ئه‌ڤرۆ نیوز:
د. شێركو جه‌وده‌ت، سه‌رۆكێ لژنا سامانێن سرۆشتى ل په‌رله‌مانێ كوردستانێ بۆ رۆژناما ئه‌ڤرۆ ئاشكرا كر كو بڕیاره 30 ملیۆن لترێن گازا سپى بۆ هه‌رێما كوردستانێ بهێن و هنده‌ك گه‌هشتیه و یا دى ژى دێ گه‌هیت و گۆت: “پێشبینى دكه‌م سه‌ره‌رایى ئه‌ڤێ رێژێ گازا سپى هێشتا بگه‌هیته هه‌رێما كوردستانێ، چونكو ئه‌ڤه تێرا خه‌لكى ناكه‌ت، به‌لێ ب هاتنا ڤێ گازا سپى ژ به‌غدا بۆ كوردستانێ بهایێ گازا سپى ل بازارێن كوردستانێ نزمبوویه”.
ئه‌ڤرۆ نیوز، له‌زگین جوقى، بارزان مزرووى
ئه‌ندامه‌كێ جڤاتا ناحیا سنۆنێ دیاركر كو ئه‌ڤرۆ 19/11/2017 ل گرزه‌رك ل ده‌ڤه‌را شنگال گۆره‌كێ دى یێ ب كۆم هاتیه دیتن كو روفاتێن 17 كه‌سان تێدانه.
سه‌عدوون سه‌میر، ئه‌ندامێ جڤاتا ناحیا سنۆنێ دیاركر كو هیشتا پشت راست نه‌بووینه كو روفاتێن كێ نه كو د ناڤ ڤێ گۆرى ب كۆم دا هاتینه دیتن و ره‌نگه هه‌موو ژى نه كوردێن ئێزدى بن ، پێدڤیه هه‌موو گۆرێن بكۆم بهێنه پاراستن هه‌تا لیژنێن تایبه‌تمه‌ند دهێن كارێ خوه لسه‌ر ئه‌نجام ده‌ن.
ئاماژه دا وێ چه‌ندێ ژى كو پشتى روودانێن 16 ئوكتوبه‌رێ هیچ پێنگاڤه‌ك بۆ هلدانا گۆرێن ب كۆم نه‌هاتیه هاڤێتن هه‌تا نوكه پتر ژ 40 گۆرێن ب كۆم ل سه‌رانسه‌رێ ده‌ڤه‌را شنگال یێن هاتینه دیتن و پێشبینى دهێته كرن روفاتێن زێده‌تر ژ هزار كه‌سان ناڤدابن”.
ئه‌ڤرۆ نیوز:
بالیۆزێ نوو یێ بریتانیا ل عیراقێ پشته‌ڤانیا وه‌لاتێ خوه بۆ حوكمه‌تا هه‌رێما كوردستانێ دوپات كر و راگه‌هاند، بریتانیا دخوازیت په‌یوه‌ندی ل گه‌ل حوكمه‌ته‌كا ب هێز یا هه‌رێما كوردستانێ ژ لایێ سیاسى، ئابوورى و ئاسایشه ڤه هه‌بیت.
نێچیرڤان بارزانى سه‌رۆك وه‌زیرێن هه‌رێما كوردستانێ پێشوازى ل جۆن ویلكس بالیۆزێ نوو یێ بریتانیا ل عیراقێ كر و د دیداره‌كێ دا ویلكس ئاماژه ب وێ چه‌ندێ كر كو وى ڤیایه ل ده‌ستپێكا ده‌ستبكاربوونا خوه سه‌ره‌دانا هه‌رێما كوردستانێ بكه‌ت و ل گه‌ل حوكمه‌ت و سه‌ركرداتیا هه‌رێمێ كۆم ببیت.
بالیۆزێ بریتانیا دوپات ژى كر كو وه‌لاتێ وى بۆ هه‌ر هاریكارى و هه‌ماهه‌نگیه‌كێ ژ پێخه‌مه‌ت ده‌ستپێكرنا دیالۆگه‌كا رژد د ناڤبه‌را هه‌ولێر و به‌غدا دا و چاره‌كرنا كێشان یا به‌رهه‌ڤه.
ژ لایێ خوه ڤه نێچیرڤان بارزانى هاریكاریكرنا حوكمه‌تا هه‌رێما كوردستانێ بۆ كار و چالاكیێن وى و خورتكرنا په‌یوه‌ندیێن هه‌رێما كوردستانێ و بریتانیا دوپات كر.
