ئه‌ڤرۆنيوز:
سه‌رۆكێ يانا ريال مه‌دريد يا ئيسپانى، فلورينتينۆ بيرێز، دانپێدان ب وێ چه‌ندێ كر كو حه‌زدكه‌ت ياريكه‌رێ هه‌لبژارتيێ به‌رازيلێ ويانا پاريس سان جيرمان يا فه‌ره‌نسى، بۆ يانا خوه ب ڤه‌گۆهيزيت.
سه‌رۆكێ ريال مه‌دريد بۆ راديوا (كادينا سير) يا ئيسپانى گۆت”هه‌كه نيمار ل ريال مه‌دريد بيت، دا وى پتر ده‌ليڤه بۆ بده‌ستڤه‌ئينانا ته‌پا زێرى هه‌بيت، ريال مه‌دريد يانه‌كه تشتێ هه‌ر ياريكه‌ره‌كه مه‌زن بڤێت، دێ ده‌تێ، هه‌موو ژى دزانن كو من دڤيا گرێبه‌ستێ ل گه‌ل نيمارى گرێده‌م”.
ئه‌ڤرۆنيوز:
بزاڤا نوجه‌با يا ب سه‌ر حه‌شدا شه‌عبى ڤه، گه‌فێن هيرشكرنێ ل سه‌ر هێزێن ئه‌مريكى ل عيراقێ دكه‌ت، وه‌كو كارڤه‌دانه‌ك ل به‌رامبه‌ر هژمارتنا قودسێ وكو پايته‌ختێ ئيسرائيلێ.
دبه‌ياننامه‌كێ دا “ئه‌كره‌م كه‌عبى” سه‌رۆكێ بزاڤا نوجه‌با، كو ئيران پشته‌ڤانيا وێ دكه‌ت، راگه‌هاند” بريارا ترامپى سه‌رۆكێ ئه‌مريكا يا تايبه‌ت ب هژمارتنا باژێرێ قودسێ وه‌كو پايته‌ختێ ئيسرائيلێ، به‌هانه‌كا شه‌رعى يه بۆ هێرشكرنێ ل سه‌ر هێزێن ئه‌مريكى ل عيراقێ”.
ئه‌كره‌م كه‌عبى دبه‌يانناما خوه‌دا، دبێژيت” بريارا ترامپنى ده‌ستپێكا سه‌رهلدانا راپه‌رينه‌كا مه‌زنه بۆ رامالينا ئيسرائيلێ ژ له‌شێ وه‌لاتێن ئيسلامى”.
بزاڤا نوجه‌با ل سالا 2013 هاتيه دامه‌زراندن، ئيران هاريكاريا وێ يا له‌شكرى ودارايى دكه‌ت، ديسا ئه‌و بزاڤه ئێك ژ ميليشياتێن حه‌شدا شه‌عبى يه ژى ونێزيكى 1500 چه‌كدار يێن هه‌ين”.
ئه‌ڤرۆنيوز:
ل دووڤ نڤيساره‌كا وه‌زاره‌تا خواندنا بلند وڤه‌كۆلێن زانستى ل هه‌رێما كوردستانێ، قوتابيێن هه‌رسێ پارێزگه‌هێن هه‌ولێر وسلێمانيێ ودهۆك دشێن ب تيكرايێ 55 ل هه‌ردو پشكێن دروستكرنا ددانان وده‌رمانسازى ل په‌يمانگه‌هێن ته‌كنيكى يێن تايبه‌ت بخوينن.
ل دووڤ نڤيسارا هژمار (17677) ل 6/12/2017، رێڤه‌به‌ريا خواندنا تايبه‌ت ل وه‌زاره‌تا خواندنا بلند وڤه‌كۆلينێن زانسى ل هه‌رێما كوردستانێ كو ئاراسته‌ى هژماره‌كا په‌يمانگه‌هين تايبه‌ت ل پارێزگه‌هێن هه‌ولێر وسلێمانيێ ودهۆكێ كرى، تێدا هاتيه” رازيبوونا وه‌زيرێ خواندنا بلند وڤه‌كۆلينێن زانستى هاته وه‌رگرتن بۆ وه‌رگرتنا قوتابيان ل پشكێن دروستكرنا ددانان وده‌مانسازى بۆ سالا خواندنێ 2017 – 2018″.
