ئه‌ڤرۆنيۆز:
كۆمپانيا سامسۆنگ يا كورى دياركر كو ئه‌و به‌رهه‌ڤيا راگه‌هاندنا مۆبايلا گالاگسى 2018 A5 دكه‌ت، ب رێيا دانانا به‌رپه‌ره‌كێ پشته‌ڤانيێ ب ناڤێ A530 ل سه‌ر پێگه‌هێ وێ يێ فه‌رمى يێ كوريا باشوور، ئه‌وژى هژمارا كودێ دێ دانيته سه‌ر وێ مۆبايلا نوو.
ل دووڤ هنده‌ك پێزانينێن ل سه‌ر وى جۆرێ گلاكسى هاتينه به‌لاڤكرن، مۆبايلا نوو دێ شاشه‌كا مه‌زن هه‌بيت كو به‌رى نوكه تنێ د هه‌ردو موبايلێن S8 ونوت 8 هاتبوو ديتن، به‌سما تبلێ ژى دێ ل پشتا موبايلێ بيت .
ئه‌ڤرۆنيۆز:
راهينه‌رێ يانا ريال مه‌دريد يا ئيسپانى، زه‌ينه‌دين زێدان، راگه‌هاند دفنا سێرخيۆ رامۆس كاپتنێ يانێ يا شكه‌ستى.
ريال مه‌دريد وئه‌تله‌تيكۆ مه‌دريد د ياريا دێربى يا مه‌دريد دا ئه‌وا دوهى ب شه‌ڤ هاتيه ئه‌نجامدان بێ گۆل وه‌كهه‌ڤ ببون وسه‌ره‌راى ژده‌ستدانا دو خالان، ريالێ كاپتنێ خوه ژى ژده‌ستدا.
پشتى ياريێ رافايێل ڤاران، ياريكه‌رێ ريال مه‌دريد، گۆتبوو، ره‌وشا رامۆسى يا باش نينه ودفنا وى يا شكه‌ستى وده‌مێ دووركه‌فتنا وى ژياريان يا ديار نينه.
ژئه‌گه‌رێ وێ هنگافتنا رامۆسى، زه‌ينه‌دين زێدان نه‌چار بوو دده‌مێ بێهنڤه‌دانا دناڤبه‌را هه‌ردو گێمان دا رامۆسى بگوهۆريت وياريزان ناچۆ فێرناندێز هاته جهێ وى. پشتى ياريێ ژى زێدانى گۆت، دفنا رامۆسى يا شكه‌ستى ونه‌شێم ده‌مێ دووركه‌فتنا وى ژياريان دياربكه‌م.
به‌رى نوكه ژى دفنا رامۆسێ د ياريه‌كێ دا ل گه‌ل بايرن ميونيخ دخۆلا قاره‌مانێن ئورۆپا دا هاتبوو شكاندن، به‌لێ پشتى سێ رۆژان ژوێ هنگافتنێ پشكدارى دكلاسيكۆيێ دا كر ل به‌رامبه‌ر به‌رشه‌لونا وگۆله‌ك ژى تۆماركربوو.
ئه‌ڤرۆنيۆز:
فه‌رماندێ هێزێن پاراستنا ئێزيدخان ل شنگالێ، حه‌يده‌ر شه‌شۆ، راگه‌هاند، حه‌شدا شه‌عبى ژبنگه‌هێن خوه ل شنگالێ ڤه‌دكێشن ودچنه ده‌رڤه‌ى باژێرى.
حه‌يده‌ر شه‌شۆ بۆ مالپه‌رێ فه‌رميێ پارتى گۆت، حه‌شدا شه‌عبى ژبنگه‌هێن خوه ل شنگالێ ڤه‌دكێشن ودچنه ده‌رڤه‌ى باژێرى وئه‌و باره‌گايێن حه‌شدێ ده‌ست ب سه‌ردا گرتى، نوكه يێ چۆل دكه‌ن.
گۆت ژى، ده‌ما حه‌شدا شه‌عبى هاتيه شنگالێ، ب نه شه‌رعى ده‌ست ب سه‌ر باره‌گايێن پێشمه‌رگه‌ى و فه‌رمانگه‌هێن حكومى دا گرتبوو، به‌لێ نوكه هه‌موو يێن چۆلكرين ويێن چووينه باشوورێ شنگالێ وبرياره هه‌تا سه‌رێ ڤێ مه‌هێ ب تمامى شنگالێ بجه بهێلن.
