ئەڤرۆ نیۆز،زنار تۆڤی:
نێچیرڤان بارزانی سەرۆک وەزیرێن هەرێما کوردستانێ ئەڤرۆ دوشەمبی 13.11.2017 د کۆنگرەکێ رۆژنامەڤانیدا ل هەولێرێ راگەهاند،کو ڤێ هەیڤێ و هەیڤا داهاتی ژی مووچێ فەرمانبەران یێ ئامادەیە و دێ هێتە دابەشکرن.
ناڤهاتی دەربارەی ڤەکرنا دەروازەیان ژی گوت:ئەز ل گەل بەرپرسێن ئیرانێ ل سەر خەتێمە و وان بەلێن دایە کو سەرجەم دەروازەیان ڤەکەنەڤە،چونکی ڤەکرنا دەروازەیان د بەرژەوەندیا هەردو لایاندایە.
ئەڤرۆ نیوز، ھلوری:
د بەردەوامیا پرۆژێ چاکسازیێ دا، ل سەر گەندەلیێ دو بەرپرسێن بەرێ یێن حوکمەتا ھەرێما کوردستانێ ھاتنە ده‌سته‌سه‌ركرن.
دڤی واری دا “حاکم ئەحمەد ” سەرۆکێ دەستەیا دەستپاکیا ھەرێما کوردستانێ بۆ روداوو گۆت: (ل سەر دوسه‌یا گەندەلیێ کو سال و نیڤە کار ل سەر دھێتەکرن، دوھی رۆژا ئێکشەمبی ھەردو رێڤەبەرێن بازرگانی و سایلویا ھەولێر ب فەرمانا دادوەری ھاتنە گرتن و نھا ل زیندانا محەتا ھەولێرێ دانە).
زێدەتر گۆت: (ھەتا نھا دیارنینە کو ئەو ھەردو رێڤەبەر دێ ھێنە ئازادکرن یان ژی نە، بەلێ نھا ھەردو د ده‌سته‌سه‌ركرينه).
گرتنا ھەردو بەرپرسێن حوکمەتێ د چارچوڤێ بەرنامێ چاکسازیێ بوویە کو پێشتر سەرۆك بارزانی راگەھاند بوو و ھەتا نھا چەندین بەرپرس ھاتینە گرتن و چەندین ڤەکۆلین ژی کار ل سەر دھێتەکرن.
ئەڤرۆ نیوز ، نەوزاد ھلۆری:
وەزارەتا ساخلەمیا عیراقێ دیارکر کو ژ ئەنجامێ ئه‌ردهه‌ژا شەڤا بوری ل عیراقێ 535 کەس بووینە قوربانی ژ وانان ھەشت کەسان گیانێ خوە ژ دەست دایە.
د. سەیف بەدر ئاخفتنکەرێ وەزارەتا ساخلەمیا عیراقێ دیارکر کو ژ ئەنجامێ ئه‌ردهه‌ژا شەڤا بوری 535 کەس بووینە قوربانی ژ وانان ھەشت کەسان گیانێ خوە ژ دەست دایە و ئەوێن دن بریندار بووینە و گۆت: (ھەموو قوربانیێن روودانا ئه‌ردهه‌ژێ ل ھەرێما کوردستانێ بووینە ل پارێزگەھا سلێمانێ و دەربەندیخان و جەلەولا، ھەروەسا 321 کەس ل کوردستانێ بریندار بووینە و 170 کەس ل دیالە و 44 کەس ژی ل کەرکووک).
زێدەتر گۆت: (وەکو وەزارەتا ساخلەمیا عیراقێ ھەموو پێرابوونێن پیدڤی بۆ ساخلەمیا خەلکی گرتینە بەر بۆ ھەر پێدڤی و روودانەکا نەخواستی و دێ ب ھووری سەحا رەوشێ کەین و مە پەیوەندی ل گەل فەرمانگەھێن ساخلەمیێن ھەموو باژێران ھەنە).
