ئه‌ڤرۆنيوز:

سه‌رۆكاتيا په‌رله‌مانێ كوردستانێ به‌رسڤا داخۆيانيه‌كا عه‌بادى دده‌ت كو ل 6/12/2017 راگه‌هاندبوو” رێگريكرن ل پارچه‌بوونا عيراقێ چو كێمتر نه‌بوو ژ سه‌ركه‌فتنا ل سه‌ر داعشێ” سه‌رۆكاتيا په‌رله‌مانێ كوردستانێ ژى ڤێ داخۆيانيا عه‌بادى ب نه‌به‌رپرسيارانه‌ وب شاشيه‌كا راشكاوانه‌ ودوو ژ قانوون وبهايێن پرنسيبێن وه‌لاتيبوونێ وبه‌رۆڤاژى مادێ 9 ژدستوورێ عيراقێ دا زانين.

سه‌رۆكاتيا په‌رله‌مانێ كوردستانێ ئه‌ڤرۆ ئه‌ينيێ 8/12/2018 دبه‌رسڤا عه‌بادى دا دبێژيت” ئه‌م ل سه‌رۆكاتيا په‌رله‌مانێ كوردستانێ ب ديده‌ڤانيا هه‌موو جيهانا ئاشتيخواز، وێ راستيێ دووباره‌ دكه‌ين، هه‌كه‌ قاره‌مانيا هيزا پێشمه‌رگێ كوردستانێ وحيكمه‌تا سه‌ركردايه‌تيا وى، هێزێن عيراقێ ل مووسلێ وپتريا ده‌ڤه‌رێن دى ژى، كو زێده‌تر ژ دو سالان دبن كونترۆلا تيرۆرستين داعشێ دابوون، نه‌دشيان وێ سه‌ركه‌فتنێ تۆماربكه‌ن كو نوكه‌ به‌رێز عه‌بادى شانازيێ پێ دكه‌ت، هه‌روه‌سا جهێ مه‌نده‌هوشيێ يه‌ ژى كو به‌رێز عه‌بادى ئه‌و هێرشا له‌شكرى كو ل رۆژا 16/10/2017 ب پشته‌ڤانى وپشكداريا حه‌شدا شه‌عبى دژه‌ ئيرادا خه‌لكێ كوردستانێ كو وه‌لاتيێن عيراقێ نه‌ وئه‌و تاوانێن ل كه‌ركووكێ وخورماتوو وده‌ڤه‌رێن دى ئه‌نجامداين، ب سه‌ركه‌فتن دهژمێريت وهه‌ڤشێوێ سه‌ركه‌فتنا دژى تيرۆرستێن داعشێ ل قه‌له‌م دده‌ت”.

سه‌رۆكاتيا په‌رله‌مانێ كوردستانێ زێده‌تر دبێژيت”ئه‌م ل په‌رله‌مانێ كوردستانێ وێ داخۆيانيا به‌رێز حه‌يده‌ر عه‌بادى ب داخۆيانيه‌كا نه‌به‌رپرسيارانه‌ وشاشيه‌كا راشكاوانه‌ دزانين، چونكى دوورى قانوون وبها وپره‌نسيبێن وه‌لاتيبوونێ يه‌ وبه‌رۆڤاژى مادێ 9 ژدستوورێ عيراقێ يه‌ ژى، كو ب چو شێوه‌كى رێ ناده‌ت ئه‌ڤ جۆره‌ كريارێن له‌شكرى دژى وه‌لاتيێن عيراقێ بهێنه‌ ئه‌نجامدان وشه‌رعيه‌تێ ژى ناده‌تێ، ئه‌ڤه‌ژى پێشيلكرنه‌كا دى يا رۆهن يا دستوورێ عيراقێ يه‌ كو دچيته‌ سه‌ر وان پێشيلكاريێن زۆر يێن دستوورى كو ژلايێ حوكمه‌تێن ئێك ل دووڤ ئێكا عيراقێ هاتينه‌ ئه‌نجامدان، ژوان ژى بجهئينانا مادێ 140 ژدستوورى وهه‌ر ئه‌ڤ پێشيلكاريه‌ بوون كو بووينه‌ گه‌ف ومه‌ترسى بۆ پارچه‌بوونا عيراقێ وئه‌گه‌رێ وێ چه‌ندێ ژى كو تيرۆرستين داعشێ ڤێ چه‌ندێ بۆ خوه‌ بده‌ليڤه‌ ببينن ورێژه‌كا مه‌زن ژئاخا عيراقێ داگير بكه‌ن وجينۆسايد وتاوانێن جوراوجۆر ئه‌نجام بده‌ن”.

