ئه‌ڤرۆنيۆز ، نه‌وزاد هلۆرى:
وه‌لاتیه‌كێ سنوورێ ناحیا دینارته یا سه‌ر ب قه‌زا ئاكرێ ڤه ده‌ستێ خوه دانايه سه‌ر پتريا دارێن كه‌زانان ل چیایێ پیرس ووه‌كو كه‌زاخه دبریت و ل به‌ره بكه‌ت فسته‌ق و ب مولكێ خوه دبینیت ، دارستان و پاوانا ئاكرێ ژى دیاركر كو ب چو شێوه‌یان رێ ب كه‌سێ ناهێته‌دان بێى موله‌ت كه‌زانان بكه‌ت فسته‌ق.
وه‌لاتيه‌كێ ناحیا دینارته یا سه‌ر ب قه‌زا ئاكرێ كو نه‌ڤیا ناڤێ خوه بێژیت دیاركر كو هنده‌ك كه‌سان ل سنررێ ناحیا دینارته ل به‌ره دارێن كه‌زانان ل چیایێ پیرس بكه‌ن فسته‌ق و بۆ ئه‌ڤرۆ نیوز گۆت” برینا داران ل چیایێ پیرس و هه‌موو ده‌ڤه‌ران قه‌ده‌غه‌یه، به‌لێ وه‌لاتیه‌ك دارێن كه‌زانان وه‌كو كه‌زاخه دبریت و دكه‌ت فسته‌ق كو ئه‌ڤه ژى بوویه جهێ دلگرانیا خه‌لكى”.
زێده‌تر گۆت” نێزیكێ هزار دارێن كه‌زانان هه‌نه، ئه‌و كه‌س ب مولكێ خوه دبینیت و نوكه پتريا وان دكه‌زاخه كرینه و دخوازیت بكه‌ت فسته‌ق، هه‌كه رێگرى لێ نه‌هێته‌كرن، ئێدى به‌رهه‌مێ كه‌زانێ ل چیایێ پیرس نامینیت و وه‌لاتى نكارن ئێدى بچنه كه‌زانان “.
ژێده‌ره‌كێ ژ فه‌رمانگه‌ها دارستان و پاوانا ئاكرێ كو ناڤێ وى ل ده‌ف ئه‌ڤرۆ نیوز يێ پاراستیه ، د داخۆيانيه‌كێ دا بۆ ئه‌ڤرۆ نیوز گۆت” راسته وه‌لاتیه‌كى بزاڤكرن كو دارێن كه‌زانان ل چیایێ پیرس وه‌كو كه‌زاخه ببریت و ل شوونا وان بكه‌ت دارا فسته‌قێ ئه‌و ژى ب رێیا كریارا به‌درمه ، به‌لێ پۆلیسێن دارستانێ پێحه‌سیان و ب زووترین ده‌م گه‌هشتنه چیایێ پیرس و رێگرى ل كارێ وان كر و راوه‌ستاندن”.
زێده‌تر گۆت” هه‌تاكو مۆله‌ت ژ رێڤه‌به‌ریا دارستان و پاوانان ل دهۆكێ نه‌هێته وه‌رگرتن، ب چو شێوه‌یان ناهێلین كو ئه‌و وه‌لاتى و چو وه‌لاتیێن دى دارێن كه‌زانان و دارێن دن ژى ببرن و بكه‌ن فسته‌ق”.
ل دۆر وێ چه‌ندێ بوچى بتنێ دارێن كه‌زانان دهێنه كه‌زاختن وبكارئینان وه‌كو دارا فسته‌قێ ، گۆت” دارا كه‌زانێ و دارا فسته‌قێ ژ ئێك توخمن و چیایێ پیرس ژى گه‌له‌ك دارێن كه‌زانان هه‌نه ، ئه‌ڤ چه‌نده ژى بووویه ئه‌گه‌ر كو ئه‌و كه‌س په‌نایێ بۆ دارێن كه‌زانان ببه‌ت و وه‌كو دارا فسته‌قێ بكاربینیت”.
