکێ زانستێ له‌شكرى یە ژ لایێ سۆپایێ تورکیا دھێتە بکارئینان بۆ دووڤچوون و وەرگرتنا زانیاری ل سەر پەکەکێ، بەلێ ھەتا نھا ناھێتە زانین کا ناڤێ ئەوی جورە زانستی چی یە و ب چ مەرەم ل وان جھان ھاتیە دانان و دیسان ئەو رۆناھی ل ئەسمانێ ئێک ژ وان دەڤەران ب دیارکری نینە، بەلکو ژ بەر کو یا بلندە ھەموو ئەو دەڤەر دبینن”.
زێدەتر گۆت: “ئەوێ رۆناھیێ چو مەترسی ل سەر ژیانا وەلاتیان نینە و زێدەتر ل دەڤەرێن چیایی دھێتە دیتن، بەلێ ئەگەر لە ئەسمانێ سەنتەرێ دھۆک ھاتبایە دیتن رەنگە ھاتبا زانین کا چ جورە رۆناھیە و مەرەم ژی ژ وێ رۆناھیێ چی یە”.
ئەڤرۆ نیۆز ، زنار تۆڤی:
بریارە ل ڤان نێزیکان تیمەکێ دی یێ نەتەوێن ئێکگرتی سەرەدانا خورماتوو بکەت، هێشتا رەوشا خورماتوو ئاسایی نەبوویە،خەلکێ ئاوارە ژی کو کوردێن وی باژێری نە ترسا ڤەگەریانێ هەیە،ئەو پێشێلکاریێن دناڤا خورماتوو دا ژلایێ حەشدا شەعبی ڤە هاتینە ئەنجامدان بەرامبەر کوردان، هێشتا ب دروستی دیار نینە چەندن،هەروەسا گەهشتن بۆ وێ قەزایێ بۆ رێکخراوان و بۆ ئەندامێن پەرلەمانی ژی یا ب ساناهی نینە.
هەر ژ روودانێن 16 ئۆکتۆبەرێ تا نوکە دناڤا خورماتوو دا سێ هزار خانی هاتینە داگیرکرن، هەروەسا دو هزار مال ژی هاتینە تالانکرن، 400 خانیێن دی ژی هاتینە سووتن،کو هەموو ژی یێن کوردانن.
هەروەسا 50 خانی هاتینە تەقاندن، 500 دووکان ژی هاتینە تالانکرن و سووتن، ئەڤەژ بلی سووتاندنا ب دەهان ترۆمبێل و بارەگایێن حیزبێن کوردستانی.
یۆنامی د راگەهاندنەکێدا بەلاڤەکریە، کو ل رۆژا 7-12-2017 وان سەرەدانا خورماتوو کریە ب مەرەما ڤەکۆلینێ ل وان راپۆرتێن کو بەحسێ روخاندنا مولکێ خەلکێ وێ باژێری دکەن.
یۆنامی بریاردایه کو تیمەکێ دیتر بۆ خورماتوو ڤرێکەت د چەند رۆژێن داهاتیدا، ب مەرەما ڤەکۆلینی.
نيشاندان