ئه‌ڤرۆنيۆز:
ئەڤرو روژا ئێک شەمبی رێکەفتی ٢٠١٧/١١/١٢ روودانه‌كا ترافيكى دناڤبه‌را دو ترۆمبێلان په‌يدابوو ودو كه‌س برينداربوون.
ل دووڤ سايتێ رێڤه‌به‌ريا هاتنوچوونا پارێزگه‌ها دهۆكێ، ئه‌ڤرۆ سپێدێ ل جادا سەره‌کی یا دناڤبەرا شێخان و کومەلگەها چرە دا، روودانەک ژجۆرێ لێگدان دناڤبەرا دو ترومبێلێن تایبەت ژ جورێن (بی ئم دبلیو و أوپل أومێگا ستێیشن ) روودايه و دئەنجامدا دو کەس بریندار بون زێده‌بارى گه‌هاندنا زيانێن مادى ب هه‌ردو ترۆمبێلان.
ئه‌ڤرۆ نيوز:
نوشدارێ سه‌رپه‌رشتێ كوسره‌ت ره‌سۆل راگه‌هاند كو نوكه ره‌وشا وى به‌ر ب باشيێ چوويه و د ئاخڤيت و چو مه‌ترسى ل سه‌ر ژيانا وى نه‌مايه.
د. دارا به‌كر نوشدارێ سه‌رپه‌رشتێ كوسره‌ت ره‌سۆل د كۆنگره‌كێ رۆژنامه‌ڤانى دا راگه‌هاند كو ره‌وشا جێگرێ ئێكێ يێ سكرتێرێ گشتى يێ ئێكه‌تى نشتيمانى كوردستان يا باشه و يێ ب بن چاڤدێريا هوور و ده‌مژمێر بۆ ده‌مژمێرێ ره‌وشا وى باشتره، “د رۆژێن بهێت دا دێ مزگينيێن باشتر ده‌ينه خه‌لكێ كوردستانێ”.
نوشدارێ سه‌رپه‌رشتێ كوسره‌ت ره‌سۆل ئاشكه‌را ژى كو وه‌كو به‌رى نوكه به‌حس لێ هاتيه كرن نه‌خۆشيا وى يا گرێدايى خووێنبه‌رێن ريڤيكان بوو كو هاتبوونه گرتن و گۆت: “نشته‌رگه‌رى بۆ هاتيه ئه‌نجام دان و چاره‌سه‌رى بۆ هاتيه كرن”.
زێده‌تر گۆت: “نوشدارا وه‌كو نه‌ريته‌كێ نوشدارى 72 ده‌مژمێر بۆ دانابوون، به‌لێ نوكه د ئاخڤيت و به‌رى نوكه ئه‌ز ب خوه ژى يێ ل گه‌ل ئاخفتى و ره‌وشا وى گه‌له‌ك يا باشه”.
د. دارايى ئاشكه‌را ژى كو به‌رى نوكه كوسره‌ت ره‌سۆل ئه‌و نه‌خۆشى نه‌بوويه، به‌لێ تشته‌كێ ئاسايى يه و هه‌موو كه‌س تووشى ڤێ ره‌نگه نه‌خۆشيێ دبن و ژ نشكه‌كێ ڤه دهێت.
ئه‌ڤرۆ نيوز:
هه‌ليكۆپته‌ره‌كا سۆپايێ عيراقێ ل رۆژهه‌لاتێ باژێرێ كوت ل پارێزگه‌ها واست كه‌فته خوار و دو ئه‌فسه‌ر و له‌شكره‌كى گيانێ خوه ژ ده‌ست دا.
ب گۆره‌ى پێزانينێن ده‌سپێكى يێن سه‌رۆكێ لژنا ئه‌منى ل جڤاتا پارێزگه‌ها واست هه‌ليكۆپته‌رێ دو ئه‌فسه‌ر و له‌شكره‌ك تێدا بوون وهه‌ر سێيان دێ وێ روودانێ دا گيانێ خوه ژ ده‌ست دايه.
ساحب جه‌ليباوى، سه‌رۆكێ لژنا ئه‌منى ل جڤاتا پارێزگه‌ها واست بۆ سۆمه‌ريه نيوز راگه‌هاند، هه‌ليكۆپته‌را له‌شكرى ل ده‌ڤه‌را شوێجه يا رۆژهه‌لاتێ باژێرێ كوت تێكشكه‌ستيه، بێ كو ئه‌گه‌رێن په‌يدابوونا روودانێ ديار بكه‌ت.
