ئه‌ڤرۆنيۆز، ئه‌ياد به‌روارى
په‌يڤدارێ وه‌زاره‌تا په‌ترۆلا عيراقێ، عاسم جيهاد، بۆ ئه‌ڤرۆنيۆز راگه‌هاند، مه بريارا هنارتنا 30 مليۆن لترێن گازا سپى بۆ وه‌لاتيێن هه‌رێما كوردستانێ دايه ورێژه‌ك ژێ يا گه‌هشتيه هه‌رێمێ ژى.
ل دۆر وێ چه‌ندێ كو 30 مليۆن لترێن گازێ سپى تێرا ئێك پاريزگه‌ها هه‌ريمێ ب تنێ ناكه‌ت، عاسم جيهاد دياركر، وه‌زاره‌تا په‌ترۆلێ كه‌متر خه‌ميێ ناكه‌ت وئه‌م وه‌كو وه‌لاتيێن پاريزگه‌هێن دى يێن عيراقێ سه‌حدكه‌ينه وه‌لاتيێن هه‌رێما كوردستانێ.
خوياكر ژى، بێگومان دێ وه‌زاره‌تا په‌ترۆلێ ڤه‌خواندنێ بۆ وێ پێدڤيێ كه‌ت وناهێليت پارێزگه‌هێن هه‌رێمێ پێدڤى ب گازا سپى هه‌بيت، ل هه‌موو وه‌رزه‌كێ زڤستانێ ژى مه گازا سپى بۆ پارێزگه‌هێن هه‌رێمێ ڤرێكريه.
عاسمى خوياكر، وه‌زاره‌تا په‌ترۆلێ دێ بۆريه‌كا نوو ژ كه‌ركووكێ هه‌تا پێشابيرێ راكێشيت كو ژ دێ كه‌ركووكێ هێت ود پاريزگه‌ها سه‌لاحه‌دين وبێجى وپارێزگه‌ها نه‌ينه‌وا را دبۆريت هه‌تا دگه‌هيته ده‌ڤه‌را پێشابوورێ ل پارێزگه‌ها دهۆكێ كوپشتى داعشێ مووسل وچه‌ندين ده‌ڤه‌رێن دى كونترۆلكرين، گه‌له‌ك زيان گه‌هشتنه وێ بۆريێ وهنارتنا په‌ترۆلێ ده‌مه‌كێ درێژه ب رێيا وێ يا راوه‌ستياى.
زێده‌تر گۆت، پشتى تيمێن ته‌كنيكى يێن وه‌زاره‌تا په‌ترۆلێ ڤه‌ديتن ل سه‌ر وێ بۆريێن ئه‌نجامداين، دياربوو كو ژ بێجى هه‌تا پێشابيرێ گه‌له‌ك زيان يێن گه‌هشتينێ وناهێته نووژه‌نكرن، له‌وما دێ بۆريه‌كا نوو ل ل جهێ يا كه‌ڤن هێته راكێشان دا بشێن په‌ترۆلێ تێدا بهنێرين.
دياركرژى، ده‌مه‌ك بۆ پرۆسا راكێشانا بۆريا نوو دڤێت، چونكى وزاره‌تا په‌ترۆلێ ژنوو دێ داخواز ژ كۆمپانيێن جيهانى يێن دوى بياڤى دا كاردكه‌ن كه‌ت كو ڤه‌ديتنێن تايبه‌ت بۆ راكێشانا وێ بۆريێ بينين وپاشى ل دووڤ رێنما ومه‌رجان هه‌ر كۆمپانيه‌كا ئه‌و كار بۆ دكه‌ڤيت دێ دانوستاندنان ل گه‌ل وه‌زاره‌تا په‌ترۆلێ كه‌ت تا بهێته راسپاردن وى كارى ئه‌نجام بده‌ت.
نيشاندان