دبه‌رسڤا خوه‌ دا ل سه‌ر داخۆيانيا عه‌بادى، په‌رله‌مانێ كوردستانێ داخوازێ ژێ دكه‌ت كو هێزا لۆژيكى بكاربينيت وده‌رگه‌هێ دانوستاندنێ ل گه‌ل هه‌رێما كوردستانێ نه‌ دائێخيت ورێ نه‌ده‌ت مه‌ره‌مێن سياسى يێن به‌رته‌نگ، هه‌ژموونا وان ل سه‌ر ماف وئيرادا گه‌لێن عيراقێ ودستوورێ وي هه‌بيت، چونكى زياندارێ ئێكێ ودووماهيێ ژزمانێ گه‌فێ وبكارئينانا هيزێ، وه‌لاتيێن عيراقێ ب خوه‌نه‌ وئه‌ڤ جۆره‌ داخۆيانيێن وه‌كو داخۆيانيا به‌رێز عه‌بادى مه‌ترسى وگه‌فن ل سه‌ر پاشه‌رۆژا عيراقێ كو وه‌كو وه‌لاته‌كێ مه‌ده‌نى وديموكراسى بمينيت، به‌لێ دانوستاندن تاكه‌ رێ يه‌ بۆ چاره‌سه‌ريێ ورزگاربوونێ ژهه‌موو كێشان

ئه‌ڤرۆنيوز:

وه‌زاره‌تا پێشمه‌رگه‌ به‌رسڤا ئاخڤتنێن حه‌يده‌ر عه‌بادى سه‌رۆك وه‌زيرێن عيراقێ دده‌ت ورادگه‌هينيت، ئه‌و سه‌ركه‌فتنا مه‌زن ل سه‌ر داعشێ كو نوكه‌ عه‌بادى شانازيێ پێ دكه‌ت، ب ديده‌ڤانيا هه‌موو جيهانێ هه‌كه‌ پێشمه‌رگه‌ نه‌با، چو جاران ئه‌و سه‌ركه‌فتنا ب ده‌ستڤه‌ نه‌دهات.

وه‌زاره‌تا پێشمه‌رگه‌ د به‌ياننامه‌كێ دا به‌لاڤكر” ل رۆژا 6/12/2017 دداخۆيانيه‌كا نه‌به‌رپرسيارانه‌ دا ود هه‌لكه‌فته‌كا حزا ده‌عوه‌ يا ئيسلامى دا، سه‌رۆك وه‌زيرێن عيراقێ، هێرش وداگيركاريا هيزێن عيراقێ ل رۆژا 16 ئوكتۆبه‌را بۆرى ورۆژانێن ددوڤدا، ب سه‌ركه‌فتنه‌كا مه‌زن هژمارت وب ديتنا وى ئه‌و ژ سه‌ركه‌فتنا مه‌زن يا شكاندنا داعشێ ل عيراقێ يا كێمتر نينه”‌.

دبه‌يانناما وه‌زاره‌تا پێشمه‌رگه‌ دا هاتيه‌ ژى” عه‌بادى داگيركرنا له‌شكرى وهێرشكرنێ ل سه‌ر هه‌رێما كوردستانێ، كوشتن وئاواره‌كرنا خه‌لكێ كه‌ركووكێ وخورماتوو وده‌ڤه‌رين دى، ژناڤبرن وپه‌قاندنا خانى وتالانكرنا مالا وه‌لاتيێن كوردستانێ ژلايێ هێزێن عيراقى ڤه‌، ب سه‌ركه‌فتنه‌كا مه‌زن دهه‌ژمێريت ول گه‌ل سه‌ركه‌فتنا ل سه‌ر داعشێ دا به‌راورد دكه‌ت”.

زێده‌تر تێدا هاتيه‌” ئه‌و سه‌ركه‌فتنا مه‌زن ل سه‌ر داعشێ كو عه‌بادى نوكه‌ شانازيێ پێ دكه‌ت، ب ديده‌ڤانيا هه‌موو جيهانێ هه‌كه‌ پێشمه‌رگێن قاره‌مانێن كوردستانێ نه‌بان، ئه‌و سه‌ركه‌فتنه‌ نه‌دهات، هه‌مان ئه‌و پێشمه‌رگێن قاره‌مان هه‌كه‌ گيانفيدايى وبه‌رگريا وان نه‌با، ل پشتى 16 ئوكتۆبه‌را به‌ۆر، هێزێن عيراقى يێن دبن فه‌رمانا عه‌بادى، هه‌موو كوردستان دا ب ده‌ردێ خورماتوو به‌ن”.

وه‌زاره‌تا پێشمه‌رگه‌ دبێژيت ژى”گه‌له‌ك مخابن بۆ سه‌رۆك وه‌زيرێن وه‌لاته‌كى كو هێرشكرنێ ل سه‌ر خه‌لكێ وه‌لاتێ خوه‌، ل گه‌ل سه‌ركه‌فتنێ ب سه‌ر تيرۆرستاندا پێكڤه‌ به‌راورد بكه‌ت وشانازيێ پێ دكه‌ت، دده‌مه‌كى دا هه‌موو چاڤه‌رێ ده‌ليڤه‌كا ئارام دكه‌ن بۆ دانوستاندنێ ونه‌هێلانا ناكۆكى وئالۆزيان، ئه‌و ئاخڤتنێن عه‌بادى هه‌موو رق وكينێن وى ل به‌رامبه‌ر گه‌لێ كوردستانێ

دياردكه‌ن، به‌لێ ديرۆكێ يا سه‌لماندى كو ئيرادا گه‌لێ كوردستانێ ب چو كه‌س ولايه‌نه‌كى نه‌ شكه‌ستيه‌ وناشكێت.