ئه‌ڤرۆنيوز:
وه‌زاره‌تا ره‌وشه‌نبيرى ولاوان ل هه‌رێما كوردستانێ راگه‌هاند،ته‌له‌ڤزيۆن وراديۆ ل هه‌رێمێ زێده‌تر ژ ئێك مليار و274 مليۆن ديناردقه‌ردارن وهه‌كه هه‌تا سه‌رێ سالێ قه‌رين خوه نه‌ده‌ن، دێ مۆله‌تێن وان هێنه هه‌لوه‌شاندن وبه‌خشێ وان ژى هێته راگرتن.
فه‌رهه‌نگ گۆمه‌شينى، په‌يڤدارێ وه‌زاره‌تا ره‌وشه‌نبيرى ولاوان، راگه‌هاند” پشكه‌كا مه‌زن يا كه‌نالێن راگه‌هاندنێ(راديۆ وته‌له‌ڤزيۆنێن ناڤخوه‌يى وئه‌سمانى) مۆله‌تا كاركرنا خوه نوو نه‌كريه، ژبه‌ركو دقه‌ردارن وقه‌رێن وان ژى دزێده‌بوونێ دايه، له‌وما دووماهى ئاگه‌هدارى دێ ئاراسته‌ى وان كه‌ين”.
فه‌رهه‌نگى ئاماژه دا كو” قه‌رێن ل سه‌ر وان ده‌زگه‌هێن راگه‌هاندنێ يێن گه‌هشتينه ئێك مليار و274 مليۆن و425 هزار دينار، هوشدارى ژى دا هه‌كه ئه‌و ده‌زگه‌ه تاكو دووماهيا ڤێ سالێ مۆله‌تێن خوه نوو نه‌كه‌ن وقه‌رێن خوه نه‌ده‌ن، ژبلى هه‌لوه‌شاندنا مۆله‌تێن وان، دێ به‌خشێن وان ژى هێنه راگرتن ونابيت جاره‌كادى ب وى ناڤى مۆله‌تێ وه‌ربگرن”.
په‌يڤدارێ وه‌زاره‌تا ره‌وشه‌نبيرى، ل دووڤ رووداو، دياركر ژى” پێشتر چه‌ندين جاران ئاگه‌هداريا وان ده‌زگه‌هێن راگه‌هاندنێ يا هاتيه كرن، به‌لێ به‌رسڤ نه‌دايه”گۆت ژى” ئه‌ڤه دووماهى ئاگه‌هداريه كو به‌لاڤ دكه‌ين، هه‌كه ل دووڤ ڤێ داخوازيا مه نه‌هێن، دێ ده‌ست ب كارێ هه‌لوه‌شاندنا مۆله‌تێن وان كه‌ين”.
مۆله‌تا دامه‌زراندنا كه‌ناله‌كێ ئه‌سمانى بۆ جارا ئێكێ 40 مليۆن دينار دهێنه وه‌رگرتن ول ده‌مێ نووكرنێ سالانه 5 مليۆن دينار ژێ دهێنه وه‌رگرتن، مۆله‌تا دانانا ته‌له‌ڤزيۆنه‌كا ناڤخوه‌يى هه‌كه ل سه‌ر ئاستێ هه‌رێما كوردستانێ بيت 20 مليۆن دينار ژێ دهينه وه‌رگرتن، هه‌كه ل سه‌ر ئاستێ تنێ ئێك پارێزگه‌هێ بيت، 3 مليۆن دينار ژێ دهێنه وه‌رگرتن، ب هه‌مان شێوه سالانه ل ده‌مێ نووكرنا مۆله‌تێن وان چارێكا وى پاره‌ى ژێ دهێته وه‌رگرتن.
ل هه‌رێما كوردستانێ زێده‌تر ژ 300 كه‌نالێن ته‌له‌ڤزيۆنى وراديۆيى مۆله‌تا كاركرنێ يا هه‌ى، ژوان 127 ته‌له‌ڤزيۆنن كو93 ته‌له‌ڤزيۆنێن ناڤخوه‌يى نه و34 ژى ئه‌سمانى نه.
نيشاندان