ئه‌ڤرۆنيۆز:
سه‌رۆكێ لژنا وزێ وسامانێن سروشتى ل جڤاتا پارێزگه‌ها سلێمانيێ راگه‌هاند، ل هه‌فتيا بهێت ده‌ست ب به‌لاڤكرنا گازا سپى ل سه‌نته‌رێ باژێرێ سلێمانيێ دێ هێته كرن.
د. غالب محه‌مه‌د سه‌رۆكێ لژنا وزێ وسامانێن سروشتى ل جڤاتا پارێزگه‌ها سليمانيێ، گۆت، نوكه گازا سپى ل قه‌زا وناحيێن ده‌وروبه‌رى باژێرێ سلێمانيێ يا دهێته به‌لاڤكرن وتنێ مه ئێك مليۆن لتر يێن ماين كو ل وان ده‌ڤه‌ران به‌لاڤ بكه‌ين ول ده‌مێ هه‌فتيه‌كێ به‌لاڤكرن دێ ب دووماهى هێت.
غالبى زيده‌تر بۆ دوارۆژ گۆت، نوكه رۆژانه 3 هه‌تا 5 تانكه‌رێن گازا سپى بۆمه ژ عيراقێ دهێنه سلێمانيێ ورۆژانه كۆم دكه‌ين ودێ ل هه‌فتيا بهێت دناڤ سه‌نته‌رێ باژێرێ سلێمانيێ دا به‌لاڤكه‌ين .
ئەڤرۆ نیۆز،زنار تۆڤى:
رێڤه‌به‌رێ ناحیا كانى ماسێ سه‌ربه‌ست سه‌برى ئاكره‌یى بۆ ئه‌ڤرۆ نیۆز دیاركر:كانى ماسێ ل سالا 1928 بوویه ناحیه و سه‌ر ب قه‌زا ئامێدیێ ڤه‌یه،ئه‌ڤ ده‌ڤه‌ره ب چاندنێ و ب تایبه‌تى ب سێڤان یا بناڤوده‌نگه،هه‌روه‌سا ژبه‌ر هه‌بوونا كانى و ژێده‌رێن ئاڤێ كانى ماسێ جهه‌كێ گه‌له‌كێ خۆشه بۆ گه‌شتوگوزارێ ب تایبه‌تى ل وه‌رزێ هاڤینێ، هه‌وره‌سا ئاڤه‌كا ساخله‌م و ژینگه‌هه‌كا خۆش لێ هه‌یه،له‌ورا گه‌له‌ك ژ خه‌لكێ دهۆكێ و یێن ده‌ڤه‌رێن دیتر ژى ب مه‌ره‌ما گه‌شتكرنێ دهێنه ڤێ ده‌ڤه‌رێ،دیسا مه ب فه‌ر زانیه كو ئه‌م پیته‌ى و گرنگیێ ب لایه‌نێ گه‌شتوگوزاریا زڤستانى ژى بده‌ین.
