NO IORG
نووترين نووچه
نووترين نووچه

336

ئەڤرۆ نیۆز،زنار تۆڤی:

حوکمه‌تا به‌غدا یا به‌رده‌وامه‌ ل سەر‌ فشار خستنێ ل سەر هه‌رێما كوردستانێ و گه‌مارۆدانێ وه‌ك سزایه‌ك ل ‌به‌رامبه‌ر ئه‌نجامدانا ریفراندۆما‌ سه‌ركه‌فتی ل 25 ئیلۆنا 2017، دڤی چارچۆڤەی دا په‌رله‌مانتارەکێ سه‌ر ب ئیئتیلافا ده‌وڵەتا یاسایێ ڤە رادگه‌هینیت،کو عه‌بادى ل بەرە 40 بالیۆزان ب گوهۆریت كو‌ زۆربەیا وان ژی كوردن.

په‌رله‌مانتار (تاها دیفاعى)، ژ‌ فراكسیۆنا ئیئتیلافا ده‌ولە‌تا یاسا،راگه‌هاندیە:مە ل گه‌ل لیژنا په‌یوه‌ندیێن ده‌رڤە ل ئه‌نجومه‌نێ نوونه‌رێن عێراقێ، گفتوگو ل سەر دۆسەیا بالیۆزان كریە،چونکی ئەڤ لیژنه‌‌ به‌رپرسیارا چاڤدێریكرنا باڵیۆزخانا و وه‌زاره‌تا ده‌رڤە یە.

هەروسا ئاشكرا كریە،کو حه‌یده‌ر عه‌بادى، سه‌رۆك وه‌زیرێن عێراقێ،ل بەره‌ 40 بالیۆزان ب گوهۆریت، کو زۆربەیا وان ژی ژ‌ نه‌ته‌وا كوردن. گوت ژی:قۆناغەکا نوو ل ‌به‌رده‌م وه‌زاره‌تا ده‌رڤە‌دایه‌ و عه‌بادى ده‌ست ب ‌هه‌لسه‌نگاندنا كارێن ڤێ وه‌زاره‌تێ‌ دکەت،دیسا دێ هژماره‌کا بالیۆزێن نوو ژی دامه‌زرینیت.

205

ئه‌ڤرۆ نیوز:
سوپایێ رژێما سووریێ ب هه‌ڤكارییا هه‌ڤپه‌یمانێن خوه‌ حزبوللایا لبنانی و حه‌شدا شه‌عبی یا ئیراقی و ملیشیایێن ئیرانی و هێزێن ئه‌سمانی یێن رۆسیا داوی باژاركێ وی وه‌لاتی ژ داعشێ پاقژ كر.
فه‌رمانداره‌كێ سوپایێ رژێما سوورێ راگه‌هاند: سوپایێ سووریێ باژاركێ بوكه‌مال یێ هه‌ڤسنۆر د گه‌ل ئیراقێ دا ل پارێزگه‌ها دێره‌زوورێ كۆنترۆل كر.

236

ئه‌ڤرۆ نیوز:
جڤاتا پارێزگه‌ها كه‌ربه‌لا راگه‌هاند: د ده‌مێ یازده‌ رۆژێن بووری دا 13 ملیۆن شیعه‌مه‌زهه‌بان سه‌ره‌دانا كه‌ربه‌لا و مه‌زارێ ئیمام وحسێن ل وی باژاری كرییه‌ و د ده‌مه‌كی دا مه‌راسیمێن ئه‌ربه‌عینێ دهێنه‌ سازكرن، پتری دو ملیۆن ژ وان سه‌ره‌دانكه‌ران ئیرانی بوون.