ئه‌ڤرۆ نيوز:
بڕياره نێچيرڤان بارزانى سه‌رۆكێ حوكمه‌تا هه‌رێما كوردستانێ ل حه‌فتيا بهێت سه‌ره‌دانا باژێرێ سلێمانێ بكه‌ت.
شه‌فه‌ق نيوز ژ ژێده‌ره‌كى به‌لاڤكريه كو د ماوێ حه‌فتيا بهێت دا نێچيرڤان بارزانى سه‌رۆكێ حوكمه‌تا هه‌رێما كوردستانێ دێ سه‌ره‌دانا پارێزگه‌ها سلێمانيێ كه‌ت و دێ چه‌ند كۆمبوونان ئه‌نجام ده‌ت ب مه‌ره‌ما ئێكرێزيا گۆتارا كوردى به‌رى بچيته به‌غدا.
ئه‌وى ژێده‌رى ئاشكه‌را ژى كريه كو ئه‌وان پارتيێن ئۆپۆزسيۆن وه‌كو گۆڕان و كۆمه‌ل و بزاڤا ئيسلامى پرۆژه‌ك ل دۆر ره‌وشا نوكه يا ناڤخۆ يا هه‌رێما كوردستانێ و ده‌ڤه‌رێن كوردستانى يێن ده‌رڤه‌ى ئيدارا هه‌رێما كوردستانێ ئاماده كريه.
ئه‌ڤى ژێده‌رى خۆيا ژى كريه كو دێ كێشێن هه‌لاويستى يێن ناڤبه‌را عيراق و هه‌رێما كوردستانێ ژى ل گه‌ل ڤان لايه‌نێن سياسى هێنه گه‌نگه‌شه‌كرن.
ئه‌ڤرۆ نيۆز ، نه‌وزاد هلۆرى:
ده‌مه‌ك به‌ری نوكه بیڤه‌له‌رزه‌كا دى به‌نداڤا ده‌ربه‌ندیخان و ده‌ردورا وێ هه‌ژاند و بڤێ یه‌كێ ژى هوشداریه‌ك ژى بو كارمه‌ندێن به‌نداڤا ده‌ربه‌ندیخان دهێنه‌دان.
كه‌نالێ كوردستان 24 ژزارده‌ڤێ كه‌شناسیا هه‌رێما كوردستانێ راگه‌هاند، ئه‌ڤرۆ 13 چریا دوویێ 2017 ل ده‌مژمێر 10:30 دووباره بیڤه‌له‌رزه‌كێ ل به‌نداڤا ده‌ربه‌ندیخان و ده‌ردورا وێ هه‌ژاند.
زێده‌تر گۆت: ( مه ل گه‌ل تیمه‌كا كه‌شناسیێ سه‌ره‌دانا به‌نداڤا ده‌ربه‌ندیخان كریه و ل سه‌ر به‌نداڤێ ئاگه‌هدار بوینه كو بیڤه‌له‌رزه‌كا دى ل به‌نداڤا ده‌ربه‌ندیخان دایه و مه‌ترسیا ته‌قین و دارمانا به‌نداڤێ هه‌یه ، و پێدڤیه به‌نداڤ بهێته چۆلكرن )
ئه‌ڤرۆ نيوز:
سه‌رۆكێ حوكمه‌تا لوبنانى يێ ده‌ست ژ كار كێشايى سه‌عد حه‌ريرى ژ رياز يا پايته‌ختێ سعودى راگه‌هاند كو ئه‌و دێ ڤه‌گه‌ريته لوبنان ب “ده‌مه‌كێ نێزيك” دا كو ده‌ست ژ كار كێشانا خوه پێشكێش بكه‌ت ب گۆره‌ى دستوورێ لوبنانى. سه‌رۆكێ لوبنان ميشال عون راگه‌هاند بوو كو ئه‌و يێ د “كاودانێن نه‌ديار و گرتى دا”.