وێ نڤيسارێ به‌حسێ وه‌رگرتنا قوتابيان ب ڤى شێوه‌ى كريه:
ئه‌ڤرۆنيوز:
داواكارێ گشتى يێ كۆمارا توركيا ده‌ست ب پێرابوونان كر بۆ ده‌سته‌سه‌ركرنا هنارتيێ سه‌رۆكێ ئه‌مريكا بۆ هه‌ڤپه‌يمانيا نێڤده‌وله‌تى يا دژى داعشێ.
هه‌ردو ريكخراوێن “خه‌باتا مه‌ده‌نى دژى فه‌تحوللا گيوله‌ن” و” دادوه‌ريا جڤاكى وهه‌ماهه‌نگيێ” سكالايه‌كا قانوونى دژى “برێت مه‌كگۆرك” هنارتيێ سه‌رۆكێ ئه‌مريكا بۆ هه‌ڤپه‌يمانيا نێڤده‌وله‌تى يا دژى داعشێ، تۆماركر.
دوێ سكالايێ دا، هه ردو رێكخراوێن توركى داخواز دكه‌ن ماكگۆرك ب تۆمه‌تێن ره‌فتاركرن ل شوونا رێكخراوه‌كا تيرۆرستى وپرچه‌ككرنا وێ، بهێته ده‌سته‌سه‌ركرن. تۆماركرنا وێ سكالايێ دژى مه‌كگۆركى، ژبه‌ر هاريكاريێن ئه‌مريكايه بۆ يه‌كينه‌يێن پاراستنا گه‌ل(يه‌په‌گه) كو بالێ له‌شكريێ (په‌كه‌كێ) يه ل رۆژئاڤايێ كوردستانێ.
ئه‌ڤرۆ نیوز، نه‌وزاد هلۆرى:
ده‌مه‌ك به‌ریا نها ئاگر به‌ربوویه چه‌ند كه‌ره‌ڤانێن ئاواران ل كه‌مپا مام ره‌شان ل سنورێ قه‌زا شێخان و هه‌تا به‌رهه‌ڤكرنا ئه‌ڤێ راپورتێ ژى سێ كه‌ره‌ڤان سوتینه و ئاگر ژى به‌رده‌وامه.
دڤى واریدا” ئه‌كره‌م ده‌روێش ” شایه‌تحالێ روودانێ بو ئه‌ڤرۆ نیوز گۆت” ژ ئه‌گه‌ره‌كێ نه‌دیار ده‌مه‌كێ كێم به‌رى نها ئاگر به‌ربوویه چه‌ند كه‌ره‌ڤانێن كه‌مپا مام ره‌شان ل سنورێ قه‌زا شێخان و هه‌تا نها سێ ژ وان كه‌ره‌ڤانان ب تمامى هاتینه سوتن و ئاگر ژى يێ به‌رده‌وامه”.
زێده‌تر گۆت” تیمێن ئاگر ڤه‌مراندنا شێخان نها مژوولێ كونترولكرنا ئاگرى نه ، به‌لێ ئاگر به‌رده‌وامه و زیانێن زور گه‌هاندینه كه‌لوپه‌ل و كه‌ره‌ڤانێن وان ئاواران”.
كه‌مپا مام ره‌شان ئێكه ژ كه‌مپێن تایبه‌ت ب ئاوارێن كوردێن ئێزدى كو ل كومه‌لگه‌ها مه‌هه‌تێ ل سنوورێ قه‌زا شێخان هاتیه درۆستكرن.
ئه‌ڤرۆنيوز:
وه‌زاره‌تا چاندنێ وژێده‌رين ئاڤێ ل هه‌رێما كوردستانێ، ئاشكراكر، پشتى داخوازيا وان ب مه‌ره‌ما ب ساناهيكرنا كارى دتاپۆكرن وپيڤانا زه‌ڤيێن چاندنێ، جڤاتا وه‌زيران رازيبوونا خوه دياركريه ل سه‌ر دامه‌زراندنا چه‌ند فه‌رمانبه‌رێن پيڤانێ.