karbala (2)

karbala (3)

karbala (4)

karbala 7

karbala6

karbala9

kar

175

ئه‌ڤرۆ نیوز:
ملیشیایێن حه‌شدا شه‌عبی پشتی ده‌ڤه‌را قائم ل ئیراقێ یا هه‌ڤسنۆر د گه‌ل سووریێ كۆنترۆلكری، چوونه‌ د ناڤ ئاخا سووریێ دا و ژ ئالیێ رۆژهه‌لات ڤه‌ باژارێ بوكه‌مال یێ سووری دۆرپێچكر.
روانگه‌ها سووری یا مافێن مرۆڤی راگه‌هاند: حه‌شدا شه‌عبی یا ئیراقی چوویه‌ ناڤ ئاخا سووریێ و ل بن سیبه‌را فه‌رماندارییا سوپایێ رژێما سووریێ ئۆپه‌راسیۆنان دكه‌ت ب مه‌ره‌ما كۆنترۆلكرنا باژارێ بو كه‌مال یێ سووری ژ داعشێ كو هێشتا سوپایێ رژێمێ نه‌شیایه‌ بگه‌هیتێ.

2592

ئەڤرۆ نیۆز،زنار تۆڤی:

بریارە پشتی تەمامبوونا دابه‌شكرنا مووچێ فەرمانبەران،حوکمه‌تا هه‌رێما كوردستانێ دێ مووچێ خانەنشینان دابەش کەت.

وەسا بریارە پشتی تەمامبوونا دابەشکرنا مووچێ مانگا 8 یێ فەرمانبەران،کو بریاره‌ ل 15 ڤێ مانگێ ب دوماهی بهێت،دێ مووچێ خانەنشینێن مەدەنی و سەربازی هێتە دابەشکرن.

حازم تەحسین،رێڤەبەری گشتی یێ خانەنشینان بۆ باس دیارکریە:کو خشتێ مووچەی پەیوەندی ب وەزارەتا دارایی ڤە‌ هەیە، بەلێ رەنگە پشتی تەمامبوونا مووچێ فەرمانبەران، مووچێ خانه‌نشینان بهێتە دابه‌ش کرن.

وەزارەتا دارایی خشتێ مووچێ هەموو وەزارەت و فەرمانگەهان راگەهاندیە،کو تا رۆژا 15/ 11/ 2017 دێ بەردەوام بیت.

162

ئەڤرۆ نیۆز،زنار تۆڤی:

به‌رێز حه‌یده‌ر عه‌بادى سه‌رۆك وه‌زیرێن عێراقا فیدرال د‌ كۆنفرانسێ ڕۆژنامه‌ڤانیێ حه‌فتانه‌دا،ل‌ به‌روارا 7/11/2017 چه‌ند بابه‌تەکێن په‌یوه‌ست ب‌ هه‌رێما كوردستانێ خستنه‌ روو، ئه‌نجومه‌نێ وه‌زیرێن هه‌رێما كوردستانێ،سەرەرای هندێ دووپات دکەت‌ كو خوازیاره‌ دوور ژ ‌بەرسڤ و بەرسڤدانا میدیایى، ل سه‌ر مێزا گفتوگۆیێ كێشان چاره‌سه‌ر بكەت، ب پێدڤی زانى وه‌لاما چه‌ند لایه‌نەکێن‌ ئاخفتنێن وی بده‌ت:

1- سه‌باره‌ت ب‌ دابینكرنا مووچێ مووچه‌خۆرێن هه‌رێما كوردستانێ جارەکا دی‌ حوکمه‌تا هه‌رێما كوردستانێ پێشوازیێ ل وێ ده‌سپێشخه‌رییا به‌رێز سه‌رۆك وه‌زیران عه‌بادى دکەت بۆ دابینكرنا بودجهی‌ ژ‌لایێ حوکمه‌تا فیدرالی ‌ڤه‌‌.

2- به‌رێز عه‌بادى ب‌ گومانڤه‌ بەحسێ هژمارا مووچه‌خۆرێن هه‌رێما كوردستانێ كر، دووپات د‌كه‌ینه‌ڤه‌ كو ئەم د‌ ئاماده‌ینە ته‌ماما داتا و زانیاریێن پشتبه‌ستی ب تۆمارا سیسته‌مێ بایۆمه‌ترى بۆ مووچه‌خۆرێن هه‌رێما كوردستان بخه‌ینه‌ بەرچاڤ،بۆ لیژنه‌کا تایبه‌تمه‌ند یا حوکمه‌تا فیدرالی بۆ هووربینیکرنێ.