ناڤهاتى گوت ژى:د به‌رنامێ مه دایه كو ئه‌ڤ ساله ب هه‌ڤكاریا كه‌رتێ تایبه‌ت گه‌شتوگه‌زاریا زڤستانى بۆ ڤێ ده‌ڤه‌رێ دابین بكه‌ین،ژبه‌ركو ل وه‌رزێ زڤستانێ به‌فره‌كا باش ل ڤێ ده‌ڤه‌رێ دباریت و ئه‌ڤ چه‌نده دبیته هاریكار بۆ هه‌بوونا گه‌ستوگوزاریا زڤستانى،هه‌وره‌سا هنده‌ك به‌لێنده‌ران به‌رهه‌ڤیا خوه دیاركریه كو ماتۆرێن ل سه‌ر به‌فرێ و پێدڤیێن دیتر یێن گه‌شتوگوزاریا زڤستانى ل ڤێ ده‌ڤه‌رێ دابین بكه‌ن و بتنێ ماسته‌ر پلان مایه و ل نێزیك ئه‌ڤ چه‌نده دێ كه‌فته د وارێ بجهئینانێ دا،دیسا خه‌لكێ مه ژى دێ مفاى ژڤێ چه‌ندێ بینیت،هه‌روه‌سا ده‌رگه‌هێ گۆمركا سه‌رزێرى ژى بوویه خاله‌كا بهێز بۆ هه‌بوونا گه‌شتوگوزاریا زڤستانى و رۆژانه گه‌له‌ك خه‌لك ژ باكۆر ژى سه‌ره‌دانا ڤێ ده‌ڤه‌رێ دكه‌ن و ئه‌ڤه‌ژى بوویه خاله‌كا دیتر بۆ ڤه‌ژاندنا كه‌رتێ ئابوورى و گه‌شتیارى و بازرگانى ل ڤێ ده‌ڤه‌رێ و بۆ سالێن بهێن ژى دێ ئه‌ڤ پرۆژه به‌رفره‌هتر لێ هێن.
ئه‌ڤرۆ نیۆز، نه‌وزاد هلۆرى:
ڤه‌گۆهاستنا باليۆزخانا ا ئه‌مریكا ل تئه‌لئه‌بیبێ بۆ قودسێ ، زورترین ئاخفتن و كارڤه‌دان ل په‌ى خوه هێلان ل جیهانێ ، و ره‌نگه ببیته سه‌ده‌ما درۆستبوونا شه‌ره‌كێ نوو ل ده‌ڤه‌رێ ، به‌رپرسێن ئه‌وروپا و عه‌ره‌ب هوشداریێن توند ل بارا ڤێ یه‌كێ دده‌ن ، و هه‌تا هنده‌ك ژ به‌رپرسێن ئه‌مریكا ژى ل وێ باوه‌ریێ نه كو ئه‌ڤ یه‌ك یاریكرنه ب ئاگرى.
ڤه‌گۆهاستنا باليۆزخانا ئه‌مریكا بۆ قودسێ وه‌سا دهێته هژمارتن كو دێ قودس بیته پایته‌ختێ ئیسرائیلێ و ئه‌ڤ یه‌ك ژى بوویه جهێ دلگرانیا فه‌له‌ستینیان و هوشداریێن درۆستبوونا شه‌ره‌كێ نوو دهێته‌كرن ل ده‌ڤه‌رێ ، به‌رپرسێن ئه‌ورۆپا و عه‌ره‌بى ژى دخوازن كو ئه‌ڤ یه‌ك نه‌هێته قه‌بوولكرن و داخوازێ ژ ئه‌مریكا دكه‌ن كو نه‌بیته ئه‌گه‌را درۆستبوونا چو شه‌ران ل ده‌ڤه‌رێ ، سه‌ره‌راى كو ئه‌ڤ یه‌ك بوویه جهێ دلگرانیا پشكه‌ك ژ به‌رپرسێن ئه‌مریكا ژى، به‌لێ ترامپ وه‌سا دده‌ت دیاركرن كو ئه‌وى د پرۆپاگندێن هه‌لبژاردنان دا سۆزا ڤێ یه‌كێ دابوویه و دێ هه‌ر بجهئينيت.