شه‌شۆى دياركر، ب چو شێوه‌كى كريارێن حه‌شدا شه‌عبى ل شنگالێ جهێ قه‌بوولكرنێ نه‌بوون وناهێنه قه‌بوول كرنێ ژى، چونكى وان ب شێوه‌كێ نه‌شه‌رعى هێرش ل سه‌ر ده‌ڤه‌رێن كوردستانێ كر وپێشيلكارى ئه‌نجامدان.
ئەڤرۆ نیوز، ھلوری:
پێشتر ژی چەندان جاران ھەلویستێن خوە ل سەر ریفراندۆمێ راگەھاند بوو ، وەسا بریارە کو سوبەھی دادگەھا فیدرالی یا عیراقێ داوی ھەلویست و بریارا خوە لسەر ریفراندۆما ھەرێما کوردستانێ و دەڤەرێن کوردستانیێن دەرڤەیێ کارگێریا ھەرێما کوردستانێ ژی بدەت ، بەلێ ئەو یەک نەھاتیە پشتراستکرن ، ئەرێ حکومەتا ھەرێما کوردستانێ دێ بریارا وان پەسەند کەت یان دێ تانەیێ لێدەت.
ئەڤرۆ 19 چریا دوویێ ل گورەی نوچەیەکێ رۆژنامەیا شەرقولئەوسەت بتنێ دوو جورە رێکەفتن دناڤبەرا ھەرێما کوردستان و عیراقێ ھەنە کو ژ ئاریشەیێن پشتی ریفراندۆمێ بھێنە چارەسەرکرن، و ئێک ژ وان ئەوە پەنایێ بو دادگەھا فیدرالی ببەن کو ئەو ژی دھێتە چاڤەرێکرن سوبەھی داوی بریار لسەر ڤێ یەکێ بەت.
ژێدەرێن رۆژنامەیا ناڤبری ددەتن دیارکرن پشتی بریارا دادگەھێ لسەر ریفراندۆما ھەرێما کوردستانێ و رەزامەندیا حکومەتا ھەرێما کوردستانێ لسەر بریارا دادگەھێ ، دێ قوناغا دوویێ دەست پێ کەت کو ئەو ژی ئەنجامدانا دانوستاندنایە دناڤبەرا ھەولێر و بەغدا ، ئەڤ یەک ژی بو وێ یەکێ یە داکو جارەک دن ھەرێما کوردستانێ ژ روویێ ئەرک و مافان پێگەھێ خوە ل گەل عیراقێ گرێدەتن ڤە و بابەتێن مینا بودجە ژی ل گەل بھێنە گرێدان.
حکومەتا ھەرێما کوردستانێ دناڤبەرا دوو دیتنێن ژێکجودا دمینیت ئەو ژی ریفراندۆم ژلایێ گەلێ کوردستانێ ڤە ھاتیە ئەنجامدان و رەتکرنا وێ دێ یا ب زەحمەت بیت ، ژلایەکێ دنڤە گڤاشتنێن حکومەتا عیراقێ بەر ب زێدەتر ڤە بچن ژ وانان کێمکرنا پشکا بودجا ھەرێمێ و شارستەیێن دارایێن ھەرێمێ ، ھەروەسا ب ھەلوەشاندنا ریفراندۆمێ ب زەحمەت دبیت کو جارەک دن ھەرێما کوردستانێ ریفراندۆمەکا دن بکەت.
ئه‌ڤرۆ نيوز:
نڤيسينگه‌ها سه‌رۆك وه‌زيرێن عيراقێ راگه‌هاند كو حوكمه‌تا عيراقێ دێ گوهۆڕينێ د پشكا هه‌رێما كوردستانێ دا ژ بوودجێ گشتى يێ سالا 2018ێ دا ل سه‌ر بنه‌مايێ ژمارا روونشتڤانان و ب ده‌ستڤه‌ئينانا دادپه‌روه‌ريێ كه‌ت.
