ئەڤرۆ نیۆز ، زنار تۆڤی:
موقەدەمێ مافپەروەر ئازاد تاها بەرپرسێ پەیوەندی و راگەهاندنێ ل رێڤەبەریا هاتنوچوونا پارێزگەها دهۆکێ بۆ ئەڤرۆ نیۆز دیارکر:کو ل سێ هەیڤێن بوری دا 79 روودانێن هاتنوچوونێ ل سەنتەرێ پارێزگەها دهۆکێ رووداینە.
ناڤهاتی گوت ژی:ل هەر سێ هەیڤێن 9.10.11 یێن سالا 2017 ل سەنتەرێ پارێزگەها دهۆکێ 79 روودانێن ترافیکێ رووداینە،کو د وان روودانان دا 53 کەس برینداربووینە و هەروەسا 2 کەسان ژی گیانێ خۆ ژ دەستدایە.
ئه‌ڤرۆنيوز:
ژبه‌ركو ده‌زگرا كۆرێ وێ يا كورت بوو، ژنه‌كا چينێ يا 47 سالى خوه كوشت.
رۆژناما ديلى ميل يا بريتانى به‌لاڤكر كو ئه‌و ژن يا رازى نه‌بوو ب ژيگرتنا كۆرێ وێ بۆ ده‌زگرا خوه، چونكى ب ديتنا وێ به‌ژنا ده‌زگرا كۆرێ وێ يا كورته ويا گونجاى نينه بۆ وى.
زێده‌تر دياركر، پشتى وێ ژنێ داخواز ژكۆرێ خوه كرى كو بۆچوونا خوه ب گوهۆريت وكچه‌كا دى بۆ خوه ب هه‌لبژێريت كو ژيانا هه‌ڤژينيێ دگه‌لدا پێكبينيت، كۆرێ وێ ئه‌ڤ چه‌نده ره‌تكر ويێ رژد بوو ل سه‌ر بۆچوونا خوه. دئه‌نجامدا دايكا وى خوه هاڤێته د ئاڤێ وخه‌ندقى.
ئه‌ڤرۆنيۆز:
رۆژنامه‌كا لوبنانى به‌لاڤكر كو ئه‌مريكا ب پێدڤى دزانيت سه‌رۆك وه‌زيرێن عيراقێ يێ به‌رێ نورى مالكى بهێته تۆمه‌تباركرن ب به‌رپرسياره‌تيا كاره‌ساتێن قۆناغا بۆرى وداخواز ژ عه‌بادى ژى كريه كو پێدڤيه ڤێ كارى بكه‌ت.
رۆژناما (الاخبار) يا لوبنانى، دراپۆرته‌كا خوه‌دا به‌لاڤكريه كو شاندێن ئه‌مريكى چه‌ندين شيره‌ت ئاراسته‌ى حه‌يده‌ر عه‌بادى سه‌رۆك وه‌زيرێن عيراقێ كرينه ل دۆر چاوانيا شه‌رِێ دژى گه‌نده‌ليێ ب ريێا ستراتيژيه‌ته‌كێ كو ب وێ بشێت ل سه‌ر گه‌نده‌لكاران ب سه‌ركه‌ڤيت ژلايه‌كى ڤه و هه‌ڤركێن خوه ژ ئه‌وێن دوروبه‌رێن وى ڤالا كه‌ت ل قۆناغا ئێكێ، كو ئه‌و چه‌نده كو ب دووماهى ئينانا وان ژروويێ سياسى ڤه ب ساناهى ئێخيت.
دياركريه ژى، شاندێن ئه‌مريكى ل عه‌بادى راگه‌هانديه كو ئه‌و دراڤێ ل ده‌ف هه‌ڤرِكێن عه‌بادى دێ بيته گه‌ف ل سه‌ر وى وپێدڤيه ئه‌و دراڤه بهێته ڤه‌گه‌راندن دچارچۆڤێ هشككرنا ژێده‌رێن هێزا وان وبۆ عه‌بادى دووپات كريه كو پێدڤيه مالكى بهێته تۆمه‌تباركرن ب به‌رپرسياره‌تيا كاره‌ساتێن قۆناغا بۆرى
ئه‌ڤرۆنيۆز:
وه‌زيرێ ژێده‌رێن ئاڤێ ل عيراقێ راگه‌هاند، دده‌مێ چه‌ند رۆژێن داهاتى دا، بسپۆرێن نێڤده‌وله‌تى دێ گه‌هنه عيراقێ بۆ هه‌له‌سه‌نگاندنا ره‌وشا سكرێن مووسل وده‌ربه‌نديخان پشتى سكرێ دووماهيێ زيانێ گه‌هشتينێ ژئه‌گه‌رێ بيڤه‌له‌رزا 12 ڤێ مه‌هێ.