به‌رپرسێن ئه‌مریكا دده‌ن دیاركرن كو هه‌تا نها بریارا دووماهیێ بۆ ڤه‌گۆهاستنا باليۆزخانا ئه‌مریكا نه‌هاتیه دان و چاره‌نڤیسێ قودسێ ئێكه ژ بریارێن سیاسی يێن ئه‌مریكا كو ببیته سه‌ده‌ما چاره‌سه‌ركرنا ئاریشا سیاسی دناڤبه‌را ئیسرائیل و فه‌له‌ستینێ ، ژبه‌ركو ده‌ركرنا بریاره‌كا ب ڤى ره‌نگى دبيت ببیته سه‌ده‌ما درۆستبوونا شه‌ر و ئالوزیێن نوو نه‌ك تنێ ل فه‌له‌ستینێ، به‌لكو ل پرانیا وه‌لاتێن موسلمانان ل جیهانێ و دێ خوپێشاندان دژى ڤێ یه‌كێ هێنه‌كرن.
به‌رپرسه‌كێ بلند یێ ئه‌مریكا كو نه‌ڤیا ناڤێ وى بهێته به‌لاڤكرن بۆ ئاژانسا رویته‌رز دیاركر كو دبیت ئه‌ڤرۆ رۆژا چوارشه‌مبى دونالد ترامپ بریارا ڤه‌گۆهاستنا بالیوزخانا ئه‌مریكا ژ ته‌لئه‌بیب بۆ قودسێ بده‌ت ، ئه‌ڤه سه‌ره‌راى كو گارید كوشنه‌ر راوێژكارێ سه‌رۆكێ ئه‌مریكا رۆژا ئێكه‌شه‌مبیا بۆرى دیاركربوو كو هێشتا سه‌رۆكێ ئه‌مریكا بریارا دووماهيێ نه‌دایه.
پێشتر كوچكا سپى یا ئه‌مریكا دیاركربوو كو پرسا ڤه‌گۆهاستنا باليۆزخانا ئه‌مریكا ل ته‌لئه‌بیب بۆ قودسێ ، پرسه‌كه به‌رى نها ترامپ ب تایبه‌تى د ده‌ما هه‌لبژاردنان دا سۆزدابوو كو ئێكلا بكه‌ت ، به‌لێ به‌رپرسێن پله بلندێن ئه‌مریكا ل وێ باوه‌ریێ نه كو ره‌نگه ترامپ بریارا ڤه‌گۆهاستنێ پاش بێخیت ، به‌لێ رژده ژى كو هه‌ر ڤه‌گۆهێزیته قودسێ و بۆ ڤێ یه‌كێ ژى پلانه‌كا ب هێز دانایه.
هنده‌ك ژ به‌رپرسێن ئه‌مریكا ل وێ باوه‌ریێ نه كو ئه‌ڤ بریارا ئه‌مریكا دێ بیته سه‌ده‌م كو به‌رژه‌وه‌ندێن ئه‌مریكا ل رۆژهه‌لاتا ناڤه‌راست بێخیته ژێر مه‌ترسیێ ، هه‌موو دۆست و هه‌ڤپه‌یمانێن ئه‌مریكا ل ده‌ڤه‌رێ دلگران كرینه.
خالید كورێ سه‌لمانى كونسولێ سعودیێ ل ئه‌مریكا دده‌تن دیاركر كو هه‌ر راگه‌هاندنه‌كا ژلایێ ئه‌مریكا ل بارا چاره‌نڤیسێ قودسێ به‌رى چاره‌سه‌ربوونا ئاریشا دناڤبه‌را ئیسرائیل و فه‌له‌ستینێ بهێته هاڤێتن، دێ بیته سه‌ده‌ما درۆستبوونا ئالوزیان.
د هه‌مان ده‌م دا ئه‌یمه‌ن سه‌فدى وه‌زیرێ ده‌رڤه‌یێ ئوردن د په‌یوه‌ندیه‌كا تێله‌فونى دا ل گه‌ل ریكس تێره‌لسون وه‌زیرێ ده‌رڤه‌یێ ئه‌مریكا هوشداریێن توند دانه ئه‌مریكا ل بارا هاڤێتنا هه‌ر پێنگاڤه‌كا تاكلایه‌نانه ژلایێ ئه‌مریكا بۆ ڤه‌گۆهاستنا باليۆزخانا ئه‌مریكا ژ ته‌لئه‌بیب بۆ قودسێ ، و ئه‌ڤ یه‌ك ژى زڤراند بۆ هه‌بوونا ئه‌وى پێگه‌هێ مێژوويى و ئاینیێ دناڤبه‌را موسلمان و قودسێ هه‌یى ب گشتى و ئوردن و فه‌له‌ستینێ ب تایبه‌تى.