3- داخوازێ ژ به‌رێز حه‌یده‌ر عه‌بادى د‌كه‌ین ل چارچۆڤێ وان ده‌ستهەلاتێن کو ئه‌نجومه‌نێ وه‌زیرێن فیدرالی پێداین‌، پێداچوونه‌کا پێدڤی ب خشتێ تایبه‌ت یێ هاتیە‌ ته‌رخانكرن بۆ مووچه‌خۆرێن هه‌رێما كوردستانێ بكەت،کو ب تنێ‌ گۆژمێ (334) ملیار دینارێن مانگانه‌ بۆ سه‌رجه‌م مووچه‌خۆرێن هه‌رێما كوردستانێ ته‌رخان كرینە‌،د دەمەکێ دا‌ گۆژمێ پارێ پێدڤی بۆ مووچێ ئێك مانگ یێ مووچه‌خۆرێن هه‌رێما كوردستانێ دگەهیتە‌ (897) ملیار و (500) ملیۆن دیناران، واته‌ ب جیاوازیا (563) ملیار و (500) ملیۆن دیناران.

4- سه‌باره‌ت ب پێشمه‌رگه‌ی، هیچ بره‌ پاره‌یەکێ دیارکری ل‌ خشتێن هەڤپێچیێ ره‌شنڤیسێ بودجێ فیدرالی نه‌هاتیه‌، به‌لکی ب ده‌قەكێ نەروون رێژه‌یه‌ك ژ ته‌رخانكریێن هێزێن هشکانی یێن وه‌زاره‌تا به‌رگریێ بۆ هاتیە ته‌رخان کرن‌، ئه‌ڤه‌ د دەمەکێ دایە کو مە چاڤەرێی هندێ دكر،کوو ستایشا ڕۆل و قوربانیێن پێشمه‌رگەی‌ بكەت،کو مل ب ملێ هێزێن دیەر یێن عێراقێ روو ب روو تیرۆرێ بووینە‌ و ب گه‌واهیا خودێ به‌رێز سه‌رۆك وه‌زیرێن عێراقێ و هەڤپه‌یمانێن نێڤده‌ولە‌تى ل دژى تیرۆرێ پێشمه‌رگەی‌ ڕۆلێ كاریگه‌ر ل شكست پێئینانا تیرۆرێ دا هه‌بوویه و هه‌یه‌‌.

5- ده‌رباره‌ى ب رێڤەبرنا كه‌رتێ نه‌فت و گازێ ل هه‌رێما كوردستانێ و ئه‌و گومانێن كه‌ به‌ڕێز حه‌یدر عه‌بادى خستینە بەرچاڤ، سه‌باره‌ت ب‌ شه‌فافیه‌تێ ژ به‌رهه‌م ئینان و هنارده‌كرنا نه‌فتێدا، حوکمه‌تا هه‌رێما كوردستانێ ل‌ سالا 2016 گرێبه‌ست ل ‌گه‌ل باشترین دو كۆمپانیێن هووردبینی یێن جیهانێ ئیمزا كرینه‌ بۆ هووردبینیەکا سه‌ربه‌خۆ یا ته‌ماما داهاتی و خه‌رجى و پرسێن نه‌فت و گازێ ل هه‌رێما كوردستانێ ل سه‌ره‌تایا ده‌سپێكرنا چالاكیێن نه‌فت و گازێ‌ ل هه‌رێما كوردستانێ، پڕۆسا هووردبینیێ‌ زۆر ب‌ باشى برێڤە دچیت و دێ یا به‌رده‌وام بیت،حوکمه‌تا هه‌رێما كوردستانێ ئاماده‌یه‌ راپۆرتێن وێ هووردبینییێ بۆ وەلاتیان و حوکمه‌تا فیدرالی ژی ئاشكرا بكەت.