ل دۆر په‌یوه‌ندیێن د ناڤبه‌را هه‌وڵر و به‌غدا دا سه‌رۆك وه‌زیرێن هه‌رێمێ راگه‌هاند، حوكمه‌تا هه‌رێما كوردستانێ هه‌رده‌م د دانوستاندنێن رژد و دوور ژ توندوتیژیێ دخوازیت و ب پێدڤى زانى كو جڤاكێ نێڤده‌وله‌تى رۆلێ خوه د خوه‌شكرنا ده‌لیڤا دیالۆگێ دا د ناڤبه‌را هه‌ردو لا دا بگێڕیت.
ئةڤرۆنيۆز:
سه‌رۆكێ توركيا، ره‌جه‌ب ته‌يب ئه‌ردۆگان، لێبۆرينا په‌يمانا باكوورێ ئه‌تله‌سى(ناتۆ) ره‌ت دكه‌ت، ئه‌وا ل دۆر روودانه‌كێ كو ل ده‌مێ ئه‌نجامدانا مه‌شق وراهێنانێن هيزێن وه‌لاتێن ناتۆ ل نه‌رويج رووداى، كو ژبه‌ر وێ توركيا خوه ژراهێنانان ڤه‌كێشاى.
ناتۆ داخوازا لێبۆرينێ ژتوركيا كربوو ل دۆر دانانا وێنێن مسته‌فا كه‌مال ئه‌تاتۆرك دامه‌زرێنه‌رێ ده‌وله‌تا توركيا وره‌جه‌ب وته‌يب ئه‌ردوگان سه‌رۆكێ توركيا ل سه‌ر تابلۆيێن نيشان شكاندنێ.
د په‌يڤه‌كا ته‌له‌ڤزيۆنى دا، ئه‌ردۆگانى گۆت( من شێوازێ هه‌وه دمه‌شقا ناتۆ دا ديت، هنده‌ك شاشى يێن هه‌ين خوه ژلايێ مرۆڤێن گه‌مژه‌ڤه ژى ناهێنه ئه‌نجامدان، به‌لكو ته‌نها ژلايێ خه‌لكێ نه‌فس نزم ڤه دهێنه ئه‌نجامدان). گۆت ژى( نابيت ئه‌ڤ پرسه تنێ ب داخوازه‌كا لێبۆرينێ بهێته ده‌ربازكرن).
رۆژا ئه‌ينيا بۆرى توركيا سه‌ربازێن خوه ژ سه‌نته‌ره‌كێ راهێنانێن له‌شكرى ژ نه‌رويج كێشان، ژئه‌گه‌رێ دانان وێنێن ئه‌تاتۆركى وئه‌ردۆگانى ل سه‌ر تابلۆيێن نيشان شكاندنێ، پشتى روودانێ ژى هه‌ر ئێك ژ ناتۆى وحوكمه‌تا نه‌رويجێ داخوازا لێبۆرينێ ژ توركيا كر.
ئه‌ڤرۆنيۆز
پشتى روودانا بيڤه‌له‌رزا 12 ڤێ مه‌هێ ل ده‌ڤه‌را هه‌له‌بجه وده‌ربه‌نديخان، هه‌موو خه‌لكێ باژێركێ به‌مۆ يێ سه‌ر ب پارێزگه‌ها هه‌لبجه ڤه ژبه‌ر ترسا بيڤه‌له‌رزێ دناڤ جيڤه‌تگه‌هێ دا دا دمينن.
عادل سال رێڤه‌به‌رێ ناحيا به‌مۆ بۆ باسنيۆز دياركر كو هه‌ر ژ بيڤه‌له‌رزا 12 ڤێ مه‌هێ وهه‌تا نوكه زێده‌تر ژ 100 بيڤه‌له‌رزێن دى ل سنۆرێ ناحيا مه يێن داين ورۆژانه ژى چه‌ندين جار دووباره دبيت، به‌لێ هێزا وان بيڤه‌له‌رزا ژ وێ كێمتره ئه‌وا ل 12 مه‌هێ رووداى.
دياركر ژى، ناحيا مه زيانداره هه‌ره مه‌زن بوو دوێ بيڤه‌له‌رزێ دا، هه‌رچه‌نده مه زيانێن گيانى نه‌بوون، به‌لێ بريندار هه‌بوون وزيانێن مه‌زن يێن دراڤى ب ناحيێ كه‌فتينه كو پشكه‌ك ژ چيايێ به‌مۆ هاته خوار وچه‌ندين ترومبيڵ زيان گه‌هشتنێ وخانيێن ده‌ڤه‌رێ ژى زيان يێن گه‌هشتينێ وكۆمه‌لگه‌ها فه‌رمانگه‌هێن ناحيێ يا تێكچووى وفه‌رمانگه‌ه ژى يێن ل ناڤ خيڤه‌تان دا.