مه‌حمود عه‌باس كو ئێكه ژ مه‌زنه نوونه‌رێن رێكخراوا رزگاركرنا فه‌له‌ستنێ و سه‌رۆكێ فه‌له‌ستینێ دیاركر كو ڤه‌گۆهاستنا باليۆزخانا ئه‌مریكا بۆ قودسێ وه‌كو ماچا مرنێ یه و دێ بیته سه‌ده‌ما درۆستبوونا شه‌ر و ئالوزیێن نوو دناڤبه‌را هه‌ردو ده‌وله‌تان دا و بۆ هه‌موو جیهانا ئیسلامى ڤه‌گوهێزیت و هه‌بوونا هه‌ر بریاره‌كا ب ڤى ره‌نگى ره‌ت دكه‌ین، هه‌ڤده‌م حوسام زملت كو ئه‌و ژى ئێكه ژ نوونه‌رێن رزگاریخوازیا واشنتونێ دیاركر ئه‌گه‌ر ئه‌مریكا ب ڤى ره‌نگێ ره‌فتارێ بكه‌ت دێ ل دووماهیێ ده‌رئه‌نجامێن كاره‌ساتبار ژى هێنه چاڤه‌رێكرن.
دانێل بنجامین به‌رپرسێ به‌رێ يێ ده‌زگه‌هێ به‌رهنگاربوونا تیرۆرێ ل ئه‌مریكا كو نها مامۆستایه ل زانكویا دارتموس دیاركر كو ئه‌وا كو دهێته روودان یاریكرنه ب ئاگرى ژلایێ دونالد ترامپى ڤه.
ژلایه‌كێ دى ڤه ئیمانوێل ماكرۆن سه‌رۆكێ فه‌ره‌‌نسا د په‌یوه‌ندیه‌كا تێله‌فونى دا ل گه‌ل سه‌رۆكێ ئه‌مریكا ، دلگرانیا خوه دیاركر و دوپات ل وێ یه‌كێ هاته‌كرن كو پێدڤیه چاره‌نڤیسێ قودسێ ب رێككه‌فتنا ئاشتیانه دناڤبه‌را ئیسرائیل و فه‌له‌ستینێ و دامه‌زراندنا دو ده‌وله‌تان ل ده‌ڤه‌رێ بهێته چاره‌سه‌ركرن.
ئەڤرۆ نیۆز،زنار تۆڤی:
بریارده‌رێ لیژنا دارایی ل په‌رله‌مانێ عێراقێ، ئاشكرا كریه،کو سندوقا دراڤێ نێڤده‌وله‌تى، فشار ئێخستیە سه‌ر عه‌بادى، بۆ هندێ کو پشكا هه‌رێما كوردستانێ د بودجێ گشتی یێ عێراقێ بۆ سالا 2018 زێدە بكەت.
ئه‌حمه‌د حاجى ڕه‌شید، بریارده‌رێ لیژنا دارایی ل په‌رله‌مانێ عێراقێ راگه‌هاند:سندوقا دراڤێ نێڤده‌وله‌تى، فشار ئێخستیە سه‌ر حوکمه‌تا فیدرالی بۆ هندێ د یاسایا بودجێ گشتی یێ سالا 2018، پشكا هه‌رێما كوردستانێ زێدە بكەت،هەروەسا هەکە فشارێن نێڤده‌ولە‌تی بۆ سه‌ر حه‌یده‌ر عه‌بادى، سه‌رۆك وه‌زیرێن عێراقێ د به‌رده‌وام بن،ب دلنیایی دێ پشكا هه‌رێما كوردستانێ د بودجه‌ی دا زێدە کەت.