6- سه‌باره‌ت ب‌ راده‌ستكرنا نه‌فتا هه‌رێما كوردستانێ بۆ حوکمه‌تا فیدرال، دووپات دكه‌ین كو‌ پێدڤیە ئه‌ڤ پرۆسە‌ د‌ چارچۆڤێ دستووریدا بهێتە ئه‌نجامدان و گه‌ره‌نتیا شایستهیێن‌ دارایی یێن هه‌رێما كوردستانێ بهێتە کرن،ل‌ به‌رامبه‌ر كۆمپانیایێن جیهانی یێن به‌رهه‌مهێنه‌رێن نه‌فتێ ل هه‌رێما كوردستانێ ل دووڤ وان گرێبه‌ستێن د چارچۆڤێ یاسایێدا هاتینە ئیمزاکرن، كو‌ ل ماددێ ئێکێ یێ ره‌شنڤیسێ بودجێ عێراقێ بۆ سالا 2018 هه‌رێما كوردستانێ هاتیە پابه‌ند كرن‌ ب هناردتنا (250) هزار به‌رمیلێن نه‌فتێ بێی کو هیچ ته‌رخانكرنەک هه‌بیت بۆ شایستێن دارایی یێن كۆمپانیێن نه‌فتێ د دمەکێ دا‌ زێدەتر ژ (16) تریلیۆن دیناران بۆ وه‌زاره‌تا نه‌فتا عێراقێ هاینە ته‌رخان كرن.

7- به‌رێز حه‌یده‌ر عه‌بادى ب گومانڤە پرسیار دکەت ئەرێ پارێ فرۆشتنا (550) هزار به‌رمیلێن نەفتا مانگا ئۆكتۆبەرا 2017 چو لێهاتیه‌؟،دڤی باری دا وه‌زاره‌تا سامانێن‌ سروشتی یا حوکمه‌تا هه‌رێما كوردستانێ ئه‌ڤرۆ د راگه‌هاندنەکێدا، نە راستیا وان زانیارییان خستە بەرچاڤ،داهاتیێ راسته‌قینه‌ یێ وێ مانگێ بۆ دابه‌شكرنا مووچێ مانگا ئابا 2017 هاتیە خه‌رج كرن.

8- سه‌باره‌ت ب‌ بریارا وەیا به‌رێز بۆ دابینكرنا نه‌فتا خاڤ بۆ پالاوگه‌هێن هه‌رێما كوردستانێ، پێشوازیێ ل ڤێ ده‌سپێشخه‌ریێ د‌كه‌ین،بەلێ تا نوکە نەفتا خاڤ ژ حوکمەتا فیدرالی نەگەهشتیە پالاوگەهێن هه‌رێما كوردستانێ.

9- سه‌باره‌ت ب به‌رگریكرنێ به‌رێز حه‌یده‌ر عه‌بادى ژ كێمكرنا پشكا هه‌رێما كوردستانێ ژ بودجێ فیدالی بۆ 12,6%، ژ بلی هندێ جهێ نیگه‌رانیا هه‌رێا كوردستانێ یە‌، هیچ بنه‌مایه‌كێ دستووری ژی نینه‌، چونكی‌ تا نوکە سه‌رژمێریا ئاکنجیبوویان نەهاتیەکرن، ده‌ستنیشانكرنا رێژا 17% ب‌ رێككه‌فتنا هه‌ردو حوکمه‌تان بوویه، هه‌ر چه‌نده‌ هیچ سالەکێ هه‌رێما كوردستانێ ب‌ كریار رێژا 17% وه‌رنه‌گرتیه‌ ب ئەگەرێ بلندبوونا سالانە یا خه‌رجیێن‌ سیادیی كو‌ هه‌رێما كوردستانێ ژێ بێبه‌ش بوویە‌‌، ئه‌ڤە سەرەرای‌ زێدەبوونا دانیشتوانێن هه‌رێما كوردستانێ ب‌ ڕێژا 30% ب ئەگەرێ هاتنە زێدەتر پ (1,5) ملیۆن ئاوارێن پارێزگەهێن عێراقێ و په‌نابه‌رێن سووریێ كو ژ‌ هه‌موو خزمه‌تگوزارییێن (ساخلەمی، په‌روه‌ده‌یى، ئاسایش، كاره‌با، ئاڤا پاقژ و نیشته‌جێبوونێ) مفادار بووینە،سەرەرای سنووردارکرن و خرابیا بارێ ئابووری یێ هه‌رێما كوردستانێ.