سه‌عد حه‌ريرى د ديداره‌كا تله‌ڤزيۆنى دا بۆ كه‌نالێ مسته‌قبل يێ نێزيكى هه‌ڤپه‌يمانيا وى يا سياسى ل مالا وى ل رياز رۆژا ئێكشه‌مبى راگه‌هاند كو ئه‌و دێ ڤه‌گه‌ريته لوبنان ب ده‌مه‌كێ نێزيك دا كو كاودانێن دستوورى يێن پێدڤى ئه‌نجام بده‌ت ب ره‌نگه‌كى دا كو ده‌ست ژ كاركێشانا خوه راده‌ستى سه‌رۆك كۆمارێ لوبنان بكه‌ت.
گۆتژى: “من ده‌ست ژ كاركێشانا خوه بۆ به‌رژه‌وه‌ندا لوبنان و لوبنانيان دايه”، ته‌كست ل سه‌ر وێ چه‌ندێ ژى كريه كو ب ده‌ستێن خوه به‌ياننامه نڤيسيه و دا زانين ژى كو ئه‌و ل سعوديێ يێ ئازاده و په‌يوه‌نديێن وى ل گه‌ل سه‌رۆكێ سعوديێ د نايابن.
ئه‌ڤرۆ نيوز:
هێمن ئه‌مين شوانى، رێڤه‌به‌رێ راگه‌هاندنێ ل وه‌زاره‌تا خواندنا بلند و ڤه‌كۆلينێن زانستى راگه‌هاند كو وه‌زاره‌تا وان قوتابيان ئاگه‌هدار دكه‌ت كو پشكا هاريكارى و كه‌لتۆرى ل بالوێزخانا فره‌نسا ل عيراقێ ژماره‌كا كورسيێن خواندنا ماسته‌رێ د وارێن (په‌يوه‌نديێن نێڤده‌وله‌تى، قانوون و زانستێن سياسى) پێشكێشى قوتابيێن هه‌رێما كوردستانێ كرينه.
ئاشكه‌را ژى كر كو هه‌ر كه‌سێ حه‌ز ل سه‌ر ب ده‌ستڤه‌ئينانا ڤان كورسيێن خواندنێ هه‌بيت ل دووڤ ڤان مه‌رجێن ده‌ستنيشانكرى بلا ناڤێن خوه تۆمار بكه‌ن.
پێزانينێن گشتى:
1- دڤێت ئه‌ڤێ حه‌ز ل سه‌ر هه‌يى ده‌رچوويێ سالا خواندنێ يا 2016-2017 بيت يان ژى ئه‌ڤ ساله قوتابيێ قووناغا چارێ بيت.
2- كرێيا پشكداريكرن د كورسێن زمانى دا 180.000 هزار دينارن و ئه‌و دكه‌ڤيته سه‌ر ستوويێ كانديدى. ب رێيا ڤى ئيملێى خوه تۆمار بكه: (cours@institutfrancais-erbil.com)
3- هه‌ر كه‌سێ حه‌ز ل سه‌ر هه‌بيت و هاته كانديدكرن ژ رێكه‌فتى 12ى چريا دويێ يا ئه‌ڤ ساله هه‌تا 5ى كانوونا ئێكێ يا سالا بهێت كورسێ زمانى دێ ل ناڤه‌ندا كه‌لتۆرى ل كونسلخانا گشتى يا فره‌نسا ل هه‌ولێر خوونيت.
4- باشترين كانديدێن كورسێ زمانى يێن ئێكێ دێ بۆ ماوێ شه‌ش هه‌يڤ هه‌تا ساله‌كێ خوونن بۆ ب ده‌ستڤه‌ئينانا ئاستێ (B1) پاشان دێ ل فره‌نسا زمانێ فره‌نسى خوونن بۆ ب ده‌ستڤه‌ئينانا ئاستێ (B2) دێ بۆ پێشكێشكرنا سالا خواندنێ يا 2019 ئاماده بيت.