حه‌سه‌ن ئه‌لجه‌نابى، وه‌زيرێ ژێده‌رێن ئاڤێ ل عيراقێ دداخۆيانيه‌كا رۆژنامه‌ڤانى دا گۆت، نوكه بسپۆرێن بوارێ جيۆلوجى مژوولى هه‌لسه‌نگاندنا ره‌وشا سكرێ ده‌ربه‌نديخانن ودانوستاندنێ ل سه‌ر چه‌ند برياره‌كا دكه‌ن بۆ كێمكرنا ئاستێ ئاڤا سكرى ب مه‌ره‌ما زانينا وان زيانێن ژئه‌گه‌رێ بيڤه‌له‌رزێ گه‌هشتينێ.
ئه‌ڤرۆنيۆز:
هه‌ردو كۆمپانيێن زه‌به‌لاح (فه‌يسبووك وگووگل) پێكڤه بزاڤه‌كا رژد كريه بۆ وێ چه‌ندێ رێگريێ ل ده‌نگوباسێن دره‌و وسه‌خته بگرن ووان ل به‌ره نيشانه‌كا جوداكه‌ر بێخنه سه‌ر وان ده‌نگوباسێن دهه‌ژى كو كليك ل سه‌ر بهێته كرن.
هه‌ردو كۆمپانيێن ناڤبرى، ناڤێ وى كارى يێ كريه(پرۆژێ دلنياييێ) وئارمانجا وان نه‌هێلانا ده‌نگوباسێن سه‌خته‌يه كو ب شێوه‌كێ به‌ربه‌لاڤ دمالپه‌ران دا دهێنه به‌لاڤكرن، ژبۆ كو كارێ خوه ب شێوه‌كێ باش ئنجام بده‌ن، 75 ده‌زگه‌هێن راگه‌هاندنێ ل جيهانێ هاريكاريا وان دكه‌ن.
ئه‌ڤ پرۆژه پێزانينان ل سه‌ر ده‌زگه‌هان كۆم دكه‌ت بۆ وێ چه‌ندێ ده‌نگوباسێن هه ر ده‌زگه‌هه‌كێ راگه‌هاندنێ دراست بن، هه‌ردو كۆمپانى ل تۆرێن خوه نيشانه‌كا دلنياييێ ل سه‌ر دانن، ئه‌ڤه ژى دێ بيته ئاسانكاريه‌ك بۆ خوينه‌ران هه‌تا بشێن دڤه‌كرنا هه‌ر ده‌نگوباسه‌كى دا، پشت راست ببن ژ راستى ودروستيا پێزانينان.
سالى ليهرمان ڤه‌كۆله‌ر ل زانكۆيا (سانتا كلارا) وبه‌رپرسێ ڤى پرۆژێ هه‌ڤپشك، دبێژيت، نوكه ديتنا ده‌نگوباسێ راست ل سه‌ر ئه‌نترنێتێ يێ بوويه تشته‌كێ ب زه‌حمه‌ت ويا وه‌كرى كو خه‌لك به‌رده‌وام ب گومان سه‌حكه‌نه هه‌ر پێزانينه‌كێ، مه ژى دڤێت رێگريێ ل ڤى كارى بكه‌ين.
ل دووڤ وى پرۆژه‌ى، ژنوكه وپێڤه هه‌ر مالپه‌ره‌كێ لينكێ وى ل فه‌يسبووكێ هه‌بيت وئه‌و نيشان پێڤه نه‌بيت، پێدڤيه پێزانينێن وى ب چاڤێ گومانێ بهێنه سه‌حكرن.