گۆت ژى، نوكه هه‌موو ئاكنجيێن ناحيا به‌مۆ يێن دناڤ خيڤه‌تاندا دژين، چونكه ترس ژ دووباره هاتنا بيڤه‌له‌رزێ يا هه‌ى، ب تايبه‌تى كو رۆژانه چه‌ندين جاران بيڤه‌له‌رز دووباره دبيت.
ئه‌ڤرۆنيۆز:
شيره‌تكارێ جڤاتا ئاسايشا هه‌رێما كوردستانێ، مه‌سرور بارزانی ،دچارچۆڤێ پێشوازيا باليۆزێ نوويێ بريتانيا دا ل عيراقێ راگه‌هاند، هه‌رێما كوردستانێ يا پێگيره پشكداريێ دهه‌ڤپه‌يمانيا شه‌رێ دژى تيرۆرێ دا.
نڤيسينگه‌ها راگه‌هاندنا شيره‌تكارێ جڤاتا ئاسايشا هه‌رێما كوردستانێ به‌لاڤكر كو ئه‌ڤرۆ مه‌سرور بارزانى پێشوازى ل جۆناتان ويلكس باليۆزێ نوو يێ بريتانيا ل عيراقێ كر.
دوێ ديدارێ دا، چاوانيا پێشڤه‌برنا په‌يوه‌نديێن هه‌ريمێ وبريتانيا هاته به‌حسكرن وباليۆزێ بريتانى دووپاتى كر كو وه‌لاتێ وى پشته‌ڤانيێ ل مافێن دستوورى يێن هه‌رێما كوردستانێ دكه‌ت ودێ هاريكار بيت كو هه‌رێم ڤێ قۆناغا سه‌خت ده‌ربازبكه‌ت.
باليۆزێ بريتانى ئاماژه ب دووماهى ره‌وشا په‌يوه‌نديێن دناڤبه‌را هه‌وێرێ و به‌غدا كر وهه‌لويستێ وه‌لاتێ خوه بۆ پشته‌ڤانيا دانوستاندنه‌كا ئاشتيانه ل سه‌ر بنه‌مايێ دستوورى بۆ چاره‌كرنا هه‌موو كێشێن دناڤبه‌را هه‌ردولا دياركر.
دبه‌رامبه‌ر دا مه‌سرور بارزانى هيڤيا سه‌ركه‌فتنێ بۆ باليۆزێ نوويێ بريتانيا خواست ودووپاتى ل سه‌ر به‌رده‌وامى وبهێزكرنا په‌يوه‌نديێن دولايانه كر، ل دۆر دووماهى ره‌وشا ده‌ڤه‌رێ، شيره‌تكارێ جڤاتا ئاسايشا هه‌رێمێ پێگيريا هه‌رێمێ ب پشكداريێ دهه‌ڤپه‌يمانيا شه‌رێ دژى تيرۆرێ دووپاتكر وهيڤى خواست ب چاره‌كرنا بنه‌ره‌تى يا كێشان ونه‌هێلانا گرژيان، سه‌رهلدانا توندوتيژيێ ل ده‌ڤه‌رێ بهێته ژناڤبرن.
شيره‌تكارێ جڤاتا ئاسايشا هه‌رێمێ، پشته‌ڤانيا جڤاكێ نێڤده‌وله‌تى بۆ ده‌ستپێكرنا دانوستاندنێن ئاشتيانه وراسته‌وخوه دناڤبه‌را هه‌وێرێ و به‌غدا ژبۆ چاره‌كرنا كێشان ب گرنگ زانى وهيڤى خواست هه‌ر چ زووتر به‌غدا ب رێزگرتن ل دستوورى به‌رسڤا ئه‌رينى بۆ بزاڤێن هه‌رێمێ ژبۆ ده‌ستپێكرنا دانوستاندنێ هه‌بيت.
ئه‌ڤرۆنيۆز:
به‌رپرسه‌كێ ئێكه‌تيا نيشتمانى كوردستان گۆت، دڤيت هزر دبه‌رگريا مللى يا سه‌رانسه‌رى بهێته كر، هه‌كه دانوستاندنێن هه‌ريمێ و به‌غدا بێ ئه‌نجام بوون.