5- ل كانوونا دويێ يا سالا 2019 ل سه‌ر بنه‌مايێ ئاستێ زمان و رێژه‌يا نمرێن زانكۆيێ، پشكا هاريكاريێن كه‌لتۆرى ل بالوێزخانا فره‌نسا كانديدێن سكولارشيپ ده‌ستنيشان كه‌ن.
6- بۆ ب ده‌ستڤه‌ئينانا پێزانين و هوورده‌كاريێن زێده‌تر و خوه‌تۆماركرن ل كورسێ زمانى، دشيان دايه ژ نوكه يێ حه‌ز ل سه‌ر هه‌بيت په‌يوه‌نديێ ب ناڤه‌ندا كه‌لتۆرى يا قونسلخانا گشتى ل فره‌نسا ل هه‌ولێر بكه‌ن ل بن ڤان ناڤونيشانان: (http://cours.institutfrancais.org.uk) http://www.mhe-krg.org/ku/node/3630
ئه‌ڤرۆ نيوز:
ئاژانسا ئه‌نادۆل يا توركى به‌لاڤكر كو وه‌لاتێ توركيا تيمه‌كێ رزگاركرنێ و پێدڤيێن نوشدارى ب فرۆكه‌يه‌كا له‌شكرى ره‌وانه‌ى هه‌رێما كوردستانێ كر.
ئاژانشا ناڤبرى راگه‌هاند كو د په‌خشێ ئێكسه‌ر يێ كه‌نالێ TV24 دا، ره‌جه‌ب ئاكداغ جێگرێ سه‌رۆك وه‌زيرێن توركيا راگه‌هاند كو ل گه‌ل فه‌رمانگه‌ها ئافاد تيمه‌كا فرياگۆزارى يا 70 كه‌سى ل گه‌ل تيمه‌كا فرياگۆزارى يا نوشدارى يا سه‌ر ب وه‌زاره‌تا ساخله‌ميێ ڤه د چه‌ند ده‌مژمێرێن بهێت دا دێ ب رێيا فرۆكه‌يه‌كا سۆپايێ توركيا ره‌وانه‌ى ده‌ڤه‌رێن زيانڤێكه‌فتى كه‌ن.
ئاكداغ هيڤيا سلامه‌تيێ بۆ خه‌لكێ ده‌ڤه‌رێ خواست و راگه‌هاند كو ئه‌وان ب رێنمايا ببنالى يلدرم ئێكسه‌ر ده‌ست ب ئاماده‌كاريان كريه بۆ گه‌هاندنا هاريكاريێن مرۆڤى بۆ ده‌ڤه‌رێ.
جێگرێ سه‌رۆك وه‌زيرێن توركيا ئاماژه ب وێ چه‌ندێ ژى كريه كو فه‌رمانگه‌ها ئافاد و هه‌يڤا سۆر يا توركى و وه‌زاره‌تا ساخله‌ميێ پێكڤه بۆ ڤێ مه‌ره‌مێ د هه‌ماهه‌نگيێ دانه و راگه‌هاند ژى كو خوه بۆ خرابترين سيناريۆ بۆ هاريكاريێ ئاماده كريه.
ده‌رباره‌ى چاوانيا ڤه‌گوهاستنا هاريكاريان ژى ب رێيا ئاسمانى، ئاكداغ ئاماژه ب وێ چه‌ندێ كر كو د وێ ده‌ربارێ دا د هه‌ماهه‌نگىێ دانه ل گه‌ل وه‌زاره‌تا ژ ده‌رڤه يا توركيا و ئاشكه‌را كر كو تيمه‌ك ب رێيا هشكاتى ژ باژێرێ سلۆپى بۆ گه‌هاندنا چادران بۆ ده‌ڤه‌رێن زيان ڤێكه‌فتين.
راگه‌هاند ژى كو ژ به‌ر ريفراندۆما هه‌رێما كوردستانێ توركيا رێگريێ ل گه‌هاندنا هاريكاريێن مرۆڤى ناكه‌ت.