ئه‌ڤرۆنيۆز:
په‌يڤدارێ پارتى ديموكراتى كوردستان، مه‌حموود محه‌مه‌د، پشتى كۆمبوونا شاندێ سه‌رۆكاتيا حوكمه‌تێ ل گه‌ل پارتى، ل دۆر ته‌وه‌رێن وێ كۆمبوونێ راگه‌هاند، ئه‌جندايێن وێ سه‌ره‌دانێ بۆ دروستكرنا ئێكرێزيێ يه، هه‌ڤده‌م ئه‌و داخوازيێن ل سه‌ر پرسا حوكمه‌تێ هه‌ين ل گه‌ل وان كێشێن تووشى حوكمه‌تا هه‌رێما كوردستانێ وخه‌لكێ كوردستانێ بووين هاتن به‌حسكرن.
په‌ڤدارێ پارتى هه‌لويستا حزبا خوه‌ل دۆر ئه‌نجامدانا هه‌لبژارتنان راگه‌هاند وگۆت، پرسا هه‌لبژارتنان چ زوو بهێنه ئه‌نجامدان وچ دره‌نگ ئه‌ڤ چه‌نده پێدڤى ب كوده‌نگيێ يا هه‌ى، ئه‌م وه‌كو پارتى دبينين هه‌كه هه‌لبژارتنێن هه‌رێما كوردستانێ به‌رى هه‌لبژارتنێن عيراقێ بهێنه ئه‌نجامدان دبيت باشتر بيت، هه‌تا نوكه ژى چو ژڤان بۆ ئه‌نجامدانا هه‌لبژارتنان نه‌هاتينه دياركرن، دياركرنا ده‌مێ هه‌لبژارتنان دێ مينيت ل سه‌ر وان كۆمبوونێن سه‌رۆكاتيا حوكمه‌تا هه‌رێما كوردستاێ ل گه‌ل لايه‌نێن سياسى ئه‌نجامدده‌ت كو دێ ل سه‌ر ده‌مى رێككه‌ڤن.
مه‌حموود محه‌مه‌د گۆت ژى، ئه‌م يێ ڤه‌خواندنێ ل سه‌ر وى پرۆژێ بزاڤا گۆرِان پێشكێش كرى دكه‌ين، دێ ل سه‌ر ئاخڤين وپاشى دێ وان ئاگه‌هداركه‌ين، چو ژڤان ژى بۆ گرێدانا كۆمبوونا پێنج قۆلى نه‌هاتينه دياركرن.
ل دۆر داخوازيا هه‌لوه‌شاندنا حوكمه‌تێ ژى، گۆت، هه‌لوه‌شاندنا حوكمه‌تێ دێ كێشێن مه‌زن دروست كه‌ت.
ئەڤرۆ نیوز ، نەوزاد ھلۆری:
پارێزگەھا دھۆک ب پارێزگەھا سيێ يا ھەرێما کوردستانێ ژ روویێ ھژمارا رونشتڤانان دھێتە ھژمارتن پشتی ھەولێر و سلێمانی، ب گورەی دووماهی ئامارێن سازیێن پەیوەندیدار، ھژمارا رونشتڤانێن گشتی ل پارێزگەھا دھۆک ب ئاوارە و پەنابەر ڤە دو ملیۆن و 246 ھزار 587 کەسە.
ب گورەی ئەوان ئامارێن کو رێڤەبەریا ئامار و سەرژمێریاریا دھۆک و ئەنستیوتا دھۆک بۆ رەوشەنبیریا گشتی و کاروبارێن ئاوارە و پەنابەران ل دھۆکێ، ھژمارا روونشتڤانێن گشتی ل پارێزگەھا دھۆک ب ڤی رەنگی یە:
– ناڤەندادھۆک 403 ھزار و 150 کەسە.
– قەزا زاخۆ 295 ھزار و 738 کەسە.
– قەزا ئاکرێ 189ھزار و 573 کەسە.
– قەزا سێمێل 202 ھزار و 22 کەسە.
– قەزا ئامێدی 119 ھزار و 421 کەسە.
– قەزا شێخان 154 ھزار و 525 کەسە.
– قەزا بەردەڕەش 148 ھزار و 148 کەسە.