ئه‌نجومه‌نێ وه‌زیرێن هه‌رێما كوردستانێ

8/11/2017

186

ئەڤرۆ نیۆز،زنار تۆڤی:

حوکمه‌تا توركیا ب‌ هەڤبه‌شی ل ‌گه‌ل ئیرانێ،د خۆ ئاماده‌كرنێدانە بۆ هندێ کو ئۆپه‌راسیۆنەکا مەزن یا سه‌ربازی بۆ سه‌ر قه‌ندیلی ل‌ دژی په‌كه‌كێ‌ ئه‌نجام بده‌ن.
عه‌بدولقادر سه‌لفی کو رۆژنامەنڤیسێ ره‌جه‌ب ته‌ییب ئه‌ردۆگانێ سه‌رۆك كۆمارێ توركیا دهێتە دانان،د گۆتارا خۆ یا ئەڤرۆدا ل رۆژناما (حوریه‌ت) ئاشكرا كریه‌ کو توركیا و ئیران پێکڤە دێ ئۆپه‌راسیۆنەکا مەزن بۆ سه‌ر قه‌ندیلی ئه‌نجام ده‌‌ن.

هەروەسا سه‌لفی دبێژیت،من پرسیار ژ‌ ئه‌ردۆگانی کریە،دێ‌ كه‌نگی ئۆپه‌راسیۆنا قه‌ندیلی ده‌ست پێکە‌ن؟،د بەرسڤدا ئه‌ردۆگانی گوتیێ،ئەم ل گه‌ل ئیرانێدا هەڤ فكرین بۆ ئه‌نجامدانا ئۆپه‌راسیۆنەکا مەزن بۆ سه‌ر قه‌ندیلی، هه‌روه‌سا نوکە هه‌ردو وەلات ئاماده‌كاریان د‌كه‌ن.

وی نڤێسەری دەمێ وێ ئۆپه‌راسیۆنێ ئاشكرا نه‌كریه‌، به‌لێ وه‌كو ئەو ئاماژێ بۆ دکەت،کو ئه‌ردۆگانی گوتیێ ل شه‌ڤەکێ ئەم دێ ب سه‌ردا گرین.

دیسا رۆژناما (ها‌به‌ر تورك) ژی ل ‌سه‌ر هه‌مان بابه‌ت نووچەیەک بەلاڤکریه و ئاشكرا كریه‌،کو توركیا و ئیران رێككه‌فتنا دوماهیێ كریه‌ بۆ ئه‌نجامدانا ئۆپه‌راسیۆنەکا مەزن یا سه‌ربازی بۆ سه‌ر قه‌ندیلی،هەروەسا ب تنێ ئەو چاڤەرێی دەمەکێ گونجاینە بۆ جێبه‌جێكرنێ.

779

ئه‌ڤرۆ نیۆز، نه‌وزاد هلۆرى:

ئه‌ڤرۆ سه‌رۆكاتیا په‌رله‌مانێ كوردستانێ ل گه‌ل سه‌رۆكێن فراكسيۆنان كۆمبو، دانوستاندن ل سه‌ر كارێن داهاتى يێن په‌رله‌مانێ كوردستانێ و روونشتنێن وان و ئه‌و قانوون و بریارێن كو پێدڤیه‌ ل په‌رله‌مانى بهێنه‌ ده‌ركرن، هاتنه‌ به‌حسكرن ب تایبه‌تى ئه‌وان بابه‌تێن كو پێدڤیه‌ ل سه‌ر ره‌وشا نوكه‌ يا هه‌رێما كوردستانێ و رۆلێ ده‌زگه‌هێن ده‌ستوری يێن هه‌رێمێ.دڤى ده‌ربارى دا هه‌شت خال ده‌ركرن.