ل دووڤ به‌ياننامه‌كا وه‌زاره‌تا چاندنێ وژێده‌رێن ئاڤێ، پشتى وه‌زاره‌تێ راپۆرته‌كا تايبه‌ت ل دۆر پێدڤيا وێ ب بيڤه‌رڤانان بۆ بجهئينانا كارێن چاندنێ، دايه جڤاتا وه‌زيرێن هه‌رێمێ كو تێدا داخوازا دامه‌زراندنا پێدڤى وب گۆره‌ى ده‌ڤه‌ران يا هژماره‌كا بيڤه‌رڤانان كريه، جڤاتا وه‌زيران ژى رازيبوونا خوه ل سه‌ر وێ داخوازيێ كريه.
وه‌زاره‌تا چاندنێ وژێده‌رێن ئاڤێ دياركريه، پشتى ئه‌نجامدانا كارێ پێدڤى، هژمارا كه‌سێن وه‌زاره‌تێ پێدڤى ب دامه‌زراندنا وان هه‌ى ورێنمايێن دامه‌زراندنێ ب رێيا لژنه‌كا بسپۆر وشاره‌زا يا وه‌زاره‌تێ دێ هێنه راگه‌هاندن وپاشى دێ سيڤيێ پێشكێشكه‌ران وه‌رگريت.
دبه‌يانناما وه‌زاره‌تا ناڤبرى دا هاتيه ژى، هه‌ڤده‌م پرۆژه‌ك بۆ چاره‌سه‌ريا زێده‌گاڤيان وگرێداى ب بيڤه‌ركرن وتاپۆكرنا زه‌ڤيێن چاندنێ بۆ جڤاتا وه‌زيران هاتيه بلندكرن كو تێدا چاوانيا چاره‌سه‌ركرنا گرفتان هاتيه رۆهنكرن.
ئه‌ڤرۆنيوز:
وه‌زيرێ ساخله‌ميێ ل هه‌رێما كوردستانێ راگه‌هاند، حوكمه‌تا فيدرالى بودجا هه‌رێما كوردستانێ ژ ده‌رمانان دياركر.
رێكه‌وت حه‌مه ره‌شيد وه‌زيرێ ساخله‌ميێ، ئه‌ڤرۆ دكۆنگره‌كێ رۆژنامه‌ڤانى دا ل دهۆكێ گۆت” وه‌زاره‌تا ساخله‌ميا عيراقێ ئه‌م ئاگه‌هداركرين كو به‌هرا هه‌رێمێ دبودجا ده‌رمانان دا 170 مليار دينارن”.
دياركر ژى” هه‌كه چو كارتێكرنێن سياسى ل سه‌ر وێ به‌هرا پاره‌ى نه‌كه‌ت، دێ ده‌رمان ل سالا 2018 هه‌بن”.
ئەڤرۆنیۆز، سالار دۆسكی:
بۆ سالا پێنجێ بوو ل دووف ئێك دهه‌يڤا 12 دا، پیشانگەها دهۆك یا پەرتۆكێ ژلايێ رێڤه‌به‌ريا راگه‌هاندن وچاپ وبه‌لاڤكرنێ ڤه دهاتە ڤەكرن، به‌لێ پيشانگه‌ها ئه‌ڤ ساله هاته پاشخستن.
بورهان یەحیا بەرپرسێ پەیوەندی و راگەهاندنێ ل رێڤەبەریا راگەهاندن و چاپ و بەلاڤەكرنێ ل پارێزگەها دهۆكێ بۆ ئەڤرۆ نیۆز گۆت” مە سالانە پیشانگەها دهۆك یا پەرتۆكێ ل هۆلا كونفرانسان ل زانكۆیا دهۆكێ ڤه‌دكر، به‌لێ ژبه‌ر كاودانێن نوكه، پيشانگه‌ه هاته پاشخستن”.
گۆت ژى” برياره ئه‌وه پيشانگه‌ه ل هه‌يڤا نيسانا 2018 ل پاركا نوو دهێته دروستكرن ل نيڤا بازارێ دهۆكێ، بهێته ڤه‌كرن”.
ئه‌ڤرۆنيوز:
به‌رپرسه‌كێ پارتى ئاشكراكر، ب هێجه‌تا هه‌بوونا چه‌كدارێن داعشێ، حه‌شدا شه‌عبى زێده‌تر به‌ر ب كووراتيا كوردستانێ هات ونێزيكى باژێرێ كه‌لار بوويه.