ئه‌ڤرۆنيۆز:
پارتى هێشتا بريارا دووماهيێ ل دۆر پشكداريێ دهه‌لبژارتنێن داهاتى يێن په‌رله‌مانێ عيراقێ دا نه‌دايه، به‌لێ ناڤێ خوه وه‌كو قه‌واره ل كۆمسيۆنا هه‌لبژارتنان يێ تۆماركرى ومه‌رج ژى بۆ پشكداريێ يێن هه‌ين.
خسرۆ گۆران، به‌رپرسێ ده‌زگه‌هێ هه‌لبژارتێن پارتى ديموكراتى كوردستان، دداخۆيانيه‌كێ دا بۆ رووداو پشكداريا پارتى دهه‌لبژارتنێن عيراقێ دا ب چه‌ند مه‌رجان ڤه گرێدده‌ت ودبێژيت، ئه‌ڤ پرسه گرێداى ره‌وشا مه‌يه ل گه‌ل به‌غدا كا ل مه‌هێن داهاتى دێ چ لێهێت وئه‌و كێشێن رووداين دێ چاوان هێنه چاره‌كرن و هه‌كه هه‌موو تشته‌ك بهێته چاره‌كرن، وى ده‌مى دێ بريار بۆ هێته دان.
ئاشكرا ژى دكه‌ت كو هێشتا پارتى بريار نه‌دايه كا دێ هه‌ڤپه‌يمانيێ ل گه‌ل چ لايه‌ن ل به‌غدا گرێده‌ت وگۆت، هێشتا زوويه بۆ ڤێ چه‌ندێ چونكى ئه‌ڤه گرێداى ئێكرێزيا ناڤمالا كوردى يه.
ئارێز عه‌بدوللا سه‌رۆكێ فراكسيۆنا ئێكه‌تيێ ل په‌رله‌مانێ عيراقێ دبێژيت، ئێكه‌تى دێ پشكدار بيت دهه‌لبژارتنێن په‌رله‌مانێ عيراقێ دا وئاماژێ دده‌ت كوردان وه‌كو جاران پێگه‌هێ خوه ل به‌غدا نه‌مايه.
ل 15 گۆلانا 2018 دێ هه‌لبژارتنێن خۆلا چارێ يا په‌رله‌مانێ عيراقێ هێنه ئه‌نجامدان.
ئەڤرۆ نیۆز،زنار تۆڤی:
ئەڤرۆ شەمبیێ تۆرا كۆمەلایەتی یا (فەیسبووك) ی د پۆستەكێدا،کو ب سەدان ملیۆنان بەشداری تێدا كریە، داخواز ژ خەلكێ جیهانێ كریە،کو بەرێ سپێدەهیا سوبەهی بچنە ژ دەرڤە و تەماشای ئەسمانی بكەن بۆ دیتنا روودانەکا فەلەكی.
(فەیسبووك) ب ناڤونیشانا (دیدارا فەلەكی)، د پۆستێ خۆدا ئەڤ نووچەیە بەلاڤکریە، كو بەرێ سپێدەهیەکا زوو یا سوبەهی د روودانەکا فەلەكی یا کێم وێنەدا، هەردو ستێرێن موشتەری و ڤینۆس ل نێزیکی ئێک دێ د ئەسمانیدا تێپەرن.
د وی نووچەی دا هاتیە كو هەکە سوبەهی،بەری هەلاتنا رۆژێ و د دەمەکێ زوو یێ بەرێ سپێدێ دا بەرێ خۆ بدەنە ئەسمانی،دێ شێی تێپەرینا هەردو ستێران د بۆشایا ئەسمانیدا بینی.
ئه‌ڤرۆ نیوز ، نه‌وزاد هلۆرى:
ئه‌ڤرۆ سوپایێ ئیسرائیلێ فرۆكه‌یه‌كا بێ فروكه‌ڤان یا روسیا ل سنوورێ دناڤبه‌را سوریا و ئیسرائیلێ ئێخست كو مژولێ چاڤدێریكرنا ده‌ڤه‌رێ بوویه ، ئاخفتنكه‌رێ وه‌لاتێ ئیسرائیلێ ژى دیاركر كو ئه‌و دێ ڤه‌كولینێن زێده‌تر ل سه‌ر وێ یه‌كێ كه‌ن كا ئه‌و فروكه بو خزمه‌تا ئیران و حزبولایێ بوویه یان نه.