مه‌لا به‌ختيار به‌رپرسێ ده‌سته‌يا مه‌كته‌با سياسى يا ئێكه‌تيێ دبه‌رپه‌رێ خوه ل سه‌ر تۆرا فيسبووكى به‌لاڤكريه كو چه‌ندين ئاخڤتن ل دۆر دانوستاندنێن مه و به‌غدا پشتى 16 ئوكتوبه‌رى دهێنه كرن، هه‌رێما كوردستانێ هه‌رده‌م هه‌لويسته‌كێ نه‌رم به‌رچاڤ دكه‌ت، دبه‌رامبر دا به‌غدا ب توندى وره‌تكرنێ ل هه‌مبه‌ر پرسێ نيشان دده‌ت.
ب ديتنا مه‌لا به‌ختيارى، دانوستاندنێن نوكه دده‌مه‌كى دانه كو ره‌وشا سياسى وله‌شكرى دهه‌ڤسه‌نگ نينن وئه‌و قۆناغا نوكه پێدڤى ب ستراتيژيه‌ته‌كا نوو هه‌يه، به‌لێ ئه‌ڤه نابيت هه‌كه دانپێدانێ ب شاشيێن خوه نه‌كه‌ين.
ل دۆر وێ ستراتيژيه‌تا نوو، مه‌لا به‌ختيار دبێژيت، هه‌كه مافێن مه ل عيراقا فيدرال ب رێيا دانوستاندنێ ل دووڤ دستوورى، نه‌هاتن دان، وى ده‌مى دێ هزر دبه‌رگريا مللى يا سه‌رانسه‌رى دا هێته كرن.
گۆت ژى، ددانوستاندنێن ل گه‌ل مالكى دا، ب راستى كوردان ب بێ خه‌ميه‌كا مه‌زن ره‌فتار دكر ودانوستاندن ب پرۆژێ په‌ترۆلێ وكه‌ركووكێ ڤه گرێدا، به‌لێ كێشێن دى وه‌كو مادا 140 وسنۆرێن كوردستانێ وبه‌هرا هه‌رێمێ ژ بودجا فيدرالى دا پشتگوه خستن.
ئەڤرۆ نیوز، نيوار محه‌مه‌د سه‌ليم:
بڕیارە سوبەھی رۆژا دوشەمبی جڤاتا وەزیرێن ھەرێما کوردستانآ کۆمبوونا ئاسایی یا خوە ئەنجام بدەت و دێ دانوستاندنێ ل سەر ڤان تەوەران کەت.
سەمیر ھەورامی، سکرتێرێ رۆژنامەڤانی یێ جێگرێ سەرۆکێ حوکمەتا ھەرێما کوردستانێ راگەھاند کو سوبەھی 20ی چریا ئێکێ 2017 جڤاتا وەزیران دێ کۆمبوونا خوە یا ئاسایی ئەنجام دەت و بڕیارە د وێ کۆمبوونێ دا دانوستاندن ل سەر سێ تەوەران بھێتە کرن.
گۆتژی: “تەوەرێ ئێکێ دێ راپۆرتەک بیت ژ لایێ بریکارێ وەزارەتا دارایی ھاتیە پێشکێشکرن ل دۆر (بەرچاڤکرنا رەشنڤیسێ بڕیارا جڤاتا وەزیران یا دایبەت ب دارشتنا رێنمایێن دارایی یێن پێدڤی ب مەزاختنا ئەوێ رێژا ژ داھاتێ ناڤخۆیی یێ وەزارەتان ئێکسەر ژ لایێ خوە ڤە د مەزێخن)”.
سەمیر ھەورامی دەبارەی تەوەرێ دویێ ژی ئاشکەرا کر کو دێ پێشنیازا وەزارەتا بازرگانی یا تایبەت ب رێکخستنا کرێ و رسۆمات و سزایێن دارایی ھێتە گەنگەشەکرن.
ل دۆر تەوەرێ سیێ و یێ دووماھێ ژی سکرتێرێ رۆژنامەڤانی یێ جێگرێ سەرۆکێ حوکمەتا ھەرێما کوردستانێ گۆت: “تەوەرێ سیێ ژی دێ یێ تایبەت بیت ب رەشنڤیسێ بڕیارا جڤاتا وەزیران یا تایبەت ب دانانا رەسمێ ب کاربرنا ناڤخۆ ل سەر بابەتێن تووتن و جگاران کو ژ لایێ وەزیرێ ساخلەمیێ ڤە ھاتیە پێشکێشکرن”.