بينالى يلدرم يێ سه‌رۆك وه‌زيرێن توركيا ژى راگه‌هاند كو ئه‌و ب هه‌موو ره‌نگه‌كى پشته‌ڤانێن خووشك و برايێن خوه يێن لێقه‌ومينه و دێ ب هه‌موو ره‌نگان ژى بزاڤێ كه‌ن كو جهێ ئه‌و كێماسيێن په‌يدابووين پڕ كه‌ن.
يلدرم د به‌ياننامه‌كێ دا ئاشكه‌را كريه كو هه‌ر ئێكسه‌ر پشتى زانينا هه‌بوونا ئه‌ردهه‌ژێ ژ ناخێ دلێ خوه هه‌ست پێكريه و ئێكسه‌ر كار ژ بوو ئاماده‌كرنا تيمه‌كا فرياگۆزارى كريه.
ئه‌ڤرۆنيۆز:
وه‌زيرێ ساخله‌ميێ ل هه‌رێما كوردستانێ هژمارا قوربانيێن بيڤه‌له‌رزا شه‌ڤا بۆرى ئاشكرا دكه‌ت ورادگه‌هينيت، 7 كه‌سان گيانێ خوه ژده‌ستدايه وزێده‌تر ژ 321 كه‌سان ژ ئه‌گه‌رێ ترسێ وبرينداربوونێ يێن گه‌هاندينه نه‌خوه‌شخانان.
رێكه‌وت حه‌مه ره‌شيد وه‌زيرێ ساخله‌ميێ ل هه‌رێما كوردستانێ دداخۆيانيه‌كا رۆژنامه‌ڤانى دا راگه‌هاند، ژئه‌گه‌رێ بيڤه‌له‌رزا شه‌ڤا بۆرى 12/11/2017، هه‌فت كه‌سان گيانێ خوه ژده‌ستدايه.
ل دووڤ وه‌زيرێ ساخله‌ميێ، چار كه‌سان ل قه‌زا ده‌ربه‌نديخان، دو كه‌سان ل گه‌رميان وئێكى ژى ل سلێمانيێ گيانێ خوه ژده‌ستدايه، ئاماژه ب وێ چه‌ندێ ژى كر كو دو ژوان كه‌سێن ل ده‌ربه‌نديخان گيانێ خوه ژ ده‌ستداين ب ره‌گه‌ز عه‌ره‌ب بوون.
ل دۆر برينداران ژى دياركر، 120 كه‌س ژئه‌گه‌رێ ترسێ ئيناينه نه‌خوه‌شخانان، 201 كه‌سێن دى يێن برينداربووين وبرينێن هه‌موويان ژى دسڤكن وچاره‌سه‌ريێن پێدڤى بۆ هاتينه كرن، پتريا وان نه‌خوه‌شخانه يێن بجه هێلاين.
ئه‌ڤرۆ نيوز:
شه‌ڤا بۆرى 12ى چريا دويێ 2017 ئه‌ردهه‌ژه‌كا ب هێز هه‌رچار پارچێن كوردستانێ و چه‌ند وه‌لاتێن دى هه‌ژاندن، ژ ئه‌گه‌رێ وێ چه‌ندێ ژى ل باشورێ كوردستانێ حه‌فت كه‌س و ل رۆژهه‌لات ژى زێده‌ترى 200 كه‌سان گيانێ خوه ژ ده‌ست دان و ب سه‌دان كه‌س ژى بريندار بوون.
ب گۆره‌ى سه‌نته‌رێن جيولۆجى يێن ئه‌مريكا و ئيرانێ ناڤه‌ندا ئه‌ردهه‌ژێ ناڤبه‌را باشوور و رۆژهه‌لاتێ كوردستانێ “هه‌له‌بچه و كرماشان” بوون، هێزا وێ ژى د ناڤبه‌را 7 بۆ 7.6 پله بوو ل دۆر پيڤه‌رێ ريخته‌ر.