 1- دپێناڤى چاره كرنا ئاریشه‌ و ئالۆزى و نه‌هێلانا وان ئاسته‌نك و بزاڤێن لایه‌نێن سیاسى بۆ ئاشتیا جڤاكى و سیاسى ، ب گرنگ دهێته ‌زانین كو ئێكرێزى و ئێك گۆتارى یا ناڤخوه‌ ل هه‌رێما كوردستانێ وعیراقێ وده‌ڤه‌رێ دڤێ قۆناغێ دا یا كو گه‌لێ مه‌ تێدا دبۆریت بهێته‌كرن، داخوازێ دكه‌ین بله‌ز كار بهێته‌كرن بۆ ڤان مه‌ره‌مان.

 2- په‌رله‌مان و حوكمه‌ت هه‌ڤكارى و هه‌ماهه‌نگێن ته‌مام یێن هه‌ڤدو بن ، هه‌روه‌سا دوپاتى ل چالاكبوونا لژنێن په‌رله‌مانى و كارێ چاڤدێرى و دووڤچوونێ و هه‌موو پێرابوونێن قانونى كو دپێدڤى بن بۆ ب هێزكرنا ده‌زگه‌هان و زێده‌تر خزمه‌تا هه‌موو ته‌خ و چینێن هه‌رێما كوردستانێ بكه‌ن.

 3- په‌رله‌مانێ كوردستانێ دوپاتى ل وێ یه‌كێ دكه‌ت كو ده‌زگه‌هێن ده‌ستووری يێن هه‌رێما كوردستانێ د چارچۆڤێ ده‌ستوورێ عیراقێ دا به‌رهه‌ڤیان نیشا بده‌ت بۆ دانوستاندنێ و چاره‌كرنا ئاریشێن ل گه‌ل به‌غدا  بۆ ڤێ مه‌ره‌مێ دڤێت ب زووترین ده‌م ژڤانێ دانوستاندنان بهێـته‌ دیاركرن و دڤێ ناڤبه‌رێ دا داخوازێ ژجڤاكێ نێڤده‌وله‌تى دكه‌ین كو هاریكاریێن رژد بكه‌ن ژبه‌ركو مانا ره‌وشێ ب ڤى ره‌نگى دێ ره‌وشا ژین و ژیارا وه‌لاتیێن كوردستانێ و ده‌ڤه‌رێن ناكۆكى ل سه‌ر تێكده‌ت ، و ب پشتراستى ڤه‌ دده‌ین دیاركرن كو چو بنپێكرنێن ده‌ستوورى ژلایێ هه‌رێمێ نه‌هاتینه‌كرن، به‌روڤاژى دهه‌موو راگه‌هاندن و داخۆيانيێن فه‌رمى دا پێگیریا خوه‌ ب قانوونێ وده‌ستوورێ عیراقێ ب رۆهنى ئاماژه‌ پێ هاتیه‌كرن.

 4- دوپات دكه‌ین كو شاندێ هه‌رێما كوردستانێ ب مه‌ره‌ما دانوستاندنێ دێ چیته‌ به‌غدا، پاكێچه‌كا قانوونى و دارایى دێ به‌رهه‌ڤ كه‌ت، بۆ ڤێ مه‌ره‌مێ ژى په‌رله‌مانێ كوردستانێ ب فه‌رمى نوونه‌رێ خوه‌ بۆ ‌وان به‌رهه‌ڤیان كو ژ كه‌سانێن بسپۆر و شاره‌زا دیاركرینه‌ و هه‌ماهه‌نگیه‌كا ته‌مام ل گه‌ل حوكمه‌تا هه‌رێما كوردستانێ دكه‌ین ، دڤێت بزاڤ بهێنه‌ خورتكرن بۆ دانوستاندنێن بله‌ز تایبه‌ت ل دۆر قوتێ خه‌لكێ كوردستانێ دچارچۆڤێ سیسته‌مێ بایومه‌ترى بۆ دانوستاندنێن دناڤبه‌را هه‌ردوولا و كار پێ بهێته‌كرن و رێژا 17% شایسته‌یێن دارايی يێن هه‌رێما كوردستانێ ژى بپارێزیت.