سه‌عد حه‌ديسى، ئاخفتنكه‌رێ ب ناڤێ نڤيسينگه‌ها رۆژنامه‌ڤانى يا حه‌يده‌ر عه‌بادى سه‌رۆك وه‌زيرێن عيراقێ راگه‌هاند: “دووماهى پێداچوون دێ د بوودجێ سالا 2018ێ هێته كرن و پشتى ب دووماهى هاتنا دانوستاندنان ل جڤاتا وه‌زيران ده‌رباره‌ى پرۆژێ قانوونا بوودجێ، ل رۆژێن بهێت دێ ره‌وانه‌ى جڤاتا وه‌زيران هێته كرن”.
سه‌عد حه‌ديسى د داخۆيانيه‌كا رۆژنامه‌ڤانى دا گۆت: “بۆ ب جهئينانا دادپه‌روه‌ريێ، پشكا هه‌رێما كوردستانێ دێ ل سه‌ر بنه‌مايێ ژمارا روونشتڤانان، ب هه‌ڤبه‌ركى ل گه‌ل ژمارا روونشتڤانێن عيراقێ هێته گوهۆڕين”.
هه‌تا نوكه پشكا هه‌رێما كوردستانێ د پرۆژێ قانوونا بوودجێ سالا 2018ێ دا ب 12.67% هاتبوو دياركرن د ده‌مه‌كى دا د سالێن بۆرى دا 17% بوو، سه‌ره‌رايى وێ چه‌ندێ كو حوكمه‌تا هه‌رێمێ راگه‌هاندبوو كو چو سالان 17% نه‌گه‌هشتيه هه‌رێما كوردستانێ، به‌لێ حوكمه‌تا هه‌رێما كوردستانێ داخوازا زێده‌كرنا پشكا هه‌رێما كوردستانێ ژ بوودجێ فيدرال كربوو.
ئەڤرۆ نیۆز،سەباح زۆهێر:
ئه‌ندامه‌كا په‌رله‌مانێ هه‌رێما كوردستانێ ل دوور دروستبوونا حوکمه‌ته‌كا رزگاریا نیشمانى دڤى ده‌مى دده‌ته دیاركرن كو دروستبوونا حكومه‌ته‌كێ دڤى ده‌مى دا كاره‌كێ ئاسان نینه و هه‌روه‌سا ده‌م و بارودوخێ ئابورى نه‌یێ گونجایه كو حكومه‌ته‌ك سه‌ر ژنوى بهێته پێك ئینان و ئه‌ڤ حكومه‌ته دڤى ده‌مێ كورتدا نه‌شێت چ گوهرینا بكه‌ت ئه‌ڤه نه‌چاره‌یه بۆ قه‌یرانا دارایی.
ئامینا زكرى جێگرا فراكسیۆنا پارتى ل په‌رله‌مانێ كوردستانێ بۆ ئه‌ڤرۆ نیۆز گۆت، كو بۆ دروستكرنا حوکمه‌ته‌كا دى ده‌م یێ گونجاى نینه،چونكى مه تنێ هه‌شت هه‌یڤێن هه‌ین كو ڤى ده‌میدا دڤێت حوکمه‌ت پلان و به‌رنامێ خوه هه‌بیت و بكه‌ڤیته كارى،حوکمه‌ته‌كا نوى یان یا حوکمه‌ته‌كا ده‌مكى هه‌تا دهێته‌سه‌ر سیسته‌مێ رێڤه‌برنێ دێ ده‌مه‌كێ زور چیت.
هێشتا گۆت كو ژئالیێ ئابووری ڤه هه‌رێم یا گه‌هشتى یه كوپیتكێ ئه‌گه‌ر سه‌رڤێ چه‌ندێ حكومه‌ته‌كێ پێك بینین ئه‌ڤه دێ گڤاشتنه‌كا دیا ئابورى دروست كه‌ت،ئه‌ڤ حكومه‌تا نوكه ژى هه‌ى هه‌ریا ده‌مكى یه بۆ ماوه‌كێ ده‌ست نیشانكرى دێ كارێ خوه كه‌تن،له‌وما حكومه‌تا رزگاریا نیشتیمانى پێك ئینانا وێ ل گور بارودوخ و ده‌مى دمینیت،چونكى پێك ئینانا وێ یا جیاوازه واته پێك ئینانا وێ یا گونجاى نینه بۆ هه‌رێمێ،و هه‌مى ئالیێن سیاسى نوكه به‌شدارن ژ ڤێ حكومه‌تێ،له‌وما دێ هه‌مان شێوه بیت چو گورانكارى نابن دڤێ حكومه‌تێ دا،لێ مومكینه گوهرین دهنده‌ك وه‌زاره‌تاندا بهێته‌كرن و پلانه‌كا باشتر ل دیڤ بارودوخى بهێته‌دانان،ئه‌ڤه دێ یا ب ساناهى بیت،ژبه‌ر هندێ دروست بوونا حكومه‌تا رزگاریا نیشتیمانى چاره‌سه‌رى نینه بۆ ڤى ده‌مى.