ده‌زگه‌هێن میدیایێن سه‌ر ب ئیسرائیلێ دیاركر كو سوپایێ ئیسرائیلێ فرۆكه‌یه‌كا بێ فرۆكه‌ڤان یا روسیا ب سیسته‌مێ موشه‌كیێ پاتریوتى ئێخست و فروكه ژى كه‌فتیه بلنداهیێن جولان لسه‌ر سنوورێ دناڤبه‌را ئیسرائیل و سوریا ، به‌لێ هه‌تا نها روسیا ئێخستنا فروكه‌یا وان ژلایێ ئیسرائیلێ پشتراست نه‌كریه. کۆلۆنێل جۆناسان ئاخفتنكه‌رێ فه‌رمیێ ئیسرائیلێ د راگه‌هاندنه‌كێ دا ئاماژه ب سه‌ده‌مێن ئێخستنا فروكه‌یا رووسى دكه‌ت كو ئه‌و ژى مژولێ چاڤدێریكرنێ بوویه و فروكه ب خوه ژ درۆستكرنا رووسى بوویه ، به‌لێ ره‌نگه سه‌ر ب سوریا ڤه بیت و دوپات ژى كر كو ئه‌و دێ دوڤچوونێ لسه‌ر وێ یه‌كێ كه‌ن كا چه‌ند په‌یوه‌ندى ب ئیران و حزبولایێ ڤه هه‌بیت.
ئەڤرۆ نیۆز،زنار تۆڤی:
نوکە حوکمەتا هەرێما کوردستانێ یا هاتیە راسپاردن بۆ ئیدارەدانا هەرێما کوردستانێ،سەرۆكاتیا ئەنجوومەنێ وەزیران دێ ل گەل سەرجەم سەرۆكێن فراكسیۆنێن پەرلەمانێ كوردستانێ کۆمبیت،هەروەسا بریاره ژی کو سەرەدانا حزبان بکەت.
هەروەسا سوبەهی سەرۆكاتیا ئەنجوومەنێ وەزیران دێ ل گەل سەرجەم سەرۆكێن فراكسیۆنێن پەرلەمانێ كوردستانێ كۆمبیت و دێ گوتۆبێژان ل سەر کێشێن دناڤبەرا هەولێر و بەغدا دا کەن،دیساد وێ كۆمبوونێدا دێ بەحس ل پەیوەندیێن دناڤبەرا لایەنێن سیاسی یێن ھەرێما كوردستانێ و رۆلێ پەرلەمانی د چارەسەركرنا كێشان دا هێتە کرن.
راوێژکارێ تایبەت یێ سەرۆک وەزیرێن هەرێما کوردستانێ دلشاد شەهاب ئاشكرا كریە،کو بریارە حوکمه‌ت سەرەدانا حزبان بکەت،هەروەسا هەموو لایەن بێی جیاوازى هەڤرانە ل سەر ئێک دەنگى و ئێکرێزیا لایەنێن سیاسی یێن هەرێما کوردستانێ بۆ بەرهنگاریا ڤێ قۆناغا نوکە کوردستان تێدا دەرباز دبیت،هەروەسا نوکە حوکمەتا هەرێما کوردستانێ هاتیە راسپاردن بۆ ئیدارەدانا هەرێما کوردستانێ د ڤی دۆخیدا،دیسا دڤی چارچۆڤەی دا سەرۆک وەزیرێن هەرێما کوردستانێ سەرەدانا کۆمەلا ئیسلامی کریە و بریارە سەرەدانا حزبێن دی ژی بکەت،ئێک ژ وان لایەنان بریارە کو حوکمەت سەرەدانا وێ بکەت، بزاڤا گۆرانە.
ئەڤرۆ نیۆز،زنار تۆڤی:
كۆنگرێسێ ئه‌مریكی یێ رژدە ل سه‌ر په‌سه‌ندكرنا پرۆژه یاسایه‌كێ كو ئه‌مریكا دێ هاریكاریێن سه‌ربازیى بێی مه‌رج پێشكێشی هێزێن پێشمه‌رگێ كوردستانێ کەت.
مالپه‌رێ (مۆنیتۆر) یێ ئه‌مریكی،بەلاڤە كریە،کو بهایێ هاریكاریێن سه‌ربازی یێن واشنتۆن بۆ پێشمه‌رگه‌ی دگەهیته 365 ملیۆن دۆلاران.