 5- بۆ وه‌رزێ نوو یێ په‌رله‌مانى، بریارهاتیه‌ دان كو هه‌موو ئه‌و قانوون و پرۆژێن كو دگرنگن و پێدڤیێن نوكه‌نه‌ بێخنه‌ به‌ر كارێ په‌رله‌مانێ كوردستانێ و ب به‌رچاڤكرنا وان قانونێن كو ره‌هه‌ندێن نیشتمانى هه‌یه‌ و كار ب پرنسيبێ ته‌وافوقێ بهێته‌كرن.

 6- كۆمبوونێ بریار دا كو ژبۆ دووڤچوونێن مه‌يدانى و به‌رهه‌ڤكرنا راپۆرتێن گشتگیر ل سه‌ر هه‌موو ‌وان روودانێن ب سه‌ر ده‌ڤه‌رێن ناكۆكى ل سه‌ر هه‌ى هاتین  و لژنه‌كا دووڤچوونێ ژچار لیژنێن په‌رله‌مانى ئه‌وژى لژنێن ده‌ڤه‌رێن كوردستانی يێن ده‌رڤه‌ی ئيدارا هه‌رێما كوردستانێ، پێشمه‌رگه،‌ ناڤخوه‌ و مافێ مرۆڤ. بهێته‌ پێكئینان ب مه‌ره‌ما به‌رهه‌ڤكرنا راپۆرته‌كا مه‌یدانى بۆ په‌رله‌مانێ كوردستانێ.

 7- بریارهاته‌دان بله‌ز روونشتنه‌كا هه‌ڤپشك ژ فراكسيۆنێن كوردستانی ل په‌رله‌مانێ په‌رله‌مانێ عیراقێ و په‌رله‌مانێ كوردستانێ ب رێڤه‌بچیت بۆ گه‌هشتن ب بوچونێن هه‌ڤپشك.

 8  په‌رله‌مانێ كوردستانێ دووپاتيێ دكه‌ت كو پێدڤيه‌ يێ ئاگه‌هداربيت ل سه‌ر هه‌موو پێرابوون و دانوستاندن و ده‌رئه‌نجامان و راوێژێن به‌رده‌وام دناڤبه‌را حوكمه‌تێ و په‌رله‌مانى بهێنه‌ ده‌سته‌به‌ركرن.

383

ئه‌ڤرۆنيۆز:

وه‌زاره‌تا سامانێن سروشتى ل هه‌رێما كوردستانێ مه‌نده‌هوشيا خوه دياركر‌ ژ داخۆيانيێن سه‌رۆك وه‌زيرێن عيراقێ حه‌يده‌ر عه‌بادى سه‌باره‌ت مه‌زاختنا مووچێن فه‌رمانبه‌رێن هه‌ريمێ ودبێژيت، ئايا به‌غدا يا به‌رهه‌ڤه‌ بۆ ڤێ چه‌ندێ؟

وه‌زاره‌تا سامانێن سروشتى دبه‌رپه‌رێ خوه‌دا ل سه‌ر تويته‌رى دبێژيت( ل ده‌مێ حوكمه‌تا هه‌رێما كوردستانێ به‌رهه‌ڤيا خوه‌ دياردكه‌ت بۆ هنارتنا هه‌موو ليستێن فه‌رمانبه‌رێن هه‌رێمێ ب رێيا سيسته‌مێ بايۆمه‌ترى، به‌لێ پرسيار ژ عه‌بادى دكه‌ت ل دۆر رادێ به‌رهه‌ڤيا وى بۆهنارتنا مووچێن فه‌رمانبه‌ران ب دروستى).

عه‌بادى دوهى دكونگره‌كێ رۆژنامه‌ڤانى دا گۆتبوو كو هژمارا فه‌رمانبه‌رێن هه‌رێما كوردستانێ ددروست نينن ودێ پرۆسا هووربينيكرنێ بۆ كه‌ين.