ئه‌ڤرۆنيۆز
وه‌زيرێ ناڤخوه‌يێ توركيا راگه‌هاند، له‌شكرێ توركى دێ چيته قه‌نديلى ول وێرێ دێ روونين، هه‌ڤسه‌رۆكێ كۆما جڤاكێن كوردستانێ(كه‌جه‌كه) ژى دبه‌رسڤێ دا دبێژيت، فه‌رموون.
سلێمان سۆيلو وه‌زيرێ ناڤخوه‌يێ توركيا به‌رى چه‌ند رۆژان، ل دووڤ باسنيۆز، راگه‌هاندبوو كو له‌شكرێ توركى بۆ پاراستنا ئاسايشا نه‌ته‌وى يا وه‌لاتێ خوه دێ 25كيلۆمه‌تران ژده‌رڤه‌ى سنۆرێ خوه هێرشێ ل سه‌ر پارتيا كاركه‌رێن كوردستانێ( په‌كه‌كه) كه‌ت.
ل دووڤ ده‌نگوباسێن ميديايێن په‌كه‌كێ، جه‌ميل بايك، هه‌ڤسه‌رۆكێ كه‌جه‌كێ، كو سه‌رپه‌رشتيا حزبێن ب سه‌ر په‌كه‌كێ ل هه‌موو پارچێن كوردستانێ دكه‌ت، به‌رسڤا سلێمان سۆيلو دايه وراگه‌هانديه، فه‌رموون وه‌رنه قه‌نديل، كێ ده‌ستێ هه‌وه گرتيه؟.
جه‌ميل بايك هوشداريێ دده‌ته وه‌زيرێ ناڤخوه‌يێ توركيا ودبێژيت، هه‌كه له‌شكر وبه‌رپرسێن توركى هزر دداگيركرنا قه‌نديلى دا بكه‌ن، دێ قه‌نديلى لێ كه‌ينه بيره‌كا كوير ويا بێ بن.
ئه‌ڤرۆنيۆز:
په‌يڤدارێ وه‌زاره‌تا خواندنا بلند وڤه‌كۆلينێن زانستى ل هه‌رێما رادگه‌هنيت په‌يمانگه‌ها ب ناڤێ(كوردمارت) ل باژێرێ هه‌ولێرێ يا باوه‌رپێكرى نينه و دياركر كو مه داخوازا داخستنا نڤيسينگه‌ها په‌يمانگه‌ها ناڤبرى ژلايه‌نێن په‌يوه‌نديدار كريه.
عه‌باس ئه‌كره‌م، په‌يڤدارێ وه‌زاره‌تا خواندنا بلند وڤه‌كۆلينێن زانستى دداخۆيانيه‌كێ دا راگه‌هاند، هنده‌ك كه‌س ب ناڤێ په‌يمانگه‌ها (كوردمارت) ريكلامێ بۆ وه‌رگرتنا قوتابيێن ده‌رچوويێن رێزا دوازده بۆ سالا خواندنێ (2017 – 2018) دكه‌ن، ئه‌م هه‌موو قوتابى وده‌رچوويێن رێزا 12 ئاماده‌يى دكه‌ين كو ئه‌ڤ په‌يمانگه‌هه يا باوه‌ر پێكرى نينه ول پرۆسا دلنياييا جۆرى وباوه‌رى به‌خشينى ژلايێ وه‌زاره‌تا خواندنا بلند يا هاتيه ره‌تكرن، له‌وما چو مۆله‌تێن قانوونى نينن وداخواز ژ ده‌رچوويێن رێزا 12 ئاماده‌يى دكه‌ين ناڤێن خوه ل وێ په‌يمانگه‌هێ تۆمار نه‌كه‌ن وپاره وده‌مێ خوه ب هه‌ده‌ر نه‌ده‌ن.
گۆت ژى، وه‌زاره‌تا خواند بلند ب نڤيسارا هژمار 16535 ل 19/11/2017 داخواز ژ پارێزگه‌ها هه‌ولێرێ كريه نڤيسينگه‌ها په‌يمانگه‌ها ناڤبرى كو تۆمارا قوتابيان تێدا دهێته كرن، دابخيت وپێرابوونێن قانوونى ل به‌رامبه‌ر ئه‌نجام بده‌ت، چونكى ئه‌و جۆره كاره دچنه دخانا فێلكرنێ ل خه‌لكى دا،
دياركر ژى كو وه‌زاره‌تا خواندنا بلند ژى دێ سكالايى ل سه‌ر خودانێن وێ په‌يمانگه‌هێ تۆماركه‌ت.
نيشاندان