ئه‌حمه‌د حاجى رە‌شید، گوت ژی:لیژنا دارایی ل په‌رله‌مانی تا نوکە كۆمبوونێن خۆ دەرباره‌ى پرۆژه یاسایێ بودجه‌ی ده‌ست پێنه‌كرینه، به‌لێ ره‌نگه ل ڤان نێزیکان كۆمبوون بهێتە کرن.
ئاشكرا كر ژی،ئەو لیژنه ب مه‌به‌ستا گوهۆرینان و هه‌مواركرنا وی پرۆژه یاسای،دێ بودجەی بۆ جڤاتا وه‌زیران ڤەگەرینیت.
د پرۆژه یاسایێ بودجا گشتی یێ عێراقێ دا بۆ سالا 2018، پشكا هه‌رێما كوردستانێ ژ 17% بۆ 12.67% هاتیە کێمکرن، دڤی واری دا هه‌ر پێنج فراكسیۆنێن كوردستانی ل سه‌ر هندێ رێككه‌فتینە،هەکە پشكا هه‌رێما نە بیته 17% ،دێ بایكۆتا روونشتنێن په‌رله‌مان كه‌ن.
ئه‌ڤرۆ نيۆز:
شڤێدى هه‌شت ياريێن گه‌را شه‌شێ ودووماهيێ يێن 4 كۆمان هاتنه ئه‌نجامدان كو دگرنگترين وان يارياندا بايرن ميونخ يا ئه‌لمانى ب سه‌ركه‌فت ل سه‌ر پاريس سان جيرمان يا فره‌نسى ب ئه‌نجامێ 3-1 وشيلسى يا ئينگليزى وه‌كهه‌ڤ بوو ل گه‌ل ئه‌تله‌تيكۆ مه‌دريد 1-1 وئه‌تله‌تيكۆ ژ قاره‌مانيێ ده‌ركه‌فت. ئه‌نجامێن دى ب ڤى شێوه‌ى بوون:
بنفيكا يا پورتۆگالى – بازل يا سويسرى 0-1
مانشسته‌ر يونايتد يا ئينگليزى- سيسكا موسكۆ يا رۆسى 2-1
به‌رشه‌لونا يا ئيسپانى – سقۆرتينگ له‌شبونا يا پورتۆگالى 2-0
رۆما يا ئيتالى- كارياكا ئه‌غدام يا ئه‌زره‌بايجانى 1-0
سيلتك يا سكوتله‌ندى- ئه‌نده‌رله‌خت يا به‌لجيكى 0-1
ئولومپياكۆس يا يۆنانى – يوڤه‌نتۆس يا ئيتالى 0-2
هه‌ر ئێك ژ يانين مانشسته‌ر يونايتد يا ئينگليزى وبازل يا سويسرى ژ كۆما ئێكێ وپاريس سان جيرمان يا فره‌نسى وبايرن ميونخ يا ئه‌لمانى ژ كۆما دويێ ورۆما يا ئيتالى وشيلسى يائينگليزى ژ كۆما سيێ وبه‌رشه‌لونا ويوڤه‌نتۆس ژ كۆما چارێ ده‌ربازبوون قۆناغوا 16، ريال مه‌دريد يا ئيسپانى وتوتنهام هوتسبێر يا ئينگليزى ژ كۆما هه‌شتێ پشكتاش يا توركى ژ كۆما حه‌فتێ ومانشسته‌ر سيتى ژ كۆما شه‌شێ ده‌ربازبوونا خوه يا مسوگه‌ر كرى به‌رى ئه‌نجامدانا ياريێن خوه ژگه‌را شه‌شێ ودووماهيێ ژ كۆمێن خوه كو دێ ئه‌ڤ شه‌ڤه هێنه ئه‌نجامدان.