– ھژمارا پەنابەران 250 ھزار کەسە.
– ھژمارا ئاوارەیان ژی 484 ھزار کەسە.
سەرجەمێ گشتی یێ ھژمارا روونشتڤانێن رەسەن ل پارێزگەھا دھۆک دبیتە ملیونەک و 512 ھزار و 587 کەس، سەرجەمێ گشتیێ ھژمارا روونشتڤانێن رەسەن ل پارێزگەھا دھۆکێ ل گەل ھژمارا ئاوارە و پەنابەران دبیتە دو ملیون و 246 ھزار 587 کەس.
ئه‌ڤرۆ نيوز:
ل ژێر درووشمێ (بەرەڤ ئێک رێزیێ) و ب چاڤدێریا پارێزگارێ دھۆکێ و رێڤەبەریا گشتیا ئەوقاف و کاروبارێن ئایینی دێ رۆژا ژدایکبوونا پێغەمبەری (محەمەد) سلاڤ لێ بن ل رۆژا 30ى چريا دويێ 2017 ل پارێزگەھا دھۆکێ ساخ کەت.
سەمیان عەبدولخالق، رێڤەبەرێ گشتیێ ئەوقاف و کاروبارێن ئایینی بۆ رۆژناما ئەڤرۆ ئاشکرا کر کو رۆژا ژدایکبوونا پێغەمبەری (محەمەد) سلاڤ لێ بن دێ ب گێرانا چەندین ئاھەنگان و خەملاندنا باژێری ھێتە ساخکرن و بۆ ڤێ مەرەمێ ژی بەرنامەک ل سەرانسەری پارێزگەھا دھۆکێ ھاتیە دانان و دێ سمینار مزگەفتێن جوداجودا یێن ھەموو قەزایێن سەر ب پارێزگەھا دھۆکێ ڤە ھێنە پێشکێشکرن و گۆت: “ئەڤ سالە ئاھەنگا رۆژا ژدایکبوونا پێغەمبەری (محەمەد) سلاڤ لێ بن دێ ل مزگەفتا حەجی ئیبراھیم ماسیکی ل دھۆکێ ھێتە گێران”.
ناڤھاتی ئاماژە دا وێ چەندێ کو سال بۆ سالێ بەرنامێ ساخکرنا رۆژا ژدایکبوونا پێغەمبەری (محەمەد) سلاڤ لێ بن ژ ئالیێ رێڤەبەریا ئەوقاف و کاروبارێن ئایینی ڤە دھێتە گوھۆرین، بەلێ دڤێت ئەو بەرنامە دگەل بنەمایێن پیرۆزێن ئایینی بگۆنجیت
ئەڤرۆ نیوز:
سیاسەتمەدار و نڤیسەرەکێ باکورێ کوردستانێ دیار دکەت کو ھێرشا ل سەر کەرکووکێ و گڤاشتنێن نھا ل سەر ھەرێما کوردستانێ ھەموو پیلانێن بریتانیا نە، چونکو بریتانیا ناخوازیت سنورێ سایکس بیکۆ بھێنە گوھۆڕین و ئیران و تورکیا بێی بریتانیا نەدشیان دەست ب ئۆپەراسیۆنا کەرکووکێ بکەن.
موراد جوان سیاسەتمەدار و نڤیسەرێ ناڤدارێ باکورێ کوردستانێ بۆ رۆژناما ئەڤرۆ دیار کر کو ئۆپەراسیۆنا ل سەر کەرکووکێ و ئەو ئالۆزیێن ل دەڤەرێن کوردستانی یێن دەرڤەیی ئیدارا ھەرێما کوردستانێ روو دایین ھەموو پیلانێن بریتانیا بوون، چونکو بریتانیا ناخوازیت سنورێن پەیمانا سایس بیکۆ بھێتە گوھۆڕین و گۆت: (ریفراندۆما ھەرێما کوردستانێ بۆ گوھۆڕینا وان سنۆرێن دەستکرد بوو و ژ بەر ھندێ ژی بریتانیا دژبەریا ریفراندۆمێ کر و وەلاتێن رۆژھەلاتا ناڤین یێن وەکو تورکیا و ئیرانێ ژی نەدشیان بێی بریتانیا دەست ب ئۆپەراسیۆنا کەرکووکێ بکەن).