ئاماژه ب هندێ ژی دایە کو ئەڤ پرۆژێ نوو، ریفراندۆم نه‌كریە مه‌رج، كو ل 25 ئیلۆنا 2017 ب سه‌ركەفتیانە برێڤه چوو بوو،هه‌ر چه‌نده پێشتر كۆنگرێسی مه‌رجێ هندێ ل سه‌ر حوکمه‌تا هه‌رێما كوردستانێ دانابوو،کو به‌شداریێ د عێراقەکا ئێکگرتی دا بكەت بۆ هندێ داکو هاریكاریێن سه‌ربازى پێشكێش بكەت.
هه‌روه‌سا جۆن مه‌كین سیناتۆرێ ئه‌مریكی،د رۆژناما (نیویۆرك تایمز) دا گۆتارەک بەلاڤکریە و تێدا نڤێسیە: هەکە ئه‌مریكا دناڤبەرا كورد و میلیشیاتێن شیعی یێن نێزیكی ئیرانێ، بهێنە سه‌رپشك کرن، پێدڤیە كورد بهێنە هه‌لبژارتن.
ئه‌ڤرۆنیوز ، رۆژهات لوقمان:
ژێده‌ره‌كێ ل ناڤ كه‌ركووكێ بۆ ئه‌ڤرۆ نیوز دا دیاركرن : ئاگره‌كێ مه‌زن به‌ربوویه بیره‌كا نه‌فتا كه‌ركوكێ و هه‌تا نها نه‌هاتیه كونترولكرن.
هه‌روه‌سا دیاركر، ل دوله‌كا نێزیكى قزلیار ل سه‌ر رێكا دناڤبه‌را كه‌ى وان و یایجى ل باشورێ كه‌ركوكێ پشتى كو نه‌فته‌كا مه‌زن ده‌ركه‌فتى ئاگر به‌ربوویه بیره‌كا نه‌فتێ و هه‌تا نوكه نه‌هاتیه كونترولكرن.
هه‌روه‌سا دیاركر ژ ئه‌گه‌رێ ئه‌وى ئاگرێ به‌ربوویه بیره‌كا نه‌فتێ ل كه‌ركوكێ زیانه‌كا مه‌زن یا ئابورى و داراى په‌یدابو یه و گوت ژى: پشتى حه‌شدا شه‌عبى هاتیه ناڤا كه‌ركوكێ ئالوزێ زێده‌تر بوونه و به‌رده‌وام رویدانێن ب ڤى ره‌نگى دروست دبن.
ئه‌ڤرۆ نیۆز ، نه‌وزاد هلۆرى:
بریاره سوبه‌هى رێكه‌فتى 12 چریا دوویێ 2017 كۆمبوونه‌كا هه‌ڤپشك دناڤبه‌را حوكمه‌تا هه‌رێما كوردستانێ و په‌رله‌مانێ كوردستانێ بهێته ئه‌نجامدان و تێدا به‌حس ل شاندێ هه‌ڤپشكێ په‌رله‌مان و حوكمه‌تێ بۆ به‌غدا بهێته‌كرن.
به‌هزاد ده‌روێش زێبارى، سه‌رۆكێ فراكسيۆنا ئێكگرتوویا ئیسلامیا كوردستانێ بۆ ئه‌ڤرۆ نیۆز گۆت: ( كۆمبوونا سوباهى يا حوكمه‌تێ و په‌رله‌مانێ دێ ل دۆر پێكئینانا شانده‌كێ هه‌ڤپشك بۆ دانوستاندنان ل گه‌ل به‌غدا بيت).
زێده‌تر گۆت: ( لایه‌نێ په‌رله‌مانێ كوردستانێ د كۆمبوونێ دا بتنێ دێ سه‌رۆكێن فراكسيۆنا كۆمبن ل گه‌ل سه‌رۆكاتیا جڤاتا وه‌زیران ، د كومبوونێ دا دێ دانوستاندن و گوهدارى یا بوچونان هێته كرن ودێ شانده‌كێ هه‌ڤپشك هێته پێكئينان كو پێكدهێت ژ په‌رله‌مانتار و جڤاتا وه‌زیران و شاره‌زا و بسپورێن وارێن دارایى و په‌ترۆلێ و قانوونێ ).
نيشاندان