شێخ جه‌عفه‌ر شێخ مسته‌فا، به‌رپرسێ لقا خانه‌قين يا پارتى ديموكراتى كوردستان راگه‌هاند” حه‌شدا شه‌عبى وله‌شكرێ عيراقێ هێزه‌كا مه‌زن يا ئينايه سه‌ر گوندێن سنورێ ناحيا جه‌له‌ولا ودچنه سه‌ر وان گوندان ودهه‌ر ماله‌كێ دا چه‌كى ببينن، ل گه‌ل خوه دبه‌ن، خه‌لكێ وان ده‌ڤه‌ران ژى يێن ره‌ڤين بۆ كه‌لار، هه‌ر كه‌سێ ب ده‌ست وان هێزان بكه‌ڤيت ده‌سته‌سه‌ر دكه‌ن ودبه‌ن”.
شێخ جه‌عفه‌ر زێده‌تر بۆ باسنيوز رۆهنكر” پێشتر حه‌شدا شه‌عبى ئوپه‌راسيۆنه‌ك بۆ راكرنا زالگه‌ها دناڤبه‌را جه‌له‌ولا وكه‌لار ئه‌نجامدابوو، نوكه ژى بۆ وان يا چوويه سه‌رى ودخوازن نێزيكتر ببن ونوكه يێن نێزيكى كه‌لار بووين”.
گۆت ژى” ب به‌هانا هه‌بوونا داعشێل وى سنورى، حه‌شدا شه‌عبى وله‌شكرێ عيراقى لڤين ب زێده‌تر ژ 100 هه‌مه‌رێن له‌شكرى كريه به‌ر ب گوندێن(قايه،ئيسلاح وشێخ باوه) ل سنورێ جه‌له‌ولا وگه‌رميان، پێشتر ژلايێ هێزێن كوردى رێ پێ نه‌هاته دان كو هێزێن عيراقى بهێنه وى سنورى، به‌لێ نوكه بهانه‌يا هێزێن عيراقى ئه‌وه كو داعشێ يا ده‌ست ب لڤينان ل وى سنورى كرى”.
به‌رپرسێ لقێ خانه‌قينێ يێ پارتى ئه‌وژى ئاشكراكر كو ل شه‌ڤا بۆرى وان چه‌كدارێن كو حه‌شدا شه‌عبى وان ب داعش دنياسيت، هێرش كربوو سه‌ر ميليشيێن عيراقى ل وى سنورى.
ئه‌ڤرۆنيوز:
فرۆكێن ئيسرائيلێ عومباره‌كا ته‌قه‌مه‌نيێن بزاڤا حه‌ماس يا فلستينى ل كه‌رتێ غه‌زه توپبارانكر.
ل دووڤ ده‌نگوباسێن ده‌زگه‌هێن راگه‌هاندنێ يێن ئيسرائيلى، ئه‌و توپبارانكرنه ل شه‌ڤا ئه‌ينى 8/12/2017 ل سه‌ر بنگه‌هه‌كێ مه‌شقێ وعومباره‌كا ته‌قه‌مه‌نيان هاته ئه‌نجامدان وه‌كو به‌رسڤه‌ك ل سه‌ر هاڤێتنا چه‌ند مۆشه‌كان ژ غه‌زه بۆ باشوورێ ئيسرائيلێ.
ده‌زگه‌هێن راگه‌هاندنێ يێن ئيسرائيلى دياركرن كو ئه‌و مۆشه‌ك ژلايێ “بزاڤا حه‌ماس يا تيرۆرستى” هاتنه ئاراسته‌كرن بۆ باژێرێ “سه‌ديرۆت” ل باشوورێ ئيسرائيلێ وزيانێن مادى يێن مه‌زن گه‌هاندنه خه‌لكى.
پشتى باريارا دونالد ترامپى ل دۆر نياسينا قودسێ ب پايته‌ختێ ئيسرائيلێ وڤوگۆهاستنا باليۆزخانا ئه‌مريكى ژ ته‌ل ئه‌بيب بۆ قودسێ، بزاڤا حه‌ماس ده‌ست ب چالاكيێن تيرۆرستى دژى ئيسرائيلێ كريه.
حه‌ماس، بزاڤه‌كا ئيسلامى يا توندره‌وه. ناڤێ وێ دليستا تيرۆرێ يا ئه‌مريكى وهنده‌ك وه‌لاتێن ئه‌ورۆپى دا يا هه‌ى.
نيشاندان