ناڤبری د پشکەکا دی یا ئاخڤتنا خوە دا ئەو یەک ژی دیار کر کو رێککەڤتنا پەترۆلێ یا د ناڤبەرا ھەرێما کوردستانێ و روسیا ئێک ژ ئەگەرێن دی یێن سەرەکی بوو کو بریتانیا ژێ نەرازی بوو، بریتانیا ناخوازیت جھێ لنگێ روسیا ل عیراقێ و ھەرێما کوردستانێ ھەبیت و ژ بەر ھندێ ژی وان رێ خوەش کر کو ھێزێن ئیرانێ و عیراقێ دەست ب ئۆپەراسیۆنا کەرکووکێ بکەن و گۆت: (تورکیا ژی ھەموو دەمەکێ خیانەت ل ھەڤالبەندێن خوە کرینە، تورکیا خیانەت ل کورد، تورکمان و سوننان کر و ژ بەر ھندەک بەرژەوەندیێن خوە ھەڤکاریا وێ پیلانێ کر کو ل کەرکووکێ و دەڤەرێن دی ھاتە بجە ئینان).
ل دۆر ھەلویستێ ئەمریکا ژی سیاسەتمەدار و نڤیسەرێ باکورێ کوردستانێ دبێژیت کو بریتانیا ب ھەر رێکا ھەی شیا کو ترامپی ژی رازی بکەت، ژ بەر ھندێ ژی ئیدارا ترامپی ل ھەمبەر روودانێن ل کەرکووکێ بێدەنگ ما، دڤێت گەلێ مە راستیا روودانان باش بزانن و ژبیر نەکەن کو پیلانا کەرکووکێ و ئەو ئالۆزیێن روو دایین ھەموو پیلانا بریتانیا بوو.
ئەڤرۆ، زنار تۆڤی:
موئەیەد تەیب چاڤدیرێ سیاسی و پەرلەمانتارێ بەرێ یێ پەرلەمانێ عێراقێ د دیدارەکێدا بۆ رۆژناما ئەڤرۆ دیار کر، حوکمەتا عێراقێ نە پێشتر و نەنوکە ژی نەڤیایە و یا رژد ژی نەبوویە،کو ئەو کیشێن د ناڤبەرا ھەولێر و بەغدا دا ھەین چارەسەر بکەت، ھەروەسا ھەر دانوستاندنەکا بھێتە ئەنجامدان و ھەکە لایەنێ سییێ یێ ئامادە بیت، دیسا ھەکە لایەنێ سییێ ئەمریکا یان ئێکەتیا ئورۆپا یان ژی نەتەوێن ئێکگرتی بیت، دێ یا دیار و ئاشکرا بیت، کو ھەرێما کوردستانێ یا ل سەر ھەقیێ دچیت و بەغدایە پێشێلکاریێن دستووری دکەت، لەورا حوکمەتا عێراقێ دڤێت ئەڤێ راستیێ ل خەلکێ عێراقێ و ھەروەسا ل ھەموو جیھانێ ژی ڤەشێریت، دیسا وەکو دیار بەری ریفراندۆمێ ژی بەغدا یا جددی نەبوویە کو دانوستاندنەکا نیەت پاقژ ل گەل ھەرێما کوردستانێ بکەت، ھەروەسا نوکە ژی عێراق نەیا بەرھەڤە دانوستاندنان بکەت، لەورا نوکە ھەرێما کوردستانێ یا ل ھەمبەر گرفتاریەکا مەزن دا، چونکی عێراق بوویە لایەنەک نە رازی دبیت ئەم ژێ جۆدا ببین،کو ھەرێما کوردستانێ سەربەخۆیا خوە راگەھینیت، نە رازی دبیت،کو کێشە ژی بھێنە چارەسەر کرن، لەوما د رەوشەکا ھوسا دا جارەکادی بێھنا شەرەکێ دھێتە مرۆڤی، چونکی ئەڤ نە پێگیریا وان ب دستووری و نە ھەولدان بۆ چارەسەریا کێشەیان وێ دگەھینیت،کو وان نیەتا ھندێ ھەیە کو شەرەکێ دی ل سەر ھەرێما کوردستانێ راگەھینیت،ناڤھاتی گوت ژی:بۆ ڤێ قۆناغێ ب تنێ ئێک رێک ل ھەمبەری کوردان ھەیە،لێ مخابن کوردان ئەو چەندە نە کریە و نە دکەن ژی، ئەو ژی ئێک ھەلویستی و ئێکرێزیا ھەموو پارتێن کوردستانی یە، ھەروەسا پێدڤیە ھەموو لایەنێن کوردستانی پشتگیریا حوکمەتا ھەرێما کوردستانێ بکەن، داکو ھەلویستێ ڤێ حوکمەتێ بھێز بکەڤیت.