ئه‌ردهه‌ژێ هه‌رێم و باكوور و باشوور و رۆژئاڤايێن كوردستانێ ل گه‌ل عيراق و ئيران و سوريا و كوێت و سعوديێ و چه‌ند وه‌لاتێن دى ب خوه ڤه گرتينه.
ب گۆره‌ى سه‌نته‌رێ جيولۆجى يێ ئه‌مريكى ناڤه‌ندا بيڤه‌له‌رزێ باژێرێ هه‌له‌بچه بوو و هێزا وێ 7.5 پله‌يا پيڤه‌رێ ريخته‌ر بوو، ب گۆره‌ى سه‌نته‌رێ ئه‌ردهه‌ژێ ل ئيران ژى ئه‌ردهه‌ژ ب هێزا 7.6 پله‌يا پيڤه‌رێ ريخته‌ر بوو، ناڤه‌ندا سنورێ ئيران و عيراقێ “هه‌رێم و رۆژئاڤايێ كوردستانێ” بوويه و نێزيكترين باژێر ژى لێ ئيزگلى يێ سه‌ر ب كرماشان ڤه بوويه.
ميديايێن راگه‌هاندنا فه‌رمى ل ئيرانێ راگه‌هانديه كو ژ ئه‌گه‌رێ ئه‌ردهه‌ژێ زێده‌ترى 200 كه‌سان ل ده‌ڤه‌رێن سنورى يێن ل گه‌ل عيراقێ گيانێ خوه ژ ده‌ست دايه و ب سه‌دان كه‌س ژى بريندار بووينه.
ب گۆره‌ى ميديايێن ئيرانى ئه‌ردهه‌ژێ پتريا ده‌ڤه‌رێن رۆژهه‌لاتێ كوردستانێ ڤه‌گرتينه و ب گۆره‌ى دووماهى ئامار ل كرماشان 141 كه‌سان گيانێ خوه ژ ده‌ست دايه و 600 كه‌س ژى بريندار بووينه.
به‌رپرسه‌كێ هه‌يڤا سۆر ب ميديايێن ئيرانى راگه‌هانديه كو ل كرماشان هێلێن ئاڤێ و كاره‌بێ هاتينه قه‌تاندن و شه‌ڤا بۆرى خه‌لك چوويه ژ ده‌رڤه ژ ترسا بيڤه‌له‌رزه‌كا دى و ل ژوور نه‌نڤستينه.
هه‌ر ژ ئه‌گه‌رێ ئه‌ردهه‌ژێ ئه‌ڤرۆ ل ئيلام و كرماشان كريه بهێنڤه‌دانا فه‌رمى و شينيا گشتى راگه‌هانديه ئه‌ڤه د ده‌مه‌كى دايه كو ئه‌ڤرۆ ل هه‌له‌بچه و سلێمانيێ ژى بهێنڤه‌دانه.
ده‌رباره‌ى زيانێن هه‌رێما كوردستانێ ژى چار كه‌سان ل ده‌ربه‌نديخان و دو كه‌سان ل گه‌رميان و كه‌سه‌كى ژى سلێمانيێ گيانێ خوه ژ ده‌ست دايه و زێده‌تر ژ 50 كه‌سان ژى ل ده‌ربه‌نديخان بريندار بووينه.
د. رێكه‌وت حه‌مه ره‌شيد وه‌زيرێ ساخله‌ميێ سه‌ره‌رايى پشتراستكرنا ژمارا كه‌سێن گيانێ خوه ژ ده‌ست داين خويا كر كو دو كه‌س ژ وان ب ره‌گه‌ز عه‌ره‌بن و گۆت: “ژ ئه‌گه‌رێ ترس و ئاگه‌هـ ژ خوه نه‌مانێ 321 كه‌س ژى گه‌هاندينه نه‌خۆشخانێن هه‌رێما كوردستانێ”.
نيشاندان