ئه‌ڤرۆنيۆز:
بريارده‌ێ لژنا دارايى ل جڤاتا نوونه‌رين عيراقێ، ئه‌ڤرۆ سێشه‌مبى ئاشكراكر، سندۆقا دراڤى يا نێڤده‌وله‌تى فشارێ ل حوكمه‌تا عيراقێ دكه‌ت ژبۆ زێده‌كرنا پشكا هه‌ريما كوردستانێ دبودجا 2018 دا.
ئه‌حمه‌د حاجى ره‌شيد بريارده‌رێ لژنا دارايى ل جڤاتا نوونه‌رين عيراقێ دداخۆيانيه‌كا رۆژنامه‌ڤانى دا راگه‌هاند، پشكا هه‌رێمێ ژبودجه‌ى دێ زێده‌بيت هه‌كه فشارێن نێڤده‌وله‌تى ل سه‌ر حوكمه‌تا عه‌بادى به‌رده‌وام بوون وهه‌كه وان بزاڤان سه‌رنه‌گرت، ئانكو پشكا هه‌رێمێ دێ وه‌كو خوه مينيت.
دياركر ژى، لژنا دارايى دێ پرۆژێ قانوونا بودجا عيراقێ بۆ جڤاتا وه‌زيرێن عيراقى ڤه‌گه‌رينيت ژبۆ ئه‌نجامدانا راستڤه‌كرنان د وى پرۆژه‌ى دا.
حوكمه‌تا عيراقێ 12.67% وه‌كو پشكا هه‌رێما كوردستانێ ژبودجا گشتى يا عيراقێ دياركريه وهه‌رێمێ ژى نه‌رازيبوونا خوه دياركريه وداخواز دكه‌ت وه‌كو به‌رى ئه‌وژى 17% بودجا كوردستانێ بهێته دياركرن.
ئه‌شواق جاف ئهنداما جڤاتا نوونه‌رين عيراقێ به‌رى نوكه بۆ ئه‌ڤرۆنيۆز راگه‌هاندبوو، هه‌موو فراكسيۆنێن كوردستانى دجڤاتا نوونه‌ران دا ئێك هه‌لويست يێ هه‌ى ل دۆر بودجا كوردستانێ ودخوازن بهێته زێده‌كرن.
ئەڤرۆ نیۆز،زنار تۆڤی:
هەڤپەیمانێن نێڤدەولەتی ب سەرۆکاتیا ئەمریکا راگەهاند،کو هژمارا چەکدارێن داعش یێن کو تا نوکە ماینە ل سووریا و عێراقێ ،کێمترن ژ سێ هزار چەکداران.
رایان دیلن،ئاخفتنکەرێ هەڤپەیمانێن نێڤەولەتی ل دژی داعشێ راگەهاند،کو ل دووڤ خەملاندنا وان تا نوکە کێمتر ژ سێ هزار چەکدارێن داعش ل سووریا و عێراقێدا ماینە.
دیلن گوت ژی، ئەو چەکدارێن داعش هێشتا هێرشن بۆ سەر ئاسایشا ڤێ دەڤەرێ،لەورا هەڤپەیمانیا نێڤدەولەتی دێ یا بەردەوام بیت بۆ پشتەڤانیکرنا هەڤپەیمانێن خۆ ل دەڤەرێ بۆ تێکشکاندنا داعشێ ب ئێکجاری.
ل رۆژا دوشەمبی 4-12-2017 جەیمس ماتیس، وەزیرێ بەرەڤانیا ئەمریکا گوت، داعش ل عێراق و سووریێ،تۆشی شکەستنێ بوویە و نوکە هەول ددەت بچیته لیبیا، بەلێ ئەم رێکێ پێنادەین و مە ل گەل لیبیایێ ل سەر ڤێ پرسێ ئاخفتن کریە.
نيشاندان