موئەیەد تەیب زێدەتر دبێژیت: ژبەرکو مە حوکمەتا ھەرێمێ یا ھەی کو حوکمەتەکا شەرعیە، ئەو حوکمەت نوونەراتیا خەلکێ ھەرێما کوردستانێ ل بەغدا و ل دەرڤە ژی دکەت، لەورا چوونا شاندێ ھەرێمێ بۆ بەغدا پێدڤی ناکەت،ھەموو پارت و لایەنێن کوردی دناڤدا بن، لێ یا پێدڤیە سەرۆکێ حوکمەتێ ل گەل ھەموو ھێز و لایەنێن کوردستانی روونتە خوار و دڤێت وەرەقەیەکا کاری ل گەل خوە ببەتە بەغدا، لەورا پێدڤی ناکەت حزبێن کوردستانی ھەموو پێکڤە ل گەل شاندەکێ ب چنە بەغدا، لێ ھەکە پارتێن کوردستانی ئەڤە کرە مەرج، ل وی دەمی باشترە شاندەک کو نوونەراتیا ھەموو پێکھاتێن کوردستانێ بکەت بچیتە بەغدا، داکو بۆ بەغدا دیار بکەن،کو مە ئێک ھەلویست ھەیە.
ناڤھاتی ئەو چەند ژی خویاکر، ھەکە لایەنێ سییێ بەرھەڤی دانوستاندنێن د ناڤبەرا ھەولێر و بەغدا دا نەبیت، پێدڤی ناکەت شاندێ کوردی بچیتە بەغدا، ھەر چەندە نوکە ئەم د وەلاتەکی دا دژین ناڤێ وی عێراقە، لێ ئەو کێشێن د ناڤبەرا ھەولێر و بەغدا دا چێبووین، پێدڤی ب دیدەڤانەکێ و ناڤبەینکارەکێ ھەنە، ھەر چەندە نەتەوێن ئێکگرتی و ئێکەتیا ئورۆپی و فرنسا و بریتانیا ئامادەیا خوە دیارکریە کو ناڤبەینکاریێ د ناڤبەرا ھەرێمێ و عێراقێ دا بکەن،لێ حوکمەتا عێراقێ ئەڤ چەندە ژی رەتکریە، ھەروەسا وان چەند خالەک کرینە مەرجێن دانوستاندنێ،لەورا ھەکە مە ئەو خالێن وان بجە ئینان، ئێدی ئەم نزانین دێ چینە بەغدا چو دی ژ وان خوازین، ھەروەسا ھەکە مە ھەموو سنۆرێن کوردستانێ رادەستی وان کرن و ھەکە ھەر تشتێ وان ڤیا مە بۆ وان کر، دێ ھندەک تشتێن دی ل سەر مە سەپینن، دیار حوکمەتا عێراقێ داخوازا ھندێ دکەت، ئەم خوە رادەستی ئیرادا وان بکەین، ئەو چو ب رەوا دبینن ئەو مافێ مەیە،چو تشتێن دیتر لێ زێدە نەکەن،لەورا حوکمەتا عێراقێ ئێدی دانپێدانێ ب حوکمەتا ھەرێما کوردستانێ ژی ناکەت،دیسا د سەقایەکێ ھوسادا دانوستاندن ژی دێ ل گەل وان دبێ مفا بن، لەورا یا فەرە ئەم وەک کوردستانی ئەم د دو بەرەیان دا کار بکەین.
نيشاندان