ئه‌ڤ په‌رله‌مانتاره خویادكه‌ت ژى كو خۆ ئه‌گه‌ر حكومه‌ته‌كا نیشتیمانى ژى پێك بهێت نه‌شێن بارودوخێ ئه‌ڤرویێ هه‌رێما كوردستانێ بگوهرن،چونكى ئه‌ڤرۆ قه‌وارێ سیاسیێ هه‌رێمێ یێ دمه‌ترسیێ دا دڤێت ئه‌م قه‌وارێ خوه و مافێن خوه یێن ده‌ستورى بپارێزین و هه‌رێمێ به‌ره‌ف قوناغه‌كا باشتر ببیه‌ن ل چارچوڤێ دیالوگێ دا.
زێده‌تر ژى دبێژیت كو ئه‌ڤه ب تنێ پرۆژێ گورانێ یه،ئه‌ڤه ژى تنێ ده‌م بوراندن و ده‌ربازبوونا ڤێ قوناغێ یه و خوه ڤه‌دزینه دڤى كاودانێ نوکە دهه‌رێمێ دا هه‌ى،كو تنێ موزایدەكا سیاسى یه و نابیت چو لایه‌نێن سیاسى خوه ژ ڤێ حوکمه‌تێ ڤه‌ده‌رببینن،چونكى هه‌مى لایه‌ن پشكدارن دڤێ حوکمه‌تێ دا،ئایا ما لایه‌نه‌ك هه‌یه كو پشكدار نه‌بیت د ڤێ حوکمه‌تێ دا هه‌تا پێدڤى حكومه‌ته‌كا نوو بین.
ئه‌ڤرۆ نيوز:
بەرپرسەکێ ئێکەتیا مامۆستایێن کوردستانێ ئاشکرا کر کو ل گوەری بڕیارا سەرۆکاتیا جڤاتا وەزیران ھێشتا دەرمالێن دو ھەیڤان یێن مامۆستایان ل دەف حوکمەتێ ماینە و گۆت: “ئەم یێ بزاڤان دکەین ئەو دەرمالە ل سەر مامۆستایان بھێنە بەلاڤکرن”.
عەبدولواحد محەمەد، جێگرێ سەرۆکێ ئێکەتیا مامۆستایێن کوردستانێ بۆ رۆژناما ئەڤرۆ دیار کر کو ل سالا بۆری سەرۆکاتیا جڤاتا وەزیرێن ھەرێما کوردستانێ بڕیارا مەزاختنا دەرمالێن ھاندانێ بۆ مامۆستایان دەرکربوو، ل گورەی بڕیارێ ژی دەرمالە دێ بۆ شەش ھەیڤان ھێنە بەلاڤکرن ئانکو ژ ھەیڤا دوازدە بۆ ھەیڤا شەش کو وەرزێ خواندنێ یە و گۆت: “ئەڤ دەرمالێ 150 ھزاری بۆ مامۆستایان دێ ھێتە مەزاختن، بەلێ مخابن ژ بەر کاودانێن ئابووری یێن ھەرێما کوردستانێ تێدا دەربازدبیت ب تنێ دەرمالێ چار ھەیڤان ھاتیە بەلاڤکرن و ھێشتا دەرمالێ دو ھەیڤان مایە ل دەف حوکمەتێ و نەھاتیە بەلاڤکرن”.