وه‌زاره‌تا سامانێن سروشتى به‌حسێ حه‌زا به‌غدا بۆ كونترۆلكرنا په‌ترۆلا هه‌رێما كوردستانێ كر، به‌لێ گۆت ژى كو ئه‌و ل دووڤ هه‌ردو مادێن 115 و 121 ژ ده‌ستوورێ عيراقێ كاردكه‌ت، به‌لێ گرنگه‌ و كارپێكرن پتر دێ بۆ قانوونێن هه‌رێما كوردستانێ بيت دهه‌ر تشته‌كێ به‌حس لێ نه‌هاتيه‌ كرن دتايبه‌تمه‌نديێن ڤه‌بر يێن ده‌ستهه‌لاتێن فيدرالى دمادا 110 دا ئه‌وا ب چو شێوه‌كێ به‌حسێ شێوازێن ب رێڤه‌برنا كه‌رتێ په‌ترۆلێ ناكه‌ت.

وه‌زاره‌تا ناڤبرى دبه‌رسڤا خوه‌ دا ل سه‌ر عه‌بادى پرسياركر( ئايا دێ به‌غدا مافێن كۆمپانيێن په‌ترۆلێ يێن نێڤده‌وله‌تى ل هه‌رێما كوردستانێ ده‌ت د به‌رهه‌مئينانا په‌ترۆلێ دا؟ وهه‌كه‌ نه‌ده‌ت، ئايا به‌غدا دێ  دوێ باوه‌ريێ دا بيت كو ئه‌و كۆمپانيه‌  دێ ل سه‌ر به‌رهه‌مئينانا په‌ترۆلا خام ب هه‌روه‌ دبه‌رده‌وام بن؟).

ل دووماهيێ گۆت( حوكمه‌تا هه‌رێما كوردستانێ ل گه‌ل بكرێن په‌ترۆلێ يا رێككه‌فتى ل سه‌ر كرينا پێشوه‌خت  وبۆ ده‌مێ چه‌ندين سالێن داهاتى، ئايا به‌غدا هزر دكارڤه‌دانێن قانوونى ل سه‌ر ڤێ چه‌ندێ كريه‌؟).

 

122

ئه‌ڤرۆنيۆز:

ئه‌ندامێ جڤاتا پارێزگه‌ها ديالا، عومه‌ر ئه‌لكروى، راگه‌هاند، ميليشيێن حه‌شدا شه‌عبى رێ ل زڤرينا ئاوارێن سونه‌ بۆ جه‌له‌ولا دگريت و مه‌ره‌م ژێ ئه‌نجامدانا گوهۆرينا ديموگرافيه‌ ل وێ ده‌ڤه‌رێ.

 دداخۆيانيه‌كا رۆژنامه‌ڤانى دا گۆت( ئه‌وا ل هه‌ردو تاخێن ته‌جنيد و وه‌حده‌ ل جه‌له‌ولا رووداى ئه‌وژى رێگرتن ل زڤرينا ب هزاران وه‌لاتيێن سونه‌ بۆ مالێن خوه‌، كاره‌سات وتاوانه‌كا دژى مرۆڤايه‌تيێ و ئاشتيا جڤاكى و داگيرانێ ناكه‌ين ژ مافێن وان يێن قانوونى).

 ديسا داخوازكر لژنه‌كا ڤه‌كۆلينێ بهێته‌ پێكئينان ل دۆر مه‌زنترين كريارا گوهۆرينا ديموگرافى ل ديرۆكا عيراقێ كو ل جه‌له‌ولا رووداى وداخواز ژ رێكخراوێن نێڤده‌وله‌تى كر زۆرداريا ميليشيێن حه‌شدا شه‌عبى دژى ئاوارێن سونه‌ دكه‌ت تۆماربكه‌ن.

نيشاندان1...1,0002,0001,7851,7861,7872,780...3,101زێده‌تر لاپه‌ر 1,786 ژ 3,101
مالپه‌رێ فه‌رمى یێ رۆژناما ئه‌ڤرۆ یه‌ .
ئاگــــــه‌هــــــداری نـــــوویـــــــاتیـــــــان ببــــه‌ .
په‌یوه‌ندی : rojnameyaevro@gmail.com
website security
© Copyright 2021 - Rojnameya Evro - Powered by Kurdo Plus
77 queries in 0.812 seconds.
WP Facebook Auto Publish Powered By : XYZScripts.com