ناڤھاتی ئاماژە دا وێ چەندێ کو نوکە ئەو وەکو ئێکەتیا مامۆستایێن کوردستانێ یێن بزاڤا دکەن ئەو دو دەرمالێن ماین ل سەر مامۆستایان بھێنە بەلاڤکرن و بۆ ڤێ مەرەمێ ئەو یێن دگەل وەزارەتا پەروەردێ و دارایی و ئابووری کار دکەن بۆ بجھئینانا فەرمانا سەرۆکاتیا جڤاتا وەزیران و گۆت: “راستە ھێشتا چو سۆز بمە نەھاتینە دان و ھەتا نوکە دەمێ دەمێ بەلاڤکرنا وان ھەر دو دەرمالان ھاتیژی نەھاتیە دەستنیشانکرن، بەلێ ئەڤە بڕیارە و دڤێت بھێتە بجھئینان”.
ئه‌ڤرۆنيۆز:
نڤيسينگه‌ها سه‌رۆك كومارا عيراقێ به‌رسڤا شوان دادوودى په‌رله‌مانتارێ ئێكه‌تيێ ل جڤاتا نوونه‌رێن عيراقێ دا كو راگه‌هاند بوو، سه‌رۆك كومار رێگره ل هنارتنا دو فه‌وجێن سه‌رۆكاتيا كومارێ بۆ كه‌ركووكێ وخورماتوو.
نڤيسينگه‌ها سه‌رۆك كومارا عيراقێ درۆهنكرنه‌كێ دا دبێژيت( ژێده‌ره‌ك ژ سه‌رۆكاتيا كومارێ هه‌موو وان ئاخاڤتن و بۆختانێن په‌رله‌امانتار شوان داوودى ره‌تدكه‌ت كو به‌حس ل وێ دكه‌ت سه‌رۆك كومار ره‌تكريه دو فه‌وجێن لێوايێن سه‌رۆكاتيا كومارێ بهێنه هنارتن بۆ كه‌ركووكێ وخورماتوو).
د وێ رۆهنكرنێ دا ئه‌وا باسنيۆز به‌لاڤكرى، هاتيه( ره‌تكرنا هنارتنا وان هێزان ژلايێ حه‌يده‌ر عه‌بادى سه‌رۆك وه‌يزرێن عيراقێ بوو، ئه‌وژى ژبه‌ر رازينه‌بوونا پێكهاتێ توركمانى).
ژێده‌رێ سه‌رۆكاتيا كومارێ دووپاتى ل سه‌ر وێ چه‌ندێ كريه كو سه‌رۆكاتيا كومارێ ل به‌رامبه‌ر وان چاواشه‌كاريان دێ سكالايه‌كا قانوونى ل سه‌ر وان كه‌سان تۆماركه‌ت كو ب مه‌ره‌م وان پرۆپاگنداه و ئاخڤتنان دروست دكه‌ن.
ئه‌ڤرۆنيۆز:
دوهى شه‌مبيێ په‌رله‌مانێ عيراقێ ب نڤيساره‌كێ پرۆژه قانوونا بودجا گشتى يا عيراقێ بۆ سالا 2018 زڤراند.
دوێ نڤيسارێ دا ئاماژه هاتيه دان كو ل دووڤ په‌يوه‌نديه‌كا ته‌له‌فۆنى، پرۆژه قانوونا ناڤبرى دێ هيته زڤراندن.
ب گۆره‌ى ره‌شنڤيسا پرۆژه قانوونا بودجێ، پشكا هه‌رێما كوردستانێ ژ 17% بۆ 12،67% هاتبوو كێمكرن، ژبه‌ر وى ئه‌گه‌رى لايه‌نێن سياسى يێن كوردستانى گه‌فا خوه‌ڤه‌كێشانێ ژ پرۆسا سياسى ل عيراقێ كربوو.
ئه‌ڤرۆنيۆز:
جێگرێ به‌رێ يێ سه‌رۆك وه‌زيرێن توركيا راگه‌هاند، هه‌لويستێ ئه‌نقه‌ره يێ هاتيه گوهۆرين ودێ په‌يوه‌نديێن خوه ل گه‌ل هه‌ولێرێ ئاسايى كه‌ت.
عه‌بدولله‌تيف شه‌نه‌ر جێگرێ به‌رێ يێ سه‌رۆك وه‌زيرێن توركيا بۆ رووداو گۆت، سه‌ره‌راى نێگه‌رانيێن توركيا به‌رامبه‌ر ريفراندۆما هه‌رێما كوردستانێ، حوكمه‌تا توركيا دێ په‌يوه‌نديێن خوه ل گه‌ل هه‌رێما كوردستانێ ژبه‌رێ باشتر لێكه‌ت.
نيشاندان